ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܳܣܝܳܐ ܛܳܒܳܐ ܘܥܳܨܽܘ̣ܒܳܐ ܫܰܪܝ̣ܪܳܐ ܕܰܒܟܽܠܙܒܰܢ ܣܳܥܰܪ ܠܰܓܒܝ̣ܠܬܶܗ ܒܣܰܡ̱̈ܡܳܢܶܐ ܕܡ̣ܶܢܗ: ܘܠܳܐ ܟܳܠܶܐ ܡ̣ܶܢܗ̇ ܥܘ̣ܕܪ̈ܳܢܰܘܗ̱ܝ: ܐܰܢ̱ܬ ܡܳܪܝ̱ ܒܪܶܚܡܰܬ݀ ܐ̱ܢܳܫܘ̣ܬܳܟ ܫܰܕܰܪ ܒܥܶܕܳܢܳܐ ܗܳܢܳܐ ܚܘ̣ܠܡܳܢܳܐ ܠܢܰܦܫ̈ܳܬܰܢ: ܘܥܘ̣ܕܪܳܢܳܐ ܘܳܐܣܝܽܘ̣ܬܳܐ ܡܫܰܡܠܰܝܬܳܐ ܠܦܰܓܪ̈ܰܝܢ: ܘܰܥܒܶܕ ܠܰܢ ܕܟܰܝ̈ܳܐ ܘܩܰܕܝ̣̈ܫܶܐ ܟܽܠܗܽܘܢ ܝܘܡ̈ܳܬܳܐ ܕܚܰܝܰܝ̈ܢ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܚܰܝܠܳܐ ܪܰܒܳܐ ܠܳܐ ܡܶܬܡܰܚܠܳܢܳܐ ܕܡܚܝ̣̈ܠܶܐ: ܘܥܘ̣ܬܪܳܐ ܠܳܐ ܡܶܬܚܰܠܨܳܢܳܐ ܕܡܶܣ̈ܟܺܢܶܐ: ܠܗܰܘ̇ ܐܳܣܝܳܐ ܛܳܒܳܐ ܕܡܰܟ̈ܰܐܒܶܐ: ܘܥܳܨܽܘ̣ܒܳܐ ܬܡܝ̣ܗܳܐ ܕܰܡܡܰܚ̈ܰܝܳܐ: ܠܗܰܘ̇ ܡܠܰܒܒܳܢܳܐ ܘܰܡܒܰܝܳܐܢܳܐ ܕܰܐܒܝ̣̈ܠܶܐ: ܘܰܡܚܰܕܝܳܢܳܐ ܘܡܰܦܨܚܳܢܳܐ ܕܰܟܡܝ̣ܪ̈ܶܐ: ܠܗܰܘ̇ ܨܶܡܚܳܐ ܘܢܘ̣ܗܪܳܐ ܕܚܶܫ̈ܘ̣ܟܶܐ: ܘܣܘ̣ܝܳܥܳܐ ܘܥܘ̣ܕܪܳܢܳܐ ܕܰܡܥ̈ܳܩܶܐ: ܠܗܰܘ̇ ܣܰܒܪܳܐ ܫܰܪܝ̣ܪܳܐ ܕܰܐܝܠܶܝܢ ܕܚܰܝܺܝ̣ܢ: ܘܰܩܝܳܡܬܳܐ ܘܢܘ̣ܚܳܡܳܐ ܕܰܐܝܠܶܝܢ ܕܥܰܢܝ̣ܕܝ̣ܢ ܒܰܬܪܝ̣ܨܘ̣ܬ ܫܘ̣ܒܚܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܐܳܣܝܳܐ ܕܢܰܦܫ̈ܳܬܳܐ ܘܦܰܓܪ̈ܶܐ: ܗܰܘ̇ ܡܪܰܚܡܳܢܳܐ ܕܪܰܚ̣ܶܡ ܥܰܠ ܓܶܢܣܰܢ ܕܳܘܝܳܐ ܘܚܰܠܳܫܳܐ: ܕܰܒܡܰܚ̈ܘܳܬܳܐ ܘܫܘ̣ܡ̈ܳܬܳܐ ܐܶܬ̣ܡܰܚܝ̣: ܟܰܕ ܒܰܥܨ̈ܳܒܰܘܗ̱ܝ ܐܳܣܝ̈ܳܝܶܐ ܐܰܣܝ̣ ܘܰܐܚܠ̣ܶܡ ܒܡܶܠܬܶܗ ܦܳܩܘ̣ܕܬܳܐ ܠܰܡܡܰܚ̈ܰܝܳܐ ܕܰܦܓܰܥ̣ܘ̱ ܒܶܗ ܒܙܰܒܢܳܐ ܕܰܡܕܰܒܪܳܢܘ̣ܬܶܗ ܦܳܪܘ̣ܩܳܝܬܐ: ܟܰܕ ܠܶܐܫܳܬܳܐ ܕܰܚܡܳܬܶܗ ܕܦܶܛܪܽܘܣ ܐܰܣܝ̣: ܘܚܘ̣ܠܡܳܢܳܐ ܓܡܝ̣ܪܳܐ ܘܰܢܦܺܐܫܳܐ ܠܳܗ̇ ܫܰܟ̣ܶܢ: ܠܒܰܪ̱ܬ ܝܽܘܐܳܪܳܫ ܕܶܝܢ ܡ̣ܶܢ ܡܰܘܬܳܐ ܠܚܰܝ̈ܶܐ ܐܰܦ̣ܢܝ̣: ܐܰܝܟ ܡܳܪܳܐ ܕܚܰܝ̈ܶܐ ܘܰܕܡܝ̣̈ܬܶܐ ܘܰܐܠܳܗܳܐ ܕܟܽܠ ܒܣܰܪ ܠܓܰܪܒܳܐ ܕܶܝܢ ܒܰܦܫܳܛܳܐ ܕܐܝ̣ܕܶܗ ܡܰܠܝܰܬ݀ ܥܘ̣ܕܪ̈ܳܢܶܐ ܕܰܟܝ̣ ܐܰܝܟ ܓܳܒܘ̣ܠܳܐ ܕܰܟܝܳܢܳܐ ܕܰܒܛܝ̣ܠ ܠܶܗ ܥܰܠ ܐܳܣܝܽܘ̣ܬܳܐ ܕܰܓܒܝ̣ܠܬܶܗ: ܠܕܰܒܗܰܝܡܳܢܘ̣ܬܳܐ ܩܶܪܒ̣ܰܬ݀ ܠܟܶܢܦܳܐ ܕܡܰܪܛܘ̣ܛܶܗ ܐܰܣܝ̣ ܬܟܝ̣ܒܳܐܝ̣ܬ: ܠܗܳܢܽܘܢ ܬܪܶܝܢ ܣܡ̈ܰܝܳܐ ܕܶܐܬ̣ܟܰܫܰܦܘ̱ ܠܶܗ ܒܪܶܗ ܕܕܰܘܺܝ̣ܕ ܐܶܬ̣ܪܰܚܰܡ ܥܠܰܝܢ ܫܰܟܶܢ ܢܘ̣ܗܪܳܐ ܘܰܚܙܳܝܳܐ: ܐܰܝܟ ܢܘ̣ܗܪܳܐ ܕܡ̣ܶܢ ܢܘ̣ܗܪܳܐ ܕܰܠܚܶܫܘ̣ܟܘ̣ܬܶܗ ܕܥܳܠܡܳܐ ܐܰܢ̣ܗܰܪ: ܘܰܠܘܳܬ ܡܳܟ̈ܣܶܐ ܕܶܝܢ ܟܰܕ ܐܶܬ̣ܪܟܶܢ ܒܪܶܚܡܰܬ݀ ܐ̱ܢܳܫܘ̣ܬܶܗ ܚܰܘܺܝ̣ ܐܶܢܽܘܢ ܐܘ̣ܪܚܳܐ ܘܰܫܒܝ̣ܠܳܐ ܕܦܘ̣ܩ̈ܕܳܢܰܘܗ̱ܝ ܡܰܚܝ̈ܳܢܶܐ: ܠܙܳܢܝ̣ܬܳܐ ܕܶܝܢ ܗܳܝ̇ ܡܟܰܬܡܰܬ݀ ܒܰܚ̈ܛܳܗܶܐ ܚܰܣܝ̣: ܘܫܘ̣ܒܩܳܢܳܐ ܡܫܰܡܠܝܳܐ ܘܕܘ̣ܟܳܝܳܐ ܫܰܟܶܢ ܐܰܝܟ ܣܰܓܝ̣ ܪ̈ܰܚܡܶܐ: ܠܚܰܘ̈ܒܶܐ ܘܰܚܛܳܗ̈ܶܐ ܕܚܰܛܳܝ̈ܶܐ ܕܫܶܐܠ̣ܘ̱ ܡ̣ܶܢܗ ܫܘ̣ܒܩܳܢܳܐ ܝܰܗ̣ܒ ܐܰܝܟ ܫܳܒܘ̣ܩܳܐ ܘܰܡܚܰܣܝܳܢܳܐ ܕܚܰܘ̈ܒܶܐ ܘܕܰܚ̈ܛܳܗܶܐ: ܠܛܝ̣ܡܰܝ ܒܰܪ ܛܝ̣ܡܰܝ ܣܰܡܝܳܐ ܒܝܰܕ ܪܘ̣ܩܳܐ ܘܛܝ̣ܢܳܐ ܥܰܝ̈ܢܰܘܗ̱ܝ ܦ̣ܰܬܰܚ: ܘܢܘ̣ܗܪܳܐ ܚܰܕܬܳܐ ܠܒܳܒ̈ܳܬܶܗ ܝܰܗ̣ܒ ܕܡܰܠ̈ܝܳܢ ܗ̱ܘܰܝ̈ ܚܶܫܟܳܐ: ܠܝܰܡܳܐ ܕܶܝܢ ܕܡܶܬܒܰܥܪܰܪ ܗ̱ܘܳܐ ܙܥܝ̣ܦܳܐܝ̣ܬ ܒܡܶܠܬܶܗ ܫ̣ܰܝܶܢ: ܐܰܝܟ ܡܕܰܒܪܳܢܳܐ ܘܡܳܪܳܐ ܕܟܽܠ ܦܫܝ̣ܩ ܠܶܗ ܠܟܢܰܥܢܳܝܬܳܐ ܚܘ̣ܠܡܳܢܳܐ ܠܒܰܪܬܳܗ̇ ܒܝܰܕ ܗܰܝܡܳܢܘ̣ܬܳܗ̇ ܫܰܟܶܢ: ܟܰܕ ܒܡܰܟܝ̣ܟܘ̣ܬܳܗ̇ ܠܕܰܡܝܽܘ̣ܬܳܐ ܕܟܰܠ̈ܒܶܐ ܗܝ̣ ܠܳܗ̇ ܟܰܢܝܰܬ݀ : ܠܠܶܓܝܽܘ̣ܢܳܐ ܕܶܝܢ ܕܫܺܐܕ̈ܶܐ ܟܰܕ ܐܰܦ̣ܶܩ ܡ̣ܶܢ ܓܒܝ̣ܠܬܶܗ ܠܰܬܗܘ̣ܡܳܐ ܒܝܰܕ ܚܙܝ̣ܪ̈ܶܐ ܫ̣ܰܕܰܪ: ܘܚ̣ܰܘܺܝ̣ ܠܟܽܠܢܳܫ ܕܐܶܠܘ̣ܠܳܐ ܕܰܦܩ̣ܰܕ ܠܗܽܘܢ ܐܳܦܠܳܐ ܒܰܚܙܝ̣ܪ̈ܶܐ ܣܳܥܶܝܢ ܗ̱ܘܰܘ ܕܢ̣ܶܥܠܽܘܢ: ܠܰܡܫܰܪܝܳܐ ܕܶܝܢ ܗܰܘ ܕܰܬܠܳܬܝ̣ܢ ܘܰܬܡܳܢܶܐ ܫܢܝ̣̈ܢ ܡܢܰܘܰܠ ܗ̱ܘܳܐ ܒܟܘ̣ܪ̈ܗܳܢܶܐ ܡ̣ܶܢ ܥܰܪܣܳܐ ܕܟܺܐܒܰܘ̈ܗ̱ܝ ܐܰܩܝ̣ܡ: ܘܰܚܛܳܗ̈ܶܐ ܘܥܰܘ̈ܠܶܐ ܕܰܣܥ̣ܰܪ ܒܪܶܚܡܰܬ݀ ܐ̱ܢܳܫܘ̣ܬܶܗ ܕܠܳܐ ܡܶܬܕܰܪܟܳܐ ܫܒ̣ܰܩ: ܠܢܰܦܫ̈ܳܬܳܐ ܟܰܦܢ̈ܳܬܳܐ ܣܰܓܺܝ̈ܳܐܬܳܐ ܡ̣ܶܢ ܠܰܚܡܳܐ ܙܥܘ̣ܪܳܐ ܣܰܒ̣ܰܥ ܐܰܝܟ ܙܳܝܽܘ̣ܢܳܐ ܛܳܒܳܐ ܘܝܳܨܽܘܦܳܐ ܕܚܰܝ̈ܶܐ ܕܟܽܠ ܒܣܰܪ: ܠܰܣܒܝ̣ܣܘ̣ܬ ܒܝ̣̈ܫܳܬܳܐ ܣܰܓܺܝ̈ܳܐܬܳܐ ܕܡܰܬܰܝ ܘܰܕܙܰܟܰܝ ܡܳܟܣܳܐ ܙܰܕܶܩ̣ ܘܚ̣ܰܣܝ̣: ܘܰܫܠܝ̣̈ܚܶܐ ܘܰܡܣܰܒܪ̈ܳܢܶܐ ܚ̣ܰܘܺܝ̣ ܐܶܢܽܘܢ: ܠܥܶܣܪܳܐ ܓܰܪ̈ܒܶܐ ܕܘ̣ܟܳܝܳܐ ܘܚܘ̣ܠܡܳܢܳܐ ܫܰܟ̣ܶܢ: ܐܰܝܟ ܥܳܨܽܘܒܳܐ ܕܟܺܐܒ̈ܶܐ ܘܡܰܚܠܡܳܢܳܐ ܕܟܘ̣ܪ̈ܗܳܢܶܐ ܠܦܘ̣ܡܳܐ ܘܰܠܠܶܫܳܢܳܐ ܘܰܠܥܰܝ̈ܢܶܐ ܕܗܰܘ̇ ܕܰܚܪܶܫ ܘܰܥܘܺܝ̣ܪ ܐܰܣܝ̣: ܘܰܠܕܰܝܘܳܐ ܗܰܘ̇ ܕܒܶܗ ܟܡܺܝ̣ܢ ܗ̱ܘܳܐ ܐܰܦ̣ܶܩ: ܠܨܳܐܝܘ̣ܬܳܐ ܕܰܚܛܳܗ̈ܶܐ ܕܚܰܛܳܝ̇ܬܳܐ ܕܡܶܫ̣ܚܰܬ݀ ܪ̈ܶܓܠܰܘܗ̱ܝ ܐܰܫܝ̣ܓ: ܘܰܠܥ̱ܽܘ̣ܗܕܳܢܳܗ̇ ܒܰܣܒܰܪܬܳܐ ܕܝ̣ܠܶܗ ܦܳܪܘ̣ܩܳܝ̇ܬܳܐ ܪܫ̣ܰܡ: ܠܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܟܰܕ ܐܶܙ̣ܕܰܡܰܢ ܫܰܚ̣ܠܶܦ ܡܰܝ̈ܳܐ ܠܚܰܡܪܳܐ: ܘܚܰܕܝ̣ ܠܚܰܬܢܳܐ ܘܠܰܙܡܝ̣̈ܢܶܐ ܒܡܰܥܒܕܳܢܘ̣ܬܳܐ ܕܰܣܥ̣ܰܪ: ܠܪܳܡܘ̣ܬܳܐ ܘܫܘ̣ܥܠܳܝܳܐ ܕܰܒܥܶܠܕܰܪܳܐ ܒܰܛܶܠ: ܐܰܦܶܩ̣ܬܶܗ ܪܘ̣ܚܳܐ ܠܡܰܕܒܪܳܐ ܕܡܶܢܶܗ ܢ̣ܶܬܢܰܣܶܐ: ܠܰܫܪܳܪܳܐ ܕܗܰܝܡܳܢܘ̣ܬܶܗ ܕܗܰܘ̇ ܩܶܢܛܪܘ̣ܢܳܐ ܢ̣ܰܨܰܚ: ܘܰܠܛܰܠܝܳܐ ܕܝ̣ܠܶܗ ܐܰܚܠ̣ܶܡ ܒܣܳܥܘ̣ܪܘ̣ܬܶܗ ܕܡܶܠܬܳܐ ܦܳܩܘ̣ܕܬܳܐ: ܠܰܬܠܳܬܳܐ ܡܝ̣̈ܬܶܐ ܒܪܳܗ̇ ܕܰܐܪܡܰܠܬܳܐ ܘܒܰܪ̱ܬ݀ ܝܽܘܐܳܪܳܫ ܘܰܠܠܳܥܳܙܳܪ ܪܳܚܡܶܗ ܢܰܚ̣ܶܡ: ܐܰܝܟ ܡܢܰܚܡܳܢܳܐ ܕܡܝ̣̈ܬܶܐ ܘܥܳܨܽܘܒܳܐ ܕܰܬܒܝ̣ܪ̈ܰܝ ܠܶܒܳܐ: ܘܥܰܠܗܳܕܶܐ ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܡܪܰܚܡܳܢܳܐ ܕܰܬ̣ܕܰܟܶܐ ܠܰܢ ܡ̣ܶܢ ܢܰܦܫ̈ܳܬܰܢ ܘܦܰܓܪ̈ܰܝܢ ܠܓܰܪܒܳܐ ܕܰܚܛܝ̣ܬܳܐ: ܘܰܬ̣ܚܰܝܶܨ ܪܰܦܝܽܘ̣ܬܰܢ ܒܚܰܝܠܳܐ ܕܝܰܡܝ̣ܢܳܟ: ܘܬ̣ܰܢܗܰܪ ܥܰܝ̈ܢܶܐ ܕܬܰܪ̈ܥܝܳܬܰܢ ܒܢܘ̣ܗܪܳܐ ܕܝ̣ܕܰܥܬܳܟ: ܘܰܬ̣ܫܰܬܶܩ ܡ̣ܶܢܢ ܠܫܘ̣ܠ̈ܗܳܒܶܐ ܘܚܶܛܝ̈ܳܢܶܐ ܒܣܘ̣ܓܳܐܐ ܕܛܰܝܒܘ̣ܬܳܟ: ܘܬ̣ܶܙܓܘ̣ܪ ܡ̣ܶܢܢ ܠܟܺܐܡܘ̣̈ܢܶܐ ܐܰܒܕ̈ܳܢܳܝܶܐ: ܘܰܬ̣ܫܰܚܠܶܦ ܠܰܢ ܡ̣ܶܢ ܒܝ̣̈ܫܳܬܳܐ ܠܛܳܒ̈ܳܬܳܐ: ܘܬ̣ܶܛܪܘ̣ܕ ܡ̣ܶܢܢ ܠܫܺܐܕ̈ܶܐ ܘܰܠܚܰܫ̈ܶܐ ܕܡܰܠܙܝ̣ܢ ܠܰܢ: ܘܬ̣ܶܫܒܘ̣ܩ ܚܰܘܒܰܝ̈ܢ ܘܰܬ̣ܚܰܣܶܐ ܚܛܳܗܰܝ̈ܢ ܒܝܰܡܳܐ ܕܰܚܢܳܢܳܟ: ܘܬ̣ܰܫܘܶܐ ܠܰܢ ܘܰܠܥܰܢܝ̈ܕܰܝܢ ܠܩܰܘܡܳܐ ܕܡ̣ܶܢ ܝܰܡܝ̣ܢܳܟ: ܘܰܬ̣ܛܰܝܶܒ ܠܰܢ ܠܫܘ̣ܒܚܳܐ ܕܪܰܒܘ̣ܬܳܟ: ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܒܪܳܗ̇ ܕܐܝ̣ܬܘ̣ܬܳܐ ܕܶܐܬܒܰܣ̣ܰܪ ܡܶܛܽܠ ܦܘ̣ܪܩܳܢܰܢ: ܘܝܰܗ̣ܒ ܡܰܝ̈ܳܐ ܚܝ̈ܶܐ ܠܫܳܡܪܳܝܬܳܐ: ܘܰܐܣܝ̣ ܠܒܰܪܬܳܗ̇ ܕܰܟܢܰܥܢܳܝܬܳܐ: ܘܰܐܚܝ̣ ܠܰܒܪܳܗ̇ ܕܰܐܪܡܰܠܬܳܐ: ܘܝܰܗ̣ܒ ܥܘ̣ܕܪܳܢܳܐ ܠܰܡܡܰܚܰܝܬܳܐ: ܘܰܐܩܝ̣ܡ ܡ̣ܶܢ ܡܰܘܬܳܐ ܠܒܰܪ̱ܬ ܝܽܘܐܳܪܳܫ ܪܝ̣ܫ ܟܢܘ̣ܫܬܳܐ: ܘܰܫܒ̣ܰܩ ܚܰܘܒܶܝ̈ܗ̇ ܕܚܰܛܳܝ̇ܬܳܐ: ܐܰܢ̱ܬ ܡܳܪܝ̱ ܩܰܒܶܠ ܦܝ̣ܪܡܳܐ ܗܳܢܳܐ ܕܥܰܒ̈ܕܰܝܟ ܕܠܐܝ̣ܩܳܪܳܐ ܕܡܳܪܘ̣ܬܳܟ ܩܰܪܶܒܢܰܢ: ܘܢܰܛܰܪ ܒܗܰܝܡܳܢܘ̣ܬܳܐ ܬܪܝ̣ܨܬ݀ ܫܘ̣ܒܚܳܐ ܠܥܺܕܬܳܟ ܩܰܕܝ̣ܫܬܳܐ: ܘܰܦܪܘ̣ܩ ܠܝܰܠ̈ܕܶܝܗ̇ ܡ̣ܶܢ ܢܶܟܝ̈ܳܢܶܐ ܘܫܳܪ̈ܥܳܬܳܐ: ܘܢܰܚܶܡ ܠܥܰܢܝ̈ܕܶܝܗ̇ ܕܰܫܟܶܒ̣ܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ܆ ܕܰܢ̇ܫܰܒܰܚ ܠܐܝ̣ܬܘ̣ܬܳܟ ܠܳܐ ܡܶܬܕܰܪܟܳܢܝ̣ܬܳܐ: ܘܕܰܐܒܘ̣ܟ ܘܰܕܪܘ̣ܚܳܟ ܩܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀