ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܕܶܐܬ̣ܬܰܚܬܝ̣ ܨܶܝܕ ܡܳܟ̈ܶܐ ܘܰܣܥ̣ܰܪ ܐܶܢܽܘܢ: ܠܗܰܘ̇ ܐܳܣܝܳܐ ܕܶܐܬ̣ܪܟܶܢ ܨܶܝܕ ܟܪ̈ܝ̣ܗܶܐ ܘܰܐܣܝ̣ ܐܶܢܽܘܢ ܠܗܰܘ̇ ܥܰܬܝ̣ܪܳܐ ܕܶܐܬ̣ܳܐ ܨܶܝܕ ܡܶܣ̈ܟܺܢܶܐ ܘܰܐܥ̣ܬܰܪ ܐܶܢܽܘܢ: ܠܗܰܘ̇ ܩܰܕܝ̣ܫܳܐ ܕܶܐܬ̣ܚܰܠܰܛ ܥܰܡ ܛܰܡ̈ܶܐܐ ܘܩ̣ܰܕܶܫ ܐܶܢܽܘܢ: ܠܗܰܘ̇ ܝܰܡܳܐ ܕܰܚܢܳܢܳܐ ܕܚܰܢ̣ܶܗ ܠܓܶܢܣܳܐ ܐ̱ܢܳܫܳܝܳܐ ܘܦܰܪܩ̣ܶܗ: ܠܗܰܘ̇ ܟܝܳܢܳܐ ܛܘ̣ܒܬܳܢܳܐ ܘܰܡܥܝ̣ܢܳܐ ܕܥܘ̣ܕܪ̈ܳܢܶܐ ܕܥ̣ܰܕܪܶܗ ܠܰܟܝܳܢܰܢ ܪܰܦܝܳܐ ܒܛܰܝܒܘ̣ܬܶܗ: ܕܠܶܗ ܢ̇ܦܝ̣ܣ ܘܢ̇ܶܬܟܰܫܰܦ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܐܰܚܝ̣ܕ ܟܽܠ ܗܰܘ̇ ܕܒܰܠܚܘ̣ܕܰܝܟ ܐܝ̣ܬܰܝܟ ܦܳܪܘ̣ܩܳܐ ܘܰܡܫܰܘܙܒܳܢܳܐ ܕܟܽܠܗܽܘܢ ܐܰܝܠܶܝܢ ܕܡ̣ܶܢ ܒܝ̣ܫܳܐ ܡܶܬܥܰܫܡܝ̣ܢ ܘܡܶܬܡܰܪܕܝ̣ܢ: ܗܰܘ̇ ܕܺܐܝܬܰܝܟ ܐܳܣܝܳܐ ܛܳܒܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܗܳܢܽܘܢ ܕܰܒܟܘ̣ܪ̈ܗܳܢܶܐ ܡܫܰܚܠ̈ܦܶܐ ܐܝ̣ܬܰܝܗܽܘܢ: ܗܰܘ̇ ܕܐܝ̣ܬܰܝܟ ܡܢܰܛܪܳܢܳܐ ܕܰܐܝܠܶܝܢ ܕܥܰܠ ܬܘ̣ܟܠܳܢܳܐ ܕܪ̈ܰܚܡܰܝܟ ܒܥܳܠܡܳܐ ܗܳܢܳܐ ܫܓܝ̣ܫܳܐ ܘܰܡ̇ܠܶܐ̣ ܥܳܩ̈ܳܬܳܐ ܘܟܺܐܒ̈ܶܐ ܡܕܰܝܪܝ̣ܢ: ܗܰܘ̇ ܕܐܝ̣ܬܰܝܟ ܡܣܰܒܥܳܢܳܐ ܕܟܰܦ̈ܢܶܐ ܘܰܡܬܰܪܣܝܳܢܳܐ ܕܰܨܪ̈ܝ̣ܟܶܐ ܘܰܕܟܽܠܗܽܘܢ ܐܰܝܠܶܝܢ ܕܒܰܫܡܳܐ ܕܝ̣ܠܳܟ ܩܰܕܝ̣ܫܳܐ ܡܶܬܓܰܘܣܝ̣ܢ: ܐܰܢ̱ܬ ܗ̱ܘ̣ ܗܳܟܝ̣ܠ ܡܳܪܝܳܐ ܗܰܘ̇ ܕܰܒܣܰܓܺܝܽܐܘ̣ܬܳܐ ܕܪ̈ܰܚܡܰܝܟ ܡܶܛܽܠܳܬܰܢ ܐܰܟܘܳܬܰܢ ܗ̣ܘܰܝܬ: ܘܰܒܣܰܓܺܝܽܐܘ̣ܬ ܙܢܰܝ̈ܳܐ ܐܳܣ̈ܘܳܬܳܐ ܘܥܘ̣ܕܪ̈ܳܢܶܐ ܠܓܶܢܣܳܐ ܡܚܝ̣ܠܳܐ ܫܰܟܶܢ̣ܬ: ܗܰܘ̇ ܕܟܰܕ ܒܡܶܫܬܘ̣ܬܳܐ ܒܩܳܛܢܶܐ ܕܰܓܠܝ̣ܠܳܐ ܡܰܝ̈ܳܐ ܠܚܰܡܪܳܐ ܛܳܒܳܐ ܡܫܰܚܠܶܦ ܗ̱ܘܰܝܬ: ܠܥܳܠܡܳܐ ܟܽܠܶܗ ܫܘ̣ܚܠܳܦܳܐ ܝܰܡܝ̣ܢܳܝܳܐ ܘܫܘ̣ܘܫܳܛܳܐ ܕܰܠܥܳܠܰܡ ܡܫܰܟܶܢ ܗ̱ܘܰܝܬ: ܘܠܰܐܝܠܶܝܢ ܕܡܶܬܬܰܥܒܕܝ̣ܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ ܦܘ̣ܪܩܳܢܳܐ ܡܫܰܡܠܝܳܐ ܡܣܰܪܗܶܒ ܗ̱ܘܰܝܬ: ܘܟܰܕ ܠܓܰܪܒܳܐ ܡ̣ܶܢ ܓܰܪܒܶܗ ܡܕܰܟܶܐ ܗ̱ܘܰܝܬ ܠܟܽܠܶܗ ܓܶܢܣܳܐ ܐ̱ܢܳܫܳܝܳܐ ܐܳܣܝܘ̣ܬܳܐ ܡܫܰܟܶܢ ܗ̱ܘܰܝܬ: ܘܟܰܕ ܠܰܡܫܰܪܝܳܐ ܡ̣ܶܢ ܥܰܪܣܳܐ ܕܟܘ̣ܪ̈ܗܳܢܶܐ ܡܩܝ̣ܡ ܗ̱ܘܰܝܬ: ܐܳܣܝܘ̣ܬܳܐ ܕܢܰܦܫܳܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܐܰܝܟ ܒܳܪܘ̣ܝܳܐ ܘܥܳܒܘ̣ܕܳܐ ܕܟܽܠ ܠܶܗ ܝܳܗܶܒ ܗ̱ܘܰܝܬ: ܘܟܰܕ ܠܰܣ̈ܡܰܝܳܐ ܢܘ̣ܗܪܳܐ ܕܒܳܒ̈ܳܬܳܐ ܒܝܰܕ ܡܶܠܬܳܐ ܡܫܰܟܶܢ ܗ̱ܘܰܝܬ: ܠܥܰܝ̈ܢܶܐ ܡܶܬܝܰܕܥܳܢ̈ܝܳܬܳܐ ܕܢܰܦܫܳܐ ܐܰܝܟ ܡܳܪܳܐ ܘܥܳܒܘ̣ܕܶܗ ܕܰܟܝܳܢܳܐ ܡܰܢܗܰܪ ܗ̱ܘܰܝܬ: ܘܟܰܕ ܠܰܡܥܝ̣ܢܳܐ ܕܰܕܡܳܐ ܗܳܝ ܕܰܟܦܝ̣ܦܳܐ ܗ̱ܘܳܬ݀ ܒܟܶܢܦܳܐ ܕܡܰܪܛܘ̣ܛܳܟ ܡܰܐܣܶܐ ܗ̱ܘܰܝܬ: ܠܘܽܒܳܒܳܐ ܡܫܰܡܠܝܳܐ ܐܰܝܟ ܡܳܪܳܐ ܕܟܽܠܳܐ ܡܰܟܪܶܙ ܗ̱ܘܰܝܬ: ܘܟܰܕ ܠܛܰܡܽܐܘܬܳܐ ܕܰܚܛܳܗ̈ܶܐ ܗܳܝ ܕܡ̣ܶܢ ܩܕܝ̣ܡ ܚܰܛܳܝ̇ܬܳܐ ܡܳܪܶܩ ܗ̱ܘܰܝܬ: ܒܝܰܕ ܕܶܡ̈ܥܶܐ ܕܥܰܝ̈ܢܶܐ ܫܘ̣ܒܩܳܢܳܐ ܕܰܚܛܳܗ̈ܶܐ ܐܰܝܟ ܡܚܰܣܝܳܢܳܐ ܝܳܗܶܒ ܗ̱ܘܰܝܬ: ܘܟܰܕ ܕܠܰܥܠܰܝܡܳܐ ܕܰܠܩܰܒܪܳܐ ܡܶܬܬܰܘܒܰܠ ܗ̱ܘܳܐ ܒܐܘ̣ܪܚܳܐ ܡܢܰܚܶܡ ܗ̱ܘܰܝܬ: ܒܫܶܡܥܳܐ ܕܒܰܪ̱ܬ ܩܳܠܳܟ ܡܰܥܒܕܰܬ݀ ܚܰܝ̈ܶܐ ܦܘ̣ܪܩܳܢܳܐ ܡܣܰܪܶܗܒ ܗ̱ܘܰܝܬ: ܟܰܕ ܠܝܰܡܳܐ ܕܡܶܬܒܰܥܪܰܪ ܗܳܐ ܠܘ̣ܩܒܰܠ ܒܗܝ̣ܠܘ̣ܬܳܐ ܕܬܰܠܡܝ̣̈ܕܶܐ ܩܰܕܝ̣̈ܫܶܐ ܡܰܫܠܶܐ ܗ̱ܘܰܝܬ: ܠܚܺܐܦܳܐ ܕܰܚܛܳܗ̈ܶܐ ܡ̣ܶܢ ܢܰܦ̈ܫܳܬܳܐ ܕܟܽܠܰܢ ܙܳܓܰܪ ܗ̱ܘܰܝܬ: ܘܟܰܕ ܠܟܰܦ̈ܢܶܐ ܒܰܐܬܪܳܐ ܚܘ̣ܪܒܳܐ ܡ̣ܶܢ ܠܰܚܡܳܐ ܙܥܘ̣ܪܳܐ ܡܣܰܒܰܥ ܗ̱ܘܰܝܬ: ܠܥܺܕܬܳܟ ܩܰܕܝ̣ܫܬܳܐ ܬܘ̣ܪܣܳܝܳܐ ܕܦܰܓܪܳܟ ܡܙܰܡ̣ܶܢ ܗ̱ܘܰܝܬ: ܘܟܰܕ ܠܠܳܥܳܙܳܪ ܡ̣ܶܢ ܒܳܬܰܪ ܐܰܪܒܥܳܐ ܝܰܘܡ̈ܝ̣ܢ ܡ̣ܶܢ ܩܰܒܪܳܐ ܡܩܝ̣ܡ ܗ̱ܘܰܝܬ: ܠܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܕܰܩܝܳܡܬܳܐ ܡܳܠܶܐ ܗ̱ܘܰܝܬ: ܘܟܰܕ ܠܥܳܠܡܳܐ ܟܽܠܶܗ ܦܘ̣ܪܩܳܢܳܐ ܡܫܰܟܶܢ ܗ̱ܘܰܝܬ: ܒܫܰܝܢܳܐ ܘܒܰܫܠܳܡܳܐ ܠܡܶܬܥܰܡܪܳܢܝ̣ܬܳܐ ܡܨܰܒܶܬ ܗ̱ܘܰܝܬ: ܘܒܰܕܓܽܘܢ ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܚܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܡܳܪܝܳܐ: ܕܰܬ̣ܫܰܟܶܢ ܐܳܣܝܘ̣ܬܳܐ ܡܫܰܡܠܰܝܬܳܐ ܘܚܘ̣ܠܡܳܢܳܐ ܓܡܝ̣ܪܳܐ ܡ̣ܶܢ ܒܶܝܬ ܓܰܙܳܐ ܕܰܡܪܰܚܡܳܢܘ̣ܬܳܟ: ܘܗܰܒ ܒܛܰܝܒܘ̣ܬܳܟ ܡܳܪܝܳܐ ܚܘ̣ܣܳܝܳܐ ܠܚܰܛܳܝ̈ܶܐ ܘܫܘ̣ܒܩܳܢܳܐ ܠܬܰܝ̈ܳܒܶܐ: ܐܳܣܝܘ̣ܬܳܐ ܠܰܟܪ̈ܝ̣ܗܶܐ: ܢܦܺܐܫܳܐ ܠܰܐܠܝ̣̈ܨܶܐ: ܫܪܳܝܳܐ ܠܰܐܣܝ̣ܪ̈ܶܐ ܘܰܢܝܳܚܬܳܐ ܠܰܡܛܰܪ̈ܦܶܐ: ܦܽܘܢܳܝܳܐ ܠܪ̈ܰܚܝ̣ܩܶܐ: ܘܟܽܘܢܳܫܳܐ ܠܰܡܒܰܕܪ̈ܶܐ: ܣܰܒܥܳܐ ܠܡܶܣ̈ܟܺܢܶܐ: ܘܬܘ̣ܪܣܳܝܳܐ ܠܰܨܪ̈ܝ̣ܟܶܐ: ܘܣܰܒܪܳܐ ܘܕܘ̣ܟܪܳܢܳܐ ܛܳܒܳܐ ܠܥܰܢܝ̣̈ܕܶܐ ܡܗܰܝ̈ܡܢܶܐ: ܡܶܛܽܠ ܕܰܐܰܠܳܗܳܐ ܡܪܰܝܡܳܐ ܘܰܡܪܰܚܡܳܢܳܐ ܘܣܰܓܝ̣ ܪ̈ܰܚܡܶܐ ܐܝ̣ܬܰܝܟ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀