ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܳܣܝܳܐ ܕܡܰܓܳܢ ܕܶܐܫ̣ܬܰܕܰܪ ܠܰܒܪܝ̣ܬܳܐ ܘܣܰܒ̣ܰܥ ܐܰܠܦ̈ܶܐ ܒܰܐܬܪܳܐ ܚܘ̣ܪܒܳܐ ܘܰܪܕܰܦ ܠܫܺܐܕ̈ܶܐ: ܘܰܐܚܠ̣ܶܡ ܠܺܐܝܕܳܐ ܝܰܒܝ̣ܫܬܳܐ: ܘܰܐܒ̣ܗܶܬ ܠܰܟܢܘ̣ܫܬܳܐ ܛܳܠܘ̣ܡܬܳܐ: ܘܰܐܫܡ̣ܰܥ ܕܘ̣ܓ̈ܶܐ: ܘܝܰܗ̣ܒ ܡܶܠܬܳܐ ܠܦܺܐܩ̈ܶܐ ܘܚܰܪ̈ܫܶܐ: ܘܰܐܣܝ̣ ܟܪ̈ܝ̣ܗܶܐ ܘܕܰܟܝ̣ ܓܰܪ̈ܒܶܐ ܘܰܐܩܝ̣ܡ ܡܝ̣̈ܬܶܐ: ܕܰܟܳܐ ܠܰܢ ܡܳܪܝ̱ ܡ̣ܶܢ ܚܛܳܗ̈ܶܐ ܘܣܘ̣ܪ̈ܚܳܢܶܐ: ܚܰܪܪ ܠܰܢ ܡ̣ܶܢ ܫܘ̣ܥܒܳܕܳܐ ܕܫܺܐܕ̈ܶܐ ܕܰܢ̇ܫܰܒܰܚ ܠܰܫܡܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܥܰܬܝ̣ܪܳܐ ܕܶܐܬ̣ܳܐ ܨܶܝܕ ܡܶܣ̈ܟܺܢܶܐ ܘܰܐܥ̣ܬܰܪ ܐܶܢܽܘܢ: ܠܗܰܘ̇ ܩܰܕܝ̣ܫܳܐ ܕܶܐܬ̣ܚܰܠܰܛ ܥܰܡ ܛܰܡ̈ܶܐܐ ܘܩ̣ܰܕܶܫ ܐܶܢܽܘܢ: ܠܗܰܘ̇ ܝܰܡܳܐ ܕܰܚܢܳܢܳܐ ܕܚܰܢ̣ܶܗ ܠܓܶܢܣܳܐ ܐ̱ܢܳܫܳܝܳܐ ܘܦܰܪܩ̣ܶܗ: ܠܗܰܘ̇ ܡܥܝ̣ܢܳܐ ܕܥܘ̣ܕܪ̈ܳܢܶܐ ܕܥ̣ܰܕܪܶܗ ܠܰܟܝܳܢܰܢ ܥܰܦܪܳܢܳܐ ܒܛܰܝܒܘ̣ܬܶܗ ܟܰܕ ܣܰܥ̣ܪܶܗ ܠܛܘ̣ܗܡܰܢ ܚܰܠܳܫܳܐ ܒܪܶܚܡܰܬ݀ ܐ̱ܢܳܫܘ̣ܬܶܗ ܙܰܕܩ̣ܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܒܥܰܝܢܳܐ ܕܬܰܪ̈ܥܝܳܬܰܢ ܡܶܬܒܰܩܶܝܢܰܢ ܒܬܶܕܡܘ̣ܪܬܳܐ ܕܐ̱ܪ̈ܳܙܶܐ ܕܰܡܕܰܒܪܳܢܘ̣ܬܳܟ ܐܳܘ ܡܶܠܬܳܐ ܐܰܠܳܗܳܐ: ܠܡܰܢܘ̣ ܐܝ̣ܬ ܡܶܠܬܳܐ ܕܣܳܦ̇ܩܳܐ ܕܰܬ̣ܩܰܠܶܣܝ̱ ܠܐ̱ܪ̈ܳܙܰܝܟ ܫܒܝ̣̈ܚܶܐ ܐܳܘ ܡܳܪܝܳܐ܇ ܙܥܘ̣ܪܝ̣ܢ ܓܶܝܪ ܦܘ̣ܡ̈ܶܐ ܕܰܐܝܟ ܕܙܳܕܶܩ ܢ̣ܫܰܒܚܽܘ̣ܢܳܟ ܘܠܶܫ̈ܳܢܶܐ ܡܚܝ̣ܠܝ̣ܢ ܕܰܐܝܟ ܕܫܳܘܝܳܐ ܢ̣ܪܰܡܪܡܽܘܢ ܠܳܟ: ܠܰܝܬ ܚܶܟܡܬܳܐ ܕܣܳܦܩܳܐ ܠܡܰܘܪܳܒܘ̣ ܠܪܰܒܘ̣ܬܳܟ ܘܐܳܦܠܳܐ ܝܺܕܰܥܬܳܐ ܡܶܫܟܚܳܐ ܕܰܬ̣ܡܰܠܶܠܝ̱ ܬܶܗܪܳܐ ܕܦܘ̣ܪܩܳܢܳܟ ܕܡܶܛܽܠܳܬܰܢ ܟܽܠܗܶܝܢ ܣܒܰܠ̣ܬ ܐܳܘ ܪܳܚܶܡ ܐ̱ܢ̈ܳܫܳܐ: ܘܥܰܠ ܗܳܕܶܐ ܒܕܘ̣ܒܳܪ̈ܶܐ ܝܺܪܶܒ ܫܡܳܟ ܟܰܕ ܠܳܐ ܡܶܬܕܰܪܟܳܐ ܘܠܳܐ ܡܶܬܦܰܫܩܳܐ ܡܶܐܬܝ̣ܬܳܟ ܕܰܠܘܳܬܰܢ: ܡܰܝ̈ܳܐ ܚܙܰܐܘܽܘ̣ܟ ܘܰܠܚܰܡܪܳܐ ܛܳܒܳܐ ܐܶܫܬܰܚܠ̣ܰܦܘ̱ ܒܡܶܫܬܘ̣ܬܳܐ ܕܠܰܢ ܠܘܳܬ ܚܰܝ̈ܶܐ ܚܰܕ̈ܬܶܐ ܒܡܰܘܠܕܳܐ ܕܡ̣ܶܢ ܕܪܝ̣ܫ ܬ̣ܚܰܕܶܬ: ܝܰܡܳܐ ܐܶܫ̣ܬܰܘܕܥܳܟ ܐܰܝܟ ܥܳܒܘ̣ܕܳܐ ܘܰܕܪܰܫ̣ܬ ܠܳܟ ܐܘܽܪܚܳܐ ܒܰܬܗ̈ܘ̣ܡܰܘܗ̱ܝ ܘܰܐܪܟ̣ܶܢ ܨܰܘܪܶܗ ܬ̣ܕܘ̣ܫܝ̣ܘܗ̱ܝ ܥܶܩܒܳܟ ܕܢ̣ܶܬܒܰܪܰܟ ܡ̣ܶܢ ܕܘ̣ܪ̈ܟܳܬܳܟ: ܓܰܪ̈ܒܶܐ ܚ̣ܙܰܐܘܽܘ̣ܟ ܘܶܐܬ̣ܕܰܟܝ̣ܘ ܘܟܘܽܪ̈ܗܳܢܶܐ ܥܪܰܩ̣ܘ̱ ܡ̣ܶܢ ܩܘ̣ܕܡܰܝܟ: ܠܰܡܫܰܪܝܳܐ ܒܡܶܠܬܳܟ ܐܰܚܠܶܡ̣ܬ ܐܰܝܟ ܒܳܪܘ̣ܝܳܐ ܕܰܟܝ̈ܳܢܶܐ ܘܠܐܝ̣ܕܳܐ ܕܝܰܒܝ̣ܫܳܐ ܐܰܬܩܶܢ̣ܬ ܕܰܚܢܰܢ ܢ̇ܶܬܦܫܶܛ ܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ: ܠܰܡܡܰܚܰܝܬܳܐ ܒܟܶܢܦܳܐ ܕܡܰܪܛܘ̣ܛܳܟ ܚܘ̣ܠܡܳܢܳܐ ܓܡܝ̣ܪܳܐ ܫܰܟܶܢ̣ܬ ܕܰܠܪܶܕܝܳܐ ܕܰܚܛܳܗ̈ܶܐ ܡܶܢܰܢ ܬ̣ܶܦܣܘ̣ܩ: ܠܰܥܠܰܝܡܬܳܐ ܢܰܚܶܡ̣ܬ: ܕܰܠܢܰܦܫܳܐ ܕܡܝ̣ܬܰܬ݀ ܒܰܚܛܝ̣ܬܳܐ ܒܡܶܐܬܝ̣ܬܳܟ ܐܰܝܟ ܕܡ̣ܶܢ ܫܶܢܬܳܐ ܐܰܩܝ̣ܡܬ: ܠܰܥܠܰܝܡܳܐ ܒܪܳܗ̇ ܕܰܐܪܡܰܠܬܳܐ ܡ̣ܶܢ ܦܘ̣ܡܶܗ ܕܡܰܘܬܳܐ ܛܪܽܘܢܐ ܐܰܥܕܝ̣ܬ: ܕܠܰܗܘܳܝܳܐ ܕܝ̣ܠܰܢ ܒܰܥܒܳܪ ܦܘ̣ܩܕܳܢܳܐ ܐܰܘܒ̣ܶܕܢܰܢ ܡ̣ܶܢܕܪܝ̣ܫ ܬ̣ܰܗܦܶܟ ܠܰܢ: ܪ̈ܘ̣ܚܶܐ ܫܰܠܝ̣ܬ ܐܰܝܟ ܡܳܪܳܐ ܕܝ̣ܠܗܽܘܢ ܘܰܬܗܘ̣ܡܳܐ ܐܶܫ̣ܬܰܘܕܥܳܟ ܕܒܳܪܘ̣ܝܶܗ ܐܝ̣ܬܰܝܟ ܗܶܠܰܟܬܳܐ ܐܰܪܡܝ̣ܬ ܥܰܠ ܝܰܡܳܐ ܐ̱ܢܳܫܳܐܝ̣ܬ: ܘܩܰܠܝ̣ܠܘ̣ܬܳܐ ܕܰܐܠܳܗܘ̣ܬܳܟ ܠܳܐ ܛܶܒ̣ܥܰܬ݀ : ܩܳܠܳܟ ܢܦ̣ܰܠ ܒܰܫܝܽܘ̣ܠ ܘܰܠܥܶܪ̈ܒܶܐ ܕܝ̣ܠܳܟ ܒܰܫܡܳܗܰܝ̈ܗܽܘܢ ܩ̣ܪܰܝܬ: ܒܛܝ̣ܢܳܐ ܓܶܝܪ ܠܣܰܡܝܳܐ ܦܰܬܰܚ̣ܬ ܕܰܬ̣ܚܰܘܶܐ ܒܰܪܢܳܫܳܐ ܩܰܕܡܳܝܳܐ ܕܡ̣ܶܢ ܥܰܦܪܳܐ ܐܰܢ̱ܬ ܓܒܰܠ̣ܬ: ܠܫܝ̣ܠܘ̣ܚܳܐ ܫ̣ܰܕܰܪܬܳܝܗ̱ܝ ܕܛܘ̣ܦܣܳܐ ܕܡܰܥܡܘ̣ܕܝ̣ܬܳܐ ܕܢܘ̣ܗܪܳܐ ܫܰܪܝ̣ܪܳܐ ܡܰܩܢܝܳܐ ܠܰܢ ܬ̣ܚܰܘܶܐ: ܠܕܰܝ̈ܘܶܐ ܒܡܶܠܬܳܟ ܛܪܰܕܬ ܘܰܠ̈ܫܺܐܕܶܐ ܡܳܪ̈ܘ̣ܕܶܐ ܡ̣ܶܢ ܐ̱ܢܳܫܘ̣ܬܳܐ ܒܦܘ̣ܩܕܳܢܳܟ ܐܰܥܪܶܩ̣ܬ ܘܠܰܬܗܘ̣ܡܳܐ ܒܝܰܕ ܚܙܝ̣ܪ̈ܶܐ ܫ̣ܰܕܰܪܬ: ܠܦܰܓܪܳܐ ܣܰܪܝܳܐ ܡ̣ܶܢ ܒܳܬܰܪ ܕܰܣ̣ܪܝ̣ ܒܬܶܕܡܘ̣ܪܬܳܐ ܦܰܐܝܰܬ݀ ܠܐܰܠܳܗܳܐ ܢܰܚܶܡ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܡܳܟ̈ܣܶܐ ܩܰܕܶܫ̣ܬ: ܘܰܠܚܰܛܳܝ̈ܶܐ ܙܰܕܶܩ̣ܬ ܠܰܟܪ̈ܝ̣ܗܶܐ ܐܰܣܝ̣ܬ ܘܠܰܐܝܠܶܝܢ ܕܒܝ̣ܫ ܒܝ̣ܫ ܥܒܝ̣ܕܝ̣ܢ ܐܰܚܠܶܡ̣ܬ: ܠܳܟ ܡܶܬܟܰܫܦܳܐ ܡܰܪܥܝ̣ܬܳܟ ܐܳܘ ܡܳܪܝܳܐ܇ ܗܰܘ̇ ܕܨܳܒܶܐ ܕܟܽܠܗܽܘܢ ܒܢܰܝ̈ܢܳܫܳܐ ܢ̣ܺܚܽܘܢ ܕܰܬ̣ܫܰܟܶܢ ܚܘ̣ܠܡܳܢܳܐ ܓܡܝ̣ܪܳܐ ܘܳܐܣܝܘܽܬܳܐ ܡܫܰܡܠܰܝܬܳܐ ܠܟܽܠܗܽܘܢ ܚܰܛܳܝ̈ܶܐ ܕܢܳܩ̇ܫܝ̣ܢ ܒܬܰܪܥܳܐ ܕܰܡܪܰܚܡܳܢܘ̣ܬܳܟ ܘܚܰܣܳܐ ܘܚܰܠܶܠ ܘܕܰܟܳܐ ܘܩܰܕܶܫ ܠܦܰܓܪ̈ܶܐ ܘܢܰܦ̈ܫܳܬܳܐ: ܕܝ̣ܠܰܢ ܘܚܰܪܰܪ ܠܰܢ ܡ̣ܶܢ ܟܽܠܳܗ̇ ܡܰܥܒܕܳܢܘ̣ܬܳܐ ܕܗܰܘ̇ ܕܰܠܩܘ̣ܒܠܳܐ: ܐܰܢ̱ܬ ܗ̱ܘ̣ ܗܰܘ̇ ܓܶܝܪ ܐܰܠܳܗܳܐ ܕܰܐܝܠܶܝܢ ܕܬܳܝܒܝ̣ܢ ܘܡܶܫܟܚܳܢܳܐ ܕܰܐܝܠܶܝܢ ܕܰܐܒܝ̣ܕܝ̣ܢ: ܘܳܐܣܝܳܐ ܕܰܐܝܠܶܝܢ ܕܰܟܪܝ̣ܗܝ̣ܢ: ܘܥܳܨܘܽܒܳܐ ܕܰܐܝܠܶܝܢ ܕܰܬܒܝ̣ܪܝ̣ܢ: ܥܨܘ̣ܒ ܘܰܐܣܳܐ ܘܰܐܚܠܶܡ ܠܟܽܠܗܽܘܢ ܫܘ̣ܚ̈ܢܶܐ ܡܶܬܝܰܕ̈ܥܳܢܶܐ ܕܝ̣ܠܰܢ ܘܫܰܗܳܐ ܠܚܰܫ̈ܶܐ ܡ̣ܶܢ ܬܰܪ̈ܥܝܳܬܳܐ ܕܝ̣ܠܰܢ: ܘܠܳܐ ܡܳܪܝ̱ ܬ̣ܶܩܢܶܐ ܠܰܢ ܟܰܕ ܡܠܶܝܢܰܢ ܥܰܘܠܳܐ ܘܚܰܫ̈ܶܐ ܥܕܝ̣̈ܠܶܐ ܘܰܢܕܝ̣̈ܕܶܐ ܐܶܠܳܐ ܩܘ̣ܡ ܥܰܠ ܡܰܚ̈ܫܘ̣ܠܶܐ ܕܰܚ̈ܛܳܗܶܐ ܕܝ̣ܠܰܢ ܘܟܺܐܡ̈ܘ̣ܢܶܐ ܘܒܰܥܓܰܠ ܢ̣ܶܫܠܽܘܢ: ܘܢ̇ܶܫܟܰܚ ܪ̈ܰܚܡܶܐ ܘܥܘ̣ܕܪ̈ܳܢܶܐ ܘܚܘ̣ܣܳܝܳܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܗܳܪܟܳܐ ܘܰܒ̈ܚܰܝܶܐ ܕܰܥܬܝ̣ܕܝ̣ܢ: ܘܰܚܢܰܢ ܘܥܰܢܝ̣̈ܕܰܝܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝܺܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܠܳܗܳܐ ܪܰܒܳܐ ܘܦܳܪܘ̣ܩܳܐ ܕܝ̣ܠܰܢ ܝܶܫܘ̣ܥ ܡܫܝ̣ܚܳܐ: ܗܰܘ̇ ܕܒܰܡܕܰܒܪܳܢܘ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ ܠܓܶܢܣܳܐ ܕܝ̣ܠܰܢ ܐ̱ܢܳܫܳܝܳܐ ܕܰܡܡܰܚܰܝ ܗ̱ܘܳܐ ܒܟܘܽܪ̈ܗܳܢܶܐ ܐܰܣܝ̣ܬ: ܘܰܠ̈ܚܰܛܳܝܶܐ ܕܰܒܥ̣ܰܘ ܡܶܢܳܟ ܫܘ̣ܒܩܳܢܳܐ ܕܰܚ̈ܛܳܗܶܐ ܫܰܟܶܢ̣ܬ ܘܰܠܛܳܥܰܝ̈ܳܐ ܠܐܘܽܪܚܳܐ ܕܰܫܪܳܪܳܐ ܐܰܦܢܝ̣ܬ: ܘܰܠܡܳܟ̈ܣܶܐ ܙܰܕܶܩ̣ܬ: ܘܰܠܛܰܡ̈ܶܐܐ ܩܰܕܶܫ̣ܬ: ܩܰܕܶܫ ܡܳܪܝܳܐ ܠܠܶܒ̈ܰܘܳܬܰܢ ܒܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܘܰܥܒܶܕ ܠܰܢ ܗܰܝ̈ܟܠܶܐ ܘܰܐܘ̈ܘܳܢܶܐ ܕܚܳܫܚܝ̣ܢ ܠܰܥܡܘ̣ܪܝܳܐ ܕܺܐܝܩܳܪܳܟ: ܘܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡ̣ܶܢ ܐܝ̣ܕܰܝ̈ܳܐ ܕܝ̣ܠܰܢ ܡܚܝ̣̈ܠܳܬܳܐ ܐܶܬ̣ܩܰܪܰܒܘ̱ ܩܕܳܡ ܪܰܒܘ̣ܬܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀