ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܚܰܝܠܬܳܢܳܐ ܘܪܳܡܳܐ ܕܰܒܚܰܝܠܶܗ ܛܥܝ̣ܢ ܒܶܪ̈ܝܳܬܳܐ: ܕܛܰܥ̣ܢܶܗ ܩܰܝܣܳܐ ܕܰܨܠܝ̣ܒܳܐ ܒܨܶܒܝܳܢܶܗ: ܠܗܰܘ̇ ܓܢܝ̣ܙܳܐ ܘܰܡܥܰܠܝܳܐ ܕܒܰܕܡܶܗ ܚܰܣܝܳܐ ܕܐܶܫܬ̣ܦܰܥ ܠܚ̣ܳܐ ܠܶܐܫܛܳܪ ܚܰܘ̈ܒܶܐ ܕܐ̱ܢܳܫܘ̣ܬܳܐ: ܠܗܰܘ̇ ܦܫܝ̣ܛܳܐ ܕܐܶܬܪܟ݂ܶܒ ܘܒܰܦܫܳܛܳܐ ܕܐܝ̣ܕܰܘ̈ܗ̱ܝ ܐܰܚܝ̣ ܠܟܽܠܗܽܘܢ ܣܰܘ̈ܦܶܐ ܕܥܳܡܰܪܬܳܐ: ܠܗܰܘ̇ ܡܳܪܳܐ ܕܢܘ̣ܗܪܳܐ ܘܰܕܡܰܕܢܚܳܐ ܕܰܠܡܰܥܪܒܳܐ ܕܐ̱ܢܳܫܘ̣ܬܰܢ ܪܟ̣ܶܒ ܕܢ̣ܶܦܪܘ̣ܩ ܠܰܢ ܡ̣ܶܢ ܚܶܫܘ̣ܟܳܐ ܕܰܚܛܝ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܣܶܓܕܬܳܐ ܕܰܨܠܝ̣ܒܳܐ ܦܳܪܘ̣ܩܳܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܟܰܕ ܚ̣ܙܰܝܬܳܝܗ̱ܝ ܠܓܶܢܣܳܐ ܕܰܒܢܰܝ̈ܢܳܫܳܐ ܕܰܒ̣ܠܝ̣ ܒܰܚܛܝ̣ܬܳܐ: ܥܰܠ ܩܰܝܣܳܐ ܕܰܨܠܝ̣ܒܳܐ ܐܶܬ̣ܬܠܝ̣ܬ ܒܪ̈ܰܚܡܰܝܟ ܕܠܰܢ ܚܰܛܳܝ̈ܶܐ ܘܡܰܣ̈ܟܠܳܢܶܐ ܬ̣ܶܦܪܘ̣ܩ ܘܰܬ̣ܫܰܘܙܶܒ: ܘܥܰܠ ܗܳܕܶܐ ܠܰܨܠܝ̣ܒܳܐ ܩܰܕܝ̣ܫܳܐ ܢܶܣ̇ܓܘ̣ܕ ܟܰܕ ܐܳܡ̇ܪܝ̣ܢܰܢ: ܨܠܝ̣ܒܳܐ ܙܰܝܢܰܐ ܗ̱ܘ̇ ܕܠܳܐ ܚܳܐܶܒ: ܨܠܝ̣ܒܳܐ ܫܘ̣ܪܰܐ ܗ̱ܘ̇ ܕܠܳܐ ܢܳܦܶܠ: ܨܠܝ̣ܒܳܐ ܒܰܕܰܪ ܠܥܰܡܳܐ ܕܨܳܠܘ̣̈ܒܶܐ: ܨܠܝ̣ܒܳܐ ܟܰܢ̣ܶܫ ܠܥܰܡ̱̈ܡܶܐ ܘܐܶܡ̈ܘܳܬܳܐ: ܨܠܝ̣ܒܳܐ ܐܰܒܗ̣ܶܬ ܠܟܳܦܘ̣ܪ̈ܶܐ: ܨܠܝ̣ܒܳܐ ܫܰܝܶܢ ܠܰܫ̈ܡܰܝܳܢܶܐ ܥܰܡ ܐܰܪ̈ܥܳܢܳܝܶܐ: ܘܒܰܕܓܽܘܢ ܡܳܪܝ̱ ܒܰܨܠܝ̣ܒܳܟ ܚܰܣܳܐ ܚܰܘ̈ܒܳܬܰܢ: ܘܒܰܨܠܝ̣ܒܳܟ ܫܒܘ̣ܩ ܣܰܟܠ̈ܘܳܬܰܢ: ܘܒܰܨܠܝ̣ܒܳܟ ܢܰܛܰܪ ܕܰܝܪ̈ܳܬܰܢ ܘܥܺܕ̈ܳܬܰܢ: ܘܒܰܨܠܝ̣ܒܳܟ ܪܰܡܪܶܡ ܘܢܰܛܰܪ ܝܰܠ̈ܕܶܝܗ̇ ܕܥܺܕܬܳܐ ܡܗܰܝܡܰܢܬܳܐ: ܘܰܐܫܘܳܐ ܠܰܢ ܘܰܠܥܰܢܝ̣̈ܕܰܝܢ ܕܢܶܣ̇ܓܘ̣ܕ ܠܳܟ ܒܗܰܘ̇ ܝܰܘܡܳܐ ܐ̱ܚܪܳܝܳܐ ܕܕܳܢܚܳܐ ܡܶܐܬܝ̣ܬܳܟ ܕܬܰܪܬܶܝܢ: ܘܰܬܚܶܝܬ ܟܶܢܦܰܘ̈ܗ̱ܝ ܕܰܨܠܝ̣ܒܳܟ ܣܰܬܰܪ ܠܰܢ: ܘܰܒܚܰܝܠܶܗ ܕܰܨܠܝ̣ܒܳܟ ܐܰܡܝ̣ܬ ܠܡܰܘܬܳܐ ܕܰܚܛܝ̣ܬܳܐ ܕܰܛܡܝ̣ܪ ܒܗܰܕܳܡܰܝ̈ܢ: ܘܰܐܚܶܫ ܠܚܰܫ̈ܶܐ ܕܰܚܒܳܠܳܐ ܕܫܳܘܚܝ̣ܢ ܒܪ̈ܶܥܝܳܢܰܝܢ: ܘܰܩܒܘ̣ܪ ܠܚܘ̣̈ܫܳܒܶܐ ܕܥܰܘܠܳܐ ܕܢܳܒ̇ܥܝ̣ܢ ܒܬܰܪ̈ܥܝܳܬܰܢ: ܘܢܰܚܶܡ ܠܚܰܝ̈ܶܐ ܠܳܐ ܥܕܝ̣̈ܠܶܐ ܒܟܽܠܗܽܘܢ ܗܰܕܳܡܰܝ̈ܢ: ܘܰܓܠܝ̣ ܒܰܣܝ̣ܡܘ̣ܬ ܪܝ̣ܚܳܐ ܕܰܥܒ̈ܳܕܶܐ ܛܳܒ̈ܶܐ ܒܟܽܠܗܽܘܢ ܗܘ̣ܦܳܟܰܝ̈ܢ ܐܰܝܟܰܢܳܐ ܕܰܒܗܶܪ̈ܘ̣ܡܶܐ ܡܶܬܝܰܕ̈ܥܳܢܶܐ ܘܩܰܕܝ̣̈ܫܶܐ ܢ̇ܝܰܩܰܪ ܠܰܙܩܝ̣ܦܘ̣ܬܳܟ ܦܳܪܘ̣ܩܳܝ̇ܬܳܐ ܘܰܠܡܝ̣ܬܘ̣ܬܳܟ ܡܰܚܝܳܢܝ̣ܬܳܐ ܘܠܰܩܒܘ̣ܪܬܳܟ ܡܩܰܠܰܣܬܳܐ ܘܠܰܩܝܳܡܬܳܟ ܡܝܰܩܰܪܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀