ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܝܳܐ ܘܡܰܚܝܳܢܳܐ ܕܰܠܚܘ̣ܕܳܐܝ̣ܬ ܐܝ̣ܬ ܠܶܗ ܠܳܐ ܡܳܝܘ̣ܬܘ̣ܬܳܐ: ܘܠܳܐ ܡܶܬܚܰܒܠܳܢܘ̣ܬܳܐ ܒܰܟܝܳܢܶܗ: ܘܥܰܠ ܕܐܶܬܒܰܣ̣ܰܪ ܒܚܘ̣ܒܶܗ ܐܶܬܥ̣ܰܪܙܰܠ ܥܰܡ ܡܰܘܬܳܐ ܚܠܝ̣ܨܳܐܝ̣ܬ: ܘܬܰܒ̣ܪܶܗ ܠܥܘ̣ܩܣܶܗ ܘܠܰܡܕܝ̣ܢ̱ܬܶܗ ܐܰܚ̣ܪܶܒ ܘܒ̣ܰܙ ܒܚܰܝܠܬܳܢܘ̣ܬܶܗ ܘܠܰܐܣܝ̣ܪ̈ܶܐ ܐܰܦ̣ܶܩ: ܘܣܰܒܪܳܐ ܕܢܘ̣ܚܳܡܳܐ ܡ̣ܠܳܐ ܐܶܢܽܘܢ: ܘܠܘ̣ܒܳܒܳܐ ܒܰܩܝܳܡܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܰܒܡܰܘܬܳܟ ܡܰܥܒܶܕ ܚܰܝ̈ܶܐ ܘܒܰܩܒܘ̣ܪܬܳܟ ܡܰܚܝܳܢܝ̣ܬܳܐ ܣܰܒܪܳܐ ܛܳܒܳܐ ܘܫܘ̣ܘܕܳܥܳܐ ܕܚܰܝܰܬ݀ ܡܝ̣̈ܬܶܐ ܘܒܘ̣ܛܳܠܶܗ ܕܡܰܘܬܳܐ ܒܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܠܳܟ ܙܪܰܥ̣ܬ ܒܢܰܦ̈ܫܳܬܰܢ: ܘܥܰܠ ܗܳܕܶܐ ܠܝܰܘܡܳܐ ܗܳܢܳܐ ܪܰܒܳܐ ܕܰܩܒܘ̣ܪܬܳܟ ܐܰܘܟܝ̣ܬ ܡܰܚܰܬܬܳܟ ܕܠܰܫܝܘ̣ܠ ܬܠܝ̣ܬܳܝܰܬ݀ ܝܰܘ̈ܡܶܐ: ܡܫܰܒܚܝ̣ܢܰܢ ܘܡܰܘܪܒܝ̣ܢܰܢ ܘܫܘ̣ܒܚܳܐ ܕܡܶܬ̣ܬܚܝ̣ܒ ܠܡܳܪܘ̣ܬܳܟ ܡܰܣܩܝ̣ܢܰܢ ܟܰܕ ܐܳܡ̇ܪܝ̣ܢܰܢ: ܫܘ̣ܒܚܳܐ ܠܳܟ ܐܰܠܳܗܳܐ ܡܶܠܬܳܐ ܕܚܘ̣ܒܳܟ ܐܰܝܬ̣ܝܳܟ ܠܣܘ̣ܪܳܩܳܐ ܨܶܒܝܳܢܳܝܳܐ ܕܰܚܠܳܦܰܝܢ: ܫܘ̣ܒܚܳܐ ܠܳܟ ܒܪܳܐ ܡܬܘ̣ܡܳܝܳܐ ܕܐܰܒܳܐ ܕܰܚܢܳܢܳܟ ܥܰܒ̣ܕܳܟ ܒܰܪܢܳܫܳܐ ܡܶܛܽܠ ܦܘ̣ܪܩܳܢܰܢ: ܫܘ̣ܒܚܳܐ ܠܳܟ ܓܢܝ̣ܙܳܐ ܘܰܡܥܰܠܝܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ ܐܰܥܶܠ̣ܬܳܟ ܠܒܶܝܬ ܕܝ̣ܢܳܐ ܡܶܛܽܠ ܚܘ̣ܪܳܪܰܢ: ܫܘ̣ܒܚܳܐ ܠܳܟ ܕܰܝܳܢܳܐ ܕܕܰܝ̈ܳܢܶܐ ܕܛܰܝܒܘ̣ܬܳܟ ܐܰܩܝ̣ܡܬܳܟ ܒܶܝܬ ܕܝ̣ܢܳܐ ܡܶܛܽܠ ܚܰܝܳܒܘ̣ܬܰܢ: ܫܘ̣ܒܚܳܐ ܠܳܟ ܗܕܝ̣ܪ ܒܫܘ̣ܒܚܶܗ: ܘܬܶܫܒܘ̣ܚܬܳܐ ܠܰܫܡܳܟ ܕܪ̈ܰܚܡܰܝܟ ܥܰܒ̣ܕܘ̣ܟ ܚܰܝܳܒ ܠܡܰܘܬܳܐ ܡܶܛܽܠ ܫܘ̣ܘܙܳܒܰܢ: ܫܘ̣ܒܚܳܐ ܠܳܟ ܙܰܕܝ̣ܩܳܐ ܘܰܬܪܝ̣ܨܳܐ ܕܚܰܘܝ̣ܬ ܚܰܝܠܳܐ ܕܓܰܢ̱ܒܳܪܘ̣ܬܳܟ ܒܥܘ̣ܠܝܳܟ ܕܥܰܠ ܨܠܝ̣ܒܳܐ: ܫܘ̣ܒܚܳܐ ܠܳܟ ܛܳܒܳܐ ܘܛܘ̣ܒܬܳܢܳܐ ܕܝܰܗ̣ܒܬ ܠܓܰܝܳܣܳܐ ܩܠܝ̣̈ܕܶܐ ܕܓܰܢܰܬ݀ ܚܰܕ̈ܘܳܬܳܐ ܦܘ̣ܪܥܳܢ ܗܰܝܡܳܢܘ̣ܬܶܗ ܡܫܰܒܰܚܬܳܐ: ܫܘ̣ܒܚܳܐ ܠܳܟ ܟܘ̣ܡܪܳܐ ܕܰܫܪܳܪܳܐ ܘܪܝ̣ܫ ܟܘ̣ܡܪ̈ܶܐ ܕܩܘ̣ܫܬܳܐ: ܕܠܰܐܒܘ̣ܟ ܪܰܥܝ̣ܬ ܒܕܶܒܚܳܟ ܪܰܒܳܐ ܕܥܰܠ ܐܰܦܰܝ̈ܢ: ܫܘ̣ܒܚܳܐ ܠܳܟ ܡܳܪܶܗ ܕܡܰܘܬܳܐ ܘܡܰܦܩܳܢܳܐ: ܕܰܢܚ̣ܶܬܬ ܒܝܰܕ ܢܰܦܫܳܟ ܠܰܫܝܘ̣ܠ ܒܳܠܰܥܬܳܐ ܘܐܰܟ̣ܪܶܙܬ ܒܳܗ̇ ܢܘ̣ܚܳܡܳܐ ܘܣܰܒܪܳܐ ܫܰܪܝ̣ܪܳܐ ܠܡܳܝܘ̣̈ܬܶܐ: ܫܘ̣ܒܚܳܐ ܠܳܟ ܣܰܒܪܳܐ ܘܣܘ̣ܟܳܝܳܐ ܕܥܰܡ̱̈ܡܶܐ ܕܥܰܠ̣ܬ ܠܬܰܘ̈ܘܳܢܶܐ ܚܶܫܘ̣̈ܟܳܝܶܐ ܕܬܰܚ̈ܬܳܝܳܬܳܗ̇ ܕܐܰܪܥܳܐ ܘܰܐܢܗ̣ܰܪܬ ܠܗܳܢܽܘܢ ܕܬܰܡܳܢ ܒܕܘ̣ܘܳܢܳܐ ܪܡܶܝܢ ܗ̱ܘܰܘ: ܫܘ̣ܒܚܳܐ ܠܳܟ ܦܳܪܘ̣ܩܶܗ ܕܓܶܢܣܰܢ ܕܨܶܡܚܳܟ ܫܒܝ̣ܚܳܐ ܕܢܰܚ̣ ܥܰܠ ܢܰܦ̈ܫܳܬܳܐ ܥܓܝ̣̈ܢܳܬܳܐ ܘܰܐܦ̣ܨܰܚ ܐܶܢܶܝܢ: ܫܘ̣ܒܚܳܐ ܠܳܟ ܩܝܳܡܬܳܐ ܘܚܰܝ̈ܶܐ ܕܟܽܠ ܢܰܦ̈ܠܶܐ: ܕܪܰܡܪܶܡ̣ܬ ܡ̣ܶܢ ܚܒܳܠܳܐ ܠܳܐܕܳܡ ܘܰܠܝܰܠ̈ܕܰܘܗ̱ܝ ܒܝܰܕ ܩܒܘ̣ܪܬܳܟ ܬܠܝ̣ܬܳܝܰܬ݀ ܝܰܘ̈ܡܶܐ ܕܰܫ̣ܪܳܬ݀ ܠܰܚܒܳܠܳܐ ܕܰܒܩܰܒܪ̈ܶܐ: ܫܘ̣ܒܚܳܐ ܠܳܟ ܫܰܝܢܳܐ ܫܡܰܝܳܢܳܐ ܕܰܬܪܰܥ̣ܬ ܒܬܘ̣ܩܦܳܟ ܠܫܘ̣ܪ̈ܶܝܗ̇ ܥܰܫܝ̣̈ܢܶܐ ܕܰܡܕܝ̣ܢܰܬ݀ ܡܰܘܬܳܐ ܘܰܥܒ̣ܰܕܬܳܗ̇ ܕܝܳܫܳܐ ܠܰܒܢܰܝ̈ܢܳܫܳܐ ܡܳܝܘ̣̈ܬܶܐ ܒܛܰܝܒܘ̣ܬܳܟ: ܘܥܰܠ ܗܳܕܶܐ ܡܶܬ̣ܟܰܫܦܝ̣ܢܰܢ ܠܳܟ ܐܰܠܳܗܳܐ ܕܝ̣ܠܰܢ ܛܳܒܳܐ ܘܙܰܟܳܝܳܐ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܝ̣ܫܳܐ ܕܰܩܒܘ̣ܪܬܳܟ ܡܳܪܳܢܳܝܬܳܐ ܕܐܝ̣ܬܶܝܗ̇ ܡܣܰܒܪܳܢܝ̣ܬܳܐ ܕܰܩܝܳܡܬܳܐ ܐܰܠܳܗܳܝܬܳܐ: ܘܡܰܚܪܒܳܢܝ̣ܬܳܐ ܕܰܫܝܘ̣ܠ ܘܣܳܚܘ̣ܦܬܳܐ ܕܒܝ̣ܫܳܐ ܘܰܕܡܰܘܬܳܐ: ܚܠܳܦ ܟܽܠܳܗ̇ ܐܘ̣ܡܬܳܐ ܘܝܳܪܬܘ̣ܬܳܐ ܕܝ̣ܠܳܟ ܕܰܦܪܰܩ̣ܬ ܒܚܰܫܰܝ̈ܟ ܣܓܝ̣̈ܕܶܐ: ܘܰܐܚܝ̣ܬ ܒܡܰܘܬܳܟ ܡܰܥܒܶܕ ܚܰܝ̈ܶܐ ܘܰܙܒܰܢ̣ܬ ܒܰܕܡܳܟ ܝܰܩܝ̣ܪܳܐ: ܕܰܬ̣ܩܰܒܶܠ ܡܶܢܰܢ ܒܨܝ̣ܪ̈ܶܐ ܘܚܰܛܳܝ̈ܶܐ ܠܒܳܥܘ̈ܳܬܳܐ ܘܬܰܟܫ̈ܦܳܬܳܐ ܕܩܰܪܶܒ̣ܢܰܢ ܠܳܟ: ܘܬܶܫܡ̈ܫܳܬܳܐ ܘܫܰܗܪ̈ܶܐ ܘܰܨܠܰܘ̈ܳܬܳܐ ܘܩܰܘ̈ܡܶܐ ܘܒܳܥܘ̈ܳܬܳܐ ܕܠܰܝ̈ܠܰܝ ܐܝ̣ܡܳܡ ܕܰܒܝܰܘ̈ܡܳܬܳܐ ܗܳܠܶܝܢ ܫܰܡ̣ܠܝ̣ܢܰܢ ܩܕܳܡ ܪܰܒܘ̣ܬܳܟ: ܟܰܕ ܡܰܫܦܰܥ ܐܰܢ̱ܬ ܥܰܠ ܟܽܠܰܢ ܟܢܝ̣ܫܳܐܝ̣ܬ: ܪ̈ܝ̣ܫܰܝ ܟܳܗ̈ܢܶܐ ܘܟܳܗ̈ܢܶܐ ܘܰܡܫܰܡ̈ܫܳܢܶܐ: ܡܰܠ̈ܟܶܐ ܕܶܝܢ ܘܪ̈ܝ̣ܫܳܢܶܐ: ܘܕܰܝ̈ܳܢܶܐ ܥܰܬܝ̣ܪ̈ܶܐ ܘܡܶܣ̈ܟܺܢܶܐ ܘܣܳܒ̈ܶܐ ܘܰܥܠܰܝ̈ܡܶܐ: ܓܰܒܪ̈ܶܐ ܘܢ̈ܶܫܶܐ ܓܰܕܘ̣̈ܕܶܐ ܟܝ̣ܬ ܘܫܰܒܪ̈ܶܐ: ܝ̣ܚܝ̣̈ܕܳܝܶܐ ܘܕܰܝܪ̈ܳܝܶܐ ܥܳܢܘ̈ܳܝܶܐ ܘܰܒܬܘ̣̈ܠܶܐ: ܟܽܠܗܶܝܢ ܛܰܝ̈ܒܘܳܬܳܟ ܫܦܝ̣̈ܥܳܬܳܐ ܘܡܰܘܗ̈ܒܳܬܳܐ ܥܰܬܝ̣ܪ̈ܳܬܳܐ: ܟܰܕ ܡܫܰܟܶܢ ܐܰܢ̱ܬ ܒܰܒܛܝ̣ܠܘ̣ܬܳܐ ܕܪ̈ܰܚܡܰܝܟ: ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ ܚܘ̣ܠܡܳܢܳܐ: ܠܰܐܒܝ̣̈ܠܶܐ ܘܰܡܥ̈ܳܩܶܐ ܒܘ̣ܝܳܐܳܐ: ܠܟܰܦ̈ܢܶܐ ܘܠܰܨܪ̈ܝ̣ܟܶܐ ܬܘ̣ܪܣܳܝܳܐ: ܠܛܳܥܰܝ̈ܳܐ ܘܠܰܐܒܝ̣̈ܕܶܐ ܦܘ̣ܢܳܝܳܐ: ܠܪ̈ܰܚܝ̣ܩܶܐ ܘܩܰܪ̈ܝ̣ܒܶܐ ܢܘ̣ܛܳܪܳܐ: ܠܰܪ̈ܓܝ̣ܙܶܐ ܘܰܐܟ̈ܬܳܢܶܐ ܡܫܰܝܢܘ̣ܬܳܐ: ܠܰܛܠܝ̣̈ܡܶܐ ܘܠܰܥܠܝ̣̈ܒܶܐ ܪܘܳܚܬܳܐ: ܠܚܰܛܳܝ̈ܶܐ ܘܡܰܣܟ̈ܠܳܢܶܐ ܫܘ̣ܒܩܳܢܳܐ: ܠܥܺܕ̈ܳܬܳܟ ܘܰܠܕܰܝܪ̈ܳܬܳܟ ܩܰܕܝ̣̈ܫܳܬܳܐ ܗܳܠܶܝܢ ܕܰܬܪܝ̣ܨܘ̣ܬ ܫܘ̣ܒܚܳܐ ܕܗܰܝܡܳܢܘ̣ܬܳܐ ܘܰܕܬܰܘܕܝ̣ܬܳܐ ܫܠܝ̣ܚܳܝ̇ܬܳܐ ܒܗܶܝܢ ܡܶܬ̣ܟܰܪܙܳܐ ܫܰܝܢܳܐ ܘܰܫܠܳܡܳܐ ܘܐܰܘܝܘ̣ܬܳܐ: ܟܰܕ ܡܰܥܒܰܪ ܐܰܢ̱ܬ ܡܶܢܗܶܝܢ ܘܡ̣ܶܢ ܟܽܠܳܗ̇ ܥܳܡܰܪܬܳܐ ܣܶܕ̈ܩܶܐ ܘܚܶܪ̈ܝܳܢܶܐ ܘܟܽܠܗܶܝܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ: ܘܰܠܝܰܠ̈ܕܰܝܗܶܝܢ ܢܰܛܰܪ ܡ̣ܶܢ ܒܝ̣ܫܳܐ ܘܡ̣ܶܢ ܟܽܠܗܶܝܢ ܨܶܢܥ̈ܳܬܶܗ: ܘܐܰܫܘܳܐ ܠܰܢ ܬܘ̣ܒ ܒܰܚܢܳܢܳܟ ܕܰܒܠܶܒܳܐ ܕܰܟܝܳܐ ܘܪܶܥܝܳܢܳܐ ܫܰܦܝܳܐ ܢ̇ܥܰܦܶܩ ܠܰܚ̈ܕܳܕܶܐ ܒܢܘ̣̈ܫܩܳܬܳܐ ܩܰܕܝ̣̈ܫܳܬܳܐ ܘܚܘ̣ܒܳܐ ܓܡܝ̣ܪܳܐ ܕܝܳܐܶܐ ܠܰܩܝܳܡܬܳܐ ܕܝ̣ܠܳܟ ܡܫܰܒܰܚܬܳܐ: ܘܠܰܢ ܘܠܰܐܒܳܗܰܝ̈ܢ ܘܠܰܐܚܰܝ̈ܢ ܘܰܠܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܝ̣̈ܕܰܝܢ ܡܗܰܝܡ̈ܢܶܐ ܐܰܫܘܳܐ ܠܰܩܝܳܡܬܳܐ ܦܳܪܘ̣ܩܳܝ̇ܬܳܐ: ܘܰܠܓܰܠܝܘ̣ܬ ܐܰܦ̈ܶܐ ܕܰܩܕܳܡܰܝܟ ܘܰܠܒܘ̣ܣܳܡܳܐ ܕܡ̣ܶܢ ܝܰܡܝ̣ܢܳܟ: ܒܡܰܠܟܘ̣ܬܳܟ ܝܶܫܘ̣ܥ ܡܫܝ̣ܚܳܐ ܡܳܪܰܢ: ܕܢ̇ܰܣܶܩ ܠܳܟ ܫܘ̣ܒܚܳܐ ܒܚܰܕܘ̣ܬܳܐ: ܘܬܰܘܕܝ̣ܬܳܐ ܒܰܦܨܝ̣ܚܘ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀

ܥܶܛܪܳܐ

ܡܪܰܡܪܡܺܝ̣ܢܰܢ ܠܡܰܘܬܳܐ ܕܝ̣ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܒܶܗ ܐܶܙ̣ܕܟܝ̣ ܘܐܶܬ̣ܚܰܝܰܒ ܡܰܘܬܰܢ: ܡܩܰܠܣܝ̣ܢܰܢ ܠܢܘ̣ܚܳܡܳܐ ܕܝ̣ܠܳܟ: ܕܒܶܗ ܐܰܥ̣ܕܝ̣ܬܳܢ ܡ̣ܶܢ ܦܘ̣ܡܳܗ̇ ܕܰܫܝܘ̣ܠ ܒܳܠܰܥܬܳܐ: ܘܦܝ̣ܪܡܰܢ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ: ܢ̣ܶܬܩܰܒܰܠ ܒܐܝ̣̈ܕܰܝܟ ܠܘܳܬ ܫܳܠܘ̣ܚܳܟ: ܘܡܶܬ̣ܟܰܫܦܝ̣ܢܰܢ ܠܳܟ ܕܟܰܕ ܠܒܝ̣ܫܝ̣ܢܰܢ ܫܪܳܪܳܐ ܕܗܰܝܡܳܢܘ̣ܬܳܐ ܕܝ̣ܠܳܟ: ܘܐܝ̣ܬ ܨܶܝܕܰܝܢ ܥ̱ܘ̣ܗܕܳܢܶܗ ܕܚܘ̣ܒܳܟ ܡܫܰܡܠܝܳܐ: ܢܰܘ̇ܕܶܐ ܠܳܟ ܘܰܢ̇ܫܰܒܚܳܟ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀