ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܕܡ̣ܶܢ ܡܰܘܬܶܗ ܚܰܝ̈ܶܐ ܕܢܰܚ̣ ܠܰܢ: ܘܡ̣ܶܢ ܐ̱ܢܳܫܘ̣ܬܶܗ ܐܰܠܳܗܘ̣ܬܳܐ ܩܢ̣ܰܝܢܰܢ: ܘܡ̣ܶܢ ܡܘ̣ܟܳܟܶܗ ܪܘ̣ܡܪܳܡܳܐ ܗ̣ܘܳܐ ܠܰܢ: ܘܡ̣ܶܢ ܩܒܘ̣ܪܬܶܗ ܢܘ̣ܚܳܡܳܐ ܐܶܫ̣ܬܰܟܰܢ ܠܰܢ: ܘܰܒܡܰܚܰܬܬܶܗ ܕܠܰܫܝܘ̣ܠ ܥܰܠܝ̣ ܠܰܢ: ܘܟܰܕ ܕܡ̣ܶܟ ܒܩܰܒܪܳܐ ܐܰܥܝ̣ܪ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܰܒܝܰܕ ܕܡܳܟ ܝܰܩܝ̣ܪܳܐ ܠܥܺܕܬܳܟ ܩܰܝܶܡ̣ܬ: ܘܰܒܝܰܕ ܚܰܫܰܝ̈ܟ ܠܠܳܐ ܚܳܫܘ̣ܫܘ̣ܬܳܐ ܫܰܟܶܢ̣ܬ ܠܰܢ: ܘܰܐܢܗ̣ܰܪܬ ܠܕܰܡ̈ܟܶܐ ܘܚܰܝ̈ܶܐ ܘܠܳܐ ܡܶܬ̣ܚܰܒܠܳܢܘ̣ܬܳܐ ܫܰܟܶܢ̣ܬ ܠܗܽܘܢ: ܗܰܘ̇ ܕܰܒܝܰܕ ܡܰܥܰܠܬܳܟ ܕܨܶܝܕܰܝܗܽܘܢ ܣܰܒܪܳܐ ܝܰܗ̣ܒܬ ܠܗܽܘܢ: ܘܐܶܡ̣ܰܪܬ ܠܰܐܝܠܶܝܢ ܕܒܰܐܣܘ̣ܪ̈ܶܐ ܕܦܘ̣ܩܘ̱ ܘܶܐܬܓܠܰܘ: ܘܩܳܪܶܐ ܐܰܢ̱ܬ ܠܰܐܝܠܶܝܢ ܕܠܳܐ ܐܝ̣ܬܰܝܗܶܝܢ ܐܰܝܟ ܕܐܝ̣ܬܰܝܗܶܝܢ: ܘܰܡܩܝ̣ܡ ܐܰܢ̱ܬ ܠܓܰܪ̈ܡܶܐ ܡܡܰܟ̈ܟܶܐ ܘܡܰܠܒܶܫ ܐܰܢ̱ܬ ܠܗܽܘܢ ܫܘ̣ܒܚܳܐ: ܐܶܬܦܢܝ̣ ܡܳܪܝܳܐ ܐܰܠܳܗܰܢ ܠܘܳܬ ܒܳܥܘ̣ܬܰܢ ܘܚܘ̣ܣ ܘܐܶܬܪܰܚܰܡܥܠܰܝܢ: ܟܰܕ ܡܩܰܒܶܠ ܐܰܢ̱ܬ ܡ̣ܶܢ ܐܝ̣ܕܰܝ̈ܢ ܚܰܛܳܝ̈ܶܐ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܘܰܨܒܝ̣ ܕܢܶܗ̣ܘܶܐ ܩܕܳܡܰܝܟ ܡܳܪܝܳܐ ܠܪܝ̣ܚܳܐ ܒܰܣܝ̣ܡܳܐ ܘܰܠܬܶܫܒܘ̣ܚܬܳܐ ܕܰܫܡܳܟ ܩܰܕܝ̣ܫܳܐ: ܘܰܠܚܘ̣ܣܳܝܳܐ ܘܰܠܫܘ̣ܒܩܳܢܳܐ ܕܰܚܛܳܗܰܝ̈ܢ: ܠܫܰܝܢܳܐ ܘܠܰܙܗܝ̣ܪܘ̣ܬܳܐ ܕܥܺܕܬܳܟ ܩܰܕܝ̣ܫܬܳܐ: ܘܰܠܩܰܕܝ̣ܫܘ̣ܬܳܐ ܘܕܰܟܝܘ̣ܬܳܐ ܕܗܳܢܽܘܢ ܕܐܶܫܬܘܺܝ̣ܘ ܕܰܢ̣ܟܗܢܽܘܢ ܘܰܢܫ̣ܰܡܫܽܘܢ ܩܕܳܡ ܪܰܒܘ̣ܬܳܟ: ܠܫܰܦܝ̣ܪܘ̣ܬ ܩܘ̣ܝܳܡܳܐ ܕܟܽܠܶܗ ܥܳܠܡܳܐ: ܘܠܰܢܦܺܐܫܳܐ ܕܗܳܢܽܘܢ ܕܰܠܐܶܝܢ ܒܟܘ̣ܪ̈ܗܳܢܶܐ ܘܒܳܐܕ̈ܫܶܐ ܡܫܰܚ̈ܠܦܶܐ ܘܠܐܘ̣ܠ̈ܨܳܢܶܐ ܐܰܚܝ̣ܕܝ̣ܢ: ܠܩܘ̣ܝܳܡܳܐ ܕܐܰܪ̈ܡܠܳܬܳܐ ܘܰܕܝ̈ܰܬܡܶܐ: ܘܰܠܚܰܨܝ̣ܦܘ̣ܬܳܐ ܘܣܘ̣ܝܳܥܳܐ ܘܰܕܗܳܠܶܝܢ ܕܣܳܒܠܝ̣ܢ ܚܰܫ̈ܶܐ ܘܡܶܬܢܰܘܠܝ̣ܢ ܒܰܐܟܣܶܢܝܳܐ ܘܒܰܐܟܣܘ̣ܪܺܝܰܐ: ܠܢܘ̣ܛܳܪܳܐ ܘܣܳܥܘ̣ܪܘ̣ܬܳܐ ܕܗܳܢܽܘܢ ܕܰܒܛܘ̣ܪ̈ܶܐ ܘܒܰܡܥܰܪ̈ܶܐ ܐܝ̣ܬܰܝܗܽܘܢ: ܘܰܒܦܶܥܪ̈ܶܐ ܕܐܰܪܥܳܐ ܥܳܡܪܝ̣ܢ ܘܰܡܕܰܝܪܝ̣ܢ: ܘܠܰܫܦܝ̣ܥܘ̣ܬܳܐ ܕܰܛܥܝ̣ܢܘ̣ܬ ܦܺܐܪ̈ܶܐ ܘܰܠܪ̈ܶܕܝܶܐ ܘܡܶܛܪ̈ܶܐ ܡܫܰܝ̈ܢܶܐ ܘܰܪ̈ܣܝ̣ܣܶܐ: ܘܰܠܡܰܓܗܝܳܢܘ̣ܬܳܐ ܕܡ̣ܶܢ ܟܰܦܢܳܐ ܘܡܰܘܬܳܢܳܐ ܘܝܰܩܕܳܢܳܐ: ܘܡ̣ܶܢ ܪܕܘ̣ܦܝܳܐ ܘܚܰܪܒܳܐ ܒܝ̣ܫܬܳܐ ܘܡ̣ܶܢ ܐܝ̣̈ܕܰܝܳܐ ܕܰܒܢܰܝ̈ܳܐ ܢܘ̣ܟܪ̈ܳܝܶܐ ܠܒܘ̣ܝܳܐܳܐ ܘܠܘ̣ܒܳܒܳܐ ܕܰܐܝܠܶܝܢ ܕܦܰܩ̣ܶܕܘ̱ ܠܰܢ ܕܢ̇ܶܬܕܟܰܪ ܐܶܢܽܘܢ ܒܫܳܥܬܳܐ ܗܳܕܶܐ: ܠܬܘ̣ܪܳܨܳܐ ܕܚܰܝ̈ܶܐ ܕܰܡܗܰܝ̈ܡܢܶܐ ܘܰܠܡܶܬܦܰܢܝܳܢܘ̣ܬܳܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܕܚܰܛܳܝ̈ܶܐ ܘܰܕܡܰܣܟ̈ܠܳܢܶܐ: ܘܰܠܫܘ̣ܡܠܳܝܳܐ ܕܦܘ̣̈ܩܕܳܢܰܝܟ ܩܰܕܝ̣̈ܫܶܐ ܠܥ̱ܘ̣ܗܕܳܢܳܐ ܘܠܰܢܝܳܚܳܐ ܕܟܽܠܗܽܘܢ ܗܳܢܽܘܢ ܕܰܒܗܰܝܡܳܢܘ̣ܬܳܐ ܕܰܫܪܳܪܳܐ ܩܰܕܶܡ̣ܘ̱ ܫܟܶܒ̣ܘ̱ ܐܰܒܳܗܰܝ̈ܢ ܘܐܰܚܰܝ̈ܢ: ܘܰܠܛܘ̣ܝܳܒܳܐ ܕܠܰܢ ܥܰܒܕܰܝ̈ܟ ܕܳܘܰܝ̈ܳܐ ܕܰܠܘܳܬ ܓܗܳܝܬܳܐ ܕܡ̣ܶܢ ܗܳܪܟܳܐ ܘܰܒܒܘ̣ܣܳܡܳܐ ܕܛܳܒ̈ܳܬܳܐ ܕܰܠܥܳܠܰܡ ܗܳܠܶܝܢ ܕܩܳܕܡܝ̣ܢ ܠܰܐܝܠܶܝܢ ܕܰܫܦ̣ܰܪܘ̱ ܠܳܟ: ܡܶܛܽܠ ܕܐܰܢ̱ܬ ܐܝ̣ܬܰܝܟ ܡܥܰܕܪܳܢܳܐ ܕܝ̣ܠܰܢ ܘܰܡܣܰܬܪܳܢܰܢ ܡܳܪܝܳܐ: ܘܠܳܟ ܦ̇ܐܶܐ̣ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܦܝܪܡܐ

ܥܺܝ̣ܪܳܐ ܕܥܺܝ̣ܪ̈ܰܝ ܫܡܰܝܳܐ ܠܶܗ ܡܫܰܒܚܝ̣ܢ: ܘܚܰܝ̈ܶܐ ܕܒܰܒܣܰܪ ܠܶܗ ܡܩܰܠܣܝ̣ܢ: ܘܡܝ̣̈ܬܶܐ ܕܰܫܝܘ̣ܠ ܠܣܰܒܪܶܗ ܡܣܰܟܶܝܢ: ܐܰܥܝ̣ܪ ܡܳܪܰܢ ܠܢܰܦ̈ܫܳܬܳܐ ܕܥܰܢܝ̣̈ܕܰܝܢ ܠܫܘ̣ܒܚܳܐ ܕܰܫܡܳܟ ܘܰܠܬܰܘܕܝ̣ܬܳܐ ܕܪܰܒܘ̣ܬܳܟ: ܘܚܰܣܳܐ ܘܰܠܚܝ̣ ܟܽܠ ܛܘ̣ܠ̈ܫܶܐ ܘܟܘ̣̈ܬܡܳܬܳܐ ܕܡܶܢܗܽܘܢ ܐܶܣܬܥ̣ܰܪܘ̱: ܘܰܐܢܝ̣ܚ ܐܶܢܽܘܢ ܒܰܡ̈ܛܰܠ̱ܠܶܐ ܕܝ̣ܠܳܟ ܫܡܰܝܳܢܝ̈ܳܬܳܐ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀