ܦܪܽܘ̣ܡܝܽܘܢ

ܫܘ̣ܒܚܳܐ ܕܰܫܒܝ̣ܚ ܡܫܰܒܚܳܐܝ̣ܬ: ܘܩܘ̣ܠܳܣܳܐ ܕܡܶܬܥܰܠܶܐ ܐܰܠܳܗܳܐܝ̣ܬ: ܠܗܰܘ̇ ܕܰܒܪܶܚܡܰܬ݀ ܐ̱ܢܳܫܘ̣ܬܶܗ ܐܶܬܪܟܶܢ ܡܶܢ ܪܰܘܡܳܐ ܕܰܡܥܰܠܝܽܘ̣ܬܶܗ ܘܶܐܬܚܰܠܰܛ ܥܰܡ ܒܢܰܝ̈ܢܳܫܳܐ ܒܛܰܝܒܘ̣ܬܶܗ: ܘܰܐܣܝ̣ ܟܺܐܒ̈ܶܐ ܕܡܳܝܽܘ̣̈ܬܶܐ ܒܰܚܢܳܢܶܗ: ܠܗܰܘ̇ ܐܳܣܝܳܐ ܡܗܝ̣ܪܳܐ ܕܰܒܣܰܡܳܐ ܕܡܶܠܬܶܗ ܣܰܡܣܶܡ ܠܟܘ̣ܪ̈ܗܳܢܶܐ: ܠܗܰܘ̇ ܢܘ̣ܗܪܳܐ ܡܬܘ̣ܡܳܝܳܐ ܕܦܰܬ̣ܰܚ ܥܰܝ̈ܢܶܐ ܕܰܣܡܰܝ̈ܳܐ: ܘܰܩܪܳܐ ܠܡܳܟ̈ܣܶܐ ܠܰܬܝܳܒܘ̣ܬܳܐ: ܘܫܰܟܶܢ ܠܚܰܛܳܝ̈ܶܐ ܫܘ̣ܒܩܳܢ ܚܰܘܒ̈ܳܬܳܐ: ܘܰܐܩܝ̣ܡ ܠܡܝ̣̈ܬܶܐ ܒܦܘ̣ܩܕܳܢܶܗ ܘܢܰܚ̣ܶܡ ܐܶܢܽܘܢ ܡܶܢ ܩܰܒܪ̈ܶܐ ܒܝܰܕ ܩܳܠܶܗ: ܕܠܶܗ ܟܽܠܰܢ ܒܬܶܗܪܳܐ ܢ̇ܫܰܒܰܚ ܘܰܕܠܳܐ ܒܨܳܬܳܐ ܢ̇ܩܰܠܶܣ ܘܰܢ̇ܪܰܡܪܶܡ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܠܥ̱ܘ̣ܗܕܳܢܳܐ ܕܣܳܥܘ̣ܪܘ̣ܬ ܬܶܕܡܪ̈ܳܬܳܐ ܕܝ̣ܠܳܟ ܡܥܰܕܥܕܝ̣ܢܰܢ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܘܰܒܬܶܗܪܳܐ ܕܠܳܐ ܣܳܟܳܐ ܕܰܬܡܝ̣̈ܗܳܬܳܟ ܡܶܬܒܰܩܶܝܢܰܢ: ܘܠܳܟ ܡܶܬܟܰܫܦܝ̣ܢܰܢ ܟܰܕ ܐܳܡܪܝ̣ܢܰܢ: ܕܰܐܝܟܰܢܳܐ ܡܳܪܝ̱ ܕܫܰܚ̣ܠܶܦܬ ܒܩܳܛܢܶܐ ܕܰܓܠܝ̣ܠܳܐ ܡܰܝ̈ܳܐ ܫܚܝ̣̈ܡܶܐ ܠܚܰܡܪܳܐ ܛܳܒܳܐ ܗܳܟܰܢܳܐ ܠܰܢ ܡܶܫܬܰܚܠ̈ܦܳܢܶܐ ܫܰܚܠܶܦ ܡܶܢ ܡܰܪܝ̣ܪܘ̣ܬܳܐ ܠܘܳܬ ܒܰܣܝ̣ܡܘ̣ܬܳܐ: ܘܰܐܝܟܰܢܳܐ ܕܕܰܟܝ̣ܬ ܠܓܰܒܪܳܐ ܓܰܪܒܳܢܳܐ ܘܰܕܚܰܩ̣ܬ ܡܶܢܶܗ ܛܰܡܽܐܘ̣ܬܳܐ ܗܳܟܰܢܳܐ ܠܰܢ ܕܰܟܳܐ ܡܶܢ ܚܛܝ̣ܬܳܐ ܕܟܰܬܶܡ̣ܬ݂ܰܢ ܒܥܰܘܠܳܐ: ܘܰܐܪܚܶܩ ܡܶܢܰܢ ܠܟܽܠܳܗ̇ ܫܟܝ̣ܪܘ̣ܬܳܐ: ܘܰܐܝܟܰܢܳܐ ܕܰܐܚܠܶܡ̣ܬ ܠܰܡܫܰܪܝܳܐ ܒܡܶܠܬܳܐ ܕܦܘ̣ܩܕܳܢܳܟ ܘܰܐܟܶܣ̣ܬ ܠܝܽܘܕ̈ܳܝܶܐ ܕܰܛܠܰܡ̣ܘ̱ ܫܪܳܪܳܐ ܗܳܟܰܢܳܐ ܠܰܢ ܐܰܚܠܶܡ ܡܶܢ ܡܫܰܪܝܽܘ̣ܬܳܐ ܘܰܡܚܝ̣ܠܘ̣ܬܳܐ ܕܣܶܒ̣ܟܰܬ݀ ܒܰܢ: ܘܰܒܗܰܝܡܳܢܘ̣ܬܳܐ ܕܠܳܐ ܡܘ̣ܡ ܫܰܪܰܪ ܠܰܢ: ܘܰܐܝܟܰܢܳܐ ܕܠܶܐܫܳܬܳܐ ܡܶܢ ܚܡܳܬܶܗ ܕܦܶܛܪܘ̣ܣ ܛܪܰܕܬ ܘܩܰܠܝ̣ܠܳܐܝ̣ܬ ܩܳܡ̣ܰܬ݀ ܕܰܬ̣ܫܰܡܫܳܟ ܗܳܟܰܢܳܐ ܘܰܠܟܘ̣ܪ̈ܗܳܢܶܐ ܡܢܰܘ̈ܠܶܐ ܕܦܰܓܪ̈ܰܝܢ ܘܰܕܢܰܦܫ̈ܳܬܰܢ ܐܰܣܳܐ ܕܰܢ̇ܫܰܒܚܳܟ: ܘܰܐܝܟܰܢܳܐ ܕܚܰܘܝ̣ܬ ܫܘ̣ܠܛܳܢܳܟ ܒܛܰܠܝܶܗ ܕܩܶܢܛܪܘ̣ܢܳܐ ܕܰܐܘܕܝ̣ ܕܠܳܐ ܫܳܘܶܐ ܐ̱ܢܳܐ ܕܶܐܩܰܒܠܳܟ ܗܳܟܰܢܳܐ ܠܰܢ ܡܳܪܝ̱ ܒܗܰܝܡܳܢܘ̣ܬܳܐ ܫܰܪܰܪ ܕܡܰܘܕܝܳܐ ܒܡܳܪܘ̣ܬܳܟ ܘܠܳܐ ܡܶܬܦܰܠܓܳܐ: ܘܰܐܝܟܰܢܳܐ ܕܰܒܟܶܢܦܳܐ ܕܡܰܪܛܘ̣ܛܳܟ ܦܣܰܩ̣ܬ ܠܡܰܪܕܝ̣ܬܳܗ̇ ܕܰܡܡܰܚܰܝܬܳܐ ܕܩܶܪܒ̣ܰܬ݀ ܠܳܟ ܗܳܟܰܢܳܐ ܠܰܢ ܡܶܢ ܟܘ̣ܪ̈ܗܳܢܶܐ ܡܰܪ̈ܝ̣ܪܶܐ ܚܰܪܰܪ ܠܰܢ: ܘܰܐܝܟܰܢܳܐ ܕܰܐܥܝ̣ܪܬ ܠܒܰܪ̱ܬ ܝܽܘܐܳܪܳܫ ܡܶܢ ܡܰܘܬܳܐ ܐܰܝܟ ܕܡ̣ܶܢ ܫܶܢܬܳܐ ܗܳܟܰܢܳܐ ܐܰܥܝ̣ܪ ܡܳܪܝ̱ ܠܰܢ ܡ̣ܶܢ ܛܘ̣ܒ̈ܳܥܶܐ ܕܰܚܛܝ̣ܬܳܐ ܘܡ̣ܶܢ ܡܰܘܬܳܐ ܡܰܪܝ̣ܪܳܐ ܕܢܰܦܫܳܐ: ܘܰܐܝܟܰܢܳܐ ܕܰܒܝܰܕ ܡܶܠܬܳܟ ܒܰܛܶܠ̣ܬ ܠܰܫܓܝ̣ܫܘ̣ܬܶܗ ܕܝܰܡܳܐ ܘܰܠܩܶܢܛܳܐ ܕܬܰܠ̈ܡܝ̣ܕܶܐ ܫܰܠܝ̣ܬ ܗܳܟܰܢܳܐ ܡܳܪܝ̱ ܠܙܰܘ̈ܥܶܐ ܡܫܰܠ̈ܗܒܶܐ ܫܰܠܳܐ ܡܶܢܰܢ ܘܒܰܛܶܠ: ܘܰܐܝܟܰܢܳܐ ܡܳܪܝ̱ ܕܰܠܠܶܓܝܽܘܢ ܕܫܺܐܕ̈ܶܐ ܡ̣ܶܢ ܒܰܪܢܳܫܳܐ ܡܚܝ̣ܠܳܐ ܐܰܦܶܩ̣ܬ ܘܒܰܬܗܘ̣ܡܳܐ ܒܝܰܕ ܚܙܝ̣ܪ̈ܶܐ ܛܰܒܰܥ̣ܬ: ܘܗܳܟܰܢܳܐ ܠܰܢ ܡܳܪܝ̱ ܚܰܪܰܪ ܡ̣ܶܢ ܫܘ̣ܠܛܳܢܶܗ ܕܒܝ̣ܫܳܐ ܡܳܪܘ̣ܕܳܐ: ܘܰܠܣܳܛܳܢܳܐ ܕܡܰܩ̇ܪܶܒ ܥܰܡܰܢ ܒܰܬܗܘ̣ܡܳܐ ܛܰܒܰܥ: ܘܰܐܝܟܰܢܳܐ ܡܳܪܝ̱ ܕܠܰܟܢܰܥܢܳܝܬܳܐ ܕܶܐܬ̣ܩܰܪܝܰܬ݀ ܟܰܠܒܳܐ ܘܠܳܐ ܐܶܬ̣ܪܰܚܩܰܬ݀ ܘܬܘ̣ܪܣܳܝܳܐ ܕܰܒܢܰܝ̈ܳܐ ܬܶܒܥ̣ܰܬ݀ ܘܫܶܩ̣ܠܰܬ݀: ܘܚܘ̣ܪܳܪܳܐ ܡܶܢ ܫܺܐܕܳܐ ܢܶܣ̣ܒܰܬ݀ ܗܳܟܰܢܳܐ ܡܳܪܝ̱ ܠܰܢ ܚܰܪܰܪ ܡܶܢ ܡܰܥܒܕܳܢܘ̣ܬܳܐ ܕܫܺܐܕ̈ܶܐ ܘܡ̣ܶܢ ܡܰܐܟܝܳܢܘ̣ܬܗܽܘܢ ܕܰܒܢܰܝ̈ܢܳܫܳܐ ܒܝ̣̈ܫܶܐ ܦܰܨܳܐ: ܘܰܐܝܟܰܢܳܐ ܡܳܪܝ̱ ܕܡܶܢ ܠܰܚܡܳܐ ܙܥܘ̣ܪܳܐ ܠܟܰܦ̈ܢܶܐ ܘܠܰܨܪ̈ܝ̣ܟܶܐ ܣܰܒ̣ܰܥܬ ܗܳܟܰܢܳܐ ܡܳܪܝ̱ ܠܟܰܦܢܘ̣ܬܶܗ ܕܟܽܠܶܗ ܥܳܠܡܳܐ ܣܰܒܰܥ ܘܬܰܪܣܳܐ ܡܶܢ ܛܳܒ̈ܳܬܳܟ: ܘܰܐܝܟܰܢܳܐ ܡܳܪܝ̱ ܕܠܐܝ̣ܕܳܐ ܝܰܒܝ̣ܫܬܳܐ ܦܰܩ̣ܶܕܬ ܕܬܶܬ̣ܦܫܶܛܝ̱ ܘܶܐܬ̣ܦܰܫܛܰܬ݀ ܠܡܰܟܣܳܢܘ̣ܬܳܐ ܕܝܘ̣ܕ̈ܳܝܶܐ ܢܳܛܪ̈ܰܝ ܫܰܒܬܳܐ ܗܳܟܰܢܳܐ ܡܳܪܝ̱ ܠܺܐܝ̣ܕ̈ܰܝܢ ܦܫܘ̣ܛ ܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ ܘܰܥܒ̈ܳܕܶܐ ܛܳܒ̈ܶܐ: ܘܰܐܝܟܰܢܳܐ ܡܳܪܝ̱ ܕܰܒܝܰܕ ܪܶܡܙܳܟ ܚܓܝ̣ܪ̈ܶܐ ܩ̣ܰܝܶܙܘ̱ ܐܰܝܟ ܐܰܝ̈ܠܶܐ ܡܶܛܽܠ ܕܗܰܝܡܶܢܘ̱ ܒܳܟ ܗܳܟܰܢܳܐ ܡܳܪܝ̱ ܠܗܰܠ̈ܟܳܬܰܢ ܬܰܪܶܨ ܒܐܘ̣ܪܚܳܐ ܕܩܘ̣ܫܬܳܐ ܘܒܰܫܒܝ̣ܠܳܐ ܕܙܰܕܝ̣ܩܘ̣ܬܳܐ: ܘܰܐܝܟܰܢܳܐ ܡܳܪܝ̱ ܕܰܐܢܗ̣ܰܪܬ ܠܥܰܝ̈ܢܶܐ ܕܰܣܡ̈ܰܝܳܐ ܕܡܶܢ ܢܘ̣ܗܪܳܐ ܓܠܝ̣ܙܝ̣ܢ ܗ̱ܘܰܘ ܗܳܟܰܢܳܐ ܡܳܪܝ̱ ܠܥܰܝ̈ܢܶܐ ܕܪ̈ܶܥܝܳܢܰܝܢ ܐܰܢܗܰܪ ܒܨܶܡ̈ܚܶܐ ܫܒܝ̣̈ܚܶܐ ܕܝ̣ܕܰܥܬܳܟ: ܘܰܐܝܟܰܢܳܐ ܕܚܰܕܝ̣ܬ ܠܰܐܪܡܰܠܬܳܐ ܒܢܘ̣ܚܳܡܳܐ ܕܰܒܪܳܗ̇ ܝܰܬܡܳܐ ܘܝ̣ܚܝ̣ܕܳܝܳܐ ܗܳܟܰܢܳܐ ܡܳܪܝ̱ ܠܰܐܪ̈ܡܠܳܬܳܐ ܕܡܰܪܥܝ̣ܬܳܟ ܚܰܕܳܐ ܘܰܠܝܰܬܡ̈ܶܐ ܣܥܘ̣ܪ ܘܦܰܪܢܶܣ ܡ̣ܶܢ ܒܶܝܬ ܓܰܙܳܐ ܕܰܡܪܰܚܡܳܢܘ̣ܬܳܟ: ܘܰܐܝܟܰܢܳܐ ܡܳܪܝ̱ ܕܰܠܫܶܡܥܽܘܢ ܕܶܐܬ̣ܦܰܠܰܓ ܟܰܕ ܡܶܬܢܰܘܰܓ ܒܶܝܬ ܓܰܠ̱̈ـܠܶܐ ܐܰܘܫ̣ܶܛܬ ܐܝ̣ܕܳܟ ܐܰܘܟܝ̣ܬ ܝܰܡܝ̣ܢܳܟ ܘܕܰܠܝ̣ܬܳܝܗ̱ܝ ܗܳܟܰܢܳܐ ܡܳܪܝ̱ ܠܰܢ ܕܰܠܳܐ ܡܶܢ ܝܰܡܳܐ ܕܚܰܘܒ̈ܶܐ ܘܓܰܠ̱̈ـܠܶܐ ܘܟܺܐܡ̈ܘ̣ܢܶܐ ܕܰܚܛܝ̣ܬܳܐ: ܘܰܐܝܟܰܢܳܐ ܡܳܪܝ̱ ܕܩܰܒܶܠ̣ܬ ܕܶܡ̈ܥܶܝܗ̇ ܕܚܰܛܳܝ̇ܬܳܐ ܕܩܶܪܒ̣ܰܬ݀ ܠܳܟ ܘܡܶܫ̣ܚܰܬ݀ ܒܒܶܣ̈ܡܶܐ ܠܪܝ̣ܫܳܟ ܡܰܥܒܶܕ ܚܰܝ̈ܶܐ ܘܰܒܣ̣ܶܡ ܠܳܟ ܗܳܟܰܢܳܐ ܡܳܪܝ̱ ܘܰܒܕܶܡ̈ܥܶܐ ܕܡܶܢ ܥܰܝ̈ܢܰܝܢ ܚܰܣܳܐ ܚܰܘܒܰܝ̈ܢ: ܘܢ̇ܶܬܡܪܶܩ ܡܶܢ ܣܰܢܝ̈ܳܬܰܢ: ܘܰܐܝܟܰܢܳܐ ܡܳܪܝ̱ ܕܰܠܠܳܥܳܙܳܪ ܪܳܚܡܳܟ ܡܶܢ ܩܰܒܪܳܐ ܒܳܬܰܪ ܕܰܣܪܝ̣ ܢܰܚܶܡ̣ܬ ܗܳܟܰܢܳܐ ܡܳܪܝ̱ ܘܰܠܥܰܢܝ̣̈ܕܰܝܢ ܕܰܫܟܶܒܘ̱ ܥܰܠ ܣܰܒܪܳܟ ܘܰܐܘܕܝ̣ܘ ܒܳܟ ܘܰܐܩܝ̣ܡ ܐܶܢܽܘܢ ܡܶܢ ܝܰܡܝ̣ܢܳܟ: ܘܚܰܕܳܐ ܐܶܢܽܘܢ ܒܰܓܢܘ̣ܢܳܟ ܘܒܰܣܶܡ ܐܶܢܽܘܢ ܒܡܰܠܟܘ̣ܬܳܟ: ܘܰܐܟܚܕܳܐ ܟܽܠܰܢ ܢ̇ܫܰܒܰܚ ܠܚܰܝܠܳܟ ܥܳܒܶܕ ܬܶܕܡܪ̈ܳܬܳܐ: ܘܰܠܨܶܒܝܳܢܳܟ ܡܠܶܐ ܛܳܒ̈ܳܬܳܐ: ܘܢ̇ܰܘܕܶܐ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀