ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܪܳܐ ܒܘ̣ܟܪܳܐ ܕܰܐܒܳܐ ܓܢܝ̣ܙܳܐ ܕܰܗ̣ܘܳܐ ܒܰܪܢܳܫܳܐ: ܟܰܕ ܐܝ̣ܬܰܘܗ̱ܝ ܐܰܠܳܗܳܐ: ܘܠܰܡܫܰܪܝܽܘ̣ܬܳܐ ܕܗܰܕ̈ܳܡܶܐ ܕܰܡܫܰܪܝܳܐ ܒܡܶܠܬܶܗ ܐܰܠܳܗܳܝ̇ܬܳܐ ܚ̣ܰܝܶܨ: ܘܰܚܛܳܗ̈ܶܐ ܕܢܰܦܫܶܗ ܥܰܡ ܟܘ̣ܪܗܳܢܳܐ ܕܦܰܓܪܶܗ ܫܒ̣ܰܩ: ܐܰܝܟܰܢܳܐ ܕܰܓܡܝ̣ܪܳܐܝ̣ܬ ܢܰܦܫܳܐ ܥܰܡ ܦܰܓܪܳܐ ܬܶܬ̣ܚܠܶܡܝ̱: ܐܰܢ̱ܬ ܡܳܪܝ̱ ܒܪ̈ܰܚܡܰܝܟ ܣܰܓܺܝ̈ܶܐܐ ܚܘ̣ܨ ܠܪܰܦܝܽܘ̣ܬܳܐ ܕܐܝ̣ܬ ܒܚܘ̣ܫܳܒ̈ܰܝܢ: ܚܰܣܳܐ ܚܰܘܒܰܝ̈ܢ ܘܰܫܒܘ̣ܩ ܚܛܳܗ̈ܰܝܢ: ܐܰܝܟܰܢܳܐ ܕܟܰܕ ܡܪ̈ܝ̣ܩܳܢ ܢܰܦܫ̈ܳܬܰܢ ܡ̣ܶܢ ܫܘ̣ܚܬܳܐ ܕܰܚܛܳܗ̈ܶܐ ܩܰܕܝ̣ܫܳܐܝ̣ܬ ܢ̇ܫܰܒܚܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܬܘ̣ܡܳܝܳܐ ܕܫܘ̣ܪܳܝܳܐ ܠܰܝܬ ܠܶܗ: ܐܳܦܠܳܐ ܫܘ̣ܠܳܡܳܐ ܡܩܰܒܶܠ: ܠܗܰܘ̇ ܛܳܒܳܐ ܕܰܡܕܰܒܪܳܢܘ̣ܬܳܐ ܥܒ̣ܰܕ ܡܶܛܽܠ ܡܚܝ̣ܠܘ̣ܬܰܢ ܟܰܕ ܡܣܰܡ̇ܣܶܡ ܠܰܟܪܝ̣ܗܽܘ̣ܬ ܓܶܢܣܰܢ: ܗܰܘ̇ ܕܦܰܩ̣ܶܕ ܠܓܰܪ̈ܒܶܐ ܘܶܐܬ̣ܕܰܟܝ̣ܘ: ܘܠܰܡܫܰܪ̈ܰܝܳܐ ܘܶܐܬ̣ܚܰܝܰܠܘ̱: ܘܠܰܟܪ̈ܝ̣ܗܶܐ ܐܶܬ̣ܚܠܶܡܘ̱: ܘܠܰܚܓܝ̣ܪ̈ܶܐ ܘܰܩܢ̣ܰܘ ܗܶܠܰܟܬܳܐ: ܘܠܰܣ̈ܡܰܝܳܐ ܘܶܐܬ̣ܦܰܬܰܚܘ̱: ܘܰܠܡܝ̣̈ܬܶܐ ܘܶܐܬ̣ܢܰܚܰܡܘ̱: ܘܰܠܕܰܝ̈ܘܳܢܶܐ ܐܶܫ̣ܬܰܝܰܢܘ̱: ܘܰܠܚܰܛܳܝ̈ܶܐ ܘܶܐܬ̣ܚܰܣܝ̣ܘ: ܘܰܠܚܶܫ̈ܘ̣ܟܶܐ ܘܠܰܣܡ̈ܰܝܳܐ ܘܶܐܬ̣ܢܰܗܰܪܘ̱: ܘܛܰܡ̈ܶܐܐ ܐܶܬ̣ܩܰܕܰܫܘ̱: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܘܒܰܣܝ̣ܡܳܐ ܘܢܰܓܝ̣ܪ ܪܘ̣ܚܳܐ: ܕܰܒܨܶܒܝܳܢܳܐ ܛܳܒܳܐ ܕܰܐܠܳܗܘ̣ܬܳܟ ܡܶܢ ܠܳܐ ܡܶܕܶܡ ܒ̣ܪܰܝܬ ܠܰܢ: ܘܰܠܢܳܛܘ̣ܪܘ̣ܬ ܦܘ̣ܩ̈ܕܳܢܶܐ ܕܝ̣ܠܳܟ ܩܰܕܝ̣̈ܫܶܐ ܙܰܡܶܢ̣ܬ ܠܰܢ: ܘܰܠܝܳܪܬܘ̣ܬܳܐ ܕܡܘ̣ܠ̈ܟܳܢܶܐ ܕܝ̣ܠܳܟ ܫܒܝ̣̈ܚܶܐ ܘܚܰܒܝ̣̈ܒܶܐ ܕܝ̣ܠܳܟ ܝܰܬܝ̣ܪ ܡܶܢ ܟܽܠ ܒܶܪ̈ܝܳܢ ܚܰܘܝ̣ܬ ܠܰܢ: ܘܰܠܗܳܝ̇ ܕܝܰܬܝ̣ܪ ܪܳܡܳܐ ܘܰܡܥܰܠܝܳܐ ܒܨܰܠܡܳܟ ܘܒܰܕܡܘ̣ܬܳܟ ܥܒ̣ܰܕܬ ܠܰܢ: ܘܰܒܚܺܐܪܘ̣ܬܳܐ ܘܫܰܠܝ̣ܛܘ̣ܬ ܒܝܳܬܳܐ ܨܰܒ̣ܶܬܬ ܠܰܢ: ܐܶܠܳܐ ܚܠܳܦ ܗܳܠܶܝܢ ܟܽܠܗܶܝܢ ܚܢܰܢ ܒܡܰܗܡܝܳܢܘ̣ܬܳܐ ܕܝ̣ܠܰܢ ܬܚܶܝܬ ܛܪܘ̣ܢܘ̣ܬܶܗ ܕܳܐܟܶܠܩܰܪܨܳܐ ܐܶܫ̣ܬܰܥܒܰܕܢܰܢ: ܘܰܠܡܳܪܘ̣ܬܳܐ ܕܝ̣ܠܳܟ ܐܰܠܳܗܳܝܬܳܐ ܘܰܡܥܰܠܰܝܬܳܐ ܐܰܪܓ̣ܶܙܢܰܢ: ܐܶܠܳܐ ܟܰܕ ܚ̣ܙܰܝܬ ܐܳܘ ܐܰܒܳܐ ܡܪܰܚܡܳܢܳܐ ܕܰܠܟܽܠܳܗ̇ ܕܳܘܝܽܘ̣ܬܳܐ ܘܫܶܦܠܳܐ ܡܰܪܝ̣ܪܳܐ ܐܶܬ̣ܬܰܚܬܝ̣ܢܰܢ ܠܳܐ ܐܰܗ̣ܡܝ̣ܬ ܡ̣ܶܢ ܦܘ̣ܪܩܳܢܳܐ ܕܝ̣ܠܰܢ ܐܶܠܳܐ ܫ̣ܰܕܰܪܬ ܠܰܒܪܳܐ ܕܝ̣ܠܳܟ ܚܰܒܝ̣ܒܳܐ ܡܶܛܽܠܳܬܰܢ ܘܰܢܚ̣ܶܬ ܡܶܢ ܫܡܰܝܳܐ ܥܰܡ ܣܒܰܪܬܶܗ ܕܪܝ̣ܫ ܡܰܠܰܐܟ̈ܶܐ ܓܰܒܪܺܐܝܶܠ ܘܰܫ̣ܪܳܐ ܘܰܐܓ̣ܶܢ ܒܰܒܬܘ̣ܠܬܳܐ ܡܰܠܝܰܬ݀ ܩܰܕܝ̣ܫܘ̣ܬܳܐ ܘܶܐܬ̣ܒܰܣܰܪ ܡܶܢܳܗ̇ ܦܰܓܪܳܐ ܢܰܦܫܳܢܳܝܳܐ ܕܠܳܐ ܬܰܘܣܶܦܬܳܐ ܕܰܩܢܘ̣̈ܡܶܐ ܘܶܐܬܝ̣ܠܶܕ ܒܰܒܣܰܪ ܡܶܢ ܙܰܪܥܳܐ ܕܒܶܝܬ ܕܰܘܺܝ̣ܕ ܕܠܳܐ ܙܘ̣ܘܳܓ݂ܳܐ: ܘܩܰܒ̣ܶܠ ܥܠܰܘܗ̱ܝ ܡܰܘܠܳܕܳܐ ܬܪܰܝܳܢܳܐ ܥܰܡ ܟܽܠܗܽܘܢ ܚܰܫ̈ܶܐ ܐ̱ܢܳܫ̈ܳܝܶܐ ܘܠܳܐ ܥܕܝ̣̈ܠܶܐ ܘܶܐܬ̣ܚܙܝ̣ ܒܥܳܠܡܳܐ ܐ̱ܢܳܫܳܐܝ̣ܬ ܘܰܐܠܳܗܳܐܝ̣ܬ: ܘܡܰܠܝ̣ ܒܰܩܢܘ̣ܡܶܗ ܙܥܘ̣ܪ̈ܝܳܬܳܐ ܘܪܰܘܪ̈ܒܳܬܳܐ ܘܰܗ̣ܘܰܝ̈ ܟܽܠܗܶܝܢ ܕܝ̣ܠܶܗ ܪ̈ܳܡܳܬܳܐ ܘܡܳܟ̈ܳܬܳܐ: ܘܫܰܪܝ̣ ܠܡܶܥܒܰܕ ܘܰܠܡܰܠܳܦܘ̣ ܕܒܰܥܒܳܕܶܗ ܢܶܬܝ̣ܕܰܥ ܕܒܰܪ ܡܰܢܘ̣: ܘܰܒܝܽܘܠܦܳܢܶܗ ܢ̣ܶܪܓܰܫ ܥܳܠܡܳܐ ܕܰܐܠܳܗܰܐ ܗ̱ܘ̇ ܘܒܰܪ ܐܰܠܳܗܳܐ: ܘܶܐܬ̣ܩܪܝ̣ ܠܰܣܡܳܟܳܐ ܣܢܝ̣ܩܳܐ ܘܰܐܥ̣ܬܪܶܗ ܒܚܰܡܪܳܐ ܛܳܒܳܐ ܕܰܐܣܓܝ̣ ܒܶܗ: ܕܰܟܝ̣ ܠܦܰܓܪܶܗ ܕܗܰܘ̇ ܓܰܪܒܳܐ ܕܬܶܬ̣ܕܰܟܶܐ ܢܰܦܫܶܗ ܡ̣ܶܢ ܥܰܘܠܳܐ: ܟܰܕ ܦܳܢܝܳܐ ܥܰܡܶܗ ܠܡܰܠܟܘ̣ܬܳܐ: ܣܥ̣ܰܪ ܠܰܡܫܰܪܝܳܐ ܘܰܦܣ̣ܰܩ ܒܡܶܠܬܶܗ ܣܘ̣ܓܳܐܐ ܕܰܚܛܳܗܰܘ̈ܗ̱ܝ ܘܶܐܫ̣ܬܰܪܰܪ ܘܩ̣ܳܡ ܒܚܘ̣ܠܡܳܢܳܐ ܘܰܛܥ̣ܶܢ ܥܰܪܣܶܗ ܗܰܘ̇ ܕܰܬܠܳܬܝ̣ܢ ܘܰܬܡܳܢܶܐ ܫܢܝ̣̈ܢ ܪܡ̇ܶܐ̣ ܗ̱ܘܳܐ ܒܟܘ̣ܪܗܳܢܳܐ: ܐܰܥ̣ܬܰܪ ܠܕܘ̣̈ܓܶܐ ܒܫܶܡܥܳܐ ܕܰܢ̣ܨܽܘ̣ܬܽܘܢ ܡܶܠܰܘ̈ܗ̱ܝ ܡܳܐ ܕܡܰܠܶܦ ܝܘ̣ܠܦܳܢܳܐ ܪܘ̣ܚܳܢܳܝܳܐ: ܝܰܗ̣ܒ ܡܶܢ ܡܰܪܛܘ̣ܛܶܗ ܚܘ̣ܠܡܳܢܳܐ ܠܗܳܝ̇ ܕܰܕܡܳܗ̇ ܪܳܕܶܐ ܗ̱ܘܳܐ ܕܬܶܬ̣ܨܝ̣ܪܝ̱ ܒܳܗ̇ ܐ̱ܢܳܫܘ̣ܬܰܢ: ܕܰܒܦܰܓܪܶܗ ܘܰܕܡܶܗ ܡܶܬܩܰܕܫܳܐ ܡܶܢ ܛܰܡܽܐܘ̣ܬܳܐ ܕܰܦܬܰܟܪ̈ܶܐ: ܦܫ̣ܰܛ ܠܰܟܦܝ̣ܦܬܳܐ ܡܶܢ ܟܘ̣ܪܗܳܢܳܐ ܕܝ̣ܠܳܗ̇ ܕܰܢ̣ܚܰܘܶܐ ܕܰܐܝܟܰܢ ܦܳܫܶܛ ܒܪܝ̣ܬܳܐ ܠܫܘ̣ܒܚܶܗ ܕܡܰܪܟܢܳܐ ܒܣܶܓܕܬܳܐ ܕܰܓܠܝ̣̈ܦܶܐ: ܫ̣ܶܐܠ ܡܶܢ ܫܳܡܪܳܝܬܳܐ ܡܰܝ̈ܳܐ ܐܰܝܟ ܨܰܗܝܳܐ܆ ܗܰܘ̇ ܕܡܰܫܶܒ ܪ̈ܘ̣ܚܶܐ ܘܡܰܪ̈ܕܝܳܢ ܡܰܝ̈ܳܐ: ܘܦܳܩܶܕ ܠܰܪ̈ܣܝ̣ܣܶܐ ܕܢ̣ܰܫܩܽܘܢ ܠܰܐܪ̈ܥܳܬܳܐ ܨܰܗ̈ܝܳܬܳܐ: ܛܰܒܥ̣ܶܗ ܠܠܶܓܝܽܘܢ ܒܓܰܘ ܝܰܡܳܐ ܘܰܐܠ̣ܶܦ ܕܬܳܒܘ̣ܥܰܐ ܗ̱ܘ̇ ܕܡܳܪ̈ܘ̣ܕܶܐ: ܕܡ̣ܶܟ ܡܕܰܒܪܳܢܳܐܝ̣ܬ ܒܰܣܦܝ̣ܢ̱ܬܳܐ ܕܰܬܥܝ̣ܪܝ̣ܘܗ̱ܝ ܒܳܥܘ̣ܬܳܐ ܕܬܰܠ̈ܡܝ̣ܕܶܐ ܘܶܐܬ̣ܚܰܙܝܰܬ݀ ܦܳܩܘ̣ܕܘ̣ܬܶܗ ܒܝܰܡܳܐ ܐܰܝܟ ܕܶܐܬ̣ܝܰܕܥܰܬ݀ ܒܝܰܒܫܳܐ: ܢܰܚ̣ܶܡ ܠܥܰܢܝ̣ܕܳܐ ܒܬܰܪܥܳܗ̇ ܕܢܰܐܝ̣ܢ ܡܕܝ̣ܢ̱ܬܳܐ: ܘܚܰܕܝ̣ ܒܢܘ̣ܚܳܡܶܗ ܠܰܐܪܡܰܠܬܳܐ ܕܳܘܝ̣ܬܳܐ: ܩܰܒ̣ܶܠ ܠܚܰܛܳܝܬܳܐ ܒܒܶܝܬ ܫܶܡܥܽܘܢ ܘܰܫܒ̣ܰܩ ܠܳܗ̇ ܚܰܘܒ̈ܶܝܗ̇ ܘܰܚܛܳܗ̈ܶܝܗ̇: ܘܰܐܘܕܰܥ ܕܗܽܘ̣ ܐܝ̣ܬܰܘܗ̱ܝ ܬܰܪܥܳܐ ܕܒܶܗ ܥܳܐܶܠ ܐ̱ܢܳܫ ܨܶܝܕ ܐܰܒܘ̣ܗ̱ܝ ܡܒܰܪܟܳܐ: ܙܰܕܶܩ ܠܡܳܟ̈ܣܶܐ ܘܶܐܬ̣ܗܰܝܡܰܢ ܕܝܳܨܘ̣ܦܰܐ ܗ̱ܘ̇ ܘܡܚܰܤܝܳܢܳܐ: ܒܥ̣ܳܐ ܠܛܳܥܰܝ̈ܳܐ ܘܰܐܒܝ̣̈ܕܶܐ: ܘܶܐܬ̣ܚܙܝ̣ ܕܪܳܥܝܰܐ ܗ̱ܘ̇ ܡܫܰܒܚܳܐ: ܐܰܣܓܝ̣ ܠܰܚܡܳܐ ܒܚܘ̣ܪܒܳܐ ܘܶܐܬ̣ܟܪܶܙ ܕܙܳܝܽܘ̣ܢܰܐ ܗ̱ܘ̇ ܐܰܝܟ ܐܰܒܘ̣ܗ̱ܝ: ܐܰܣܝ̣ ܟܪ̈ܝ̣ܗܶܐ ܘܡܰܪ̈ܥܶܐ ܘܶܐܬ̣ܬܰܘܕܝ̣ ܕܳܐܣܝܰܐ ܗ̱ܘ̇ ܫܡܰܝܳܢܳܐ: ܓܒ̣ܰܠ ܛܝ̣ܢܳܐ ܡܶܢ ܪܘ̣ܩܶܗ ܘܰܥܒ̣ܰܕ ܥܰܝ̈ܢܶܐ ܠܣܰܡܝܳܐ ܘܶܐܬ̣ܝ̣ܕܰܥ ܕܒܳܪܘ̣ܝܰܐ ܗ̱ܘ̇ ܕܰܟܝܳܢܳܐ: ܢܰܚ̣ܶܡ ܠܠܳܥܳܙܳܪ ܘܰܠܒܰܪ̱ܬ ܝܽܘܐܳܪܳܫ ܘܚܰܘܺܝ̣ ܕܰܡܢܰܚܡܳܢܰܐ ܗ̱ܘ̇ ܕܡܝ̣̈ܬܶܐ: ܟܽܠܗܽܘܢ ܚܰܝܠܰܘ̈ܗ̱ܝ ܬܗܝ̣ܪܝ̣ܢ ܘܟܽܠܗܽܘܢ ܚܘ̣ܠ̈ܡܳܢܰܘܗ̱ܝ ܓܡܝ̣ܪܝ̣ܢ: ܟܽܠܗܽܘܢ ܥܒܳܕ̈ܰܘܗ̱ܝ ܫܒܝ̣ܚܝ̣ܢ: ܟܽܠܗܽܘܢ ܒܚܶܟܡܬܳܐ ܥܒܝ̣ܕܝ̣ܢ: ܟܽܠܗܽܘܢ ܣܘ̣ܥܪ̈ܳܢܰܘܗ̱ܝ ܪܰܘܪܒܝ̣ܢ: ܘܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܶܗ ܠܗܰܘ̇ ܕܗܳܠܶܝܢ ܟܽܠܗܶܝܢ ܪܰܘܪ̈ܒܳܬܳܐ ܘܰܬܡܝ̣̈ܗܳܬܳܐ ܣܥ̣ܰܪ ܠܘܳܬܰܢ: ܟܰܕ ܡܶܬܟܰܫܦܝ̣ܢܰܢ ܩܕܳܡܰܘܗ̱ܝ ܘܳܐܡܪܝ̣ܢܰܢ: ܐܰܕܢܰܚ ܠܰܢ ܡܳܪܝ̱ ܢܘ̣ܗܪܳܐ ܕܝ̣ܕܰܥܬܳܟ: ܒܰܣܶܡ ܠܰܢ ܙܝ̣ܘܳܐ ܕܫܘ̣ܒܚܳܟ: ܓܡܘ̣ܪ ܠܰܢ ܒܝ̣ܕܰܥܬܳܐ ܕܐ̱ܪ̈ܳܙܰܝܟ: ܕܰܠܳܐ ܠܰܢ ܡܶܢ ܗܰܘܬܳܐ ܕܰܫܟܝ̣ܪ̈ܳܬܳܐ: ܗܰܒ ܠܰܢ ܕܢ̇ܶܪܕܶܐ ܘܰܢ̇ܗܰܠܶܟ ܒܦܘ̣ܩ̈ܕܳܢܰܝܟ: ܘܰܥܶܕ ܠܰܢ ܠܚܰܓܶܗ ܕܰܓܢܘ̣ܢܳܟ: ܙܰܡܶܢ ܠܰܢ ܠܰܚܠܘ̣ܠܳܗ̇ ܕܡܶܫܬܘ̣ܬܳܟ: ܚܰܠܶܛ ܠܰܢ ܒܟܶܢܫ̈ܶܐ ܕܰܡܫܰܒܚ̈ܳܢܰܝܟ: ܛܰܝܶܒ ܠܰܢ ܠܟܽܠܗܽܘܢ ܒܘ̣ܣܳܡ̈ܰܝܟ: ܝܰܡܝ̣ܢܳܟ ܬܰܓܶܢܝ̱ ܥܠܰܝܢ ܥܰܠ ܥܰܒ̈ܕܰܝܟ: ܟܠܝ̣ ܡܶܢܰܢ ܠܡܰܪ̈ܕܘܳܬܳܐ ܒܪ̈ܰܚܡܰܝܟ: ܠܚܝ̣ ܟܽܠܗܶܝܢ ܣܰܢܝ̈ܳܬܰܢ ܒܰܚܢܳܢܳܟ: ܡܪܘ̣ܩ ܟܘ̣ܬܡ̈ܳܬܰܢ ܒܙܘ̣ܦܳܟ: ܢ̇ܶܗܘܶܐ ܟܽܠܰܢ ܫܳܦܪ̈ܰܝ ܠܨܶܒܝܳܢܳܟ: ܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ: ܥܰܕܰܪ ܠܰܢ ܕܩܳܪܶܝܢܰܢ ܠܳܟ: ܦܰܨܳܐ ܠܰܢ ܡܶܢ ܦܰܚܰܘ̈ܗ̱ܝ ܕܢܳܟܘ̣ܠܰܢ: ܨܰܒܶܬ ܠܰܢ ܒܝ̣ܕܰܥܬܳܐ ܕܰܫܪܳܪܳܟ: ܩܪܝ̣ ܘܩܰܪܶܒ ܠܟܽܠܰܢ ܠܘܳܬܳܟ: ܪܰܝܰܚ ܡܶܢܰܢ ܠܟܺܐܡܘ̣̈ܢܶܐ ܕܰܚܛܳܗ̈ܰܝܢ: ܫܰܝܢܳܟ ܘܰܫܠܳܡܳܟ ܢܣܰܬܶܬ ܒܢܰܦܫ̈ܳܬܰܢ: ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܚܢܰܢ ܘܥܰܢܝ̣̈ܕܰܝܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ ܢ̇ܶܫܬܘܶܐ ܕܰܢ̇ܩܰܪܶܒ ܠܳܟ ܒܡܶܐܬܝ̣ܬܳܟ ܕܬܰܪܬܶܝܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܡܫܺܝ̣ܚܳܐ ܚܰܝܠܳܐ ܘܚܶܟܡܬܳܐ ܕܰܐܒܳܐ: ܗܰܘ̇ ܕܐܝ̣ܬܰܝܟ ܥܘ̣ܕܪܳܢܳܐ ܕܰܐܝܠܶܝܢ ܕܰܟܪܝ̣ܗܝ̣ܢ: ܘܳܐܣܝܳܐ ܛܳܒܳܐ ܕܰܐܝܠܶܝܢ ܕܒܝ̣ܫ ܒܝ̣ܫ ܥܒܝ̣ܕܝ̣ܢ: ܐܝ̣ܢ ܡܳܪܝ̱ ܐܨܛܒܰܝ ܒܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ: ܘܫܰܕܰܪ ܠܰܢ ܒܶܗ ܐܳܣܝܘ̣ܬܳܐ ܠܟܺܐܒܰܝ̈ܢ ܘܟܘ̣ܪ̈ܗܳܢܰܝܢ: ܘܕܘ̣ܟܳܝܳܐ ܘܚܘ̣ܠܳܠܳܐ ܠܟܽܠܗܶܝܢ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ: ܘܰܐܢܝ̣ܚ ܒܛܰܝܒܘ̣ܬܳܟ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܐܰܝܟܰܢܳܐ ܕܡܶܢ ܟܽܠ ܘܰܒܝܰܕ ܟܽܠ ܘܡܶܛܽܠ ܟܽܠ ܬ̣ܶܫܬܰܒܰܚ ܘܬܶܣܬܓܶܕ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀