ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܚܰܣܝܳܢܳܐ ܕܚܰܛܳܝ̈ܶܐ ܘܰܡܩܰܒܠܳܢܳܐ ܕܬܰܝܳܒ̈ܶܐ: ܠܗܰܘ̇ ܕܩ̣ܰܕܶܫ ܠܛܰܡ̈ܶܐܐ ܒܙܘ̣ܦܳܐ ܕܰܚܢܳܢܶܗ: ܘܚ̣ܰܘܰܪ ܟܘ̣ܬܡ̈ܳܬܳܐ ܕܰܡܟ̈ܰܬܡܶܐ ܒܚܰܝܘ̣ܣܬܳܢܘ̣ܬܶܗ: ܠܗܰܘ̇ ܕܬܰܠܡ̣ܶܕ ܠܨܰܝܳܕ̈ܶܐ ܘܰܠܠܳܐ ܣܦܝ̣ܪ̈ܶܐ ܠܟܳܪܘ̣ܙܘ̣ܬܳܐ ܕܰܣܒܰܪܬܶܗ: ܘܰܢܓ̣ܰܕ ܘܰܐܝܬܝ̣ ܠܡܳܟ̈ܣܶܐ ܠܣܶܓܕܬܶܗ: ܠܗܰܘ̇ ܝܰܡܳܐ ܕܪ̈ܰܚܡܶܐ ܘܡܰܒܘ̣ܥܳܐ ܕܰܚܢܳܢܳܐ: ܘܰܡܩܰܒܶܠ ܠܛܳܥܰܝ̈ܳܐ ܕܡܶܬܦܢܶܝܢ ܠܘܳܬܶܗ: ܘܰܡܚܰܒܶܒ ܠܰܡܒܰܕܪ̈ܶܐ ܕܡܶܬܟܰܢܫܝ̣ܢ ܠܘܰܥܕܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܐܰܚܝ̣ܕ ܟܽܠ: ܝܰܠܕܳܐ ܣܓܝ̣ܕܳܐ ܘܥܶܠܬܳܢܳܐ ܕܡ̣ܶܢ ܥܶܠܬܳܐ ܩܰܕܡܳܝܬܳܐ: ܝܘ̣ܩܢܳܐ ܠܳܐ ܡܶܫܬܰܚܠܦܳܢܳܐ ܘܙܝ̣ܘܳܐ ܠܳܐ ܡܶܬܡܰܠܠܳܢܳܐ: ܗܰܘ̇ ܕܒܰܡ̈ܢܰܘܳܬܳܐ ܘܰܒܕܶܡ̈ܘܳܬܳܐ ܡܰܠ݂ܶܠܬ ܒܰܢ̈ܒܝܶܐ ܚܰܙܳܝ̈ܶܐ ܕܰܥܬܝ̣̈ܕܳܬܳܐ: ܘܰܒܗܳܠܶܝܢ ܝܰܘ̈ܡܳܬܳܐ ܐ̱ܚܪ̈ܳܝܶܐ ܡܰܠ݂ܶܠܬ ܥܰܡܰܢ ܒܰܚܕܳܝܘ̣ܬܳܐ ܠܳܐ ܡܶܣܬܰܕܩܳܢܝ̣ܬܳܐ: ܟܰܕ ܒܟܽܠ ܡܶܕܶܡ ܐܶܬ̣ܕܰܡܝ̣ܬ ܠܰܢ ܣܛܰܪ ܡ̣ܶܢ ܚܛܝ̣ܬܳܐ: ܥܘ̣ܬܪܳܐ ܛܥܶܢ̣ܬ ܡ̣ܶܢ ܒܶܝܬ ܓܰܙܳܐ ܪܰܒܳܐ ܕܛܰܝܒܘ̣ܬܳܟ ܘܰܐܥ̣ܬܰܪܬ ܠܓܶܢܣܳܐ ܕܒܶܝܬ ܐܳܕܳܡ: ܗܰܠܶܟ̣ܬ ܥܰܡܰܢ ܡܕܰܒܪܳܢܳܐܝ̣ܬ ܟܰܕ ܪܰܘܡܳܐ ܘܥܘ̣ܡܩܳܐ ܡܠܶܝܢ ܡܶܢܳܟ: ܘܠܳܐ ܡܣܰܝ̈ܟܳܢ ܠܳܟ ܫܡܰܝܳܐ ܘܰܫ̈ܡܰܝ ܫ̈ܡܰܝܳܐ ܙܥܘ̣ܪ̈ܝܳܢ ܠܳܟ: ܘܒܰܣܡܳܟܳܐ ܕܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܣܰܝܶܟ̣ܬ ܐܰܢ̱ܬ ܠܳܟ ܠܳܐ ܡܶܣܬܰܝܟܳܢܳܐܝ̣ܬ: ܐܰܬܩܶܢ̣ܬ ܐܝ̣̈ܠܳܢܶܐ ܘܢܶܨ̈ܒܳܬܳܐ ܒܫܘ̣ܪܝܳܐ ܕܰܒܪܝ̣ܬܳܐ ܗܳܕܶܐ ܡܶܬܚܰܙܝܳܢܝ̣ܬܳܐ: ܘܠܰܟܝܳܢܳܐ ܫܰܪܝܳܐ ܕܡܰܝ̈ܳܐ ܠܚܰܡܪܳܐ ܛܳܒܳܐ ܫܰܚܠܶܦ̣ܬܳܝܗ̱ܝ: ܘܟܰܕ ܐܶܬ̣ܒܰܣ̣ܰܡܘ̱ ܕܰܣܡܝ̣ܟܝ̣ܢ ܦܪܰܥ̣ܘ̱ ܠܳܟ ܕܳܫ̈ܢܶܐ ܘܩܘ̣ܠܳܣ̈ܶܐ ܐܰܝܟ ܐܰܠܳܗܳܐ ܕܟܽܠ ܦܫܝ̣ܩ ܠܶܗ: ܠܗܰܘ̇ ܕܶܝܢ ܕܰܐܓ̣ܪܶܒ ܗ̱ܘܳܐ ܦܰܓܪܶܗ ܘܡܰܣܠܰܝ ܗ̱ܘܳܐ ܒܢܳܡܘ̣ܣܳܐ ܘܡ̣ܶܢ ܝܳܕܘ̣̈ܥܰܘܗ̱ܝ ܡܰܪܚܰܩ ܗ̱ܘܳܐ: ܒܓܶܫܬܳܐ ܕܝ̣ܠܳܟ ܨܶܒܝܳܢܳܝܬܳܐ ܕܘ̣ܟܳܝܳܐ ܡܫܰܡܠܝܳܐ ܫܰܟܶܢ̣ܬ ܠܶܗ ܘܰܒܡܶܢܝܳܢܳܐ ܕܰܒܢܰܝ̈ ܫܰܪܒܬܶܗ ܛܰܟܶܣ̣ܬܳܝܗ̱ܝ: ܠܗܰܘ̇ ܕܶܝܢ ܕܰܠܙܰܘܥܳܐ ܕܡܰܝ̈ܳܐ ܡܣܰܟܶܐ ܗ̱ܘܳܐ: ܬܠܳܬܝ̣ܢ ܘܰܬܡܳܢܶܐ ܫܢܝ̣̈ܢ ܒܟܘ̣ܪܗܳܢܳܐ ܡܶܬܢܰܘܰܠ ܗ̱ܘܳܐ: ܒܡܺܐܡܪܳܐ ܡܰܢ ܕܝ̣ܠܳܟ ܠܗܳܝ ܕܟܰܣܝܳܐ ܒܗܳܝ ܕܓܰܠܝܳܐ ܫ̣ܰܪܰܪܬ: ܘܰܛܥ̣ܶܢ ܠܗܳܝ ܕܰܛܥܶܢ̣ܬܶܗ ܘܒܰܦܨܝ̣ܚܘ̣ܬܳܐ ܠܒܰܝܬܶܗ ܐܶܙ̣ܰܠ: ܗܰܘ̇ ܕܶܝܢ ܕܫܰܓ̣ܫܳܗܿ ܠܦܰܠܰܣܛܝ̣ܢܝ̣ ܛܝ̣ܡܰܝ ܒܰܪ ܛܝ̣ܡܰܝ ܒܟܳܪܘ̣ܙܘ̣ܬܶܗ: ܒܛܝ̣ܢܳܐ ܡܰܢ ܘܰܒܪܘ̣ܩܳܐ ܠܰܚܣܝ̣ܪܘ̣ܬܳܐ ܕܝ̣ܠܶܗ ܡܫܰܡܠܝܘ̣ܬܳܐ ܟܝܳܢܳܝܬܳܐ ܫܰܟܠܶܠ̣ܬ: ܘܰܐܝܟ ܓܳܒܘ̣ܠܳܐ ܘܰܡܬܰܩܢܳܢܳܐ ܨܰܒ̣ܶܬܬ: ܠܗܳܝ̇ ܕܶܝܢ ܕܰܒܪܶܕܝܳܐ ܕܰܕܡܳܐ ܬܰܪܬܰܥܶܣܪܶܐ ܫܢ̈ܝ̣ܢ ܐܶܬ̣ܢܰܘܠܰܬ݀ : ܘܰܒܝܰܕ ܓܫܳܦܳܐ ܕܰܒܩܰܪܢܳܐ ܕܡܰܪܛܘ̣ܛܳܟ ܩܳܡ̣ܰܬ݀ ܡܰܪܕܝ̣ܬܗܿ: ܘܬܶܫ̈ܒܚܳܬܳܐ ܕܡܶܬܬܚܝ̣̈ܒܳܢ ܘܬܰܘܕ̈ܝ̣ܬܳܐ ܦܶܪܥ̣ܰܬ݀ : ܐ̱ܚܝܳܢܬܳܗܿ ܕܗܳܕܶܐ ܚܰܛܳܝ̇ܬܳܐ ܟܪܘ̣ܡܬܳܢܝ̣ܬܳܐ ܒܝܰܕ ܕܶܡ̈ܥܶܝܗܿ ܠܚܰܘ̈ܒܶܝܗܿ ܫܒܰܩ̣ܬ: ܘܝܰܬܝ̣ܪ ܡ̣ܶܢ ܒܬܘ̣ܠܬܳܐ ܫܰܡ̣ܠܝ̣ܬ: ܠܠܳܥܳܙܳܪ ܕܶܝܢ ܗܰܘ̇ ܕܰܪܒܝ̣ܥܳܝ ܝܰܘ̈ܡܶܐ ܬܚܶܝܬ ܢܝ̣ܪܶܗ ܕܡܰܘܬܳܐ ܟܕܝ̣ܢ ܗ̱ܘܳܐ: ܘܰܠܓܰܘ ܡ̣ܶܢ ܬܰܪ̈ܥܰܘܗ̱ܝ ܚܒܝ̣ܫ ܗ̱ܘܳܐ: ܐܶܫܬ̣ܰܘܕܰܥ ܠܩܳܠܳܟ ܘܰܢܦ̣ܰܩ ܡ̣ܶܢ ܚܶܙ̈ܶܐ ܕܓܘ̣ܒܳܐ ܬܰܚܬܳܝܳܐ ܥܰܡ ܣܘ̣ܛܡ̈ܶܐ ܘܦܳܣܶܩ̈ܝܳܬܳܐ ܘܫܰܡ̣ܰܪ ܫܘ̣ܒܚܳܐ ܕܡܶܬܬܚܝ̣ܒ ܠܳܟ: ܗܰܘ̇ ܕܡܶܫܬܰܥܶܝܢ ܐܰܝܠܶܝܢ ܕܰܒܩܰܒܪ̈ܶܐ ܛܰܝܒܘ̣ܬܳܟ: ܘܰܠܗܰܘ̇ ܕܰܒܬܰܪܥܳܐ ܕܢܰܐܝܺܢ ܡܕܝ̣ܢ̱ܬܳܐ ܥܰܡ ܩܳܒܘ̣ܪ̈ܰܘܗ̱ܝ ܐܰܗܦܶܟ̣ܬ: ܘܡ̣ܶܢ ܒܶܝܬ ܚܰܘ̈ܩܶܐ ܡܰܘܬܳܢܳܝ̈ܶܐ ܐܰܥܕܝ̣ܬ: ܘܰܚܠܳܦ ܐܘ̣ܠ̈ܝܳܬܳܐ ܘܬܶܢ̈ܚܳܬܳܐ ܐܶܒ̈ܠܳܢܳܝܳܬܳܐ: ܙܡܝ̣ܪ̈ܳܬܳܐ ܘܬܶܫܒ̈ܚܳܬܳܐ ܒܦܘ̣ܡܳܗ̇ ܕܰܡܓܰܙܰܝܬܳܐ ܬܰܩܶܢ̣ܬ: ܝܰܡܳܐ ܐܶܫ̣ܬܰܘܕܥܳܟ ܘܰܫ̣ܠܝ̣: ܘܓܰܠ̱̈ـܠܶܐ ܘܡܰܚ̈ܫܘ̣ܠܶܐ ܘܰܫ̣ܬܶܩܘ̱: ܪ̈ܘ̣ܚܶܐ ܘܥܰܠ̈ܥܳܠܶܐ ܘܰܒ̣ܛܶܠܘ̱: ܘܰܚܠܳܦ ܫܓܝ̣ܫܘ̣ܬܳܐ ܕܬܰܠܡܝ̣̈ܕܶܐ ܫܶܠܝܳܐ ܘܢܰܘܚܳܐ ܘܰܒܗܝ̣ܠܘ̣ܬܳܐ ܐܰܩܢܝ̣ܬ: ܢܶܩ̣ܥܽܘܢ ܫܘ̣ܒܚܳܟ ܟܶܢ̈ܫܶܐ ܕܶܐܬܒܰܣ̣ܰܡܘ̱ ܡ̣ܶܢ ܠܰܚ̈ܡܶܐ ܙܥܘ̣ܪ̈ܶܐ ܕܰܐܣ̣ܓܝ̣ܬ ܒܪܶܚܡܰܬ݀ ܐ̱ܢܳܫܘ̣ܬܳܟ: ܐܰܢ̱ܬ ܓܶܝܪ ܐܝ̣ܬܰܝܟ ܒܰܫܪܳܪܳܐ ܕܦܳܬܰܚ ܐܰܢ̱ܬ ܐܝ̣ܕܳܟ ܘܰܡܣܰܒܰܥ ܐܰܢ̱ܬ ܨܶܒܝܳܢܳܐ ܕܟܽܠ ܕܚܰܝ: ܠܗܰܘ̇ ܕܶܝܢ ܕܡ̣ܶܢ ܓܰܝܳܣ̈ܶܐ ܡܶܬܝܰܕ̈ܥܳܢܶܐ ܐܶܬܠܰܣ̣ܛܝ̣ ܒܝܰܕ ܟܺܐܒ̈ܶܐ ܘܡܰܚ̈ܘܳܬܳܐ ܡܫܝ̣̈ܡܳܢܝܳܬܳܐ ܥܰܠ ܝܰܕ ܐܘ̣ܪܚܳܐ ܐܶܬ̣ܬܪܰܡܝ̣ ܒܝܰܕ ܚܰܡܪܳܐ ܘܡܶܫܚܳܐ ܐ̱ܪܳܙܢܳܝܳܐ ܕܰܢܨܰܠ̣ܰܬ ܥܠܰܘܗ̱ܝ ܠܫܘ̣ܡ̈ܳܬܶܗ ܐܰܚܠܶܡ̣ܬ: ܘܰܚܠܝ̣ܛܳܐ ܒܒܰܝܬܳܝܘ̣ܬܳܐ ܕܝ̣ܠܳܟ ܐܰܠܳܗܳܝ̇ܬܳܐ ܫܰܘܬܶܦ̣ܬ: ܘܠܳܟ ܐܳܦ ܗܳܫܳܐ ܬܶܫܒܘ̣ܚܬܳܐ ܚ̇ܕܰܬܳܐ ܡܩܰܪܒܝ̣ܢܰܢ ܚܢܰܢ ܕܐܝ̣ܬܰܝܢ ܡܡܰܚܰܝ̈ܳܐ ܒܣܰܓܺܝܽܐܘ̣ܬ ܟܘ̣ܪ̈ܗܳܢܶܐ ܡܶܬܝܰܕ̈ܥܳܢܶܐ: ܟܰܕ ܐܳܡܪܝ̣ܢܰܢ ܠܳܟ ܕܐܝ̣ܬܰܝܟ ܐܳܣܝܳܐ ܕܪ̈ܰܚܡܶܐ ܐܳܦ ܡܰܐܣܝܳܢܳܐ ܕܰܬܒܝ̣ܪ̈ܰܝ ܠܶܒܳܐ: ܦܝܳܣܳܐ ܡܩܰܪܒܝ̣ܢܰܢ ܘܗܳܠܶܝܢ ܕܝ̣ܠܳܟ ܠܳܟ ܝܳܗܒܝ̣ܢܰܢ: ܫܰܕܰܪ ܠܰܢ ܥܘ̣ܬܪܶܗ ܕܰܚܢܳܢܳܟ: ܣܥܘ̣ܪ ܠܰܡܚܝ̣ܠܘ̣ܬܰܢ ܒܳܐܣܝܘ̣ܬܳܟ: ܐܰܚܠܶܡ ܡܫܰܪܝܘ̣ܬܰܢ ܒܚܰܝܠܬܳܢܘ̣ܬܳܟ: ܟܰܢܶܫ ܠܰܢ ܠܓܰܘ ܡ̣ܶܢ ܚܶܣܢܳܐ ܕܰܒܛܝ̣ܠܘ̣ܬܳܟ: ܘܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ: ܘܚܰܣܳܐ ܠܥܰܢܝ̣̈ܕܰܝܢ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܣܘ̣ܓܳܐܐ ܕܰܡܪܰܚܡܳܢܘ̣ܬܳܟ: ܐܰܢܝ̣ܚ ܐܶܢܽܘܢ ܒܡܰܠܟܘ̣ܬܳܟ ܐܰܣܡܶܟ ܐܶܢܽܘܢ ܥܰܠ ܦܳܬܘ̣ܪ ܓܶܐܘ̈ܳܬܳܟ: ܦܰܛܶܡ ܐܶܢܽܘܢ ܡ̣ܶܢ ܙܝ̣ܘܳܐ ܕܦܰܪܨܘ̣ܦܳܟ: ܐܰܩܝ̣ܡ ܐܶܢܽܘܢ ܒܓܰܒܳܐ ܕܝܰܡܝ̣ܢܳܟ: ܡܶܛܽܠ ܕܰܡܥܝ̣ܢܳܐ ܕܪܶܚܡܰܬ݀ ܐ̱ܢܳܫܘ̣ܬܳܐ ܐܝ̣ܬܰܝܟ ܘܠܳܟ ܙܳܕܩܳܐ ܬܶܫܒܘ̣ܚܬܳܐ: ܘܠܳܟ ܡܶܬܬܚܝ̣ܒܳܐ ܬܰܘܕܝ̣ܬܳܐ: ܘܠܳܟ ܦܰܐܝܳܐ ܣܶܓܕܬܳܐ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀