ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܕܠܳܐ ܡܘ̣ܡ ܘܬܰܘܕܝ̣ܬܳܐ ܕܡܶܡܬܘ̣ܡ: ܠܗܰܘ̇ ܬܩܝ̣ܦܳܐ ܘܥܰܫܝ̣ܢܳܐ ܕܡܰܪܟܰܒܬܳܐ ܕܢܘ̣ܪ̈ܳܢܶܐ ܛܥܝ̣ܢܳܐ ܠܶܗ: ܘܥܰܠ ܥܝ̣ܠܳܐ ܕܰܐܬܳܢܳܐ ܝ̣ܬܶܒ ܒܡܘ̣ܟܳܟܶܗ: ܗܰܘ̇ ܕܰܣܪ̈ܳܦܶܐ ܘܢܘ̣ܪ̈ܳܢܶܐ ܙܳܡܪܝ̣ܢ ܫܘ̣ܒܚܶܗ: ܘܫܰܒܪ̈ܶܐ ܘܝܰܠ̈ܘ̣ܕܶܐ ܐܰܙܥ̣ܶܩܘ̱ ܬܶܫܒܘ̣ܚܬܶܗ: ܠܗܰܘ̇ ܕܰܡ̣ܬܰܚ ܫܡܰܝܳܐ ܐܰܝܟ ܝܳܪܝ̣ܥܬܳܐ ܒܪܶܡܙܶܗ: ܘܰܒܢܰܚ̈ܬܶܐ ܘܡܰܪ̈ܛܘ̣ܛܶܐ ܐܶܬܝܰܩ̣ܰܪ ܪܟܘ̣ܒܶܗ: ܠܗܰܘ̇ ܕܡܰܥܰܠܬܳܐ ܕܝ̣ܠܶܗ ܐܰܪܗ̣ܒܰܬ݀ ܠܨܳܠܘ̣̈ܒܶܐ ܘܩܳܠܳܐ ܕܐܘ̣ܫܰܥ̈ܢܰܘܗ̱ܝ ܒܠ̣ܰܡ ܠܣܳܦܪ̈ܶܐ ܘܠܦܪ̈ܝ̣ܫܶܐ: ܘܐܝ̣̈ܠܢܶܐ ܒܣܘ̈ܟܶܐ ܝܰܩ̣ܪܘ̣ܗ̱ܝ ܘܥܰܡ̱̈ܡܶܐ ܦܪ̈ܝ̣ܫܶܐ ܢܦܰܩ̣ܘ̱ ܘܩܰܒ̣ܠܘ̣ܗ̱ܝ ܘܰܥܒ̣ܰܕ ܐܶܢܽܘܢ ܕܝ̣ܠܶܗ ܘܥܳܢ̈ܳܐ ܕܡܰܪܥܝ̣ܬܶܗ: ܕܠܶܗ ܒܝܰܘܡܳܐ ܗܳܢܳܐ ܒܝܘ̣̈ܒܳܒܰܝ ܫܘ̣ܒܚܳܐ ܡܗܰܠܠܝ̣ܢ ܒܩܝ̣̈ܢܳܬܗܽܘܢ ܕܰܟܝ̈ܳܬܳܐ ܡܗܰܕܪܝ̣ܢ: ܘܠܶܗ ܟܰܕ ܠܶܗ ܐܰܠܳܗܳܐ ܫܰܪܝ̣ܪܳܐ ܡܶܫܬܰܘܕܥܝ̣ܢ ܘܕܶܐܬܒܰܣ̣ܰܪ ܨܶܒܝܳܢܳܐܝ̣ܬ ܡܰܘܕܶܝܢ ܘܠܳܐ ܟܳܦܪܝ̣ܢ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܢ: ܗܰܘ̇ ܕܟܽܠ ܡܶܕܶܡ ܚܰܟܝ̣ܡܳܐܝ̣ܬ ܘܰܠܥܶܠ ܡ̣ܶܢ ܡܰܕܪܟܳܢܘ̣ܬܳܐ ܕܗܰܘ̈ܢܶܐ ܕܝ̣ܠܰܢ ܡܕܰܒܪܳܢܳܐܝ̣ܬ ܠܘܳܬ ܦܘ̣ܪܩܳܢܳܐ ܕܝ̣ܠܰܢ ܐ̱ܢܳܫܳܝܳܐ: ܗܰܘ̇ ܕܟܰܕ ܥܰܠ ܡܰܪܟܰܒܬܳܐ ܕܰܟܪ̈ܘ̣ܒܶܐ ܡܶܙܕܰܝܰܚ ܐܰܢ̱ܬ: ܘܡܶܬܪܰܡܪܰܡ ܐܰܢ̱ܬ ܫܒܝ̣ܚܳܐܝ̣ܬ: ܒܨܶܒܝܳܢܳܐ ܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܠܡܘ̣ܟܳܟܳܐ ܕܝ̣ܠܰܢ ܐܶܬܪܟܶܢ̣ܬ ܘܰܕܡܘ̣ܬܳܐ ܥܰܒܕܳܢܳܝܬܳܐ ܢܣܰܒ̣ܬ: ܘܥܰܠ ܚܰܝܘ̣ܬܳܐ ܕܠܳܐ ܡܶܠܬܳܐ ܥܝ̣ܠܳܐ ܫܝ̣ܛܳܐ ܒܰܪ ܐܰܬܳܢܳܐ ܡܟܝ̣ܟܐܝ̣ܬ ܪܟܶܒ̣ܬ: ܘܥܰܠ ܢܰܚ̈ܬܰܝܗܽܘܢ ܕܰܫܠܝ̣̈ܚܶܐ ܫܚܝ̣ܡܳܐܝ̣ܬ ܝ̣ܬܶܒܬ: ܘܠܰܢܒܺܝܰܘ̈ܳܬܳܐ ܕܰܢܒܺܝ̈ܶܐ ܕܰܥܠܰܝܟ ܐܶܬ̣ܢܰܒܝ̣ܘ ܫܰܡܠܝ̣ܬ: ܟܰܕ ܡ̣ܶܢ ܡܒܰܕ̈ܩܳܢܶܐ ܩܰܕ̈ܡܳܝܶܐ ܡܶܬܡܰܠܰܠ ܗ̱ܘܰܝܬ: ܘܡ̣ܶܢ ܚܰܙܳܝ̈ܶܐ ܡܶܨܥܳܝ̈ܶܐ ܡܶܬܒܰܕܰܩ ܗ̱ܘܰܝܬ: ܘܡ̣ܶܢ ܟܳܪ̈ܘ̣ܙܶܐ ܐ̱ܚܪ̈ܳܝܶܐ ܓܰܠܝܳܐܝ̣ܬ ܡܶܬܚܰܘܶܐ ܗ̱ܘܰܝܬ: ܟܰܕ ܚܰܕ ܡܰܢ ܒܨܶܒܥܳܐ ܠܰܟܢܘ̣ܫܬܳܐ ܡܚܰܘܶܐ ܗ̱ܘܳܐ: ܕܗܳܢܰܘ ܐܶܡܪܶܗ ܕܰܐܠܳܗܳܐ ܘܰܕܗܘ̣ ܫܳܩܶܠ ܚܛܝ̣ܬܶܗ ܕܥܳܠܡܳܐ ܐܳܡܰܪ ܗ̱ܘܳܐ: ܐ̱ܚܪܺܢܐ ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܦܘ̣ܩܝ̱ ܠܐܘ̣ܪܥܶܗ ܒܚܰܕܘ̣ܬܳܐ ܪܳܡܶܙ ܗ̱ܘܳܐ: ܚܰܕ ܕܡܰܟܝ̣ܟ ܘܰܪܟܝ̣ܒ ܥܰܠ ܚܡܳܪܳܐ ܡܰܘܕܰܥ ܗ̱ܘܳܐ: ܘܰܐ̱ܚܪܺܢܳܐ ܕܶܐܬܬܥܝ̣ܪܝ̱ ܐܶܬܬܥܝ̣ܪܝ̱ ܐܘ̣ܪܫܠܶܡ ܡܰܙܥܶܩ ܗ̱ܘܳܐ: ܚܰܕ ܕܗܳܐ ܦܳܪܘ̣ܩܶܟܝ̱ ܙܳܚ̣ ܕܢ̣ܶܥܘ̣ܠ ܠܶܟܝ̱ ܒܬܶܫܒܘ̣ܚܬܳܐ ܡܝܰܒܶܒ ܗ̱ܘܳܐ: ܘܰܐ̱ܚܪܺܢܳܐ ܕܰܐܬܩܶܢܝ̱ ܠܶܟܝ̱ ܩ̈ܳܠܶܐ ܫܦܰܝ̈ܳܐ ܕܰܡܗܰܕܪܝ̣ܢ ܠܶܗ ܒܬܶܫܒܘ̣ܚܬܳܐ ܦܳܩܶܕ ܗ̱ܘܳܐ: ܚܰܕ ܕܩܘ̣ܡܝ̱ ܐܰܢܗܰܪܝ̱ ܝܳܬܒܰܬ݂݀ ܒܚܶܫܘ̣ܟܳܐ ܡܰܫܡܰܥ ܗ̱ܘܳܐ: ܐ̱ܚܪܺܢܳܐ ܕܐܝ̣ܩܳܪܶܗ ܕܡܳܪܝܳܐ ܥܠܰܝܟܝ̱ ܢ̣ܶܕܢܰܚ ܠܥܺܕܰܬ݀ ܩܘ̣ܕܫܳܐ ܡܣܰܒܰܪ ܗ̱ܘܳܐ: ܚܰܕ ܕܠܳܟ ܢ̣ܶܣܓܕܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ ܠܳܥܶܙ ܗ̱ܘܳܐ: ܘܰܐ̱ܚܪܺܢܳܐ ܕܡܰܠܟܘ̣ܬܳܟ ܡܰܠܟܘ̣ܬ ܟܽܠ ܥܳܠ̈ܡܝ̣ܢ ܡܙܰܡܰܪ ܗ̱ܘܳܐ: ܚܰܕ ܕܢ̣ܰܘܒܶܕ ܣܘ̣ܣܝܳܐ ܡ̣ܶܢ ܐܰܦܪܶܝܡ ܐܳܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܢ̣ܰܥܒܰܪ ܡܳܪܝܳܐ ܫܰܠܝ̣ܛܳܐ ܘܰܗܕܝ̣ܪ ܐܰܦ̈ܶܐ ܡ̣ܶܢ ܐܝ̣ܣܪܳܐܝܶܠ ܡܛܰܒܶܒ ܗ̱ܘܳܐ: ܘܟܰܕ ܠܘܳܬ ܡܰܚܰܬܬܳܐ ܕܛܘ̣ܪܳܐ ܕܙܰܝ̈ܬܶܐ ܐܶܬܡܰܢ̣ܰܥܬ ܒܬܶܫܒܚ̈ܳܬܳܐ ܕܡ̣ܶܢ ܫܰܒܪ̈ܶܐ ܫܦܰܝ̈ܳܐ ܐܶܬܩܰܠ̣ܰܣܬ: ܟܰܕ ܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܛܥܝ̣ܢܝ̣ܢ ܗ̱ܘܰܘ ܩܕܳܡ ܥܝ̣ܠܳܐ ܕܰܥܠܰܘܗ̱ܝ ܪܟܝ̣ܒ ܗ̱ܘܰܝܬ ܘܓܘ̣ܕ̈ܶܐ ܡܩܝ̣ܡܝ̣ܢ ܗ̱ܘܰܘ ܘܳܐܡܪܝ̣ܢ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ: ܘܟܰܕ ܦܰܐܝܽܘܬ ܐܰܠܳܗܳܐܝ̣ܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܡ̣ܶܢ ܝܰܠ̈ܘ̣ܕܶܐ ܘܓܰܕܘ̣ܕ̈ܶܐ ܩܰܒܶܠ̣ܬ ܕܬ̣ܶܫܬܰܒܰܚ ܥܰܡ ܫܘ̣ܒܚܳܐ ܕܰܫܡܰܝ̈ܳܢܶܐ ܚܰܠ̣ܶܛܬ ܠܩܝ̣̈ܢܳܬܗܽܘܢ ܫܰܒܪ̈ܳܝܳܬܳܐ: ܐܰܝܟ ܒܘ̣ܪ̈ܟܳܬܳܐ ܕܰܟܪ̈ܘ̣ܒܶܐ ܩܰܒܶܠ̣ܬ ܠܘ̣ܓܠܳܓܰܝ̈ܗܽܘܢ: ܐܰܝܟ ܬܶܫܒܚ̈ܳܬܳܐ ܡܨܰܠ̈ܠܳܬܳܐ ܕܰܣܪ̈ܳܦܶܐ ܒܣ̣̈ܶܡܝ̱ ܗ̱ܘ̈ܰܝ ܠܳܟ ܢܶܥܡ̈ܳܬܗܽܘܢ: ܐܰܝܟ ܝܘ̣ܒܳܒܳܐ ܕܥܝ̣ܪ̈ܰܝ ܪܰܘܡܳܐ ܫܦ̣ܰܪ ܠܳܟ ܩܳܠܰܝ̈ܗܽܘܢ: ܐܰܝܟ ܡܰܡܠ̱̈ܠܶܐ ܠܳܐ ܡܶܫܬܰܬܩ̈ܳܢܶܐ ܕܦܳܠܰܚ̈ܘܳܬܳܐ ܫܡܰܝ̈ܳܢܝܳܬܳܐ ܐܶܬܗ̣ܰܢܝ̣ܬ ܒܙܘ̣ܡܳܪ̈ܰܝܗܽܘܢ: ܐܰܝܟ ܩܝ̣ܬܳܪ̈ܶܐ ܠܳܐ ܗܘ̣̈ܠܳܢܳܝܶܐ ܕܠܶܓ̈ܝܽܘ̣ܢܶܐ ܠܳܐ ܡܶܬܚ̈ܰܙܝܳܢܝܳܬܳܐ ܐܶܣ̣ܬܰܓܝ̣ܬ ܒܣܰܘ̈ܟܰܝܗܽܘܢ: ܐܰܝܟ ܢܘ̣ܨܪ̈ܳܬܳܐ ܕܛܶܟܣܝ̣̈ܣ ܥܶܠܳܝ̈ܳܬܳܐ ܐܶܫ̣ܬܰܒܰܚܬ ܒܐܘ̣ܫܰܥܢܰܝ̈ܗܽܘܢ ܥܶܠܳܝ̈ܶܐ ܘܬܰܚ̈ܬܳܝܶܐ ܐܶܬܚ̣ܰܠܰܛܘ̱ ܒܡܘ̣ܟܳܟܳܟ: ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ ܬܗ̣ܰܪܘ̱ ܒܡܶܬܢܰܚܬܳܢܘ̣ܬܳܟ: ܣܳܛܳܢܳܐ ܘܚܰܝ̈ܠܰܘܳܬܶܗ ܐܶܫܬܰܦ̣ܰܕܘ̱ ܒܚܶܙܘܳܟ: ܣܳܦܪ̈ܶܐ ܘܰܦܪ̈ܝ̣ܫܶܐ ܐܶܬ̣ܥܰܘܰܪܘ̱ ܒܰܚܣܳܡܳܐ: ܟܳܗ̈ܢܶܐ ܕܰܒܠܝ̣ܡܝ̣ܢ: ܣܳܒ̈ܶܐ ܕܫܰܬܝ̣ܩܝ̣ܢ: ܠܶܘ̈ܳܝܶܐ ܕܡܶܬܠܰܬܟܝ̣ܢ: ܡܥܰܪ̈ܦܳܢܶܐ ܕܰܛܪܝ̣ܕܝ̣ܢ: ܟܘ̣ܪ̈ܣܰܘܳܬܳܐ ܕܰܗܦܝ̣ܟܝ̣ܢ: ܝܰܘ̈ܢܶܐ ܘܥܶܪ̈ܒܶܐ ܘܬܰܘܪ̈ܶܐ ܕܒܰܛܝ̣ܠܝ̣ܢ: ܚܘ̣ܠ̈ܡܳܢܶܐ ܕܡܶܬܝܰܗܒܝ̣ܢ: ܘܳܐܦ ܚܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܟܰܕ ܒܰܡܕܰܒܪܳܢܘ̣ܬܳܟ ܦܰܐܝܰܬ݀ ܠܰܐܠܳܗܳܐ ܡܶܬܒܰܩܶܝܢܰܢ: ܡܰܘܕܶܝܢܰܢ ܘܣܳܓ̇ܕܝ̣ܢܰܢ ܘܰܡܫܰܒܚܝ̣ܢܰܢ ܠܳܟ: ܘܰܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܪ̈ܰܚܡܶܐ ܕܝ̣ܠܳܟ ܗܳܠܶܝܢ ܕܰܒܗܽܘܢ ܐܶܬܪܟܶܢ̣ܬ ܠܘܳܬ ܡܘ̣ܟܳܟܰܢ: ܕܬ̣ܰܫܘܶܐ ܠܰܢ ܕܢ̇ܩܰܪܶܒ ܠܳܟ ܒܝܰܘܡܳܐ ܗܳܢܳܐ ܩܰܕܝ̣ܫܳܐ ܕܐܘ̣ܫܰܥ̈ܢܶܐ ܥܰܡ ܛܥܝ̣ܢܘ̣ܬ ܣܰܘ̈ܟܶܐ ܬܶܫܒ̈ܚܳܬܳܐ ܫܰܦܝ̣ܪ̈ܳܬܳܐ: ܙܘ̣ܡܳܪ̈ܶܐ ܕܟܰܝ̈ܳܐ: ܗܘ̣̈ܠܳܠܶܐ ܙܗܰܝ̈ܳܐ: ܪܘ̣ܡܪ̈ܳܡܶܐ ܗܕܝ̣ܪ̈ܶܐ: ܩܝ̣̈ܢܳܬܳܐ ܡܨܰܠ̈ܠܳܬܳܐ: ܢܶܥܡ̈ܳܬܳܐ ܗܰܢܺܝ̈ܳܐܬܳܐ: ܐܰܝܟܰܢܳܐ ܕܥܰܡ ܓܘ̣ܕ̈ܶܐ ܠܳܐ ܗܘܠܳܢܳܝ̈ܳܬܳܐ ܩܳܠܰܝ̈ܢ ܢ̣ܶܬܚܰܠܛܽܘܢ ܘܥܰܡܗܽܘܢ ܢ̣ܶܬܩܰܒܠܽܘܢ ܩܕܳܡ ܬܪܘ̣ܢܘ̣ܣ ܡܥܰܠܝܳܐ ܕܐܝ̣ܩܳܪܳܟ: ܠܰܢܝܳܚܳܐ ܕܪ̈ܰܚܡܰܝܟ ܘܰܠܢܘ̣ܛܳܪܳܐ ܕܟܽܠܳܗ̇ ܥܺܕܬܳܐ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝ̇ܬܳܐ ܐܰܝܟܰܢܳܐ ܕܰܒܫܰܝܢܳܐ ܘܒܰܫܠܳܡܳܐ ܕܡܶܢܳܟ ܬ̣ܶܬܒܰܣܰܡܝ̱: ܘܒܰܢܛܝ̣ܪܘ̣ܬܳܐ ܘܫܽܘܘ̣ܙܳܒܳܐ ܕܡ̣ܶܢ ܟܽܠ ܢܶܟܝ̈ܳܢܝ̣ܢ ܘܦܳܠܰܓ̈ܘܳܬܳܐ ܘܦܘ̣ܠ̈ܗܳܕܶܐ ܕܫܺܐܕ̈ܶܐ ܘܕܰܒܢܰܝ̈ܢܳܫܳܐ ܒܝ̣̈ܫܶܐ ܥܕܰܡܳܐ ܠܫܘ̣ܠܳܡܳܐ ܬܶܬ̣ܩܰܝܰܡܝ̱: ܘܰܠܪ̈ܳܥܰܘܳܬܳܐ ܘܩܳܝܘ̣̈ܡܶܐ ܘܰܡܕܰܒܪ̈ܳܢܶܐ ܕܒܳܗ̇ ܒܰܫܦܝ̣ܥܘ̣ܬ ܡܰܘܗ̈ܒܳܬܳܐ ܐܰܠܳܗܳܝ̈ܳܬܳܐ ܟܰܠܶܠ ܘܰܓܡܘ̣ܪ: ܘܰܫܦܝ̣ܥܘ̣ܬܳܐ ܕܥܰܠ̱̈ـܠܳܬܳܐ ܘܦܺܐܪ̈ܶܐ ܕܰܐܪܥܳܐ ܒܛܝܒܘ̣ܬܳܟ ܫܰܟܶܢ: ܠܒܘ̣ܝܳܐܳܐ ܘܡܘ̣ܠܳܝܳܐ ܕܰܣܢܝ̈ܩܶܐ ܘܡܶܣ̈ܟܺܢܶܐ ܘܰܨܪ̈ܝ̣ܟܶܐ: ܘܰܠܗܳܠܶܝܢ ܕܰܒܬܰܘܫܳܐ ܕܒܝ̈ܫܳܬܳܐ ܣ̣ܛܰܘ ܡ̣ܶܢ ܬܪܝ̣ܨܘ̣ܬ ܫܘ̣ܒܚܳܐ ܕܝ̣ܠܳܟ ܐܰܘܫܶܛ ܠܗܽܘܢ ܝܰܡܝ̣ܢܳܟ ܘܰܐܩܝ̣ܡ ܐܶܢܽܘܢ: ܘܠܰܐܪܥܳܐ ܘܰܠܥܳܡܘ̣ܪ̈ܶܝܗ̇ ܦܰܨܳܐ ܡ̣ܶܢ ܡܰܪܕܘ̣ܬܳܐ ܩܫܝ̣ܬܳܐ ܘܡ̣ܶܢ ܢܶܣܝ̈ܘ̣ܢܶܐ ܟܣ̈ܰܝܳܐ ܘܰܓܠܰܝ̈ܳܐ: ܘܰܠܗܳܠܶܝܢ ܕܰܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܐܶܫ̣ܬܰܡܠܝ̣ܘ ܘܰܠܘܳܬܳܟ ܚܙܰܩ̣ܘ̱ ܡ̣ܶܢ ܚܰܝ̈ܶܐ ܗܳܠܶܝܢ: ܐܰܢܝ̣ܚ ܐܶܢܽܘܢ ܒܰܐܘ̈ܘܳܢܶܐ ܕܝ̣ܠܳܟ ܛܘ̣ܒ̈ܬܳܢܶܐ: ܘܰܒܬܰܟܫ̈ܦܳܬܳܐ ܩܰܕܝ̈ܫܳܬܳܐ ܕܝܳܠܶܕܬܳܟ: ܘܰܕܟܽܠܗܽܘܢ ܡܢܝ̣̈ܚܳܢܰܝܟ: ܫܰܟܶܢ ܠܰܢ ܕܰܢ̇ܥܰܕܥܶܕ ܠܳܟ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܥܺܐܕ̈ܶܐ ܕܰܕܝܳܨܳܐ ܘܰܕܚܰܕܘ̣ܬܳܐ ܥܰܡ ܢܳܛܘ̣ܪܘ̣ܬܳܐ ܕܬܰܘܕܝ̣ܬܳܐ ܫܠܝ̣ܚܳܝ̇ܬܳܐ ܘܰܒܚܘ̣ܪܳܪܳܐ ܕܡ̣ܶܢ ܫܟܝ̣ܪܘ̣ܬܳܐ ܕܚܰܫ̈ܶܐ ܒܰܡܨܰܠܠܘ̣ܬܳܐ ܕܚܘ̣ܫ̈ܳܒܶܐ: ܒܕܰܟܝܘ̣ܬܳܐ ܕܦܰܓܪܳܐ: ܒܙܰܗܝܽܘ̣ܬܳܐ ܕܢܰܦܫܳܐ: ܒܩܰܕܝ̣ܫܘ̣ܬܳܐ ܕܪܘ̣ܚܳܐ ܘܒܢܰܗܝ̣ܪܘ̣ܬܳܐ ܕܗܰܘܢܳܐ: ܐܰܝܟܰܢܳܐ ܕܰܒܣܰܘ̈ܟܶܐ ܠܳܐ ܡܳܝܽܘ̣̈ܬܶܐ ܒܟܶܢ̈ܫܶܐ ܕܩܰܕܝ̣̈ܫܰܝܟ ܠܐܘ̣ܪܥܳܐ ܕܝ̣ܠܳܟ ܢ̇ܶܦܘ̣ܩ ܒܝܰܘܡܳܐ ܕܕܶܢܚܳܟ ܫܒܝ̣ܚܳܐ ܘܒܰܦܨܝ̣ܚܘ̣ܬܳܐ ܘܰܪܘܳܙܳܐ ܪܘ̣ܚܳܢܳܝܳܐ ܢ̇ܰܣܶܩ ܠܳܟ ܫܘ̣ܒܚܳܐ ܦܰܐܝܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀