ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܐܳܣܝܳܐ ܛܳܒܳܐ ܕܟܰܕ ܠܳܐ ܒܥ̣ܰܝܢܳܝܗ̱ܝ ܐܶܫܬ̣ܟܰܚ ܠܰܢ: ܘܟܰܕ ܠܳܐ ܐܰܪܓܶܫ̣ܢܰܢ ܒܶܗ ܐܶܫܬ̣ܰܘܫܰܛ ܠܰܢ ܪܳܡܳܐ ܘܰܡܥܰܠܝܳܐ ܕܟܰܕ ܨܒܳܐ ܕܢܶܦܪܩܰܢ ܐܶܬܢܰܚ̣ܰܬ ܠܘܳܬܰܢ ܒܚܘܽܒܶܗ: ܘܰܐܚܠ̣ܶܡ ܟܘ̣ܪ̈ܗܳܢܰܝܢ ܒܣܰܡܳܐ ܕܰܚܢܳܢܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܕܶܐܬ̣ܳܐ ܠܘܳܬܰܢ ܒܚܘܽܒܶܗ ܘܰܣܥ̣ܰܪ ܫܰܦܠܘ̣ܬܰܢ ܒܰܚܢܳܢܶܗ: ܛܳܒܳܐ ܕܓܳܠ̣ܘ̱ ܪ̈ܰܚܡܰܘܗ̱ܝ ܡܬܘ̣ܡܳܝ̈ܶܐ ܐܰܠܳܗܳܝ̈ܶܐ ܥܰܠ ܓܒܝ̣ܠܬܶܗ: ܘܠܳܐ ܣܰܝܒ̣ܰܪ ܕܢ̣ܶܚܣܰܪ ܟܽܠܶܗ ܗܳܢܳܐ ܥܒܳܕܳܐ ܕܺܐܝ̈ܕܰܘܗ̱ܝ ܒܰܪܢܳܫܳܐ: ܪܳܥܝܳܐ ܛܳܒܳܐ ܕܰܢܦ̣ܰܩ ܒܰܒܥܳܬܶܗ ܕܥܶܪܒܳܐ ܐܰܒܝ̣ܕܳܐ ܗܰܘ̇ ܕܒܰܢܟܝ̣ܠܘ̣ܬܶܗ ܕܚܶܘܝܳܐ ܡܳܪܘ̣ܕܳܐ ܛܥ̣ܳܐ ܡ̣ܶܢ ܡܶܢܝܳܢܳܐ ܓܡܝ̣ܪܳܐ ܕܰܡܠ̈ܝ̣ܠܶܐ: ܘܰܐܕܠ̣ܶܩ ܫܪܳܓܳܐ ܒܰܣ̣ܪܶܗ ܩܰܕܝ̣ܫܳܐ: ܘܰܟܢ̣ܰܫ ܒܰܝܬܶܗ ܕܥܳܠܡܳܐ ܡ̣ܶܢ ܚܛܝ̣ܬܳܐ: ܘܶܐܫܟ̣ܰܚ ܠܙܘܽܙܳܐ ܐܰܒܝ̣ܕܳܐ ܨܰܠܡܳܐ ܕܡܰܠܟܘ̣ܬܳܐ ܕܰܛܡܝ̣ܪ ܗ̱ܘܳܐ ܒܚܰܫ̈ܶܐ ܘܰܐܫܚ̣ܶܬ ܒܰܚܛܝ̣ܬܳܐ: ܘܕܰܟ̣ܝܶܗ ܘܡܰܪܩ̣ܶܗ ܒܟܘ̣ܪܳܐ ܕܡܰܥܡܘ̣ܕܝ̣ܬܳܐ ܡܚܰܣܝܳܢܝ̣ܬܳܐ ܘܒܰܣܚܳܬܳܐ ܕܡܰܘܠܳܕܳܐ ܕܡ̣ܶܢܕܪܝ̣ܫ: ܘܰܐܩ̣ܢܶܝܗ ܫܘ̣ܦܪܳܐ ܩܰܕܡܳܝܳܐ ܕܰܒܪܝ̣ܬܶܗ ܘܰܒܨܰܘܡܶܗ ܕܰܚܠܳܦܰܘܗ̱ܝ ܙܰܟ̣ܝܶܗ ܠܰܟܝܳܢܶܗ ܪܰܦܝܳܐ: ܘܰܒܣܳܥܘ̣ܪܘ̣ܬ ܬܶܕܡܪ̈ܳܬܳܗ ܐܰܣܝ̣ ܘܰܐܚܠ̣ܶܡ ܫܘ̣̈ܡܳܬܶܗ: ܚܰܪܰܪ ܡܳܪܝ̱ ܐܳܦ ܗܳܫܳܐ ܘܰܦܪܘ̣ܩ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܠܢܰܦ̈ܫܳܬܳܐ ܕܟܽܠܰܢ: ܡ̣ܶܢ ܨܳܐܝܘ̣ܬܳܐ ܘܫܘ̣ܚܬܳܐ ܕܰܚܛܝ̣ܬܳܐ: ܘܠܳܐ ܐ̱ܢܳܫ ܡܶܢܰܢ ܬ̣ܶܥܒܶܕ ܕܢܶܗܘܶܐ ܡܶܫܬܰܪܝܳܢܳܐ ܐܰܘ ܡܶܬܦܰܪܫܳܢܳܐ ܡ̣ܶܢ ܡܰܠܟܘ̣ܬܳܟ ܐܰܘ ܕܰܡܫܰܠܰܚ ܡ̣ܶܢ ܡܰܘܗܰܒܬܳܐ ܕܪܘ̣ܚܳܟ ܩܰܕܝ̣ܫܳܐ: ܐܶܠܳܐ ܐܰܫܘܳܐ ܠܰܢ ܡܳܪܝܳܐ ܒܪ̈ܰܚܡܰܝܟ ܕܢ̇ܶܗܘܶܐ ܢܰܘ̈ܣܶܐ ܕܟܰܝ̈ܳܐ ܠܬܶܫܡܶܫܬܳܐ ܕܝ̣ܠܳܟ: ܘܗܰܝ̈ܟܠܶܐ ܩܰܕܝ̣̈ܫܶܐ ܠܰܥܡܘ̣ܪܝܳܐ ܕܐܝ̣ܩܳܪܳܟ: ܐܰܝܟܰܢܳܐ ܕܒܰܥܡܳܕܳܟ ܐܶܬܢܰܗ̣ܪܢܰܢ: ܘܰܒܨܰܘܡܳܟ ܐܶܬܚܰܝܠ̣ܢܰܢ: ܘܰܒܚܘ̣ܠ̈ܡܳܢܰܝܟ ܐܰܠܳܗܳܝ̈ܶܐ ܐܶܬ̣ܐܰܣܝ̣ܢܰܢ: ܐܰܫܘܳܐ ܠܰܢ ܠܰܩܝܳܡܬܳܐ ܫܒܝ̣ܚܬܳܐ ܘܰܠܦܶܨܚܳܐ ܡܰܦܨܰܚ ܟܽܠ: ܘܰܒܥܳܠܡܳܐ ܚܰܕܬܳܐ ܚܢܰܢ ܘܥܰܢܝ̣̈ܕܰܝܢ ܒܚܰܝ̈ܶܐ ܛܘ̣ܒ̈ܬܳܢܶܐ ܘܰܕܠܳܐ ܣܳܐܒܝ̣ܢ: ܢ̇ܶܫܬܘܶܐ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܣܶܓܕܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܠܥܳܠܡܝ̣ܢ܀