ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܘܰܓܢܝ̣ܙ ܡ̣ܶܢ ܟܽܠ ܒܰܟܝܳܢܳܐ ܕܐܰܠܳܗܘ̣ܬܶܗ: ܠܗܰܘ̇ ܕܰܡܥܰܠܰܝ ܡ̣ܶܢ ܚܰܫ̈ܶܐ ܕܚ̣ܰܫ ܒܨܶܒܝܳܢܶܗ ܡܶܛܽܠܳܬܰܢ: ܠܗܰܘ̇ ܠܳܐ ܡܳܝܘ̣ܬܳܐ ܕܰܛܥ̣ܶܡ ܡܰܘܬܳܐ ܒܰܒܣܰܪ ܒܛܰܝܒܘ̣ܬܶܗ ܚܠܳܦ ܦܘ̣ܪܩܳܢܰܢ: ܠܗܰܘ̇ ܕܰܝܳܢܳܐ ܕܕܰܝ̈ܳܢܶܐ ܕܩܳܡ̣ ܒܶܝܬ ܕܝ̣ܢܳܐ ܩܕܳܡ ܦܝ̣ܠܰܛܘ̣ܣ ܗܺܓܡܘ̣ܢܳܐ ܐܰܝܟܰܢܳܐ ܕܠܰܢ ܢܚ̣ܰܪܰܪ ܡ̣ܶܢ ܚܘ̣ܝܳܒܳܐ ܕܰܚܛܝ̣ܬܳܐ ܒܰܚܢܳܢܶܗ: ܠܗܰܘ̇ ܡܩܰܒܠܳܢܳܐ ܕܰܨ̈ܠܰܘܳܬܳܐ: ܕܰܨܠܘ̣ܬܳܐ ܚܠܳܦܰܝܢ ܩܰܪܶܒ ܠܝܳܠܘ̣ܕܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܰܒܚܝ̣ܢܰܢ ܘܡܰܘܕܶܝܢܰܢ ܠܐܝ̣ܬܘ̣ܬܳܟ ܡܪܰܝܰܡܬܳܐ ܐܰܠܳܗܳܐ ܪܳܡܳܐ ܘܰܡܥܰܠܝܳܐ: ܕܰܥܒ̣ܰܕܬܳܢ ܒܨܰܠܡܳܟ ܘܒܰܕܡܘ̣ܬܳܟ: ܘܰܡܩܰܠܣܝ̣ܢܰܢ ܠܦܘ̣ܪܩܳܢܳܟ ܒܪܳܐ ܝ̣ܚܝ̣ܕܳܝܳܐ ܡܶܠܬܶܗ ܕܐܰܒܳܐ ܫܡܰܝܳܢܳܐ: ܘܰܡܪܰܡܪܡܝ̣ܢܰܢ ܠܪܘ̣ܚܳܟ ܩܰܕܝ̣ܫܳܐ ܕܡ̣ܶܢ ܥܰܦܪܳܐ ܫܝ̣ܛܳܐ ܡܫܰܒ̈ܚܳܢܶܐ ܐܰܩܝ̣ܡܬ: ܐܳܕܳܡ ܒܰܪܢܳܫܳܐ ܩܰܕܡܳܝܳܐ ܡܰܠܟܳܐ ܕܗܳܠܶܝܢ ܥܰܠ ܐܰܪܥܳܐ ܒܝܘ̣ܡ ܥܪܘ̣ܒܬܳܐ ܫܬܳܐ ܒܢܝ̣ܣܳܢ ܝܰܪܚܳܐ ܩܰܕܡܳܝܳܐ ܫܰܪܝ̣ ܕܢ̣ܶܬܒܪܶܐ: ܘܰܒܦܰܪܕܰܝܣܳܐ ܣܳܡ̣ܬܳܝܗ̱ܝ ܕܢ̣ܶܬܒܰܣܰܡ ܒܬܶܫܒܘ̣ܚܬܳܐ ܘܰܐ̱ܚܝܳܢܳܐ ܠܡܰܠܰܐܟ̈ܶܐ ܢܶܗ̣ܘܶܐ: ܘܟܰܕ ܒܨܰܦܪܳܐ ܕܰܥܪܘ̣ܒܬܳܐ ܒܰܥܕܶܝܢ ܝܳܪܘ̣ܬܳܐ ܥܒ̣ܰܕܬܳܝܗ̱ܝ ܘܥܰܠ ܟܽܠ ܕܒܰܐܪܥܳܐ ܐܰܫܠ̣ܶܛܬܳܝܗ̱ܝ: ܒܰܬܠܳܬܫܳܥܝ̣̈ܢ ܠܦܺܐܪܳܐ ܪܶܓܬܳܢܳܝܳܐ ܫܰܒܪܳܐܝ̣ܬ ܐܶܬ̣ܩܰܪܰܒ: ܘܟܰܕ ܡ̣ܶܢ ܗܳܢܳܐ ܕܰܥܠܰܘܗ̱ܝ ܢܳܡܘ̣ܣܳܐ ܢܳܛܘ̣ܪܳܐ ܣܝ̣ܡ ܗ̱ܘܳܐ: ܐܶܟ̣ܰܠ ܪܗܝ̣ܒܳܐܝ̣ܬ ܐܶܬ̣ܦܰܪܣܝ̣ ܘܩܳܠܳܐ ܥܰܙܝ̣ܙܳܐ ܫܡ̣ܰܥ: ܐܳܕܳܡ ܐܳܕܳܡ ܐܰܝܟܳܐ ܐܰܢ̱ܬ ܒܒܶܗܬܰܬ݀ ܐܰܦ̈ܶܐ ܥܢ̣ܳܐ ܘܐܶܡ̣ܰܪ: ܩܳܠܳܟ ܡܳܪܝ̱ ܫܶܡ̇ܥܶܬ ܘܐܶܬܛܰܫܝ̣ܬ: ܘܰܒܚܶܡܬܳܐ ܘܪܘ̣ܓܙܳܐ ܐܶܡ̣ܰܪܬ ܠܶܗ: ܦܘ̣ܩ ܡ̣ܶܢ ܝܳܪܬܘ̣ܬܳܟ ܥܰܒܕܳܐ ܠܳܐ ܡܶܬܛܦܝ̣ܣܳܢܳܐ ܠܰܐܪܥܳܐ ܟܘ̣ܒܳܢܳܝܬܳܐ ܘܠܝ̣ܛܬܳܐ ܐܰܝܟ ܦܘ̣ܩܕܳܢܳܐ ܡܳܪܳܢܳܝܳܐ: ܒܶܗ ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܡ̣ܶܢ ܦܰܪܕܰܝܣܳܐ ܐܶܬ̣ܛܪܶܕ ܘܰܗ̣ܘܳܐ ܡܶܢܶܗ ܐܰܟܣܽܘ̣ܪܺܝ̣ܣܬܺܝ̣ܢܳܐ: ܒܚܰܝ̈ܶܐ ܫܚܝ̣̈ܩܶܐ ܘܠܳܐ ܡܶܬ̣ܒܰܝ̈ܳܐܢܶܐ ܥܰܡ ܚܰܘܳܐ ܕܐܶܬ̣ܬܰܩܢܰܬ݀ ܠܥܶܕܪܳܐ ܠܡܰܦܘ̣ܠܬܳܐ ܫ̣ܶܪܟܰܬ݀ ܘܟܰܕ ܠܳܐ ܫܶܦ̣ܪܰܬ݀ ܠܛܳܒܘ̣ܬܳܟ ܕܢ̣ܺܐܒܰܕ ܨܰܠܡܳܟ ܡܰܠܟܳܝܳܐ: ܠܡܶܠܬܳܐ ܡܬܘ̣ܡܳܝܳܐ ܫܰܕܰܪܬ ܚܠܳܦ ܦܘ̣ܪܩܳܢܰܢ: ܘܰܡܕܰܒܪܳܢܘ̣ܬܳܐ ܡܰܠܝ̣ ܕܰܡܚܰܪܪܳܐ ܡ̣ܶܢ ܚܰܫ̈ܶܐ ܚܛܝ̣̈ܬܳܢܳܝܶܐ: ܘܒܶܗ ܒܝܰܘܡܳܐ ܫܬܝ̣ܬܳܝܳܐ ܕܰܥܪܘ̣ܒܬܳܐ ܡܛܰܝܒܳܐܝ̣ܬ ܠܰܨܠܝ̣ܒܳܐ ܐܶܬ̣ܳܐ ܐܰܟܡܰܢ ܕܦܘ̣ܪܩܳܢܳܐ ܠܳܐܕܳܡ ܢܶܥ̣ܒܶܕ: ܐܶܬ̣ܚܒܶܫ ܒܶܝܬ ܚܰܢܳܢ ܐܰܝܟ ܥܳܒܶܕ ܒܝ̣̈ܫܳܬܳܐ: ܐܶܬ̣ܩܰܦܰܚ ܒܩܰܢܝܳܐ ܐܰܝܟ ܚܰܝܳܒܳܐ: ܒܒܶܝܬ ܩܰܝܳܦܳܐ ܥܰܦ̣ܶܩ ܐܶܣܛܘ̣ܢܳܐ ܐܰܝܟ ܡܚܝ̣ܠܳܐ: ܘܐܶܫܬ̣ܠܶܡ ܠܡܰܘܬܳܐ ܐܝܟ ܬܰܚܘ̣ܒܳܐ ܒܰܦܪܶܛܳܘܪܝ̣ܢ ܕܦܝ̣ܠܰܛܘ̣ܣ: ܒܰܥܪܘ̣ܒܬܳܐ ܐܶܬ̣ܒܪܝ̣ ܐܳܕܳܡ ܘܒܰܥܪܘ̣ܒܬܳܐ ܒܰܐܪܒܬܰܥܣܰܪ ܒܢܝ̣ܣܳܢ ܚ̣ܰܫ ܡܳܪܰܢ ܝܶܫܘ̣ܥ ܡܫܝ̣ܚܳܐ ܚܠܳܦܰܝܢ ܘܰܦ̣ܪܰܩ ܠܰܢ: ܒܰܥܪܘ̣ܒܬܳܐ ܓܰܒ̣ܠܶܗ ܐܰܠܳܗܳܐ ܠܳܐܕܳܡ: ܘܒܰܥܪܘ̣ܒܬܳܐ ܩܰܒ̣ܶܠ ܡܫܝ̣ܚܳܐ ܪܘ̣ܩܳܐ ܡܶܢ ܛܰܡ̈ܶܐܐ ܒܢܰܝ̈ ܐܳܕܳܡ: ܒܰܥܪܘ̣ܒܬܳܐ ܐܶܬ̣ܟܰܢܰܫ̈ܝ̱ ܒܥܝ̣ܪ̈ܳܐ ܘܚܰܝ̈ܘܳܬܳܐ ܠܘܳܬ ܐܳܕܳܡ ܕܢܶܩ̣ܪܶܐ ܠܗܶܝܢ ܫܡ̈ܳܗܶܐ ܟܰܕ ܡܰܪ̈ܟܢܳܢ ܪ̈ܝ̣ܫܰܝܗܶܝܢ ܘܣܳܓ̈ܕܳܢ ܩܕܳܡܰܘܗ̱ܝ: ܘܒܰܥܪܘ̣ܒܬܳܐ ܐܶܬܟܰܢ̣ܰܫܘ̱ ܗ̱ܘܰܘ ܝܘ̣̈ܕܳܝܶܐ ܥܰܠ ܡܫܝ̣ܚܳܐ ܟܰܕ ܡܒܰܙܚܝ̣ܢ ܒܶܗ ܘܐܳܡ̇ܪܝ̣ܢ: ܫܠܳܡ ܠܳܟ ܡܰܠܟܳܐ ܕܝܘ̣̈ܕܳܝܶܐ: ܘܫܶܠ̣ܡܰܬ݀ ܡܶܠܬܶܗ ܕܰܢܒܺܝܳܐ ܕܰܘܝ̣ܕ: ܐܶܬ̣ܟܰܪܟܘ̣ܢܝ̱ ܬܰܘܪ̈ܶܐ ܣܰܓܺܝ̈ܶܐܐ ܘܐܰܪ̈ܘܳܢܶܐ ܕܒܰܝܫܳܢ ܚܰܕܪܘ̣ܢܝ̱: ܒܰܥܪܘ̣ܒܬܳܐ ܐܶܬ̣ܬܣܝ̣ܡ ܟܠܝ̣ܠܳܐ ܡܰܠܟܳܝܳܐ ܒܪܝ̣ܫܶܗ ܕܐܳܕܳܡ: ܘܒܰܥܪܘ̣ܒܬܳܐ ܐܶܬ̣ܬܣܝ̣ܡ ܟܠܝ̣ܠܳܐ ܕܥܘ̣̈ܙܰܢܝܶܐ ܒܪܝ̣ܫܶܗ ܕܡܳܪܰܢ: ܬܠܳܬ ܫܳܥܝ̣̈ܢ ܗ̣ܘܳܐ ܐܕܳܡ ܒܦܰܪܕܰܝܣܳܐ ܟܰܕ ܡܰܦܪܶܓ ܒܫܘ̣ܒܚܳܐ: ܘܰܬܠܳܬ ܫܳܥܝ̣̈ܢ ܩܳܡ̣ ܡܳܪܰܢ ܒܒܶܝܬ ܕܝ̣ܢܳܐ ܟܰܕ ܡܶܬ̣ܢܓܶܕ ܡ̣ܶܢ ܥܰܦܪ̈ܳܢܶܐ ܒܢܰܝ̈ ܐܳܕܳܡ: ܒܰܥܪܘ̣ܒܬܳܐ ܩܶܪܒ̣ܰܬ݀ ܚܰܘܳܐ ܠܐܝ̣ܠܳܢܳܐ ܕܛܳܒܬܳܐ ܘܰܕܒܝ̣ܫܘ̣ܬܳܐ: ܘܒܰܥܪܘ̣ܒܬܳܐ ܒܫܶܬܫܳܥܝ̣̈ܢ ܣܠ̣ܶܩ ܐܰܠܳܗܳܐ ܠܰܨܠܝ̣ܒܳܐ ܕܐܝ̣ܬܰܘܗ̱ܝ ܐܝ̣ܠܳܢܳܐ ܕܚܰܝ̈ܶܐ: ܒܰܥܪܘ̣ܒܬܳܐ ܝܶܗ̣ܒܰܬ݀ ܚܰܘܳܐ ܦܺܐܪܳܐ ܩܳܛܘ̣ܠܳܐ ܠܳܐܕܳܡ ܘܐܶܟ̣ܰܠ: ܒܰܥܪܘ̣ܒܬܳܐ ܐܰܘܫ̣ܛܰܬ݀ ܟܢܘ̣ܫܬܳܐ ܠܰܡܫܝ̣ܚܳܐ ܚܰܠܳܐ ܘܰܡܪܳܪ̈ܶܐ ܘܶܐܫ̣ܬܝ̣: ܬܠܳܬ ܫܳܥܝ̣̈ܢ ܗ̣ܘܳܐ ܐܳܕܳܡ ܒܦܰܪܕܰܝܣܳܐ ܟܰܕ ܡܦܰܪܣܰܝ: ܘܰܬܠܳܬ ܫܳܥܝ̣̈ܢ ܗ̣ܘܳܐ ܡܫܝ̣ܚܳܐ ܥܰܪܛܶܠܳܝܳܐ ܒܰܨܠܝ̣ܒܳܐ: ܡ̣ܶܢ ܓܰܒܶܗ ܕܣܶܡܳܠܳܐ ܕܐܳܕܳܡ ܢܶܦ̣ܩܰܬ݀ ܚܰܘܳܐ ܐܶܡܳܐ ܕܥܰܦܪ̈ܳܢܶܐ ܡܳܝܘ̣̈ܬܶܐ: ܘܡ̣ܶܢ ܣܶܛܪܶܗ ܕܝܰܡܝ̣ܢܳܐ ܕܰܡܫܝ̣ܚܳܐ ܢܦܰܩ̣ܘ̱ ܕܡܳܐ ܘܡܰܝ̈ܳܐ ܟܳܣܳܐ ܕܚܰܝ̈ܶܐ ܘܫܶܩܝܳܐ ܪܘ̣ܚܳܢܳܐ: ܒܰܥܪܘ̣ܒܬܳܐ ܚ̣ܛܘ ܐܳܕܳܡ ܘܚܰܘܳܐ: ܘܒܰܥܪܘ̣ܒܬܳܐ ܒܰܡܫܝ̣ܚܳܐ ܐܶܫܬܰܒ̣ܩܰܬ݀ ܚܛܝ̣ܬܗܽܘܢ: ܒܰܥܪܘ̣ܒܬܳܐ ܕܢܰܚ ܠܗܽܘܢ ܢܘ̣ܗܪܳܐ ܘܰܩܢ̣ܰܘ ܚܰܝ̈ܶܐ ܚ̣ܰܕ̈ܬܶܐ ܕܒܰܥܪܘ̣ܒܬܳܐ ܐܰܘܒ̣ܶܕܘ̱ ܗ̱ܘܰܘ ܚܰܝܰܝ̈ܗܽܘܢ ܒܦܰܪܕܰܝܣܳܐ: ܒܰܥܪܘ̣ܒܬܳܐ ܐܰܡܠ̣ܶܟ ܥܠܰܝܗܽܘܢ ܡܰܘܬܳܐ ܝܰܥܢܳܐ: ܘܒܰܥܪܘ̣ܒܬܳܐ ܐܶܫ̣ܬܪܝ̣ ܡܶܢܗܽܘܢ ܫܘ̣ܠܛܳܢܶܗ ܕܡܰܘܬܳܐ: ܒܰܥܪܘ̣ܒܬܳܐ ܢܦܰܩ̣ܘ̱ ܡ̣ܶܢ ܦܰܪܕܰܝܣܳܐ ܐܳܕܳܡ ܘܚܰܘܳܐ ܟܰܕ ܡܰܪܟܢܝ̣ܢ ܪ̈ܝ̣ܫܰܝܗܽܘܢ ܒܟܰܪܝܘ̣ܬܳܐ: ܘܒܳܗ̇ ܒܰܥܪܘ̣ܒܬܳܐ ܐܰܗ̣ܦܶܟ ܐܶܢܽܘܢ ܢܝ̣ܫܶܗ ܕܰܨܠܝ̣ܒܳܐ ܠܦܰܪܕܰܝܣܳܐ ܒܚܰܕܘ̣ܬܳܐ: ܒܰܥܪܘ̣ܒܬܳܐ ܫܠܰܚ̣ܘ̱ ܐܳܕܳܡ ܘܚܰܘܳܐ ܫܘ̣ܒܚܗܽܘܢ ܒܶܝܬ ܐܝ̣̈ܠܳܢܶܐ: ܘܒܰܥܪܘ̣ܒܬܳܐ ܫܠ̣ܰܚ ܡܫܝ̣ܚܳܐ ܢܰܚ̈ܬܰܘܗ̱ܝ ܘܐܰܠܒ̣ܶܫ ܐܶܢܽܘܢ ܐܶܣܛܰܠ ܫܘ̣ܒܚܳܐ: ܒܰܥܪܘ̣ܒܬܳܐ ܦܰܪܣܝ̣ ܐܶܢܽܘܢ ܣܳܛܳܢܳܐ ܒܰܢܟܝ̣ܠܘ̣ܬܶܗ: ܘܒܰܥܪܘ̣ܒܬܳܐ ܦܰܪܣܝ̣ ܡܫܝ̣ܚܳܐ ܠܣܳܛܳܢܳܐ ܘܐܰܒ̣ܗܶܬ ܠܚܝ̈ܠܰܘܳܬܶܗ: ܒܰܥܪܘ̣ܒܬܳܐ ܐܶܬ̣ܬܚܶܕ ܬܰܪܥܶܗ ܕܦܰܪܕܰܝܣܳܐ ܘܥ̣ܰܠ ܠܶܗ ܓܰܝܳܣܳܐ ܝܰܡܝ̣ܢܳܝܳܐ: ܒܰܥܪܘ̣ܒܬܳܐ ܐܶܬܝܰܗ̣ܒܰܬ݀ ܫܢܳܢܳܐ ܕܚܰܪܒܳܐ ܠܰܟܪܘ̣ܒܳܐ ܕܢ̣ܶܛܪܝ̣ܘܗ̱ܝ ܠܦܰܪܕܰܝܣܳܐ: ܒܳܗ̇ ܒܰܥܪܘ̣ܒܬܳܐ ܒܠ̣ܰܥ ܡܫܝ̣ܚܳܐ ܒܠܘ̣ܟܳܝܬܳܐ ܘܬܰܒ̣ܪܳܗ̇ ܠܰܫܢܳܢܳܐ ܕܚܰܪܒܳܐ ܘܬܰܪܥ̣ܶܗ ܠܰܣܝܳܓܳܐ ܕܰܒܥܶܠܕܒܳܒܘ̣ܬܳܐ: ܒܰܥܪܘ̣ܒܬܳܐ ܗ̣ܘܳܐ ܐܳܕܳܡ ܡܰܠܟܳܐ ܘܟܳܗܢܳܐ ܘܰܢܒܺܝܳܐ: ܘܒܳܗ̇ ܒܰܥܪܘ̣ܒܬܳܐ ܐܶܫܬ̣ܩܶܠ̈ܝ̱ ܡ̣ܶܢ ܝܘ̣̈ܕܳܝܶܐ ܡܰܠܟܘ̣ܬܳܐ ܘܟܳܗܢܘ̣ܬܳܐ ܘܰܢܒܺܝܘ̣ܬܳܐ: ܒܰܥܪܘ̣ܒܬܳܐ ܢܚ̣ܶܬ ܐܳܕܳܡ ܡ̣ܶܢ ܦܰܪܕܰܝܣܳܐ ܠܰܐܪܥܳܐ ܕܠܰܘ̈ܛܳܬܳܐ: ܘܒܰܥܪܘ̣ܒܬܳܐ ܢܚ̣ܶܬ ܡܫܝ̣ܚܳܐ ܡ̣ܶܢ ܪܰܘܡܳܐ ܕܰܨܠܝ̣ܒܳܐ ܠܘܳܬ ܫܟܝ̣̈ܒܰܝ ܕܰܚܝ̣ܚܳܐ: ܟܽܠܗܶܝܢ ܕܶܝܢ ܡܳܟ̈ܳܬܳܐ ܕܰܣܥ̣ܰܪ ܐܳܕܳܡ ܒܗܶܝܢ ܫܰܡܠܝ̣ ܡܫܝ̣ܚܳܐ ܡܳܪܰܢ ܒܰܡܕܰܒܪܳܢܘ̣ܬܶܗ ܐܰܠܳܗܳܝ̇ܬܳܐ ܘܓܰܢ̱ܒܳܪܳܐܝ̣ܬ ܙܟ݂ܳܝܗ̱ܝ ܠܡܰܘܬܳܐ ܘܚܰܝܒ̣ܳܗ̇ ܠܰܚܛܝ̣ܬܳܐ: ܘܰܒܗܳܝ̇ ܕܘ̣ܟܬܳܐ ܕܰܩܒܝ̣ܪ ܐܳܕܳܡ: ܘܡܰܠܟܝ̣ܙܕܶܩ ܟܘ̣ܡܪܳܐ ܫܰܡ̣ܶܫ: ܘܐܰܒܪܳܗܳܡ ܠܰܒܪܶܗ ܐܝ̣ܣܚܳܩ ܕܶܒܚܳܐ ܐܰܣ̣ܶܩ ܬܰܡܳܢ ܐܶܬܩ̣ܒܰܥ ܨܠܝ̣ܒܶܗ ܕܡܳܪܰܢ ܘܐܰܠܳܗܰܢ ܘܡܰܚܝܳܢܰܢ ܝܶܫܘ̣ܥ ܡܫܝ̣ܚܳܐ: ܘܰܒܦܘ̣ܡܶܗ ܢܛܰܦ̣ܘ̱ ܕܡܳܐ ܘܡܰܝ̈ܳܐ ܐ̱ܪܳܙܳܢܳܐܝ̣ܬ: ܘܒܰܕܓܽܘܢ ܥܰܠ ܐܰܦܰܝ̈ ܡܕܰܒܪܳܢܘ̣ܬܶܗ ܕܰܚܠܳܦܰܝܢ ܩܘ̣ܒܳܠ ܛܰܝܒܘ̣ܬܳܐ ܢ̇ܰܣܶܩ ܠܶܗ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܓܰܢ̱ܒܳܪܳܐ ܕܒܰܬܫܰܥܫܳܥܝ̣̈ܢ ܐܰܙܶܥ̣ܩ ܥܰܠ ܙܩܝ̣ܦܳܐ: ܕܐܝ̣ܠ ܐܝ̣ܠ ܠܡܳܢܳܐ ܫܒܰܩ̣ܬܳܢܝ̱: ܘܐܰܓܥ̣ܶܠ ܪܘ̣ܚܶܗ ܒܐܝ̣̈ܕܰܝ ܐܰܒܘ̣ܗ̱ܝ ܡܫܰܒܚܳܐ: ܐܰܫܘܳܐ ܠܰܢ ܡܳܪܝܳܐ ܕܒܰܬܫܝ̣ܥܳܝܘ̣ܬ ܪ̈ܶܓܫܶܐ ܪ̈ܘ̣ܚܳܢܶܐ ܢܶܫ̇ܦܰܪ ܠܳܟ ܕܐܝ̣ܬܰܝܟ ܝܘ̣ܩܢܶܗ ܕܐܰܒܳܐ ܓܢܝ̣ܙܳܐ: ܕܰܨܒ̣ܰܝܬ ܕܬܶܬ̣ܡܬܰܚ ܥܰܠ ܩܰܝܣܳܐ ܕܰܨܠܝ̣ܒܳܐ ܡܶܛܽܠܳܬܰܢ: ܕܥܰܠ ܐܰܦܰܝ̈ ܟܽܠܗܶܝܢ ܕܰܣܒܰܠ̣ܬ ܚܠܳܦܰܝܢ: ܢܰܘܕܶܐ ܘܢܶܣ̇ܓܘ̣ܕ ܘܰܢ̇ܫܰܒܚܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀