ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܩܰܕܝ̣ܫܳܐ ܕܰܒܢܘ̣ܪܳܐ ܕܚܘ̣ܒܶܗ ܐܶܬ̣ܓܰܘܙܰܠܘ̱ ܣܳܗ̈ܕܶܐ ܩܰܕܝ̣̈ܫܶܐ: ܘܥܰܠ ܥܰܪܝܳܐ ܩܰܫܝܳܐ ܕܰܓܠܝ̣ܕܳܐ ܫܰܘܝܳܐܝ̣ܬ ܐܰܡܣ̣ܰܪܘ̱: ܘܢܰܚ̈ܬܰܝܗܽܘܢ ܗܘ̣̈ܠܳܢܳܝܶܐ ܫܠܰܚ̣ܘ̱ ܗ̱ܘܰܘ: ܘܰܠܝܰܡܬܳܐ ܕܡܰܝ̈ܳܐ ܒܰܪܘܳܙܳܐ ܢܚ̣ܶܬܘ̱ ܗ̱ܘܰܘ: ܘܙܳܟܘ̣ܬܳܐ ܓܡܝ̣ܪܬܳܐ ܥܰܠ ܒܝ̣ܫܳܐ ܩܛܰܪܘ̱ ܗ̱ܘܰܘ: ܘܰܟܠܝ̣̈ܠܶܐ ܕܫܘ̣ܒܚܳܐ ܡ̣ܶܢ ܪܰܘܡܳܐ ܫܩ̣ܰܠܘ̱ ܗ̱ܘܰܘ ܘܡ̣ܶܢ ܡܳܪܗܽܘܢ ܐܶܬ̣ܝܰܩܰܪܘ̱ ܗ̱ܘܰܘ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܚܰܝܠܳܐ ܘܥܘ̣ܫܢܳܐ ܘܚܶܟܡܬܳܐ ܕܰܐܒܳܐ: ܗܰܘ̇ ܣܳܝܘ̣ܡܳܐ ܘܥܶܠܬܳܐ ܕܰܐܓ̈ܘ̣ܢܶܐ ܢܰܨܝ̣̈ܚܶܐ: ܩܰܕܡܳܝܳܐ ܘܪܝ̣ܫܳܐ ܕܰܙܪ̈ܝ̣ܙܶܐ ܕܰܪܕܰܘ ܒܐܘ̣ܪܚܳܐ ܕܣܳܗܕܘ̣ܬܳܐ: ܚܰܬܢܳܐ ܕܩܘ̣ܫܬܳܐ ܘܠܰܙܡܝ̣̈ܢܰܘܗ̱ܝ ܓܰܘܙܶܠ ܒܚܘ̣ܒܶܗ: ܘܝܰܬܝ̣ܪ ܡ̣ܶܢ ܕܰܒܚܰܡܪܳܐ ܪܘܺܝ̣ܘ ܒܪܶܚܡܬܶܗ: ܘܰܐܣܡܶܟ ܠܚܰܕܘ̣ܓܰܘ̈ܗ̱ܝ ܥܰܠ ܐܰܓܳܢܳܐ ܕܚܰܫ̈ܶܐ ܕܰܙܩܝ̣ܦܘ̣ܬܶܗ: ܓܰܢ̱ܒܳܪܳܐ ܕܰܛܥܝ̣ܢ ܙܩܝ̣ܦܶܗ ܥܰܠ ܟܰܬܦܶܗ ܘܰܩܥ̣ܳܐ ܕܟܽܠ ܕܠܳܐ ܫܳܩܶܠ ܙܩܝ̣ܦܶܗ ܘܳܐܬܶܐ ܒܳܬܰܪܝ̱ ܠܳܐ ܫܳܘܶܐ ܠܝ̣: ܘܟܽܠ ܕܠܳܐ ܡܰܘܕܶܐ ܒܶܗ ܩܕܳܡ ܒܢܰܝ̈ܢܳܫܳܐ ܠܳܐ ܡܰܘܕܶܐ ܒܶܗ ܗܽܘ̣ ܩܕܳܡ ܐܰܒܘ̣ܗ̱ܝ ܘܟܰܕ ܛܘ̣ܥܝ݂ܰܝ݂ ܕܰܦܬܰܟܪܘ̣ܬܳܐ ܦܶܩ̣ܪܰܬ݀ ܠܘ̣ܩܒܰܠ ܡܗܰܝ̈ܡܢܶܐ ܣܳܗ̈ܕܶܐ ܩܰܕܝ̣̈ܫܶܐ ܫܰܡܥܘ̣ܗ̱ܝ ܘܶܐܬܢܩ̣ܶܦܘ̱ ܠܶܗ: ܘܣܰܝܒ̣ܰܪܘ̱ ܟܽܠ ܫܶܢ̈ܕܝ̣ܢ ܘܠܳܐ ܟܦ̣ܰܪܘ̱ ܒܶܗ ܗܳܢܽܘܢ ܕܰܒܫܘ̣̈ܕܳܠܶܐ ܠܳܐ ܐܶܬ̣ܪܰܦܝ̣ܘ: ܘܰܒܡܰܘܗ̈ܒܳܬܳܐ ܕܡ̣ܶܢ ܡܰܠ̈ܟܶܐ ܕܙܰܒܢܳܐ ܐܰܒܣܝ̣ܘ: ܘܥܰܠ ܚܰܫ̈ܶܐ ܡܫܰܚ̈ܠܦܶܐ ܒܰܣ̣ܰܪܘ̱ ܘܰܒܠܘ̣̈ܚܳܡܶܐ ܕܟܽܠ ܐܶܣܟܝ̣ܡ ܐܰܗ̣ܶܠܘ̱: ܕܡܶܢܗܽܘܢ ܐܰܪܒܥܝ̣ܢ ܢܰܦ̈ܫܳܢ ܠܰܡܣܰܝܒܪܳܢܘ̣ܬܳܐ ܕܥܰܪܝܳܐ ܘܰܓܠܝ̣ܕܳܐ ܥܰܪܛܶܠܳܐܝ̣ܬ ܒܰܚܠܝ̣ܨܘ̣ܬܳܐ ܩܰܘܝ̣ܘ ܘܩܘ̣ܪܳܐ ܥܰܙܝ̣ܙܳܐ ܘܡܰܫ̈ܒܶܐ ܕܪܘ̣ܚܳܐ ܠܰܛܢܳܢܗܽܘܢ ܠܳܐ ܫܰܗܝ̣ܘ: ܘܢܘ̣ܪܳܐ ܕܡܰܘܩܕܳܐ ܠܪܶܬܚܳܐ ܕܚܘ̣ܒܗܽܘܢ ܠܳܐ ܛܰܠܩ̣ܰܬ݀ : ܕܪܶܚܡܰܬ݀ ܡܳܪܗܽܘܢ ܛܳܒ ܡ̣ܶܢ ܫܰܠܗܶܒܝ̣ܬܳܐ ܒܗܽܘܢ ܐܶܬ̣ܓܰܘܙܠܰܬ݀ ܦܠܰܓܳܐ ܚܰܝܠܬܳܢܝ̣ܬܳܐ ܘܠܳܐ ܡܶܙܕܰܥܙܥܳܢܝ̣ܬܳܐ: ܐܰܪܒܥܝ̣ܢ ܐܶܡܪ̈ܶܐ ܬܰܡܝ̣̈ܡܶܐ ܕܶܐܬܩ̣ܰܪܰܒܘ̱ ܕܶܒܚܬܳܐ ܠܪܝ̣ܫ ܟܘ̣ܡܪ̈ܶܐ ܫܡܰܝܳܢܳܐ: ܐܰܪܒܥܝ̣ܢ ܒܢܰܝ̈ܳܐ ܒܬܰܪܒܝ̣ܬܳܐ ܫܒܝ̣ܚܬܳܐ ܕܪܰܒ̣ܝܰܬ݀ ܥܺܕܬܳܐ ܡܟܝ̣ܪܬܶܗ ܕܰܡܪܰܝܡܳܐ: ܐܰܪܒܥܝ̣ܢ ܓܰܢ̱ܒܳܪ̈ܶܐ ܕܰܫ̈ܡܳܗܳܬܳܐ ܕܰܚܠܝ̣ܨܳܐܝ̣ܬ ܐܶܬ̣ܟܰܬܰܫܘ̱ ܒܰܐܓܘ̣ܢܳܐ ܗܰܘ̇ ܕܰܚܠܝ̣ܨܘ̣ܬܳܐ: ܐܰܪܒܥܝ̣ܢ ܕܳܫ̈ܢܝ̣ܢ ܕܶܐܬܩ̣ܰܪܰܒܘ̱ ܩܘ̣ܪܒܳܢܳܐ ܕܰܟܝܳܐ ܠܰܡܠܶܟ ܡܰܠ̈ܟܶܐ ܫܡܰܝܳܢܳܐ: ܐܰܪܒܥܝ̣ܢ ܗܰܒܳܒ̈ܶܐ ܪ̈ܓܝ̣ܓܶܐ ܘܒܰܣܝ̣̈ܡܰܝ ܪܝ̣ܚܳܐ ܕܒܰܣ̣ܡܘ̣ܗ̇ ܠܰܒܪܝ̣ܬܳܐ ܒܪܝ̣ܚܗܽܘܢ ܗܰܢܺܝܳܐܐ: ܐܰܪܒܥܝ̣ܢ ܘܰܥ̈ܕܶܐ ܕܰܫܪܳܪܳܐ ܕܶܐܬ̣ܘܰܥܰܕܘ̱ ܠܡܶܫܬܘ̣ܬܳܐ ܕܡܰܠܟܳܐ ܕܰܫܪܳܪܳܐ: ܐܰܪܒܥܝ̣ܢ ܙܡܝ̣̈ܢܶܐ ܕܶܐܬ̣ܛܰܝܰܒܘ̱ ܠܰܣܡܳܟܳܐ ܕܚܰܫܳܐ ܐܰܝܟ ܕܰܠܦܳܬܘ̣ܪܳܐ ܕܒܘ̣̈ܣܳܡܶܐ: ܐܰܪܒܥܝ̣ܢ ܚܕܘ̣̈ܓܶܐ ܡܝܰܩܪ̈ܶܐ ܕܒܰܚܕܳܐ ܫܰܘܝܘ̣ܬ ܢܫܰܡܬܳܐ ܥܰܡ ܡܳܪܗܽܘܢ ܡܰܠܟܳܐ ܢܰܨܝ̣ܚܳܐ ܐܶܬ̣ܶܐܣܰܪܘ̱: ܐܰܪܒܥܝ̣ܢ ܛܰܒ̈ܥܶܐ ܛܳܒ̈ܶܐ ܕܰܐܝܟ ܟܺܐܦ̈ܶܐ ܝܰܩܝ̣ܪ̈ܳܬܳܐ ܩܒܝ̣ܥܝ̣ܢ ܒܬܳܓܶܗ ܕܡܰܠܟܳܐ ܫܡܰܝܳܢܳܐ ܘܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ: ܐܰܪܒܥܝ̣ܢ ܝܘ̣ܩ̈ܢܶܐ ܫܰܦܝ̣ܪ̈ܶܐ ܕܰܐܝܟ ܕܰܗܒܳܐ ܣܢܝ̣ܢܳܐ ܐܶܬ̣ܒܚ̣ܰܪܘ̱ ܒܟܘ̣ܪܳܐ ܕܢܶܣ̈ܝܘ̣ܢܶܐ ܘܰܕܛܘ̣ܪ̈ܳܦܶܐ: ܐܰܪܒܥܝ̣ܢ ܟܰܫܝ̣ܪ̈ܶܐ ܕܶܐܬܟܰܫ̣ܰܪܘ̱ ܒܟܰܪܡܶܗ ܕܰܡܫܝ̣ܚܳܐ ܘܠܳܐ ܚܳܒ̣ܘ̱ ܒܰܬܟܬܘ̣ܫܳܐ ܕܠܘ̣ܩܒܰܠ ܣܳܛܢܳܐ: ܐܰܪܒܥܝ̣ܢ ܠܰܡ̈ܦܺܐܕܶܐ ܥܰܬܝ̣ܪ̈ܰܝ ܒܡܶܫܚܳܐ ܕܙܰܕܝ̣ܩܘ̣ܬܳܐ ܘܠܳܐ ܕܰܥ̣ܟܰܬ݀ ܐܶܢܽܘܢ ܥܰܪܦܶܠܳܐ ܥܰܙܝ̣ܙܬܳܐ ܕܟܳܦܘ̣ܪܘ̣ܬܳܐ: ܐܰܪܒܥܝ̣ܢ ܡܰܓ̈ܕܠܶܐ ܥܰܫܝ̣̈ܢܶܐ ܕܠܳܐ ܐܶܣ̣ܬܰܪܰܕܘ̱ ܡ̣ܶܢ ܬܰܟܬܘ̣̈ܫܶܐ ܕܡܰܠ̈ܟܰܝ ܚܰܢܦܘ̣ܬܳܐ: ܐܰܪܒܥܝ̣ܢ ܢܶܨܒ̈ܳܬܳܐ ܪ̈ܓܝ̣ܓܳܬܳܐ ܕܶܐܬܢ̈ܨܶܒܝ̱ ܒܓܰܘ ܝܰܡܬܳܐ ܐܰܝܟ ܕܰܒܓܰܢܬܳܐ ܕܚܰܕܘ̣ܬܳܐ: ܐܰܪܒܥܝ̣ܢ ܣܳܗ̈ܕܶܐ ܙܰܟܳܝ̈ܶܐ ܕܰܢܨܰܚ̣ܘ̱ ܘܰܐܥܕܝ̣ܘ ܓܰܠܝܳܐܝ̣ܬ ܟܠܝ̣̈ܠܶܐ ܕܡܰܘܕܝܳܢܘ̣ܬܳܐ ܘܰܗܕܝ̣ܪܝ̣ܢ ܒܢܶܨ̈ܚܳܢܶܐ ܕܪܘ̣ܚܳܐ ܩܰܕܝ̣ܫܳܐ: ܐܰܪܒܥܝ̣ܢ ܥܰܒ̈ܕܶܐ ܢܰܚܫܝ̣ܪ̈ܬܳܢܶܐ ܕܰܪܕܰܘ ܒܐܘ̣ܪܚܳܐ ܐܰܠܝ̣ܨܬܳܐ ܕܡܰܘܒܠܳܐ ܠܡܰܠܟܘ̣ܬܳܐ ܫܡܰܝܳܢܝ̣ܬܳܐ: ܐܰܪܒܥܝ̣ܢ ܦܳܥ̈ܠܶܐ ܙܪ̈ܝ̣ܙܶܐ ܕܒܰܕܡܳܐ ܕܰܨܘܪ̈ܰܝܗܽܘܢ ܒܢ̣ܰܘ ܒܺܐܪܬܳܐ ܒܪ̈ܰܘܡܶܐ ܥܶܠܳܝ̈ܶܐ: ܐܰܪܒܥܝ̣ܢ ܨܘ̣ܪ̈ܳܬܳܐ ܪ̈ܚܝ̣ܡܳܬܳܐ ܕܰܚܕܳܐ ܐܶܡܳܐ ܡܰܥܡܘ̣ܕܝ̣ܬܳܐ ܩܰܕܝ̣ܫܬܳܐ: ܐܰܪܒܥܝ̣ܢ ܩܪ̈ܰܒܬܳܢܶܐ ܘܓܰܢ̱ܒܳܪ̈ܶܐ ܚܠܝ̣̈ܨܶܐ ܘܠܳܐ ܡܶܬܪ̈ܰܦܝܳܢܶܐ ܕܰܚܕܳܐ ܓܘ̣ܕܳܐ ܠܒܝ̣ܒܬܳܐ ܕܪ̈ܘ̣ܚܳܢܶܐ: ܐܰܪܒܥܝ̣ܢ ܚܰܝ̈ܠܬܳܢܶܐ ܓܰܢ̱ܒܳܪ̈ܰܝ ܚܰܝܠܳܐ ܕܠܳܐ ܝܰܗ̣ܒܘ̱ ܚܰܨܳܐ ܒܰܩܪܳܒܳܐ ܕܠܘ̣ܩܒܰܠ ܐܳܟܶܠܩܰܪܨܳܐ: ܐܰܪܒܥܝ̣ܢ ܫܘ̣ܪ̈ܶܐ ܪ̈ܳܡܶܐ ܕܰܟܪܝ̣ܟܝ̣ܢ ܠܥܳܡܰܪܬܳܐ ܕܠܳܐ ܬܶܟܒܘ̣ܫܝ̱ ܡ̣ܶܢ ܚܰܝ̈ܠܘܳܬܳܐ ܒܝ̣̈ܫܶܐ ܕܚܶܫܘ̣ܟܳܐ: ܐܰܪܒܥܝ̣ܢ ܬܰܦܢ̈ܟܶܐ ܗܕܝ̣ܪ̈ܶܐ ܕܶܐܬ̣ܬܣܝ̣ܡܘ̱ ܒܬܳܓܳܗ̇ ܕܥܺܕܬܳܐ ܩܰܕܝ̣ܫܬܳܐ ܩܰܬܽܘ̣ܠܺܝ̣ܩܺܝ̣ ܘܰܫܠܝ̣ܚܳܝܬܳܐ: ܗܳܢܽܘܢ ܕܰܥܠܰܝܗܽܘܢ ܐܶܬ̣ܢܰܒܝ̣ ܕܰܘܝ̣ܕ ܐܰܠܳܗܳܝܳܐ ܒܪܘ̣ܚܳܐ ܩܰܕܝ̣ܫܳܐ ܘܶܐܡ̣ܰܪ ܕܰܐܥܶܠ̣ܬܳܢ ܒܢܘ̣ܪܳܐ ܘܰܒܡܰܝ̈ܳܐ ܘܰܐܦܶܩ̣ܬܳܢ ܠܰܢܦܺܐܫܳܐ: ܘܥܰܠ ܗܳܝ ܒܩܘ̣̈ܠܳܣܶܐ ܕܙܳܟܘ̣ܬܳܐ ܡܪܰܡܪܡܝ̣ܢܰܢ ܠܥܺܐܕܳܐ ܕܝ̣ܠܗܽܘܢ ܘܰܒܚܰܓܳܐ ܕܰܪܘܳܙܳܐ ܪܘ̣ܚܳܢܳܝܳܐ ܡܟܰܠܠܝ̣ܢܰܢ ܠܕܘ̣ܟܪ̈ܳܢܰܝܗܽܘܢ: ܕܒܺܐܝ̈ܕܰܝܗܽܘܢ ܨܠܰܘ̈ܳܬܰܢ ܢ̣ܶܥܠ̈ܳܢ ܩܕܳܡ ܬܠܝ̣ܬܳܝܘ̣ܬܳܐ ܡܫܰܒܰܚܬܳܐ: ܘܒܺܐܝܙܓܰܕܘ̣ܬܗܽܘܢ ܒܳܥ̈ܘܳܬܰܢ ܢ̣ܶܬܩܰܒ̈ܠܳܢ ܩܕܳܡ ܐܰܠܳܗܘ̣ܬܳܐ ܡܪܰܝܰܡܬܳܐ: ܘܫܶܐܠ̈ܳܬܰܢ ܢܶܬܦܰܢ̈ܝܳܢ ܡ̣ܶܢ ܝܳܗܘ̣ܒܳܐ ܕܫܶܐܠ̈ܳܬܳܐ ܟܺܐܢ̈ܳܬܳܐ: ܘܣܰܟ̈ܠܘܳܬܰܢ ܢܶܫܬܰܒ̈ܩܳܢ ܡ̣ܶܢ ܗܰܘ̇ ܕܩܰܪܝ̣ܒ ܠܰܐܝܠܶܝܢ ܕܩܳܪܶܝܢ ܠܶܗ ܒܩܘ̣ܫܬܳܐ: ܘܫܶܦ̈ܥܶܐ ܕܰܚܢܳܢܳܐ ܢ̣ܶܫܬܰܟܢܽܘܢ ܠܰܢ ܡ̣ܶܢ ܚܰܢܳܢܳܐ ܕܬܰܪܥܶܗ ܠܳܐ ܐܳܚܶܕ ܩܕܳܡ ܒܰܥ̈ܳܝܶܐ ܕܗܰܝܡܳܢܘ̣ܬܳܐ: ܘܰܚܢܰܢ ܘܥܰܢܝ̣̈ܕܰܝܢ ܢ̇ܶܫܡܰܥ ܡܶܢܳܟ ܒܰܪ̱ܬ݀ ܩܳܠܳܐ ܡܚܰܕܝܳܢܝ̣ܬܳܐ ܕܳܐܡܪܳܐ: ܕܬܰܘ ܥܘ̣ܠܘ̱ ܒܪ̈ܝ̣ܟܰܘܗ̱ܝ ܕܳܐܒܝ̱ ܝ̣ܪܰܬܘ̱ ܡܰܠܟܘ̣ܬܳܐ ܕܰܫܡܰܝܳܐ ܒܰܨ̈ܠܰܘܳܬܳܐ ܕܰܪ̈ܚܘ̣ܡܰܘܗ̱ܝ ܐܳܦ ܢ̇ܶܬܒܰܣܰܡ ܒܛܘ̣ܒ̈ܶܐ ܕܰܢܛܝ̣ܪܝ̣ܢ ܠܗܽܘܢ: ܘܠܰܐܘ̈ܘܳܢܶܐ ܕܢܘ̣ܗܪܳܐ ܕܰܡܠܝ̣ܟܝ̣ܢ ܠܗܽܘܢ ܒܢܘ̣ܗܪܳܐ ܕܝ̣ܠܶܗ ܕܰܡܫܝ̣ܚܳܐ ܡܳܪܗܽܘܢ: ܕܠܶܗ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀