ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܘܰܡܥܰܠܝܳܐ: ܕܨܶܒܝܳܢܶܗ ܛܳܒܳܐ ܨܶܝܕ ܟܽܠ ܐ̱ܢܳܫ ܐܰܪܟܢ̣ܶܗ: ܘܚܘ̣ܒܶܗ ܣܰܓܺܝܳܐܐ ܠܟܽܠ ܦܶܢܝ̈ܳܢ ܐܰܘܒ̣ܠܶܗ: ܘܟܽܠ ܕܰܒܥ̣ܳܝܗ̱ܝ ܐܶܫܟܚ̣ܶܗ ܒܛܰܝܒܘ̣ܬܶܗ: ܘܠܰܟܪ̈ܝ̣ܗܶܐ ܘܰܡܚܝ̣̈ܠܶܐ ܣܥ̣ܰܪ ܒܬܶܕܡܪ̈ܳܬܶܗ: ܘܠܰܐܠܝ̣̈ܨܶܐ ܘܰܡܛܰܪ̈ܦܶܐ ܐܰܪܘܰܚ ܒܰܡܪܰܚܡܳܢܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܰܒܝܰܕ ܡܶܐܬܝ̣ܬܳܟ ܕܒܰܒܣܰܪ ܠܚܰܛܳܝ̈ܶܐ ܚܰܣܝ̣ܬ: ܘܰܠܛܰܡ̈ܶܐܐ ܩܰܕܶܫ̣ܬ: ܘܰܠܛܳܥܰܝ̈ܳܐ ܐܰܦܢܝ̣ܬ: ܘܠܰܐܒܝ̣̈ܕܶܐ ܐܶܫܟܰܚ̣ܬ: ܘܰܠܟܽܠܗܽܘܢ ܐܰܝܠܶܝܢ ܕܰܒܢܶܣ̈ܝܽܘ̣ܢܶܐ ܩ̣ܪܰܐܘܽܘ̣ܟ ܡܫܰܘܙܒܳܢܳܐ ܘܰܡܚܰܪܪܳܢܳܐ ܗ̣ܘܰܝܬ ܠܗܽܘܢ: ܐܳܦ ܠܝ̣ ܗܳܫܳܐ ܡܥܰܕܪܳܢܳܐ ܗܘܺܝ̣ ܕܓܳܥܶܐ ܐ̱ܢܳܐ ܠܘܳܬܳܟ ܡܦܝ̣ܣܳܢܳܐܝ̣ܬ ܘܪ̈ܰܚܡܶܐ ܫܳܐܶܠ ܐ̱ܢܳܐ: ܬܳܐ ܒܰܪ ܚܳܬܳܐ ܕܩܰܪܝ̣ܒܳܐ ܠܝ̣ ܕܡ̣ܶܢ ܡܥܰܝ̈ܳܐ ܐܶܡܗ̈ܳܝܶܐ ܥܠܰܝܟ ܐܶܫ̇ܬܕܝ̣ܬ: ܐܰܝܟ ܚܰܢܰܐ ܟܳܗܢܳܝܬܳܐ ܠܦܺܐܪܳܐ ܡܗܰܒܒܳܐ ܕܚܰܠܒܳܐ ܕܝ̣ܠܳܗ̇ ܢܕܝ̣ܪܳܐ: ܗܳܫܳܐ ܕܶܝܢ ܡ̇ܢܶܐ̣ ܒܛܰܡ̈ܶܐܐ ܥܰܡ ܒܢܰܝ̈ܳܐ ܕܥܺܝܠܺܝ ܥܰܒܕܳܐ ܡܫܰܒܚܳܐ: ܗܳܠܶܝܢ ܕܥܰܠ ܕܶܒܚ̈ܶܐ ܒܐܝ̣ܕܳܐ ܝܰܥܢܬܳܐ ܣܳܥܶܝܢ ܗ̱ܘܰܘ ܒܝ̣ܫܳܐܝ̣ܬ: ܘܰܒܢܰܦܫܳܐ ܫܳܛܝ̣ܬܳܐ ܕܝܳܢܶܣ̈ܩܶܐ ܒܡܰܫܠܝܳܐ ܬܠܝ̣ܬܳܝ ܫܶܢ̈ܶܐ ܕܒܶܣܪܳܐ ܡܶܢ ܩܶܕܣܳܐ ܝܰܥܢܳܐܝ̣ܬ ܢܳܣ̇ܒܝ̣ܢ ܗ̱ܘܰܘ: ܘܗܰܟܰܢܳܐ ܢܰܦܫܝ̱ ܕܦܶܚܡܳܐ ܗ̣ܘܳܬ݀ ܠܗܽܘܢ: ܘܥܰܠ ܗܳܕܶܐ ܒܫܘ̣ܠܳܡܳܐ ܒܝ̣ܫܳܐ ܕܰܐܟܘܳܬܗܽܘܢ ܐܳܙܠ̱ܳܐ: ܬ̣ܶܩܕܘ̣ܡܝ̱ ܘܬܰܕܪܶܟܝ̱ ܛܰܝܒܘ̣ܬܳܟ ܘܰܬܩܰܒܶܠܝ̱: ܒܗܳܝ̇ ܕܰܚܓܝ̣ܣܳܐܝ̣ܬ ܪܳܕܶܐ ܐ̱ܢܳܐ: ܘܠܝ̣ ܘܒܝ̣ ܩܪܳܒܶܗ ܕܪܳܫܘ̣ܦܳܐ ܡܥܰܩܡܳܐ ܡܰܛܫܝܳܐܝ̣ܬ ܘܓܰܠܝܳܐܝ̣ܬ ܡܟܰܦܶܦ ܠܬܰܪܥܝ̣ܬܝ̱: ܒܪܰܡ ܕܶܝܢ ܟܰܕ ܥܳܡܶܠ ܐ̱ܢܳܐ ܩܳܥܶܕ ܐ̱ܢܳܐ ܒܘ̣ܪܟܳܐ: ܫܰܕܰܪ ܒܨܶܒܥܳܐ ܪܰܛܝ̣ܒܬܳܐ ܠܠܳܥܳܙܳܪ ܕܝ̣ܠܳܟ ܕܰܠܠܶܫܳܢܳܐ ܕܝ̣ܠܝ̱ ܝܰܒܝ̣ܫܳܐ ܢ̣ܦܰܝܶܓ ܒܓܰܘܙܰܠܬܳܐ ܕܦܶܚܬܳܐ ܕܥܳܠܡܳܐ ܗܳܢܳܐ ܣܪܝ̣ܩܳܐ ܘܬܰܡܳܢ ܒܥܘ̣̈ܒܶܐ ܪ̈ܰܚܡܶܐ ܕܰܐܒܳܗ̈ܰܝ ܐܶܬܪܡܶܐ: ܘܒܐܝ̣ܕܳܐ ܕܝ̣ܠܳܟ ܐܳܚܘ̣ܕܬܳܐ ܫܰܪܰܪܰܝܢܝ̱: ܘܰܒܟܽܠܗܶܝܢ ܐܳܬܘ̈ܳܬܳܟ ܘܬܶܕܡܪ̈ܳܬܳܟ ܘܚܰܝ̈ܠܰܝܟ ܒܝ̣ ܚܰܘܳܐ ܐܰܝܟ ܕܡܶܢܩܕܝ̣ܡ: ܐ̱ܡ̣ܰܪ ܘܪܶܕܝܳܐ ܕܡܰܝ̈ܳܐ ܕܚܰܘܒ̈ܶܐ ܢ̣ܶܬܟܠܶܐ ܩܰܠܝ̣ܠܳܐܝ̣ܬ: ܘܠܰܠܡܺܐܢܳܐ ܕܢܰܘܚܳܐ ܒܛܰܝܒܘ̣ܬܳܟ ܐܶܡ̇ܛܶܐ: ܐ̱ܶܡܰܪ ܘܰܬ̣ܫܰܢܶܐ ܡܶܢܝ̱ ܠܒܰܩܪܳܐ ܕܰܚܙܝ̣ܪ̈ܶܐ ܪܘ̣ܚܳܐ ܕܠܶܓܝܽܘܢ ܘܬ̣ܶܦܶܠ ܒܰܬܗܘ̣ܡܳܐ ܒܥܘ̣ܡܩܳܐ ܕܰܛܒܰܥܬܳܐ: ܐܰܝܟܰܢܳܐ ܕܠܝ̣ ܩܰܠܝ̣ܠ ܢ̣ܶܗܘܶܐ ܢܦܺܐܫܳܐ: ܦܩܘ̣ܕ ܘܓܰܪܒܳܐ ܢܕܝ̣ܕܳܐ ܘܠܳܐ ܦܨܺܝ̣ܚܳܐ ܢ̣ܶܬܪܕܶܦ: ܘܗܰܒ ܢܘ̣ܗܪܳܐ ܠܥܰܝ̈ܢܰܝ ܕܢ̣ܚ̈ܙܝܳܢ ܬܪܝ̣ܨܘ̣ܬܳܐ: ܘܶܐܕ̈ܢܰܝ ܕܢ̣ܶܫ̈ܡܥܳܢ ܡܰܡܠ̱ܠܳܐ ܕܰܐܠܳܗܳܐ: ܐ̱ܶܡܰܪ ܐܝ̣ܕܳܐ ܝܰܒܝ̣ܫܬܳܐ ܬܶܬ̣ܦܫܶܛܝ̱ ܒܙܶܕ̈ܩܳܬܳܐ ܘܶܐܣܳܪܳܐ ܕܠܶܫܳܢܝ̱ ܢ̣ܶܣܬܕܶܩ: ܘܗܰܕܳܡ̈ܶܐ ܡܫܰܪ̈ܰܝܳܐ ܕܢܰܦܫܳܐ ܢ̣ܬܚܰܝܨܽܘܢ: ܐ̱ܶܡܰܪ ܘܡܶܢ ܒܶܝܬ ܡܝ̣̈ܬܶܐ ܡܶܢܫܶܝܠܝ̱ ܐܰܩܝ̣ܡ ܠܕܰܣ̇ܪܶܐ̣ ܒܰܚܛܝ̣ܬܳܐ: ܘܰܐܝܟ ܥܠܰܝܡܳܐ ܠܒܶܝܬ ܐܰܒܳܗ̈ܰܝ ܡ̣ܶܢ ܨܳܡܰܪܬܳܐ ܕܰܐܒܕܳܢܳܐ ܐܶܗ̇ܦܘ̣ܟ: ܐ̱ܶܡܰܪ ܘܡ̣ܶܢ ܩܰܠܝ̣ܠ ܠܰܚܡܳܐ ܙܥܘ̣ܪܳܐ ܘܢܽܘܢܳܣ̈ܶܐ ܡܰܠܝܳܐܝ̣ܬ ܐܶܣ̇ܒܰܥ: ܕܰܠܡܳܐ ܐܶܥ̇ܘ̣ܦ ܒܐܘ̣ܪܚܳܐ ܘܶܐܬܛܰܠܰܩ: ܐ̱ܶܡܰܪ ܘܫܰܝܢܳܐ ܘܰܫܠܰܡܳܐ ܘܚܘ̣ܒܳܐ ܘܰܐܘܝܽܘ̣ܬܳܐ ܢ̣ܰܡܠܟܽܘܢ: ܐ̱ܶܡܰܪ ܘܣܰܒܥܳܐ ܘܬܰܪܣܝ̣ܬܳܐ ܘܰܪܘܳܚܬܳܐ ܠܝܰܬܡ̈ܶܐ ܘܠܰܐܪ̈ܡܠܳܬܳܐ ܘܡܶܣ̈ܟܺܢܶܐ ܘܰܐܟܣ̈ܢܳܝܶܐ ܢ̣ܫܬܰܟܚܽܘܢ: ܐ̱ܶܡܰܪ ܘܕܘ̣ܟܪܳܢܳܐ ܛܳܒܳܐ ܘܢܘ̣ܚܳܡܳܐ ܕܙܰܕܝ̣ܩܘ̣ܬܳܐ ܠܥܰܢܝ̣̈ܕܶܐ ܕܗܰܝܡ̣ܶܢܘ̱ ܒܳܟ ܢ̣ܶܗܘܶܐ: ܫܰܝܶܢ ܕܶܝܢ ܝܰܡܳܐ ܠܫܰܦܠܳܐ: ܐܰܩܝ̣ܡ ܕܶܝܢ ܬܘ̣ܒ ܩܰܘܡܳܐ ܠܪܶܓܠܳܐ ܡܚܝ̣ܠܬܳܐ ܕܒܰܫܒܝ̣ܠܳܐ ܐܰܠܝ̣ܨܳܐ: ܘܡܰܣܩܳܢܳܐ ܕܬܰܪܥܳܐ ܩܰܛܝ̣ܢܳܐ ܕܠܰܫܡܰܝܳܐ ܡܰܘܒܶܠ: ܥܰܡ ܗܰܕܳܝܳܐ ܕܰܬܪܝ̣ܨ ܘܰܡܝܰܬܰܪ ܐܶܪܕܶܐ: ܘ݂ܡ̣ܶܢ ܥܒܳܕ̈ܶܐ ܕܫܳܘܶܝܢ ܠܫܘ̣ܢܳܩܳܐ ܐܰܡ̇ܶܕ: ܘܠܳܐ ܐܶܬܦ̇ܢܶܐ ܠܘܳܬ ܩܶܛܡܳܐ ܚܰܪܒܳܐ ܕܰܣܕܽܘ̣ܡ: ܕܡܶܛܽܠ ܦܰܩܪܘ̣ܬܳܐ ܕܝ̣ܠܳܗ̇ ܒܢܘ̣ܪܳܐ ܐܰܟܣܢܳܝܬܳܐ ܝܶܩ̣ܕܰܬ݀: ܐܶܬܚܙܶܐ ܕܶܝܢ ܡܣܰܪܗܒܳܐ ܠܘܳܬ ܛܘ̣ܪܳܐ ܕܥܺܕܬܳܐ ܩܰܕܝ̣ܫܬܳܐ ܘܠܳܐ ܐܶܬܛܥܶܐ ܘܶܐܦ̇ܗܶܐ ܒܰܐܬܪܳܐ ܨܰܕܝܳܐ: ܘܰܠܒܰܝܬܳܐ ܕܰܐܒܳܗ̈ܰܝ ܨܳܥܳܪ ܕܫܽܘܘ̣ܙܳܒܳܐ ܐܶܡ̇ܛܶܐ: ܕܠܳܐ ܟܺܐܦܳܐ ܡܶܬܚܰܣܕܳܢܝ̣ܬܳܐ ܩܳܝܶܡܬܳܐ ܕܡܶܠܚܳܐ ܒܰܗܦܳܟ ܒܶܣܬܰܪ ܐܶܗ̇ܘܶܐ: ܘܒܐܝ̣̈ܕܰܝܳܐ ܒܥܶܠ̈ܕܒܳܒܳܝܳܬܳܐ ܐܶܬܩܰܦܰܚ ܘܰܒܛܘ̣ܫܝܳܐ ܐܶܬܡܰܝܰܩ: ܘܶܐܗ̇ܘܶܐ ܢܰܘܕܳܐ ܠܶܐܡ̈ܘܳܬܳܐ: ܘܐܘ̣ܠ̈ܝܳܬܳܐ ܠܪ̈ܳܚܡܶܐ ܘܰܙܡܝ̣ܪ̈ܳܬܳܐ ܒܶܝܬ ܥܰܡ̱̈ܡܶܐ ܢܥܰܢܘ̣ܢܳܢܝ̱: ܐܶܠܳܐ ܒܛܰܝܒܘ̣ܬܳܟ ܩܰܦܝ̣ܢܝ̱ ܒܰܠܡܺܐܢܳܟ ܟܰܢܶܫܰܝܢܝ̱ ܘܰܚܡܘ̣ܠܰܝܢܝ̱: ܘܣܰܒܰܝܢܝ̱ ܥܰܠ ܟܰܬܦ̈ܳܬܳܟ: ܘܠܰܛܝܳܪܳܟ ܐܰܝܬܳܢܝ̱ ܘܒܶܗ ܣܰܬܰܪܰܝܢܝ̱: ܐܰܛܶܦ ܛܘ̣ܦܬܳܐ ܙܥܘ̣ܪܬܳܐ ܕܡܶܫܚܳܐ ܠܰܫܪܳܓܳܐ ܨܰܗܝܳܐ: ܘܥܘ̣ܕܪܳܢܳܐ ܢܰܗܝ̣ܪܳܐ ܘܡܶܢܕܪܝ̣ܫ ܢ̣ܶܬܢܰܒܪܰܫ ܠܰܡܦܺܐܕܳܐ ܕܝ̣ܠܝ̱: ܠܟܘ̣̈ܒܶܐ ܕܝ̣ܠܝ̱ ܚܳܢܘ̣̈ܩܶܐ ܐܰܘܟܝ̣ܬ ܪ̈ܶܢܝܶܐ ܣܪ̈ܝ̣ܩܶܐ ܕܰܠܒܶܣܬܰܪܝ̱ ܟܳܠܶܝܢ ܠܚܰܝܠܳܐ ܕܝ̣ܠܝ̱: ܟܰܕ ܡܣܰܪܗܶܒ ܠܐܘ̣ܪܚܳܐ ܗܳܝ̇ ܡܰܠܟܳܝܬܳܐ ܘܰܐܠܳܗܳܝܬܳܐ: ܘܡܶܢܕܪܝ̣ܫ ܡܰܗܦܟܝ̣ܢ ܐܰܘܩܶܕ ܘܛܰܠܶܩ: ܕܰܐܟܝ̣ܦܳܐܝ̣ܬ ܢ̣ܶܟܫܘ̣ܛ ܪܶܥܝܳܢܳܐ: ܘܰܐܟܚܕܳܐ ܢ̣ܶܓܠܘ̣ܦ ܫܘ̣ܒܚܳܐ ܚܰܠܝܳܐ ܘܩܘ̣ܠܳܣܳܐ ܦܰܐܝܳܐ: ܘܪܘ̣ܡܪܳܡܳܐ ܗܕܝ̣ܪܳܐ: ܠܳܟ ܡܳܪܝ̱ ܘܒܐܝ̣̈ܕܰܝܟ ܘܥܰܡܳܟ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀