ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܕܡ̣ܶܢ ܡܰܘܬܶܗ ܚܰܝ̈ܶܐ ܕܢܰܚ̣ܘ̱ ܠܰܢ: ܘܡ̣ܶܢ ܐ̱ܢܳܫܘ̣ܬܶܗ ܐܰܠܳܗܘ̣ܬܳܐ ܩܢ̣ܰܝܢܰܢ: ܘܡ̣ܶܢ ܡܘ̣ܟܳܟܶܗ ܪܘ̣ܡܪܳܡܳܐ ܗ̣ܘܳܐ ܠܰܢ: ܘܒܰܩܒܘ̣ܪܬܶܗ ܢܘ̣ܚܳܡܳܐ ܐܫ̣ܬܰܟܰܢ ܠܰܢ: ܘܰܒܝܰܕ ܡܰܚܰܬܬܶܗ ܕܠܰܫܝܘ̣ܠ ܥܰܠܝ̣ ܠܰܢ: ܘܟܰܕ ܕܡ̣ܶܟ ܒܩܰܒܪܳܐ ܐܰܥܝ̣ܪ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܣܰܒܪܳܐ ܕܡܳܝܘ̣̈ܬܶܐ ܘܢܘ̣ܚܳܡܳܐ ܕܥܰܢܝ̣̈ܕܶܐ: ܗܰܘ̇ ܕܒܳܬܰܪ ܡܰܚܰܬܬܳܟ ܕܡ̣ܶܢ ܩܰܝܣܳܐ: ܐܰܝܟ ܦܘ̣ܩܕܳܢܶܗ ܕܦܝ̣ܠܰܛܘ̣ܣ ܕܰܝܳܢܳܐ ܥܰܘܳܠܳܐ: ܟܰܕ ܫ̣ܶܐܠ ܦܰܓܪܳܟ ܩܰܕܝ̣ܫܳܐ ܝܰܘܣܶܦ ܟܺܐܢܳܐ: ܘܗܰܘ ܢܝ̣ܩܳܘܕܝ̣ܡܘ̣ܣ ܡܰܠܶܦ ܢܳܡܘ̣ܣܳܐ: ܘܰܒܟ̈ܶܬܳܢܶܐ ܟܰܪܟܘ̣ܗ̱ܝ ܘܰܒܡܘ̣ܪܳܐ ܘܥܰܠܘܰܝ ܚܰܢ̣ܛܘ̣ܗ̱ܝ: ܘܰܒܩܰܒܪܳܐ ܐܰܥ̣ܶܠܘ̱ ܣܳܡܘ̣ܗ̱ܝ ܐܰܝܟ ܡܝ̣ܬܳܐ: ܘܰܒܕܘ̣ܟܬܳܐ ܙܥܘ̣ܪܬܳܐ ܕܰܬܠܳܬ ܐܰܡܝ̣̈ܢ ܓܢ̣ܰܝܬ ܐܰܝܟ ܥܰܢܝ̣ܕܳܐ: ܠܰܫܝܘ̣ܠ ܡܰܢ ܒܚܰܝܠܳܟ ܬܰܩܝ̣ܦܳܐ ܐܰܪܥܶܠ̣ܬ: ܘܰܠܓܰܙܰܘ̈ܗ̱ܝ ܕܡܰܘܬܳܐ ܛܪܘ̣ܢܳܐ ܒܬܘ̣ܩܦܳܟ ܒ̣ܰܙܬ: ܠܚܰܣܝ̣ܢܳܐ ܕܰܫܒ̣ܳܗ̇ ܠܳܐܢܫܘ̣ܬܳܐ ܐܰܪܡܝ̣ܬ ܒܰܦܟܳܪ̈ܶܐ: ܠܓܳܠܘ̣ܬܳܐ ܕܰܚ̣ܛܦ ܐܰܥܕܝ̣ܬ ܡ̣ܶܢ ܐܝ̣ܕܰܘ̈ܗ̱ܝ: ܘܰܐܦܢܝ̣ܬ ܠܰܫܒܝ̣ܬܳܐ ܕܰܫܒ̣ܳܐ ܒܡܰܪ̈ܕܘܳܬܳܐ ܐܰܙܝ̣ܥܬ ܒܣܳܚܪ̈ܳܬܳܗ̇: ܘܰܐܚ̣ܪܶܒܬ ܠܫܘ̣ܪ̈ܶܐ ܕܰܡܕܝ̣ܢ̱ܬܳܗ̇ ܕܒܶܠܥ̣ܰܬ݀ ܓܰܢ̱ܒܳܪ̈ܶܐ: ܕܳܫ̣ܬ ܥܰܠ ܨܰܘܪܶܗ ܘܪܰܨܶܨܬ ܪܝ̣ܫܶܗ ܕܗܰܘ̇ ܕܰܠܪܝ̣ܫ ܓܶܢܣܰܢ ܐܰܘܒ̣ܶܕ ܒܰܚܣܳܡܶܗ: ܢܰܦܫܳܟ ܗܳܝ̇ ܕܰܐܫܠܶܡ̣ܬ ܠܡܰܘܬܳܐ: ܠܡܝ̣̈ܬܶܐ ܕܰܫܝܘ̣ܠ ܣܰܒ̣ܰܪܬ ܐ̱ܪܳܙܳܐ ܕܡܰܥܰܠܬܳܟ: ܘܰܠܢܰܦ̈ܫܳܬܳܐ ܗܳܢܶܝ̈ܢ ܕܐܳܦܠܳܐ ܒܝܰܘ̈ܡܰܝ ܢܘ̣ܚ ܩܰܒܶܠ̣ܘ̱ ܠܡܶܬ̣ܬܦܝ̣ܣܳܢܘ̣ܬܳܐ ܝܰܗ̣ܒܬ ܠܰܡܩܰܒܳܠܘ̣ ܗܰܝܡܳܢܘ̣ܬܳܐ ܕܒܳܟ: ܘܡܶܫܬܰܘܕܥܳܢܘ̣ܬܳܐ ܕܰܡܕܰܒܪܳܢܘ̣ܬܳܐ ܕܝ̣ܠܳܟ: ܘܠܳܐ ܦܪܰܫ̣ܬ ܠܰܐܠܳܗܘ̣ܬܳܟ ܡ̣ܶܢ ܦܰܓܪܳܟ ܟܰܕ ܒܩܰܒܪܳܐ ܣܳܡܘ̣ܟ: ܘܠܳܐ ܫܰܢܝܰܬ݀ ܡ̣ܶܢ ܢܰܦܫܳܟ ܟܰܕ ܢܚ̣ܶܬܬ ܠܬܰܚܬܳܝ̈ܳܬܳܗ̇ ܕܐܰܪܥܳܐ: ܡܚܰܝܕܳܐܝ̣ܬ ܐܶܬܥ̣ܰܪܙܰܠܬ ܥܰܡ ܡܰܘܬܳܐ ܒܦܰܓܪܳܐ ܘܰܒܢܰܦܫܳܐ: ܘܳܐܦ ܒܝܰܕ ܢܰܦܫܳܐ ܠܓܰܝܳܣܳܐ ܕܐܰܘܕܝ̣ ܐܰܥܶܠ̣ܬ ܠܦܰܪܕܰܝܣܳܐ ܐܰܟܡܳܐ ܕܐܶܫ̣ܬܰܘܕܝ̣ܬ: ܘܬܰܒ̣ܰܪܬ ܪܘ̣ܡܚܶܗ ܕܰܟܪܘ̣ܒܳܐ ܢܳܛܘ̣ܪܳܐ ܘܰܐܦܢܝ̣ܬܳܝܗ̱ܝ ܠܓܶܢܣܳܐ ܕܰܒܢܰܝ̈ܢܳܫܳܐ ܠܝܳܪܬܘ̣ܬܶܗ ܩܰܕܡܳܝܬܳܐ: ܘܰܫܝܘ̣ܠ ܐܶܬܡ̣ܰܪܡܪܰܬ݀ ܠܘ̣ܩܒܰܠ ܡܰܥܠܳܟ ܐܰܝܟ ܡܶܠܬܶܗ ܕܰܢܒܺܝܳܐ: ܡܝ̣̈ܬܶܐ ܣܓ̣ܶܕܘ̱ ܠܳܟ ܘܫܰܒ̣ܚܘ̣ܟ ܒܦܰܓܪ̈ܰܝܗܽܘܢ ܘܰܒܢܰܦ̈ܫܳܬܗܽܘܢ ܐܰܪܓܶܫ̣ܘ̱ ܒܳܟ: ܛܥܶܡ̣ܬܳܝܗ̱ܝ ܠܡܰܘܬܳܐ ܡܰܪܝ̣ܪܳܐ ܐܰܝܟ ܒܰܪܢܳܫܳܐ: ܘܐܶܫ̣ܬܝ̣ܬܳܝܗ̱ܝ ܠܟܳܣܳܐ ܥܰܙܝ̣ܙܳܐ ܐܰܝܟ ܚܰܠܳܫܳܐ: ܘܡ̣ܶܢ ܗܳܪܟܳܐ ܥܒ̣ܕܬܳܝܗ̱ܝ ܠܰܕܚܝ̣ܠܳܐ ܘܰܡ̇ܠܶܐ̣ ܙܰܘܥܬܳܐ ܘܰܐܥܒ̣ܰܪܬ ܕܶܡܰܥܬܳܐ ܡ̣ܶܢ ܟܽܠ ܐܰܦܝ̣̈ܢ: ܗܳܐ ܚܰܝ̈ܶܐ ܘܡܝ̣̈ܬܶܐ ܡܫܰܒܚܝ̣ܢ ܠܳܟ: ܘܗܳܐ ܟܽܠ ܦܘ̣ܡܝ̣̈ܢ ܒܠܶܫܳܢܰܝ̈ܗܽܘܢ ܙܳܡܪܝ̣ܢ ܠܳܟ: ܫܘ̣ܒܚܳܐ ܠܳܟ ܕܡܝ̣ܬܬ ܘܰܐܚܝ̣ܬܳܢ: ܫܘ̣ܒܚܳܐ ܠܳܟ ܕܰܠܠܳܐ ܡܶܬܚܰܒܠܳܢܘ̣ܬܳܐ ܐܶܬܢܰܚ̣ܰܡܬ ܘܰܗ̣ܘܰܝܬ ܒܘ̣ܟܪܳܐ ܕܡ̣ܶܢ ܒܶܝܬ ܡܝ̣̈ܬܶܐ ܘܪܝ̣ܫܝ̣ܬܳܐ ܕܕܰܡ̈ܟܶܐ: ܘܡܶܛܽܠ ܗܳܕܶܐ ܡܶܬܟܰܫܦܝ̣ܢܰܢ ܠܳܟ ܕܰܬ̣ܫܰܘܙܶܒ ܠܰܢ ܡ̣ܶܢ ܡܰܘܬܳܐ ܬܶܢܝܳܢܳܐ ܕܡܝ̣̈ܬܶܐ ܕܡܳܝ̇ܬܝ̣ܢ ܡ̣ܶܢ ܐܝ̣ܕܰܝ̈ܟ ܡܳܪܝܳܐ: ܘܬܶܦܪܘ̣ܩ ܠܰܢ ܡ̣ܶܢ ܚܒܳܠܳܐ ܕܰܚܛܝ̣ܬܳܐ ܘܡ̣ܶܢ ܨܳܡܰܪܬܳܐ: ܘܰܠܥܰܢܝ̣̈ܕܰܝܢ ܕܰܫܟܶܒܘ̱ ܥܰܠ ܣܰܒܪܳܟ ܒܰܣܶܡ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܕܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܺܝ̣ܫܳܐ ܕܚܰܝ̈ܶܐ ܕܰܗ̣ܘܳܐ ܒܶܝܬ ܡܝ̣̈ܬܶܐ ܐܰܝܟ ܚܰܕ ܡ̣ܶܢ ܥܰܢܝ̣̈ܕܶܐ: ܘܐܰܢܝ̣ܚ ܒܝܰܕ ܡܰܘܬܶܗ ܠܟܽܠܗܽܘܢ ܡܳܝܘ̣̈ܬܶܐ: ܘܶܐܫ̣ܬܰܘܕܝ̣ ܠܗܽܘܢ ܢܘ̣ܚܳܡܳܐ ܘܚܰܝ̈ܶܐ: ܘܒܰܣܶܡ ܐܶܢܽܘܢ ܒܣܰܒܪܳܐ ܒܪܝ̣ܟܳܐ ܕܰܩܝܳܡܬܶܗ: ܢܰܚܶܡ ܡܳܪܝ̱ ܠܥܰܢܝ̣̈ܕܶܐ ܒܰܚܢܳܢܳܟ: ܘܐܰܠܒܶܫ ܐܶܢܽܘܢ ܐܶܣܛܠܳܐ ܫܒܝ̣ܚܬܳܐ ܕܠܳܐ ܡܶܬܚܰܒܠܳܢܘ̣ܬܳܐ: ܘܩܰܒܶܠ ܠܦܝ̣ܪܡܳܐ ܗܳܢܳܐ ܕܡܶܬ̣ܩܰܪܰܒ ܠܳܟ ܒܥܶܕܳܢܳܐ ܗܳܢܳܐ ܚܠܳܦܰܝܗܽܘܢ: ܚܰܘ̈ܒܰܝܗܽܘܢ ܢܶܫ̣ܬܰܒܩܽܘܢ ܒܣܘ̣ܓܳܐܐ ܪܰܒܳܐ ܕܛܰܝܒܘ̣ܬܳܟ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀