ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܳܣܝܳܐ ܕܡܰܓܳܢ ܕܶܐܫ̣ܬܰܕܰܪ ܠܰܒܪܝ̣ܬܳܐ ܘܣܰܒ̣ܰܥ ܐܰܠܦ̈ܶܐ ܒܰܐܬܪܳܐ ܚܘ̣ܪܒܳܐ ܘܰܪܕܰܦ ܫܺܐܕ̈ܶܐ ܒܰܚܙܝ̣ܪ̈ܶܐ ܠܰܬܗܘ̣ܡܳܐ ܥܰܡܝ̣ܩܳܐ: ܘܰܐܚܠ̣ܶܡ ܠܺܐܝ̣ܕܳܐ ܝܰܒܝ̣ܫܬܳܐ: ܘܰܐܒܶܗ̣ܬ ܠܰܟܢܘ̣ܫܬܳܐ ܛܳܠܘ̣ܡܬܳܐ: ܘܰܐܫܡ̣ܰܥ ܕܘ̣ܓ̈ܶܐ: ܘܝܰܗ̣ܒ ܡܶܠܬܳܐ ܠܦܺܐܩ̈ܶܐ ܘܚܰܪ̈ܫܶܐ: ܘܰܐܣܝ̣ ܟܪ̈ܝ̣ܗܶܐ ܘܕܰܟܝ̣ ܓܰܪ̈ܒܶܐ: ܘܰܐܚܝ̣ ܡܝ̣̈ܬܶܐ ܘܰܫܒ̣ܰܩ ܚܰܘ̈ܒܶܐ: ܕܰܟܳܐ ܠܰܢ ܡܳܪܝ̱ ܡ̣ܶܢ ܚܛܳܗ̈ܶܐ ܘܣܘ̣ܪ̈ܚܳܢܶܐ: ܘܚܰܪܰܪ ܠܰܢ ܡ̣ܶܢ ܫܘ̣ܥܒܳܕܳܐ ܕܫܺܐܕ̈ܶܐ ܒܝ̣̈ܫܶܐ ܕܰܢ̇ܫܰܒܰܚ ܠܪ̈ܰܚܡܰܝܟ ܣܰܓܺܝ̈ܶܐܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܘܰܡܥܰܠܝܳܐ ܕܶܐܬܢܰܚ̣ܰܬ ܠܰܐܪܥܳܐ ܡܶܛܽܠ ܦܘ̣ܪܩܳܢܰܢ: ܘܰܠܒ̣ܶܫ ܡܘ̣ܟܳܟܳܐ ܡܶܛܽܠ ܪܘ̣ܡܪܳܡܰܢ: ܘܚ̣ܰܪܪܰܢ ܡ̣ܶܢ ܫܘ̣ܥܒܳܕܳܐ ܕܒܝ̣ܫܳܐ ܢܳܟܘ̣ܠܰܢ: ܘܥܰܡܶܗ ܠܰܫܡܰܝܳܐ ܐܰܣ̣ܶܩ ܠܰܢ: ܘܡ̣ܶܢ ܝܰܡܝ̣ܢ ܐܰܒܘ̣ܗ̱ܝ ܒܫܘ̣ܒܚܳܐ ܐܰܘܬ̣ܶܒ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰ‌ܠܳܗܳܐ ܗܰܘ̇ ܕܐܘ̣ܚܕܳܢܶܗ ܠܳܐ ܡܶܬܡܰܠܰܠ ܘܫܘ̣ܠܛܳܢܶܗ ܠܳܐ ܡܶܬܕܪܶܟ: ܘܫܘ̣ܒܚܶܗ ܠܳܐ ܡܶܣܬܰܝܰܟ ܘܚܘ̣ܒܶܗ ܫܦܝ̣ܥ ܘܰܚܢܳܢܶܗ ܪܰܒ: ܘܪ̈ܰܚܡܰܘܗ̱ܝ ܥܰܬܝ̣ܪܝ̣ܢ ܗܰܘ̇ ܕܰܒܛܰܝܒܘ̣ܬܶܗ ܚ̣ܳܣ ܥܰܠ ܓܶܢܣܳܐ ܕܰܒܢܰܝ̈ܢܳܫܳܐ: ܘܫ̣ܰܕܰܪ ܠܗܽܘܢ ܦܳܪܘ̣ܩܳܐ ܠܰܒܪܶܗ ܚܰܒܝ̣ܒܳܐ: ܠܡܶܠܬܳܐ ܗܰܘ̇ ܕܺܐܝ̣ܬܰܘܗ̱ܝ ܡ̣ܶܢ ܒܪܝ̣ܫܝ̣ܬ ܠܘܳܬܶܗ ܘܒܶܗ ܒܐܝ̣ܬܘ̣ܬܶܗ: ܗܰܘ̇ ܕܰܒܥܳܠܡܳܐ ܗ̱ܘܳܐ ܩܕܳܡ ܕܢ̣ܺܐܬܶܐ ܠܥܳܠܡܳܐ ܐܶܬ̣ܪܟܶܢ ܕܢ̣ܶܗܘܶܐ ܐ̱ܢܳܫܳܐ ܟܰܕ ܟܝܳܢܳܐܝ̣ܬ ܘܐܘ̣ܣܺܝܳܐܝ̣ܬ ܐܰ‌ܠܳܗܳܐ ܐܝ̣ܬܰܘܗ̱ܝ: ܗܰܘ̇ ܕܪܝ̣ܫ ܡܰܠܰܐܟ̈ܶܐ ܣܰܒ̣ܰܪ ܠܰܒܬܘ̣ܠܬܳܐ ܒܰܛܢܶܗ: ܘܪ̈ܳܥܰܘܳܬܳܐ ܚ̣ܙܰܘ ܫܘ̣ܒܚܶܗ: ܘܰܡܓ̈ܘ̣ܫܶܐ ܟܰܘܟܒܳܐ ܗܰܕܝ̣ ܐܶܢܽܘܢ ܠܘܳܬܶܗ ܘܩܘ̣ܪ̈ܒܳܢܶܐ ܐ̱ܪ̈ܳܙܳܢܳܝܶܐ ܩܰܪܶܒ̣ܘ̱ ܠܶܗ: ܠܒܘ̣ܢܬܳܐ ܠܰܐܠܳܗܘ̣ܬܶܗ: ܕܰܗܒܳܐ ܡܫܰܘܕܥܳܢܳܐ ܕܡܰܠܟܘ̣ܬܶܗ: ܘܡܘ̣ܪܳܐ ܡܛܰܦܣܳܢܳܐ ܕܡܝ̣ܬܘ̣ܬܶܗ: ܩ̣ܰܪܶܒ ܩܘ̣ܪ̈ܒܳܢܶܐ ܘܶܐܬ̣ܛܥܶܢ ܥܰܠ ܕܪ̈ܳܥܶܐ: ܘܰܫ̣ܪܳܐ ܒܰܫܠܳܡܳܐ ܡ̣ܶܢ ܐܰܣܘ̣ܪ̈ܶܐ ܕܦܰܓܪܳܐ ܠܫܶܡܥܽܘܢ ܕܰܚ̣ܙܳܐ ܚܢܳܢܶܗ: ܐܶܫ̣ܬܰܘܫܰܛ ܒܩܰܘܡܬܳܐ ܐ̱ܢܳܫܳܝܬܳܐ ܘܥ̣ܰܠ ܠܗܰܝܟܠܳܐ ܘܶܐܡ̣ܰܪ ܕܰܒܒܶܝܬ ܐܳܒܝ̱ ܘܳܠܶܐ ܠܝ̣ ܕܶܐܗ̇ܘܶܐ: ܡܛܳܐ ܠܰܡܫܘ̣ܚܬܳܐ ܕܩܰܘܡܬܳܐ ܓܡܝ̣ܪܬܳܐ ܘܶܐܬ̣ܳܐ ܠܡܰܥܡܘ̣ܕܝ̣ܬܳܐ ܕܰܬܝܳܒܘ̣ܬܳܐ ܐܰܝܟ ܣܢܝ̣ܩܳܐ: ܘܪܘ̣ܚܳܐ ܢܚ̣ܶܬ ܐܰܝܟ ܝܰܘܢܳܐ ܘܩܰܘܝ̣ ܥܠܰܘܗ̱ܝ: ܘܨܳܡ ܐܰܪܒܥܝ̣ܢ ܝܰܘ̈ܡܝ̣ܢ ܘܰܟܦ̣ܶܢ ܘܝܰܗ̣ܒ ܐܰܬܪܳܐ ܠܒܝ̣ܫܳܐ ܕܰܢ̣ܢܰܣܶܝܘܗ̱ܝ: ܙܟܳܝܗ̱ܝ ܒܰܕܪܳܫܳܐ ܘܕܺܐܝܬܰܘܗ̱ܝ ܐܰ‌ܠܳܗܳܐ ܠܶܗ ܠܳܐ ܚܰܘܝ̣: ܐܶܫ̣ܬܰܡܰܫ ܡ̣ܶܢ ܡܰܠܰܐܟ̈ܶܐ ܐܰܝܟ ܗܰܘ̇ ܕܣܳܠܶܩ ܡ̣ܶܢ ܐܰܓܘ̣ܢܳܐ ܒܙܳܟܘ̣ܬܳܐ: ܫܰܚ̣ܠܶܦ ܡܰܝ̈ܳܐ ܠܚܰܡܪܳܐ ܛܳܒܳܐ ܒܩܳܛܢܶܐ ܘܰܐܬ̣ܗܰܪ ܠܰܙܡܝ̣̈ܢܶܐ: ܐܰܣܝ̣ ܠܓܰܪ̈ܒܶܐ ܘܕܰܟܝ̣ ܠܰܡܫܰܪ̈ܰܝܳܐ ܘܰܐܟ̣ܶܣ ܠܝܘܽܕܳܝ̈ܶܐ ܛܳܠܘ̣̈ܡܶܐ: ܦ̣ܰܬܰܚ ܠܰܣ̈ܡܰܝܳܐ ܒܫܘ̣ܠܛܳܢܳܐ ܐܰ‌ܠܳܗܳܝܳܐ ܘܰܐܥ̣ܪܶܩ ܠܶܐܫܳܬܳܐ ܕܰܚܡܳܬܶܗ ܕܦܶܛܪܘ̣ܣ ܬܰܠܡܝ̣ܕܶܗ: ܐܰܚܠ̣ܶܡ ܠܰܡܡܰܚܰܝܬܳܐ ܒܟܶܢܦܳܐ ܕܡܰܪܛܘ̣ܛܶܗ: ܚ̣ܰܪܰܪ ܡ̣ܶܢ ܫܺܐܕܳܐ ܠܰܟܢܰܥܢܳܝܬܳܐ ܕܒܰܪ ܕܰܘܝ̣ܕ ܩ̣ܪܳܬܶܗ: ܐܰܝܟ ܡܳܪܳܐ ܢܰܚ̣ܶܡ ܡ̣ܶܢ ܡܰܘܬܳܐ ܐܰܝܟ ܕܡ̣ܶܢ ܫܶܢܬܳܐ ܠܒܰܪ̱ܬ ܝܘܽܐܳܪܳܫ ܕܗܰܝܡ̣ܶܢ ܒܶܗ: ܝܰܗܒ ܡܰܝ̈ܳܐ ܚܰܝ̈ܶܐ ܠܫܳܡܪܳܝܬܳܐ ܟܰܕ ܠܳܐ ܫܶܐܠ̣ܬܶܗ ܐܰܥ̣ܕܝ̣ ܡ̣ܶܢ ܡܰܘܬܳܐ ܠܰܒܪܳܗ̇ ܕܰܐܪܡܰܠܬܳܐ ܘܝܰܗ̣ܒ ܠܶܗ ܒܘ̣ܝܳܐܳܐ: ܟ̣ܐܳܐ ܒܝܰܡܳܐ ܕܡܶܬܒܰܥܪܰܪ ܗ̱ܘܳܐ: ܘܰܒܗ̣ܶܠ ܠܰܫܓܝ̣ܫܘ̣ܬܳܐ ܕܬܰܠܡܝ̣̈ܕܶܐ: ܠܛܰܠܝܶܗ ܕܩܶܢܛܪܘ̣ܢܳܐ ܣܥ̣ܰܪ ܒܡܶܠܬܶܗ: ܠܦܶܛܪܘ̣ܣ ܕܰܠܝܶܗ ܡ̣ܶܢ ܝܰܡܳܐ ܘܚܰܣ̣ܶܕ ܠܚܰܣܝ̣ܪܘ̣ܬ ܗܰܝܡܳܢܘ̣ܬܶܗ: ܒܠܰܚܡܳܐ ܙܥܘ̣ܪܳܐ ܕܬܰܪܬܶܝܢ ܙܰܒ̈ܢܝ̣ܢ ܣܰܒ̣ܰܥ ܟܰܦܢܘ̣ܬܳܐ ܕܟܶܢ̈ܫܶܐ: ܒܳܐܣܝܘ̣ܬܳܐ ܕܐܝ̣ܕܳܐ ܝܰܒܝ̣ܫܬܳܐ ܬܟ̣ܰܣ ܠܰܟܢܘ̣ܫܬܳܐ ܕܰܦܪ̈ܝ̣ܫܶܐ: ܒܙܳܢܝ̣ܬܳܐ ܕܶܐܬܩܰܒ̣ܠܰܬ݀ ܝܰܗ̣ܒ ܠܘ̣ܒܳܒܳܐ ܠܚܰܛܳܝ̈ܶܐ ܘܥܰܡ ܣܒܰܪܬܶܗ ܦܰܩ̣ܶܕ ܕܬܶܬ̣ܟܪܶܙܝ̱ ܒܡܶܬܦܰܢܝܳܢܘ̣ܬܳܗ̇ ܠܠܶܓܝܽܘܢ ܛܪܰܕ ܠܰܬܗܘ̣ܡܳܐ: ܠܕܰܝ̈ܘܶܐ ܚ̣ܰܪܰܪ ܒܦܘ̣ܩܕܳܢܳܐ ܡܫܰܠܛܳܐ ܠܠܳܥܳܙܳܪ ܡܝ̣ܬܳܐ ܢܰܚ̣ܶܡ: ܒܳܬܰܪ ܐܰܪܒܥܳܐ ܝܰܘ̈ܡܝ̣ܢ ܕܡܶܛܽܠܳܬܶܗ ܟܶܢ̈ܫܶܐ ܣܰܓܺܝ̈ܶܐܐ ܠܬܶܗܪܳܗ̇ ܪܰܒܳܐ ܕܬܶܕܡܘ̣ܪܬܳܐ: ܐܶܬ̣ܐ ܠܚܰܫܳܐ ܒܡܘ̣ܟܳܟܳܐ ܪܰܒܳܐ: ܘܶܐܬܚ̣ܣܶܡ ܡ̣ܶܢ ܣܳܦܪ̈ܶܐ ܡܶܛܽܠ ܦܰܐܝܘܽܬܳܗ̇ ܕܬܶܫܒܘ̣ܚܬܳܐ ܘܰܐܟ̣ܶܣ ܐܶܢܽܘܢ: ܕܶܐܢ ܫܳܬܩܝ̣ܢ ܫܰܒܪ̈ܶܐ ܟܺܐܦ̈ܶܐ ܩܳܥܶܝܢ ܫܘ̣ܒܚܳܐ ܘܠܳܐ ܫܳܠܶܝܢ: ܘܡ̣ܶܢ ܗܰܘ̇ ܕܶܝܢ ܬܰܠܡܝ̣ܕܳܐ ܙܺܐܦܳܢܳܐ ܚܫ̣ܰܠ ܐ̱ܪܳܙܳܐ: ܘܪܝ̣ܫ ܟܳܗ̈ܢܶܐ ܒܰܕܶܩ ܕܚܰܕ ܦܰܩܳܚ ܕܰܢ̣ܡܘ̣ܬ ܐܰܝܟ ܕܒܰܢܒܺܝܽܘܬܳܐ ܐܰܝܟ ܪܶܓܬܳܐ ܚܘ̣ܒܳܢܳܝܬܳܐ: ܐܶܡܪܳܐ ܐܶܟ̣ܰܠ ܥܰܡ ܬܰܠ̈ܡܝ̣ܕܰܘܗ̱ܝ ܒܥܶܠܝ̣ܬܳܐ ܘܰܐܠ̣ܶܦ ܐܶܢܽܘܢ ܐ̱ܪܳܙܳܐ ܕܦܰܓܪܶܗ ܘܰܕܡܶܗ ܩܰܕܝ̣ܫܳܐ ܘܰܐܓܥ̣ܶܠ ܠܗܽܘܢ ܛܘ̣ܦܣܳܐ ܕܡܘ̣ܟܳܟܳܐ ܒܰܫܝܳܓ݂ܬܳܐ: ܫܩ̣ܰܠ ܙܩܝ̣ܦܶܗ ܥܰܠ ܟܰܬܦܶܗ ܘܰܡ̣ܛܳܐ ܠܓܳܓܘ̣ܠܬܳܐ ܐܶܨܛܠ̣ܶܒ ܒܰܝܢܳܬ ܬܪܶܝܢ ܓܰܝܳܣ̈ܶܐ ܘܚܰܕ ܫ̣ܰܕܰܪ ܠܦܰܪܕܰܝܣܳܐ ܘܠܰܐ̱ܚܪܺܢܳܐ ܠܰܐܒܕܳܢܳܐ: ܣܥ̣ܰܪ ܐܘ̣ܪܚܶܗ ܝܰܘ̈ܡܶܐ ܬܠܳܬܳܐ ܒܓܰܘ ܩܰܒܪܳܐ: ܢܦ̣ܰܩ ܡܶܢܶܗ ܟܰܕ ܠܳܐ ܚ̣ܙܳܐ ܚܒܳܠܳܐ: ܘܥܰܠ ܠܥܶܠܝ̣ܬܳܐ ܘܫ̣ܰܪܰܪ ܠܬܽܐܘ̣ܡܰܐ ܕܠܳܐ ܗܰܝܡ̣ܶܢ: ܕܒ̣ܰܪ ܠܬܰܠ̈ܡܝ̣ܕܰܘܗ̱ܝ ܠܛܘ̣ܪ ܙܰܝ̈ܬܶܐ ܘܚ̣ܰܘܝ̣ ܠܗܽܘܢ ܣܘܽܠܳܩܶܗ: ܘܚܰܦ̣ܶܛ ܐܶܢܽܘܢ ܕܡܘ̣ܠܟܳܢܳܐ ܕܰܐܒܘ̣ܗ̱ܝ ܢ̣ܶܬܶܠ ܠܗܽܘܢ ܫܰܡܠܝ̣ ܫܘ̣ܘܕܳܝܶܗ ܘܪܘ̣ܚܩܘ̣ܕܫܳܐ ܦܰܪܰܩܠܝ̣ܛܳܐ ܫ̣ܰܕܰܪ ܠܗܽܘܢ ܘܒܰܕܡܘ̣ܬ ܠܶܫܳܢ̈ܶܐ ܕܢܘ̣ܪܳܐ ܐܰܓ̣ܶܢ ܥܠܰܝܗܽܘܢ: ܘܰܒܗܳܝ ܕܰܐ‌ܠܳܗܳܐ ܢܘ̣ܪܰܐ ܗ̱ܘ̇ ܐܳܟܶܠܬܳܐ: ܘܪܘ̣ܚܰܐ ܗ̱ܘ̇ ܐܰ‌ܠܳܗܳܐ ܘܰܐܝܠܶܝܢ ܕܣܳܓ̇ܕܝ̣ܢ ܠܶܗ ܒܪܘ̣ܚܳܐ ܘܒܰܫܪܳܪܳܐ ܘܳܠܶܐ ܕܢ̣ܶܣܓܕܽܘܢ: ܘܰܚܢܰܢ ܗܳܫܳܐ ܒܪܘ̣ܚܳܐ ܘܒܰܫܪܳܪܳܐ ܠܰܚܕܳܐ ܐܘ̣ܣܺܝܰܐ ܕܰܬܠܝ̣ܬܳܝܘܽܬܳܐ ܣܳܓ̇ܕܝ̣ܢܰܢ: ܠܰܐܒܳܐ ܕܰܐܫܦ̣ܰܥ ܪ̈ܰܚܡܰܘܗ̱ܝ ܥܰܠ ܟܽܠܰܢ: ܘܠܰܒܪܳܐ ܕܡܝ̣ܬ ܒܰܒܣܰܪ ܚܠܳܦ ܟܽܠܰܢ ܘܰܦ̣ܪܰܩ ܠܰܢ ܘܰܠܪܘ̣ܚܳܐ ܩܰܕܝ̣ܫܳܐ ܕܒܶܗ ܡܶܫܬܰܡܠܝ̣ܢ ܐ̱ܪ̈ܳܙܰܝܢ ܘܡܶܬܓܰܡܪܝ̣ܢ ܫܘ̣ܘ̈ܟܳܢܰܝܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܥܶܛܪܳܐ ܡܳܪܝ̱ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܢ̣ܶܗܘܶܐ ܠܰܢܝܳܚܳܟ ܘܰܠܚܘ̣ܣܳܝܰܢ: ܠܺܐܝܩܳܪܳܐ ܘܰܠܦܘ̣ܪܩܳܢܳܐ: ܠܡܰܣܓܳܝܘ̣ ܥܠܰܝܢ ܫܰܝܢܳܐ ܘܰܫܠܳܡܳܐ ܘܠܰܡܒܰܛܳܠܘ̣ ܚܶܡܬܳܐ: ܠܬܘ̣ܗܳܝܳܐ ܕܪܘ̣ܓܙܳܐ ܘܰܠܡܶܐܬܝ̣ܬܳܐ ܕܪ̈ܰܚܡܶܐ ܠܥܶܢܝܳܢܳܐ ܕܚܘ̣ܒܳܐ ܘܰܠܪܶܗܛܳܐ ܕܰܠܘܳܬ ܫܰܦܝ̣ܪ̈ܳܬܳܐ: ܐܰܝܟܰܢܳܐ ܕܥܰܡ ܦܝ̣ܪܡܰܢ ܗܰܝܡܳܢܘ̣ܬܰܢ ܢ̇ܩܰܪܶܒ ܠܳܟ: ܘܢ̣ܶܬܕܰܟܽܘܢ ܠܶܒܰܘ̈ܳܬܰܢ ܘܢ̣ܶܬܢܰܗܪܽܘܢ ܪ̈ܶܥܝܳܢܰܝܢ: ܘܡ̣ܶܢ ܒܝ̣̈ܫܳܬܳܐ ܢ̇ܶܨܛܰܠܰܠ ܒܪ̈ܰܚܡܰܝܟ: ܘܡ̣ܶܢ ܛܰܡܽܐܘ̣ܬܳܐ ܕܰܚ̈ܛܳܗܶܐ ܢ̇ܶܬܕܰܟܶܐ ܒܰܚܢܳܢܳܟ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀