ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܢܰܚ̈ܬܶܐ ܕܫܘ̣ܒܚܳܐ ܘܰܒܡܰܙܠܓܘ̣ܬܳܐ ܡܶܬܝܰܕܥܳܢܝ̣ܬܳܐ ܘܰܒܚܘ̣ܫ̈ܳܒܶܐ ܕܟܰܝ̈ܳܐ ܘܩܰܕܝ̣̈ܫܶܐ ܢ̇ܶܦܘ̣ܩ ܠܐܘ̣ܪܥܳܟ ܒܝܰܘܡܳܐ ܗܳܢܳܐ ܕܡܰܥܰܠܬܳܟ ܕܠܐܘ̣ܪܫܠܶܡ: ܘܰܒܣܰܘ̈ܟܶܐ ܕܬܶܫܒܘ̣ܚܬܳܐ ܘܰܕܕܶܩ̈ܠܶܐ ܡܰܙܥܩܝ̣ܢܰܢ ܘܐܳܡܪܝ̣ܢܰܢ: ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܰܠܟܳܐ ܕܪܰܘܡܳܐ ܕܰܪܟܘ̣ܒܳܐ ܫܝ̣ܛܳܐ ܛܰܝܶܒ ܠܓܶܠܝܳܢܶܗ: ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ ܝ̣ܬܶܒ ܒܨܶܒܝܳܢܶܗ: ܠܗܰܘ̇ ܩܰܕܝ̣ܫܳܐ ܕܰܣܪ̈ܳܦܶܐ ܩܰܕܝ̣̈ܫܶܐ ܩܳܠ̈ܰܝ ܫܘ̣ܒܚܳܐ ܡܰܙܥܩܝ̣ܢ ܠܬܶܫܒܘ̣ܚܬܶܗ ܘܶܐܬ̣ܩܰܠܰܣ ܡ̣ܶܢ ܛܠܳܝ̈ܶܐ ܘܫܰܒܪ̈ܶܐ ܕܰܫܦ̣ܰܪ ܠܶܗ: ܠܗܰܘ̇ ܥܳܒܘ̣ܕܳܐ ܕܰܡ̣ܬܰܚ ܫܡܰܝܳܐ ܐܰܝܟ ܝܳܪܝ̣ܥܬܳܐ ܒܪܶܡܙܶܗ: ܘܰܒܢܰܚ̈ܬܶܐ ܫܚܝ̣̈ܡܶܐ ܐܶܬ̣ܝܰܩܰܪ ܪܟ̥ܘ̣ܒܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܒܰܫܡܰܝܳܐ ܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܕܚܝ̣ܠܳܐܝ̣ܬ ܡܶܙܕܰܝܰܚ ܐܰܢ̱ܬ: ܘܥܰܠ ܐܰܪܥܳܐ ܡܶܛܽܠܳܬܰܢ ܥܰܠ ܥܝ̣ܠܳܐ ܕܠܳܐ ܡܶܠܬܳܐ ܦܰܓܪܳܢܳܐܝ̣ܬ ܪܟܶܒ̣ܬ: ܘܰܒܝܰܕ ܗܳܕܶܐ ܠܰܩܪܳܝܬܳܐ ܕܥܰܡ̱̈ܡܶܐ ܠܳܐ ܕܟܰܝ̈ܳܐ ܩܰܕܶܡ̣ܬ ܫܰܘܕܰܥ̣ܬ ܗܰܘ̇ ܕܰܒܡܰܥܰܠܬܳܟ ܕܠܐܘ̣ܪܫܠܶܡ ܠܰܢܒܺܝ̈ܰܘܳܬܳܐ ܕܰܢܒܺܝ̈ܶܐ ܚܰܬܶܡ̣ܬ: ܗܳܢܽܘܢ ܕܐܰܝܟ ܫܝ̣ܦܘ̣ܪ̈ܶܐ ܒܡܶܬܥܰܡܪܳܢܝ̣ܬܳܐ ܐܰܙܥܶܩ̣ܘ̱ ܡܶܛܽܠ ܡܶܐܬܝ̣ܬܳܟ ܦܳܪܘ̣ܩܳܝܬܳܐ: ܟܰܕ ܗܽܘ̣ ܚܰܕ ܡܶܢܗܽܘܢ ܕܠܳܐ ܢ̣ܶܥܢܰܕ ܫܰܒܛܳܐ ܡ̣ܶܢ ܝܺܗܘ̣ܕܳܐ ܐܳܡܰܪ ܗ̱ܘܳܐ ܥܕܰܡܳܐ ܕܢ̣ܺܐܬܶܐ ܡܰܢ ܕܕܝ̣ܠܶܗ ܗ̱ܝ̣ ܡܰܠܟܘ̣ܬܳܐ ܡܶܬܢܰܒܶܐ ܗ̱ܘܳܐ: ܐ̱ܚܪܺܢܳܐ ܕܶܝܢ ܕܘ̣ܨܝ̱ ܛܳܒ ܒܰܪ̱ܬ݀ ܨܶܗܝܽܘܢ ܕܡܰܠܟܶܟܝ̱ ܐܳܬܶܐ ܠܶܟܝ̱ ܡܰܟܝ̣ܟܳܐ ܘܰܪܟܝ̣ܒ ܥܝ̣ܠܳܐ ܒܰܪ ܐܰܬܳܢܳܐ ܩܳܥܶܐ ܗ̱ܘܳܐ: ܚܰܕ ܡ̣ܶܢ ܦܘ̣ܡܳܐ ܕܫܰܒܪ̈ܶܐ ܘܕܰܛܠܳܝ̈ܶܐ ܬܰܩܶܢ̣ܬ ܬܶܫܒܘ̣ܚܬܳܟ ܡܙܰܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܢ̣ܶܐܣܘ̣ܪ ܒܰܓܦܶܬܳܐ ܥܝ̣ܠܶܗ ܘܰܒܫܰܒܘ̣ܩܳܐ ܒܰܪ ܐܰܬܳܢܶܗ ܡܶܫܬܰܥܶܐ ܗ̱ܘܳܐ: ܚܰܕ ܕܡܳܐ ܝܳܐܝ̈ܳܢ ܥܰܠ ܛܘ̣ܪܳܐ ܪ̈ܶܓܠܰܝܗܽܘܢ ܕܰܡܣܰܒܪ̈ܰܝ ܙܰܕܝ̣ܩܘ̣ܬܳܐ ܡܰܙܥܶܩ ܗ̱ܘܳܐ: ܘܰܐ̱ܚܪܺܢܳܐ ܕܡܳܪܝܳܐ ܗܳܐ ܐܳܬܶܐ ܒܰܪ̱ܬ݀ ܨܶܗܝܽܘܢ ܦܘ̣ܩܝ̱ ܠܐܘ̣ܪܥܶܗ ܒܚܰܕܘ̣ܬܳܐ ܡܒܰܕܶܩ ܗ̱ܘܳܐ: ܘܟܰܕ ܒܡܰܥܰܠܬܳܟ ܕܠܐܘ̣ܪܫܠܶܡ ܕܥܰܠ ܥܝ̣ܠܳܐ ܗܳܠܶܝܢ ܡܫܰܡܠܶܐ ܗ̱ܘܰܝܬ: ܚܰܝ̈ܠܘܳܬܳܐ ܫܡܰܝܳܢ̈ܶܐ ܒܡܘ̣ܟܳܟܳܟ ܕܰܚܠܳܦܰܝܢ ܛܳܒ ܡܶܬܕܰܡܪܝ̣ܢ ܗ̱ܘܰܘ: ܘܟܰܕ ܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܡܶܫܬܰܒܰܚ ܗ̱ܘܰܝܬ ܠܙܳܟܘ̣ܬܳܐ ܕܥܰܠ ܡܰܘܬܳܐ ܡܒܰܕܶܩ ܗ̱ܘܰܝܬ: ܟܰܕ ܡ̣ܶܢ ܫܰܒܪ̈ܶܐ ܫܦܰܝ̈ܳܐ ܘܰܕܠܳܐ ܡܘ̣ܡ ܡܶܬܩܰܠܰܣ ܗ̱ܘܰܝܬ: ܘܟܰܕ ܡ̣ܶܢ ܣܪ̈ܳܦܶܐ ܩܰܕܝ̣̈ܫܶܐ ܒܰܬܪܽܘܢܘ̣ܣ ܕܫܘ̣ܒܚܶܗ ܐܰܝܟ ܚܰܝܠܬܳܢܳܐ ܡܶܬܩܰܕܰܫ ܗ̱ܘܰܝܬ: ܘܟܰܕ ܡ̣ܶܢ ܬܰܠܡܝ̣̈ܕܶܐ ܕܝ̣ܠܳܟ ܒܫܘ̣̈ܩܶܝܗ̇ ܕܨܶܗܝܽܘܢ ܐܰܝܟ ܡܰܠܟܳܐ ܡܶܙܕܰܝܰܚ ܗ̱ܘܰܝܬ: ܘܡ̣ܶܢ ܟܪ̈ܘ̣ܒܶܐ ܩܰܕܝ̣̈ܫܶܐ ܒܡܰܪܟܰܒܬܳܐ ܣܰܓܺܝܰܐܬ݀ ܫܘ̣ܚ̈ܠܳܦܶܐ ܐܰܝܟ ܐܰܠܳܗܳܐ ܡܶܬܒܰܪܰܟ ܗ̱ܘܰܝܬ: ܘܟܰܕ ܡ̣ܶܢ ܟܶܢ̈ܫܶܐ ܕܥܰܡ̱̈ܡܶܐ ܒܡܰܪ̈ܛܘ̣ܛܶܐ ܡܶܬܝܰܩܪ ܗ̱ܘܰܝܬ: ܐܶܣܛܠܳܐ ܕܠܳܐ ܡܶܬܚܰܒܠܳܢܘ̣ܬܳܐ ܠܓܶܢܣܳܐ ܐ̱ܢܳܫܳܝܳܐ ܐܰܝܟ ܡܳܪܝܳܐ ܡܰܠܒܶܫ ܗ̱ܘܰܝܬ: ܘܟܰܕ ܡ̣ܶܢ ܣܳܦܪ̈ܶܐ ܘܰܦܪ̈ܝ̣ܫܶܐ ܐܰܝܟ ܥܰܘܳܠܳܐ ܡܶܨܛܰܚܶܐ ܗ̱ܘܰܝܬ: ܡ̣ܶܢ ܫܰܒܪ̈ܶܐ ܫܦܰܝ̈ܳܐ ܘܝܰܠ̈ܘ̣ܕܶܐ ܕܟܰܝ̈ܳܐ ܬܶܫܒܘ̣ܚܬܳܐ ܡܩܰܒܶܠ ܗ̱ܘܰܝܬ: ܘܟܰܕ ܡ̣ܶܢ ܗܳܠܶܝܢ ܟܽܠܗܶܝܢ ܡܶܛܽܠ ܦܘ̣ܪܩܳܢܰܢ ܫܰܡܠܝ̣ܬ ܪ̈ܳܚܶܡܢܳܫܳܐ ܡܶܬܟܰܫܦܝ̣ܢܰܢ ܠܳܟ ܒܗܳܢܳܐ ܝܰܘܡܳܐ ܕܡܰܥܰܠܬܳܟ ܕܠܐܘ̣ܪܫܠܶܡ: ܕܰܬ̣ܫܰܟܶܢ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ: ܘܰܒܢܰܚ̈ܬܶܐ ܫܒܝ̣̈ܚܶܐ ܕܰܡܝܰܬܪܘ̣ܬܳܐ ܘܰܒܣܰܘ̈ܟܶܐ ܕܗܰܝܡܳܢܘܽܬܳܐ ܢ̇ܶܬܚܙܶܐ ܩܕܳܡܰܝܟ ܒܬܶܫܒܘ̣ܚܬܳܐ: ܟܰܕ ܡܥܰܛܦܝ̣ܢܰܢ ܠܒܘ̣ܫܳܐ ܕܠܳܐ ܡܶܬܚܰܒܠܳܢܘ̣ܬܳܐ ܢ̇ܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܩܳܐܡ ܒܚܰܕܘ̣ܬܳܐ ܘܒܰܪܘܳܙܳܐ ܘܰܒܬܶܫ̈ܒܚܳܬܳܐ ܐܰ‌ܠܳܗ̈ܳܝܳܬܳܐ ܥܰܡ ܫܰܒܪ̈ܶܐ ܫܦܰܝ̈ܳܐ ܘܝܰܠ̈ܘ̣ܕܶܐ ܕܟܰܝ̈ܳܐ ܢ̇ܰܙܥܶܩ ܘܢ̇ܺܐܡܰܪ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܒܪܝ̣ܟܳܐ ܗ̱ܝ ܡܶܐܬܝ̣ܬܳܟ ܕܰܠܘܳܬܰܢ: ܘܫܘ̣ܒܚܳܐ ܘܺܐܝܩܳܪܳܐ ܢ̇ܰܣܶܩ ܠܳܟ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܳܡܳܐ ܕܶܐܬ̣ܬܰܚܬܝ̣ ܡܶܛܽܠܳܬܰܢ ܘܣܰܥ̣ܪܰܢ ܒܛܰܝܒܘ̣ܬܶܗ ܘܶܐܬ̣ܚܙܝ̣ ܠܘܳܬܰܢ ܒܐ̱ܢܳܫܘ̣ܬܶܗ: ܘܟ̣ܰܬܰܪ ܒܺܐܝܬܘ̣ܬܶܗ: ܘܥܝ̣ܪ̈ܶܐ ܒܪܰܘܡܳܐ ܙܳܡܪܝ̣ܢ ܬܶܫܒܘ̣ܚܬܶܗ: ܘܝܰܠ̈ܘ̣ܕܶܐ ܘܫܰܒܪ̈ܶܐ ܩܰܠܣܘ̣ܗ̱ܝ ܒܐܘ̣ܫܰܥܢ̈ܶܐ: ܐܰܫܘܳܐ ܠܰܢ ܕܥܰܡ ܡܰܠܰܐܟ̈ܶܐ ܢ̇ܫܰܒܚܳܟ ܘܥܰܡ ܫܰܒܪ̈ܶܐ ܘܰܛܠܳܝ̈ܶܐ ܒܐܘ̣ܫܰܥܢ̈ܶܐ ܡܶܬܝܰܕ̈ܥܳܢܶܐ ܢ̇ܩܰܠܣܳܟ: ܘܥܰܠ ܐܰܦ̈ܰܝ ܟܽܠܗܶܝܢ ܛܰܝ̈ܒܘܳܬܳܟ ܕܰܠܘܳܬܰܢ ܢ̇ܰܘܕܶܐ ܠܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀