ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܪܳܚܶܡ ܐ̱ܢܳܫܳܐ: ܕܥܰܡ ܝܰܘܣܶܦ ܘܢܝ̣ܩܘ̣ܕܝ̣ܡܘ̣ܣ ܢ̇ܝܰܩܰܪ ܠܰܩܒܘ̣ܪܬܳܟ ܡܰܚܝܳܢܝ̣ܬܳܐ ܒܕܘ̣ܒܳܪ̈ܶܐ ܛܳܒ̈ܶܐ: ܐܰܝܟ ܕܰܒܡܘ̣ܪܳܐ ܕܶܝܢ ܘܥܰܠܘܰܝ ܢ̇ܥܰܦܶܝܟ ܘܰܒܢܰܦ̈ܫܳܬܰܢ ܬܶܥܘ̣ܠ ܘܬܶܬ̣ܢܝ̣ܚ ܐܰܝܟ ܕܰܒܩܰܒܪܳܐ ܚ̣ܰܕܬܳܐ ܕܰܦܪܰܩ̣ܬ ܒܰܨܠܝ̣ܒܳܟ: ܘܥܰܡ ܡܝ̣̈ܬܶܐ ܕܰܣܥ̣ܰܪܬ ܒܰܩܢܘ̣ܡܳܟ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܝܳܐ ܘܠܳܐ ܡܳܝܘ̣ܬܳܐ ܒܰܟܝܳܢܶܗ ܕܰܚܠܳܦܰܝܢ ܡܳܝܘ̣̈ܬܶܐ ܡܝ̣ܬ ܒܰܒܣܰܪ ܒܨܶܒܝܳܢܶܗ: ܠܗܰܘ̇ ܕܐܝ̣ܬܰܘܗ̱ܝ ܚܰܝ̈ܶܐ ܘܰܩܝܳܡܬܳܐ ܕܟܽܠ ܒܶܝܬ ܡܝ̣̈ܬܶܐ ܫ̣ܪܳܐ ܐܰܝܟ ܩܛܝ̣ܠܳܐ ܕܰܫܦ̣ܰܪ ܠܶܗ ܡܶܛܽܠܳܬܰܢ ܩܛܝ̣̈ܠܰܝ ܒܰܚܛܝ̣ܬܳܐ ܕܠܰܢ ܢ̣ܰܚܶܐ: ܠܗܰܘ̇ ܕܒܰܩܒܘ̣ܪܬܶܗ ܫ̣ܪܳܐ ܚܒܳܠܳܐ ܕܰܒܩܰܒܪ̈ܶܐ: ܘܰܙ̣ܪܰܥ ܚܰܝ̈ܶܐ ܘܰܩܝܳܡܬܳܐ ܕܠܳܐ ܚܒܳܠܳܐ ܒܶܝܬ ܥܰܢܝ̣̈ܕܶܐ: ܘܰܒܦܰܓܪܶܗ ܠܦܰܓܪ̈ܶܐ ܕܝ̣ܠܰܢ ܢ̣ܛܰܪ ܕܠܳܐ ܢܶܟܝܳܢܳܐ ܘܰܚܒܳܠܳܐ ܘܰܒܝܰܕ ܢܰܦܫܶܗ ܠܢܰܦܫ̈ܳܬܰܢ ܐܰܟ̣ܪܶܙ ܦܘ̣ܪܩܳܢܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܩܒܘ̣ܪܬܳܐ ܦܳܪܘ̣ܩܳܝܬܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܚܰܝ̈ܶܐ ܘܢܘ̣ܚܳܡܳܐ ܘܰܩܝܳܡܬܳܐ ܕܟܽܠ: ܗܰܘ̇ ܕܠܳܟ ܒܰܠܚܘ̣ܕ ܐܝ̣ܬ ܠܳܐ ܡܳܝܘ̣ܬܘ̣ܬܳܐ ܘܠܳܐ ܡܶܬܚܰܒܠܘ̣ܬܳܐ: ܘܕܝ̣ܠܳܟ ܐܝ̣ܬܶܝܗ̇ ܟܽܠܳܗ̇ ܡܶܬܡܰܨܝܳܢܘ̣ܬܳܐ ܘܓܰܢ̱ܒܳܪܘ̣ܬܳܐ: ܘܒܳܟ ܠܚܘ̣ܕ ܫܟܝ̣ܚܳܐ ܩܰܕܝ̣ܫܘ̣ܬܳܐ ܘܙܰܕܝ̣ܩܘ̣ܬܳܐ: ܘܠܳܟ ܙܳܕ̇ܩܳܐ ܬܶܫܒܘ̣ܚܬܳܐ ܘܦܰܐܝܘ̣ܬܳܐ ܡ̣ܶܢ ܥܶܠܳܝ̈ܶܐ ܘܡ̣ܶܢ ܬܰܚ̈ܬܳܝܶܐ ܒܟܽܠܥܶܕܳܢ: ܐܰܢ̱ܬ ܓܶܝܪ ܡܳܪܝ̱ ܒܰܫܦܝ̣ܥܘ̣ܬܳܐ ܕܚܘ̣ܒܳܟ ܘܣܘ̣ܓܳܐܐ ܪܰܒܳܐ ܕܰܡܪܰܚܡܳܢܘ̣ܬܳܟ ܠܚܰܫܳܐ ܘܡܰܘܬܳܐ ܨܶܒܝܳܢܳܐܝ̣ܬ ܐܶܬ̣ܰܝܬ ܚܠܳܦܰܝܢ: ܘܰܡܒܰܣܪܳܐ ܘܰܡܢܰܦܫܳܐ ܘܰܡܡܰܕܥܳܐ ܗ̣ܘܰܝܬ ܡ̣ܶܢ ܒܬܘ̣ܠܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܟܝܳܢܳܐܝ̣ܬ ܘܰܩܢܘ̣ܡܳܐܝ̣ܬ ܕܠܳܐ ܫܘ̣ܚܠܳܦܳܐ: ܟܽܠܳܗ̇ ܡܕܰܒܪܳܢܘ̣ܬܳܐ ܪܳܡܰܬ݀ ܡ̣ܶܢ ܝ̣ܕܰܥܬܳܐ ܕܰܒܪ̈ܰܝܳܐ ܘܰܥܒܝ̣̈ܕܶܐ ܫܰܡܠܝ̣ܬ ܥܕܰܡܳܐ ܠܰܨܠܝ̣ܒܳܐ: ܒܳܗ̇ ܒܰܙܩܝ̣ܦܘ̣ܬܳܟ ܡܰܠ̣ܝܰܬ݀ ܙܰܘ̈ܥܶܐ ܘܬܶܕܡܪ̈ܳܬܳܐ ܘܠܳܐ ܡܶܬ̣ܡܰܠ̈ܠܳܢܝܳܬܳܐ ܚܰܘܝ̣ܬ: ܫܶܡܫܳܐ ܕܰܚܫ̣ܶܟ ܒܛܰܗܪܳܐ: ܠܶܠܝܳܐ ܕܐܶܬ̣ܚܰܘܝ̣ ܒܐܝ̣ܡܳܡܳܐ: ܫܘ̣̈ܥܶܐ ܛܡܝ̣̈ܡܶܐ ܐܶܬܦ̣ܩܰܥܘ̱: ܘܩܰܒܪ̈ܶܐ ܐܰܚܝ̣̈ܕܶܐ ܐܶܬܦ̣ܰܬܰܚܘ̱ ܘܦܰܓܪ̈ܶܐ ܕܩܰܕܝ̣̈ܫܶܐ ܐܶܬܢܰܚ̣ܰܡܘ̱ ܘܠܳܐ ܬܘ̣ܒ ܡܝ̣ܬܘ̱: ܐܰܦܰܝ̈ ܬܰܪܥܳܐ ܕܗܰܝܟܠܳܐ ܐܶܨܛܰܪܝ̣ ܡ̣ܶܢ ܠܥܶܠ ܘܰܥܕܰܡܳܐ ܠܬܰܚܬ: ܓܰܝܳܣܳܐ ܕܡܰܘ̇ܕܶܐ ܘܰܠܚܰܒܪܶܗ ܡܰܟܶܣ ܥܰܠ ܪܘ̣ܫܥܶܗ: ܩܶܢܛܪܘ̣ܢܳܐ ܕܰܡܫܰܒܰܚ ܘܡܰܒ̇ܗܶܬ ܠܒܰܗܝ̣̈ܬܶܐ ܕܣܳܟ ܠܳܐ ܒܳܗ̇ܬܝ̣ܢ: ܡܰܝ̈ܳܐ ܘܰܕܡܳܐ ܕܰܪܕܰܘ ܡ̣ܶܢ ܕܰܦܢܳܟ ܡܰܥܒ̣ܕܰܬ݀ ܚܰܝ̈ܶܐ ܘܠܳܐ ܡܳܝܘ̣ܬܘ̣ܬܳܐ: ܟܰܕ ܡܝ̣ܬܳܐ ܗ̣ܘܰܝܬ ܚܰܝܳܐ ܡܶܬ̣ܚܙܶܐ ܐܰܢ̱ܬ: ܘܟܰܕ ܒܰܐܪܥܳܐ ܐܰܢ̱ܬ ܒܰܡܪ̈ܰܘܡܶܐ ܥܳܡܰܪ ܐܰܢ̱ܬ: ܘܚܰܕ ܐܰܠܳܗܳܐ ܡܶܬ̣ܗܰܝܡܰܢ ܐܰܢ̱ܬ ܡ̣ܶܢ ܐܰܠܳܗܘ̣ܬܳܐ ܘܐ̱ܢܳܫܘ̣ܬܳܐ: ܕܐ̱ܢܳܫܳܐܝ̣ܬ ܘܐܰܠܳܗܳܐܝ̣ܬ ܣܒܰܠ̣ܬ ܟܽܠܗܶܝܢ ܐܰܝܠܶܝܢ ܕܚܰܝܳܒ ܗ̱ܘܳܐ ܐܳܕܳܡ ܠܡ̣ܶܚܰܫ: ܘܚܰܫ̈ܶܐ ܕܝ̣ܠܰܢ ܘܕܝ̣ܠܳܟ ܥܒ̣ܰܕܬ ܐܶܢܽܘܢ: ܘܰܐܝܟ ܡܶܬܒܰܨܝܳܢܳܐ ܕܟܽܠ ܘܙܳܟܘ̣ܬܳܐ ܕܰܙܟܰܝܬ ܕܝ̣ܠܰܢ ܥܒ̣ܰܕܬܳܗ̇ ܒܛܰܝܒܘ̣ܬܳܟ: ܘܡܰܘܬܰܢ ܐܰܡܝ̣ܬܬ ܒܨܶܒܝܳܢܳܟ: ܘܰܒܡܰܘܬܳܟ ܚܰܝܳܐ ܠܡܰܘܬܳܐ ܡܡܝ̣ܬܳܢܰܢ ܐܰܡܝ̣ܬܬ ܘܠܰܢ ܠܳܐ ܡܳܝܘ̣ܬܘ̣ܬܳܐ ܫܰܟܶܢ̣ܬ ܐܰܢ̱ܬ ܠܳܐ ܡܳܝܘ̣ܬܳܐ ܒܰܟܝܳܢܳܟ: ܐܰܟܡܳܐ ܕܰܒܚܰܫܰܝ̈ܟ ܠܡܰܚܫܳܢܰܢ ܒܝ̣ܫܳܐ ܐܰܚܶܫ̣ܬ ܘܠܰܢ ܚܳܫܘ̣̈ܫܶܐ ܠܳܐ ܚܳܫܘ̣ܫܘ̣ܬܳܐ ܐܰܢ̱ܬ ܠܳܐ ܚܳܫܘ̣ܫܳܐ ܐܰܩܢܝ̣ܬ: ܘܟܰܕ ܠܰܩܒܘ̣ܪܬܳܐ ܝܰܗ̣ܒܬ ܐܰܢ̱ܬ ܠܳܟ ܗܰܘ̇ ܠܳܐ ܡܶܬܩܰܪܒܳܢܳܐ ܘܠܳܐ ܡܶܬܠܰܒܟܳܢܳܐ ܒܐܝ̣̈ܕܰܝ ܝܰܘܣܶܦ ܒܘ̣ܠܘ̣ܛܝ̣ ܙܰܕܝ̣ܩܳܐ ܘܟܺܐܢܳܐ ܘܰܡܗܰܝܡܢܳܐ ܐܶܬ̣ܛܥܶܢܬ ܗܰܘ̇ ܕܰܠܟܽܠ ܛܥܝ̣ܢ: ܘܡܶܢܶܗ ܘܡ̣ܶܢ ܢܝ̣ܩܳܘ̣ܕܺܝ̣ܡܘ̣ܣ ܗܰܘ̇ ܪܳܚܡܳܟ ܐܶܬܚܰܢ̣ܰܛܬ ܘܐܶܬ̣ܟܰܪܰܟܬ ܒܟ̈ܶܬܳܢܶܐ ܕܟܰܝ̈ܳܐ: ܘܡܘ̣ܪܳܐ ܘܥܰܠܘܰܝ ܪ̈ܝ̣ܫܳܝܶܐ ܘܐܶܬ̣ܥܰܦܝ̣ܬ ܐܰܝܟ ܡܝ̣ܬܳܐ: ܘܰܒܩܰܒܪܳܐ ܚ̣ܰܕܬܳܐ ܦܣܝ̣ܠ ܡ̣ܶܢ ܫܘ̣ܥܳܐ ܐܶܬ̣ܬܣܝ̣ܡܬ: ܗܰܘ̇ ܠܳܐ ܡܶܣܬܰܝܟܳܢܳܐ ܒܰܟܝܳܢܶܗ ܒܰܠܚܘ̣ܕܰܝܟ: ܗܳܝ̇ܕܶܝܢ ܡܰܠܰܐܟ̈ܶܐ ܘܚܰܝ̈ܠܶܐ ܕܰܫܡܰܝܳܐ ܟܽܠܗܽܘܢ ܠܐܝ̣ܩܳܪ ܩܒܘ̣ܪܬܳܟ ܡܳܪܳܢܳܝ̇ܬܳܐ ܢܶܚ̣ܬܘ̱: ܒܗܳܝ̇ ܕܠܳܐ ܐܰܪܦܝ̣ ܐܶܢܽܘܢ ܪܶܡܙܳܟ ܕܢܶܚ̣ܬܽܘܢ ܨܶܝܕܰܝܟ ܒܰܙܩܝ̣ܦܘ̣ܬܳܟ ܡܶܛܽܠ ܟܢܘ̣ܫܝܳܐ ܕܡܰܪ̈ܳܚܶܐ ܕܰܠܡܳܐ ܢ̣ܣܝ̣ܦܽܘܢ ܐܶܢܽܘܢ ܒܰܛܢܳܢܗܽܘܢ ܥܰܙܝ̣ܙܳܐ ܠܘܳܬ ܪ̈ܳܚܡܰܝܟ ܢܚ̣ܶܬܘ̱: ܘܬܶܫܒܘ̣ܚܬܳܐ ܕܙܳܟܘ̣ܬܳܐ ܐܰܠܶܦ̣ܘ̱ ܐܶܢܽܘܢ ܟܰܕ ܐܳܡ̇ܪܝ̣ܢ: ܩܰܕܝ̣ܫܰܬ ܐܰܠܳܗܳܐ: ܩܰܕܝ̣ܫܰܬ ܚܰܝܠܬܳܢܳܐ: ܩܰܕܝ̣ܫܰܬ ܠܳܐ ܡܳܝܘ̣ܬܳܐ: ܕܐܶܨܛܠܶܒ̣ܬ ܚܠܳܦܰܝܢ ܐܶܬܪܰܚܰܡܥܠܰܝܢ: ܚܢܰܢ ܕܶܝܢ ܡܳܪܝ̱ ܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܥܰܡ ܝܰܘܣܶܦ ܘܢܝ̣ܩܳܘ̣ܕܝ̣ܡܘ̣ܣ ܪܘ̣ܚܳܢܳܐܝ̣ܬ ܗܳܫܳܐ ܩܳܥܶܝܢܰܢ ܘܐܳܡ̇ܪܝ̣ܢܰܢ: ܩܰܕܝ̣ܫܰܬ ܐܰܠܳܗܳܐ ܡܶܠܬܳܐ ܕܰܗ̣ܘܰܝܬ ܒܰܪܢܳܫܳܐ ܡܶܛܽܠܳܬܰܢ: ܟܰܕ ܩܰܘܝ̣ܬ ܐܰܠܳܗܳܐ ܕܠܳܐ ܫܘ̣ܚܠܳܦܳܐ: ܕܠܰܢ ܒܢܰܝ̈ܢܳܫܳܐ ܐܰܠܳܗ̈ܶܐ ܒܛܰܝܒܘ̣ܬܳܟ ܬܶܥ̣ܒܶܕ: ܩܰܕܝ̣ܫܰܬ ܚܰܝܠܬܳܢܳܐ ܕܐܶܬܡܰܟ̣ܰܟܬ ܡܶܛܽܠܳܬܰܢ ܘܩܰܒܶܠ̣ܬ ܚܰܫ̈ܶܐ ܕܨܰܥܪܳܐ ܕܰܟܪܝ̣ܗܘ̣ܬܳܐ ܘܟܺܐܒܬܳܢܘ̣ܬܳܐ ܚܠܳܦܰܝܢ: ܘܠܰܢ ܚܰܝܠܳܐ ܘܠܘ̣ܒܳܒܳܐ ܕܥܰܠ ܟܽܠܗܽܘܢ ܚܰܫ̈ܶܐ ܥܕܝ̣̈ܠܶܐ ܘܠܳܐ ܥܕܝ̣̈ܠܶܐ ܝܰܗ̣ܒܬ: ܩܰܕܝ̣ܫܰܬ ܠܳܐ ܡܳܝܘ̣ܬܳܐ ܕܡܝ̣ܬܬ ܒܰܨܠܝ̣ܒܳܐ ܚܠܳܦܰܝܢ ܘܰܦܪܰܩ̣ܬ ܠܰܢ ܒܡܰܘܬܳܟ ܕܒܰܒܣܰܪ ܡ̣ܶܢ ܒܝ̣ܫܳܐ ܘܡܰܘܬܳܐ: ܟܰܕ ܐܝ̣ܬܰܝܟ ܠܳܐ ܡܳܝܘ̣ܬܳܐ ܘܠܳܐ ܡܶܬܚܰܒܠܳܢܳܐ ܟܝܳܢܳܐܝ̣ܬ: ܘܰܩܒܘ̣ܪܬܳܐ ܬܠܝ̣ܬܳܝܰܬ݀ ܝܰܘ̈ܡܶܐ ܨܒ̣ܰܝܬ ܕܬܶܬ̣ܩܒܰܪ ܐܰܝܟܰܢܳܐ ܕܰܠܢܰܦܫ̈ܳܬܳܐ ܕܒܰܫܝܘ̣ܠ ܐܰܚܝ̣̈ܕܳܢ ܗ̱ܘܰܝ̈ ܡ̣ܶܢ ܛܰܘܦܳܢܳܐ ܘܰܠܗܳܫܳܐ ܡܰܠܟܘ̣ܬܳܐ ܕܰܫܡܰܝܳܐ ܬ̣ܰܟܪܶܙ: ܘܰܩܝܳܡܬܳܐ ܘܚܰܝܰܬ݀ ܡܝ̣̈ܬܶܐ ܠܗܶܝܢ ܬ̣ܣܰܒܰܪ: ܘܠܳܐܕܳܡ ܘܰܠܚܰܘܳܐ ܘܰܠܟܽܠܗܽܘܢ ܟܺܐܢ̈ܶܐ ܘܰܢܒܺܝ̈ܶܐ ܕܡ̣ܶܢ ܥܳܠܰܡ ܬܒܰܝܰܐ ܒܣܰܒܪܳܐ ܕܢܘ̣ܚܳܡܳܐ ܘܦܘ̣ܢܳܝܳܐ ܕܠܰܥܕܶܝܢ: ܡܶܟܝ̣ܠ ܒܳܥܶܝܢܰܢ ܡܶܢܳܟ ܡܫܝ̣ܚܳܐ ܐܰܠܳܗܰܢ ܕܬܰܫ̣ܘܶܐ ܠܰܢ ܠܣܳܥܘ̣ܪܘ̣ܬܳܐ ܕܪ̈ܰܚܡܰܝܟ ܘܰܬ̣ܒܰܝܰܐ ܠܰܢ ܒܣܰܒܪܳܐ ܕܫܘ̣̈ܘܕܳܝܰܝܟ: ܘܰܬ̣ܚܰܕܶܐ ܠܰܢ ܒܚܰܕܘ̣ܬܳܐ ܕܰܩܝܳܡܬܳܐ: ܘܠܰܢ ܘܰܠܥܰܢܝ̣̈ܕܰܝܢ ܬܶܥ̣ܒܶܕ ܚܘ̣ܕܳܬܳܐ ܕܙܰܕܝ̣ܩܘ̣ܬܳܐ: ܘܰܬܢܝ̣ܚ ܠܰܢ ܒܰܐܘ̈ܘܳܢܶܐ ܕܝ̣ܠܳܟ ܕܢܘ̣ܗܪܳܐ: ܕܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ:ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܣܳܓ̇ܕܺܝ̣ܢܰܢ ܠܒܰܣܝ̣ܡܘ̣ܬܳܟ ܝܶܫܘ̣ܥ ܡܫܝ̣ܚܳܐ ܐܰܠܳܗܰܢ ܫܰܪܝ̣ܪܳܐ: ܕܩܰܪܶܒ̣ܬ ܢܰܦܫܳܟ ܠܝܳܠܘ̣ܕܳܟ ܦܝ̣ܪܡܳܐ ܕܬܰܪܥܘ̣ܬܳܐ ܘܦ̣ܳܚ ܡܶܢܳܟ ܪܝ̣ܚܳܐ ܕܚܰܝ̈ܶܐ: ܘܡ̣ܶܢ ܚܰܠܝܘ̣ܬܶܗ ܚܰܝ̈ܶܐ ܘܡܝ̣̈ܬܶܐ ܪܝ̣ܚܳܐ ܕܚܰܝ̈ܶܐ ܣܳܩ̣ܘ̱ ܘܰܩܢ̣ܰܘ ܡܶܢܶܗ ܚܰܝܘ̣ܬܳܐ: ܘܒܰܣܶܡ̣ܬ ܠܰܫܟܝ̣̈ܒܰܝ ܫܝܘ̣ܠ ܒܪܝ̣ܚܳܐ ܚܰܠܝܳܐ ܕܒܰܣܝ̣ܡܘ̣ܬܳܟ ܘܐܰܩܢܝ̣ܬ ܠܰܢ ܢܘ̣ܚܳܡܳܐ ܘܚܰܝ̈ܶܐ: ܘܩܰܒܶܠܳܝܗ̱ܝ ܡܳܪܝ̱ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡ̣ܶܢ ܐܝ̣̈ܕܰܝܳܐ ܕܝ̣ܠܰܢ ܒܨܝ̣ܪ̈ܶܐ ܥܰܒܕܰܝ̈ܟ ܕܡܶܬܩܰܪܰܒ ܒܝܰܘܡܳܐ ܗܳܢܳܐ ܕܡܰܥܰܠܬܳܟ ܕܠܰܫܝܘ̣ܠ: ܘܫܰܟܶܢ ܠܰܢ ܣܰܒܪܳܐ ܕܰܩܝܳܡܬܳܟ: ܘܐܰܩܝ̣ܡ ܠܰܢ ܡ̣ܶܢ ܡܰܦܘ̣ܠܬܳܐ ܕܰܚܛܝ̣ܬܳܐ: ܘܰܠܥܰܢܝ̣̈ܕܰܝܢ ܢܝܳܚܳܐ ܘܒܘ̣ܣܳܡܳܐ ܕܥܰܡ ܩܰܕܝ̣̈ܫܰܝܟ ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀