ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܡܰܠܟܳܐ ܫܡܰܝܳܢܳܐ ܕܫ̣ܰܕܰܪ ܐܰܪܒܥܝ̣ܢ ܐܝ̣ܙ̈ܓܰܕܶܐ ܕܫܰܝܢܳܐ ܠܰܒܪܝ̣ܬܳܐ ܘܰܐܟ̣ܪܶܙܘ̱ ܣܒܰܪܬܶܗ ܡܰܚܝܳܢܝ̣ܬܳܐ ܒܰܐܪܥܳܐ ܕܣܶܒܰܣܛܺܝܰܐ: ܠܗܰܘ̇ ܪܳܡܳܐ ܘܰܡܥܰܠܝܳܐ ܕܒܰܐܪܒܥܝ̣ܢ ܡܶܣ̈ܟܺܢܶܐ ܐܰܥ̣ܬܪܳܗ̇ ܠܥܳܡܰܪܬܳܐ ܘܣܰܚ̣ܶܦ ܡܶܢܳܗ̇ ܠܟܽܠܶܗ ܫܘ̣ܒܗܳܪܳܐ ܕܰܦܬܰܟܪܘ̣ܬܳܐ: ܠܗܰܘ̇ ܫܰܪܝ̣ܪܳܐ ܕܒܰܐܪܒܥܝ̣ܢ ܙܰܠܝ̣̈ܩܶܐ ܐܰܢܗ̣ܰܪ ܠܟܽܠܳܗ̇ ܡܶܬܥܰܡܪܳܢܝ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܢܘ̣ܗܪܳܐ ܡܬܘ̣ܡܳܝܳܐ ܘܨܶܡܚܳܐ ܐܰܠܳܗܳܝܳܐ: ܗܰܘ̇ ܡܥܰܠܝܳܐ ܘܠܳܐ ܡܶܬܡܰܠܠܳܢܳܐ ܕܰܒܬܺܒܶܝܠ ܐܶܬ̣ܓܠܝ̣: ܗܰܘ̇ ܕܰܒܡܶܐܬܝ̣ܬܳܐ ܕܝ̣ܠܳܟ ܠܓܶܢܣܳܐ ܪܰܡܝܳܐ ܘܬܰܚܘ̣ܒܳܐ ܦܪܰܩ̣ܬ ܘܰܕܪܰܫ̣ܬ ܠܰܢ ܐܘ̣ܪܚܳܐ ܕܡܰܣܩܳܐ ܠܰܫܡܰܝܳܐ: ܗܰܘ̇ ܕܒܰܩܪܳܝܬܳܐ ܕܝ̣ܠܳܟ ܐܰܠܳܗܳܝܬܳܐ ܙܰܡܶܢ̣ܬ ܠܐܰܪܒܥܝ̣ܢ ܣܳܗ̈ܕܶܐ ܕܝ̣ܠܳܟ ܩܰܕܝ̣̈ܫܶܐ ܠܰܓܢܽܘܢܳܐ ܕܝ̣ܠܳܟ ܡ̇ܠܶܐ̣ ܚܰܕ̈ܘܳܬܳܐ: ܘܶܐܬ̣ܓܰܘܰܣܘ̱ ܒܚܘ̣ܒܳܟ ܘܕܶܠܩ̣ܰܬ݀ ܒܗܽܘܢ ܢܘ̣ܪܳܐ ܕܪܶܚܡܬܳܟ ܘܰܐܩܠܝ̣ܘ ܥܰܠ ܢܶܓ̈ܕܶܐ ܘܫܶܢ̈ܕܶܐ ܡܰܪܝ̣ܪ̈ܶܐ ܘܰܩ̈ܫܰܝܳܐ ܘܕܳܫ̣ܘ̱ ܥܰܠ ܢܘ̣ܪܳܐ: ܘܒܰܣ̣ܰܪܘ̱ ܥܰܠ ܚܰܝ̈ܶܐ ܕܝ̣ܠܗܽܘܢ: ܐܰܪܒܥܝ̣ܢ ܣܳܗ̈ܕܶܐ ܩܰܕܝ̣̈ܫܶܐ ܗܳܢܽܘܢ ܕܒܰܚܙܘ̣ܩܝܳܐ ܕܪܘ̣ܚܳܐ ܥܰܡ ܚܕܳܕ̈ܶܐ ܐܰܣܝ̣ܪܝ̣ܢ ܒܬܰܪܥܝ̣ܬܳܐ ܘܰܒܨܶܒܝܳܢܳܐ ܘܰܒܚܘ̣ܒܳܐ ܘܰܒܪܶܚܡܬܳܐ ܐܰܠܳܗܳܝܬܳܐ: ܐܰܪܒܥܝ̣ܢ ܣܳܗ̈ܕܶܐ ܓܰܢ̱ܒܳܪ̈ܰܝ ܚܰܝܠܳܐ ܗܳܢܽܘܢ ܕܰܗ̣ܘܰܘ ܡܰܓ̈ܕܠܶܐ ܪ̈ܳܡܶܐ ܠܳܐ ܡܶܬܚܰܣ̈ܢܳܢܶܐ: ܘܫܘ̣ܪ̈ܶܐ ܠܳܐ ܡܶܙܕܰܥ̈ܙܥܳܢܶܐ ܚܶܣ̈ܢܶܐ ܡܪ̈ܝ̣ܕܶܐ ܘܠܳܐ ܡܶܬܟܰܒ̈ܫܳܢܶܐ: ܐܳܣܰܘ̈ܳܬܳܐ ܕܟܺܐܒ̈ܶܐ ܘܰܕܟܘ̣ܪ̈ܗܳܢܶܐ ܪ̈ܳܕܘ̣ܦܶܐ ܕܫܺܐܕ̈ܶܐ ܘܰܕܛܘ̣ܥܝ݂ܰܝ݂: ܓܰܢ̱ܒܳܪ̈ܶܐ ܢܰܚܫܝ̣ܪ̈ܬܳܢܶܐ ܕܩܳܡ̣ܘ̱ ܚܠܝ̣ܨܳܐܝ̣ܬ ܒܶܐܣܛܰܕܺܝܳܘܢ ܪܘ̣ܚܳܢܳܝܬܳܐ ܘܠܳܐ ܐܶܬ̣ܪܰܦܝ̣ܘ ܡ̣ܶܢ ܥܰܙܝ̣ܙܘ̣ܬܳܐ ܕܩܘ̣ܪܳܐ ܕܝܰܡܬܳܐ ܘܡܰܫ̈ܒܶܐ ܕܪܘ̣ܚܳܐ ܥܰܙܝ̣ܙܳܬܳܐ: ܘܰܐܥܕܝ̣ܘ ܟܠܝ̣̈ܠܶܐ ܕܙܳܟܘ̣ܬܳܐ ܒܬܰܟܬܘ̣ܫܗܽܘܢ ܕܥܰܡ ܣܳܛܳܢܳܐ: ܘܶܐܬ̣ܓܰܢ̱ܒܰܪܘ̱ ܠܒܝ̣ܒܳܐܝ̣ܬ ܘܩܰܦܰܚ̣ܘ̱ ܠܚܰܢܦܘ̣ܬܳܐ ܘܠܰܦܬܰܟܪܘ̣ܬܳܐ: ܘܶܐܬ̣ܚܙܝ̣ܘ ܐܰܝܟ ܠܰܡܦܝ̣̈ܕܶܐ ܢܰܗܝ̣ܪ̈ܶܐ ܒܟܽܠܳܗ̇ ܥܳܡܰܪܬܳܐ: ܘܳܐܦ ܚܢܰܢ ܡܳܪܝܳܐ ܒܰܙܡܝ̣ܪ̈ܳܬܳܐ ܪ̈ܘ̣ܚܳܢܳܝܳܬܳܐ ܘܰܒܚ̈ܘ̣ܓܳܝܶܐ ܐܰܠܗ̈ܳܝܶܐ ܠܘܳܬܗܽܘܢ ܐܳܡ̇ܪܝ̣ܢܰܢ: ܐܳܘ ܠܫܰܦܝ̣ܪ̈ܶܐ ܕܰܗ̣ܘܰܘ ܨܶܡܚ̈ܶܐ ܫܒܝ̣̈ܚܶܐ ܒܟܽܠܳܗ̇ ܬܺܒܶܝܠ: ܐܳܘ ܠܰܡܣܰܝܒܪ̈ܳܢܶܐ ܕܫܺܐܕ̈ܶܐ ܘܕܶܡ̈ܘܳܬܳܐ ܓܢܝ̣̈ܚܶܐ ܕܰܪܘܝ̣ܘ ܒܚܘ̣ܒܶܗ ܕܝܶܫܽܘܥ ܡܳܪܗܽܘܢ: ܐܳܘ ܠܣ̈ܝ̣ܡܳܬܳܐ ܠܳܐ ܡܶܬܚܰܠ̈ܨܳܢܝܳܬܳܐ ܕܰܒܥܘ̣ܬܪܗܽܘܢ ܥܳܬܪܝ̣ܢ ܐܰܝܠܶܝܢ ܕܰܒܗܽܘܢ ܡܶܬܓܰܘܣܝ̣ܢ ܐܳܘ ܠܚܘ̣ܡܪ̈ܶܐ ܝܰܩܝ̣ܪ̈ܳܬܳܐ ܘܛܰܒ̈ܥܶܐ ܛܳܒ̈ܶܐ ܕܰܒܬܳܓܳܗ̇ ܕܥܺܕܬܳܐ ܩܰܕܝ̣ܫܬܳܐ ܩܒܝ̣ܥܝ̣ܢ ܘܰܠܟܽܠܳܗ̇ ܒܪܝ̣ܬܳܐ ܡܒܰܕܩܝ̣ܢ: ܐܳܘ ܠܰܩܪ̈ܰܒܬܳܢܶܐ ܘܢܰܚܫܝ̣ܪ̈ܬܳܢܶܐ ܕܫܰܦܶܠ̣ܘ̱ ܒܕܰܪܳܐ ܕܝ̣ܠܗܽܘܢ ܠܓܘ̣̈ܕܶܐ ܫܺܐܕܳܢܳܝ̈ܳܬܳܐ: ܘܰܦܪܰܚ̣ܘ ܠܪ̈ܰܘܡܶܐ ܥܶܠ̈ܳܝܶܐ ܒܰܪ̈ܟܘ̣ܒܶܐ ܡܰܠܰܐܟܳܝ̈ܶܐ: ܠܦܳܠ̈ܚܶܐ ܙܪ̈ܝ̣ܙܶܐ ܕܡܰܠܟܳܐ ܫܡܰܝܳܢܳܐ ܕܰܐܒܗ̣ܶܬܘ̱ ܠܪ̈ܳܕܘ̣ܦܶܐ ܘܰܠܡܰܠ̈ܟܶܐ ܛܪ̈ܘ̣ܢܶܐ ܒܰܡܚܰܡܣܢܳܢܘ̣ܬܗܽܘܢ: ܐܳܘ ܠܓܰܢ̱ܒܪ̈ܶܐ ܠܒܝ̣̈ܒܶܐ ܕܰܐܩܪܶܒ̣ܘ̱ ܠܶܠܝܳܐ ܟܽܠܳܗ ܠܘ̣ܩܒܰܠ ܦܠܰܓܳܐ ܕܫܺܐܕ̈ܶܐ ܘܣܰܝܒ̣ܰܪܘ̱ ܩܪܰܒܬܳܢܘ̣ܬܳܐ ܕܥܰܪܝܳܐ ܘܠܳܐ ܐܶܬ̣ܪܰܦܝ̣ܘ: ܐܳܘ ܠܰܐܪ̈ܙܶܐ ܕܶܐܬܢ̣ܨܶܒܘ̱ ܒܝܰܡܬܳܐ ܘܰܩ̣ܛܰܪܘ̱ ܥܠܰܝܗܽܘܢ ܓܠܝ̣ܕܳܐ ܘܶܐܬ̣ܟܰܪܝ̣ܘ ܩܰܘ̈ܡܳܬܗܽܘܢ ܘܗܳܐ ܢܳܨܰܚ ܕܘ̣ܟܪܳܢܗܽܘܢ ܒܰܐܪ̈ܒܰܥܦܶܢܝܳܬܳܐ: ܐܳܘ ܠܰܚ̈ܕܘ̣ܓܶܐ ܪ̈ܚܝ̣ܡܶܐ ܕܣܰܝܒ̣ܰܪܘ̱ ܥܰܙܝ̣ܙܘ̣ܬ ܥܰܪܝܳܐ ܘܶܐܣ̣ܬܡܶܟܘ̱ ܥܰܡ ܚܰܬܢܳܐ ܫܡܰܝܳܢܳܐ: ܐܳܘ ܠܰܚ̈ܠܝ̣ܨܶܐ ܙܪ̈ܝ̣ܙܰܝ ܢܰܦܫܳܐ: ܐܳܘ ܠܢܰܨܝ̣̈ܚܶܐ ܚܰܝܠ̈ܬܳܢܶܐ ܘܓܰܢ̱ܒܳܪ̈ܰܝ ܩܪܳܒܳܐ ܕܒܰܐܪܒܥܝ̣ܢ ܦܰܓܪ̈ܶܐ ܚܕܳܐ ܚܰܝܠܬܳܢܘ̣ܬܳܐ ܕܢܰܦܫܳܐ ܚܰܘܝ̣ܘ: ܐܳܘ ܠܰܐܬܠܝ̣̈ܛܶܐ ܠܒܝ̣̈ܒܶܐ ܕܠܳܐ ܚܳܣ̣ܘ̱ ܥܰܠ ܒܶܣܪܳܐ ܕܝ̣ܠܗܽܘܢ ܟܰܕ ܕܳܐܶܒ ܗ̱ܘܳܐ ܘܫܳܚܶܠ ܡܶܛܽܠ ܦܘ̣ܪܥܳܢܳܐ ܛܘ̣ܒܬܳܢܳܐ ܗܰܘ̇ ܕܰܠܗܳܢܳܐ ܡܰܢ ܬ̣ܶܬܶܠ ܠܗܽܘܢ ܒܰܩܝܳܡܬܳܐ ܝܰܬܽܝܪ ܡܰܢ ܢܰܨܝ̣ܚܳܐ ܘܰܕܠܳܐ ܡܘ̣ܡ ܬܟܝ̣ܠܝ̣ܢ ܗ̱ܘܰܘ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܟܽܘܢ ܐܳܘ ܣܳܗ̈ܕܶܐ ܩܰܕܝ̣̈ܫܶܐ ܕܬ̣ܶܗܘܽܘܢ ܚܠܳܦܰܝܢ ܡܦܝ̣̈ܣܳܢܶܐ ܠܗܰܘ̇ ܕܡܶܛܠܳܬܶܗ ܥܰܠ ܫܶܢܕ̈ܶܐ ܐܰܡܣ̣ܰܪܬܽܘܢ ܘܥܰܠ ܡܰܘܬܳܐ ܐܰܩܠܝ̣ܬܽܘܢ: ܘܥܰܠ ܩܘ̣ܪܳܐ ܘܰܓܠܝ̣ܕܳܐ ܒܰܣ̣ܰܪܬܽܘܢ ܘܠܘ̣ܩܒܰܠ ܪ̈ܘ̣ܚܶܐ ܩܫ̈ܝܳܬܳܐ ܥܰܙܝ̣ܬܽܘܢ ܘܠܳܐܟܶܠܩܰܪܨܳܐ ܐܰܒܗ̣ܶܬܬܽܘܢ: ܕܰܢ̣ܫܰܟܶܢ ܠܥܺܕܬܶܗ ܡܗܰܝܡܰܢܬܳܐ ܫܰܝܢܳܐ ܐܰܡܝ̣ܢܳܐ: ܘܰܫܠܳܡܳܐ ܠܳܐ ܡܶܬܦܰܣܩܳܢܳܐ: ܘܠܰܢ ܥܰܒ̈ܕܶܐ ܕܝ̣ܠܶܗ ܡ̣ܶܢ ܗܰܘ̇ ܚܰܝܠܳܐ ܕܰܫ̇ܪܶܐ̣ ܒܗܽܘܢ ܢ̣ܶܬܶܠ ܚܘ̣ܠܡܳܢܳܐ ܠܟܺܐܒ̈ܰܝܢ ܘܰܠܟܘ̣ܪ̈ܗܳܢܰܝܢ ܘܰܒܥܘ̣ܬܪ̈ܶܐ ܪ̈ܘ̣ܚܳܢܳܝܶܐ ܠܢܰܦ̈ܫܳܬܰܢ ܢ̣ܰܥܬܰܪ: ܘܰܢ̣ܕܰܟܶܐ ܠܦܰܓܪ̈ܰܝܢ ܡ̣ܶܢ ܟܽܠܗܶܝܢ ܟܘ̣ܬܡ̈ܳܬܳܐ ܕܰܚܛܝ̣ܬܳܐ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܕܥܰܠ ܣܰܒܪܶܗ ܫܟ̣ܶܒܘ̱ ܒܰܡ̈ܛܰܠ̱ܠܶܐ ܢܰܗܝ̣ܪ̈ܳܬܳܐ ܢ̣ܰܫܪܶܐ ܘܢ̣ܰܥܡܰܪ: ܘܰܚܢܰܢ ܘܗ̣ܶܢܽܘܢ ܠܳܐ ܣܰܒܥܳܐܝ̣ܬ ܒܓܘ̣ܕܳܐ ܕܩܰܕܝ̣ܫܘ̣ܬܟܽܘܢ ܢ̇ܰܣܶܩ ܠܶܗ ܫܘ̣ܒܚܳܐ ܘܬܰܘܕܝ̣ܬܳܐ ܠܰܡܟܰܠܠܳܢܟܽܘܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀