ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܪܰܡܪܡܳܢܳܐ ܕܰܐܬܠܝ̣̈ܛܰܘܗ̱ܝ: ܘܡܰܘܪܒܳܢܳܐ ܕܦܳܠܚ̈ܰܘܗ̱ܝ ܠܗܰܘ̇ ܓܳܡܘ̣ܪܳܐ ܘܰܡܫܰܡܠܝܳܢܳܐ ܕܥܰܒ̈ܕܰܘܗ̱ܝ: ܒܡܶܠܬܳܐ ܕܰܫܪܳܪܳܐ ܘܰܒܚܶܟܡܬܳܐ ܕܪܘ̣ܚܳܐ ܠܗܰܘ̇ ܕܶܐܡ̣ܰܪ ܒܰܣܒܰܪܬܶܗ ܚܰܝܬܳܐ: ܕܠܳܐ ܬ̣ܶܗܘܽܘܢ ܪܳܢܶܝܢ ܕܡܳܢܳܐ ܬ̣ܰܦܩܽܘܢ ܪܘ̣ܚܳܐ ܩܕܳܡ ܡܰܠ̈ܟܶܐ ܘܕܰܝ̈ܳܢܶܐ: ܕܶܐܢܳܐ ܬܰܡܳܢ ܐ̱ܢܳܐ ܥܰܡܟܽܘܢ: ܘܶܐܢܳܐ ܐܶܬ̣ܠ ܒܟܽܘܢ ܪܘ̣ܚܳܐ ܕܚܶܟܡܬܳܐ: ܘܠܘ̣ܒܳܒܳܐ ܕܒܳܗ̇ ܬ̣ܰܒܗܬܽܘܢ ܠܚ̈ܰܢܦܶܐ ܟܳܦܘ̣ܪ̈ܶܐ: ܘܒܶܝܬ ܐܝ̣ܕܰܝ̈ܟܽܘܢ ܣܰܓܺܝ̈ܶܐܐ ܢ̣ܶܬܩܰܪܒܽܘܢ ܠܘܳܬܝ̱ ܒܗܰܝܡܳܢܘ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܚܶܟܡܬܳܐ ܘܚܰܝܠܳܐ ܕܰܐܠܳܗܳܐ ܐܰܒܳܐ: ܗܰܘ̇ ܕܝܰܗ̣ܒܬ ܒܛܰܝܒܘ̣ܬܳܟ ܚܰܝܠܳܐ ܘܠܘ̣ܒܳܒܳܐ ܠܰܐܬܠܝ̣̈ܛܶܐ ܕܝ̣ܠܳܟ: ܡܰܘܕ̈ܝܳܢܶܐ ܘܣܳܗ̈ܕܶܐ ܢܰܨܺܝ̣̈ܚܶܐ: ܕܥܰܡ ܒܝ̣ܫܳܐ ܘܚܰܝ̈ܠܰܘܳܬܶܗ ܐܰܓܘ̣ܢܳܐ ܕܰܚܠܳܦ ܕܶܚܠܬܳܟ ܢܶܥ̣ܒܕܽܘܢ: ܘܰܒܡܶܠ̈ܰܝ ܫܪܳܪܳܐ ܕܦܘ̣ܡܗܽܘܢ ܠܦܳܠܚܘ̣ܬܳܐ ܟܽܠܳܗ̇ ܕܕܶܚܠܰܬ݀ ܦܬܰܟܪ̈ܶܐ ܢ̣ܶܙܟܽܘܢ ܘܰܢ̣ܚܰܝܒܽܘܢ: ܗܰܘ̇ ܕܰܠܢܰܨܺܝ̣ܚܳܐ ܡܳܪܝ̱ ܬܶܐܘܳܕܳܘܪܳܘܣ ܗܳܢܳܐ ܕܝܰܘܡܳܢܳܐ ܕܘ̣ܟܪܳܢܶܗ ܒܚܰܕܘ̣ܬܳܐ ܡܫܰܡܠܶܝܢܰܢ: ܝܰܗ̣ܒܬ ܡܶܠܬܳܐ ܕܚܶܟܡܬܳܐ ܕܰܫܪܳܪܳܐ ܠܡܰܟܳܣܽܘ̣ ܠܡܰܠ̈ܟܶܐ ܘܕܰܝ̈ܳܢܶܐ ܘܰܕܠܳܐ ܕܶܚܠܳܐ: ܗܰܘ̇ ܕܟܰܕ ܩܰܪܒܘ̣ܗ̱ܝ ܠܒܶܝܬ ܕܝ̣ܢܳܐ ܚܠܳܦܰܝܟ: ܐܰܝܟ ܐܰܪܝܳܐ ܕܢܳܗܶܡ ܥܰܠ ܬܰܥ̈ܠܶܐ ܪܗ̣ܶܛ ܠܶܐܣܛܰܕܝܳܘܢ ܟܰܕ ܪܳܘܶܙ ܒܪܘ̣ܚܳܐ: ܗܶܢܽܘܢ ܕܶܝܢ ܟܰܕ ܚ̣ܙܰܐܘܽܗ̱ܝ ܠܰܠܒܝ̣ܒܳܐ ܒܰܠܒܝ̣ܒܘ̣ܬܶܗ ܬܗ̣ܰܪܘ̱: ܘܡܶܚܕܳܐ ܫܰܪܝ̣ܘ ܕܳܝܢܝ̣ܢ ܠܶܗ ܥܰܠ ܫܘ̣ܚܠܳܦܶܗ ܕܡ̣ܶܢ ܟܦܘ̣ܪܝܶܗ ܠܗܰܝܡܳܢܘ̣ܬܳܐ ܠܰܡܕܰܒܳܚܽܘ̣ ܠܫܺܐܕ̈ܶܐ ܡܦܝ̣ܣܝ̣ܢ ܗ̱ܘܰܘ ܠܶܗ: ܡܶܢܗܽܘܢ ܒܰܓ̈ܙܳܡܶܐ ܡܰܪ̈ܝ̣ܪܶܐ: ܘܡܶܢܗܽܘܢ ܒܫܽܘ̈ܕܳܠܶܐ ܢܟܝ̣̈ܠܶܐ: ܗܽܘ̣ ܕܶܝܢ ܟܰܕ ܐܶܬ̣ܡܠܝ̣ ܪܘ̣ܚܳܐ ܩܰܕܝ̣ܫܳܐ ܒܡ̈ܶܠܶܐ ܕܡܰܟܣܳܢܘ̣ܬܳܐ ܡܡܰܚܶܐ ܗ̱ܘܳܐ ܠܗܽܘܢ ܟܰܕ ܐܳܡܰܪ: ܕܐܶܢܳܐ ܕܡ̣ܶܢ ܓܘ̣ܡܳܨܳܐ ܕܰܐܒܕܳܢܳܐ ܣܶܠܩܶܬ ܒܶܗܬܬܳܐ ܗ̱ܝ ܠܝ̣ ܕܒܶܗ ܟܰܕ ܒܶܗ ܐܶܦܶܠ: ܟܰܕ ܩܶܪܒܶܬ ܠܐܝ̣ܡܳܡܳܐ ܪܰܒܳܐ: ܬܘ̣ܩܰܠܬܳܐ ܗ̱ܝ ܪܰܒܬܳܐ ܠܡܰܢ ܕܰܦܬܝ̣̈ܚܳܢ ܥܰܝ̈ܢܰܘܗ̱ܝ ܘܒܰܝܢܳܬ ܦܰܚ̈ܶܐ ܘܬܘ̣ܩ̈ܠܳܬܳܐ ܪܳܕܶܐ: ܫܰܦܠܘ̣ܬܳܐ ܗ̱ܝ ܠܡܰܢ ܕܰܐܓ̣ܗܝ̣ ܡ̣ܶܢ ܥܰܒܕܘ̣ܬܳܐ ܕܒܝ̣ܫܳܐ ܘܬܘ̣ܒ ܥܠܶܝܗ̇ ܒܨܶܒܝܳܢܶܗ ܢ̣ܶܦܢܶܐ: ܪܘܫܥܰܐ ܗ̱ܘ̇ ܪܰܒܳܐ ܠܡܰܢ ܕܣܳܓܶܕ ܠܒܶܪ̈ܝܳܬܳܐ ܛܳܒ ܡ̣ܶܢ ܒܳܪܘ̣ܝܳܐ: ܩܘ̣ܦܳܚܰܐܗ̱ܘ̇ ܪܰܒܳܐ ܘܩܘ̣ܛܪܳܓܳܐ ܠܡܰܢ ܕܰܠܟ̈ܺܐܦܶܐ ܘܰܠܩܰܝ̈ܣܶܐ ܐܰܝܟ ܕܠܰܐܠ̈ܳܗܶܐ ܡܕܰܒܰܚ: ܨܰܥܪܰܐ ܗ̱ܘ̇ ܪܰܒܳܐ ܠܡܰܢ ܕܰܠܕܰܝ̈ܘܶܐ ܐܰܝܟ ܕܰܠܛܳܒ̈ܶܐ ܡܢܰܩܶܐ: ܦܰܩܪܘ̣ܬܳܐ ܗ̱ܝ ܠܡܰܢ ܕܰܠܡܝ̣̈ܬܶܐ ܐܰܝܟ ܕܰܠܚܰܝ̈ܶܐ ܡܫܰܡܶܫ: ܥܰܘܠܳܐ ܕܶܝܢ ܘܰܛܠܘ̣ܡܝܳܐ ܠܡܰܢ ܕܩܰܒ̣ܶܠ ܝ̣ܕܰܥܬܳܐ ܕܰܫܪܳܪܳܐ ܘܰܠܥܰܘ̈ܳܠܶܐ ܡܶܬܬܦܝ̣ܣ: ܣܰܟܠܘ̣ܬܳܐ ܪܰܒܬܳܐ ܠܡܰܢ ܕܶܐܬ̣ܩܪܝ̣ ܠܡܶܫܬܘ̣ܬܳܐ ܗܳܝ ܕܠܳܐ ܥܳܒܪܳܐ ܘܡ̣ܶܢ ܕܶܒܚ̈ܶܐ ܘܢܘ̣ܩ̈ܳܝܶܐ ܕܫܺܐܕ̈ܶܐ ܢ̣ܶܐܟܘ̣ܠ: ܢܕܝܕܘ̣ܬܳܐ ܗ̱ܝ̇ ܠܡܰܢ ܕܩܰܒ̣ܶܠ ܫܘ̣ܘܟܳܢܳܐ ܪܘ̣ܚܳܢܳܝܳܐ ܘܪܝ̣ܚܳܐ ܕܡܽܘܪܽܘܢ ܐܰܠܳܗܳܝܳܐ ܘܥܰܡ ܛܰܡ̈ܶܐܐ ܢ̣ܶܬܥܰܪܓܰܠ ܒܰܣܝܳܢܳܐ ܕܛܘ̣ܥܝܰܝ: ܡܘܝܳܩܰܐ ܗ̱ܘ̇ ܠܡܰܢ ܕܥܰܡ ܡܡܰܝ̈ܩܳܢܶܐ ܘܕܰܓ̈ܳܠܶܐ ܢ̣ܶܬܚܰܠܰܛ ܘܢܶܫܒܘ̣ܩ ܬܪܝ̣ܨܘ̣ܬ ܫܘ̣ܒܚܳܐ: ܠܳܐ ܘܳܠܶܐ ܕܢ̣ܺܚܶܐ ܐܰܝܢܳܐ ܕܟܰܕ ܚܠܝ̣ܡ ܘܢ̣ܶܫܬܰܘܬܰܦ ܠܰܡܚܰܒ̈ܠܶܐ: ܟܘ̣ܐܳܪܰܐ ܗ̱ܘ̇ ܠܝ̣ ܟܽܠܶܗ ܦܘ̣ܠܚܳܢܟܽܘܢ: ܝܰܬܝ̣ܪ ܒܝ̣ܫܳܐ ܗ̱ܝ ܡ̣ܶܢ ܪܰܒܟܽܘܢ ܣܳܛܳܢܳܐ ܛܳܒܘ̣ܬܟܽܘܢ: ܛܘ̣ܒܰܘܗ̱ܝ ܠܡܰܢ ܕܢ̣ܶܪܚܰܩ ܡ̣ܶܢ ܛܳܥܝܽܘܬܟܽܘܢ ܘܳܐܦܶܢ ܒܡܰܘܬܳܐ: ܚܰܣܝܰܐ ܗ̱ܘ̇ ܘܩܰܕܝ̣ܫܳܐ ܐܰܝܢܳܐ ܕܶܐܫ̣ܬܰܘܕܰܥ ܣܪܝ̣ܩܘ̣ܬܟܽܘܢ: ܙܰܟܳܝܰܐ ܗ̱ܘ̇ ܐܰܝܢܳܐ ܕܠܳܐ ܐܶܬ̣ܬܦܝ̣ܣ ܠܫܘ̣ܓ̈ܳܫܰܝܟܽܘܢ: ܘܳܝ ܠܶܗ ܠܡܰܢ ܕܛܰܒܝ̣ܥ ܒܰܣܝܳܢܳܐ ܕܛܰܡܽܐܘ̣ܬ ܦܘ̣ܠܚܳܢܟܽܘܢ: ܗܕܝ̣ܪ ܘܰܦ̇ܐܶܐ̣ ܩܕܳܡ ܡܳܪܝܳܐ ܗܰܘ̇ ܕܠܳܐ ܡܶܬܕܰܢܶܐ ܠܡܘ̣ܠܟܳܢܟܽܘܢ: ܕܰܟܝܳܐ ܘܰܡܨܰܠܠܳܐ ܐܝ̣ܬܰܘܗ̱ܝ ܗܘ̇ ܕܰܐܡ̣ܶܕ ܡ̣ܶܢ ܫܰܘܬܳܦܘ̣ܬܟܽܘܢ: ܓܢ̱ܒܳܪܰܐ ܗ̱ܘ̇ ܘܰܚܠܝ̣ܨܳܐ ܕܡܰܩܢܶܐ ܥܰܠ ܠܘ̣ܚܳܡ̈ܰܝܟܽܘܢ: ܒܚܝ̣ܪܰܐ ܗ̱ܘ ܒܚܰܟܝ̈ܡܶܐ ܐܰܝܢܳܐ ܕܡ̣ܶܢ ܐܘ̣ܪ̈ܚܳܬܟܽܘܢ ܡܰܠ̈ܝܰܝ ܥܘ̣ܩ̈ܣܶܐ ܐܰܪܝ̣ܡ ܪܶܓܠܶܗ: ܐܝ̣ܩܳܪܳܐ ܪܰܒܳܐ ܡܶܫܟܰܚ ܒܰܫܡܰܝܳܐ ܘܒܰܐܪܥܳܐ ܐܰܝܢܳܐ ܕܠܳܐ ܡܶܬܦܢܶܐ ܥܰܠ ܡܰܘܗ̈ܒܳܬܟܽܘܢ ܘܐܝ̣ܩܳܪ̈ܰܝܟܽܘܢ: ܠܝ̣ ܠܰܡ ܠܳܐ ܢܶܗ̣ܘܶܐ ܠܝ̣ ܕܶܐܫ̇ܬܰܒܗܰܪ ܐܶܠܳܐ ܐܶܢ ܒܰܙܩܝ̣ܦܶܗ ܕܰܡܫܝ̣ܚܳܐ ܗܰܘ̇ ܕܠܳܐ ܒܳܗܶܬ ܐܰܝܢܳܐ ܕܡܶܬܓܰܘܰܣ ܒܶܗ: ܪܰܒܳܐ ܗ̱ܝ ܠܝ̣ ܕܶܐܗ̇ܘܶܐ ܪܕܝ̣ܦܳܐ ܘܰܩܛܝ̣ܠܳܐ ܡܶܛܽܠ ܡܳܪܝ̱ ܕܡܝ̣ܬ ܚܠܳܦܰܝ: ܚܰܢ̈ܦܶܐ ܕܶܝܢ ܟܰܕ ܫܶܢܕ̈ܶܐ ܡܰܪ̈ܝ̣ܪܶܐ ܐܰܣܒ̣ܠܘ̣ܗ̱ܝ ܒܰܐܬܘ̣ܢܳܐ ܕܢܘ̣ܪܳܐ ܫܰܠ̣ܶܡ ܚܰܝܰܘ̈ܗ̱ܝ ܒܰܨܠܘ̣ܬܳܐ ܕܠܳܐ ܢܶܟܝ̈ܳܢܶܐ ܒܚܰܝܠܳܟ: ܠܳܟ ܕܶܝܢ ܡܳܪܰܢ ܗܰܘ̇ ܕܚܰܝܶܠ̣ܬܳܝܗ̱ܝ ܒܰܐܓܘ̣ܢܶܗ ܡܶܬܟܰܫܦܝ̣ܢܰܢ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܬܫܰܟܶܢ ܠܰܢ ܒܪܶܚܡܰܬ݀ ܐ̱ܢܳܫܘ̣ܬܳܟ: ܘܒܰܨܠ̈ܰܘܳܬܶܗ ܕܰܐܬܠܝ̣ܛܳܟ ܐܰܝ̇ܕܳܐ ܕܥܳܕܪܳܐ ܘܦܳܩܚܳܐ ܠܚ̈ܰܝܶܐ ܕܢܰܦܫ̈ܳܬܢ: ܟܰܕ ܡܰܫܦܰܥ ܐܰܢ̱ܬ ܪ̈ܰܚܡܶܐ ܕܛܰܝܒܘ̣ܬܳܟ ܥܰܠ ܡܰܪ̈ܥܶܐ ܘܰܟܪ̈ܝ̣ܗܶܐ ܘܥܰܠ ܒܳܝ̈ܫܶܐ ܘܡܶܣ̈ܟܺܢܶܐ: ܘܥܰܠ ܛܥ̈ܰܝܳܐ ܘܰܐܒܝ̈ܕܶܐ ܘܥܰܠ ܡܥܳܩ̈ܶܐ ܘܰܫܚܝ̣̈ܩܶܐ: ܘܥܰܠ ܚܰܛܳܝ̈ܶܐ ܘܡܰܣܟ̈ܠܳܢܶܐ: ܘܥܰܠ ܡܰܠ̈ܟܶܐ ܘܪ̈ܝ̣ܫܳܢܶܐ ܘܥܰܠ ܪ̈ܳܥܰܘܳܬܳܐ ܘܥܰܠ̈ܠܳܢܶܐ ܕܥܺܕܬܳܟ: ܘܥܰܠ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܡܰܪܥܝ̣ܬܳܟ ܘܥܰܠ ܝ̣ܚܝ̣̈ܕܳܝܶܐ ܘܕܰܝܪ̈ܳܝܶܐ ܕܥܰܡܳܟ: ܘܥܰܠ ܥܰܢܝ̈ܕܰܝܢ ܡܗܰܝܡ̈ܢܶܐ ܕܫܟܶܒܘ̱ ܒܳܟ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܠܪܘ̣ܚܳܟ ܩܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀