ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܠܒܶܫ ܡܳܪܝ̱ ܚܘ̣ܫܳܒ̈ܰܝܢ ܠܒܘ̣ܫܳܐ ܚܰܕܬܳܐ ܕܠܳܐ ܡܶܬܚܰܒܠܳܢܘ̣ܬܳܐ ܘܢܰܚ̈ܬܶܐ ܫܒܝ̣̈ܚܶܐ ܕܠܳܐ ܡܳܝܘ̣ܬܘ̣ܬܳܐ: ܘܰܐܪܚܶܩ ܘܰܐܒܥܶܕ ܡ̣ܶܢ ܠܘܳܬܰܢ ܥܒܳܕ̈ܶܐ ܢܕܝ̈ܕܶܐ ܕܰܚܛܝ̣ܬܳܐ: ܘܩܰܪܶܒ ܠܰܢ ܠܦܘ̣ܠܚܳܢܳܐ ܕܰܡܝܰܬܪ̈ܳܬܳܐ: ܘܰܐܫܘܳܐ ܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܶܚܕܶܐ ܘܢ̇ܶܪܘܰܙ ܘܰܢ̇ܕܽܘ̣ܨ ܒܥܰܕܥܺܐܕܶܗ ܕܦܳܠܚܳܐ ܕܝ̣ܠܳܟ ܡܰܠܦܳܢܳܐ ܕܰܬܪ̈ܝ̣ܨܰܝ ܫܘ̣ܒܚܳܐ: ܒܥܰܕܥܺܐܕܳܟ ܐܳܘ ܡܳܪܝ̱ ܐܰܦܪܶܝܡ ܟܽܠܰܢ ܡܶܬܦܰܨܚܝ̣ܢܰܢ: ܘܛܘ̣ܒܳܐ ܠܳܟ ܝܳܗܒܝ̣ܢܰܢ ܣܳܒܳܐ ܙܰܗܝܳܐ: ܘܰܒܝܰܕ ܨܠ̈ܰܘܳܬܶܗ ܢ̇ܶܫܟܰܚ ܪ̈ܰܚܡܶܐ ܡ̣ܶܢ ܒܶܝܬ ܓܰܙܳܟ ܡܪܰܚܡܳܢܳܐ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܝ̣ܫܳܐ ܘܡܰܠܟܳܐ ܕܟܽܠ ܪܝ̣ܫ ܘܡܰܠܟܽܘ̣: ܕܣܳܗܕܘ̣ܬܳܐ ܫܰܪܝ̣ܪܬܳܐ ܐܰܣ̣ܗܶܕ ܩܕܳܡ ܕܰܝܳܢܳܐ ܒܐ̣ܘܪܫܠܶܡ ܕܡܰܠܟܳܐ ܐܝ̣ܬܰܘܗ̱ܝ ܘܡܰܠܟܘ̣ܬܶܗ ܒܰܫܡܰܝܳܐ ܗ̱ܝ ܕܥܰܡ ܐܰܒܘ̣ܗ̱ܝ ܠܥܳܠܰܡ ܡܰܡܠܶܟ: ܗܰܘ̇ ܕܒܰܕܡܶܗ ܚܰܝܳܐ ܕܶܐܫ̣ܰܕ ܚܠܳܦܰܝܢ ܒܪܰܘܡܳܐ ܕܓܳܓ̣ܘ̣ܠܬܳܐ ܠܟܽܠܗܽܘܢ ܩܰܕܝ̣̈ܫܶܐ ܐܰܪܘܺܝ̣ ܒܪܶܚܡܬܶܗ ܘܰܚܠܳܦܰܘܗ̱ܝ ܟܽܠ ܡܰܘ̈ܬܝ̣ܢ ܡܫܰܚܠ̈ܦܶܐ ܣܒ̣ܰܠܘ̱: ܗܰܘ̇ ܕܰܠܗܳܢܳܐ ܐܰܬܠܝ̣ܛܳܐ ܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ ܡ̣ܶܢ ܒܰܝܢܳܬ ܟܘ̣̈ܒܶܐ ܘܗܰܛܛ̈ܶܐ ܕܰܦܬܰܟܪܘ̣ܬܳܐ ܢܓ̣ܰܕ: ܘܰܒܣܰܘܟ̈ܳܬܶܗ ܕܐܝ̣ܠܳܢܳܐ ܕܚܰܝ̈ܶܐ ܨܠܝ̣ܒܳܐ ܦܳܪܘ̣ܩܳܝܳܐ ܩܰܒ̣ܥܶܗ: ܘܗܳܐ ܥܺܕܬܳܐ ܡܝܰܩܪܳܐ ܒܚܰܕܘ̣ܬܳܐ ܠܝܘ̣ܡ ܕܘ̣ܟܪܳܢܶܗ: ܘܙܳܡܪܳܐ ܫܘ̣ܒܚܳܐ ܒܥܰܕܥܺܐܕܶܗ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܰܒܚܝ̣ܢܰܢ ܠܳܟ ܡܫܝ̣ܚܳܐ ܡܰܘܪܒܳܢܳܐ ܕܥܰܒ̈ܕܰܘܗ̱ܝ: ܡܪܰܡܪܡܝ̣ܢܰܢ ܠܳܟ ܐܰܠܳܗܳܐ ܡܢܰܨܚܳܢܳܐ ܕܣܳܗ̈ܕܰܘܗ̱ܝ: ܡܩܰܠܣܝ̣ܢܰܢ ܠܡܳܪܘ̣ܬܳܟ ܝܶܫܘܽܥ ܦܳܪܘ̣ܩܳܐ ܘܰܡܚܰܝܠܳܢܳܐ ܕܰܐܬܠܝ̣̈ܛܰܘܗ̱ܝ: ܗܳܢܽܘܢ ܕܡܶܛܽܠ ܫܡܶܗ ܘܚܘ̣ܒܶܗ ܕܰܪܬܰܚ ܒܠܶܒ̈ܰܘܳܬܗܽܘܢ ܟܽܠ ܡܰܘܬܝ̣̈ܢ ܡܰܪ̈ܝ̣ܪܶܐ ܣܒ̣ܰܠܘ̱ ܗ̱ܘܰܘ ܘܣܰܝܒ̣ܰܪܘ̱: ܗܰܘ̇ ܕܰܠܢܰܨܺܝ̣ܚ ܒܰܐܬܠܝ̣̈ܛܶܐ ܡܳܪܝ̱ ܬܶܐܘܳܕܳܘܪܳܘܣ ܓܰܢ̱ܒ̣ܰܪ ܘܚ̣ܰܝܶܠ ܘܥ̣ܰܕܰܪ ܒܰܐܓܘ̣ܢܳܐ ܕܰܚܠܳܦ ܗܰܝܡܳܢܘ̣ܬܳܐ ܕܒܶܗ: ܘܦܰܓܪܶܗ ܐܰܫܠ̣ܶܡ ܠܟܽܠ ܫܶܢܕ̈ܝ̣ܢ: ܘܓܘ̣ܫܡܶܗ ܠܡܰܚ̈ܘܳܬܳܐ: ܚܰܨܶܗ ܝܰܗ̣ܒ ܠܢܶܓ̈ܕܶܐ ܘܗܰܕܳܡܰܘ̈ܗ̱ܝ ܠܰܣܪ̈ܳܩܶܐ ܐܝ̣̈ܕܰܘܗ̱ܝ ܦܫ̣ܰܛ ܠܰܦܟܳܪ̈ܶܐ: ܘܪ̈ܶܓܠܰܘܗ̱ܝ ܠܣܘ̣̈ܛܡܶܐ ܫܶܢܰܘ̈ܗ̱ܝ ܕܢ̣ܶܬܥܰܩܪ̈ܳܢ ܥܰܝܢܰܘ̈ܗ̱ܝ ܕܢ̣ܶܬܚܰܨ̈ܝܳܢ: ܠܶܫܳܢܶܗ ܕܢ̣ܶܬܫܡܶܛ ܩܢܘ̣ܡܶܗ ܠܝܰܩܕܳܢܳܐ: ܠܡܰܠ̈ܟܶܐ ܐܰܚܡ̣ܶܬ: ܠܕܰܝ̈ܳܢܶܐ ܒܰܠ̣ܗܝ̣: ܠܪ̈ܳܕܘ̣ܦܶܐ ܪܕܰܦ: ܠܰܛܪ̈ܘ̣ܢܶܐ ܐܰܥܝ̣ܩ: ܠܰܦܬܰܟܪ̈ܶܐ ܫܚ̣ܰܩ: ܠܰܓܠܝ̣̈ܦܶܐ ܣܚ̣ܰܦ ܘܰܐܪܡܝ̣: ܠܟܘ̣ܡܪ̈ܶܐ ܐܰܒ̣ܗܶܬ: ܘܰܠܫܺܐܕ̈ܶܐ ܥܰܡܗܽܘܢ ܟܰܐܐܰܪ: ܒܰܐܠ̈ܳܗܶܐ ܚܰܪ̈ܫܶܐ ܘܡܝ̣̈ܬܶܐ ܒܰܙ̣ܰܚ ܘܠܳܐ ܕܚ̣ܶܠ: ܠܰܓ̈ܙܳܡܶܐ ܫ̣ܳܛ: ܘܰܠܠܘ̣ܚ̈ܳܡܶܐ ܐܰܣ̣ܠܝ̣ ܘܠܳܐ ܙܳܥ̣: ܠܬܰܢܝ̣ܢܳܐ ܩ̣ܛܰܠ ܒܩܘ̣ܢܛܳܪ (ܒܚܝ̣ܠ) ܨܠܝ̣ܒܳܐ: ܘܰܒܟܺܐܦܳܐ ܕܕܘ̣ܡܳܪܳܐ ܠܶܗ ܪܓ̣ܰܡ: ܘܰܠܢܰܦܫܶܗ ܒܰܠܚܘ̣ܕ ܢ̣ܛܰܪ ܕܠܳܐ ܡܘ̣ܡ: ܘܰܒܙܳܟܘ̣ܬܳܐ ܘܢܶܨܚܳܢܳܐ ܕܥܰܠ ܡܰܘܬܳܐ ܠܰܥܕܶܝܢ ܕܒܘ̣ܣ̈ܳܡܶܐ ܕܰܒ̣ܰܪܬ ܘܫܰܢܝ̣ܬܳܝܗ̱ܝ: ܘܥܰܠ ܗܳܕܶܐ ܓܘ̣ܕ̈ܶܐ ܪ̈ܘ̣ܚܳܢܝܳܬܳܐ ܘܢܰܦ̈ܫܳܬܳܐ ܕܩܰܕܝ̣̈ܫܶܐ ܒܚܰܕܘ̣ܬܳܐ ܐܰܪܥܘ̣ܗ̇ ܠܢܰܦܫܶܗ ܒܰܫܠܳܡܳܐ ܟܰܕ ܐܳܡܪ̈ܳܢ: ܬܳܐ ܒܰܫܠܳܡܳܐ ܐܰܓܘ̣ܢܝ̣ܣܛܳܐ ܚܰܝܠܬܳܢܳܐ ܕܰܕܚ̣ܶܠ ܡܶܢܶܗ ܐܳܟܶܠܩܰܪܨܳܐ ܘܫܰܡܳܫ̈ܰܘܗ̱ܝ: ܬܳܐ ܒܰܫܠܳܡܳܐ ܒܰܪ ܬܰܘܕܝ̣ܬܳܐ ܫܠܝ̣ܚܳܝ̇ܬܳܐ: ܬܳܐ ܒܰܫܠܳܡܳܐ ܓܰܒܝܳܐ ܘܪܰܒܳܐ ܒܣܳܗ̈ܕܶܐ: ܬܳܐ ܒܰܫܠܳܡܳܐ ܕܒܝ̣ܚܳܐ ܘܰܩܛܝ̣ܠܳܐ ܕܡܶܛܽܠ ܡܳܪܶܗ: ܬܳܐ ܒܰܫܠܳܡܳܐ ܗܰܒܳܒܳܐ ܪܓܝ̣ܓܳܐ ܘܦܰܩܚܳܐ ܗܕܝ̣ܪܳܐ ܕܰܥܕܶܝܢ ܡܶܬܝܰܕܥܳܢܝ̣ܬܳܐ: ܬܳܐ ܒܰܫܠܳܡܳܐ ܘܰܪܕܳܐ ܫܒܝ̣ܚܳܐ ܘܒܰܣܝ̣ܡ ܪܝ̣ܚܳܐ ܕܰܫܘܰܚ ܒܣܰܘܟܰܘ̈ܗ̱ܝ ܕܰܨܠܝ̣ܒܳܐ: ܬܳܐ ܒܰܫܠܳܡܳܐ ܙܪܝ̣ܙܳܐ ܒܕܰܪ̈ܳܪܶܐ: ܬܳܐ ܒܰܫܠܳܡܳܐ ܚܰܝܠܬܳܢܳܐ ܒܡܰܘܕ̈ܝܳܢܶܐ: ܬܳܐ ܒܰܫܠܳܡܳܐ ܛܒܝ̣ܒܳܐ ܒܦܳܠ̈ܚܰܘܗ̱ܝ ܕܰܡܫܝ̣ܚܳܐ: ܬܳܐ ܒܰܫܠܳܡܳܐ ܝܳܗܘ̣ܒܳܐ ܕܥܘ̣ܕܪ̈ܳܢܶܐ ܠܰܡܗܰܝܡ̈ܢܶܐ: ܥܺܕܬܳܐ ܕܶܝܢ ܩܰܕܝ̣ܫܬܳܐ ܟܠܝ̣ܠܳܐ ܕܛܘ̣̈ܒܶܐ ܓܳܕܠܳܐ ܠܳܟ ܟܰܕ ܐܳܡܪܳܐ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܝܰܡܝ̣ܢܶܗ ܕܰܡܪܰܝܡܳܐ ܚܰܝܶܠ̣ܬܳܟ ܥܰܠ ܗܰܘ̇ ܬܰܢܝ̣ܢܳܐ ܪܰܒܳܐ ܘܟܺܐܦ̈ܶܐ ܠܰܪܓܘ̣ܡܝܶܗ ܗܝ̣ ܐܰܘܫܛܰܬ݀ ܠܳܟ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܟܰܕ ܠܗܰܘ ܚܰܪܡܳܢܳܐ ܐܰܘܒ̣ܶܕܬ ܠܡܰܝ̈ܳܐ ܕܰܟܝ̣ܬ ܡ̣ܶܢ ܡܶܪܬܶܗ ܘܠܰܛܠܝ̣ܬܳܐ ܦܰܨܺܝ̣ܬ ܡ̣ܶܢ ܚܘ̣ܒܳܠܳܐ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܠܒܰܪ̈ܒܪܳܝܶܐ ܙܟ݂ܰܝܬ ܒܚܰܝܠܳܟ ܘܠܰܡܕܝ̣ܢ̱ܬܳܐ ܗܳܝ ܕܡ̣ܶܢ ܛܳܥܝܽܘܬ ܦܬܰܟܪ̈ܶܐ ܚ̣ܰܪܰܪܬ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܡܰܠܟܘ̣ܬܳܐ ܕܰܫܡܰܝܳܐ ܢܛܝ̣ܪܳܐ ܠܳܟ ܗܳܝ ܕܰܩ̣ܢܰܝܬ ܒܰܕܡܳܟ ܝܰܩܝ̣ܪܳܐ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܢܘ̣ܗܪܳܐ ܡܫܝ̣ܚܳܐ ܟܠܝ̣ܠ ܢܘ̣ܗܪܳܐ ܓܕܰܠ ܠܳܟ: ܠܳܟ ܛܘ̣ܒܰܝܟ ܡܳܪܝ̱ ܬܶܐܘܳܕܳܘܪܳܘܣ ܕܣܝ̣ܡܰܬ݀ ܥܘ̣ܕܪ̈ܳܢܶܐ ܥܒܝ̣ܕ ܦܰܓܪܳܟ ܠܰܡܡܰܚ̈ܰܝܳܐ: ܘܥܰܠ ܗܳܕܶܐ ܚܢܰܢ ܕܙܰܝܰܚ̣ܢܰܢ ܠܕܘ̣ܟܪܳܢܳܟ ܒܰܙܡܝ̣ܪ̈ܳܬܳܐ ܕܪܘ̣ܚܳܐ ܩܰܕܝ̣ܫܳܐ: ܥܘ̣ܕܪ̈ܳܢܶܐ ܐܰܣܪܰܚ ܠܰܢ ܡ̣ܶܢ ܒܶܝܬ ܓܰܙܳܟ: ܦܬܰܚ ܬܰܪܥܳܟ ܠܰܣܢܝ̣̈ܩܶܐ ܕܒܶܗ ܢܳܩܫܝ̣ܢ ܘܦܰܢܳܐ ܫܶܐܠ̈ܳܬܗܽܘܢ: ܨܰܘܡܰܢ ܘܰܨܠ̈ܰܘܳܬܰܢ ܢ̣ܶܬܩܰܒ̈ܠܳܢ ܒܰܨܠ̈ܰܘܳܬܳܟ: ܩܳܠ ܒܳܥ̈ܘܳܬܰܢ ܢܶܫ̣ܬܡܰܥ ܒܒܳܥ̈ܘܳܬܳܟ: ܪ̈ܰܚܡܶܐ ܘܰܚܢܳܢܳܐ ܢ̣ܶܫܬܰܦܥܽܘܢ ܥܠܰܝܢ ܒܬܰܟܫ̈ܦܳܬܳܐ ܕܝ̣ܠܳܟ: ܫܶܐܠ̈ܳܬܳܐ ܕܟܽܠܰܢ ܢ̣ܶܬܦܰܢܝ̈ܳܢ ܒܰܣܢܺܐܓܪܘ̣ܬܳܟ: ܬܝܳܒܘ̣ܬܰܢ ܬܶܬ̣ܢܰܨܰܚ ܒܰܦܝ̈ܳܣܳܬܳܟ: ܚܘ̣ܣܳܝܳܐ ܕܚܰܘܒ̈ܶܐ ܢܶܫ̣ܬܰܟܰܢ ܠܰܢ ܡ̣ܶܢ ܡܳܪܳܟ ܒܕܘ̣ܟܪܳܢܳܟ ܫܰܝܢܳܐ ܘܰܫܠܳܡܳܐ ܢ̣ܶܫܪܶܐ ܒܓܰܘ ܥܺܕ̈ܳܬܳܐ ܘܕܰܝܪ̈ܳܬܳܐ ܕܝ̣ܠܰܢ ܒܒܘ̣ܪ̈ܟܳܬܳܟ: ܐܳܣܝܽܘ̣ܬܳܐ ܘܚܘ̣ܠܡܳܢܳܐ ܢ̣ܶܬܝܰܗܒܽܘܢ ܠܰܢ ܡ̣ܶܢ ܓܰܪ̈ܡܰܝܟ: ܘܥܰܢܝ̣̈ܕܰܝܢ ܢ̣ܶܬܬܢܝ̣ܚܽܘܢ ܒܰܐܘ̈ܘܳܢܶܐ ܕܰܢܝܳܚܳܐ ܬܚܶܝܬ ܟܶܢܦܰܝ̈ܟ: ܘܟܶܢܫܰܢ ܟܽܠܶܗ ܕܙܰܝܰܚ̣ ܥܰܕܥܺܐܕܳܟ ܢܶܬܒܰܪܰܟ ܒܝܰܡܝ̣ܢܳܟ: ܘܢ̇ܶܫܬܘܶܐ ܠܒܘ̣ܣܳܡܳܐ ܕܥܰܡܳܟ ܥܰܠ ܦܳܬܘ̣ܪܳܐ ܕܛܘ̣̈ܒܶܐ ܕܰܢܛܝ̣ܪ ܠܳܟ: ܘܰܠܗܰܘ̇ ܕܪܰܡܪܶܡ ܥܰܕܥܺܐܕܳܟ ܢ̇ܰܣܶܩ ܠܶܗ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܗ̱ܝ ܘܠܪܘ̣ܚܶܗ ܩܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܠܳܗܳܐ ܗܰܘ̇ ܕܰܒܣ̣ܶܡ ܠܳܟ ܩܶܛܠܶܗ ܕܥܰܒܕܳܟ ܠܪܝ̣ܚ ܢܝܳܚܳܐ ܕܰܐܠܳܗܘ̣ܬܳܟ: ܘܰܗ̣ܘܳܬ݀ ܕܶܒܚܬܶܗ ܩܕܳܡܰܝܟ ܩܘ̣ܪܒܳܢܳܐ ܡܠܝ̣ܠܳܐ ܘܕܶܒܚܳܐ ܟܳܗܢܳܝܳܐ: ܘܪܰܡ̣ܪܶܡܬ ܠܝܘ̣ܡ ܕܘ̣ܟܪܳܢܶܗ ܒܰܫܡܰܝܳܐ ܘܒܰܐܪܥܳܐ: ܢ̣ܶܒܣܰܡ ܠܳܟ ܗܳܟܝ̣ܠ ܪܝ̣ܚܶܗ ܕܦܝ̣ܪܡܰܢ ܐܰܝܟ ܪܝ̣ܚ ܕܶܒܚܶܗ ܘܩܘ̣ܪܒܳܢܳܐ ܕܢܰܦܫܶܗ: ܘܗܰܒ ܠܰܢ ܕܰܡܕܰܡܝ̈ܳܢܶܐ ܗܳܟܝ̣ܠ ܢ̇ܶܗܘܶܐ ܟܽܠܰܢ ܒܐܬܠܝܣܘ̣ܬܶܗ: ܘܰܡܡܰܪ̈ܝܳܢܶܐ ܒܥܶܕܳܢ ܩܪܳܒܳܐ ܕܚܰܫܰܝ̈ܢ ܬܰܙܝ̣̈ܙܶܐ ܒܰܡܚܰܡܣܢܳܢܘ̣ܬܶܗ: ܘܢ̇ܶܣܰܒ ܡܶܢܳܟ ܦܘ̣ܪܥܳܢܳܐ ܕܰܡܛܰܝܰܒ ܠܶܗ ܘܰܟܠܝ̣ܠܳܐ ܕܰܡܥܰܬܰܕ ܠܶܗ ܒܝܰܘܡܳܐ ܕܓܶܠܝܳܢܳܟ: ܘܢ̇ܶܫܬܘܶܐ ܕܥܰܡܶܗ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀