ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܚܰܝܳܐ ܒܰܟܝܳܢܶܗ: ܘܝܳܗܘ̣ܒܳܐ ܕܚܰܝ̈ܶܐ ܕܡܝ̣ܬ ܒܰܒܣܰܪ ܒܨܶܒܝܳܢܶܗ: ܘܣܳܡ̣ ܪܘ̣ܚܶܗ ܒܐܝ̣̈ܕܰܝ ܐܰܒܳܐ ܫܳܠܘ̣ܚܶܗ: ܘܝܰܘܣܶܦ ܟܺܐܢܳܐ ܫ̣ܶܐܠ ܦܰܓܪܶܗ: ܘܰܒܩܰܒܪܳܐ ܕܝ̣ܠܶܗ ܡܳܪܳܢܳܝܳܐ ܩܰܒ̣ܪܶܗ: ܘܣ̣ܳܡ ܗܘ̣ ܠܶܗ ܒܶܝܬ ܡܝ̣̈ܬܶܐ ܒܫܘ̣ܠܛܳܢܶܗ: ܐܰܝܟ ܩܛܝ̣̈ܠܶܐ ܕܰܚܛܝ̣ܬܳܐ ܕܰܫܟܝ̣ܒܝ̣ܢ ܒܩܰܒܪ̈ܶܐ: ܠܗܰܘ̇ ܕܰܙ̣ܪܰܥ ܚܰܝ̈ܶܐ ܒܶܝܬ ܡܝ̣̈ܬܶܐ ܒܝܰܕ ܡܰܚܰܬܬܶܗ: ܘܢܘ̣ܚܳܡܳܐ ܐܰܟ݂ܪܶܙ ܠܰܩܒܝ̣ܪ̈ܶܐ ܒܰܩܒܘ̣ܪܬܶܗ: ܕܠܶܗ ܦܰܐܝܳܐ ܬܶܫܒܘ̣ܚܬܳܐ ܡ̣ܶܢ ܟܽܠܗܽܘܢ ܒܪ̈ܰܝܳܐ ܘܰܥܒܝ̣̈ܕܶܐ: ܘܠܶܗ ܙܳܕܩܳܐ ܣܶܓܕܬܳܐ ܘܬܰܘܕܝ̣ܬܳܐ ܡ̣ܶܢ ܟܽܠܗܽܘܢ ܚܰܝ̈ܶܐ ܘܡܝ̣̈ܬܶܐ: ܒܗܳܢܳܐ ܥܶܕܳܢܳܐ ܕܰܩܒܘ̣ܪܬܳܐ ܦܳܪܘ̣ܩܳܝܬܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܚܰܝ̈ܶܐ ܐܰܠܳܗ̈ܳܝܶܐ ܘܠܳܐ ܡܶܬ̣ܚܰܒ̈ܠܳܢܶܐ ܘܠܳܐ ܡܶܬܛܰܠܩ̈ܳܢܶܐ: ܗܰܘ̇ ܕܰܟܝܳܢܳܐܝ̣ܬ ܘܐܘ̣ܣܺܝܳܐܝ̣ܬ ܩ̇ܢܶܐ̣ ܐܰܢ̱ܬ ܠܳܐ ܡܳܝܘ̣ܬܘ̣ܬܳܐ ܘܠܳܐ ܡܶܬܚܰܒܠܳܢܘ̣ܬܳܐ: ܘܝܰܘܡܳܢܳܐ ܒܨܶܒܝܳܢܳܟ ܥܰܡ ܡܰܘܬܳܐ ܐܶܬܥܰܪܙܰܠ̣ܬ ܡܶܛܽܠ ܓܶܢܣܰܢ ܡܳܝܘ̣ܬܳܐ ܘܡܰܘܬܳܐ ܕܰܙܩܝ̣ܦܳܐ ܘܰܕܩܶܛܠܳܐ: ܡܶܛܽܠ ܥܒܳܪ ܦܘ̣ܩܕܳܢܳܐ ܕܪܝ̣ܫ ܓܒܝ̣ܠܬܰܢ ܐܳܕܳܡ ܘܠܰܩܒܘ̣ܪܬܳܐ ܒܛܰܝܒܘ̣ܬܳܟ ܒܶܗ ܟܰܕ ܒܶܗ ܒܗܳܢܳܐ ܝܰܘܡܳܐ ܐܶܬ̣ܰܝܬ: ܐܰܝܟܰܢܳܐ ܕܰܠܫܘ̣ܠܛܳܢܶܗ ܕܡܰܘܬܳܐ ܬܶܫ̣ܪܶܐ: ܘܰܠܗܳܢܽܘܢ ܕܒܰܫܝܘ̣ܠ ܫܟܝ̣ܒܝ̣ܢ ܗ̱ܘܰܘ ܡ̣ܶܢ ܥܳܠܰܡ ܬܚ̣ܰܪܰܪ: ܡ̣ܶܢ ܣܘ̣̈ܛܡܶܐ ܕܡܝ̣ܬܘ̣ܬܳܐ ܘܰܬ̣ܫܰܟܶܢ ܠܗܽܘܢ ܚܰܝ̈ܶܐ ܚܰܕ̈ܬܶܐ ܘܠܳܐ ܡܶܬ̣ܚܰܒ̈ܠܳܢܶܐ: ܝܰܘܡܳܢܳܐ ܠܡܰܚܰܬܬܳܐ ܕܰܠܩܰܒܪܳܐ ܐܰܦܰܝ̈ܟ ܣܳܡ̣ܬ ܐܰܝܟܰܢܳܐ ܕܠܰܚܒܳܠܳܐ ܕܰܒܩܰܒܪ̈ܶܐ ܬܶܫ̣ܪܶܐ ܘܰܬ̣ܛܰܠܶܩ: ܝܰܘܡܳܢܳܐ ܡܘ̣ܪܳܐ ܘܥܰܠܘܰܝ ܥܰܡ ܟܶܬܳܢ̈ܶܐ ܢܰܩ̈ܕܶܐ ܐܶܬ̣ܛܰܝܰܒܘ̱ ܠܰܩܒܘ̣ܪܬܳܟ: ܝܰܘܡܳܢܳܐ ܝܰܘܣܶܦ ܗܰܘ̇ ܕܡ̣ܶܢ ܪܳܡܬܳܐ ܟܰܕ ܐܶܫܰܬ̣ܘܕܰܥ ܠܬܶܕܡܪ̈ܳܬܳܐ ܕܶܐܣܬ̣ܥܰܪ̈ܝ̱ ܒܥܶܕܳܢܳܐ ܕܰܙܩܝ̣ܦܘ̣ܬܳܐ ܕܝ̣ܠܳܟ: ܠܰܐܪܥܳܐ ܕܪܳܥܠܳܐ: ܫܘ̣̈ܥܶܐ ܕܡܶܨܛܰܪܶܝܢ: ܫܶܡܫܳܐ ܕܚܳܫܶܟ: ܐܰܦܰܝ̈ ܬܰܪܥܳܐ ܐܶܣܬ̣ܕܶܩ: ܗܳܝܕܶܝܢ ܩ̣ܪܶܒ ܘܫ̣ܶܐܠ ܡ̣ܶܢ ܦܝ̣ܠܰܛܘ̣ܣ ܕܰܝܳܢܳܐ ܟܰܕ ܐܳܡܰܪ: ܗܰܒܳܝܗ̱ܝ ܠܝ̣ ܠܦܰܓܪܶܗ ܕܝܶܫܘ̣ܥ ܗܰܘ̇ ܡܶܣܟܺܢܳܐ: ܗܰܘ̇ ܐܰܟܣܢܳܝܳܐ: ܗܰܘ̇ ܕܠܰܝܬ ܠܶܗ ܒܰܝܬܳܐ ܒܰܐܪܥܳܐ: ܗܰܘ̇ ܕܐܶܬ̣ܚܰܝܰܒ ܡ̣ܶܢ ܝܘ̣̈ܕܳܝܶܐ ܒܰܛܠܘ̣ܡܝܳܐ ܠܡܰܘܬܳܐ: ܟܰܕ ܗܘ̣ ܐܝ̣ܬܰܘܗ̱ܝ ܫܰܪܝ̣ܪܳܐܝ̣ܬ ܐܰܠܳܗܳܐ ܕܥܰܠ ܟܽܠ: ܗܳܝܕܶܝܢ ܢܰܣ̣ܒܶܗ ܘܟܰܪܟ̣ܶܗ ܒܟ̈ܶܬܳܢܶܐ ܢܰܩ̈ܕܶܐ: ܘܥܰܦ̣ܝܶܗ ܒܐܝ̣ܩܳܪܳܐ ܕܰܦ̇ܐܶܐ̣ ܠܛܰܝܒܘ̣ܬܶܗ: ܝܰܘܡܳܢܳܐ ܢܝ̣ܩܘ̣ܕܝ̣ܡܘ̣ܣ ܥܰܡ ܝܰܘܣܶܦ ܫܰܘ̈ܬܳܦܶܐ ܗ̣ܘܰܘ ܒܰܩܒܘ̣ܪܬܳܟ ܡܰܠ̣ܝܰܬ݀ ܚܰܝ̈ܶܐ: ܘܰܒܡܘ̣ܪܳܐ ܘܥܰܠܘܰܝ ܚܰܢ̣ܛܘ̣ܟ ܘܒܰܚܝܳܨܳܐ ܕܟܶܬܳܢܳܐ ܟܰܪܟ̥ܘ̣ܟ: ܘܰܒܩܰܒܪܳܐ ܚ̣ܰܕܬܳܐ ܢܩܝ̣ܪ ܒܓܰܢܬܳܐ ܕܝ̣ܠܶܗ ܕܐ̱ܢܳܫ ܥܕܰܟܝ̣ܠ ܠܳܐ ܐܶܬ̣ܬܣܝ̣ܡ ܗ̱ܘܳܐ ܒܶܗ ܣܳܡܘ̣ܟ ܘܟܺܐܦ̈ܶܐ ܒܰܐܦܰܝ̈ܟ ܚܬܰܡ̣ܘ̱: ܝܰܘܡܳܢܳܐ ܥܰܠ ܡܶܕܪܳܐ ܕܕܰܚܝ̣ܚܶܗ ܕܳܐܕܳܡ ܣܳܡ̣ܬ ܬܰܫܘܝ̣ܬܳܟ ܘܰܕܡܶܟ̣ܬ: ܐܰܝܟܰܢܳܐ ܕܥܰܡܳܟ ܢ̣ܶܬܢܰܚܰܡ ܘܰܢ̣ܩܘ̣ܡ: ܝܰܘܡܳܢܳܐ ܡܰܘܬܳܐ ܐܶܬܒܰܠ̣ܗܝ̣ ܘܙ̣ܳܥ ܡ̣ܶܢ ܡܰܘܬܳܐ ܕܝ̣ܠܳܟ: ܘܰܫܝܘ̣ܠ ܕܳܘܝ̣ܬܳܐ ܠܘ̣ܩܒܰܠ ܡܰܥܰܠܬܳܟ ܐܶܬܪܰܡ̣ܪܡܰܬ݀ : ܝܰܘܡܳܢܳܐ ܪܦ̣ܰܬܘ̱ ܓܰܪ̈ܡܶܐ ܕܥܰܢܝ̣̈ܕܶܐ ܘܰܣ̣ܘܰܚܘ̱ ܠܐܘ̣ܪܥܳܟ ܕܣܳܩ̣ܘ̱ ܪܝ̣ܚܳܐ ܕܚܰܝ̈ܶܐ ܘܐܰܪܓܶܫ̣ܘ̱ ܒܢܘ̣ܚܳܡܳܐ ܒܝܰܕ ܩܒܘ̣ܪܬܳܟ ܡܰܚܝܳܢܝ̣ܬܳܐ: ܘܒܰܕܓܽܘܢ ܟܰܕ ܠܝܰܘܡܳܐ ܗܳܢܳܐ ܕܰܩܒܘ̣ܪܬܳܟ ܡܰܥ̣ܒܕܰܬ݀ ܚܰܝ̈ܶܐ ܡܥܰܕܥܕܝ̣ܢܰܢ: ܘܰܠܕܘ̣ܟܪܳܢܳܐ ܕܡܝ̣ܬܘ̣ܬܳܟ ܦܳܪܘ̣ܩܳܝܬܳܐ ܡܶܬܥ̱ܰܗܕܝ̣ܢܰܢ: ܒܩܘ̣̈ܝܳܙܶܐ ܕܪܘ̣ܚܳܐ ܩܰܕܝ̣ܫܳܐ ܡܰܙܥܩܝ̣ܢܰܢ ܘܐܳܡܪܝ̣ܢܰܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܐܶܬ̣ܰܝ̈ ܠܰܢ ܒܐܝ̣ܕܶܝ̈ܗ̇ ܟܽܠܗܶܝܢ ܛܳܒ̈ܳܬܳܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܒܳܗ̇ ܐܶܬܢܰܚ̣ܰܡ ܡܶܢ ܥܓܳܢܶܗ ܕܡܰܘܬܳܐ ܓܶܢܣܰܢ ܚܰܠܳܫܳܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܓܰܡ̣ܪܰܬ݀ ܠܘܳܬܰܢ ܦܘ̣ܪܩܳܢܳܐ ܘܣܰܒܪܳܐ ܫܰܪܝ̣ܪܳܐ ܕܰܩܝܳܡܬܳܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܡܶܛܽܠܳܬܳܗ̇ ܐܰܙ̣ܥܶܩ ܕܰܘܝ̣ܕ ܘܐܶܡ̣ܰܪ: ܕܗܳܐ ܒܶܝܬ ܡܝ̣̈ܬܶܐ ܒܰܪ ܚܺܐܪ̈ܶܐ ܘܰܒܩܰܒܪܳܐ ܝܳܗܶܒ ܚܰܝ̈ܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܰܗ̣ܘܳܬ݀ ܦܘ̣ܪܩܳܢܳܐ ܘܣܰܒܪܳܐ ܠܓܶܢܣܰܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܘܰܥܕܳܐ ܕܚܰܝ̈ܶܐ ܐܶܣ̣ܬܰܒܰܪ ܒܳܗ̇ ܠܰܫܟܝ̣̈ܒܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܙܰܪܥܳܐ ܕܚܰܝܰܬ݀ ܡܝ̣̈ܬܶܐ ܩܰܕܡ̣ܰܬ݀ ܐܰܪܡܝܰܬ݀ : ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܚܰܘܒܬܳܐ ܕܐܳܕܳܡ ܫܶܒ̣ܩܰܬ݀ : ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܛܰܠܳܐ ܕܚܰܝ̈ܶܐ ܪܶܣ̣ܰܬ݀ ܥܰܠ ܥܰܢܝ̣̈ܕܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܝܶܗ̣ܒܰܬ݀ ܠܡܳܝܘ̣̈ܬܶܐ ܚܰܝ̈ܶܐ ܫܡܝ̈ܢܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܟܽܠܗܽܘܢ ܟܺܐܢ̈ܶܐ ܘܙܰܕܝ̣̈ܩܶܐ ܒܳܗ̇ ܨܡܰܚ̣ ܢܘ̣ܗܪܳܐ ܥܠܰܝܗܽܘܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܠܰܓܠܝ̣̈ܦܶܐ ܕܒܰܐܪܥܳܐ ܣܶܚ̣ܦܰܬ݀ : ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܡܰܪܕܝ̣ܬܳܐ ܕܠܰܫܝܘ̣ܠ ܒܳܗ̇ ܗ̣ܘܳܬ݀ ܨܶܝܕ ܡܝ̣̈ܬܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܢܘ̣ܗܪܳܐ ܘܚܰܝ̈ܶܐ ܗ̣ܘܰܘ ܒܳܗ̇ ܠܰܩܒܝ̣ܪ̈ܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܰܣܘܰܚ̣ܘ̱ ܒܳܗ̇ ܫܟܝ̣̈ܒܶܐ ܠܐܘ̣ܪܥܶܗ ܕܦܳܪܘ̣ܩܗܽܘܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܥܰܢܝ̣̈ܕܶܐ ܪܘܰܙܘ̱ ܒܰܩܛܝ̣ܠܳܐ ܕܰܗ̣ܘܳܐ ܡܰܢܝܳܐ ܒܰܩܒܝ̣ܪ̈ܶܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܦܰܓܪ̈ܶܐ ܕܙܰܕܝ̣̈ܩܶܐ ܒܳܗ̇ ܐܶܬܢܰܚ̣ܰܡܘ̱: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܨܶܡ̈ܚܶܐ ܕܢܘ̣ܗܪܳܐ ܒܳܗ̇ ܨܡܰܚ̣ܘ̱ ܥܰܠ ܥܓ̈ܝ̣ܢܰܝ ܕܰܚܝ̣ܚܳܐ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܰܩܥ̣ܰܘ ܒܳܗ̇ ܐܰܒܝ̣̈ܠܶܐ ܫܘ̣ܒܚܳܐ ܠܗܰܘ̇ ܕܐܰܥܒ̣ܰܪ ܐܶܒܠܳܐ ܕܰܟܡܝ̣ܪܘ̣ܬܗܽܘܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܪܰܘܡܳܐ ܘܥܘ̣ܡܩܳܐ ܐܰܘܕܝ̣ܘ ܘܫܰܒ̣ܰܚܘ̱ ܠܦܳܪܘ̣ܩܳܐ ܕܰܦ̣ܪܰܩ ܐܶܢܽܘܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܒܳܗ̇ ܕܫܰܒܰܚ̣ܘ̱ ܐܳܕܳܡ ܘܚܰܘܳܐ ܫܘ̣ܒܚܳܐ ܠܗܰܘ̇ ܕܐܰܓܶܣ̣ ܥܰܠ ܥܰܦܪܳܐ ܕܝ̣ܠܗܽܘܢ ܘܰܦ̣ܪܰܩ ܐܶܢܽܘܢ: ܐܳܘ ܩܒܘ̣ܪܬܳܐ ܡܰܚܝܳܢܝ̣ܬܳܐ ܕܬܶܕܡܪ̈ܳܬܳܐ ܕܠܳܐ ܣܳܟܳܐ ܒܶܟܝ̱ ܐܶܣ̣ܬܥܰܪ̈ܝ̱: ܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܳܪܝܳܐ ܗܰܘ̇ ܕܗܳܢܳܐ ܟܽܠܶܗ ܐܰܪܟܶܢ̣ܬܳܟ ܛܰܝܒܘ̣ܬܳܟ ܥܕܰܡܳܐ ܕܡܰܘܬܳܐ ܕܰܙܩܝ̣ܦܳܐ ܬܶܣܒܘ̣ܠ ܚܠܳܦܰܝܢ: ܕܰܒܡܝ̣ܬܘ̣ܬܳܟ ܬܢܰܚ̣ܶܡ ܡܝ̣ܬܘ̣ܬܰܢ: ܘܢܘ̣ܗܪܳܐ ܕܰܩܝܳܡܬܳܟ ܢܰܦ̣ܨܰܚ ܟܡܝ̣ܪܘ̣ܬܰܢ: ܘܣܰܒܪܳܐ ܕܢܘ̣ܚܳܡܳܐ ܕܝ̣ܠܳܟ ܢ̣ܒܰܝܰܐ ܠܰܐܒܝ̣ܠܘ̣ܬܰܢ: ܥܨܘ̣ܒ ܠܰܬܒܝ̣ܪܘ̣ܬܰܢ ܦܰܓ݂ܶܕ ܠܰܡܒܰܕܪܘ̣ܬܰܢ: ܨܰܒܶܬ ܠܣܰܢܝܘ̣ܬܰܢ: ܩܘ̣ܡ ܘܥܰܕܰܪ ܠܰܡܚܝ̣ܠܘ̣ܬܰܢ: ܪܰܡܪܶܡ ܠܥܺܕ̈ܳܬܰܢ ܫܰܟܠܶܠ ܠܕܰܝܪ̈ܳܬܰܢ: ܬܶܗ̣ܘܶܐ ܛܰܝܒܘ̣ܬܳܟ ܡܚܰܣܝܳܢܝ̣ܬܳܐ ܠܰܢ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܒܛܰܝܒܘ̣ܬܳܐ ܕܝ̣ܠܳܟ ܘܕܐܰܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀