ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܫܡܰܝܳܢܳܐ ܕܰܣܥ̣ܰܪ ܠܰܒܪܝ̣ܬܶܗ ܒܛܰܝܒܘ̣ܬܶܗ: ܘܰܐܚܠ̣ܶܡ ܟܘ̣ܪ̈ܗܳܢܶܐ ܕܰܓܒܝ̣ܠܬܶܗ ܒܢܝ̣ܚܘ̣ܬܶܗ: ܠܗܰܘ̇ ܪܳܡܳܐ ܕܰܢܚ̣ܶܬ ܘܰܗ̣ܘܳܐ ܡܰܒܘ̣ܥܳܐ ܕܚܘ̣ܠ̈ܡܳܢܶܐ ܠܰܟܪ̈ܝ̣ܗܶܐ ܒܰܚܢܳܢܶܗ: ܘܰܡܥܝ̣ܢܳܐ ܕܥܘ̣ܕܪ̈ܳܢܶܐ ܘܳܐܣ̈ܘܳܬܳܐ ܠܡܰܟ̈ܰܐܒܶܐ ܒܰܡܪܰܚܡܳܢܘ̣ܬܶܗ: ܠܗܰܘ̇ ܥܰܬܝ̣ܪܳܐ ܕܠܳܐ ܡܶܣܬܰܝܟܝ̣ܢ ܫܽܘ̈ܘܟܢܶܐ ܕܰܚܢܳܢܶܗ: ܘܠܳܐ ܡܶܬܡܰܠܠܝ̣ܢ ܥܘ̣ܕܪ̈ܳܢܶܐ ܕܪܰܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܡܪܰܝܡܳܐ ܕܡ̣ܶܢ ܡܰܠܝܽܘ̣ܬܶܗ ܡܦܰܠܶܓ ܛܳܒ̈ܳܬܳܐ ܠܒܶܪ̈ܝܳܬܶܗ: ܥܰܬܝ̣ܪܳܐ ܠܰܝܬ ܕܩܳܐܶܡ ܥܰܠ ܣܳܟܳܐ ܕܓܰܙܰܘ̈ܗ̱ܝ: ܝܰܡܳܐ ܕܪ̈ܰܚܡܶܐ ܕܠܳܐ ܡܶܣܬܰܝܟܝ̣ܢ ܥܘ̣ܕܪ̈ܳܢܰܘܗ̱ܝ: ܡܰܒܘ̣ܥܳܐ ܒܪܝ̣ܟܳܐ ܕܠܳܐ ܡܶܬܦܰܣܩܳܐ ܡܰܪܕܝ̣ܬܶܗ: ܢܶܒܥܳܐ ܛܘ̣ܒܬܳܢܳܐ ܕܠܳܐ ܡܶܬܒܰܨܪܳܐ ܡܰܠܝܽܘ̣ܬܶܗ: ܡܰܠܟܳܐ ܡܬܘ̣ܡܳܝܳܐ ܕܠܳܐ ܡܶܫܬܰܚܠܦܳܐ ܓܰܐܝܽܘ̣ܬܶܗ: ܟܰܣܝܳܐ ܕܠܰܝܬ ܕܡܶܣܬܰܟܰܠ ܥܰܡܝ̣ܩܘ̣ܬ ܚܶܟܡܬܶܗ: ܛܳܒܳܐ ܕܠܳܐ ܡܶܬܡܰܫܚܳܐ ܪܶܚܡܰܬ݀ ܐ̱ܢܳܫܘ̣ܬܶܗ: ܐܳܣܝܳܐ ܫܡܰܝܳܢܳܐ ܕܰܢܚ̣ܶܬ ܠܰܐܪܥܳܐ ܒܝܰܕ ܚܘ̣ܒܶܗ: ܚܰܬܢܳܐ ܕܥܶܠܳܝ̈ܶܐ ܕܶܐܙ̣ܕܰܡܰܢ ܠܰܚܠܘ̣ܠܳܐ ܕܬܰܚ̈ܬܳܝܶܐ: ܡܳܪܳܐ ܕܢܘ̣ܪ̈ܳܢܶܐ ܕܰܓܢ̣ܳܐ ܒܰܣܡܳܟܳܐ ܕܥܰܦܪ̈ܳܢܶܐ: ܥܳܒܘ̣ܕܳܐ ܕܥܳܠ̈ܡܶܐ ܕܰܐܬ̣ܗܰܪ ܠܰܙܡܝ̣̈ܢܶܐ ܒܚܰܡܪܳܐ ܕܡ̣ܶܢ ܡܰܝ̈ܳܐ: ܙܘ̣ܦܳܐ ܡܚܰܠܠܳܢܳܐ ܕܕܰܟܝ̣ ܠܓܰܪ̈ܒܶܐ ܒܝܰܕ ܓܶܫܬܶܗ: ܩܘ̣ܕܳܫܳܐ ܩܰܕܝ̣ܫܳܐ ܕܩ̣ܰܕܶܫ ܠܛܰܡ̈ܶܐܐ ܕܰܩܪܶܒ̣ܘ̱ ܠܶܗ: ܚܰܝܠܳܐ ܚܰܣܝ̣ܢܳܐ ܕܰܐܩ̣ܢܝ̣ ܠܰܚܓܝ̣ܪ̈ܶܐ ܪܶܗܛܳܐ ܩܰܠܝ̣ܠܳܐ: ܥܘ̣ܫܢܳܐ ܫܰܪܝ̣ܪܳܐ ܕܝܰܗ̣ܒ ܠܰܡܫܰܪ̈ܰܝܳܐ ܚܘ̣ܠܡܳܢܳܐ ܓܡܝ̣ܪܳܐ: ܥܰܬܝ̣ܪܳܐ ܕܰܓܢܰܒ̣ܘ̱ ܡܶܢܶܗ ܟܺܐܒ̈ܬܳܢܶܐ ܥܘ̣ܕܪܳܢܳܐ ܓܡܝ̣ܪܳܐ: ܫܶܡܫܳܐ ܕܙܰܕܝ̣ܩܘ̣ܬܳܐ ܕܰܐܢ̣ܗܰܪ ܥܰܝ̈ܢܶܐ ܕܰܣܡ̈ܰܝܳܐ: ܣܳܦܪܳܐ ܡܗܝ̣ܪܳܐ ܕܰܐܠ̣ܶܦ ܠܗܶܕ̈ܝܘ̣ܛܶܐ ܡܶܠܰܝ̈ ܚܶܟܡܬܳܐ: ܡܳܪܝܳܐ ܡܪܰܚܡܳܢܳܐ ܕܬܰܪܶܨ ܠܩܰܘܡ̈ܳܬܳܐ ܕܰܟܦܝ̣̈ܦܶܐ: ܪܰܥܡܳܐ ܕܩ̈ܳܠܶܐ ܕܦ̣ܰܬܰܚ ܠܶܐܕ̈ܢܶܐ ܛܡܝ̣̈ܡܳܬܳܐ ܕܕܽܘ̣ܓ̈ܶܐ: ܡܶܠܬܳܐ ܡܬܘ̣ܡܳܝܳܐ ܕܰܦܫ̣ܰܛ ܠܶܫܳܢܳܐ ܕܦܺܐܩ̈ܶܐ: ܩܝ̣ܬܳܪ ܩ̈ܳܠܶܐ ܕܰܐܥ̣ܬܰܪ ܟܶܢܳܪܳܐ ܕܚܰܪ̈ܫܶܐ: ܙܳܝܽܘ̣ܢܳܐ ܕܥܳܠ̈ܡܶܐ ܕܰܗ̣ܘܳܐ ܒܕܰܒܪܳܐ ܦܳܬܘ̣ܪܳܐ ܕܦܘ̣̈ܢܳܩܶܐ: ܘܣܰܒ̣ܰܥ ܒܓܰܘ ܚܘ̣ܪܒܳܐ ܟܰܦܢܘ̣ܬܳܐ ܕܟܶܢܫ̈ܶܐ: ܡܳܪܳܐ ܕܝܰܡ̱̈ܡܶܐ ܕܫ̣ܰܬܶܩ ܡ̣ܶܢ ܬܰܠ̈ܡܝ̣ܕܶܐ ܫܓܝ̣ܫܘ̣ܬܳܐ ܕܓܰܠ̱̈ܠܐܶ: ܬܰܩܝ̣ܦܳܐ ܕܛܰܒ̣ܰܥ ܠܠܶܓܝܽܘ̣ܢܳܐ ܕܫܺܐܕ̈ܶܐ ܒܰܬܗܘ̣ܡܳܐ: ܒܰܣܝ̣ܡܳܐ ܕܰܐܣ̣ܓܝ̣ ܠܛܳܠܘ̣̈ܡܶܐ ܛܒ̈ܳܬܳܐ ܫܦܝ̣̈ܥܳܬܳܐ: ܐܶܠܳܐ ܐܰܢ̱ܬ ܡܳܪܝܳܐ ܡܪܰܚܡܳܢܳܐ ܐܰܝܟ ܕܚܰܕܝ̣ܬ ܠܰܙܡܝ̣̈ܢܶܐ ܒܡܶܫܬܘ̣ܬܳܐ ܕܰܒܩܳܛܢܶܐ ܡܕܝ̣ܢ̱ܬܳܐ ܒܚܰܡܪܳܐ ܕܡ̣ܶܢ ܡܰܝ̈ܳܐ: ܘܒܰܝܺܐܝ̣ܬ ܠܓܰܪ̈ܒܶܐ ܒܕܘ̣ܟܳܝ ܦܰܓܪ̈ܰܝܗܽܘܢ: ܘܠܰܡܫܰܪ̈ܰܝܳܐ ܒܫܘ̣ܪܳܪ ܓܘ̣ܫ̈ܡܰܝܗܽܘܢ: ܘܠܰܣܡ̈ܰܝܳܐ ܒܦܘ̣ܬܳܚ ܥܰܝܢܰܝ̈ܗܽܘܢ: ܘܠܰܟܪ̈ܝ̣ܗܶܐ ܒܚܘ̣ܠܡܳܢ ܟܺܐܒܰܝ̈ܗܽܘܢ: ܘܰܠܡܰܟ̈ܰܐܒܶܐ ܒܳܐܣܝܽܘ̣ܬܳܐ ܕܫܘ̣ܚ̈ܢܰܝܗܽܘܢ: ܘܰܠܙܰܟܰܝ ܡܳܟܣܳܐ ܒܙܘ̣ܕܳܩܶܗ ܘܰܠܩܶܢܛܪܘ̣ܢܳܐ ܒܝܰܕ ܛܰܠܝܶܗ: ܘܰܠܪܝ̣ܫ ܟܢܘ̣ܫܬܳܐ ܒܝ̣ܚܝ̣ܕܳܝܬܶܗ: ܘܰܐܝܟ ܕܰܐܦܨܰܚ̣ܬ ܠܰܡܡܰܚܰܝܬܳܐ ܒܚܘ̣ܠܡܳܢܳܐ ܕܦܰܓܪܳܗ̇: ܘܠܰܟܢܰܥܢܳܝܬܳܐ ܒܦܘ̣ܢܳܝ ܫܶܐܠ̈ܳܬܳܗ̇: ܘܠܰܐܪܡܰܠܬܳܐ ܒܢܘ̣ܚܳܡܳܐ ܕܰܒܪܳܗ̇: ܘܰܠܚܰܛܳܝܬܳܐ ܒܫܘ̣ܒܩܳܢܳܐ ܕܚܰܘܒܶܝ̈ـܗ̇: ܘܰܠܡܰܪܝܰܡ ܘܡܳܪܬܳܐ ܒܠܳܥܳܙܳܪ ܐܰܚܘ̣ܗܶܝܢ: ܗܳܟܰܢܳܐ ܚܰܕܳܐ ܘܰܐܦܨܰܚ ܠܥܺܕܬܳܟ ܡܗܰܝܡܰܢܬܳܐ ܒܫܰܦܝ̣ܪܘ̣ܬ ܡܛܰܟܣܘ̣ܬܳܐ ܕܟܶܢܫ̈ܶܝܗ̇: ܒܫܰܝܢܳܐ ܘܰܫܠܳܡܳܐ ܕܰܟܪܘ̣ܟܝܳܐ ܕܚܰܝܶܝ̈ܗ̇: ܒܥܝ̣ܪܘ̣ܬܳܐ ܘܝܰܨܝ̣ܦܘ̣ܬܳܐ ܕܥܰܠ̈ܠܳܢܶܝܗ̇: ܒܙܰܗܝܽܘ̣ܬܳܐ ܘܢܰܟܦܘ̣ܬܳܐ ܕܟܳܗ̈ܢܶܝܗ̇: ܒܰܗܕܝ̣ܪܘ̣ܬܳܐ ܕܰܡܫܰܡ̈ܫܳܢܶܝܗ̇: ܒܰܚܕܳܝܽܘ̣ܬܳܐ ܘܰܐܘܝܽܘ̣ܬܳܐ ܕܝܰܠ̈ܕܶܝܗ̇: ܒܚܘ̣ܣܳܝܳܐ ܘܫܘ̣ܒܩܳܢܳܐ ܕܰܒܢܶܝ̈ܗ̇: ܒܚܘ̣ܠܡܳܢܳܐ ܓܡܝ̣ܪܳܐ ܕܟܽܠܗܽܘܢ ܗܰܕܳܡ̈ܶܝܗ̇: ܒܥ̱ܘ̣ܗܕܳܢܳܐ ܛܳܒܳܐ ܘܰܢܝܳܚܬܳܐ ܡܫܰܡܠܰܝܬܳܐ ܕܟܽܠܗܽܘܢ ܥܰܢܝ̣̈ܕܶܝܗ̇: ܐܰܝܟܰܢܳܐ ܕܟܽܠܳܗ̇ ܥܰܡ ܟܽܠܳܗ̇ ܒܟܽܠܗܽܘܢ ܟܶܢܫܶܝ̈ܗ̇ ܬ̣ܝܰܒܶܒܝ̱ ܠܳܟ ܫܘ̣ܒܚܳܐ ܒܟܽܠܗܽܘܢ ܠܶܫܳܢܶܝ̈ܗ̇: ܘܒܺܐܝ̣̈ـܕܰܝܟ ܘܥܰܡܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀