ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܝܶܫܽܘ̣ܥ ܐܰܠܳܗܳܐ ܕܰܐܦ̣ܶܩ ܠܠܶܓܝܽܘܢ ܕܫܺܐܕ̈ܶܐ: ܘܦܰܩ̣ܶܕ ܠܗܽܘܢ ܕܢ̣ܶܥܠܽܘܢ ܒܰܚܙܝ̣ܪ̈ܶܐ: ܘܛܰܒ̣ܰܥ ܐܶܢܽܘܢ ܒܥܘ̣ܡ̈ܩܰܘܗ̱ܝ ܕܰܬܗܘ̣ܡܳܐ: ܐܰܦܶܩ ܗܳܫܳܐ ܡ̣ܶܢ ܬܰܪ̈ܥܝܳܬܰܢ ܚܘ̣ܫ̈ܳܒܶܐ ܫܺܐܕܳܢܳܝ̈ܶܐ ܕܗܳܪܝ̣ܢ ܥܰܡܰܢ ܐܳܘ ܫܶܡܫܳܐ ܢܰܨܝ̣ܚ ܙܰܠܝ̣̈ܩܶܐ: ܕܰܐܨܡܰܚ ܠܥܰܝ̈ܢܶܐ ܕܗܳܢܽܘܢ ܬܪܶܝܢ ܣܡܰܝ̈ܳܐ: ܐܰܒܪܶܩ ܡܳܪܝ̱ ܠܥܰܝ̈ܢܶܐ ܕܗܰܘ̈ܢܶܐ ܕܝ̣ܠܰܢ ܕܢ̇ܶܕܥܳܟ ܕܰܐܢ̱ܬ ܗ̱ܘ̣ ܐܝ̣ܬܰܝܟ ܓܳܒܘ̣ܠܶܗ ܕܳܐܕܳܡ ܘܢ̇ܰܘܕܶܐ ܠܳܟ ܘܰܢ̇ܫܰܒܚܳܟ ܥܰܠ ܟܽܠܗܶܝܢ ܛܰܝ̈ܒܘܳܬܳܟ ܕܰܠܘܳܬܰܢ ܘܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܳܐ ܕܝ̣ܠܰܢ: ܘܰܠܪܘ̣ܚܳܟ ܚܰܝܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܳܪܳܐ ܡܪܰܚܡܳܢܳܐ ܕܰܒܛܝ̣ܠ ܠܶܗ ܥܰܠ ܚܰܝ̈ܶܐ ܘܦܘ̣ܪܩܳܢܳܐ ܕܟܽܠ: ܘܰܨ̇ܗܶܐ̣ ܘܰܪܓܝ̣ܓ ܠܩܳܠܳܐ ܕܡܶܬܟܰܫ̈ܦܳܢܶܐ ܕܢܳܩܫܝ̣ܢ ܒܬܰܪܥܶܗ ܐܰܡܝ̣ܢܳܐܝ̣ܬ: ܠܗܰܘ̇ ܕܰܩ̣ܪܳܐ ܠܗܳܝ ܚܰܛܳܝܬܳܐ ܘܰܡܟܰܬܰܡܬܳܐ ܘܙܳܢܝ̣ܬܳܐ ܕܬ̣ܺܐܬܶܐ ܐܰܝܟܰܢܳܐ ܕܰܢ̣ܕܰܟܶܝܗ̇ ܡ̣ܶܢ ܛܰܡܽܐܘ̣ܬܳܐ ܕܰܚ̈ܛܳܗܶܝܗ̇ ܘܢ̣ܶܡܠܶܝܗ̇ ܡ̣ܶܢ ܩܰܕܝ̣ܫܘ̣ܬܶܗ: ܗܰܘ̇ ܕܩܰܒ̣ܶܠ ܠܕܶܡ̈ܥܶܝܗ̇ ܐܰܝܟ ܩܘ̣ܪܒܳܢܳܐ ܘܰܠܒܶܟܝܳܗ̇ ܐܰܝܟ ܪܝ̣ܫܝ̣ܬܳܐ ܘܠܰܦܝܳܣܳܗ̇ ܐܰܝܟ ܕܶܒܚܬܳܐ ܡܫܰܡܠܰܝܬܳܐ: ܠܗܰܘ̇ ܕܰܐܟ̣ܶܣ ܠܫܶܡܥܽܘܢ ܦܪܝ̣ܫܳܝܳܐ ܥܰܠ ܡܰܚܫܰܒܬܶܗ ܦܠܝ̣ܓܬܳܐ: ܘܰܠܬܰܠܡܝ̣̈ܕܶܐ ܟܠ̣ܳܐ ܡ̣ܶܢ ܠܳܐ ܬܪܝ̣ܨܘܽܬ ܝܰܨܪܗܽܘܢ ܘܰܠܗܰܝܡܳܢܘ̣ܬܳܗ̇ ܩܰܠ̣ܶܣ ܠܥܝ̣ܢ ܟܽܠܗܽܘܢ ܘܰܠܣܘ̣ܓܳܐܐ ܕܰܚܛܳܗ̈ܶܐ ܕܝ̣ܠܳܗ̇ ܫܒ̣ܰܩ: ܘܰܠܣܘ̣ܥܪܳܢܳܐ ܡܝܰܬܪܳܐ ܕܦܳܪܘ̣ܫܘ̣ܬܳܐ ܕܝ̣ܠܶܗ ܒܰܣܒܰܪܬܶܗ ܬܺܐܒܶܠܳܝܬܳܐ ܕܢ̣ܶܬܟܪܶܙ ܠܘ̣ܒܳܒܳܐ ܕܟܽܠܗܽܘܢ ܬܰܝܳܒ̈ܶܐ: ܕܠܶܗ ܠܗܰܘ̇ ܕܚܰܢ̣ܳܗ̇ ܘܩܰܒ̣ܠܳܗ̇ ܒܛܰܝܒܘ̣ܬܶܗ ܢ̇ܫܰܒܰܚ ܘܰܢ̇ܪܰܡܪܶܡ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܝܰܡܳܐ ܫܦܝ̣ܥܳܐ ܕܰܚܢܳܢܳܐ ܘܰܬܗܘ̣ܡܳܐ ܠܳܐ ܡܶܬܬܓܝ̣ܫܳܢܳܐ ܕܪ̈ܰܚܡܶܐ: ܗܰܘ̇ ܐܳܣܝܳܐ ܚܰܟܝ̣ܡܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܕܰܒܢ̈ܰܝ ܐ̱ܢܳܫܳܐ ܡܚܝ̣̈ܠܶܐ ܘܚܰܛܳܝ̈ܶܐ: ܗܰܘ̇ ܕܡ̣ܶܢ ܐܰܒܳܐ ܐܶܫ̣ܬܰܕܰܪ ܠܥܳܠܡܳܐ ܠܘܳܬ ܐܰܝܠܶܝܢ ܕܒܝ̣ܫ ܒܝ̣ܫ ܥܒܝ̣ܕܝ̣ܢ ܒܰܚܒܳܪ̈ܳܬܳܐ ܘܰܒܟܘܽܪ̈ܗܳܢܶܐ ܡܦܰܬܟ̈ܶܐ ܐܰܚܝ̣ܕܝ̣ܢ: ܗܰܘ̇ ܕܰܒܪܶܚܡܰܬ݀ ܐ̱ܢܳܫܘ̣ܬܳܟ ܐܶܬܪܟܶܢ̣ܬ ܡ̣ܶܢ ܪܰܘܡܳܐ ܕܪܰܒܘ̣ܬܳܟ ܒܨܶܒܝܳܢܳܟ ܡܶܛܽܠ ܐܰܝܠܶܝܢ ܕܰܐܒܝ̣ܕܝ̣ܢ: ܘܰܠܡܶܣܥܰܪ ܒܥܘ̣ܕܪ̈ܳܢܰܝܟ ܠܰܐܝܠܶܝܢ ܕܰܐܠܝ̣ܨܝ̣ܢ ܘܰܠܡܶܥܨܰܒ ܒܣܰܡ̱̈ܡܳܢܰܝܟ ܠܰܐܝܠܶܝܢ ܕܰܬܒܝ̣ܪܝ̣ܢ: ܘܰܠܡܰܐܣܳܝܘ̣ ܒܥܶܩܳܪ̈ܰܝܟ ܠܰܐܝܠܶܝܢ ܕܰܟܪܝ̣ܗܝ̣ܢ: ܘܰܠܡܰܢܗܳܪܘ̣ ܒܙܰܠܝ̣̈ܩܰܝܟ ܠܰܐܝܠܶܝܢ ܕܚܶܫܘ̣ܟܝ̣ܢ: ܘܠܰܡܩܳܡܘ̣ ܒܚܰܝܠܳܟ ܪܰܒܳܐ ܠܰܐܝܠܶܝܢ ܕܢܰܦܝ̣ܠܝ̣ܢ: ܘܠܰܡܕܰܟܳܝܘ̣ ܒܩܘ̣ܕܫ̈ܰܝܟ ܠܰܐܝܠܶܝܢ ܕܰܡܛܰܢܦܝ̣ܢ: ܘܰܠܡܶܓܰܕ ܠܘܳܬ ܐܰܒܘ̣ܟ ܒܰܚܢܳܢܳܟ ܠܰܐܝܠܶܝܢ ܕܪܰܚܝ̣ܩܝ̣ܢ: ܘܰܠܡܶܦܪܰܩ ܡ̣ܶܢ ܒܝ̣ܫܳܐ ܒܬܘ̣ܩܦܳܟ ܠܰܐܝܠܶܝܢ ܕܰܬܚܶܝܬ ܢܝ̣ܪܶܗ ܩܰܫܝܳܐ ܟܕܝ̣ܢܝ̣ܢ ܘܒܰܣܪܝ̣ܩܘ̣ܬ ܡܰܚ̈ܫܒܳܬܳܐ ܥܳܠܡ̈ܳܢܳܝܳܬܳܐ ܐܰܡܝ̣ܢܝ̣ܢ: ܘܠܰܡܢܳܚܘ̣ ܒܚܰܘ̈ܣܳܢܰܝܟ ܠܰܐܝܠܶܝܢ ܕܒܰܚ̈ܛܳܗܶܐ ܪܰܘܪ̈ܒܶܐ ܥܡܝ̣ܠܝ̣ܢ: ܗܰܘ̇ ܕܗܳܠܶܝܢ ܘܝܰܬܝ̣ܪ ܡ̣ܶܢ ܗܳܠܶܝܢ ܣܥ̣ܰܪܬ ܠܘܳܬܰܢ ܡܶܣ̈ܟܺܢܶܐ ܘܚܰܛܳܝ̈ܶܐ ܘܡܰܣܟ̈ܠܳܢܶܐ: ܗܳܢܽܘܢ ܕܳܐܦܠܳܐ ܠܰܐܪܥܳܐ ܐܝ̣ܬܰܝܢ ܕܫܳܘܶܝܢ ܘܒܰܝܢܳܬ ܗܳܠܶܝܢ ܪܰܘܪ̈ܒܳܬܳܐ ܫܰܟܶܢ̣ܬ: ܠܒܰܝܬܶܗ ܕܫܶܡܥܽܘܢ ܗܰܘ̇ ܦܪܝ̣ܫܳܝܳܐ ܕܡ̣ܶܢ ܓܰܪܒܳܐ ܢܕܝ̣ܕܳܐ ܒܡܶܠܬܳܟ ܦܪܰܩ̣ܬ: ܪ̈ܰܚܡܰܝܟ ܙܰܡ̣ܢܘ̣ܟ ܕܰܒܫܳܪܘ̣ܬܳܐ ܥܰܡܶܗ ܬ̣ܶܓܢܶܐ ܡܶܚܕܳܐ ܨܳܒ̣ ܚܢܳܢܳܟ ܠܘܳܬ ܐܰܢ̱ܬܬܳܐ ܗܳܝ ܚܰܛܳܝܬܳܐ ܘܰܡܦܰܠܦܠܰܬ݀ ܒܰܫܥܝ̣ܢܳܐ ܕܨܰܚܢܘ̣ܬܳܐ ܘܰܕܛܰܢܦܘ̣ܬܳܐ: ܗܝ̣ ܕܶܝܢ ܟܰܕ ܫܶܡ̣ܥܰܬ݀ ܥܰܠ ܪܰܒܘ̣ܬ ܛܰܝ̈ܒܘܳܬܳܟ ܘܥܘ̣ܕܪ̈ܳܢܰܝܟ ܕܰܠܘܳܬ ܟܽܠ ܐ̱ܢܳܫ: ܘܰܕܠܳܐ ܢܳܐܕܳܐ ܠܳܟ ܡ̣ܶܢ ܢܶܫ̈ܶܐ ܛܰܡ̈ܳܐܬܳܐ ܕܡܶܬܓܰܘܣܝ̣ܢ ܒܪ̈ܰܚܡܰܝܟ: ܐܶܠܳܐ ܘܰܠܗܳܠܶܝܢ ܝܰܬܝ̣ܪ ܡܫܰܟܶܢ ܐܰܢ̱ܬ ܘܚܳܐܶܢ ܐܰܝܟ ܡܳܪܳܐ ܛܳܒܳܐ ܘܚܰܝܘܽܣܬܳܢܳܐ ܒܰܬܘܳܬܳܐ ܪܰܒܬܳܐ ܘܫܰܪܝ̣ܪܬܳܐ ܘܰܒܗܰܝܡܳܢܘ̣ܬܳܐ ܚܰܡܝ̣ܡܬܳܐ ܥܰܡ ܡܶܫܚܳܐ ܪܝ̣ܫܳܝܳܐ: ܘܡܶܬܬܰܘܝܳܢܘ̣ܬܳܐ ܕܟܝ̣ܬܳܐ ܠܟܰܪ ܕܺܐܝܬܰܝܟ ܪܶܗ̣ܛܰܬ݀ ܠܒܝ̣ܒܳܐܝ̣ܬ: ܘܰܒܬܰܪܥܳܐ ܕܪ̈ܰܚܡܰܝܟ ܢܶܩ̣ܫܰܬ݀ ܚܰܨܝ̣ܦܳܐܝ̣ܬ ܘܰܠܒܶܝܬ ܫܶܡܥܽܘܢ ܥܶܠ̣ܰܬ݀ ܨܶܝܕܰܝܟ ܓܘܽܡܕܳܢܳܐܝ̣ܬ: ܟܰܕ ܠܡܘ̣ܪܽܘܢ ܝܰܩܝ̣ܪ ܛܝ̣̈ܡܶܐ ܥܰܠ ܪܝ̣ܫܳܟ ܡܝܰܩܪܳܐ ܢܶܣ̣ܟܰܬ݀ ܐܰܘܟܝ̣ܬ ܟܽܠܳܗ̇ ܬܶܓܘܽܪܬܳܐ ܕܥܰܘܠܳܐ ܘܕܰܚܛܝ̣ܬܳܐ ܗܳܝ ܕܟܰܢ̣ܫܰܬ݀ ܒܰܩܢܘ̣ܡܳܗ̇ ܥܠܰܝܟ ܣܰܦ̣ܩܰܬ݀ : ܗܰܘ̇ ܡ̇ܨܶܐ̣ ܚܰܝܠܳܐ ܠܡܶܫܩܰܠ ܠܰܚܛܝ̣ܬܳܐ ܕܟܽܠܶܗ ܥܳܠܡܳܐ ܒܰܩܢܘ̣ܡܶܗ ܘܰܠܪ̈ܶܓܠܰܝܟ ܩܰܕܝ̣̈ܫܳܬܳܐ ܘܕܰܟܝ̈ܳܬܳܐ ܒܺܐܝ̈ܕܶܝܗ̇ ܛܰܡ̈ܳܐܬܳܐ ܠܒ̣ܶܟܬ݀ : ܘܰܠܗܳܠܶܝܢ ܒܚܘ̣ܒܳܐ ܚܰܡܝ̣ܡܳܐ ܘܰܕܟܶܐ ܡ̣ܶܢ ܟܽܠ ܛܘ̣ܠܫܳܐ ܒܣܶܦ̈ܘܳܬܳܗ̇ ܠܳܐ ܕܰܟܝ̈ܳܬܳܐ ܡܢܰܫܩܳܐ ܗ̱ܘܳܬ݀ ܟܰܕ ܒܳܟܝܳܐ: ܘܰܒܕܶܡ̈ܥܶܐ ܕܚܰܫܳܐ ܠܗܶܝܢ ܡܪܰܛܒܳܐ ܗ̱ܘܳܬ݀ ܘܰܒܣܰܥܪܳܐ ܕܪܝ̣ܫܳܗ̇ ܚܠܳܦ ܣܶܕܽܘܢܳܐ ܡܟܰܦܪܳܐ ܗ̱ܘܳܬ݀ : ܘܚܘ̣ܣܳܝܳܐ ܘܕܘ̣ܟܳܝܳܐ ܠܰܩܢܘ̣ܡܳܗ̇ ܫܳܐܠܳܐ ܗ̱ܘܳܬ݀ ܘܳܐܡ̇ܪܳܐ: ܚܘ̣ܪ ܡܳܪܝ̱ ܒܰܐܡܬܳܟ ܘܰܓܒܝ̣ܠܬܳܐ ܕܺܐܝ̈ܕܰܝܟ ܕܗܳܐ ܒܺܐܝ̈ܕܰܝ ܫܰܒܳܝܳܐ ܡܰܪܝ̣ܪܳܐ ܕܒܝ̣ܪܳܐ: ܐܰܥܕܳܗ̇ ܛܳܒܳܐ ܡܶܢܶܗ ܕܠܳܐ ܚܳܒܠܳܐ: ܪܳܥܝܳܐ ܛܳܒܳܐ ܕܶܐܬ̣ܳܐ ܡܶܛܽܠ ܥܶܪܒܳܐ ܐܰܒܝ̣ܕܳܐ: ܒܥܺܝ̣ܝ݂ܳܗ̇ ܠܢܶܩܝܳܐ ܐܰܒܝ̣ܕܬܳܐ ܘܡ̣ܶܢ ܒܶܝܬ ܫܶܢܰܘ̈ܗ̱ܝ ܕܕܺܐܒܳܐ ܣܳܪܘ̣ܚܳܐ ܐܰܦܶܩܝ̣ܗ̇ ܒܰܚܢܳܢܳܟ: ܘܫܰܘܙܶܒܝ̣ܗ̇ ܠܕܳܘܝ̣ܬܳܐ ܡܰܢ ܚܳܛܘ̣ܦܬܳܐ ܡ̣ܶܢ ܦܰܚܶܗ ܕܨܰܝܳܕܳܐ ܢܟܝ̣ܠܳܐ ܘܡ̣ܶܢ ܝܰܕ ܢܶܨܳܐ ܨܢܝ̣ܥܳܐ: ܘܰܥܒܶܕܝ̣ܗ̇ ܝܰܘܢܳܐ ܬܰܡܝ̣ܡܬܳܐ ܒܩܶܢܳܟ ܘܫܘ̣ܦܢܝ̣ܢܬܳܐ ܢܰܟܦܬܳܐ ܒܒܰܝܬܳܟ: ܘܨܶܦܪܳܐ ܚܰܒܝ̣ܒܬܳܐ ܥܰܠ ܓܶܢ̱ܒ ܡܰܕܒܚܳܟ: ܕܰܠܳܗ̇ ܠܛܰܒܝ̣ܥܬܳܐ ܡ̣ܶܢ ܝܰܡܳܐ ܕܚܰܘ̈ܒܶܐ ܘܰܬܗܘ̣ܡܳܐ ܕܒܝ̣̈ܫܳܬܳܐ ܘܰܐܣܶܩܝ̣ܗ̇ ܠܕܳܘܝ̣ܬܳܐ ܡ̣ܶܢ ܚܰܒܳܪܳܐ ܕܛܰܢܦܘ̣ܬܳܐ: ܘܡ̣ܶܢ ܓܘ̣ܡܬܳܐ ܣܝܳܢܳܝܬܳܐ ܕܦܰܚܙܘܽܬܳܐ ܦܶܩ̣ܪܰܬ݀ ܥܠܶܝܗ̇: ܚܰܠܶܠܝ̣ܗ̇ ܠܛܰܡܰܐܬܳܐ ܒܙܘ̣ܦܳܟ ܡܚܰܘܪܳܢܳܐ ܕܛܰܡ̈ܶܐܐ: ܩܰܕܶܫܰܝܢܝ̱ ܒܩܰܕܝ̣ܫܘ̣ܬܳܟ ܡܩܰܕܫܳܢܳܐ ܕܰܡܟܰܬܡ̈ܶܐ: ܐܰܣܓܳܐ ܐܰܫܝ̣ܓܰܝܢܝ̱ ܡ̣ܶܢ ܥܰܘܠܝ̱ ܕܪܰܒ ܗ̱ܘ̣: ܬ̣ܶܥܫܰܢܝ̱ ܥܠܰܝ ܛܰܝܒܘ̣ܬܳܟ: ܐܰܢ̱ܬ ܓܶܝܪ ܡܳܪܝ̱ ܐܶܡ̣ܰܪܬ ܕܡܶܛܽܠ ܥܶܪ̈ܒܶܐ ܘܰܢܩ̈ܰܘܳܬܳܐ ܕܶܐܒ̣ܰܕܘ̱ ܡ̣ܶܢ ܒܶܝܬ ܐܝ̣ܣܪܳܐܝܶܠ ܐܶܬܺܝ̇ܬ ܕܰܐܦ̇ܢܶܐ ܐܶܢܽܘܢ ܠܰܛܝܳܪܳܐ ܕܝ̣ܠܝ̱ ܡܥܰܠܝܳܐ: ܐܰܢ̱ܬ ܡܳܪܝ̱ ܐܶܡ̣ܰܪܬ ܕܰܩܪܰܘ ܘܥܳܢܶܐ ܐ̱ܢܳܐ ܘܩܘ̣ܫܽܘܢ ܘܦܳܬܰܚ ܐ̱ܢܳܐ: ܫܰܐܠܘ̱ ܘܬ̣ܶܣܒܽܘܢ ܒܥܰܘ ܘܬ̣ܶܫܟܚܽܘܢ: ܗܳܐ ܒܬܰܪܥܳܟ ܩܳܝܡܳܐ ܐ̱ܢܳܐ ܘܠܰܚܢܳܢܳܟ ܚܳܝܪܳܐ ܐ̱ܢܳܐ: ܫܡܰܥܰܝܢܝ̱ ܘܰܥܢܝ̣ܢܝ̱ ܐܶܬ̣ܦܰܢ ܠܰܓܥܳܬܝ̱ ܘܨܘܽܬ ܠܬܶܢ̈ܚܳܬܝ̱ ܚܙܝ̣ ܫܘ̣ܥܒܳܕܝ̱ ܘܰܫܒܘ̣ܩ ܠܝ̣ ܟܽܠ ܕܰܐܣ̇ܟܠܶܬ: ܗܳܐ ܡܳܪܝ̱ ܒܥܶܠܕܒܳܒܝ̱ ܢ̇ܩܶܐ̣ ܠܰܬܒܳܪܝ̱ ܗܳܐ ܣܳܐܢܝ̱ ܨ̇ܗܶܐ̣ ܠܰܐܒܕܳܢܝ̱: ܠܳܐ ܢ̣ܶܚܕܶܐ ܠܶܗ ܟܰܕ ܚܳܙܶܐ ܠܝ̣ ܕܢܶܦ̇ܩܶܬ ܒܰܗܝ̣ܬܬܳܐ: ܠܳܐ ܢ̣ܕܘ̣ܨ ܟܰܕ ܚܳܙܶܐ ܠܝ̣ ܕܢܶܦ̇ܩܶܬ ܟܰܕ ܠܳܐ ܣܥܝ̣ܪܳܐ ܐ̱ܢܳܐ: ܠܳܐ ܢ̣ܶܪܦܘ̣ܣ ܒܚܰܓܳܐ ܥܰܡ ܦܳܠܚܘ̣ܬܶܗ ܟܰܕ ܚܳܙܶܐ ܠܝ̣ ܕܶܐܙܶܠ̱̇ܬ ܡ̣ܶܢ ܘܰܥܕܳܟ ܒܟܰܪܝܘܽܬܳܐ: ܠܳܐ ܢ̣ـܓܰܚܶܟ ܒܝ̣ ܟܰܕ ܚܳܙܶܐ ܠܝ̣ ܕܐܪܶܚ̇ܩܶܬ ܡ̣ܶܢ ܨܶܝܕܰܝܟ ܒܠܳܐ ܚܘ̣ܪܳܪܳܐ ܕܡܶܢܶܗ: ܠܳܐ ܢ̣ܒܰܙܰܚ ܒܝ̣ ܟܰܕ ܚܳܙܶܐ ܠܝ̣ ܕܠܳܐ ܦܶܠ̇ܛܶܬ ܡ̣ܶܢ ܢܶܫ̈ܒܰܘܗ̱ܝ: ܠܳܐ ܢ̣ܡܰܝܶܩ ܒܝ̣ ܟܰܕ ܚܳܙܶܐ ܠܝ̣ ܕܠܳܐ ܦܶܣ̇ܩܶܬ ܐܰܣܘ̣ܪ̈ܰܘܗ̱ܝ ܘܰܡܨܝ̣̈ܕܳܬܶܗ ܘܬܶܒ̇ܪܶܬ ܦܰܚ̈ܰܘܗ̱ܝ: ܠܳܐ ܬܶܫܒܘ̣ܩܰܝܢܝ̱ ܡܳܪܝ̱ ܬܚܶܝܬ ܡܰܪܫܘ̣ܬܶܗ ܟܰܕ ܡܶܬܥܰܕܰܠ ܒܝ̣ ܥܰܠ ܡܶܐܬܝ̣ܬܝ̱ ܕܰܠܘܳܬܳܟ: ܘܣܰܓܝ̣ ܣܶܒ̇ܠܶܬ ܡܶܢܶܗ ܒܟܶܣܝܳܐ ܘܰܒܓܶܠܝܳܐ: ܣܰܓܝ̣ ܕܰܠܚ̣ܰܢܝ̱ ܡ̣ܶܢ ܦܶܓܥܳܟ ܣܰܓܝ̣ ܣܰܪܕܰܢܝ̱ ܡ̣ܶܢ ܘܰܥܕܳܟ: ܣܰܓܳܝ ܥܰܘܟ̣ܰܢܝ̱ ܡ̣ܶܢ ܚܙܳܬܳܟ: ܗܳܫܳܐ ܡܳܪܝ̱ ܕܰܚܙܺܝ̇ܬ ܚܢܳܢܳܟ ܫܪܝ̣ܢܝ̱ ܡ̣ܶܢ ܢܝ̣ܪ ܦܰܩܪܘ̣ܬܶܗ: ܗܳܫܳܐ ܡܳܪܝ̱ ܕܶܐܫ̇ܬܰܘܕܥܶܬ ܠܛܳܒܘ̣ܬܳܟ ܬ̣ܶܥܫܰܢܝ̱ ܥܠܰܝ ܪܶܚܡܰܬ݀ ܐ̱ܢܳܫܘ̣ܬܳܟ: ܣܝ̣ܡ ܥܠܰܝ ܛܰܒܥܳܐ ܕܰܫܪܳܪܳܟ ܕܢ̣ܶܒܗܰܬ ܡܶܢܶܗ: ܪܫܘ̣ܡ ܥܠܰܝ ܪܘ̣ܫܡܳܟ ܚܰܝܳܐ ܕܢ̣ܶܚܙܶܝܘܗ̱ܝ ܘܢ̣ܶܥܪܘ̣ܩ ܡܶܢܶܗ: ܡܢܝ̣ܢܝ̱ ܒܰܓܙܳܪܳܟ ܕܠܳܐ ܬܘ̣ܒ ܢ̣ܶܣܥܶܐ ܥܠܰܝ: ܐܰܥܶܠܰܝܢܝ̱ ܠܰܛܝܳܪܳܟ ܕܠܳܐ ܬܘ̣ܒ ܢ̣ܰܡܪܰܚ ܥܰܠ ܕܳܘܝܘ̣ܬܝ̱: ܡܳܪܝ̱ ܐܰܢ̱ܬܬܳܐ ܐܺܝ̇ܬܰܝ ܚܰܛܳܝ̇ܬܳܐ ܘܰܡܦܰܠܦܠܰܬ݀ ܒܟܽܠܳܗ̇ ܛܰܡܽܐܘ̣ܬܳܐ: ܠܳܐ ܐܶܦ̇ܘ̣ܩ ܡ̣ܶܢ ܠܘܳܬܳܟ ܐܰܟܡܳܐ ܕܥܶܠܶܬ ܟܰܕ ܡܛܰܡܰܐܐ ܐܶܠܳܐ ܙܰܕܝ̣ܩܬܳܐ ܘܩܰܕܝ̣ܫܬܳܐ ܘܕܰܡܚܰܪܪܳܐ ܡ̣ܶܢ ܟܽܠܳܗ̇ ܠܳܐ ܕܰܟܝܘ̣ܬܳܐ: ܟܽܠ ܕܰܚ̣ܙܳܟ ܡܳܪܝ̱ ܐܰܝܟ ܗܰܝܡܳܢܘ̣ܬܶܗ ܫܩ̣ܰܠ ܘܳܐܦ ܐܶܢܳܐ ܡܳܪܝ̱ ܗܳܟܰܢܳܐ ܫܰܟܶܢ ܠܝ̣ ܡܳܪܝ̱ ܕܠܳܟ ܐܶܗ̇ܘܶܐ ܡ̣ܶܢ ܗܳܫܳܐ ܘܰܠܥܳܠܰܡ: ܚܰܕܳܐ ܒܝ̣ ܒܰܐܒܘ̣ܟ ܡܒܰܪܟܳܐ ܘܰܠܪܘ̣ܚܳܟ ܡܰܚܝܳܢܳܐ ܘܰܠܡܰܠܰܐܟܰܝ̈ܟ ܩܰܕܝ̣̈ܫܶܐ: ܘܰܚܢܰܢ ܡܳܪܝ̱ ܐܰܟܘܳܬܳܗ̇ ܡܦܝ̣ܣܝ̣ܢܰܢ ܠܳܟ ܐܰܝܟܰܢܳܐ ܕܬ̣ܰܫܘܶܐ ܠܰܢ ܘܰܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܕܰܐܟܘܳܬܳܗ̇ ܢ̇ܩܰܪܶܒ ܠܳܟ ܬܝܳܒܘ̣ܬܳܐ ܫܰܪܝ̣ܪܬܳܐ ܒܕܶܡ̈ܥܶܐ ܚܰܫܝ̣̈ܫܳܬܳܐ: ܒܬܶܢ̈ܚܳܬܳܐ ܪ̈ܰܥܘ̣ܡܳܬܳܐ ܒܰܬܘܳܬܳܐ ܫܰܪܝ̣ܪܬܳܐ ܒܫܘ̣ܚܠܳܦܳܐ ܫܰܦܝ̣ܪܳܐ ܒܗܰܝܡܳܢܘ̣ܬܳܐ ܚܠܝ̣ܡܬܳܐ: ܒܣܰܒܪܳܐ ܕܠܳܐ ܡܰܒܗܶܬ ܒܚܘ̣ܒܳܐ ܕܠܳܐ ܙܺܐܦܳܐ: ܒܪܶܚܡܬܳܐ ܕܠܳܐ ܛܘ̣ܠܫܳܐ: ܘܢܶܫ̇ܬܘܶܐ ܕܢܶܫ̇ܡܰܥ ܡܶܢܳܟ ܠܒܰܪ̱ܬ ܩܳܠܳܐ ܗܳܝ ܡܚܰܕܝܳܢܝ̣ܬܳܐ ܘܡܰܠܝܰܬ݀ ܟܽܠ ܥܘ̣ܕܪ̈ܳܢܝ̣ܢ ܗܳܝ ܕܰܠܘܳܬܳܗ̇ ܐܶܡ̣ܰܪܬ ܚܘ̣ܒܳܢܳܐܝ̣ܬ: ܕܙܶܠܝ̱ ܐܰܢ̱ܬܬܳܐ ܗܰܝܡܳܢܘ̣ܬܶܟܝ̱ ܐܰܚ̣ܝܰܬܶܟܝ̱ ܫܒܝ̣ܩܝ̣ܢ ܠܶܟܝ̱ ܚܛܳܗܰܝ̈ܟܝ̱ ܣܰܓܺܝ̈ܶܐܐ ܡܶܛܽܠ ܕܰܐܚܶܒ̣ܬܝ̱ ܣܰܓܝ̣: ܘܰܐܟܘܳܬܳܗ̇ ܢ̇ܶܦܘ̣ܩ ܠܘܳܬܳܟ ܟܰܕ ܚܳܕܶܝܢܰܢ ܘܪܳܘܙܝ̣ܢܰܢ ܒܫܘ̣ܒܩܳܢܳܐ ܕܰܚ̈ܛܳܗܰܝܢ ܣܰܓܺܝ̈ܶܐܐ: ܘܥܰܠ ܟܽܠܗܶܝܢ ܛܰܝ̈ܒܘܳܬܳܟ ܕܰܠܘܳܬܰܢ ܫܘ̣ܒܚܳܐ ܘܺܐܝܩܳܪܳܐ ܥܦܝ̣ܦܳܐ ܡܰܣܩܝ̣ܢܰܢ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܝ̣ܚܳܐ ܕܚܰܝ̈ܶܐ ܕܒܰܣ̣ܡܳܗ̇ ܠܰܒܪܝ̣ܬܳܐ ܒܗܰܢܺܝܽܐܘ̣ܬܶܗ: ܘܕܰܟ̣ܝܳܗ̇ ܠܡܶܬܥܰܡܪܳܢܝ̣ܬܳܐ ܒܒܰܣܝ̣ܡܘ̣ܬܶܗ: ܘܰܒܚܰܝܠܶܗ ܫܶܡܥܽܘܢ ܥܰܠ ܝܰܡܳܐ ܗܰܠ̣ܶܟ: ܘܰܒܚܘ̣ܒܶܗ ܙܰܟܰܝ ܢܶܟ̈ܣܰܘܗ̱ܝ ܦܰܠ̣ܶܓ: ܘܩܶܢܛܪܽܘܢܳܐ ܕܚ̣ܶܠ ܘܰܚܠܳܦ ܒܰܝܬܶܗ ܒܢܰܦܫܶܗ ܩܰܒ̣ܠܶܗ: ܘܠܳܥܳܙܳܪ ܡܝ̣ܬܳܐ ܣ̣ܳܩ ܪܝ̣ܚܶܗ ܘܰܢܦ̣ܰܩ: ܘܒܰܪܬܶܗ ܕܰܐܪܟܘܳܢܳܐ ܐܶܬ̣ܢܰܚܡܰܬ݀ : ܘܰܡܡܰܚܰܝܬܳܐ ܒܟܶܣܝܳܐ ܥܘ̣ܕܪ̈ܳܢܶܐ ܠܟܺܐܒܳܗ̇ ܓܶܢܒ̣ܰܬ݀ : ܘܰܟܢܰܥܢܳܝܬܳܐ ܚܘ̣ܠܡܳܢܳܐ ܢܶܣ̣ܒܰܬ݀ ܠܒܰܪܬܳܗ̇: ܘܫܳܡܪܳܝܬܳܐ ܡܰܝ̈ܳܐ ܚܰܝ̈ܶܐ ܫܶܩ̣ܠܰܬ݀ : ܘܰܐܪܡܰܠܬܳܐ ܠܝ̣ܚܝ̣ܕܳܝܳܗ̇ ܡܝ̣ܬܳܐ ܚܰܝܳܐ ܩܰܒ̣ܠܰܬ݀ : ܘܙܳܢܝ̣ܬܳܐ ܡ̣ܶܢ ܚܰܘ̈ܒܶܝܗ̇ ܐܶܬ̣ܚܰܪܪܬ݀ : ܘܺܐܝ̣ܕܳܐ ܝܰܒܝ̣ܫܬܳܐ ܐܶܬ̣ܦܰܫܛܰܬ݀ ܘܶܐܠܦܳܐ ܕܬܰܠܡܝ̣̈ܕܶܐ ܒܢܰܘܚܳܐ ܩܳܡ̣ܰܬ݀ : ܘܠܶܓܝܽܘܢܳܐ ܕܫܺܐܕ̈ܶܐ ܐܶܬܛܰܒ̣ܥܰܬ݀ : ܘܶܐܫܳܬܳܐ ܩܰܠܝ̣ܠܳܐܝ̣ܬ ܐܶܬ̣ܛܰܠܩܰܬ݀ : ܘܒܰܪ̱ܬ݀ ܥܰܡ̱̈ܡܶܐ ܒܗܰܝܡܳܢܘ̣ܬܳܐ ܐܶܫܬܰܪܪܰܬ݀ ܘܰܡܦܝ̣ܣܳܐ ܠܚܰܬܢܳܐ ܕܒܰܕܡܶܗ ܝܰܩܝ̣ܪܳܐ ܩܢ̣ܳܗ̇: ܘܒܰܨܠܝ̣ܒܶܗ ܙܰܟܳܝܳܐ ܦ̣ܰܪܩܳܗ̇ ܕܬ̣ܶܫܬܘܶܐ ܠܡܰܠܟܘ̣ܬܶܗ ܫܡܰܝܳܢܝ̣ܬܳܐ ܘܰܠܡܘ̣ܠܟܳܢܶܗ ܛܘ̣ܒܬܳܢܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀