ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܰܐܡܝ̣ܢܳܐܝ̣ܬ ܢ̇ܫܰܡܠܶܐ ܕܘ̣ܟܪܳܢ ܩܰܕܝ̣ܫܰܝ̈ܟ ܐܰܪܒܥܝ̣ܢ ܣܳܗ̈ܕܶܐ ܩܰܕܝ̣̈ܫܶܐ ܘܢܰܨܝ̣̈ܚܶܐ: ܒܨܰܘܡܳܐ ܕܰܟܝܳܐ ܘܒܰܨ̈ܠܰܘܳܬܳܐ ܚܦܝ̣̈ܛܳܬܳܐ: ܘܰܒܚܘ̣ܒܳܐ ܘܰܒܗܰܝܡܳܢܘ̣ܬܳܐ ܕܰܫܪܳܪܳܐ: ܐܰܝܟܰܢܳܐ ܕܰܒܝܰܕ ܒܳܥ̈ܘܳܬܗܽܘܢ ܕܰܪ̈ܚܘ̣ܡܰܝܟ ܢ̇ܶܫܬܰܘܙܰܒ ܡ̣ܶܢ ܩܰܪܣܘ̣ܬܳܐ ܡܚܰܒܠܳܢܝ̣ܬܳܐ ܕܢܰܦܫܳܐ ܘܰܕܦܰܓܪܳܐ: ܘܡ̣ܶܢ ܩܘ̣ܪܳܐ ܘܰܓܠܝ̣ܕܳܐ ܕܰܠܬܰܪܥܝ̣ܬܳܐ ܡܰܘܩܶܕ: ܘܡ̣ܶܢ ܪܘ̣ܚܳܐ ܓܰܪܒܝ݂ܳܝ݂ܬܳܐ ܕܰܠܗܰܘܢܳܐ ܡܕܰܘܕܳܐ: ܘܡ̣ܶܢ ܡܰܝ̈ܳܐ ܕܓܳܪܦܝ̣ܢ ܠܚܰܝ̈ܠܶܐ ܕܢܰܦܫܳܐ ܠܰܐܒܕܳܢܳܐ: ܘܗܰܒܠܰܢ ܕܥܰܡܗܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܰܠܟܳܐ ܕܡܰܠ̈ܟܶܐ ܘܡܳܪܳܐ ܕܡܳܪ̈ܰܘܳܬܳܐ: ܕܚ̣ܰܝܶܠ ܘܥ̣ܰܕܰܪ ܠܰܐܬܠ̈ܝ̣ܛܰܘܗ̱ܝ ܠܘ̣ܩܒܰܠ ܟܽܠ ܫܶܢܕ̈ܶܐ ܕܪ̈ܳܕܘ̣ܦܶܐ: ܠܗܰܘ̇ ܕܒܰܐܪܒܥܝ̣ܢ ܝܰܘ̈ܡܳܬܳܐ ܩܰܕܝ̣̈ܫܶܐ ܕܨܰܘܡܳܐ ܟܰܠ̣ܶܠ ܘܢ̣ܰܨܰܚ ܠܣܳܗ̈ܕܶܐ ܩܰܕܝ̣̈ܫܶܐ ܟܰܕ ܐܰܡܣ̣ܰܪܘ̱ ܥܰܠ ܩܘ̣ܪܳܐ ܘܰܓܠܝ̣ܕܳܐ ܕܝܰܡܬܳܐ ܠܰܝ̈ܠܰܝ ܐܝ̣ܡܳܡ: ܫܶܠܡ̣ܰܬ݀ ܒܗܽܘܢ ܡܶܠܬܶܗ ܕܕܰܘܝܺܕ ܢܒܺܝܳܐ ܕܶܐܡ̣ܰܪ ܕܰܐܥܶܠ̣ܬܳܢ ܠܢܘ̣ܪܳܐ ܘܰܠܡܰܝ̈ܳܐ: ܘܰܐܦܶܩ̣ܬܳܢ ܠܰܪܘܳܚܬܳܐ ܘܠܰܢܦܺܐܫܳܐ ܘܰܒܗܽܘܢ ܐܶܫܬܰܗ̣ܝܰܬ݀ ܚܶܡܬܶܗ ܕܕܰܝܳܢܳܐ ܛܪܘ̣ܢܳܐ ܘܰܕܠܳܐ ܪ̈ܰܚܡܶܐ: ܘܰܐܝܟ ܫܘ̣ܪ̈ܶܐ ܬܰܩܝ̣̈ܦܶܐ ܘܚܶܣ̈ܢܶܐ ܡܪ̈ܝ̣ܕܶܐ ܗ̱ܘܰܘ ܠܥܺܕܬܳܐ ܦܪܝ̣ܩܰܬ݀ ܒܰܕܡܳܐ ܕܰܡܫܝ̣ܚܳܐ ܐܰܠܳܗܳܐ: ܗܳܢܽܘܢ ܕܰܐܝܟ ܐܰܪ̈ܙܶܐ ܪ̈ܳܡܶܐ ܘܰܗܕܝ̣ܪ̈ܶܐ: ܘܰܐܝܟ ܫܰܪ̈ܘܰܝܢܶܐ ܫܰܦܝ̣ܪ̈ܰܝ ܣܰܘ̈ܟܶܐ ܐܶܬ̣ܢܨܶܒܘ̱ ܥܰܠ ܝܰܡܬܳܐ ܕܡܰܝ̈ܳܐ: ܘܰܒܝܰܕ ܡܣܰܝܒܪܳܢܘ̣ܬܗܽܘܢ ܘܰܚܘܝܺܚܘܽܬܳܐ ܕܨܶܒܝܳܢܗܽܘܢ ܛܳܒܳܐ: ܫܩ̣ܰܠܘ̱ ܟܠܝ̣̈ܠܶܐ ܕܠܳܐ ܚܳܡܶܝܢ ܘܠܳܐ ܡܶܬܚܰܒܠܝ̣ܢ: ܗܳܢܽܘܢ ܕܒܰܨ̈ܠܰܘܳܬܗܽܘܢ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܰܬ̣ܫܰܟܶܢ ܠܰܢ ܚܘܽܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܒܗܳܢܳܐ ܝܰܘܡܳܐ ܩܰܕܝ̣ܫܳܐ ܕܥ̱ܘ̣ܗܕܳܢܗܽܘܢ ܡܫܰܡܠܶܝܢܰܢ: ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ݂̈ܢ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܠܥ̱ܽܘ̣ܗܕܳܢܳܐ ܕܝ̣ܠܟܽܘܢ ܪܚܝ̣ܡܳܐ ܡܫܰܡܠܶܝܢܰܢ ܐܳܘ ܐܰܪܒܥܝ̣ܢ ܣܳܗ̈ܕܶܐ ܩܰܕܝ̣̈ܫܶܐ ܐܶܬ̣ܟܰܢܰܫܢܰܢ: ܘܰܠܝܰܘܡܳܐ ܫܒܝ̣ܚܳܐ ܕܕܘܽܟܪ̈ܳܢܰܝܟܽܘܢ ܐܶܬ̣ܝܢܰܢ: ܐܳܘ ܐܰܬܠܝ̣̈ܛܶܐ ܢܰܨܝ̣̈ܚܶܐ ܘܰܠܥܰܕܥܺܐܕܳܐ ܕܝ̣ܠܟܽܘܢ ܐܰ‌ܠܳܗܳܝܳܐ ܒܚܰܕܘܽܬܳܐ ܘܒܰܪܘܳܙܳܐ ܡܚܰܓܶܝܢܰܢ: ܐܳܘ ܐܰܬܠܝ̣̈ܣܶܐ ܚܠܝ̣̈ܨܶܐ ܡܶܬܓܰܢ̱ܒܪ̈ܰܝ ܒܚܰܝܠܳܐ ܐܰ‌ܠܳܗܳܝܳܐ: ܘܰܠܣܝ̣ܥܰܬܟܽܘܢ ܡܚܰܣܢܰܬ݀ ܒܙܰܝܢܳܐ ܕܪܘ̣ܚܳܐ ܩܰܕܝ̣ܫܳܐ ܚܳܙܶܝܢܰܢ: ܘܠܰܡܟܰܠܠܳܢܳܐ ܕܰܐܓ̈ܘܽܢܰܝܟܽܘܢ ܡܫܝ̣ܚܳܐ ܡܳܪܟܽܘܢ ܫܳܐܠܝ̣ܢܰܢ: ܕܫܰܝܢܳܐ ܘܰܫܠܳܡܳܐ ܒܗܳܢܳܐ ܝܰܘܡܳܐ ܕܕܘܽܟܪ̈ܳܢܰܝܟܽܘܢ ܢ̣ܫܰܟܶܢ ܠܰܢ: ܘܪ̈ܰܚܡܶܐ ܘܰܚܢܳܢܳܐ ܡ̣ܶܢ ܠܘܳܬܶܗ ܠܰܢ ܢܶܬܶܠ: ܘܚܘܽܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܢܰܣܪܰܚ ܠܰܢ: ܐܰܝܟܰܢܳܐ ܕܠܰܦܠܰܓܳܐ ܕܝ̣ܠܗܽܘܢ ܢ̇ܩܰܠܶܣ ܘܥܰܡ ܥܝ̣ܪ̈ܰܝ ܪܰܘܡܳܐ ܒܰܦܨܝ̣ܚܘܽܬܳܐ ܩܳܥܶܝܢܰܢ ܘܳܐܡ̇ܪܝ̣ܢܰܢ: ܐܳܘ ܠܓܘ̣ܕܳܐ ܕܰܐܚ̈ܶܐ ܪ̈ܚܝ̣ܡܶܐ ܟܡܳܐ ܫܰܦܝ̣ܪܳܐ: ܘܡܰܢܘ̣ ܣܳܦܶܩ ܕܢ̣ܶܬܢܶܐ ܫܰܪܒܳܐ ܕܰܐܬܠܝ̣ܛܘ̣ܬܟܽܘܢ ܐܳܘ ܣܳܗ̈ܕܶܐ ܢܰܨܝ̣̈ܚܶܐ: ܫܰܘܝ݂ܰܝ݂ ܒܰܐܬܠܝ̣ܣܘ̣ܬܳܐ ܪܘ̣ܚܳܢܳܝܬܳܐ ܘܡܰܚܝܳܢܝ̣ܬܳܐ ܕܠܘ̣ܩܒܰܠ ܒܶܠܶܐܝܰܪ ܛܰܪܟܳܢܳܐ ܘܡܳܪܘ̣ܕܳܐ ܣ̣ܕܰܪܘ̱ ܬܰܟܬܘܽܫܳܐ: ܡܫܰܦ̈ܠܰܝ ܠܚܰܝܠܶܗ ܕܡܰܐܟܣܝ̣ܡܝܰܐܢܘܳܣ ܡܰܠܟܳܐ ܛܪܘ̣ܢܳܐ: ܘܣܳܚ̈ܘܽܦܰܘܗ̱ܝ ܕܰܐܓܪܝ̣ܩܶܠܰܐܘܳܣ ܕܰܝܳܢܳܐ ܒܝ̣ܫܳܐ: ܐܰܪܒܥܝ̣ܢ ܐܝ̣ܠܳܢ̈ܶܐ ܕܰܫܘܰܚ̣ܘ̱ ܒܓܰܢܬܳܐ ܕܡܰܠܟܳܐ ܡܫܝ̣ܚܳܐ ܠܥܶܠ ܡ̣ܶܢ ܝܰܡܬܳܐ ܕܣܶܒܰܣܛܺܝܰܐ: ܐܰܪܒܥܝ̣ܢ ܢܫܶܪ̈ܶܐ ܕܛܳܣ̣ܘ̱ ܒܰܒܪܝ̣ܬܳܐ ܘܰܙܪܰܥ̣ܘ̱ ܫܰܝܢܳܐ ܒܓܰܘ ܥܳܡܰܪܬܳܐ: ܐܰܪܒܥܝ̣ܢ ܚܠܝ̣̈ܨܶܐ ܕܩܳܡ̣ܘ̱ ܒܕܰܪܳܐ ܠܘ̣ܩܒܰܠ ܣܳܛܳܢܳܐ ܘܰܐܩܠܝ̣ܘ ܥܰܠ ܠܘ̣ܚ̈ܶܐ: ܐܰܪܒܥܝ̣ܢ ܢܰܘ̈ܣܶܐ ܕܟܰܝ̈ܳܐ ܕܰܒܗܽܘܢ ܥܶܡ̣ܪܰܬ݀ ܪܘ̣ܚܳܐ ܕܩܘ̣ܕܫܳܐ: ܐܰܪܒܥܝ̣ܢ ܐܝ̣ܙܓ̈ܰܕܶܐ ܡܩܰܒ̈ܠܰܝ ܫܰܝܢܳܐ ܘܣܳܗ̈ܕܰܘܗ̱ܝ ܕܰܒܪܳܐ ܝ̣ܚܝ̣ܕܳܝܳܐ: ܐܰܪܒܥܝ̣ܢ ܬܳܓ̈ܶܐ ܕܰܡܨܰܒܬܝ̣ܢ ܒܰܕܡܳܐ ܚܰܣܝܳܐ ܕܰܐܬܠܝ̣ܣܘ̣ܬܳܐ: ܐܰܪܒܥܝ̣ܢ ܟܠܝ̣̈ܠܶܐ ܕܰܓܕܝ̣ܠܝ̣ܢ ܒܚܰܫ̈ܶܐ ܩܫܰܝ̈ܳܐ ܕܰܙܩܝ̣ܦܘ̣ܬܳܐ: ܐܰܪܒܥܝ̣ܢ ܫܡܳܗ̈ܶܐ ܕܰܪܫܝ̣ܡܝ̣ܢ ܒܰܕܡܳܐ ܚܢܝ̣ܓܳܐ ܕܣܳܗܕܘܽܬܳܐ: ܐܰܪܒܥܝ̣ܢ ܐܳܣܰܘ̈ܳܬܳܐ ܕܡܰܐܣܶܝܢ ܕܠܳܐ ܥܨܳܒ̈ܶܐ ܠܢܰܦ̈ܫܳܬܳܐ ܟܪ̈ܝ̣ܗܳܬܳܐ: ܐܰܪܒܥܝ̣ܢ ܢܶܨ̈ܒܳܬܳܐ ܕܰܫܘܰܚ̣̈ܝ̱ ܒܥܺܕܬܳܐ ܩܰܕܝ̣ܫܬܳܐ ܕܰܡܫܝ̣ܚܳܐ: ܐܰܪܒܥܝ̣ܢ ܙܰܟܳܝ̈ܶܐ ܕܶܐܬܟ̣ܰܬܰܫܘ̱ ܠܘ̣ܩܒܰܠ ܛܰܠܝܘܽܬܳܐ ܘܰܙܟ̣ܰܘ ܒܰܐܓܽܘܢܳܐ: ܐܰܪܒܥܝ̣ܢ ܟܰܘ̈ܟܒܶܐ ܢܰܗܝ̣ܪ̈ܶܐ ܕܰܢܦ̣ܰܩܘ̱ ܡ̣ܶܢ ܐܰܪܥܳܐ ܕܩܰܦܰܕܽܘܩܺܝܰܐ ܘܩܳܡܘ̱ ܩܕܳܡ ܡܰܠܟܳܐ ܡܰܟܣܝ̣ܡܝܰܐܢܘ̣ܣ ܘܰܐܒܗ̣ܶܬܘ̱ ܠܫܳܢܝܘܽܬܶܗ: ܐܰܪܒܥܝ̣ܢ ܡܰܠܳܚ̈ܶܐ ܪ̈ܘܽܚܳܢܳܝܶܐ ܕܰܒܠܶܫܳܢ̈ܶܐ ܕܪܘ̣ܚܳܐ ܩܰܕܝ̣ܫܳܐ ܐܰܟܶܣ̣ܘ̱ ܘܦܰܪܣܝ̣ܘ ܠܛܳܥܝܘܽܬܶܗ ܕܰܐܓܪܝ̣ܩܶܠܰܐܘܳܣ ܐܺܝ̣ܓܡܘܽܢܳܐ: ܐܰܪܒܥܝ̣ܢ ܩܘ̣ܒܰܪ̈ܢܝ̣ܛܶܐ ܡܗܝ̣ܪ̈ܶܐ ܕܰܙܩ̣ܰܪܘ̱ ܒܰܡܣܰܝܒܪܳܢܘ̣ܬܳܐ ܕܝ̣ܠܗܽܘܢ ܢܰܚܬܳܐ ܠܥܺܕܰܬ݀ ܩܘ̣ܕܫܳܐ: ܐܰܪܒܥܝ̣ܢ ܚܠܝ̣̈ܨܶܐ ܐܰܪ̈ܙܶܐ ܪ̈ܳܡܶܐ ܕܒܰܕܡܘܽܬ ܥܰܡ̈ܘ̣ܕܶܐ ܕܢܘ̣ܗܪܳܐ ܩܳܡ̣ܘ̱ ܗ̱ܘܰܘ ܒܝܰܡܬܳܐ ܠܶܠܝܳܐ ܟܽܠܶܗ: ܐܰܪܒܥܝ̣ܢ ܓܰܢ̱ܒܳܪ̈ܶܐ ܕܠܳܐܟܶܠܩܰܪܨܳܐ ܚܰܝܶܒ̣ܘ̱ ܒܰܩܪܳܒܳܐ: ܐܰܪܒܥܝ̣ܢ ܢܰܚܫܝ̣ܪ̈ܬܳܢܶܐ ܕܶܐܫܬܝ̣ܘ ܓܠܝ̣ܕܳܐ ܘܶܐܬܪܰܒܝ̣ܘ ܒܪܰܛܝ̣ܒܘ̣ܬܳܐ: ܐܰܪܒܥܝ̣ܢ ܐܝ̣ܠܳܢ̈ܶܐ ܕܩܝ̣ܢܳܘܡܳܘܢ ܘܒܰܣܝ̣ܡ ܪܝ̣ܚܳܐ ܕܡ̣ܶܢ ܣܳܢܝ̣ܪ ܘܡ̣ܶܢ ܚܶܪܡܳܘܢ ܡܕܰܝܩܝ̣ܢ: ܐܰܪܒܥܝ̣ܢ ܣ̈ܰܬܶܐ ܕܠܰܐܪܒܥܝ̣ܢ ܣܓ̈ܘ̣ܠܶܐ ܕܰܪܒ̣ܰܘ ܒܟܰܪܡܶܗ ܕܰܡܫܝ̣ܚܳܐ ܘܡ̣ܶܢ ܕܶܐܬܥ̣ܨܰܪ ܡܶܢܗܽܘܢ ܒܰܣ̣ܡܘ̣ܗ̇ ܠܥܺܕܬܳܐ ܡܗܰܝܡܰܢܬܳܐ: ܐܰܪܒܥܝ̣ܢ ܐܶܡܪ̈ܶܐ ܬܰܡܝ̣̈ܡܶܐ ܕܪܝ̣ܫܝ̣ܬܳܐ ܠܡܰܠܟܳܐ ܡܫܝ̣ܚܳܐ ܐܶܬܩ̣ܰܪܰܒܘ̱ ܘܥܰܠ̣ܘ̱ ܠܰܣܡܳܟܳܐ ܕܚܰܫ̈ܘܰܗ̱ܝ: ܐܰܪܒܥܝ̣ܢ ܐܶܠܦܳܪ̈ܶܐ ܕܥܰܠ ܪܝ̣ܫ ܙܳܘܝ̣ܬܳܐ ܩܳܝܡܝ̣ܢ ܥܰܡ ܡܰܠܳܚܳܐ ܪܰܒܗܽܘܢ ܡܫܝ̣ܚܳܐ: ܐܰܪܒܥܝ̣ܢ ܐܶܡܪ̈ܶܐ ܕܶܐܬܦ̣ܪܶܫܘ̱ ܡ̣ܶܢ ܓܙܳܪܳܐ ܕܰܓܙܝ̣ܪ̈ܳܬܳܐ ܡܰܬܶܐܡܳܢ ܘܕܰܡܓܰܙܝܳܐ ܠܰܝܬ ܒܗܶܝܢ: ܐܰܪܒܥܝ̣ܢ ܟܰܘ̈ܟܒܶܐ ܨܰܡܘܽܚ̈ܬܳܢܶܐ ܕܰܨܡܰܚ̣ܘ̱ ܒܰܦܢܝ̣ܬܳܐ ܓܰܪܒܝ݂ܳܝ݂ܬܳܐ ܗܳܝ ܕܩܰܦܰܕܘܽܩܝܰܐ: ܐܰܪܒܥܝ̣ܢ ܥܰܡ̈ܘ̣ܕܶܐ ܕܰܫܘܰܚ̣ܘ̱ ܘܰܣܠ̣ܶܩܘ̱ ܒܝܰܡܬܳܐ ܕܰܓܠܝ̣ܕܳܐ: ܐܰܪܒܥܝ̣ܢ ܓܰܢ̱ܒܳܪ̈ܶܐ ܕܰܒܩܘ̣ܪܳܐ ܕܝܰܡܬܳܐ ܐܶܣ̣ܬܰܝܰܛܘ̱ ܘܶܐܬܒ̣ܚܰܪܘ̱ ܘܣܶܠ̣ܩܰܬ݀ ܪܝ̣ܚ ܣܘܳܬܗܽܘܢ ܥܕܰܡܳܐ ܠܰܫܡܰܝܳܐ: ܐܰܪܒܥܝ̣ܢ ܫܡܳܗ̈ܶܐ ܕܰܪܫܝ̣ܡܝ̣ܢ ܒܰܕܡܳܐ ܚܢܝ̣ܓܳܐ ܕܣܳܗܕܘܽܬܳܐ ܗܳܠܶܝܢ ܕܕܘ̣ܟܪ̈ܳܢܰܝܗܽܘܢ ܪܫܝ̣ܡܝ̣ܢ ܒܰܫܡܰܝܳܐ ܘܰܫܡܳܗܰܝ̈ܗܽܘܢ ܡܶܬܟܰܪܙܝ̣ܢ ܒܥܺܕܬܳܐ ܩܰܕܝ̣ܫܬܳܐ ܗܳܢܽܘܢ ܕܩܰܕܡܳܝܗܽܘܢ ܐܝ̣ܬܰܘܗ̱ܝ ܡܝ̣ܠܝ̣ܛܳܘܢ: ܐܝ̣ܘܰܐܢܢܝ̣ܣ ܒܝ̣ܒܺܝܰܐܢܳܘܣ ܟܰܘܕܺܝܳܘܢ ܓܰܐܝܺܘܳܣ ܦܪܺܝܣܩܳܘܣ ܬܶܐܘܳܕܳܠܳܘܳܣ ܬܶܐܘܳܦܝ̣ܠܘܳܣ ܐܰܢܰܐܛܳܘ̣ܠܺܘܳܣ ܡܝ̣ܠܝ̣ܛܽܘܣ ܠܘ̣ܣܝ̣ܡܰܐܟܳܘܣ ܩܠܽܘܕܺܝܳܘܢ ܩܰܐܢܕܝ̣ܕܺܝܳܘܣ ܐܝ̣ܠܝܺܐܢܳܘܣ ܐܝ̣ܣܘ̣ܟܺܝܽܘܣ ܕܘ̣ܡܰܐܛܝܺܢܳܘܣ ܘܰܐܘܰܠܺܝܳܘܣ ܐܽܘܛܘ̣ܟܺܝܽܘܣ ܐܰܘܢܘ̣ܩܺܝܳܘܣ ܐܰܒܢܺܝܩܺܝܳܘܣ ܐܰܠܶܟܣܰܢܕܪܳܘܣ ܩܽܘ̣ܪܺܠܠܽܘܣ ܦܠܰܐܒܺܝܳܘܣ ܣܡܰܐܪܓܕܳܘܣ ܟܣܰܢܬܺܝ̣ܘܳܣ ܣܝ̣ܣܺܝܰܐܢܳܘܣ ܣܶܐܘܶܝ̣ܪܺܝܰܐܢܳܘܣ ܦܝ̣ܠܘ̣ܩܶܛܝ̣ܡܳܘܢ ܐܰܓܰܐܓܺܝܽܘܣ ܐܝ̣ܪܰܐܡܺܝܳܘܣ ܐܰܩܕܝ̣ܩܺܝܽܘܣ ܩܘ̣ܪܺܝܘܳܣ ܐܰܬܰܐܢܰܐܣܺܝܳܘܣ ܣܰܐܩܰܪܕܳܘܢ ܕܘܽܡܰܐܢܰܘܳܣ ܓܽܘ̣ܪܓܽܘ̣ܢܺܝ̣ܘܳܣ ܐܰܩܰܐܩܺܝܳܘܣ ܢܰܝܩܺܘܠܰܐܘܳܣ ܐܺܝܰܐܦܛܺܝ̣ܩܽܘܢ ܩܝ̣ܠܛܽܘ̣ܕܺܝܽܘܣ: ܗܳܠܶܝܢ ܕܡܶܛܠܳܬܗܘܽܢ ܡܙܰܡܰܪ ܢܒܺܝܳܐ ܕܰܘܝ̣ܕ ܟܰܕ ܐܳܡܰܪ ܕܶܐܥܰܠܬܳܢ ܒܢܘ̣ܪܳܐ ܘܰܒܡܰܝ̈ܳܐ ܐܰܦܶܩ̣ܬܳܢ ܠܰܪܘܳܚܬܳܐ: ܟܽܠܗܶܝܢ ܒܰܦܨܝ̣ܚܘܽܬܳܐ ܥܒ̣ܰܕܘ̱ ܘܫܰܡܠܝ̣ܘ ܘܥܰܡܶܗ ܕܰܡܙܰܡܪܳܢܳܐ ܐܰܠܳܗܳܝܳܐ ܩܳܥܶܝܢ ܗ̱ܘܰܘ ܟܰܕ ܐܳܡܪܝ̣ܢ: ܕܗܳܠܶܝܢ ܟܽܠܗܶܝܢ ܓܕ̈ܰܫ̣ܝ̱ ܠܰܢ ܘܠܳܐ ܛܥܰܝܢ ܠܰܫܡܳܟ ܩܰܕܝ̣ܫܳܐ: ܬܗ̣ܰܪܘ̱ ܡܰܠܰܐܟ̈ܶܐ ܒܰܡܥܰܙܝܳܢܘ̣ܬܗܽܘܢ: ܐܶܬ̣ܕܰܡܰܪܘ̱ ܟܪ̈ܘ̣ܒܶܐ ܘܰܣܪ̈ܳܦܶܐ ܒܰܡܚܰܡܣܢܳܢܘ̣ܬܗܽܘܢ: ܘܰܬܡ̣ܰܗܘ̱ ܢܘ̣ܪ̈ܳܢܶܐ ܒܰܡܣܰܝܒܪܳܢܘ̣ܬܗܽܘܢ: ܟܶܢ̈ܫܶܐ ܕܪ̈ܘ̣ܚܳܢܶܐ ܫܰܪܝ̣ܘ ܩܳܥܶܝܢ ܟܰܕ ܐܳܡܪܝ̣ܢ: ܛܘ̣ܒܰܝܟܽܘܢ ܣܳܗ̈ܕܶܐ ܩܰܕܝ̣̈ܫܶܐ ܐܰܪܒܥܝ̣ܢ ܕܰܗ̣ܘܰܝܬܽܘܢ ܒܶܝܬ ܡܰܥܡܪܳܐ ܠܪܘ̣ܚܳܐ ܩܰܕܝ̣ܫܳܐ: ܛܘ̣ܒܰܝܟܽܘܢ ܣܳܗ̈ܕܶܐ ܩܰܕܝ̣̈ܫܶܐ ܐܰܪܒܥܝ̣ܢ ܕܰܒܕܘ̣ܟܪܳܢܟܽܘܢ ܟܽܠܳܗ̇ ܒܪܝ̣ܬܳܐ ܚܳܕܝܳܐ ܘܡܶܬܦܰܨܚܳܐ: ܛܘ̣ܒܰܝܟܽܘܢ ܣܳܗ̈ܕܶܐ ܩܰܕܝ̣̈ܫܶܐ ܐܰܪܒܥܝ̣ܢ ܕܡ̣ܶܢ ܓܰܪ̈ܡܰܝܟܽܘܢ ܥܘ̣ܕܪ̈ܳܢܶܐ ܘܳܐܣܘ̈ܳܬܳܐ ܠܰܒܢ̈ܰܝ ܐ̱ܢܳܫܳܐ ܢܳܒܥܝ̣ܢ: ܗܰܒܠܰܢ ܡܳܪܝܳܐ ܕܢ̇ܶܫܬܘܶܐ ܕܢ̇ܶܬܚܰܠܰܛ ܥܰܡܗܽܘܢ ܒܣܶܕܪ̈ܰܝܗܽܘܢ ܘܢ̇ܶܬܛܰܟܰܣ ܒܓܘ̣̈ܕܰܝܗܽܘܢ: ܘܢ̇ܶܫܠܰܚ ܠܥܳܠܡܳܐ ܐܰܟܘܳܬܗܽܘܢ ܘܢܶܬܥܰܕܰܪ ܒܝܰܕ ܨܠܰܘ̈ܳܬܗܽܘܢ: ܘܫܰܝܢܳܐ ܘܰܫܠܳܡܳܐ ܠܥܳܠܡܳܐ ܟܽܠܶܗ ܫܰܟܶܢ ܘܰܐܟܚܕܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܠܳܟ ܐܰܠܳܗܳܐ ܡܳܪܶܐ ܟܽܠ ܕܫܰܟܶܢ̣ܬ ܠܰܢ ܒܝܰܕ ܛܰܝܒܘ̣ܬܳܟ ܒܝܰܘ̈ܡܳܬܳܐ ܩܰܕܝ̣̈ܫܶܐ ܕܨܰܘܡܳܐ ܕܰܐܪܒܥܝ̣ܢ ܣܝ̣ܡܬܳܐ ܪܰܒܬܳܐ ܕܣܳܗ̈ܕܶܐ ܐܰܪܒܥܝ̣ܢ: ܐܰܝܟܰܢܳܐ ܕܒܰܐܪܒܥܝ̣ܢ ܘܰܐܪܒܥܝ̣ܢ ܢ̇ܶܙܟܶܐ ܒܝ̣ܫܳܐ ܗܰܘ̇ ܕܰܙܟ̣ܳܐ ܒܡܰܛܥܝܳܢܘ̣ܬܶܗ ܠܰܟܝܳܢܰܢ ܕܡ̣ܶܢ ܐܰܪܒܥܳܐ ܐܶܬ̣ܪܰܟܰܒ: ܩܰܒܶܠ ܡܳܪܝ̱ ܬܶܫ̈ܡܫܳܬܰܢ ܘܰܨ̈ܠܰܘܳܬܰܢ ܒܨܝ̣ܪ̈ܶܐ: ܘܫܰܟܶܢ ܫܘ̣ܒܩܢܳܐ ܕܰܚ̈ܛܳܗܶܐ ܠܰܐܝܠܶܝܢ ܕܰܡܝܰܩܪܝ̣ܢ ܥ̱ܽܘ̣ܗ̈ܕܳܢܰܝܗܽܘܢ ܕܰܡܢܝ̣̈ܚܳܢܰܝܟ: ܘܰܥܒܶܕ ܒܪܶܚܡܰܬ݀ ܐ̱ܢܳܫܘ̣ܬܳܟ ܕܘܽܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ ܕܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀