ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܛܳܒܳܐ ܕܶܐܬ̣ܳܐ ܒܨܶܒܝܳܢܶܗ ܠܘܳܬ ܟܪ̈ܝ̣ܗܶܐ: ܘܰܐܣܝ̣ ܟܺܐܒܰܝ̈ܗܽܘܢ ܒܚܘ̣ܡܣܳܢܶܗ: ܠܗܰܘ̇ ܡܰܒܘ̣ܥܳܐ ܕܚܘ̣ܠ̈ܡܳܢܶܐ ܕܶܐܬ̣ܚܙܝ̣ ܒܰܝܢܳܬ ܡܳܟ̈ܶܐ ܘܡܰܟܰܐܒ̈ܶܐ ܒܛܰܝܒܘ̣ܬܶܗ: ܘܰܒܟܽܠ ܓܰܒܝ̣̈ܢ ܐܰܪܕܝ̣ ܠܰܣܢܝ̣̈ܩܶܐ ܥܘ̣ܕܪ̈ܳܢܶܐ: ܠܗܰܘ̇ ܥܶܠܳܝܳܐ ܕܶܐܬ̣ܪܟܶܢ ܨܶܝܕ ܬܰܚ̈ܬܳܝܶܐ ܒܰܚܢܳܢܶܗ ܕܰܢ̣ܦܰܠܶܓ ܠܡܶܣ̈ܟܺܢܶܐ ܡ̣ܶܢ ܥܘ̣ܬܪܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܫܘ̣ܒܚܳܐ ܠܳܟ ܐܳܣܝܳܐ ܫܡܰܝܢܳܐ ܕܶܐܫ̣ܬܰܕܰܪ ܠܰܢ ܡ̣ܶܢ ܥܘ̣ܒܶܗ ܕܰܐܒܳܐ ܚܘ̣ܒܳܢܳܐܝ̣ܬ: ܕܢ̣ܰܐܣܶܐ ܟܺܐܒ̈ܶܐ ܘܟܘ̣ܪ̈ܗܳܢܶܐ ܕܓܶܢܣܳܐ ܕܝ̣ܠܰܢ ܡܕܰܒܪܳܢܳܐܝ̣ܬ: ܐܰܢ̱ܬ ܡܳܪܝ̱ ܒܣܰܓܺܝܽܐܘ̣ܬ ܪ̈ܰܚܡܰܝܟ ܠܘܳܬܰܢ ܐܶܬܪܟܶܢ̣ܬ ܘܢܰܦܫܳܟ ܣܰܪܶܩ̣ܬ ܘܰܕܡܘ̣ܬܳܐ ܕܥܰܒܕܳܐ ܢܣܰܒ̣ܬ ܐ̱ܢܳܫܳܐܝ̣ܬ: ܘܰܒܕܐܝ̣ܬܰܝܟ ܐܰܠܳܗܳܐ ܗ̣ܘܰܝܬ ܒܰܪܐ̱ܢܳܫܳܐ ܐܰܟܘܳܬܰܢ ܣܛܰܪ ܡ̣ܶܢ ܚܛܝ̣ܬܳܐ ܠܳܐ ܡܶܫܬܰܚܠܦܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܒܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܡܰܝ̈ܳܐ ܠܚܰܡܪܳܐ ܛܳܒܳܐ ܫܰܚ̣ܠܶܦܬ ܐܰܠܳܗܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܪܒܳܐ ܛܰܡܳܐܐ ܘܰܢܕܝ̣ܕܳܐ ܕܰܟܝ̣ܬ ܨܶܒܝܳܢܳܐܝ̣ܬ ܘܠܰܡܫܰܪܝܳܐ ܕܡ̣ܶܢ ܢܘ̣ܓܪܳܐ ܪܡܶܐ ܗ̱ܘܳܐ ܘܡܶܬܢܰܘܰܠ ܒܥܰܪܣܳܐ ܕܟܺܐܒ̈ܶܐ ܐܰܚܠܶܡ̣ܬ ܡܫܰܡܠܝܳܐܝ̣ܬ ܘܠܰܚܡܳܬܶܗ ܕܦܶܛܪܘ̣ܣ ܕܪܰܡܝܳܐ ܗ̣ܘܳܬ݀ ܒܶܐܫܳܬܳܐ: ܐܶܚ̣ܰܕܬ ܒܐܝ̣ܕܳܗܿ ܘܰܐܩܝ̣ܡܬܳܗܿ ܚܠܝ̣ܡܳܐܝ̣ܬ: ܐܰܢ̱ܬ ܗ̱ܘ̣ ܕܰܠܛܰܠܝܶܗ ܕܩܶܢܛܪܘܢܐ ܗܰܘ̇ ܕܣܰܓܝ̣ ܗܰܝܡ̣ܶܢ ܒܡܶܠܬܳܟ ܐܰܣܝ̣ܬ ܩܰܠܝ̣ܠܳܐܝ̣ܬ: ܘܠܰܡܡܰܚܰܝܬܳܐ ܕܩܶܪܒ̣ܰܬ݀ ܠܟܶܢܦܳܐ ܕܡܰܪܛܘ̣ܛܳܟ ܐܰܪܕܝ̣ܬ ܠܳܗܿ ܥܘ̣ܕܪܳܢܳܐ ܕܝ̣ܠܳܟ ܟܰܣܝܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܒܰܪܬܶܗ ܕܝܘ̣ܐܳܪܳܫ ܕܡܝ̣ܬܳܐ ܗ̣ܘܳܬ݀ ܢܰܚܶܡ̣ܬ ܐܰܝܟ ܐܰܠܳܗܳܐ ܫܰܪܝ̣ܪܳܐܝ̣ܬ: ܘܰܠܠܶܓܝܘܢ ܕܫܺܐܕ̈ܶܐ ܡܳܪ̈ܘ̣ܕܶܐ ܛܪܰܕܬ ܘܰܐܦܶܩ̣ܬ ܡ̣ܶܢ ܓܒܝ̣ܠܬܳܟ ܡܳܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܟܢܰܥܢܳܝܬܳܐ ܕܰܒܥ̣ܳܬ݀ ܡܶܢܳܟ ܡܶܛܽܠ ܒܰܪܬܳܗܿ ܚ̣ܰܪܪܬܳܗܿ ܡ̣ܶܢ ܡܰܥܒܕܳܢܘ̣ܬܶܗ ܕܒܝ̣ܫܳܐ ܚܰܝܘ̣ܣܬܳܢܳܐܝ̣ܬ ܘܠܶܐܠܦܳܐ ܕܡܶܬܢܰܘܓܳܐ ܗ̣ܘܳܬ݀ ܡ̣ܶܢ ܥܰܙܝܙܘ̣ܬ ܪ̈ܘ̣ܚܶܐ ܘܩܰܫܝܘ̣ܬ ܓܰܠ̱̈ـܠܶܐ ܝܰܡ̱̈ܡܳܝܶܐ ܚܰܝܠܳܟ ܚ̣ܰܘܝ̣ܬ ܚܰܝܠܬܳܢܳܐܝ̣ܬ: ܘܰܫܡ̣ܰܥܘ̱ ܠܳܟ ܪ̈ܘ̣ܚܶܐ ܘܝܰܡܳܐ ܥܰܒܕܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܬܪܶܝܢ ܣܡܰܝ̈ܳܐ ܕܰܒܥ̣ܰܘ ܡܶܢܳܟ ܦܰܬܰܚ̣ܬ ܠܗܽܘܢ ܥܰܝ̈ܢܰܝܗܽܘܢ ܘܰܚ̣ܙܰܘ ܢܘ̣ܗܪܳܐ ܦܨܝ̣ܚܳܐܝ̣ܬ: ܘܠܐܝ̣ܕܳܐ ܕܝܰܒܝ̣ܫܳܐ ܗ̣ܘܳܬ݀ ܦܫ̣ܰܛܬ ܐܰܝܟ ܚܒܰܪܬܳܗܿ ܬܰܩܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܥܠܰܝܡܳܐ ܒܪܳܗܿ ܕܰܐܪܡܰܠܬܳܐ ܐܰܚܝ̣ܬܝܗ̱ܝ ܐܰܝܟ ܥܳܒܘ̣ܕܳܐ ܕܟܽܠ ܚܰܝܠܬܳܢܳܐܝ̣ܬ: ܘܰܠܗܰܘ̇ ܕܶܐܬܡܰܚܝ̣ ܡ̣ܶܢ ܓܰܝܳܣ̈ܶܐ ܡܶܬܝܰܕܥܳܢ̈ܶܐ ܚܰܢ̣ܬܳܝܗ̱ܝ ܘܰܥܨܰܒ̣ܬ ܡܰܚ̈ܘܳܬܶܗ: ܘܰܠܥܺܕܬܳܐ ܕܐܝ̣ܬܶܝܗܿ ܦܘ̣ܬܩܳܐ ܐܰܫܠܶܡ̣ܬܳܝܗ̱ܝ ܒܛܝ̣ܠܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܙܳܢܝ̣ܬܳܐ ܡܰܣܠܰܝ̣ܬܳܐ ܒܝܰܕ ܒܶܟܝܳܐ ܘܕܶܡ̈ܥܶܐ ܘܡܶܬܬܰܘܝܳܢܘ̣ܬܳܐ ܚܰܣܝ̣ܬܳܗܿ ܡܪܰܚܡܳܢܳܐܝ̣ܬ: ܘܰܠܣܰܡܝܳܐ ܕܡ̣ܶܢ ܟܪܶܣ ܐܶܡܶܗ ܒܳܒ̈ܳܬܳܐ ܕܥܰܝ̈ܢܰܘܗ̱ܝ ܬܰܩܶܢ̣ܬ ܢܘ̣ܗܪܳܐ ܫܰܟܶܢ̣ܬ ܠܶܗ ܬܗܝ̣ܪܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܪܳܚܡܳܟ ܠܳܥܳܙܳܪ ܡ̣ܶܢ ܒܳܬܰܪ ܕܰܣ̣ܪܝ̣ ܒܩܳܠܳܟ ܐܰܩܝ̣ܡܬܳܝܗ̱ܝ ܦܳܩܘ̣ܕܳܐܝ̣ܬ: ܘܚ̣ܰܘܝ̣ܬ ܒܝܰܕ ܗܳܕܶܐ ܕܐܰܢ̱ܬ ܗ̱ܘ̣ ܐܝ̣ܬܰܝܟ ܩܝܳܡܬܳܐ ܘܢܘ̣ܚܳܡܳܐ ܘܚܰܝ̈ܶܐ ܫܰܪܝ̣ܪܳܐܝ̣ܬ: ܘܡܶܛܽܠ ܗܳܕܐ ܒܳܥܶܝܢܰܢ ܘܰܡܦܝ̣ܣܝ̣ܢܰܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܡܶܬܟܰܫܦܳܢܳܐܝ̣ܬ: ܕܬ̣ܰܪܟܶܢ ܐܶܕܢܳܟ ܘܰܬ̣ܩܰܒܶܠ ܨܠܰܘ̈ܳܬܳܐ ܘܒܳܥ̈ܘܳܬܳܐ ܕܡܰܪܥܝ̣ܬܳܟ ܕܰܡܩܰܪܒܳܐ ܠܳܟ ܚܢܝ̣ܓܳܐܝ̣ܬ ܘܠܳܐ ܬ̣ܚܘ̣ܪ ܒܚܰܘ̈ܒܰܝܢ ܘܰܚ̈ܛܳܗܰܝܢ ܚܰܬܝ̣ܬܳܐܝ̣ܬ: ܘܠܳܐ ܢ̣ܶܬܬܥܝ̣ܪ ܘܠܳܐ ܢ̣ܶܬܠܰܚܰܡ ܥܠܰܝܢ ܪܘ̣ܓܙܳܟ ܬܳܒܘ̣ܥܳܐܝ̣ܬ ܐܶܠܳܐ ܦܬܰܚ ܠܰܢ ܬܰܪܥܳܐ ܕܪ̈ܰܚܡܰܝܟ ܒܰܣܝ̣ܡܳܐܝ̣ܬ: ܘܰܐܥܒܰܪ ܡܶܢܰܢ ܢܶܣܝܘ̣̈ܢܶܐ ܘܡܰܚ̈ܘܳܬܳܐ ܕܡ̣ܶܢ ܥܶܠܰܬ݀ ܚܛܳܗ̈ܰܝܢ ܡܶܬܬܰܝ̣ܬܶܝܢ ܥܠܰܝܢ ܙܳܕܩܳܐܝ̣ܬ: ܘܰܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ ܣܰܬܰܪ ܠܰܢ ܐܰܡܝ̣ܢܳܐܝ̣ܬ: ܡܛܽܠ ܕܐܰܢ̱ܬ ܐܝ̣ܬܰܝܟ ܥܳܨܘ̣ܒܳܐ ܕܰܐܝܠܶܝܢ ܕܰܬܒܝ̣ܪܝ̣ܢ ܒܝ̣ܫܳܐܝ̣ܬ: ܘܡܶܫܟܚܳܢܳܐ ܕܰܐܒܝ̣ܕܝ̣ܢ ܕܳܘܝܳܐܝ̣ܬ: ܘܥܰܠ ܐܰܦ̈ܰܝ ܗܳܠܶܝܢ ܬܶܫܒܘ̣ܚܬܳܐ ܠܳܟ ܡܰܣܩܝ̣ܢܰܢ ܘܠܳܐ ܣܰܒܥܳܐܝ̣ܬ: ܘܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܰܢ ܠܳܐ ܫܰܠܘܳܐܝ̣ܬ: ܘܰܠܪܘ̣ܚܳܟ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܫܰܘܝܳܐܝ̣ܬ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀