ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܳܣܝܳܐ ܛܳܒܳܐ ܘܣܰܓܝ̣ ܪ̈ܰܚܡܶܐ ܡܳܪܝܳܐ: ܡܶܛܽܠ ܡܚܝ̣ܠܘ̣ܬ ܟܝܳܢܳܐ ܐ̱ܢܳܫܳܝܳܐ ܐܶܬ̣ܬܰܚܬܝ̣: ܘܕܰܟܝ̣ ܓܰܪ̈ܒܶܐ ܘܦ̣ܰܬܰܚ ܠܰܣܡܰܝ̈ܳܐ: ܘܰܐܩܝ̣ܡ ܠܡܝ̣̈ܬܶܐ: ܒܳܟ ܢ̣ܶܬܕܰܟ̈ܝܳܢ ܢܰܦܫ̈ܳܬܰܢ: ܘܢ̣ܶܬܩܰܕܫܽܘܢ ܦܰܓܪ̈ܰܝܢ: ܘܢ̣ܶܬܦ̈ܰܬܚܳܢ ܥܰܝ̈ܢܶܐ ܕܪ̈ܶܥܝܳܢܰܝܢ ܠܡܶܫܡܰܥ ܦܘ̣ܩ̈ܕܳܢܶܐ ܕܝ̣ܠܳܟ ܐܰܠܳܗ̈ܳܝܶܐ: ܐܰܝܟܰܢܳܐ ܕܥܰܡ ܚܰܛܳܝ̈ܶܐ ܕܬܳܒ̣ܘ̱: ܘܬܰܝ̈ܳܒܶܐ ܕܶܐܙ̣ܕܰܕܰܩܘ̱: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܡܶܛܽܠ ܚܘ̣ܒܶܗ ܘܪܶܚܡܰܬ݀ ܐ̱ܢܳܫܘ̣ܬܶܗ ܡ̣ܶܢ ܫܡܰܝܳܐ ܢܚ̣ܶܬ: ܘܥܰܠ ܐܰܪܥܳܐ ܡܶܛܽܠܳܬܰܢ ܐܶܬ̣ܚܙܝ̣: ܗܰܘ̇ ܕܰܓܒܰܪ̈ܘܳܬܳܐ ܘܬܶܕܡܪ̈ܳܬܳܐ ܦܰܐܝ̈ܳܬܳܐ ܦܰܐܝܽܘܬ ܐܰܠܳܗܳܐܝ̣ܬ ܣܥ̣ܰܪ: ܗܰܘ̇ ܕܚܘ̣ܠ̈ܡܳܢܶܐ ܘܥܘ̣ܕܪ̈ܳܢܶܐ ܡܦܰܬܟ̈ܶܐ ܠܰܓܒܝ̣ܠܬܳܐ ܕܝ̣ܠܶܗ ܫܰܟܶܢ: ܗܰܘ̇ ܕܰܠܓܰܪ̈ܒܶܐ ܕܰܟܝ̣: ܘܠܰܡܫܰܪ̈ܰܝܳܐ ܫ̣ܰܪܰܪ ܘܰܠܡܝ̣̈ܬܶܐ ܢܰܚ̣ܶܡ: ܘܒܰܣܦܝ̣ܢ̱ܬܳܐ ܐܰܝܟ ܒܰܪܢܳܫܳܐ ܕܡ̣ܶܟ: ܗܰܘ̇ ܕܥܶܠܳܝ̈ܶܐ ܘܬܰܚ̈ܬܳܝܶܐ ܥܘ̣ܫܢܳܐ ܕܰܕܚܝ̣ܠܘ̣ܬܳܟ ܡܰܟܪܙܝ̣ܢ: ܘܳܐܦ ܚܢܰܢ ܚܰܛܳܝ̈ܶܐ ܥܰܒ̈ܕܶܐ ܕܝ̣ܠܳܟ: ܣܳܓܕܝ̣ܢܰܢ ܘܡܰܘܕܶܝܢܰܢ ܘܰܡܫܰܒܚܝ̣ܢܰܢ ܥܰܠ ܐܰܦܰܝ̈ ܟܽܠܗܶܝܢ ܬܶܕܡܪ̈ܳܬܳܐ ܕܰܣܥ̣ܰܪܬ ܠܘܳܬܰܢ ܣܶܓܕܬܳܐ ܥܰܡ ܪܟܝ̣ܢܘ̣ܬ ܨܰܘܪ̈ܶܐ ܠܳܟ ܡܩܰܪܒܝ̣ܢܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܝ̣ܬܝܳܐ ܓܢܝ̣ܙܳܐ ܘܠܐ ܡܶܬܥܰܩܒܳܢܳܐ: ܢܘ̣ܗܪܳܐ ܡܬܘ̣ܡܳܝܳܐ ܘܠܳܐ ܡܶܣܬܰܝܟܳܢܳܐ: ܕܶܢܚܳܐ ܫܒܝ̣ܚܳܐ ܘܠܳܐ ܡܶܬܡܰܠܠܳܢܳܐ: ܓܰܐܝܳܐ ܕܓܰܐܝܳܐܝ̣ܬ ܡܶܬܓܰܝܰܐܐ: ܬܗܘ̣ܡܳܐ ܠܳܐ ܡܶܬܡܰܫܚܳܢܳܐ ܕܐ̱ܪ̈ܳܙܶܐ ܠܳܐ ܡܶܬܡܰܠ̈ܠܳܢܶܐ: ܡܰܒܘ̣ܥܳܐ ܫܦܝ̣ܥܳܐ ܕܥܘ̣ܕܪ̈ܳܢܶܐ ܡ̣ܶܢ ܝܰܡܳܐ ܠܳܐ ܡܶܬܕܰܪܟܳܢܳܐ ܕܚܶܟܡܬܳܐ ܫܰܪܝ̣ܪܬܳܐ ܪܳܕܶܐ: ܡܬܘ̣ܡܳܝܳܐ ܕܡ̣ܶܢ ܡܬܘ̣ܡܳܝܳܐ: ܕܠܳܐ ܫܘܪܳܝ ܝ̣ܠܝ̣ܕ ܘܰܠܗܰܠ ܡ̣ܶܢ ܙܰܒ̈ܢܶܐ: ܘܗܰܘ̈ܢܶܐ ܕܰܥܒܝ̣̈ܕܶܐ ܐܝ̣ܬܰܘܗ̱ܝ ܝܰܠܕܶܗ: ܡܶܠܬܳܐ ܐܰܠܳܗܳܐ ܒܪܳܐ ܕܡ̣ܶܢ ܐܰܒܳܐ ܐܶܬ̣ܝ̣ܠܶܕ ܕܠܳܐ ܫܘ̣ܪܳܝ: ܘܫܘ̣ܠܳܡܳܐ ܠܰܝܬ ܠܶܗ: ܗܰܘ̇ ܕܡܶܛܽܠܳܬܰܢ ܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܐܶܬ̣ܒܰܣܰܪ ܠܳܐ ܡܶܫܬܰܚܠܦܳܢܳܐܝ̣ܬ: ܘܙܰܝܢܳܐ ܠܳܐ ܡܶܬܒܰܙܥܳܢܳܐ ܡ̣ܶܢ ܡܰܝ̈ܳܐ ܠܰܢ ܐܰܠܒ̣ܶܫ ܒܰܥܡܳܕܶܗ: ܐܰܝܟܰܢܳܐ ܕܠܘ̣ܩܒܰܠ ܒܥܶܠ̈ܕܒܳܒܶܐ ܕܓܶܢܣܰܢ ܢ̇ܰܩܪܶܒ ܘܢ̇ܶܙܟܶܐ: ܗܰܘ̇ ܕܒܝܰܕ ܨܰܘܡܶܗ ܙܟ̣ܳܝܗ̱ܝ ܘܙܳܟܘ̣ܬܳܐ ܒܰܩܢܘ̣ܡܶܗ ܚܰܘܺܝ̣ ܠܰܢ: ܐܳܣܝܳܐ ܛܳܒܳܐ ܘܥܳܨܽܘ̣ܒܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܕܝ̣ܠܰܢ: ܗܰܘ̇ ܕܗܽܘ̣ ܠܶܗ ܩ̣ܪܳܐ ܘܰܠܘܳܬܰܢ ܐܶܬ̣ܳܐ ܒܪ̈ܰܚܡܰܘܗ̱ܝ: ܠܘܳܬܳܟ ܓܶܝܪ ܡܳܪܝ̱ ܬܰܠ̈ܝܳܢ ܥܰܝ̈ܢܰܝܢ ܒܥܶܕܳܢܳܐ ܗܳܢܳܐ ܘܰܒܟܽܠܗܽܘܢ ܥܶܕ̈ܳܢܶܐ ܘܫܳܥ̈ܶܐ ܘܝܰܘܡ̈ܳܬܳܐ ܕܚܰܝܰܝ̈ܢ: ܘܠܳܟ ܩܳܪܶܝܢܢ ܠܺܐܝܳܠܳܐ ܕܝ̣ܠܰܢ ܕܳܘܰܝ̈ܳܐ ܘܰܡܚܝ̣̈ܠܶܐ: ܕܬ̣ܶܬܦܰܢ ܥܠܰܝܢ ܐܰܝܟ ܣܘ̣ܓܳܐܐ ܕܰܡܪܰܚܡܳܢܘ̣ܬܳܟ: ܘܰܬ̣ܫܰܟܶܢ ܚܘ̣ܠ̈ܡܳܢܶܐ ܥܦܝ̣̈ܦܶܐ ܘܰܡܦ̈ܰܬܟܶܐ ܠܢܰܦܫ̈ܳܬܳܐ ܘܦܰܓܪ̈ܶܐ ܕܝ̣ܠܰܢ: ܘܫܘ̣ܚ̈ܢܶܐ ܡܰܟܝ̈ܳܢܶܐ ܗܳܢܽܘܢ ܕܰܒܗܽܘܢ ܐܶܬ̣ܡܰܚܝ̣ܢܰܢ: ܒܳܟ ܐܳܣܝܳܐ ܕܝ̣ܠܢ ܚܰܝܽܘܣܬܳܢܳܐ ܢ̇ܶܣܰܒ ܚܘ̣ܠܡܳܢܳܐ: ܘܡܶܬܟܰܫܦܝ̣ܢܰܢ ܗܳܟܝ̣ܠ ܘܰܡܦܝ̣ܣܝ̣ܢܰܢ ܠܛܳܒܘ̣ܬܳܟ: ܕܠܳܐ ܠܪܘ̣ܚܩܳܐ ܡܶܢܰܢ ܢܶܗ̣ܘܽܘܢ ܥܘ̣ܕܪ̈ܳܢܰܝܟ: ܐܳܦܠܳܐ ܠܣܰܓܺܝܽܐܘ̣ܬ ܪ̈ܰܚܡܶܐ ܕܝ̣ܠܳܟ ܬ̣ܶܟܠܶܐ ܡ̣ܶܢܢ ܚܰܛܳܝ̈ܶܐ ܥܰܒ̈ܕܰܝܟ ܡܶܛܽܠ ܣܰܓܺܝܐܘ̣ܬܳܐ ܕܒܝ̣̈ܫܳܬܳܐ ܕܝ̣ܠܰܢ: ܐܶܠܳܐ ܐܶܬ̣ܦܰܢ ܡܳܪܝܳܐ ܐܰܝܟ ܕܰܡܥܳܕ ܐܰܢ̱ܬ: ܘܒܰܛܶܠ ܡܰܪ̈ܕܘܳܬܳܐ ܕܪܘ̣ܓܙܳܐ ܡܶܢܰܢ: ܐܰܢ̱ܬ ܗ̱ܘ̣ ܓܶܝܪ ܐܝ̣ܬܰܝܟ ܗܰܘ ܕܥܰܠ ܟܽܠ ܫܦܝ̣ܥܝ̣ܢ ܪ̈ܰܚܡܰܝܟ: ܘܚܰܝܽܘܣܬܳܢܘ̣ܬܳܟ ܥܰܠ ܟܽܠ ܦܪܝ̣ܣܳܐ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܪ̈ܒܶܐ ܕܰܟܝ̣ܬ: ܘܠܰܣܡ̈ܰܝܳܐ ܦܰܬܰܚ̣ܬ: ܘܠܰܡܫܰܪ̈ܰܝܳܐ ܫ̣ܰܪܰܪܬ: ܘܠܰܓܒܝ̣ܠܬܳܐ ܕܝ̣ܠܳܟ ܡ̣ܶܢ ܕܰܝ̈ܘܶܐ ܚ̣ܰܪܰܪܬ: ܐܰܢ̱ܬ ܗ̱ܘ̣ ܗܰܘ̇ ܕܠܶܐܫܳܬܳܐ ܐܰܥܪܶܩ̣ܬ: ܘܠܰܚܡܳܬܶܗ ܕܦܶܛܪܘ̣ܣ ܚܠܝ̣ܡܬܳܐ ܐܰܩܝ̣ܡܬ: ܐܰܢ̱ܬ ܗ̱ܘ̣ ܗܰܘ̇ ܕܠܐܝ̣ܕܳܐ ܝܰܒܝ̣ܫܬܳܐ ܦܫ̣ܰܛܬ: ܘܰܠܓܰܠ̱̈ܠܶܐ ܕܝܰܡܳܐ ܦܳܩܘ̣ܕܳܐܝ̣ܬ ܟܠ̣ܰܝܬ ܘܐܰܩܝ̣ܡܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܐܢ̱ܬܬܳܐ ܡܡܰܚܰܝܬܳܐ ܘܰܬܪܝ̣ܥܰܬ݀ ܕܡܳܐ ܒܟܶܢܦܳܐ ܕܡܰܪܛܘ̣ܛܳܟ ܠܰܕܡܳܐ ܕܝ̣ܠܳܗ̇ ܐܰܘܒܶܫ̣ܬ: ܘܠܚܰܛܳܝ̇ܬܳܐ ܒܝܰܕ ܕܶܡܥܶܝ̈ܗ̇ ܚܰܣܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܟܢܰܥܢܳܝܬܳܐ ܡܶܛܽܠ ܗܰܝܡܳܢܘ̣ܬܳܗ̇ ܠܒܰܪܬܳܗ̇ ܚܠܝ̣ܡܬܳܐ ܥܒ̣ܰܕܬ: ܘܰܠܗܳܝ̇ ܕܰܟܦܝ̣ܦܳܐ ܗ̱ܘܳܬ݀ ܚܘ̣ܠܡܳܢܳܐ ܫܰܟܶܢ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܒܰܪ̱ܬ ܝܽܘܐܳܪܳܫ ܘܠܰܒܪܳܗ̇ ܕܰܐܪܡܰܠܬܳܐ ܢܰܚܶܡ̣ܬ: ܘܰܠܠܳܥܳܙܳܪ ܡ̣ܶܢ ܒܳܬܰܪ ܕܰܣ̣ܪܝ̣ ܦܳܩܘ̣ܕܳܐܝ̣ܬ ܩ̣ܪܰܝܬ ܘܰܐܩܝ̣ܡܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܡܳܟ̈ܣܶܐ ܙܰܕܶܩ̣ܬ: ܘܰܠܚ̈ܰܛܳܝܶܐ ܐܰܦ̣ܢܝ̣ܬ: ܘܠܰܒܪܳܐ ܐܳܣܘ̣ܛܳܐ ܩܰܒܶܠ̣ܬ: ܘܰܒܡܶܫܬܘ̣ܬܳܐ ܕܰܒܩܳܛܢܶܐ ܡܰܝ̈ܳܐ ܠܚܰܡܪܳܐ ܛܳܒܳܐ ܫܰܚܠ̣ܶܦܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܠܰܚ̈ܡܶܐ ܐܰܣܓܝ̣ܬ: ܘܰܠܟܶܢܫ̈ܶܐ ܣܰܓܺܝ̈ܶܐܐ ܣܰܒܰܥ̣ܬ: ܘܰܠܟܰܦ̈ܢܶܐ ܬܰܪܣܝ̣ܬ ܒܝܰܕ ܡܰܠܦܳܢܘ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ: ܐܰܢ̱ܬ ܗ̱ܘ̣ ܗܰܘ̇ ܕܰܠܟܺܐܒܰܝ̈ܢ ܪܕܰܦ̣ܬ: ܘܰܠܟܘ̣ܪ̈ܗܳܢܰܝܢ ܐܰܣܝ̣ܬ: ܘܡ̈ܰܬܠܶܐ ܦܳܪ̈ܘ̣ܩܳܝܶܐ ܠܥܘ̣ܕܪܳܢܰܢ ܪܰܟܶܒܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܫܳܡܪܳܝܬܳܐ ܡܰܝ̈ܳܐ ܚܰܝ̈ܶܐ ܝܰܗ̣ܒܬ: ܘܰܠܗܰܘ̇ ܕܡ̣ܶܢ ܓܰܝ̈ܳܣܶܐ ܐܶܬ̣ܡܰܚܝ̣ ܒܪܶܚܡܰܬ݀ ܐ̱ܢܳܫܘ̣ܬܳܟ ܚܳܢ̣ܬ: ܘܰܒܚܰܡܪܳܐ ܘܡܶܫܚܳܐ ܥܨܰܒ̣ܬ: ܘܰܒܚܰܫ̈ܰܝܟ ܡܰܚ̈ܝܳܢܶܐ ܘܠܳܐ ܥܕܺܝ̣̈ܠܶܐ ܦܪܰܩ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܡܶܛܽܠܳܬܰܢ ܥܰܡܰܢ ܡܕܰܒܪܳܢܳܐܝ̣ܬ ܐܶܬ̣ܗܰܦܰܟܬ ܘܰܗ̣ܘܰܝܬ ܐܰܟܘܳܬܰܢ ܕܰܐܟܘܳܬܳܟ ܬ̣ܶܥܒܶܕ ܠܰܢ: ܐܰܢ̱ܬ ܗ̱ܘ̣ ܗܰܘ̇ ܕܐܘ̣ܪܚܳܐ ܕܚܰܝ̈ܶܐ ܕܪܰܫ̣ܬ ܠܰܢ: ܘܰܫܒܝ̣ܠܳܐ ܕܰܠܗܳܕܶܐ ܡܰܘܒܶܠ ܬܪܝ̣ܨܳܐܝ̣ܬ ܓܠ̣ܰܝܬ ܠܰܢ: ܘܒܳܥܶܝܢܢ ܡ̣ܶܢ ܡܪܰܚܡܳܢܘ̣ܬܳܟ ܡܳܪܝܳܐ ܕܰܠܟ̈ܺܐܒܶܐ ܘܟܘ̣ܪ̈ܗܳܢܶܐ ܕܝ̣ܠܰܢ ܟܣ̈ܰܝܳܐ ܘܰܓ̈ܠܰܝܳܐ ܐܰܣܳܐ: ܠܣܰܡܝܽܘܬܳܐ ܕܗܰܘܢܰܝ̈ܢ ܐܰܢܗܰܪ ܒܝ̣ܕܰܥܬܳܐ ܕܝ̣ܠܳܟ ܐܰܠܳܗܳܝ̇ܬܳܐ: ܘܠܰܡܫܰܪܝܽܘܬܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܕܝ̣ܠܰܢ ܚܰܝܶܨ ܘܫܰܪܰܪ: ܘܰܠܚܰܘܒ̈ܶܐ ܘܰܚܛܳܗ̈ܶܐ ܕܝ̣ܠܰܢ ܫܒܘ̣ܩ ܘܚܰܣܳܐ: ܘܠܰܩܪ̈ܳܒܶܐ ܘܬܰܟ̈ܬܘ̣ܫܶܐ ܕܐܳܟܶܠܩܰܪܨܳܐ ܘܰܕܪ̈ܘ̣ܚܶܐ ܒܝ̣̈ܫܳܬܳܐ ܡ̣ܶܢ ܒܰܝܢܳܬܰܢ ܪܕܘ̣ܦ ܘܛܰܠܶܩ: ܘܰܡܠܝ̣ ܠܰܢ ܣܰܒܪܳܐ ܘܚܘ̣ܒܳܐ ܘܗܰܝܡܳܢܘ̣ܬܳܐ: ܘܫܰܝܢܳܐ ܕܝ̣ܠܳܟ ܐܰܠܳܗܳܐ ܘܰܫܠܳܡܳܟ ܢ̣ܶܗܘܶܐ ܥܰܡܰܢ ܒܟܽܠܙܒܰܢ ܘܰܐܫܘܳܐ ܠܰܢ ܕܕܰܟܝܳܐܝ̣ܬ ܘܩܰܕܝܫܳܐܝ̣ܬ ܢ̇ܫܰܡܠܶܐ ܠܰܐܓܘ̣ܢܳܐ ܗܳܢܳܐ ܪܘ̣ܚܳܢܳܝܳܐ ܕܨܰܘܡܳܐ ܩܰܕܝ̣ܫܳܐ: ܘܟܰܕ ܠܳܐ ܒܣܝ̣ܪܝ̣ܢܰܢ ܡ̣ܶܢ ܬܺܐܪ̈ܳܬܰܢ ܢ̇ܡܰܢܰܥ ܠܦܶܨܚܳܐ ܩܰܕܝ̣ܫܳܐ: ܟܰܕ ܡܫܰܒܚܝ̣ܢܰܢ ܠܳܟ ܬܶܫܒܘ̣ܚܬܳܐ ܐܰܡܝ̣ܢܬܳܐ: ܘܠܰܐܒܘ̣ܟ ܬܰܘܕܝ̣ܬܳܐ ܚܕܰܬܳܐ ܘܰܠܪܘ̣ܚܳܟ ܩܰܕܝ̣ܫܳܐ ܣܶܓܕܬܳܐ ܡܳܪܳܢܳܝܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܫܘ̣ܒܚܳܐ ܠܳܟ ܐܳܣܝܳܐ ܛܳܒܳܐ ܘܡܳܪܳܐ ܫܡܰܝܳܢܳܐ: ܕܰܢܚ̣ܶܬܬ ܡ̣ܶܢ ܡܶܕܝܳܪ̈ܰܝܟ ܪ̈ܳܡܶܐ ܘܰܡܥܰܠ̈ܰܝܳܐ: ܘܰܐܣ̣ܝ̣ܬ ܟܺܐܒ̈ܶܐ ܘܟܘ̣ܪ̈ܗܳܢܶܐ ܕܰܓܒܝ̣ܠܬܳܟ: ܐܰܣܳܐ ܡܳܪܝ̱ ܐܳܦ ܗܳܫܳܐ ܠܟ̈ܺܐܒܶܐ ܕܢܰܦܫ̈ܳܬܰܢ ܘܰܕܦܰܓܪ̈ܰܝܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܰܐܠܳܗܘ̣ܬܳܟ ܡܪܰܝܰܡܬܳܐ܆ ܘܫܰܟܶܢ ܒܶܗ ܪ̈ܰܚܡܶܐ ܕܚܘ̣ܣܳܝܳܐ ܠܟܽܠܳܗ̇ ܥܳܢ̈ܳܐ ܕܝ̣ܠܳܟ: ܘܰܢܝܳܚܬܳܐ ܛܘ̣ܒܬܳܢܝ̣ܬܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܕܢ̇ܰܣܶܩ ܠܟ ܫܘ̣̈ܒܚܶܐ ܫܦܰܝ̈ܳܐ ܘܗܘ̣ܠ̈ܳܠܶܐ ܕܟܰܝ̈ܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀