ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܩܰܕܝ̣ܫܳܐ ܘܰܡ̇ܠܶܐ̣ ܡ̣ܶܢ ܩܘ̣ܕ̈ܫܶܐ ܓܳܡܘ̣ܪܳܐ ܘܰܡܩܰܕܫܳܢܳܐ ܕܩܰܕܝ̣̈ܫܶܐ: ܕܡܶܛܽܠ ܕܢ̣ܶܬܩܰܕܫܽܘܢ ܒܶܗ ܣܪ̈ܳܦܶܐ ܡܩܰܕܫܝ̣ܢ ܠܶܗ: ܘܕܶܢ̣ܬܒܰܪܟܽܘܢ ܒܶܗ ܟܪ̈ܘܽܒܶܐ ܡܒܰܪܟܝ̣ܢ ܠܶܗ: ܘܰܕܢ̣ܶܙܕܰܗܽܘܢ ܒܶܗ ܡܰܠܰܐܟ̈ܶܐ ܡܫܰܒܚܝ̣ܢ ܠܶܗ: ܘܰܕܢ̣ܶܬܶܠ ܠܰܒܢܰܝ̈ܢܳܫܳܐ ܚܘ̣ܣܳܝܳܐ ܕܚܰܘ̈ܒܰܝܗܽܘܢ ܡܩܰܒܶܠ ܩܘ̣ܪ̈ܒܳܢܰܝܗܽܘܢ ܒܛܰܝܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܐܰܠܳܗܳܐ ܡܶܠܬܶܗ ܕܰܐܒܳܐ ܫܡܰܝܳܢܳܐ: ܫܘ̣ܒܚܳܐ ܠܳܟ ܐܳܣܝܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ: ܫܘ̣ܒܚܳܐ ܠܳܟ ܒܳܪܘ̣ܝܳܐ ܕܥܳܠ̈ܡܶܐ ܕܥܶܠ̈ܳܝܶܐ ܘܰܕܬܰܚ̈ܬܳܝܶܐ: ܫܘ̣ܒܚܳܐ ܠܳܟ ܕܰܒ̣ܪܰܝܬܳܢ ܠܬܶܫܒܘ̣ܚܬܳܟ: ܫܘ̣ܒܚܳܐ ܠܳܟ ܓܳܒܘ̣ܠܳܐ ܕܓܶܢܣܳܐ ܕܥܰܦܪ̈ܳܢܶܐ: ܫܘ̣ܒܚܳܐ ܠܳܟ ܓܰܐܝܳܐ ܘܰܡܫܰܒܚܳܐ: ܫܘ̣ܒܚܳܐ ܠܳܟ ܕܶܢܚܳܐ ܡܰܢܗܪܳܢܳܐ ܕܚܶܫܘ̣̈ܟܶܐ: ܫܘ̣ܒܚܳܐ ܠܳܟ ܕܰܝܳܢܳܐ ܟܺܐܢܳܐ ܘܰܬܪܝ̣ܨܳܐ: ܫܘ̣ܒܚܳܐ ܠܳܟ ܗܰܕܳܝܳܐ ܕܗܰܘ̈ܢܶܐ ܪ̈ܘ̣ܚܳܢܶܐ ܘܦܰܓܪ̈ܳܢܶܐ: ܫܘ̣ܒܚܳܐ ܠܳܟ ܕܗܰܕܝ̣ܬܳܢ ܒܰܫܒܝ̣̈ܠܰܝܟ ܬܪ̈ܝ̣ܨܶܐ: ܫܘ̣ܒܚܳܐ ܠܳܟ ܘܰܥܕܳܐ ܘܰܡܟܰܢܫܳܢܳܐ ܕܰܡܒܰܕܪ̈ܶܐ: ܫܘ̣ܒܚܳܐ ܠܳܟ ܕܘܰܥ̣ܶܕܬܳܢ ܠܡܘ̣ܠ̈ܟܳܢܰܝܟ: ܫܘ̣ܒܚܳܐ ܠܳܟ ܙܰܝܢܳܐ ܕܙܳܟܘ̣ܬܳܐ ܕܰܓܡܝ̣ܪ̈ܶܐ: ܫܘ̣ܒܚܳܐ ܠܳܟ ܕܙܰܡ̣ܶܢܬܳܢ ܠܡܰܠܟܘ̣ܬܳܟ: ܫܘ̣ܒܚܳܐ ܠܳܟ ܚܰܝܠܬܳܢܳܐ ܡܚܰܝܠܳܢܳܐ ܕܰܡܚܝ̣̈ܠܶܐ: ܫܘ̣ܒܚܳܐ ܠܳܟ ܕܚܰܢ̣ܬܳܢ ܒܛܰܝܒܘ̣ܬܳܟ: ܫܘ̣ܒܚܳܐ ܠܳܟ ܛܳܒܳܐ ܕܥܰܠ ܟܽܠ ܦܪܝ̣ܣܳܐ ܛܳܒܘ̣ܬܶܗ: ܫܘ̣ܒܚܳܐ ܠܳܟ ܕܛܘ̣ܒ̈ܶܐ ܕܠܳܐ ܦܳܛܪܝ̣ܢ ܐܶܫ̣ܬܰܘܕܝ̣ܬ ܠܰܢ: ܫܘ̣ܒܚܳܐ ܠܳܟ ܝܳܗܘ̣ܒܳܐ ܕܥܘ̣ܕܪ̈ܳܢܶܐ ܠܟܽܠܗܽܘܢ ܒܪ̈ܰܝܳܐ ܘܰܥܒܝ̣̈ܕܶܐ: ܫܘ̣ܒܚܳܐ ܠܳܟ ܝܰܡܳܐ ܕܚܘ̣ܠ̈ܡܳܢܶܐ: ܫܘ̣ܒܚܳܐ ܠܳܟ ܟܺܐܢܳܐ ܕܦܳܪܰܥ ܒܟܺܐܢܘ̣ܬܳܐ ܠܟܺܐܢ̈ܶܐ ܘܥܰܘ̈ܳܠܶܐ: ܫܘ̣ܒܚܳܐ ܠܳܟ ܕܟܺܐܒ̈ܰܝܢ ܘܟܘ̣ܪ̈ܗܳܢܰܝܢ ܐܰܣܝ̣ܬ: ܫܘ̣ܒܚܳܐ ܠܳܟ ܠܶܘܝܳܐ ܕܰܒܝܰܡܐ ܘܰܒܝܰܒܫܳܐ ܠܚܳܙܘ̣̈ܩܶܐ: ܫܘ̣ܒܚܳܐ ܠܳܟ ܕܠܰܒܶܒ̣ܬ ܠܚܰܛܳܝ̈ܶܐ ܒܙܘ̣ܕ̈ܳܩܰܝܗܽܘܢ: ܫܘ̣ܒܚܳܐ ܠܳܟ ܡܰܒܘ̣ܥܳܐ ܡܡܰܠܝܳܢܳܐ ܕܚܰܣܝ̣ܪ̈ܳܬܳܐ ܕܰܣܢܝ̣̈ܩܶܐ: ܫܘ̣ܒܚܳܐ ܠܳܟ ܡܥܝ̣ܢܳܐ ܕܥܘ̣ܕܪ̈ܳܢܶܐ: ܫܘ̣ܒܚܳܐ ܠܳܟ ܢܘ̣ܗܪܳܐ ܕܰܣܡ̈ܰܝܳܐ ܘܕܰܦܬܝ̣̈ܚܶܐ: ܫܘ̣ܒܚܳܐ ܠܳܟ ܢܶܒܥܳܐ ܕܚܘ̣ܠܡܳܢܳܐ: ܫܘ̣ܒܚܳܐ ܠܳܟ ܣܰܒܥܳܐ ܡܣܰܒܥܳܢܳܐ ܕܟܰܦ̈ܢܶܐ: ܫܘ̣ܒܚܳܐ ܠܳܟ ܣܰܒܪܳܐ ܘܒܘ̣ܝܳܐܳܐ ܕܬܰܝܳܒ̈ܶܐ: ܫܘ̣ܒܚܳܐ ܠܳܟ ܥܝ̣ܪܳܐ ܕܰܡܥܝ̣ܪ ܠܕܰܡ̈ܟܶܐ: ܫܘ̣ܒܚܳܐ ܠܳܟ ܥܳܕܘ̣ܪܳܐ ܕܰܛܠܝ̣̈ܡܶܐ: ܫܘ̣ܒܚܳܐ ܠܳܟ ܦܳܪܘ̣ܩܳܐ ܕܦ̣ܰܪܩܰܢ ܡ̣ܶܢ ܚܰܫ̈ܶܐ ܘܡ̣ܶܢ ܫܺܐܕ̈ܶܐ: ܫܘ̣ܒܚܳܐ ܠܳܟ ܦܝ̣ܪܡܳܐ ܕܚܘ̣ܣܳܝܳܐ: ܫܘ̣ܒܚܳܐ ܠܳܟ ܨܰܝܳܕܳܐ ܕܬܰܠܡܝ̣̈ܕܶܐ ܦܫܝ̣̈ܛܶܐ ܘܨܰܝ̈ܳܕܶܐ: ܫܘ̣ܒܚܳܐ ܠܳܟ ܨܳܒܶܐ ܒܬܰܝܳܒ̈ܶܐ: ܫܘ̣ܒܚܳܐ ܠܳܟ ܩܳܠܳܐ ܡܢܰܚܡܳܢܳܐ ܕܡܝ̣̈ܬܶܐ: ܫܘ̣ܒܚܳܐ ܠܳܟ ܩܘ̣ܒܰܪܢܝ̣ܛܝ̣ ܕܢܰܦ̈ܫܳܬܳܐ ܡܠܝ̣̈ܠܳܬܳܐ: ܫܘ̣ܒܚܳܐ ܠܳܟ ܪܳܥܝܳܐ ܘܡܶܫܟܚܳܢܳܐ ܕܥܶܪ̈ܒܶܐ ܐܰܒܝ̣̈ܕܶܐ: ܫܘ̣ܒܚܳܐ ܠܳܟ ܪܰܒܐ ܕܰܙܥ̣ܰܪ ܘܠܰܢ ܢ̣ܰܘܪܶܒ: ܫܘ̣ܒܚܳܐ ܠܳܢ ܫܰܝܢܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܫܘ̣ܒܚܳܐ ܠܳܟ ܫܠܳܡܳܐ ܕܰܪ̈ܓܝ̣ܙܶܐ: ܫܘ̣ܒܚܳܐ ܠܳܟ ܬܰܪܥܘ̣ܬܳܐ ܕܥܰܡ̱̈ܡܶܐ: ܫܘ̣ܒܚܳܐ ܠܳܟ ܬܰܪܥܳܐ ܕܰܦܬܝ̣ܚ ܠܰܡܠ̈ܝ̣ܠܶܐ ܘܰܡܠܶܐ ܬܶܕܡܪ̈ܳܬܳܐ ܘܚܰܝ̈ܠܶܐ ܘܕܳܚܶܩ ܠܚܶܫܘ̣ܟܳܐ ܒܰܪܳܝܳܐ ܠܣܰܡ̈ܝ݂ܰܝ݂ ܒܰܚܛܳܗ̈ܶܐ ܘܰܡܩܰܒܶܠ ܠܬܰܝܳܒ̈ܶܐ ܘܝܳܗܶܒ ܐܰܓܪܳܐ ܛܳܒܳܐ ܠܦܳܥ̈ܠܶܐ ܟܰܫܝ̣ܪ̈ܶܐ: ܘܰܡܫܰܢܶܩ ܒܓܺܗܰܢܳܐ ܠܪ̈ܰܫܝ̣ܥܶܐ: ܘܡܰܘܩܶܕ ܒܫܰܠܗܶܒܝ̣ܬܳܐ ܠܳܐ ܡܶܬܛܰܠܩܳܢܝ̣ܬܳܐ ܠܟܳܦܘ̣ܪ̈ܶܐ ܘܡܰܣܡܶܟ ܥܰܠ ܦܳܬܘ̣ܪܳܐ ܕܡܰܠܟܘ̣ܬܶܗ ܠܨܰܝܳܡ̈ܶܐ: ܘܡܰܓܥܶܠ ܒܶܝܬ ܓܰܙܳܐ ܕܪ̈ܰܚܡܰܘܗ̱ܝ ܠܰܡܪ̈ܰܚܡܳܢܶܐ: ܘܡܰܠܒܶܫ ܐܶܣܛܰܠ ܬܶܫܒܘ̣ܚܬܳܐ ܠܰܡܫܰܒ̈ܚܳܢܶܐ ܘܰܡܫܰܟܶܢ ܛܘ̣̈ܒܶܐ ܫܡܰܝܳܢ̈ܶܐ ܠܰܡܙܰܡܪ̈ܳܢܶܐ: ܘܦܰܪܕܰܝܣܳܐ ܪܘ̣ܚܳܢܳܝܳܐ ܠܡܰܢܗܪ̈ܳܢܶܐ: ܘܡܰܘܪܶܬ ܡܰܠܟܘ̣ܬܳܐ ܫܡܰܝܳܢܝ̣ܬܳܐ ܘܒܘ̣ܣܳܡܳܐ ܕܠܳܐ ܦܳܛܰܪ ܠܥܰܢܝ̣̈ܕܶܐ ܡܗܰܝ̈ܡܢܶܐ: ܘܠܳܟ ܡܳܪܝ̱ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܫܘ̣ܒܚܳܐ ܘܐܝ̣ܩܳܪܳܐ ܘܣܶܓܕܬܳܐ ܢ̇ܰܣܶܩ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀