ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܕܰܟܝ̣ ܠܓܰܪ̈ܒܶܐ ܒܝܰܕ ܡܶܠܬܶܗ ܡܰܨܝܰܬ݀ ܟܽܠ܆ ܘܚ̣ܰܝܶܨ ܠܰܡܫܰܪ̈ܰܝܳܐ ܒܛܰܝܒܘ̣ܬܶܗ ܒܳܪܝܰܬ݀ ܟܽܠ: ܠܗܰܘ̇ ܕܗܰܠ̣ܶܟ ܥܰܠ ܓܰܠ̱̈ـܠܶܐ ܕܝܰܡܳܐ ܒܫܘ̣ܠܛܳܢܳܐ ܕܪܰܒܘ̣ܬܶܗ: ܘܦ̣ܰܬܰܚ ܠܰܣܡܰܝ̈ܳܐ ܒܚܰܝܠܬܳܢܘ̣ܬܳܐ ܕܡܳܪܘ̣ܬܶܗ: ܗܰܘ̇ ܕܩ̣ܰܕܶܫ ܠܛܰܡ̈ܶܐܐ ܒܙܘ̣ܦܳܐ ܕܰܚܢܳܢܶܗ: ܘܚܰܘܰܪ ܠܟܘ̣̈ܬܡܳܬܳܐ ܕܚܰܛܳܝ̈ܶܐ ܒܚܰܝܽܘ̣ܣܬܳܢܘ̣ܬܶܗ: ܗܰܘ̇ ܕܬܰܠܡ̣ܶܕ ܠܨܰܝ̈ܳܕܶܐ ܘܰܠܠܳܐ ܣܦܝ̣ܪ̈ܶܐ ܠܟܳܪܘ̣ܙܘ̣ܬܳܐ ܕܡܰܠܟܘ̣ܬܶܗ: ܘܰܢܓܰܕ ܘܰܐܝܬܝ̣ ܠܡܳܟ̈ܣܶܐ ܠܰܣܒܰܪܬܳܐ ܕܰܐܠܳܗܘ̣ܬܶܗ: ܗܰܘ̇ ܕܰܛܪܰܕ ܠܫܺܐܕ̈ܶܐ ܡܳܪ̈ܘ̣ܕܶܐ ܡ̣ܶܢ ܓܒܝ̣ܠܬܶܗ ܒܰܡܪܰܚܡܳܢܘ̣ܬܶܗ: ܘܢܰܚ̣ܶܡ ܠܥܰܢܝ̣̈ܕܶܐ ܒܚܝ̣ܠ ܓܰܢ̱ܒܳܪܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܡܰܢܘ̣ ܡ̣ܶܢ ܒܢܰܝ̈ܢܳܫܳܐ ܐܝ̣ܬ ܡܶܠܬܳܐ ܕܣܳܦܩܳܐ ܕܰܬ̣ܩܰܠܶܣܝ̱ ܠܣܰܓܺܝܽܐܘ̣ܬ ܬܶܕܡܪ̈ܳܬܳܐ ܕܝ̣ܠܳܟ ܐܳܘ ܡܳܪܝܳܐ: ܐܰܘ ܡܰܢܽܘ̣ ܩ̇ܢܶܐ̣ ܒܰܪ̱ܬ ܩܳܠܳܐ ܕܡܰܨܝܳܐ ܕܰܬ̣ܗܰܕܰܪܝ̱ ܠܪܰܒܘ̣ܬܳܐ ܕܐ̱ܪ̈ܳܙܰܝܟ ܫܒܝ̣̈ܚܶܐ ܘܰܐܠܗ̈ܳܝܶܐ: ܙܥܘܪܝ̣ܢ ܐܶܢܽܘܢ ܓܶܝܪ ܐܰܝܟ ܕܒܰܫܪܳܪܳܐ ܟܽܠܗܽܘܢ ܦܘ̣̈ܡܶܐ ܘܠܶܫ̈ܳܢܶܐ ܕܰܢ̣ܫܰܒܚܘ̣ܢܳܟ ܐܰܝܟ ܕܘܳܠܝܳܐ: ܘܰܡܚܝ̣ܠܝ̣ܢ ܗܰܘ̈ܢܶܐ ܘܪ̈ܶܥܝܳܢܶܐ ܕܰܢ̣ܪܰܡܪܡܘ̣ܢܳܟ ܐܰܝܟ ܕܙܳܕܶܩ: ܠܰܝܬ ܚܶܟܡܬܳܐ ܕܣܳܦܩܳܐ ܕܰܬ̣ܩܰܪܶܒܝ̱ ܕܳܫ̈ܢܶܐ ܠܪܰܒܘ̣ܬܳܟ: ܐܳܦܠܳܐ ܝ̣ܕܰܥܬܳܐ ܕܡܶܫܟܚܳܐ ܕܰܠܬܶܗܪܳܐ ܕܥܘܕܪ̈ܳܢܰܝܟ ܕܰܠܘܳܬܰܢ ܬ̣ܡܰܠܶܠܝ̱: ܘܥܰܠ ܗܳܕܶܐ ܒܕܘ̣ܡܳܪܳܐ ܪܰܒܳܐ ܢ̣ܺܐܪܰܒ ܫܡܳܟ: ܘܰܒܬܶܗܪܳܐ ܟܢܝ̣ܟܳܐ ܡܶܣܬܓܶܕ ܐܝܩܳܪܳܟ: ܡܶܛܽܠ ܕܠܳܐ ܡܶܬܕܰܪܟܳܐ ܡ̣ܶܢ ܥܒܝ̣̈ܕܶܐ ܡܶܐܬܝ̣ܬܳܟ: ܘܠܳܐ ܡܶܬܦܰܫܩܳܢܳܐ ܐܝ̣ܬܰܝܟ: ܘܡܶܐܬܝ̣ܬܳܟ ܠܳܐ ܡܶܬܦܰܫܩܳܐ ܡ̣ܶܢ ܒܪ̈ܰܝܳܐ: ܘܬܶܕܡܪ̈ܳܬܳܐ ܣܥ̣ܰܪܬ ܒܰܒܪܝ̣ܬܳܐ: ܘܐ̱ܪ̈ܳܙܶܐ ܥܛܝ̣̈ܦܳܢ ܘܳܐܣ̈ܘܳܬܳܐ ܓܡ̣ܰܪܬ ܒܰܓܒܝ̣ܠܬܳܟ ܘܦ̈ܶܠܳܐܬܳܐ ܛܥܝ̣̈ܢܳܢ: ܡܰܝ̈ܳܐ ܓܶܝܪ ܚܙܰܐܘܽܘܟ ܘܰܠܚܰܡܪܳܐ ܛܳܒܳܐ ܐܶܫܬܰܚ̣ܠܰܦܘ̱ ܒܡܶܫܬܘ̣ܬܳܐ ܕܠܰܢ ܚܰܝ̈ܶܐ ܚܰܕ̈ܬܶܐ ܒܡܥܡܘ̣ܕܝ̣ܬܳܐ ܬ̣ܫܰܟܶܢ: ܓܰܪ̈ܒܶܐ ܩܪܶܒ̣ܘ̱ ܠܳܟ ܘܶܐܬ̣ܕܰܟܝ̣ܘ ܕܢ̣ܶܬܕܰܟܶܐ ܥܳܠܡܳܐ ܡ̣ܶܢ ܚܛܝ̣ܬܳܐ: ܟܘ̣ܪ̈ܗܳܢܶܐ ܦܰܓܪ̈ܳܢܳܝܶܐ ܐܰܥܪܶܩ̣ܬ ܕܚܰܫ̈ܶܐ ܢܰܦܫ̈ܳܢܳܝܶܐ ܘܪ̈ܰܚܝ̣ܩܰܝ ܡ̣ܶܢ ܫܪܳܪܳܐ ܢ̣ܶܬܛܰܠܩܽܘܢ: ܠܰܡܫܰܪܝܳܐ ܒܡܶܠܬܳܐ ܚܰܝܶܨܬ ܕܠܰܢ ܡ̣ܶܢ ܪܰܦܝܽܘ̣ܬܳܐ ܕܚܘ̣ܫ̈ܳܒܶܐ ܬܰܚ̣ܠܶܡ: ܘܠܐܝ̣ܕܳܐ ܕܝܰܒܝ̣ܫܳܐ ܗ̱ܘܳܬ݀ ܬܰܩܶܢ̣ܬ ܕܠܐܝ̣̈ܕܰܝܳܐ ܕܝ̣ܠܰܢ ܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ ܬ̣ܶܦܫܘ̣ܛ: ܠܰܡܡܰܚܰܝܬܳܐ ܒܟܶܢܦܳܐ ܕܡܰܪܛܘ̣ܛܳܟ ܐܰܣܝ̣ܬ ܕܰܠܪܶܕܝܳܐ ܕܰܚܛܳܗ̈ܶܐ ܡܶܢܰܢ ܬ̣ܶܦܣܘ̣ܩ: ܠܰܥܠܰܝܡܬܳܐ ܢܰܚܶܡ̣ܬ ܕܰܠܢܰܦܫ̈ܳܬܳܐ ܕܡܝ̣̈ܬܝ̱ ܒܥܰܘܠܳܐ ܐܰܝܟ ܕܡ̣ܶܢ ܫܶܢܬܳܐ ܒܡܶܐܬܝ̣ܬܳܟ ܬܩܝ̣ܡ: ܠܰܒܪܳܗ̇ ܕܰܐܪܡܰܠܬܳܐ ܡ̣ܶܢ ܦܘ̣ܡܶܗ ܕܡܰܘܬܳܐ ܐܰܥ̣ܕܝ̣ܬ ܕܰܠܗܰܘܢܳܐ ܕܝ̣ܠܰܢ ܕܰܐܘܒ̣ܶܕܢܰܢ ܒܰܥܒܳܪ ܦܘ̣ܩܕܳܢܳܐ ܬ̣ܰܗܦܶܟ: ܠܪ̈ܘ̣ܚܶܐ ܐܰܝܟ ܡܳܪܳܐ ܫܰܠܝ̣ܬ ܕܰܠܓܰܠ̱̈ـܠܶܐ ܕܰܚܛܝ̣ܬܳܐ ܡܶܢܰܢ ܬ̣ܫܰܬܶܩ: ܗܰܠܶܟ̣ܬ ܥܰܠ ܡܰܝ̈ܳܐ ܐ̱ܢܳܫܳܐܝ̣ܬ ܘܩܰܠܝ̣ܠܘ̣ܬܳܟ ܠܳܐ ܛܰܒܰܥ̣ܬ: ܐܰܪܥܶܡ̣ܬ ܩܳܠܳܟ ܒܰܫܝܽܘܠ ܘܰܠܥܶܪ̈ܒܶܐ ܕܝ̣ܠܳܟ ܒܰܫܡܳܗ̈ܰܝܗܽܘܢ ܩ̣ܪܰܝܬ: ܘܡ̣ܶܢ ܟܰܪܣܶܗ ܕܡܰܘܬܳܐ ܐܰܦܶܩ̣ܬ: ܦܰܬܰܚ̣ܬ ܠܥܰܝ̈ܢܶܐ ܕܣܰܡܝܳܐ ܒܝܰܕ ܛܝ̣ܢܳܐ ܕܰܬ̣ܚܰܘܶܐ ܒܰܪܢܳܫܳܐ ܩܰܕܡܳܝܳܐ ܐܰܢ̱ܬ ܒ̣ܪܰܝܬ: ܠܫܝ̣ܠܘ̣ܚܳܐ ܫ̣ܰܕܰܪܬܳܝܗ̱ܝ ܘܛܘ̣ܦܣܳܐ ܕܡܰܥܡܽܘ̣ܕܝ̣ܬܳܐ ܕܢܘ̣ܗܪܳܐ ܡܰܩܢܝܳܐ ܬ̣ܫܰܘܕܰܥ: ܛܪܰܕܬ ܠܕܰܝ̈ܘܶܐ ܒܡܶܠܬܳܟ: ܐܰܥܪܶܩ̣ܬ ܠܫܺܐܕ̈ܶܐ ܡܳܪ̈ܘ̣ܕܶܐ ܒܦܘ̣ܩܕܳܢܳܟ: ܢܰܚܶܡ̣ܬ ܠܦܰܓܪ̈ܶܐ ܩܒܝ̣ܪ̈ܶܐ ܡ̣ܶܢ ܒܳܬܰܪ ܕܰܣܪܝ̣ܘ: ܠܡܳܟ̈ܣܶܐ ܙܰܕܶܩ̣ܬ ܡܪܰܚܡܳܢܳܐܝ̣ܬ: ܠܚܰܛܳܝ̈ܶܐ ܚܰܣܝ̣ܬ ܪܶܚܡܰܬ݀ ܐ̱ܢܳܫܳܐܝ̣ܬ: ܠܰܟܪ̈ܝ̣ܗܶܐ ܐܰܣܝ̣ܬ ܡܫܰܡܠܝܳܐܝ̣ܬ ܘܠܰܐܝܠܶܝܢ ܕܒܝ̣ܫ ܒܝ̣ܫ ܥܒܝ̣ܕܝ̣ܢ ܐܰܚܠܶܡ̣ܬ ܓܡܝ̣ܪܳܐܝ̣ܬ: ܠܳܟ ܐܳܣܝܳܐ ܛܳܒܳܐ ܘܰܐܠܳܗܳܐ ܫܰܪܝ̣ܪܳܐ ܡܶܬܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܫܳܐܠܝ̣ܢܰܢ ܡ̣ܶܢ ܪ̈ܰܚܡܰܝܟ ܣܰܓܺܝ̈ܶܐܐ ܚܘ̣ܠܡܳܢܳܐ ܓܡܝ̣ܪܳܐ ܘܳܐܣܝܽܘ̣ܬܳܐ ܡܫܰܡܠܰܝܬܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ ܕܟܽܠܗܽܘܢ ܚܰܛܳܝ̈ܶܐ ܕܢܳܩܫܝ̣ܢ ܒܬܰܪ̈ܥܶܐ ܕܰܡܪܰܚܡܳܢܘ̣ܬܳܟ: ܐܰܢ̱ܬ ܕܶܝܢ ܚܰܢܳܢܳܐ ܚܰܣܳܐ ܘܚܰܠܶܠ ܠܟܘ̣ܬܡ̈ܳܬܳܐ ܕܚܰܘ̈ܒܶܐ ܕܝ̣ܠܰܢ: ܕܰܟܳܐ ܘܩܰܕܶܫ ܠܢܰܦܫ̈ܳܬܳܐ ܕܝ̣ܠܰܢ ܘܰܠܦܰܓܪ̈ܰܝܢ: ܘܡ̣ܶܢ ܟܽܠܳܗ̇ ܡܰܥܒܕܳܢܘ̣ܬܳܐ ܕܗܰܘ̇ ܕܰܠܩܘ̣ܒܠܳܐ ܚܰܪܰܪ ܠܰܢ: ܡܶܛܽܠ ܕܰܐܢ̱ܬ ܗ̱ܘ̣ ܐܝ̣ܬܰܝܟ ܐܰܠܳܗܳܐ ܡܩܰܒܠܳܢܳܐ ܕܰܐܝܠܶܝܢ ܕܬܳܝܒܝ̣ܢ: ܘܡܶܫܟܚܳܢܳܐ ܕܰܐܝܠܶܝܢ ܕܰܐܒܝ̣ܕܝ̣ܢ: ܘܥܳܨܽܘܒܳܐ ܕܰܐܝܠܶܝܢ ܕܰܬܒܝ̣ܪܝ̣ܢ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀