ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܡܰܠܟܳܐ ܕܡܰܠ̈ܟܶܐ ܕܥܰܠ ܥܢܳܢ̈ܶܐ ܣܝ̣ܡܳܐ ܡܰܪܟܰܒܬܶܗ ܡܪܰܡܪܡܳܐܝ̣ܬ ܒܪܰܘܡܳܐ: ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ ܨܒ̣ܳܐ ܘܰܗ̣ܘܳܐ ܪܟܘ̣ܒܶܗ ܡܰܟܝ̣ܟܳܐܝ̣ܬ ܒܥܘ̣ܡܩܳܐ: ܠܗܰܘ̇ ܥܰܙܝ̣ܙܳܐ ܕܥܰܠ ܟܶܢ̈ܦܶܐ ܕܚܝ̣̈ܠܳܬܳܐ ܕܪܘ̣ܚܳܐ ܡܗܰܠܶܟ ܕܚܝ̣ܠܳܐܝ̣ܬ ܒܰܫܡܰܝܳܐ ܘܥܰܠ ܢܰܚ̈ܬܶܐ ܕܟܶܢ̈ܫܶܐ ܘܶܐܣ̣ܬܰܓܝ̣ ܫܝ̣ܛܳܐܝ̣ܬ ܒܰܐܪܥܳܐ: ܠܗܰܘ̇ ܚܰܟܝ̣ܡܳܐ ܕܰܥܒ̣ܰܕ ܡܫܰܡ̈ܫܳܢܰܘܗ̱ܝ ܠܥܶܠ ܡ̣ܶܢ ܢܘ̣ܪܳܐ ܝܳܩܶܕܬܳܐ ܘܡ̣ܶܢ ܟܶܢܫ̈ܶܐ ܕܬܰܠ̈ܡܝ̣ܕܶܐ ܐܶܫ̣ܬܰܒܰܚ ܠܬܰܚܬ ܦܰܓܪܳܢܳܐܝ̣ܬ ܥܰܠ ܕܰܨܒ̣ܳܐ: ܠܗܰܘ̇ ܒܪܝ̣ܟܳܐ ܘܰܡܒܰܪܟܳܐ ܕܰܟܪ̈ܘ̣ܒܶܐ ܩܳܥܶܝܢ ܠܶܗ ܒܪܝ̣ܟ ܐܝ̣ܩܳܪܳܟ ܡ̣ܶܢ ܐܰܬܪܳܟ ܒܙܰܘܥܳܐ: ܘܝܳܢܘ̈ܩܶܐ ܝܰܠ̈ܘ̣ܕܶܐ ܒܪܝ̣ܟ ܗ̱ܘ̣ ܕܳܐܬܶܐ ܒܰܫܡܶܗ ܕܡܳܪܝܳܐ: ܠܗܰܘ̇ ܩܰܕܝ̣ܫܳܐ ܕܰܣܪ̈ܳܦܶܐ ܩܰܕܝ̣̈ܫܶܐ ܡܩܰܕܫܝ̣ܢ ܠܶܗ ܒܕܶܚܠܳܐ: ܘܰܥܠܰܝ̈ܡܶܐ ܘܰܛܠܳܝ̈ܶܐ ܐܘ̣ܫܰܥܢܳܐ ܝܰܒܶܒ̣ܘ̱ ܩܕܳܡܰܘܗ̱ܝ ܒܬܶܗܪܳܐ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܝ̣ܚܝ̣ܕܳܝܶܗ ܕܰܐܒܳܐ ܘܨܶܡܚܳܐ ܕܬܶܫܒܘ̣ܚܬܶܗ ܗܰܘ̇ ܕܰܟܝܳܢܳܐܝ̣ܬ ܝ̣ܠܝ̣ܕ ܐܰܢ̱ܬ ܡܶܢܶܗ ܩܕܳܡ ܙܰܒ̈ܢܶܐ ܘܛܰܘܪ̈ܶܐ ܘܰܪ̈ܦܳܦܶܐ ܘܥܶܕ̈ܳܢܶܐ ܘܰܐܝܟ ܕܠܰܝܬ ܠܗܰܘܢܳܐ ܠܡܶܕܰܥ ܘܰܠܡܰܕܪܳܟܘ̣: ܒܚܰܪܬܳܐ ܕܶܝܢ ܕܝܰܘܡ̈ܳܬܳܐ ܘܰܕܙܰܒ̈ܢܶܐ ܡ̣ܶܢ ܒܬܘ̣ܠܬܳܐ ܕܟܝ̣ܬܳܐ ܘܩܰܕܝ̣ܫܬܳܐ ܫܦ̣ܰܪ ܠܳܟ ܕܬ̣ܶܬܝ̣ܠܶܕ ܡܶܛܽܠ ܦܘ̣ܪܩܳܢܳܐ ܕܝ̣ܠܰܢ ܘܶܐܬ̣ܪܰܒܝ̣ܬ ܒܡܘ̣̈ܫܚܳܬܳܐ ܐ̱ܢܳܫܳܝ̈ܳܬܳܐ ܘܟܽܠܗܶܝܢ ܕܝ̣ܠܰܢ ܒܰܩܢܘ̣ܡܳܟ ܫܰܡ̣ܠܝ̣ܬ ܣܛܰܪ ܡ̣ܶܢ ܚܛܝ̣ܬܳܐ: ܟܰܕ ܕܶܝܢ ܠܘܳܬ ܚܰܫܳܐ ܡܰܥܒܶܕ ܚܰܝ̈ܶܐ ܨܒ̣ܰܝܬ ܕܬ̣ܺܐܬܶܐ ܠܫܶܡܥܽܘܢ ܘܰܠܝܽܘܚܰܢܳܢ ܫ̣ܰܕܰܪܬ ܕܢ̣ܰܝܬܽܘܢ ܥܝ̣ܠܳܐ ܗܰܘ̇ ܕܒܰܢܒܺܝ̈ܶܐ ܩ̣ܰܕܶܡ ܐܶܬܡ̣ܰܠܰܠ ܕܰܥܠܰܘܗ̱ܝ ܬ̣ܶܪܟ݂ܰܒ ܘܬ̣ܶܥܘ̣ܠ ܠܐܘ̣ܪܫܠܶܡ: ܘܟܰܕ ܐܰܝܟ ܨܶܒܝܳܢܳܟ ܐܰܝܬܝ̣ܘ ܠܥܝ̣ܠܳܐ ܘܣܳܡ̣ܘ̱ ܥܠܰܘܗ̱ܝ ܢܰܚ̈ܬܰܝܗܽܘܢ: ܘܰܪܟܶܒ̣ܬ ܥܠܰܘܗ̱ܝ ܘܶܐܬܬܢܝ̣ܚܬ ܐܰܝܟ ܕܥܰܠ ܟܪ̈ܘ̣ܒܶܐ ܩܰܕܝ̣̈ܫܶܐ: ܢܘ̣ܪ̈ܳܢܶܐ ܕܶܝܢ ܟܰܕ ܚܙܰܐܘܽܘ̣ܟ ܐܶܬܒܰܠ̣ܗܝ̣ܘ ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܬܗ̣ܰܪܘ̱ ܒܡܘ̣ܟܳܟܳܟ: ܪ̈ܝ̣ܫܰܝ ܡܰܠܰܐܟ̈ܶܐ ܐܰܙܥ̣ܶܩܘ̱ ܬܶܫܒܘ̣ܚܬܳܟ ܘܙܳܥ̣ܘ̱ ܘܶܐܬ̣ܕܰܡܰܪܘ̱: ܟܪ̈ܘ̣ܒܶܐ ܣܰܓܺܝ̈ܰܐܝ ܥܰܝ̈ܢܶܐ ܫܰܒ̣ܰܚܘ̱ ܠܡܶܬܢܰܚܬܳܢܘ̣ܬܳܟ: ܣܪ̈ܳܦܶܐ ܕܶܫܬܳܐ ܓܶܦܰܝ̈ܗܽܘܢ ܟܰܕ ܟܳܘܙܝ̣ܢ ܡ̣ܶܢ ܓܰܘܙܰܠܬܳܟ ܩܘ̣ܕ̈ܳܫܶܐ ܬܠ̈ܝ̣ܬܳܝܶܐ ܕܰܡܫܰܕܪܝ̣ܢ ܠܐܝ̣ܩܳܪܳܟ: ܓܝ̣̈ܓܠܶܐ ܢܘ̣ܪ̈ܳܢܳܝܳܬܳܐ ܟܰܕ ܪ̈ܳܐܬܳܢ ܡ̣ܶܢ ܓܰܘܙܰܠܬܳܟ ܡܒܰܪ̈ܟܳܢ ܗ̱ܘ̈ܰܝ ܠܳܟ: ܝܰܗ̈ܠܶܐ ܕܫܰܠܗܶܒܝ̣ܬܳܐ ܒܕܶܚܠܬܳܐ ܘܒܰܪܬܝ̣ܬܳܐ ܝܰܒ̣ܶܒܘ̱ ܠܳܟ ܬܶܫܒܚ̈ܳܬܳܐ ܦܰܐܝ̈ܳܬܳܐ: ܬܰܠܡܝ̣̈ܕܶܐ ܕܶܝܢ ܘܟܽܠܶܗ ܟܶܢܫܳܐ ܕܥܰܡܗܽܘܢ ܐܰܙܝ̣ܥ ܐܶܢܽܘܢ ܚܰܝܠܳܟ ܡ̇ܨܶܐ̣ ܟܽܠ: ܘܰܒܚܰܕ ܝܘܒܳܒܳܐ ܐܰܙܥ̣ܶܩܘ̱ ܒܩܳܠܳܐ ܪܳܡܳܐ: ܒܪܝ̣ܟ ܗ̱ܘ̣ ܕܶܐܬ̣ܳܐ ܒܫܡܶܗ ܕܡܳܪܝܳܐ: ܘܫܰܒܪ̈ܶܐ ܘܝܰܠ̈ܘ̣ܕܶܐ ܡܰܙܥܩܝ̣ܢ ܗ̱ܘܰܘ ܘܳܐܡܪܝ̣ܢ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܠܰܒܪܶܗ ܕܕܰܘܝ̣ܕ: ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܘܳܐܬܶܐ ܬܘ̣ܒ ܕܢ̣ܶܥܒܶܕ ܕܝ̣ܢܳܐ ܘܙܰܕܝ̣ܩܘ̣ܬܳܐ: ܐܶܬܚܠ̣̈ܰܛܝ̱ ܙܡܝ̣ܪ̈ܳܬܳܐ ܕܰܐܪ̈ܥܳܢܶܐ ܒܩܝ̣̈ܢܳܬܳܐ ܕܰܫܡܰܝ̈ܳܢܶܐ: ܩܝ̣̈ܢܳܬܳܐ ܡܰܠܰܐܟܳܝ̈ܳܬܳܐ ܡ̣ܶܢ ܟܽܠ ܓܰܒܝ̣̈ܢ ܡܶܫܬܰܡ̈ܥܳܢ ܗ̱ܘܰܝ̈: ܝܘ̣ܒܳܒܳܐ ܕܰܫܡܰܝ̈ܢܶܐ ܒܟܽܠ ܦܘ̣ܡܝ̣̈ܢ ܡܶܙܕܰܡܰܪ ܗ̱ܘܳܐ: ܬܶܫܒ̈ܚܳܬܳܐ ܦܰܐܝ̈ܳܬܳܐ ܡ̣ܶܢ ܟܽܠ ܠܶܫܳܢ ܡܶܬܠܰܥ̈ܙܳܢ ܗ̱ܘܰܝ̈: ܪܘ̣ܡܪ̈ܳܡܶܐ ܗܕܝ̣ܪ̈ܶܐ ܒܟܽܠ ܓܰܓܪ̈ܳܬܳܐ ܡܶܬܡܰܠܠܝ̣ܢ ܗ̱ܘܰܘ: ܗܘ̣̈ܠܳܠܶܐ ܘܙܘ̣ܡܳܪ̈ܶܐ ܒܟܽܠ ܢܶܥ̈ܡܳܬܳܐ ܡܨܰܠ̈ܠܳܬܳܐ ܡܶܙܕܰܡܪܝ̣ܢ ܗ̱ܘܰܘ: ܐܳܘ ܠܬܶܕܡܘ̣ܪܬܳܐ ܦܰܐܝܰܬ݀ ܠܰܐܠܳܗܳܐ ܕܰܒܡܰܥܰܠܬܳܟ ܕܠܐܘ̣ܪܫܠܶܡ ܐܶܣ̣ܬܥܰܪ̈ܝ̱ ܗ̱ܘܰܝ̈: ܚܓܝ̣̈ܣܶܐ ܕܰܡܫܰܘܪܝ̣ܢ: ܣܡ̈ܰܝܳܐ ܕܡܶܬܦܰܬܚܝ̣ܢ: ܐܰܠܝ̣̈ܨܶܐ ܕܡܶܬܪܰܘܚܝ̣ܢ: ܡܡܰܚ̈ܰܝܳܐ ܕܡܶܬܚܰܠܡܝ̣ܢ: ܐܘ̣ܪܫܠܶܡ ܕܰܦܨܝ̣ܚܳܐ: ܟܳܗ̈ܢܶܐ ܕܰܟܡܝ̣ܪܝ̣ܢ: ܠܶܘܳܝ̈ܶܐ ܕܰܡܠܰܚܫܝ̣ܢ: ܠܶܓܝ̈ܘ̣ܢܶܐ ܫܡܰܝ̈ܳܢܝܳܬܳܐ ܘܰܐܪ̈ܥܳܢܝܳܬܳܐ ܕܰܡܙܰܝ̈ܚܳܢ ܠܡܰܥܰܠܬܳܟ: ܝܰܠ̈ܘ̣ܕܶܐ ܘܰܥܠܰܝ̈ܡܶܐ ܕܕܳܝܨܝ̣ܢ ܩܕܳܡܰܝܟ: ܫܰܒܪ̈ܶܐ ܕܰܡܩܰܝܙܝ̣ܢ ܩܕܳܡ ܪܰܒܘ̣ܬܳܟ: ܘܝ̣̈ܠܶܐ ܡܕܰܗ̈ܒܳܬ ܒܣܰܘ̈ܟܶܐ ܕܰܩܪ̈ܝ̣ܡܳܢ ܥܰܠ ܐܘ̣ܪܚܳܟ: ܥܘ̣ܫܢܳܐ ܕܡܰܠ̈ܟܶܐ ܘܰܕܫܰܠܝ̣̈ܛܳܢܶܐ ܕܡܶܬܒܣܰܪ ܒܥܝ̣ܠܳܟ: ܚܘ̣ܬܪܳܐ ܘܫܘ̣ܒܗܳܪܳܐ ܕܣܳܦܪ̈ܶܐ ܕܡܶܬܡܰܟܰܟ ܒܰܪܟܘ̣ܒܳܟ: ܛܘ̣ܪ̈ܶܐ ܘܪ̈ܳܡܳܬܳܐ ܟܰܕ ܫܰܬܝ̣ܩܝ̣ܢ ܩܳܥܶܝܢ ܠܳܟ ܬܶܫܒܘ̣ܚܬܳܐ: ܝܰܡ̱̈ܡܶܐ ܘܢܰܗܪ̈ܰܘܳܬܳܐ ܕܳܝܨܝ̣ܢ ܘܰܦܨܝ̣ܚܝ̣ܢ ܒܥܰܕܥܺܐܕܳܟ: ܐܝ̣ܠܳܢ̈ܶܐ ܒܣܰܘ̈ܟܰܝܗܽܘܢ ܩܰܒܠܘ̣ܟ ܘܒܐܝ̣ܕܳܐ ܕܰܛܠܳܝ̈ܶܐ ܫܦܰܝ̈ܳܐ ܪܘ̣ܡܝܳܢܳܐ ܩܰܪܶܒ̣ܘ̱ ܠܡܘ̣ܟܳܟܳܟ: ܘܳܐܦ ܚܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܘܰܡܫܰܒܰܚܬܳܐ ܕܰܠܥܰܕܥܺܐܕܳܟ ܗܳܢܳܐ ܫܒܝ̣ܚܳܐ ܙܰܡܶܢ̣ܬ ܠܰܢ: ܣܳܓܕܝ̣ܢܰܢ ܘܡܰܘܕܶܝܢܰܢ ܠܳܟ ܘܰܡܫܰܒܚܝ̣ܢܰܢ ܘܥܰܡ ܕܰܘܝ̣ܕ ܡܙܰܡܪܳܢܳܐ ܐܰܠܳܗܳܝܳܐ ܡܰܙܥܩܝ̣ܢܰܢ ܘܳܐܡܪܝ̣ܢܰܢ: ܗܳܢܰܘ ܝܰܘܡܳܐ ܕܰܥܒ̣ܰܕ ܡܳܪܝܳܐ ܬܰܘ ܢ̇ܕܘ̣ܨ ܘܢܶܚ̇ܕܶܐ ܒܶܗ: ܝܰܘܡܳܢܳܐ ܒܒܶܗܬܬܳܐ ܘܰܒܟܘ̣ܐܳܪܳܐ ܩܳܝܡܳܐ ܟܢܘ̣ܫܬܳܐ ܡܰܣܠܰܝܬܳܐ ܕܰܣܢ̣ܳܬܳܟ ܘܥܺܕܬܳܐ ܒܰܪ̱ܬ݀ ܐܰܪ̈ܡܳܝܶܐ ܒܚܰܕܘ̣ܬܳܐ ܩܰܒܶܠ̣ܬܳܟ: ܝܰܘܡܳܢܳܐ ܒܨܰܥܪܳܐ ܘܰܒܚܶܣܕܳܐ ܐܝ̣ܬܰܝܗܽܘܢ ܝܘ̣ܕ̈ܳܝܶܐ ܪ̈ܰܫܝ̣ܥܶܐ ܟܰܕ ܚܳܙܶܝܢ ܕܡܶܙܕܰܝܰܚ ܐܰܢ̱ܬ ܒܣܰܘ̈ܟܶܐ ܕܬܶܫܒܘ̣ܚܬܳܐ: ܝܰܘܡܳܢܳܐ ܠܒܰܪ̱ܬ݀ ܩ̈ܳܠܶܐ ܕܝܰܠ̈ܘ̣ܕܶܐ ܢ̇ܶܩܰܦ ܘܢ̇ܺܐܡܰܪ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ: ܒܪܝ̣ܟ ܗ̱ܘ̣ ܕܳܐܬܶܐ ܒܰܫܡܶܗ ܕܡܳܪܝܳܐ: ܐܘ̣ܫܰܥܢܳܐ ܠܘܰܥܕܳܐ ܕܘܰܥ̣ܶܕ ܠܟܽܠܗܽܘܢ ܥܰܡ̱̈ܡܶܐ ܠܣܶܓܕܬܳܐ ܕܐܝ̣ܩܳܪܶܗ: ܐܘ̣ܫܰܥܢܳܐ ܠܬܶܫܒܘ̣ܚܬܶܗ ܕܰܐܒܳܐ ܕܫܰܒ̣ܚܘ̣ܗ̱ܝ ܫܡܰܝ̈ܢܶܐ ܘܰܐܪ̈ܥܳܢܳܝܶܐ: ܐܘ̣ܫܰܥܢܳܐ ܠܝܘ̣ܩܢܳܐ ܠܳܐ ܡܶܫܬܰܚܠܦܳܢܳܐ ܕܝܰܩ̣ܶܢ ܗܘ̣ ܠܶܗ ܒܡܰܪܒܥܳܐ ܕܰܒܬܘ̣ܠܬܳܐ: ܐܘ̣ܫܰܥܢܳܐ ܠܠܳܐ ܡܶܣܬܰܝܟܳܢܳܐ ܕܣ̣ܰܝܶܟ ܗܘ̣ ܠܶܗ ܝܰܘܡܳܢܳܐ ܥܰܠ ܥܝ̣ܠܳܐ: ܐܘ̣ܫܰܥܢܳܐ ܠܕܘ̣ܡܳܪܳܐ ܕܡ̣ܶܢ ܛܠܳܝ̈ܶܐ ܒܣܰܘ̈ܟܰܝ ܙܰܝ̈ܬܶܐ ܐܶܫ̣ܬܰܒܰܚ: ܐܘ̣ܫܰܥܢܳܐ ܠܰܬܠܝ̣ܬܳܝܳܐ ܕܰܒܩܘ̈ܕܳܫܶܐ ܬܠ̈ܝ̣ܬܳܝܶܐ ܡ̣ܶܢ ܫܰܒܪ̈ܶܐ ܐܶܬܩ̣ܰܕܰܫ: ܐܘ̣ܫܰܥܢܳܐ ܠܟܘ̣ܡܪܳܐ ܡܚܰܣܝܳܢܳܐ ܕܡ̣ܶܢ ܝܰܠ̈ܘ̣ܕܶܐ ܒܕܶܩ̈ܠܶܐ ܐܶܬܩ̣ܰܠܰܣ: ܒܪܝ̣ܟ ܗ̱ܘ̣ ܗܰܘ̇ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܐܳܡܪܝ̣ܢܰܢ ܘܰܡܒܰܪܰܟ ܗ̱ܘ̣ ܗܰܘ̇ ܕܰܥܬܝ̣ܕ ܕܢ̣ܺܐܬܶܐ ܡܰܙܥܩܝ̣ܢܰܢ: ܡܒܰܪܟܰܐ ܗ̱ܘ̇ ܗܰܘ̇ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܘܰܥܒ̣ܰܕ ܠܰܢ ܦܘ̣ܪܩܳܢܳܐ: ܘܰܒܪܝ̣ܟ ܗ̱ܘ̣ ܗܰܘ̇ ܕܳܐܬܶܐ ܟܰܕ ܡܥܰܛܰܦ ܢܘ̣ܗܪܳܐ ܐܰܝܟ ܡܰܪܛܘ̣ܛܳܐ: ܡܒܰܪܟܰܐ ܗ̱ܘ̣ ܗܰܘ̇ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܠܚ̈ܰܫܶܐ ܘܠܰܨܠܝ̣ܒܳܐ ܡܶܛܽܠܳܬܰܢ: ܘܰܒܪܝ̣ܟ ܗ̱ܘ̣ ܗܰܘ̇ ܕܶܐܬ̣ܳܐ ܒܡܘ̣ܟܳܟܳܐ ܘܬܘ̣ܒ ܐܳܬܶܐ ܒܫܘ̣ܒܚܳܐ ܕܙܳܟܘ̣ܬܳܐ: ܒܪܝ̣ܟ ܗ̱ܘ̣ ܗܰܘ̇ ܕܳܐܬܶܐ ܗܽܘ̣ ܟܰܕ ܗܽܘ̣ ܠܕܝ̣ܢܳܐ ܘܠܰܬܒܰܥܬܳܐ ܕܟܳܦܘ̣ܪ̈ܶܐ: ܡܒܰܪܟܰܐܗ̱ܘ̣ ܗܰܘ̇ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܘܰܐܣ̣ܠܝ̣ ܠܓܰܝܳܪܬܳܐ ܕܠܳܐ ܩܰܒܶܠ̣ܬܶܗ: ܘܰܒܪܝ̣ܟ ܗ̱ܘ̣ ܗܰܘ̇ ܕܳܐܬܶܐ ܕܰܢ̣ܒܰܣܶܡ ܒܡܰܠܟܘ̣ܬܶܗ ܠܥܺܕܬܳܐ ܒܰܪ̱ܬ݀ ܥܰܡ̱̈ܡܶܐ ܕܚܰܒܶܒ̣ܬܶܗ: ܘܒܰܕܓܽܘܢ ܡܶܬܟܰܫܦܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܒܗܳܢܳܐ ܥܰܕܥܺܐܕܳܐ ܫܒܝ̣ܚܳܐ ܕܡܰܥܰܠܬܳܐ ܕܝ̣ܠܳܟ ܕܠܐܘ̣ܪܫܠܶܡ ܕܥܰܠ ܥܝ̣ܠܳܐ ܫܝ̣ܠܳܐ ܘܫܝ̣ܛܳܐ: ܩܰܒܶܠ ܠܬܶܫܒܚ̈ܳܬܰܢ ܐܰܝܟ ܕܰܛܠܳܝ̈ܶܐ ܫܦܰܝ̈ܳܐ ܕܫܰܒ̣ܚܘ̣ܟ: ܕܘ̣ܒܳܪ̈ܰܝܢ ܢ̣ܶܫܦܪܽܘܢ ܠܳܟ ܐܰܝܟ ܢܰܚ̈ܬܶܐ ܕܬܰܠܡܝ̣̈ܕܶܐ: ܘܝܰܠ̈ܘ̣ܕܰܝܢ ܘܣܳܒܰܝ̈ܢ ܢ̣ܗܰܠܠܽܘܢ ܠܳܟ ܒܬܶܫܒܚ̈ܳܬܗܽܘܢ: ܫܰܒܪ̈ܶܐ ܘܰܥܠܰܝ̈ܡܶܐ ܢ̣ܒܰܪܟܘ̣ܢܳܟ ܒܗܘ̣ܠܳܠܰܝ̈ܗܽܘܢ: ܝܳܢܘ̈ܩܶܐ ܘܥܘ̣̈ܠܶܐ ܡ̣ܶܢ ܟܶܢܦ̈ܳܬܳܐ ܢ̣ܩܰܠܣܘ̣ܢܳܟ ܒܠܘ̣ܓ̈ܠܳܓܰܝܗܽܘܢ: ܟܳܗ̈ܢܶܐ ܘܰܡܫܰܡ̈ܫܳܢܶܐ ܢ̣ܣܰܓܽܘܢ ܠܳܟ ܒܦܘ̣ܪ̈ܫܳܢܰܝܗܽܘܢ: ܘܰܠܟܽܠܰܢ ܡܝܰܩܪ̈ܰܝ ܥܰܕܥܺܐܕܳܟ ܐܰܫܘܳܐ ܠܓܰܠܝܽܘ̣ܬ ܐܰܦ̈ܶܐ ܕܰܩܕܳܡܰܝܟ: ܠܚܘ̣ܣܳܝܳܐ ܕܡܶܬܥܰܒܪ̈ܳܢܘܳܬܰܢ: ܠܰܥܛܳܝܳܐ ܕܫܳܪ̈ܥܳܬܰܢ: ܠܫܘ̣ܒܩܳܢܳܐ ܕܟܽܠܗܽܘܢ ܒܘ̣ܨܳܪ̈ܰܝܢ: ܘܳܐܦ ܠܥܰܢܝ̈ܕܶܐ ܡܗܰܝ̈ܡܢܶܐ ܕܰܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܫܰܢܝ̣ܘ ܠܘܳܬܳܟ ܐܰܢܝ̣ܚ ܐܶܢܽܘܢ ܒܰܐܘ̈ܘܳܢܶܐ ܕܝ̣ܠܳܟ ܛܘ̣ܒ̈ܬܳܢܶܐ: ܘܰܚܢܰܢ ܘܗܶܢܽܘܢ ܢ̇ܶܫܬܘܶܐ ܕܰܢ̇ܫܰܒܚܳܟ ܒܥܺܐܕܳܐ ܗܰܘ̇ ܕܠܳܐ ܥܳܒܰܪ ܘܠܳܐ ܦܳܛܪ̈ܳܢ ܚܰܕ̈ܘܳܬܶܗ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀