ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܰܒܚܘ̣ܒܶܗ ܫܰܠ̣ܗܶܒ ܠܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ: ܘܰܫܒ̣ܰܩ ܟܽܠ ܡܶܕܶܡ ܘܰܪܗ̣ܶܛ ܒܳܬܪܶܗ ܘܰܒܚܰܝܠܳܐ ܕܩܰܒ̣ܶܠ ܡ̣ܶܢܗ ܒܣ̣ܰܪ ܘܰܐܩ̣ܠܝ̣ ܘܰܐܡ̣ܣܰܪ ܥܰܠ ܫܶܢܕ̈ܶܐ ܘܰܣܪ̈ܳܩܶܐ ܘܢܶܓ̈ܕܶܐ ܕܪ̈ܳܕܘ̣ܦܶܐ ܛܪ̈ܘ̣ܢܶܐ ܘܰܒܚܘ̣ܡܣܳܢܶܗ ܙܳܟܘ̣ܬܳܐ ܥܰܠ ܣܳܛܳܢܳܐ ܘܚܰܝ̈ܠܰܘܳܬܶܗ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ ܫܩ̣ܰܠ: ܘܰܟܠܝ̣ܠܳܐ ܕܠܳܐ ܚܳܡܶܐ ܒܰܠܒܝ̣ܒܘ̣ܬ ܬܰܪܥܝ̣ܬܶܗ ܩ̣ܛܰܪ: ܘܗܳܐ ܢܳܨܰܚ ܝܰܘܡܳܐ ܕܕܘ̣ܟܪܳܢܶܗ ܒܟܽܠ ܦܶܢܝ̈ܳܢ ܘܰܒܥܺܕ̈ܳܬܳܐ ܘܕܰܝܪ̈ܳܬܳܐ ܡܶܬܩܰܠܰܣ ܟܘ̣ܠܳܠܶܗ: ܕܠܳܟ ܗ̱ܘ̣ ܕܢܰܨܰܚ̣ܬܳܝܗ̱ܝ ܢ̇ܫܰܒܰܚ ܘܰܢ̇ܩܰܠܶܣ: ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܠܥ̱ܽܘܗܕܳܢܶܗ ܕܰܪܚܘ̣ܡܳܟ ܢܰܨܺܝ̣ܚ ܒܰܐܬܠܝ̣̈ܛܶܐ ܡܳܪܝ̱ ܬܶܐܘܳܕܳܘܪܳܘܣ ܡܫܰܡܠܶܝܢܰܢ ܐܰܠܳܗܳܐ ܡܶܠܬܳܐ: ܬܳܗܪܝ̣ܢܰܢ ܘܡܶܬܕܰܡܪܝ̣ܢܰܢ ܒܢܶܨ̈ܚܳܢܶܐ ܕܓܰܢ̱ܒܳܪܘ̣ܬܶܗ: ܗܳܢܳܐ ܕܰܠܟܽܠ ܡܶܕܶܡ ܕܰܒܥܳܠܡܳܐ ܗܳܢܳܐ ܫܒܰܩ ܘܠܳܟ ܒܰܠܚܘ̣ܕ ܩܢܳܐ: ܗܳܢܳܐ ܕܰܒܚܰܝܠܳܟ ܐܰܩܠܝ̣ ܥܰܠ ܟܽܠ ܫܶܢܕܝ̣̈ܢ ܘܬܰܫܢܝ̣̈ܩܝ̣ܢ: ܗܳܢܳܐ ܕܰܒܚܘ̣ܒܳܟ ܐܰܡܣ̣ܰܪ ܥܰܠ ܡܰܘܬܳܐ ܘܥܰܠ ܩܶܛܠܳܐ ܒܣ̣ܰܪ: ܗܳܢܳܐ ܕܰܐܝܟ ܐܰܕܰܡܰܐܣ ܥܰܙܝ̣ ܥܰܠ ܓܙܳܡ̈ܶܐ ܘܠܘ̣ܚ̈ܳܡܶܐ ܕܥܰܘ̈ܳܠܶܐ: ܗܳܢܳܐ ܕܠܳܐ ܙܳܥ̣ ܡ̣ܶܢ ܥܰܙܝ̣ܙܘ̣ܬ ܡܰܠ̈ܟܶܐ: ܘܠܳܐ ܚܳܒ ܡ̣ܶܢ ܛܪܘ̣ܢܘ̣ܬ ܕܰܝ̈ܳܢܶܐ: ܘܠܳܐ ܕܚ̣ܶܠ ܡ̣ܶܢ ܚܰܪܡܘ̣ܬ ܪ̈ܳܕܘ̣ܦܶܐ: ܗܳܢܳܐ ܕܠܘ̣ܩܒܰܠ ܣܰܝܦܳܐ ܠܒܝ̣ܒܳܐܝ̣ܬ ܪܗ̣ܶܛ: ܘܰܠܓܰܘܙܰܠܬܳܐ ܕܢܘ̣ܪܳܐ ܚܳܕܝܳܐ ܣ̣ܘܰܚ: ܘܰܠܟܽܠ ܫܶܢܕ̈ܝ̣ܢ ܐܰܝܟ ܡܰܘܗܰܒܬܳܐ ܘܐܝ̣ܩܳܪܳܐ ܕܝܳܐܶܐ ܚܫ̣ܰܒ: ܗܳܢܳܐ ܕܰܠܫܘ̣ܓ̈ܳܫܶܐ ܕܕܰܝ̈ܳܢܶܐ ܐܰܥܒ̣ܰܪ: ܘܰܠܟܽܠ ܫܶܢܕ̈ܝ̣ܢ ܘܫܽܘܘ̣ܕ̈ܳܝܺܝ̣ܢ ܕܡܰܠ̈ܟܶܐ ܐܝ̣ܩܝ̣ ܕܳܢ: ܘܰܠܟܽܠܶܗ ܫܘ̣ܒܚܳܐ ܕܥܳܠܡܳܐ ܐܰܝܟ ܙܶܒܠܳܐ ܐܰܣ̣ܠܝ̣: ܗܳܢܳܐ ܕܰܠܚܰܝ̈ܶܐ ܥܕ̈ܶܢܳܝܶܐ ܐܶܬ̣ܪܰܓܪܰܓ ܘܰܠܒܘ̣ܣ̈ܳܡܶܐ ܛܘ̣ܒ̈ܬܳܢܶܐ ܕܰܒܡܰܠܟܘ̣ܬܳܐ ܕܰܫܡܰܝܳܐ ܐܶܬ̣ܝܰܐܰܒ: ܘܰܠܚܰܕ̈ܘܳܬܳܐ ܠܳܐ ܡܰܘܦܝ̈ܳܢܝܳܬܳܐ ܕܬܰܡܳܢ ܚ̣ܳܪ ܕܢ̣ܶܬܡܰܢܰܥ: ܗܳܢܳܐ ܕܠܰܣܪ̈ܳܩܶܐ ܝܰܗ̣ܒ ܓܘ̣ܫܡܶܗ: ܘܰܠܦܘ̣ܣܳܩܳܐ ܐܰܫ̣ܠܶܡ ܗܰܕ̈ܳܡܰܘܗ̱ܝ: ܘܰܠܓܰܘܙܰܠܬܳܐ ܚܰܪܝ̣ܦܰܬ݀ ܝܰܩܕܳܢܳܐ ܥ̣ܰܠ: ܕܠܳܐ ܕܶܚܠܳܐ ܘܰܕܠܳܐ ܝܰܩܕܳܢܳܐ ܐܶܫܬܰܡ̣ܠܝ̣: ܗܳܢܳܐ ܕܰܪܕܰܦ ܠܪ̈ܳܕܘ̣ܦܶܐ ܒܚܘ̣ܡܣܳܢܶܗ: ܘܰܐܒ̣ܗܶܬ ܠܕܰܝ̈ܘܶܐ ܘܪܰܒܗܽܘܢ ܣܳܛܳܢܳܐ ܒܥܘ̣ܙܳܝܶܗ: ܘܰܐܬ̣ܗܰܪ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ ܒܰܡܣܰܝܒܪܳܢܘ̣ܬܶܗ: ܗܳܢܳܐ ܕܰܠܬܰܢܝ̣ܢܳܐ ܩܳܛܘ̣ܠܳܐ ܕܰܒܡܰܝ̈ܳܐ ܥܳܡܰܪ ܗ̱ܘܳܐ ܒܚܰܝܠܳܟ ܙܰܟܳܝܳܐ ܩܛܰܠ ܘܠܰܛܠܝ̣ܬܳܐ ܡ̣ܶܢ ܒܶܝܬ ܫܶܢܰܘ̈ܗ̱ܝ ܐܰܥ̣ܕܝ̣ ܒܣܰܒܪܳܟ: ܘܥܰܠ ܗܳܕܶܐ ܚܢܰܢ ܝܰܠ̈ܕܶܝܗ̇ ܕܥܺܕܬܳܐ ܡܗܰܝܡܰܢܬܳܐ ܒܚܰܕܘ̣ܬܳܐ ܕܠܶܒܳܐ ܛܘ̣ܒܳܐ ܒܙܶܕܩܳܐ ܠܳܟ ܝܳܗܒܝ̣ܢܰܢ ܟܰܕ ܐܳܡܪܝ̣ܢܰܢ: ܛܘ̣ܒܰܝܟ ܐܰܬܠܝ̣ܛܳܐ ܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ: ܕܰܒܝܰܕ ܗܰܝܡܳܢܘ̣ܬܳܟ ܐܶܬ̣ܕܰܡܰܪܘ̱ ܡܰܠܰܐܟ̈ܶܐ: ܛܘ̣ܒܰܝܟ ܐܰܓܘ̣ܢܝ̣ܣܛܳܐ ܚܠܝ̣ܡܳܐ ܡܳܪܝ̱ ܬܶܐܘܳܕܳܘܪܳܘܣ ܕܕܰܝ̈ܘܶܐ ܚܰܪ̈ܡܶܐ ܚܰܪܶܩ̣ܘ̱ ܫܶܢ̈ܶܐ ܘܰܥܪܰܩ̣ܘ̱ ܡ̣ܶܢ ܠܒܝ̣ܒܘ̣ܬܳܟ: ܛܘ̣ܒܰܝܟ ܡܶܬܟܰܬܫܳܢܳܐ ܗܕܝ̣ܪܳܐ ܡܳܪܝ̱ ܬܶܐܘܳܕܳܘܪܳܘܣ: ܕܘܳܝܳܐ ܐܰܩܢܝ̣ܬ ܠܪ̈ܳܕܘ̣ܦܰܝܟ ܒܙܳܟܘ̣ܬܳܐ ܕܝ̣ܠܳܟ ܕܥܰܠ ܟܽܠ ܐܘ̣ܠ̈ܨܳܢܝ̣ܢ: ܛܘ̣ܒܰܝܟ ܙܪܝ̣ܙܳܐ ܒܣܳܗ̈ܕܶܐ ܡܳܪܝ̱ ܬܶܐܘܳܕܳܘܪܳܘܣ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܢܚ̣ܶܬܘ̱ ܠܬܶܐܘܰܛܪܳܘܢ ܕܝ̣ܠܳܟ: ܘܩܰܠܶܣ̣ܘ̱ ܠܕܰܪܳܟ ܕܥܰܡ ܐܰܪ̈ܟܘܳܢܶܐ ܘܰܠܙܳܟܘ̣ܬܳܟ: ܛܘ̣ܒܰܝܟ ܛܒܝ̣ܒܳܐ ܒܡܰܩܪ̈ܒܳܢܶܐ ܡܳܪܝ̱ ܬܶܐܘܳܕܳܘܪܘܳܣ ܕܝܰܡܝ̣ܢܶܗ ܕܰܡܪܰܝܡܳܐ ܚܰܝܶܠ̣ܬܳܟ ܒܕܰܪܳܟ ܕܥܰܡ ܨܢܝ̣ܥܳܐ: ܛܘ̣ܒܰܝܟ ܕܰܟܠܝ̣ܠܳܐ ܕܢܘ̣ܗܪܳܐ ܓܕܰܠ ܠܳܟ ܡܳܪܳܟ ܒܰܫܡܰܝܳܐ ܒܣܶܦܪܳܐ ܕܚܰܝ̈ܶܐ ܐܰܟܬ̣ܶܒ ܒܶܝܬ ܥܝ̣ܪ̈ܶܐ: ܛܘ̣ܒܰܝܟ ܕܡܰܠܟܘ̣ܬܳܐ ܕܰܫܡܰܝܳܐ ܢܛܝ̣ܪܳܐ ܠܳܟ ܘܢܰܦܫ̈ܳܬܳܐ ܕܟܺܐܢ̈ܶܐ ܣܳܘܚ̈ܳܢ ܘܰܣܡܳܟܳܐ ܕܙܰܕܝ̣̈ܩܶܐ ܚܳܐܰܪ ܠܳܟ: ܛܘ̣ܒܰܝܟ ܕܰܥܕܶܝܢ ܡܰܠ̈ܝܰـܝ ܒܐܝ̣̈ܠܳܢܶܐ ܐܳܪܥܳܐ ܠܳܟ: ܘܦܺܐܪ̈ܶܐ ܗܰܢܺܝ̈ܰܐܝ ܒܘ̣ܣ̈ܳܡܶܐ ܡܰܘܫܛܳܐ ܠܳܟ: ܘܨܶܝܕ ܐܝ̣ܠܳܢܳܐ ܗܰܘ̇ ܕܚܰܝ̈ܶܐ ܡܡܰܢܥܳܐ ܠܳܟ: ܛܘ̣ܒܰܝܟ ܕܩܰܕܝ̣̈ܫܶܐ ܟܽܠܗܽܘܢ ܫܠܳܡܳܐ ܝܳܗܒܝ̣ܢ ܠܳܟ ܒܰܦܨܝ̣ܚܘ̣ܬܳܐ: ܘܪ̈ܘ̣ܚܳܬܳܐ ܕܟܺܐܢ̈ܶܐ ܛܘ̣ܒܳܐ ܡܕ̈ܰܫܢܳܢ ܠܳܟ ܒܰܚܘܝ̣ܚܘ̣ܬܳܐ: ܛܘ̣ܒܰܝܟ ܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ: ܕܰܫܪ̈ܰܕܽܘ̣ܕܰܝܟ ܡܰܥܪܩܝ̣ܢ ܠܕܰܝ̈ܘܶܐ ܘܝܳܗܒܝ̣ܢ ܥܘ̣ܕܪ̈ܳܢܶܐ ܠܰܡܗܰܝܡ̈ܢܶܐ: ܛܘ̣ܒܰܝܟ ܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ ܕܬܶܕܡܪ̈ܳܬܳܐ ܘܳܐܣ̈ܘܳܬܳܐ ܬܡܝ̣̈ܗܳܬܳܐ ܡܰܒܥܝ̣ܢ ܓܰܪ̈ܡܰܝܟ ܡ̣ܶܢ ܚܰܝܠܳܐ ܕܰܫ̇ܪܶܐ̣ ܒܗܽܘܢ: ܘܥܰܠ ܗܳܕܶܐ ܒܳܥܶܝܢܰܢ ܡ̣ܶܢܟ ܡܫܝ̣ܚܳܐ ܡܢܰܨܚܳܢܶܗ ܘܡܰܘܪܒܳܢܶܗ ܒܰܐܬܠܝ̣ܛܘ̣ܬܳܐ ܕܣܳܗܕܘ̣ܬܳܐ ܕܬ̣ܰܫܦܰܥ ܥܠܰܝܢ ܪ̈ܰܚܡܶܐ ܒܝܰܕ ܨܠ̈ܰܘܳܬܶܗ: ܘܬܶܪܕܘ̣ܦ ܡܶܢܰܢ ܩܪ̈ܳܒܰܘܗ̱ܝ ܕܰܢܟܝ̣ܠܳܐ ܒܐܝ̣ܙܓܰܕܘ̣ܬܶܗ: ܘܰܬ̣ܪܰܡܪܶܡ ܩܰܪܢܳܐ ܕܰܬܪ̈ܝ̣ܨܰܝ ܫܘ̣ܒܚܳܐ ܒܒܳܥ̈ܘܳܬܶܗ: ܘܠܰܒܥܶܠ̈ܕܒܳܒܰܝܢ ܚܰܣ̈ܳܡܶܐ ܘܰܢܟܝ̈ܠܶܐ ܬ̣ܒܰܕܰܪ ܡ̣ܶܢ ܠܩܘ̣ܒܠܰܢ ܒܰܣܢܺܐܓܪܘ̣ܬܶܗ: ܘܰܠܓܰܒܪ̈ܶܐ ܐܳܫ̈ܕܰܝ ܕܡܳܐ ܕܚܳܪܩܝ̣ܢ ܫܶܢ̈ܶܐ ܥܠܰܝܢ ܬܰܘܒܶܕ ܒܬܰܟܫ̈ܦܳܬܶܗ: ܘܰܠܢܶܣܝܽܘ̈ܢܶܐ ܥܰܣ̈ܩܶܐ ܘܫܰܒ̈ܛܶܐ ܕܪܘ̣ܓܙܳܐ: ܬ̣ܰܥܒܰܪ ܡ̣ܶܢܢ ܒܦܝ̈ܳܣܳܬܶܗ: ܘܰܬ̣ܫܰܟܶܢ ܠܰܢ ܚܘ̣ܠܡܳܢܳܐ ܘܳܐܣܝܽܘܬܳܐ ܠܟܺܐܒܰܝ̈ܢ ܟܣ̈ܰܝܳܐ ܘܰܓ̈ܠܰܝܳܐ ܒܝܰܕ ܡܶܬܚܰܢܳܢܘ̣ܬܶܗ: ܘܰܐܫܘܳܐ ܠܰܢ ܘܰܠܥܰܢܝ̣̈ܕܰܝܢ ܠܚܘ̣ܣܳܝܳܐ ܕܚܰܘܒ̈ܶܐ ܘܰܠܫܘ̣ܒܩܳܢܳܐ ܕܰܚܛܳܗ̈ܶܐ: ܘܰܠܒܘ̣ܣܳܡܳܐ ܕܥܰܡܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀