ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܕܥܳܡܰܪ ܒܰܡܪ̈ܰܘܡܶܐ ܒܢܘ̣ܗܪܳܐ ܠܳܐ ܡܶܬ̣ܩܰܪܒܳܢܳܐ ܘܠܳܐ ܡܶܣ̣ܬܰܝܟܳܢܳܐ: ܕܰܨܒ̣ܳܐ ܘܰܕܢ̣ܰܚ ܒܬܰܚ̈ܬܳܝܳܬܳܗ̇ ܕܰܐܪܥܳܐ ܠܘܳܬ ܫܟܝ̣̈ܒܶܐ ܡܣܰܝܟܳܐܝ̣ܬ: ܠܗܰܘ̇ ܕܠܳܐ ܐܚ̇ܕܝ̣ܢ ܠܶܗ ܣܰܘ̈ܦܶܐ ܘܦܶܢܝ̈ܳܬܳܐ ܐܰܠܳܗܳܐܝ̣ܬ: ܠܗܰܘ̇ ܕܥܘ̣ܒܶܗ ܕܐܰܒܘ̣ܗ̱ܝ ܒܰܠܚܘ̣ܕ ܣܳܦܶܩ ܠܶܗ: ܥܘ̣ܒܳܗ̇ ܕܰܒܬܘ̣ܠܬܳܐ ܣܦ̣ܰܩ ܠܶܗ ܬܡܝ̣ܗܳܐܝ̣ܬ: ܘܝܰܘܡܳܢܳܐ ܒܥܘ̣ܒܳܐ ܟܡܝ̣ܪܳܐ ܕܰܫܝܘ̣ܠ ܐܰܓ̣ܶܣ ܡܳܝܘ̣ܬܳܐܝ̣ܬ: ܘܛܰܠܳܐ ܕܒܘ̣ܝܳܐܳܐ ܘܰܕܣܰܒܪܳܐ ܥܰܠ ܓܰܪ̈ܡܶܐ ܚܰܪ̈ܝ̣ܒܶܐ ܪܰܣܶܣ̣ ܪܶܚܡܰܬ݀ ܐ̱ܢܳܫܳܐܝ̣ܬ: ܘܚܰܝܰܬ݀ ܡܝ̣̈ܬܶܐ ܐܰܟ̣ܪܶܙ ܒܗܳܡܳܢ ܕܰܩܒܝ̣ܪ̈ܶܐ ܫܰܪܝ̣ܪܳܐܝ̣ܬ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܪܰܡܪܡܺܝ̣ܢܰܢ ܠܳܟ ܐܰܠܳܗܳܐ ܡܶܠܬܳܐ ܒܪܶܗ ܕܰܐܒܳܐ ܓܢܝ̣ܙܳܐ ܗܕܝ̣ܪܳܐܝ̣ܬ: ܕܒܰܪܢܳܫܳܐ ܡܫܰܡܠܝܳܐ ܣܛܰܪ ܡ̣ܶܢ ܚܛܝ̣ܬܳܐ ܗ̣ܘܰܝܬ ܡܶܢܰܢ ܫܰܪܝ̣ܪܳܐܝ̣ܬ: ܡܰܘ̇ܕܶܝܢܰܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܕܰܠܘܳܬܰܢ ܐܰܡܝ̣ܢܳܐܝ̣ܬ: ܕܟܰܕ ܚܰܝܳܐ ܘܡܰܚܝܳܢܳܐ ܐܝ̣ܬܰܝܟ ܟܝܳܢܳܐܝ̣ܬ: ܡܰܘܬܳܐ ܕܰܙܩܝ̣ܦܳܐ ܣܒܰܠ̣ܬ ܥܰܠ ܐܰܦܰܝ̈ܢ ܡܕܰܒܪܳܢܳܐܝ̣ܬ: ܕܠܰܢ ܡ̣ܶܢ ܡܰܘܬܳܐ ܘܣܳܛܳܢܳܐ ܬ̣ܶܦܪܘ̣ܩ ܚܘ̣ܒܳܢܳܐܝ̣ܬ: ܣܳܓ̇ܕܝ̣ܢܰܢ ܠܚܘ̣ܒܳܟ ܕܚܰܒ̣ܫܳܟ ܒܓܰܘ ܩܰܒܪܳܐ ܨܶܒܝܳܢܳܐܝ̣ܬ: ܕܠܰܢ ܡ̣ܶܢ ܒܶܝܬ ܚܒܘ̣ܫܝܳܐ ܕܰܫܝܘ̣ܠ ܬ̣ܰܦܶܩ ܦܳܪܘ̣ܩܳܐܝ̣ܬ: ܡܫܰܒܚܝ̣ܢܰܢ ܠܰܚܢܳܢܳܟ ܕܰܠܒܶܝܬ ܡܝ̣̈ܬܶܐ ܐܰܚܬ̣ܳܟ ܐܰܝܟ ܩܛܝ̣ܠܳܐ ܨܥܝ̣ܪܳܐܝ̣ܬ: ܕܠܰܢ ܚܰܪ̈ܝ̣ܒܰܝ ܡ̣ܶܢ ܡܰܘܬܳܐ ܬܶܣ̣ܥܘ̣ܪ ܘܬܰܚ̣ܶܐ ܐܰܠܳܗܳܐܝ̣ܬ: ܡܩܰܠܣܝ̣ܢܰܢ ܠܪ̈ܰܚܡܰܝܟ ܕܰܐܪܟ̣ܢܘ̣ܟ ܨܶܝܕ ܐܳܕܳܡ ܕܰܥܓܝ̣ܢ ܗ̱ܘܳܐ ܒܚ̈ܶܙܶܝܗ̇ ܕܰܫܝܘ̣ܠ ܡܰܪܝ̣ܪܳܐܝ̣ܬ: ܕܠܶܗ ܘܰܠܝܰܠ̈ܕܰܘܗ̱ܝ ܬ̣ܕܰܠܶܐ ܡ̣ܶܢ ܛܘ̣ܒܳܥܳܐ ܕܰܒܗܳܡܳܢ ܬܰܚܬܳܝ̇ܬܳܐ ܡܪܰܚܡܳܢܳܐܝ̣ܬ: ܡܰܘܪܒܝ̣ܢܰܢ ܠܪܰܒܘ̣ܬ ܛܰܝ̈ܒܘܳܬܳܟ ܕܠܰܫܒܝ̣ܬܰܢ ܕܡ̣ܶܢ ܕܳܪܕܳܪ̈ܝ̣ܢ ܨܒ̣ܰܝܬ ܕܬܰܥ̣ܕܶܐ ܡ̣ܶܢ ܐܝ̣̈ܕܰܝ ܫܰܒܳܝܳܐ ܡܦܰܨܝܳܢܳܐܝ̣ܬ: ܐܰܝܟ ܓܳܫܘ̣ܫܳܐ ܥܰܠ̣ܬ ܠܰܡܕܝ̣ܢܰܬ݀ ܡܰܘܬܳܐ ܡܰܛܥܝܳܢܳܐܝ̣ܬ ܘܡ̣ܶܢ ܒܶܝܬ ܫܶܢܰܘ̈ܗ̱ܝ ܐܰܗܦܶܟ̣ܬ ܠܓܶܢܣܰܢ ܘܠܶܗ ܩܛܰܠ̣ܬ ܘܐܰܘܒ̣ܶܕܬ: ܘܠܰܡܕܝ̣ܢ̱ܬܶܗ ܣܰܪܶܩ̣ܬ ܟܽܠܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܟܰܕ ܡܳܪܳܐ ܘܐܰܠܳܗܳܐ ܕܥܰܠ ܟܽܠ ܐܝ̣ܬܰܝܟ ܡ̣ܶܢ ܥܰܒ̈ܕܶܐ ܡܳܪ̈ܘ̣ܕܶܐ ܚܰܫ̈ܶܐ ܘܡܰܘܬܳܐ ܣܒܰܠ̣ܬ ܨܶܒܝܳܢܳܐܝ̣ܬ: ܘܠܰܢ ܡ̣ܶܢ ܚܰܫ̈ܶܐ ܨܥܝ̣ܪ̈ܶܐ ܘܡܰܘܬܳܐ ܕܰܚܛܝ̣ܬܳܐ ܒܡܰܘܬܳܟ ܡܰܥܒܶܕ ܚܰܝ̈ܶܐ ܫܰܘܙܶܒ̣ܬ ܪܶܚܡܰܬ݀ ܐ̱ܢܳܫܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܢܘ̣ܗܪܳܐ ܐܰܝܟ ܡܰܪܛܘ̣ܛܳܐ ܡܥܰܛܰܦ ܐܰܢ̱ܬ ܐܰܠܳܗܳܐܝ̣ܬ: ܡ̣ܶܢ ܝܰܘܣܶܦ ܨܒ̣ܰܝܬ ܘܰܫܦ̣ܰܪ ܠܳܟ ܕܬܶܬ̣ܥܰܦܶܐ ܒܟ̈ܶܬܳܢܶܐ ܘܰܒܣܘ̣̈ܛܡܶܐ ܛܰܝܒܘ̣ܬܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܡܰܪܟܰܒܬܳܐ ܬܡܝ̣ܗܰܬ݀ ܕܶܡ̈ܘܳܬܳܐ ܒܕܶܚܠܳܐ ܡܙܰܝܚܳܐ ܠܳܟ ܐܰܠܳܗܳܐܝ̣ܬ: ܘܩܰܒܪܳܐ ܢܩܝ̣ܪ ܒܫܘ̣ܥܳܐ ܐܰܚ̣ܕܳܟ ܕܰܨܒ̣ܳܐ ܨܶܒܝܳܢܳܟ ܦܰܓܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܒܪܝ̣ܬܳܐ ܟܽܠܳܗ̇ ܒܙܶܪܬܳܟ ܣܝ̣ܡܳܐ ܘܰܠܟܽܠ ܐܰܚܝ̣ܕ ܐܰܢ̱ܬ ܙܗܝ̣ܪܳܐܝ̣ܬ: ܘܰܬܚܝܶܬ ܛܰܒ̈ܥܶܐ ܘܢܳܛܘ̣ܪ̈ܶܐ ܨܒ̣ܰܝܬ ܘܐܶܬܚܒ̣ܶܫܬ ܡ̣ܶܢ ܨܳܠܘ̣̈ܒܶܐ ܕܚܝ̣ܠܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܬܘ̣ܩܦܳܟ ܡܰܪܗܶܒ ܠܥܰܫܝ̣̈ܢܶܐ ܙܝ̣ܥܳܐܝ̣ܬ: ܘܰܐܝܟ ܡܡܰܚܝܳܐ ܘܰܩܛܝ̣ܠܳܐ ܐܶܬܥܰܪܙܰܠ̣ܬ ܥܰܡ ܡܰܘܬܳܐ ܘܣܳܛܳܢܳܐ ܘܰܙܟ̣ܰܝܬ ܐܶܢܽܘܢ ܓܰܢ̱ܒܳܪܳܐܝ̣ܬ: ܘܠܰܢ ܡܚܝ̣̈ܠܶܐ ܘܬܰܚܘ̣̈ܒܶܐ ܐܰܩܢܝ̣ܬ ܚܰܝܠܳܐ ܘܙܳܟܘ̣ܬܳܐ ܡܥܰܕܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܒܰܩܢܘ̣ܡܳܟ ܨܶܝܕ ܐܳܕܳܡ ܪܰܡܝܳܐ ܢܚܶܬ̣ܬ ܚܰܝܘ̣ܣܬܳܢܳܐܝ̣ܬ: ܘܠܘ̣ܒܳܒܳܐ ܘܒܘ̣ܝܳܐܳܐ ܘܣܰܒܪܳܐ ܛܳܒܳܐ ܐܰܩܢܝ̣ܬܳܝܗ̱ܝ ܚܰܒܝ̣ܒܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܟܺܐܢ̈ܶܐ ܘܙܰܕܝ̣̈ܩܶܐ ܕܡ̣ܶܢ ܥܳܠܰܡ ܚܰܕܝ̣ܬ ܒܰܫܝܘ̣ܠ ܟܢܝ̣ܫܳܐܝ̣ܬ: ܘܚܰܘܝ̣ܬ ܠܗܽܘܢ ܚܰܫܰܝ̈ܟ ܕܰܚܠܳܦ ܟܽܠܶܗ ܥܳܠܡܳܐ ܓܶܠܝܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܐܳܦ ܠܡܘ̣ܫܶܐ ܘܠܰܢܒܺܝ̈ܶܐ ܐܰܦܨܰܚ̣ܬ ܓܡܝ̣ܪܳܐܝ̣ܬ: ܕܠܰܐܝܠܶܝܢ ܕܰܥܠܰܝܟ ܒܰܕܶܩ̣ܘ̱ ܓܡ̣ܰܪܬ ܒܰܩܢܘ̣ܡܳܟ ܡܫܰܡܠܝܳܐܝ̣ܬ: ܠܕܰܘܝ̣ܕ ܥܰܠ ܨܶܨܰܝ̈ܟ ܘܥܰܠ ܢܰܚܬܰܝ̈ܟ ܘܥܰܠ ܚܰܠܳܐ ܘܰܡܪܳܪܳܐ ܘܫܰܪܟܳܐ ܐܰܘܕܰܥ̣ܬ ܬܗܝ̣ܪܳܐܝ̣ܬ: ܘܠܶܐܫܰܥܝܳܐ ܥܰܠ ܪܘ̣ܩܳܐ ܘܢܶܓ̈ܕܶܐ ܘܫܘ̣ܩܳܦ ܦܰܟ̈ܶܐ ܒܰܕܶܩ̣ܬ ܬܡܝ̣ܗܳܐܝ̣ܬ: ܠܡܽܘܫܶܐ ܥܰܠ ܦܫܳܛܳܐ ܕܐܝ̣ܕܰܝ̈ܟ ܘܕܰܐܝܟ ܚܶܘܝܳܐ ܐܶܬ̣ܬܪܝ̣ܡܬ ܥܰܠ ܩܰܝܣܳܐ ܢܰܗ̣ܰܪܬ ܡܥܰܠܝܳܐܝ̣ܬ: ܘܠܰܐ̱ܚܪܺܢܳܐ ܥܰܠ ܕܩܳܪܳܟ ܕܰܒܠܘ̣ܟܳܝܬܳܐ ܘܰܠܫܰܪܟܳܐ ܡܶܛܽܠ ܟܽܠܗܶܝܢ ܡܰܚ̈ܘܳܬܳܟ ܚܰܘܝ̣ܬ ܢܰܗܝ̣ܪܳܐܝ̣ܬ: ܘܗܳܟܰܢܳܐ ܠܟܽܠܗܽܘܢ ܡܝ̣̈ܬܶܐ ܣܰܒ̣ܰܪܬ ܥܰܠ ܚܰܝܰܬ݀ ܡܝ̣̈ܬܶܐ ܕܰܠܗܽܘܢ ܡܫܰܟܶܢ ܐܰܢ̱ܬ ܠܳܐ ܡܳܝܘ̣ܬܳܐܝ̣ܬ: ܚܢܰܢ ܕܶܝܢ ܡܳܪܝ̱ ܗܳܢܽܘܢ ܕܰܐܘܕܝ̣ܢܰܢ ܒܚܰܫܰܝ̈ܟ ܘܒܰܨܠܝ̣ܒܳܟ ܘܰܒܡܘ̣ܟܳܟܳܟ ܠܳܐ ܦܠܝ̣ܓܳܐܝ̣ܬ: ܐܶܠܳܐ ܚܰܕ ܝܳܕ̇ܥܝ̣ܢܰܢ ܠܳܟ ܒܰܡܪ̈ܰܘܡܶܐ ܘܥܰܠ ܐܰܪܥܳܐ: ܘܰܒܥܘ̣ܒܶܗ ܕܐܰܒܘ̣ܟ ܒܩܰܒܪܳܐ ܘܨܶܝܕ ܥܰܢܝ̣̈ܕܶܐ ܚܕܳܢܳܐܝ̣ܬ ܘܝ̣ܚܝ̣ܕܳܐܝ̣ܬ: ܒܳܥܶܝܢܰܢ ܡܶܢܳܟ ܒܗܳܢܳܐ ܝܰܘܡܳܐ ܕܥܰܕܥܺܐܕܳܟ ܕܡܰܘܬܳܐ ܡܰܥܒܶܕ ܚܰܝ̈ܶܐ ܚܢܝ̣ܓܳܐܝ̣ܬ ܕܠܳܐ ܬ̣ܶܟܦܘ̣ܪ ܒܰܢ ܩܕܳܡ ܐܰܒܘ̣ܟ ܡܶܛܽܠ ܕܠܳܐ ܟܦ̣ܰܪܢܰܢ ܒܰܐܠܳܗܘ̣ܬܳܟ ܡܬܘ̣ܡܳܐܝ̣ܬ: ܘܠܳܐ ܬܶܡ̣ܢܶܐ ܠܰܢ ܥܰܡ ܛܳܠܡ̈ܰܝ ܠܰܚܕܳܝܘ̣ܬܳܟ ܣܰܟܠܳܐܝ̣ܬ: ܡܶܛܽܠ ܕܠܳܐ ܛܠܰܡ̣ܢܰܢ ܠܐ̱ܢܳܫܘ̣ܬܳܟ ܥܘܝ̣ܪܳܐܝ̣ܬ: ܐܶܠܳܐ ܗܰܒܠܰܢ ܘܐܰܫܘܳܐ ܠܰܢ ܘܰܠܥܰܢܝ̣̈ܕܰܝܢ ܟܢܝ̣ܫܳܐܝ̣ܬ: ܘܰܐܝܟ ܕܚܰܫ̣ܢܰܢ ܒܚܰܫܳܟ ܚܘܝ̣ܚܳܐܝ̣ܬ ܢܶܚ̇ܕܶܐ ܒܰܩܝܳܡܬܳܟ ܣܒܝ̣ܣܳܐܝ̣ܬ: ܘܰܐܝܟ ܕܣܰܒ̣ܰܪܢܰܢ ܒܦܘ̣ܪܩܳܢܳܟ ܬܟܝ̣ܠܳܐܝ̣ܬ ܢܶܫ̣ܬܰܟܢܽܘܢ ܠܰܢ ܪ̈ܰܚܡܰܝܟ ܘܰܚܢܳܢܳܟ ܫܦܝ̣ܥܳܐܝ̣ܬ: ܘܰܐܝܟ ܕܐܰܘܕܝ̣ܢܰܢ ܒܳܟ ܘܒܰܐܒܘ̣ܟ ܘܰܒܪܘ̣ܚܳܟ ܩܰܕܝ̣ܫܳܐ ܬܠܝ̣ܬܳܐܝ̣ܬ ܘܰܚܕܳܢܳܐܝ̣ܬ: ܘܰܐܘܕܳܐ ܒܰܢ ܩܕܳܡܰܘܗ̱ܝ ܘܰܩܕܳܡ ܡܰܠܰܐܟܰܝ̈ܟ ܡܩܰܠܣܳܢܳܐܝ̣ܬ: ܐܰܝܟܰܢܳܐ ܕܥܰܡ ܓܰܝܳܣܳܐ ܕܡ̣ܶܢ ܝܰܡܝ̣ܢܳܟ ܢ̇ܰܣܶܩ ܠܳܟ ܫܘ̣ܒܚܳܐ ܦܨܝ̣ܚܳܐܝ̣ܬ: ܘܬܰܘܕܝ̣ܬܳܐ ܠܳܐ ܫܰܠܘܳܐܝ̣ܬ ܘܩܘ̣ܠܳܣܳܐ ܐܰܡܝ̣ܢܳܐܝ̣ܬ ܘܪܘ̣ܡܪܳܡܳܐ ܠܳܐ ܫܰܬܘ̣ܩܳܐܝ̣ܬ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܫܰܘܝܳܐܝ̣ܬ: ܗܳܪܟܳܐ ܘܰܒܥܳܠܡܳܐ ܕܰܥܬܝ̣ܕ ܚܳܕܝܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀