ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܣܰܒܪܳܐ ܕܚܰܝ̈ܶܐ ܕܰܢܚ̣ܶܬ ܠܒܶܝܬ ܡܝ̣̈ܬܶܐ ܒܰܒܣܰܪ: ܘܰܗ̣ܘܳܐ ܐܳܪܚܳܐ ܠܥܰܢܝ̣̈ܕܶܐ ܒܩܰܒܪܳܐ: ܢܰܚܶܡ ܡܳܪܝ̱ ܘܰܐܚܳܐ ܡܝ̣ܬܘ̣ܬܰܢ ܒܡܰܘܬܳܟ: ܘܚܰܕܶܬ ܩܛܝ̣ܠܘ̣ܬܰܢ ܒܰܩܒܘ̣ܪܬܳܟ ܕܥܰܠ ܐܰܦܰܝ̈ܢ: ܘܐܰܥܝ̣ܪ ܢܰܦ̈ܫܳܬܰܢ ܥܰܡ ܦܰܓܪ̈ܰܝܢ ܡܫܝ̣ܚܳܐ ܐܰܠܳܗܰܢ: ܕܢ̇ܰܘܕܶܐ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܚܰܝܳܐ ܒܰܟܝܳܢܶܗ ܕܰܛܥ̣ܶܡ ܡܰܘܬܳܐ ܒܨܶܒܝܳܢܶܗ: ܘܰܠܡܝ̣̈ܬܶܐ ܥܓܝ̣̈ܢܶܐ ܡܰܪܓܫܳܢܘ̣ܬܳܐ ܕܢܘ̣ܚܳܡܳܐ ܥܒ̣ܰܕ ܒܚܰܝܠܶܗ: ܠܗܰܘ̇ ܕܰܕܡ̣ܶܟ ܒܶܝܬ ܥܰܢܝ̣̈ܕܶܐ ܘܰܐܥܝ̣ܪ ܒܩܳܠܶܗ ܠܡܝ̣̈ܬܶܐ ܫܟܝ̣̈ܒܰܝ ܫܝܘ̣ܠ: ܘܰܐܝܟ ܫܶܢܬܳܐ ܚ̣ܰܘܝܶܗ ܠܡܰܘܬܳܐ ܒܝܰܕ ܡܰܘܬܳܐ ܕܝ̣ܠܶܗ: ܠܗܰܘ̇ ܙܩܝ̣ܦܳܐ ܘܰܩܛܝ̣ܠܳܐ ܕܰܫ̣ܪܳܐ ܫܘ̣ܠܛܳܢܶܗ ܕܡܰܘܬܳܐ ܒܩܶܛܠܶܗ: ܘܝܰܗ̣ܒ ܣܰܒܪܳܐ ܕܰܩܝܳܡܬܳܐ ܠܳܐܕܳܡ ܘܰܠܟܽܠܗܽܘܢ ܝܰܠ̈ܕܰܘܗ̱ܝ ܒܰܩܒܘ̣ܪܬܶܗ: ܠܗܰܘ̇ ܩܒܝ̣ܪܳܐ ܕܰܐܝܟ ܥܰܢܝ̣̈ܕܶܐ ܐܶܬ̣ܥܰܦܝ̣ ܘܰܒܩܰܒܪܳܐ ܐܶܬ̣ܬܣܝ̣ܡ: ܘܰܒܡܰܥܰܠܬܶܗ ܕܰܠܩܰܒܪܳܐ ܡܝ̣̈ܬܶܐ ܕܰܫܝܘ̣ܠ ܐܶܬܢܰܚ̣ܰܡܘ̱: ܘܒܶܝܬ ܡܝ̣̈ܬܶܐ ܐܰܟ̣ܪܶܙ ܢܘ̣ܚܳܡܳܐ ܘܚܰܝܰܬ݀ ܡܝ̣̈ܬܶܐ: ܠܗܰܘ̇ ܓܰܢ̱ܒܳܪܳܐ ܘܚܰܝܠܬܳܢܳܐ ܕܝܘ̣̈ܕܳܝܶܐ ܫܢ̣ܰܘ ܕܢ̣ܶܛܪܽܘܢ ܩܰܒܪܶܗ: ܘܰܚ̣ܬܰܡܘ̱ ܟܺܐܦܳܐ ܥܰܡ ܩܶܣܛܘ̣ܢܳܪ̈ܶܐ ܘܚܰܝܠܶܗ ܬܰܩܝ̣ܦܳܐ ܟܶܢ̈ܫܶܐ ܕܡܝ̣̈ܬܶܐ ܐܰܩܝ̣ܡ ܡ̣ܶܢ ܩܰܒܪ̈ܰܝܗܽܘܢ ܘܠܐܘ̣ܪܫܠܶܡ ܡܕܝ̣ܢ̱ܬܳܐ ܥܰܠ̣ܘ̱ ܘܶܐܬ̣ܚܰܘܺܝ̣ܘ ܠܣܰܓܺܝ̈ܶܐܐ ܠܡܰܟܣܳܢܘ̣ܬܳܐ ܕܨܳܠܘ̣̈ܒܶܐ ܡܰܪ̈ܳܚܶܐ: ܠܗܰܘ̇ ܡܡܝ̣ܬܳܢܶܗ ܕܡܰܘܬܳܐ: ܘܡܰܚܪܒܳܢܳܗ̇ ܕܰܫܝܘ̣ܠ ܘܣܳܚܘ̣ܦܳܐ ܕܒܝ̣ܫܳܐ ܩܳܛܘ̣ܠܶܗ ܕܳܐܕܳܡ ܚܰܝܳܒܳܐ ܘܡܰܦܢܝܳܢܶܗ ܠܫܘ̣ܒܚܳܐ ܕܝ̣ܠܶܗ ܩܰܕܡܳܝܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܚܰܝܠܳܐ ܘܥܘ̣ܫܢܳܐ ܕܐܝ̣ܬܘ̣ܬܳܐ: ܗܰܘ̇ ܕܪܳܥܳܐ ܬܰܩܝ̣ܦܳܐ ܕܪܰܒܘ̣ܬܳܐ: ܗܰܘ̇ ܚܶܟܡܬܳܐ ܟܝܳܢܳܝܬܳܐ ܘܐܘ̣ܣܺܝܳܝܬܳܐ ܕܐܰܒܳܐ: ܗܰܘ̇ ܝܰܡܝ̣ܢܳܐ ܕܛܳܒܘ̣ܬܳܐ ܠܳܐ ܡܶܬ̣ܕܰܪܟܳܢܝ̣ܬܳܐ: ܗܰܘ̇ ܕܒܶܗ ܥܒ̣ܰܕ ܐܰܒܳܐ ܠܟܽܠܗܽܘܢ ܗܘܰܝ̈ܳܐ: ܘܟܽܠܶܗ ܒܐܝ̣ܕܶܗ ܗ̣ܘܳܐ ܘܒܶܠܥܳܕܰܘܗ̱ܝ ܐܳܦܠܳܐ ܚܕܳܐ ܗ̣ܘܳܬ ܡܶܕܶܡ ܕܰܗ̣ܘܳܐ: ܘܗܘ̣ ܒ̣ܪܳܐ ܘܩ̣ܰܝܶܡ ܟܽܠܗܽܘܢ ܬܶܓ̈ܡܶܐ ܘܚܰܝ̈ܠܰܘܳܬܳܐ ܠܳܐ ܓܫܝ̣̈ܡܶܐ: ܘܒܶܗ ܐܶܬ̣ܒܪܝ̣ ܐܳܕܳܡ ܪܝ̣ܫܳܐ ܕܰܓܒܝ̣ܠܬܰܢ: ܒܨܰܠܡܳܐ ܘܰܕܡܘ̣ܬܳܐ ܕܒܳܪܘ̣ܝܳܐ ܒܰܪ ܚܺܐܪ̈ܶܐ ܟܝ̣ܬ ܘܫܰܠܝ̣ܛ ܒܝܳܬܳܐ: ܘܕܰܡܨܰܒܰܬ ܒܡܰܠܟܘ̣ܬܳܐ ܘܟܳܗܢܘ̣ܬܳܐ ܘܰܢܒܺܝܘ̣ܬܳܐ: ܘܕܰܒܛܰܝܒܘ̣ܬܳܐ ܐܶܫ̣ܬܰܟܢܰܬ݀ ܠܶܗ ܠܳܐ ܡܳܝܘ̣ܬܘ̣ܬܳܐ: ܘܣܳܡ̣ܶܗ ܒܦܰܪܕܰܝܣܳܐ ܕܰܥܕܶܝܢ: ܕܢܶܦ̣ܠܘ̣ܚ ܘܢ̣ܶܬܒܰܣܰܡ ܡ̣ܶܢ ܦܺܐܪ̈ܰܝ ܐܝ̣̈ܠܳܢܶܐ ܟܽܠܗܽܘܢ ܕܦܰܪܕܰܝܣܳܐ: ܟܰܕ ܣ̣ܳܡ ܠܶܗ ܢܳܡܘ̣ܣܳܐ ܕܟܳܠܶܐ ܠܶܗ ܡ̣ܶܢ ܦܺܐܪܳܐ ܕܐܝ̣ܠܳܢܳܐ: ܗܰܘ̇ ܕܡܶܛܽܠ ܟܰܕ ܠܳܐ ܒܙܰܒܢܶܗ ܐܶܬ̣ܢܣܶܒ: ܡܰܘܬܳܐ ܐܰܒ̣ܰܥ ܡܶܛܽܠ ܕܐܶܬ̣ܬܰܛܥܝ̣ ܒܫܘ̣ܘܕܳܠܳܐ ܕܐܰܢ̱ܬܬܳܐ ܕܰܒܡܶܠܟܶܗ ܕܚܶܘܝܳܐ ܢܳܟܘ̣ܠܳܐ ܥܒ̣ܰܪ ܥܰܠ ܦܘ̣ܩܕܳܢܳܐ ܘܶܐܬ̣ܛܪܶܕ ܡ̣ܶܢ ܦܰܪܕܰܝܣܳܐ ܘܥܰܠ ܕܐܶܟ̣ܰܠ ܡ̣ܶܢ ܦܺܐܪܳܐ ܐܶܬ̣ܚܰܝܰܒ ܠܡܰܘܬܳܐ: ܘܰܫܡ̣ܰܥ ܗܳܝ̇ ܕܥܰܦܪܳܐ ܐܰܢ̱ܬ ܘܰܠܥܰܦܪܳܐ ܬ̣ܶܗܦܘ̣ܟ: ܘܰܗ̣ܦܰܟ ܠܰܐܪܥܳܐ ܗܳܝ̇ ܕܡܶܢܳܗ̇ ܐܶܬܢܣ̣ܶܒ: ܘܐܶܫ̣ܬܰܠܰܛ ܡܰܘܬܳܐ ܥܰܠ ܟܽܠܗܽܘܢ ܝܰܠ̈ܕܰܘܗ̱ܝ: ܘܰܐܡܠ̣ܶܟ ܥܰܠ ܟܽܠܗܽܘܢ ܕܳܪ̈ܶܐ ܘܫܰܪ̈ܒܳܬܳܐ: ܡܶܛܽܠ ܥܒܳܪ ܦܘ̣ܩܕܳܢܳܐ ܕܐܳܕܳܡ: ܘܶܐܒ̣ܰܕ ܙܘ̣ܙܳܐ ܕܐܰܢ̱ܬܬܳܐ ܐܰܘܟܝ̣ܬ ܐܰܠܗܘ̣ܬܳܐ: ܘܰܒܚ̈ܶܙܶܝܗ̇ ܕܰܫܝܘ̣ܠ ܐܶܬܛܡ̣ܰܪ ܨܰܠܡܳܐ ܡܰܠܟܳܝܳܐ ܘܶܐܫ̣ܬܕܝ̣ ܠܰܐܪܥܳܐ ܕܠܰܘ̈ܛܳܬܳܐ: ܘܚ̣ܳܒ ܚܰܘܒܬܳܐ ܥܰܫܝ̣ܢܬܳܐ ܒܝܰܕ ܐܶܫܛܳܪܳܗ̇ ܕܚܰܘܳܐ ܕܰܛܥܝ̣ܢܳܐ ܗ̱ܘܳܬ ܟܺܐܢܘ̣ܬܳܐ: ܚܰܘܒܬܳܐ ܕܛܰܒܥ̣ܰܬ݀ ܠܓܰܢ̱ܒܳܪ̈ܶܐ ܘܥܰܪܩܠ̣ܰܬ݀ ܠܩܰܠܝ̣̈ܠܶܐ: ܘܦܰܟ݂ܪܰܬ݀ ܠܥܰܫܝ̣̈ܢܶܐ ܘܐܰܚ̣ܪܒܰܬ݀ ܠܟܽܠ ܕܳܪ̈ܝ̣ܢ: ܘܰܐܣܩ̣ܰܬ݀ ܐܶܣܟ̈ܦܳܬܳܐ ܕܫܰܪ̈ܒܳܬܳܐ ܕܪ̈ܘܪܒܶܐ: ܘܠܳܐ ܐܶܫܟܰܚ̣ܘ̱ ܕܰܢ̣ܩܘ̣ܡܽܘܢ ܩܕܳܡܶܝܗ̇: ܡܰܢ ܓܶܝܪ ܡ̇ܨܶܐ̣ ܗ̱ܘܳܐ ܕܝܘ̣ܩܪܳܐ ܪܰܒܳܐ ܢ̣ܶܛܥܰܢ ܚܠܳܦ ܣܰܓܺܝ̈ܶܐܐ ܐܶܠܳܐ ܐܶܢ ܐܰܢ̱ܬ ܓܰܢ̱ܒܳܪܳܐ ܕܥܳܠ̈ܡܶܐ ܕܰܫܦ̣ܰܪ ܠܳܟ ܕܬܶܦ̣ܪܘ̣ܥ ܚܰܘܒܬܳܐ ܕܥܰܒܕܳܟ ܘܰܒܪܝ̣ܬܳܟ: ܢܦ̣ܰܠ ܗ̱ܘܳܐ ܓܶܝܪ ܐܳܕܳܡ ܒܗܰܘܬܳܐ ܕܡܝ̣̈ܬܶܐ ܘܟܽܠܗܽܘܢ ܝܰܠ̈ܕܰܘܗ̱ܝ ܥܰܡܶܗ ܡܶܬ̣ܚܰܒܫܝ̣ܢ ܗ̱ܘܰܘ: ܟܰܕ ܠܰܝܬ ܗ̱ܘܳܐ ܠܗܽܘܢ ܣܰܒܪܳܐ ܕܦܘ̣ܪܩܳܢܳܐ: ܒܰܕܓܽܘܢ ܓܳـܠ̣ܘ̱ ܪ̈ܰܚܡܶܐ ܕܝ̣ܠܳܟ ܐܳܘ ܒܳܪܘ̣ܝܳܐ: ܘܰܗ̣ܘܰܝܬ ܒܪܳܐ ܠܳܐܕܳܡ ܥܰܠ ܕܝ̣ܕܰܥܬ ܕܠܰܝܬ ܡܰܢ ܕܡܶܫܟܰܚ ܦܳܪܰܥ ܚܰܘܒܬܶܗ: ܠܳܐ ܕܶܝܢ ܐܰܪܦܝ̣ܬ ܨܰܠܡܳܟ ܕܢ̣ܶܬܚܰܒܰܠ ܒܰܫܝܘ̣ܠ ܘܠܳܐ ܫܒܰܩ̣ܬ ܕܡܘ̣ܬܳܟ ܕܬܶܬ̣ܕܝ̣ܫ ܒܰܣܝܳܢܳܐ ܡ̣ܶܢ ܓܰܢ̱ܒܳܪ̈ܶܐ ܕܰܐܒܕܳܢܳܐ: ܢܚ̣ܶܬܬ ܡ̣ܶܢ ܪܰܘܡܳܐ ܕܐܝ̣ܬܘ̣ܬܳܟ: ܘܐܶܬܝ̣ܠܶܕܬ ܡ̣ܶܢ ܒܬܘ̣ܠܬܳܐ ܒܰܪ̱ܬ݀ ܐܳܕܳܡ: ܘܟܽܠ ܕܚ̣ܳܒ ܗ̱ܘܳܐ ܐܳܕܳܡ ܦܪܰܥ̣ܬ: ܘܰܒܟܽܠܗܽܘܢ ܬܚܘ̣̈ܡܶܐ ܘܡܘ̣ܫ̈ܚܳܬܳܐ ܕܰܟܝܳܢܳܐ ܥܒ̣ܰܪܬ ܡܕܰܒܪܳܢܳܐܝ̣ܬ: ܘܰܠܡ̈ܳܟܳܬܳܐ ܐܶܬܢܚ̣ܶܬܬ ܨܶܒܝܳܢܳܐܝ̣ܬ: ܘܰܒܝܰܕ ܕܶܐܫܟܰܚ̣ܬ ܕܚܰܝܳܒ ܗ̱ܘܳܐ ܕܰܢܡܘ̣ܬ: ܡܶܛܽܠ ܕܐܶܬ̣ܶܐܡܰܪ ܠܗ ܕܰܒܝܰܘܡܳܐ ܕܬ̣ܶܐܟܘ̣ܠ ܡ̣ܶܢ ܐܝ̣ܠܳܢܳܐ ܬܡܘ̣ܬ: ܒܰܕܓܽܘܢ ܟܽܠܗܶܝܢ ܣܰܝܒ̣ܰܪܬ ܡܶܛܽܠܳܬܶܗ: ܐܶܬܝ̣ܠܶܕܬ ܒܡܰܘܠܳܕܶܗ ܐܶܬܪܰܒܝ̣ܬ ܒܡܘ̣ܫ̈ܚܳܬܶܗ ܕܟܽܠܗܶܝܢ ܕܰܟܝܳܢܳܐ: ܣܒܰܠ̣ܬ ܚܰܫ̈ܶܐ ܘܢܶܓ̈ܕܶܐ ܨܶܒܝܳܢܳܐܝ̣ܬ: ܡܝ̣ܬܬ ܒܰܒܣܰܪ ܡܰܘܬܳܐ ܕܟܺܐܢܘ̣ܬܳܐ ܕܚ̣ܳܒ ܗ̱ܘܳܐ ܐܳܕܳܡ ܒܰܥܒܳܪ ܦܘ̣ܩܕܳܢܳܐ: ܢܚ̣ܶܬܬ ܠܓܰܘ ܩܰܒܪܳܐ ܠܘܳܬܶܗ ܠܰܐܝܟܳܐ ܕܬܰܡܳܢ ܚܒܝ̣ܫ ܗ̱ܘܳܐ ܨܰܠܡܳܐ ܡܰܠܟܳܝܳܐ: ܘܟܰܕ ܛܥܶܡ̣ܬ ܒܰܒܣܰܪ ܠܡܰܘܬܳܐ ܘܥܰܡ ܡܳܝܘ̣̈ܬܶܐ ܐܶܬܡܢܝ̣ܬ: ܙܳܥ̣ܘ̱ ܫܡܰܝܳܐ ܘܐܰܪܥܳܐ: ܩ̣ܛܰܪܘ̱ ܐܶܒܠܳܐ ܥܰܠ ܒܶܪ̈ܝܳܬܳܐ: ܫܡܰܝ̈ܳܐ ܡܰܢ ܐܶܬܟܰܣܝ̣ܘ ܚܶܫܘ̣ܟܳܐ: ܠܒ̣ܶܫܘ̱ ܐܘ̣ܟ̈ܳܡܶܐ ܟܽܠܗܽܘܢ ܚܰܝ̈ܠܰܘܳܬܳܐ: ܡܰܫܪ̈ܝܳܬܳܐ ܕܢܘ̣ܪܳܐ ܙܪ̈ܰܒ̣ܝ̱ ܠܰܚ̈ܕܳܕܶܐ ܘܫܳܦ̣ܘ̱ ܐܶܒܪ̈ܰܝܗܽܘܢ ܕܢ̣ܰܘܩܕܽܘܢ ܠܥܳܡܰܪܬܳܐ: ܐܰܪܥܳܐ ܫܰܪܝܰܬ݀ ܢܳܝ̇ܕܳܐ ܐܰܝܟ ܥܰܪܶܙܠܳܐ: ܫܘ̣̈ܥܶܐ ܐܶܨܛܰܪܝ̣ܘ: ܩܰܒܪ̈ܶܐ ܐܶܬܦ̣ܬܰܚܘ̱: ܘܡܝ̣̈ܬܶܐ ܐܶܬܢܰܚܰܡ̣ܘ̱: ܕܢܰܚ̣ ܣܰܒܪܳܐ ܘܚܰܕܘ̣ܬܳܐ ܒܶܝܬ ܥܰܢܝ̣̈ܕܶܐ: ܢܚ̣ܶܬ ܢܘ̣ܚܳܡܳܐ ܠܰܐܪܥܳܐ ܕܡܝ̣̈ܬܶܐ: ܢܗ̣ܰܡ ܒܰܫܝܘ̣ܠ ܓܘ̣ܪܝܳܐ ܕܐܰܪܝܳܐ ܘܙܳܥ̣ܘ̱ ܡܰܘܬܳܐ ܘܒܝ̣ܫܳܐ ܕܶܐܒ̣ܰܕ ܘܰܒ̣ܛܶܠ ܫܘ̣ܠܛܳܢܗܽܘܢ: ܡܕܝ̣ܢ̱ܬܳܐ ܪܰܒܬܳܐ ܕܡܰܘܬܳܐ ܕܰܡܣܰܪܶܩ ܠܳܗ̇ ܡܰܘܬܳܟ ܠܡܰܦܘ̣ܠܬܳܐ: ܫܘ̣ܪ̈ܰܘܗ̱ܝ ܕܐܰܒܕܳܢܳܐ ܕܪܳܥܠܝ̣ܢ: ܪܗܳܒܬܳܐ ܕܚܰܝ̈ܶܐ ܡܶܫ̣ܬܰܡܥܳܐ ܒܰܐܬܪܳܐ ܕܡܝ̣̈ܬܶܐ: ܡܰܘܬܳܐ ܡܶܬ̣ܬܕܝ̣ܫ ܥܰܠ ܐܶܣܟܘ̣ܦܬܶܗ ܡ̣ܶܢ ܟܶܢ̈ܫܶܐ ܕܚܳܒ̇ܨܝ̣ܢ ܠܡ̣ܶܦܰܩ: ܥܰܠ̣ܬ ܓܶܝܪ ܠܒܶܝܬ ܚܰܣܝ̣ܢܳܐ ܗܳܡܳܢ ܒܳܠܥܰܬ݀ ܫܰܪ̈ܒܳܬܳܐ ܘܐܶܣ̣ܰܪܬ ܠܚܰܣܝ̣ܢܳܐ ܡܰܘܬܳܐ ܘܪܰܒܚܰܝܠܶܗ ܒܝ̣ܫܳܐ: ܘܰܠܐ̱ܢܳܫܘ̣ܬܳܐ ܕܐܰܝܟ ܡܳܐܢ̈ܶܐ ܚܡܝ̣ܠܳܐ ܗ̱ܘܳܬ ܠܗܽܘܢ ܒܰܙ̣ܬ ܘܰܐܦܶܩ̣ܬ: ܘܟܰܕ ܡ̣ܶܢ ܩܶܛܠܳܐ ܣܠ̣ܶܩܬ: ܘܫܰܪܰܪܬ ܠܗܳܝ̇ ܕܰܒ̣ܪܰܟ ܘܰܪܒ̣ܰܥ ܐܰܝܟ ܐܰܪܝܳܐ: ܘܰܐܝܟ ܓܘ̣ܪܝܳܐ ܕܐܰܪܝܳܐ ܘܡܰܢܘ̣ ܢܩܝ̣ܡܝ̣ܘܗ̱ܝ: ܘܟܰܕ ܢܚ̣ܶܬܬ ܠܰܫܝܘ̣ܠ ܣܰܒܪܳܐ ܘܦܘ̣ܪܩܳܢܳܐ ܠܰܐܝܠܶܝܢ ܕܰܚܒܝ̣ܫܝ̣ܢ ܬܰܡܳܢ ܐܰܟ̣ܪܶܙܬ: ܘܣܶܘܚ̣ܰܬ݀ ܠܐܘ̣ܪܥܳܟ ܟܽܠܳܗ̇ ܡܰܫܪܝ̣ܬܳܐ ܕܟܺܐܢ̈ܶܐ ܘܙܰܕܝ̣̈ܩܶܐ: ܘܟܽܠܳܗ̇ ܓܘ̣ܕܳܐ ܕܰܢܒܺܝ̈ܶܐ ܪܘܳܙܳܐ ܘܚܰܕܘ̣ܬܳܐ ܐܶܬ̣ܡܠܝ̣ܘ: ܘܰܒܡ̈ܶܠܶܐ ܕܬܶܫܒ̈ܚܳܬܳܐ ܡܰܥܰܠܬܳܟ ܕܠܰܫܝܘ̣ܠ ܡܥܰܕܥܕܝ̣ܢ ܗ̱ܘܰܘ: ܘܐ̱ܪ̈ܳܙܶܐ ܕܰܩܒܘ̣ܪܬܳܟ ܘܡܰܥܰܠܬܳܟ ܐܰܘܟܝ̣ܬ ܡܰܚܰܬܬܳܟ ܕܠܰܫܝܘ̣ܠ: ܘܬܘ̣ܩܦܳܐ ܕܐܰܠܳܗܘ̣ܬܳܟ ܡܰܟܪܙܝ̣ܢ ܗ̱ܘܰܘ: ܘܒܰܫܝܘ̣ܠ ܘܰܒܡܰܘܬܳܐ ܡܰܗܠܝ̣ܢ ܗ̱ܘܰܘ: ܟܰܕ ܚܰܕ ܡܶܢܗܽܘܢ (ܐܶܫܰܥܝܳܐ) ܕܰܐܦܬ̣ܝܰܬ݀ ܫܝܘ̣ܠ ܢܰܦܫܳܗ̇ ܘܦܶܥ̣ܪܰܬ݀ ܦܘ̣ܡܳܗ̇ ܘܚܶܟܶܝ̈ܗ̇ ܕܠܳܐ ܣܳܟ ܡܫܰܘܕܰܥ ܗ̱ܘܳܐ: ܐ̱ܚܪܺܢܳܐ ܕܶܝܢ (ܕܰܘܝ̣ܕ) ܡܶܛܽܠ ܕܣܶܒܥ̣ܰܬ݀ ܢܰܦܫܝ̱ ܒܝ̣̈ܫܳܬܳܐ ܘܚܰܝ̈ܰܝ ܠܰܫܝܘ̣ܠ ܡܰܛܝ̣ܘ ܘܶܐܬܚܰܫ̇ܒܶܬ ܥܰܡ ܢܳܚ̈ܬܰܝ ܓܘ̣ܒܳܐ: ܘܰܠܥܰܦܪܳܐ ܕܡܰܘܬܳܐ ܫܕܰܝܬ̣ܢܝ̱ ܡܙܰܡܰܪ ܗ̱ܘܳܐ: ܚܰܕ (ܙܟܰܪܝܳܐ) ܕܰܢ̣ܚܘ̣ܪܽܘܢ ܒܡܰܢ ܕܰܕܩ̣ܰܪܘ̱ ܘܢ̣ܶܪܩܕܽܘܢ ܥܠܰܘܗ̱ܝ ܐܰܝܟ ܕܡܰܪܩܕܝ̣ܢ ܥܰܠ ܝ̣ܚܝ̣ܕܳܝܳܐ: ܘܢ̣ܶܬܬܰܒܪܽܘܢ ܥܠܰܘܗ̱ܝ ܐܰܝܟ ܕܡܶܬ̣ܬܰܒܪܝ̣ܢ ܥܰܠ ܒܘ̣ܟܪܳܐ ܡܶܬ̣ܢܰܒܶܐ ܗ̱ܘܳܐ: ܘܰܐ̱ܚܪܺܢܳܐ (ܕܰܘܝ̣ܕ) ܕܗܳܐ ܒܶܝܬ ܡܝ̣̈ܬܶܐ ܒܰܪ ܚܺܐܪ̈ܶܐ: ܘܐܰܝܟ ܩܛܝ̣̈ܠܶܐ ܕܰܫܟܝ̣ܒܝ̣ܢ ܒܩܰܒܪ̈ܶܐ ܡܒܰܟܶܐ ܗ̱ܘܳܐ: ܚܰܕ (ܐܶܫܰܥܝܳܐ) ܕܐܰܪܝܳܐ ܐܰܝܟ ܬܰܘܪܳܐ ܢ̣ܶܐܟܘ̣ܠ ܬܶܒܢܳܐ: ܘܢܶܫ̣ܬܥܶܐ ܝܰܠܘ̣ܕܳܐ ܒܚܰܪܡܳܢܳܐ: ܘܰܒܚܰܘܪܳܐ ܕܶܐܣܦܶܣ ܢܰܘܫܶܛ ܐܝ̣ܕܶܗ ܚܣܝ̣ܠܳܐ ܡܩܰܕܶܡ ܡܣܰܒܰܪ ܗ̱ܘܳܐ: ܐ̱ܚܪܺܢܳܐ ܡܶܛܽܠ ܕܚܰܕܪܘ̣ܢܝ̱ ܚܶܒ̈ܠܶܐ ܕܡܰܘܬܳܐ ܘܚܶܒ̈ܠܶܐ ܕܰܫܝܘ̣ܠ ܟܰܪܟܘ̣ܢܝ̱ ܡܗܰܠܶܠ ܗ̱ܘܳܐ: ܚܰܕ ܡܶܟܝ̣ܠ ܬܶܦ̣ܩܝ̣ܢܝ̱ ܒܓܰܝܣܳܐ ܒܰܪ̱ܬ ܓܰܝ̈ܳܣܶܐ ܡܒܰܕܶܩ ܗ̱ܘܳܐ: ܘܰܐ̱ܚܪܺܢܳܐ ܐܰܣܶܩ̣ܬ ܡ̣ܶܢ ܫܝܘ̣ܠ ܠܢܰܦܫܝ̱: ܘܰܐܚܝ̣ܬܳܢܝ̱ ܡ̣ܶܢ ܢܳܚ̈ܬܰܝ ܓܘ̣ܒܳܐ ܓܳܠܶܐ ܗ̱ܘܳܐ: ܚܰܕ ܕܰܕܒܳܪܬܶܗ ܕܓܰܢ̱ܒܳܪܳܐ ܬܶܬܕܰܒܪܰܢܝ̱: ܘܰܫܒܝ̣ܬܶܗ ܕܥܰܫܝ̣ܢܳܐ ܬ̣ܶܬܦܰܨܶܐ ܡܰܟܪܶܙ ܗ̱ܘܳܐ: ܘܰܐ̱ܚܪܺܢܳܐ ܡܶܛܽܠ ܕܠܳܐ ܫܒܰܩ̣ܬ ܠܢܰܦܫܝ̱ ܒܰܫܝܘ̣ܠ ܘܠܳܐ ܝܰܗ̣ܒܬ ܠܚܰܣܝܳܟ ܕܢܶܚ̣ܙܶܐ ܚܒܳܠܳܐ ܐܳܡܰܪ ܗ̱ܘܳܐ: ܚܰܕ ܕܡܶܛܽܠ ܕܒܳܪܶܐ ܒܳܪܝܳܐ ܚ̣ܰܕܬܳܐ ܒܰܐܪܥܳܐ: ܡܶܛܽܠܗܳܢܳܐ ܐܶܬܬܥܝ̣ܪܶܬ ܘܰܚܙܝ̣ܬ ܘܫܶܢܰܬܝ̱ ܒܶܣܡ̣ܰܬ݀ ܠܝ̣ ܡܣܰܓܶܐ ܗ̱ܘܳܐ: ܘܰܐ̱ܚܪܺܢܳܐ ܡܳܪܝܳܐ ܐܝܟ ܓܰܢ̱ܒܳܪܳܐ ܢ̣ܶܦܘ̣ܩ ܘܐܰܝܟ ܓܰܒܪܳܐ ܩܪܰܒܬܳܢܳܐ ܢܓܰܪܶܓ ܛܢܳܢܳܐ: ܢܶܩ̣ܥܶܐ ܘܢ̣ܶܬܓܰܢ̱ܒܰܪ ܘܢܶܩ̣ܛܘ̣ܠ ܠܰܒܥܶܠ̈ܕܒܳܒܰܘܗ̱ܝ ܡܫܰܘ̇ܕܰܥ ܗ̱ܘܳܐ: ܘܟܰܕ ܠܡܰܥܰܠܬܳܟ ܕܠܰܫܝܘ̣ܠ ܡܚܰܘܶܝܢ ܗ̱ܘܰܘ: ܐܳܦ ܟܽܠܗܽܘܢ ܩܝܳܡܬܳܟ ܘܙܳܟܘ̣ܬܳܟ ܡܰܟܪܙܝ̣ܢ ܗ̱ܘܰܘ: ܒܰܫܝܘ̣ܠ ܘܰܒܡܰܘܬܳܐ ܡܰܗܠܝ̣ܢ ܗ̱ܘܰܘ: ܝܰܘܡܳܢܳܐ ܗܘ̣ܫܳܥ ܟܰܕ ܡܰܗܶܠ ܒܶܗ ܒܡܰܘܬܳܐ ܘܒܰܫܝܘ̣ܠ ܐܳܡܰܪ ܗ̱ܘܳܐ: ܐܰܝܟܳܐ ܗ̱ܝ ܙܳܟܘ̣ܬܳܟ ܡܰܘܬܳܐ ܘܰܐܝܟܰܘ ܥܘ̣ܩܣܶܟܝ̱ ܫܝܘ̣ܠ: ܝܰܘܡܳܢܳܐ ܐܶܫܰܥܝܳܐ ܢܒܺܝܳܐ ܢܶܨܚܳܢܳܐ ܕܡܰܥܰܠܬܳܟ ܕܠܰܫܝܘ̣ܠ ܡܚܰܘܶܐ ܗ̱ܘܳܐ ܟܰܕ ܐܳܡܰܪ: ܘܢܶܥ̣ܒܶܕ ܡܳܪܝܳܐ ܚܰܝܠܬܳܢܳܐ ܒܟܽܠܗܽܘܢ ܥܰܡ̱̈ܡܶܐ ܒܛܘ̣ܪܳܐ ܗܳܢܳܐ ܡܰܫܬܝܳܐ ܪܰܒܳܐ ܘܫܰܡܝ̣ܢܳܐ ܕܡܰܚܝܳܢܰܢ ܫܡܰܝܳܢܳܐ ܘܢ̣ܶܬܒܠܰܥ ܡܰܘܬܳܐ ܒܙܳܟܘ̣ ܠܥܳܠܡܝ̣ܢ ܐܳܡܰܪ ܗ̱ܘܳܐ: ܝܰܘܡܳܢܳܐ ܐ̱ܪܳܙܶܗ ܕܝܰܘܢܳܢ ܐܶܬܦܰܫ̣ܰܩ: ܕܰܐܝܟܰܢܳܐ ܕܰܗ̣ܘܳܐ ܒܓܰܘ ܢܽܘܢܳܐ ܬܠܳܬܳܐ ܝܰܘܡܝ̣̈ܢ ܘܰܬܠܳܬܳܐ ܠܰܝ̈ܠܰܘܳܢ: ܘܗܳܟܰܢܳܐ ܗ̣ܘܳܐ ܡܳܪܶܗ ܒܠܶܒܳܗ̇ ܕܐܰܪܥܳܐ ܬܠܳܬܳܐ ܝܰܘܡܝ̣̈ܢ ܘܰܬܠܳܬܳܐ ܠܰܝܠ̈ܰܘܳܢ: ܝܰܘܡܳܢܳܐ ܐܶܫܰܥܝܳܐ ܐܰܙܥ̣ܶܩ ܒܰܫܝܘ̣ܠ ܘܰܡܒܰܙܰܚ ܒܳܗ̇ ܟܰܕ ܐܳܡܰܪ: ܢܶܦܰܠ̣ܬ݀ ܢܶܦܰܠ̣ܬ݀ ܒܳܒܶܝܠ ܪܰܒܬܳܐ: ܝܰܘܡܳܢܳܐ ܡܰܬܠܶܗ ܕܫܶܡܫܽܘܢ ܐܶܬܦܰܫ̣ܰܩ ܕܡ̣ܶܢ ܐܳܟܘ̣ܠܳܐ ܢܦ̣ܰܩ ܐܘ̣ܟܠܳܐ: ܘܡ̣ܶܢ ܡܰܪܝ̣ܪܳܐ ܢܰܦ̣ܩ ܚܰܠܝܳܐ: ܝܰܘܡܳܢܳܐ ܐܶܫܰܥܝܳܐ ܡܚܰܘܶܐ ܟܺܐܢܘ̣ܬ ܕܝ̣ܢܳܟ ܕܥܰܡ ܡܰܘܬܳܐ ܘܐܳܡܰܪ: ܕܰܐܝܟ ܡܚܘ̣ܬܳܐ ܕܰܡܚ̣ܳܝܗ̱ܝ ܡܚ̣ܳܝܗ̱ܝ: ܘܰܐܝܟ ܩܶܛܠܳܐ ܕܩܰܛܠ̣ܶܗ ܩܰܛܶܠ̣ܗ: ܝܰܘܡܳܢܳܐ ܕܰܘܝ̣ܕ ܐܰܟ݂ܪܶܙ ܘܐܶܡ̣ܰܪ: ܗܳܐ ܠܡܝ̣̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ ܘܓܰܢ̱ܒܳܪ̈ܶܐ ܢܩܘ̣ܡܽܘܢ ܘܢܰܘܕܽܘܢ ܠܳܟ: ܘܢܶܫ̣ܬܰܥܽܘܢ ܕܰܒܩܰܒܪ̈ܶܐ ܛܰܝܒܘ̣ܬܳܟ: ܝܰܘܡܳܢܳܐ ܐܶܫܰܥܝܳܐ ܬܘ̣ܒ ܐܰܟ̣ܪܶܙ ܘܐܶܡ̣ܰܪ: ܐܶܩ̇ܪܶܐ ܚܺܐܪܘ̣ܬܳܐ ܠܰܫ̈ܒܰܝܳܐ ܘܰܫܪܳܝܳܐ ܠܰܐܣܝ̣ܪ̈ܶܐ: ܝܰܘܡܳܢܳܐ ܣܝ̣ܥܬܶܗ ܕܚܰܢܳܢ ܘܰܕܩܰܝܳܦܳܐ ܐܶܒܠܳܐ ܘܰܓܢܳܚ ܠܶܒܳܐ ܥܛܝ̣ܦܝ̣ܢ ܕܕܰܠܡܳܐ ܢ̣ܩܘ̣ܡ ܘܢܰܒ̣ܗܶܬ ܐܶܢܽܘܢ: ܝܰܘܡܳܢܳܐ ܢܳܛܘ̣ܪ̈ܶܐ ܐܰܓܰܪܘ̱ ܘܛܰܒ̈ܥܶܐ ܘܰܚ̈ܬܳܡܶܐ ܥܰܠ ܦܘ̣ܡ ܩܰܒܪܳܐ ܣܳܡ̣ܘ̱: ܘܰܠܟܺܐܦܳܐ ܥܰܡ ܩܶܣܛܘ̣ܢܳܪ̈ܶܐ ܚܬܰܡ̣ܘ̱: ܟܰܕ ܡܶܙܕܰܗܪܝ̣ܢ ܕܚܰܝܳܐ ܕܠܳܐ ܢ̣ܶܬܚܰܠܰܨ: ܝܰܘܡܳܢܳܐ ܡܝ̣̈ܬܶܐ ܕܰܢܦ̣ܰܩܘ̱ ܡ̣ܶܢ ܓܰܘ ܫܝܘ̣ܠ ܠܓܰܘܳܗ̇ ܕܐܘ̣ܪܫܠܶܡ ܥܰܠ̣ܘ̱ ܘܰܠܩܰܪ̈ܝ̣ܒܰܝܗܽܘܢ ܘܝܳܕܘ̣ܥܰܝ̈ܗܽܘܢ ܫܰܘܕܰܥ̣ܘ̱ ܥܶܠܰܬ݀ ܩܝܳܡܬܗܽܘܢ: ܝܰܘܡܳܢܳܐ ܨܶܦܚ̣ܰܬ݀ ܒܶܗܬܬܳܐ ܠܚܰܢܳܢ ܘܰܠܩܰܝܳܦܳܐ ܘܰܠܓܘ̣ܕܳܐ ܕܨܳܠܘ̣̈ܒܶܐ: ܟܰܕ ܚـܼܙܰܘ ܕܡܝ̣̈ܬܶܐ ܕܰܫܝܘ̣ܠ ܒܫܘ̣̈ܩܶܝܗ̇ ܕܐܘ̣ܪܫܠܶܡ ܡܰܟܪܙܝ̣ܢ ܬܶܕܡܪ̈ܳܬܳܐ ܕܗܰܘ̇ ܕܰܨܠܰܒ̣ܘ̱: ܝܰܘܡܳܢܳܐ ܡܰܘܬܳܐ ܐܶܬܬ̣ܕܝ̣ܫ ܒܬܰܪ̈ܥܶܝܗ̇ ܕܰܫܝܘ̣ܠ ܐܰܝܟ ܓܰܢ̱ܒܳܪܳܐ ܒܬܰܪܥܳܗ̇ ܕܫܳܡܪܝ̣ܢ: ܝܰܘܡܳܢܳܐ ܢܳܨܘ̣ܒܶܗ ܕܦܰܪܕܰܝܣܳܐ ܒܓܰܘ ܓܰܢܬܳܐ ܒܥ̣ܳܝܗ̱ܝ ܠܳܐܕܳܡ ܘܶܐܫܟܚ̣ܶܗ ܐܰܝܟܳܐ ܕܬܰܡܳܢ ܐܶܒ̣ܰܕ: ܝܰܘܡܳܢܳܐ ܡܰܪܝܰܡ ܐܶܡܶܗ ܥܰܡ ܫܰܪܟܳܐ ܕܢܰܟ̈ܦܳܬܳܐ ܒܛܘ̣ܫܝܳܐ ܡܒܰܟ̈ܝܳܢ ܗ̱ܘܰܝ̈ ܠܶܗ ܠܗܰܘ̇ ܕܰܫܡܰܝ̈ܳܐ ܡܶܫܬܰܥܶܝܢ ܬܶܫܒܘ̣ܚܬܶܗ: ܘܒܶܪ̈ܝܳܬܳܐ ܡܰܟܪ̈ܙܳܢ ܬܘ̣ܩܦܳܐ ܕܪܰܒܘ̣ܬܶܗ: ܝܰܘܡܳܢܳܐ ܡܰܪܝܰܡ ܟܢܝ̣ܟܬܳܐ ܒܶܝܬ ܒܳܟܶܐ ܥܶܒ̣ܕܰܬ݀ ܠܰܪܚܘ̣ܡܳܗ̇ ܐܰܝܟ ܕܰܠܥܰܢܝ̣ܕܳܐ ܒܶܐܒܠܳܐ ܡܒܰܟܝܳܐ ܗ̱ܘܳܬ ܠܶܗ: ܝܰܘܡܳܢܳܐ ܠܡܰܠܰܐܟ̈ܶܐ ܘܠܰܒܢܰܝ̈ܢܳܫܳܐ ܘܰܠܟܽܠܗܶܝܢ ܒܶܪ̈ܝܳܬܳܐ ܡܙܰܡܢܳܐ ܗ̱ܘܳܬ݀ ܠܒܶܝܬ ܒܳܟܶܐ ܕܝ̣ܚܝ̣ܕܳܝܳܗ̇: ܝܰܘܡܳܢܳܐ ܫܠܝ̣̈ܚܶܐ ܐܶܡܪ̈ܶܐ ܬܰܡܝ̣̈ܡܶܐ ܒܡܰܛܫ̈ܝܳܬܳܐ ܟܰܡܝ̣ܢܝ̣ܢ ܗ̱ܘܰܘ: ܕܒܰܪ̱ܬ ܩܳܠܶܗ ܕܰܙܟܰܪܝܳܐ ܗܳܝ̇ ܕܐܶܬܡ̣ܰܠܠܰܬ݀ : ܕܰܡܚܝ̣ ܠܪܳܥܝܳܐ ܘܢ̣ܶܬܒܰܕܪܽܘܢ ܐܶܡܪ̈ܰܘܗ̱ܝ ܐܰܥ̣ܪܩܰܬ݀ ܘܒ̣ܰܕܪܰܬ݀ ܐܶܢܽܘܢ: ܝܰܘܡܳܢܳܐ ܥܺܕܬܳܐ ܡܟܝ̣ܪܬܳܟ ܕܰܫܪܳܪܳܐ ܡܶܫܬܰܒܗܪܳܐ ܒܡܰܘܬܳܟ: ܘܰܡܚܰܒܒܳܐ ܠܚܰܫܰܝ̈ܟ ܘܠܰܙܩܝ̣ܦܘ̣ܬܳܟ: ܘܰܡܣܰܟܝܳܐ ܠܚܰܕܘ̣ܬܳܐ ܕܢܘ̣ܚܳܡܳܟ: ܘܰܡܦܝ̣ܣܳܐ ܠܪܶܚܡܰܬ݀ ܐ̱ܢܳܫܘ̣ܬܳܟ: ܐܰܫܰܪ ܫܘ̣ܘܕܳܝܰܝ̈ܟ ܠܘܳܬܳܗ̇ ܘܒܰܪܶܟ ܠܰܒܢܶܝ̈ܗ̇ ܒܓܰܘܳܗ̇: ܪܰܡܪܶܡܝ̣ܗ̇ ܒܢܝ̣ܫܶܗ ܕܰܨܠܝ̣ܒܳܟ: ܘܗܰܕܰܪܶܝܗ̇ ܒܟܶܢ̈ܫܶܐ ܕܰܒܢܶܝ̈ܗ̇: ܡܠܝ̣ܗ̇ ܫܰܝܢܳܐ ܟܰܗܝ̣ܢܳܐ: ܡܰܠܳܐ ܠܳܗ̇ ܟܽܠܗܶܝܢ ܫܶܐܠܴ̈ܬܳܗ̇: ܝܰܡܝ̣ܢܳܟ ܐܰܓܶܢ ܥܠܶܝܗ̇: ܪ̈ܰܚܡܰܝܟ ܢܶܗ̣ܘܽܘܢ ܠܳܗ̇ ܣܶܬܳܪܳܐ: ܘܰܚܢܳܢܳܟ ܫܘ̣ܪܳܐ ܪܳܡܳܐ: ܕܝ̣ܢܰܝ̈ܟ ܘܛܰܝ̈ܒܘܳܬܳܟ ܗ̣ܶܢܽܘܢ ܢܥ̣ܰܕܪܘ̣ܢܳܗ̇: ܐܰܣܓܳܐ ܠܳܗ̇ ܟܽܠܗܶܝܢ ܛܳܒ̈ܳܬܳܟ: ܘܰܐܫܦܰܥ ܠܳܗ̇ ܣܘ̣ܓܳܐܐ ܕܒܘ̣ܪ̈ܟܳܬܳܟ: ܘܪܘ̣ܚܳܟ ܩܰܕܝ̣ܫܳܐ ܢܶܫ̣ܪܶܐ ܒܓܰܘܳܗ̇: ܗܰܝܡܳܢܘ̣ܬܳܐ ܕܰܫܪܳܪܳܐ ܬ̣ܶܐܚܘ̣ܕܝ̱ ܒܳܗ̇ ܠܥܳܠܰܡ: ܝܘ̣ܒܳܒܳܐ ܕܡܰܠܰܐܟ̈ܶܐ ܠܳܐ ܫܰܠܝܳܐܝ̣ܬ ܬܝ̣ܰܒܶܒܝ̱ ܠܳܟ: ܣܶܕܪ̈ܶܝܗ̇ ܒܰܐܘܝܘ̣ܬܳܐ ܢ̣ܶܬܛܰܟܣܽܘܢ: ܡܙܰܡܪ̈ܳܢܶܝܗ̇ ܒܫܰܘܝܘ̣ܬܳܐ ܢ̣ܗܰܠܠܽܘܢ: ܗܰܝܟ̈ܠܶܐ ܒܩܝ̣̈ܢܳܬܳܐ ܕܰܟ̈ܝܳܬܳܐ ܢ̣ܶܪܥܡܽܘܢ: ܘܥܰܢܝ̣̈ܕܶܐ ܡܗܰܝ̈ܡܢܶܐ ܕܡܶܢܳܗ̇ ܫܟ̣ܶܒܘ̱ ܒܰܐܘ̈ܘܳܢܶܐ ܐܘ̣ܪ̈ܫܠܶܡܳܝܶܐ ܢ̣ܶܬܒܰܣܡܽܘܢ: ܘܰܒܟܽܠܶܗ ܟܶܢܫܳܐ ܕܰܒܢܶܝ̈ܗ̇ ܒܰܚܕܳܐ ܐܰܘܝܘ̣ܬܳܐ ܬܰܫ̣ܒܰܚܝ̱ ܠܚܰܫܳܟ ܘܡܰܘܬܳܟ ܘܰܩܒܘ̣ܪܬܳܟ ܕܰܚܠܳܦܰܝܢ ܝ̣ܚܝ̣ܕܳܝܳܐ ܐܰܠܳܗܳܐ: ܘܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܳܐ ܕܝ̣ܠܳܗ̇ ܘܰܠܪܘ̣ܚܳܟ ܚܰܝܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܝܪܡܐ

ܓܢܺܝ̣ܙܳܐ ܕܰܓܣ̣ܰܪ ܒܰܫܝܘ̣ܠ: ܘܙܳܥ̣ܘ̱ ܒܝ̣ܫܳܐ ܘܡܰܘܬܳܐ ܘܶܐܒ̣ܰܕ ܘܰܒ̣ܛܶܠ ܫܘ̣ܠܛܳܢܗܽܘܢ: ܘܬܰܒ̣ܰܪ ܬܰܪ̈ܥܶܝܗ̇ ܕܰܫܝܘ̣ܠ ܘܡܘ̣̈ܟܠܶܝܗ̇ ܓܰܕܶܡ: ܘܰܩ̣ܪܳܐ ܠܰܐܝܠܶܝܢ ܕܰܚܒܝ̣ܫܝ̣ܢ ܗ̱ܘܰܘ ܠܡ̣ܶܦܰܩ: ܣܥܘ̣ܪ ܡܳܪܝ̱ ܠܥܺܕܬܳܟ ܒܝܰܘܡܳܐ ܗܳܢܳܐ ܕܡܰܥܰܠܬܳܟ ܕܠܰܫܝܘ̣ܠ: ܘܰܐܦܨܰܚܶܝܗ̇ ܘܰܠܝܰܠ̈ܕܶܝܗ̇ ܕܰܐܒܝ̣ܠܝ̣ܢ ܥܰܠ ܚܰܫܳܟ ܒܚܰܕܘ̣ܬܳܐ ܕܢܘ̣ܚܳܡܳܟ: ܘܒܰܝܰܐ ܠܰܐܝܠܶܝܢ ܕܒܰܫܝܘ̣ܠ ܒܡܰܥܰܠܬܳܟ ܕܨܶܝܕܰܝܗܽܘܢ: ܘܡ̣ܶܢ ܟܽܠܰܢ ܟܢܝ̣ܫܳܐܝ̣ܬ ܬܶܫ̣ܬܰܒܰܚ ܡܫܝ̣ܚܳܐ ܡܳܪܰܢ ܘܐܰܠܳܗܰܢ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀