ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܰܝܳܢܳܐ ܕܕܰܝ̈ܳܢܶܐ ܕܐܶܬ̣ܬܕܝ̣ܢ: ܘܙܰܟܝ̣ ܠܚܰܝܳܒܘ̣ܬܰܢ ܒܫܶܬܩܶܗ: ܠܗܰܘ̇ ܦܳܪܘ̣ܩܳܐ ܕܝܰܗ̣ܒ ܓܘ̣ܫܡܶܗ ܠܡܰܚ̈ܘܳܬܳܐ ܘܦܰܟܰܘ̈ܗ̱ܝ ܠܫܘ̣̈ܩܳܦܶܐ: ܘܰܦܪܰܥ ܚܰܘ̈ܒܳܬܰܢ ܒܢܶܓ̈ܕܰܘܗ̱ܝ ܘܐܰܚ̣ܶܫ ܠܚܰܫܰܝ̈ܢ ܒܚܰܫܰܘ̈ܗ̱ܝ ܘܐܰܥܒ̣ܪ ܚܶܣܕܰܢ ܒܨܰܥܪܶܗ ܘܰܫܩ̣ܰܠ ܠܠܰܘ̈ܛܳܬܰܢ ܒܰܟܠܝ̣ܠܶܗ ܘܐܰܥ̣ܪܶܩ ܠܩܳܛܘ̣ܠܰܢ ܒܩܶܛܠܶܗ: ܘܐܰܡܝ̣ܬ ܠܡܰܘܬܰܢ ܒܡܰܘܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܣܘ̣ܬܳܪܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܐܰܠܳܗܳܐ ܡܶܠܬܳܐ ܝ̣ܚܝ̣ܕܳܝܳܐ ܕܡ̣ܶܢ ܐܰܒܳܐ: ܗܰܘ̇ ܕܰܒܨܶܒܝܳܢܳܐ ܕܝ̣ܠܳܟ ܛܳܒܳܐ ܘܰܒܡܰܥܒܕܳܢܘ̣ܬܳܐ ܕܪܘ̣ܚܳܟ ܩܰܕܝ̣ܫܳܐ ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ: ܐܶܬܚ̣ܰܝܰܕܬ ܠܒܶܣܪܳܐ ܒܰܪ ܟܝܳܢܳܐ ܕܝ̣ܠܰܢ: ܚܕܳܝܘ̣ܬܳܐ ܠܳܐ ܡܶܣܬܰܕܩܳܢܝ̣ܬܳܐ: ܘܰܒܟܽܠ ܡܶܕܶܡ ܣܛܰܪ ܡ̣ܶܢ ܚܛܝ̣ܬܳܐ ܠܰܢ ܐܶܬ̣ܕܰܡܝ̣ܬ: ܘܐܶܬܗܰܦܰܟ݂ܬ ܥܰܡܰܢ ܐܰܠܳܗܳܐܝ̣ܬ ܘܐ̱ܢܳܫܳܐܝ̣ܬ: ܐܰܠܳܗܳܐܝ̣ܬ ܒܚܰܝ̈ܠܶܐ: ܘܐ̱ܢܳܫܳܐܝ̣ܬ ܒܚܰܫ̈ܶܐ ܘܡܰܘܬܳܐ: ܘܰܒܡܘ̣ܠܳܝܳܐ ܕܟܽܠܳܗ̇ ܡܕܰܒܪܳܢܘ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ: ܠܚܰܘܒܬܳܐ ܕܓܶܢܣܳܐ ܕܝ̣ܠܰܢ ܒܢܰܝ̈ܢܳܫܳܐ ܦܘ̣ܪܥܳܢܳܐ ܡܫܰܡܠܝܳܐ ܫܰܟܶܢ̣ܬ ܘܡܰܥܰܠܬܳܐ ܕܰܠܘܳܬ ܚܰܝ̈ܶܐ ܚ̣ܰܕ̈ܬܶܐ ܠܟܽܠܰܢ ܚܰܘܝ̣ܬ: ܟܰܕ ܥ̣ܛܰܝܬ ܠܡܰܘܬܳܐ ܘܰܠܣܳܛܳܢܳܐ ܘܠܰܚܛܝ̣ܬܳܐ: ܘܒܰܥܒܳܕܳܐ ܫܰܪܝ̣ܪܳܐܝ̣ܬ ܠܘܳܬ ܚܰܫܳܐ ܦܳܪܘ̣ܩܳܝܳܐ ܐܶܬ̣ܰܝܬ ܐܰܝܟܰܢܳܐ ܕܕܺܝܰܬܝ̣ܩܝ̣ ܚ̇ܕܰܬܳܐ ܒܰܕܡܳܟ ܙܰܟܳܝܳܐ ܠܰܢ ܬܶܟ̣ܬܘ̣ܒ: ܘܡܘ̣ܟܳܟܳܐ ܘܚܰܫܳܐ ܘܨܰܥܪܳܐ: ܘܚܶܣܕܳܐ ܘܡܘ̣ܝܳܩܳܐ ܡ̣ܶܢ ܚܰܪܡܘ̣ܬܗܽܘܢ ܕܝܘ̣̈ܕܳܝܶܐ ܒܥܶܠ̈ܕܒܳܒܶܐ ܕܰܫܪܳܪܳܐ: ܘܒܰܝ̈ܬܳܝܶܐ ܚܰܬܝ̣̈ܬܶܐ ܕܳܐܟܶܠܩܰܪܨܳܐ: ܡܶܛܽܠܳܬܰܢ ܣܒܰܠ̣ܬ ܘܣܰܝܒ̣ܰܪܬ ܘܡܶܛܽܠ ܣܰܓܺܝܐܘ̣ܬܳܐ ܕܪ̈ܰܚܡܰܝܟ ܘܥܘ̣ܬܪܳܐ ܕܰܚܢܳܢܳܟ ܚܠܳܦ ܐܳܕܳܡ ܚܰܝܳܒܳܐ ܝܰܘܡܳܢܳܐ ܠܡܶܣ̣ܒܰܠ ܚܰܫ̈ܶܐ ܨܶܒܝܳܢܳܐܝ̣ܬ ܐܶܬ̣ܰܝܬ: ܐܰܝܟܰܢܳܐ ܕܰܬ̣ܚܰܪܪܝ̣ܘܗ̱ܝ ܡ̣ܶܢ ܓܙܳܪܕܝ̣ܢܳܐ ܕܒܰܥܒܳܪ ܦܘ̣ܩܕܳܢܳܐ ܩܰܕܶܡ̣ܬ ܫܰܘܕܰܥ̣ܬ: ܘܫܰܡܠܝ̣ܬ ܒܰܩܢܘ̣ܡܳܟ ܠܨܘ̣ܪܬܳܐ ܚܰܬܝ̣ܬܬܳܐ ܘܡܰܠ̣ܝܰܬ݀ ܦܘ̣ܪܩܳܢܳܐ ܗܳܝ̇ ܕܡ̣ܶܢ ܡܘ̣ܫܶܐ ܥܰܒܕܳܟ ܒܡܶܨܪܶܝܢ ܩܰܕܡܰܬ݀ ܐܶܬܪܰܫܡ̣ܰܬ݀ : ܒܪܰܡܫܳܐ ܗܰܘ̇ ܕܦܘ̣ܪܩܳܢܳܐ ܟܰܕ ܩܕܳܡ ܓܘ̣ܕܳܐ ܗܳܝ̇ ܫܠܝ̣ܚܳܝ̇ܬܳܐ ܠܗܳܕܶܐ ܫܰܡܠܝ̣ܬ ܒܥܶܠܝ̣ܬܳܐ ܗܳܝ̇ ܡܰܠ̣ܝܰܬ݀ ܫܘ̣ܘܕܳܥܳܐ ܘܐ̱ܪ̈ܳܙܶܐ ܡܰܚ̈ܝܳܢܶܐ ܕܥܺܕܬܳܟ ܩܰܕܝ̣ܫܬܳܐ: ܟܰܕ ܓܶܝܪ ܠܥܰܬܝ̣ܩܬܳܐ ܒܶܐܡܪܳܐ ܚܰܬܶܡ̣ܬ ܒܰܚ̇ܕܰܬܳܐ ܒܠܰܚܡܳܐ ܫܰܪܝ̣ܬ: ܘܦܰܓܪܳܟ ܘܰܕܡܳܟ ܝܰܗ̣ܒܬ ܠܰܢ ܒܰܚܫܳܡܝ̣ܬܳܐ ܗܳܝ̇ ܐ̱ܪܳܙܳܢܳܝܬܳܐ: ܘܡܶܬܰܐܟܠܳܢܳܐ ܘܡܶܫܬܰܬܝܳܢܳܐ ܗ̣ܘܰܝܬ ܠܰܢ ܠܚܘ̣ܣܳܝܳܐ ܕܚܰܘ̈ܒܶܐ: ܐܰܪܟܶܢ̣ܬ ܪܝ̣ܫܳܟ ܠܢܘ̣ܫܰܩܬܳܐ ܕܢܶܟܠܳܐ ܐܶܬܠܒ̣ܶܟ݂ܬ ܡ̣ܶܢ ܥܰܡܳܐ ܠܝ̣ܛܳܐ ܕܝܘ̣̈ܕܳܝܶܐ: ܘܰܒܝܰܕ ܡܘ̣ܟܳܟܳܐ ܕܝ̣ܠܳܟ ܨܶܒܝܳܢܳܝܳܐ ܐܶܬ̣ܰܝܬ ܠܨܰܥܪܳܐ ܕܰܙܩܝ̣ܦܳܐ: ܥܰܠ̣ܬ ܩܳܡ̣ܬ ܚܠܳܦܰܝܢ ܒܶܝܬ ܕܝ̣ܢܳܐ ܒܝܰܘܡܳܐ ܕܶܫܬܳܐ ܐܰܝܟܰܢܳܐ ܕܰܚܢܰܢ ܢܶܫ̇ܬܰܘܙܰܒ ܡ̣ܶܢ ܡܣܳܡܒܪܝ̣ܫܳܐ ܘܰܓܙܳܪܕܝ̣ܢܳܐ ܕܰܥܠܰܝܢ ܒܠܰܥ̣ܬ ܥܰܠ ܦܰܟܳܟ ܡ̣ܶܢ ܥܰܒܕܳܐ ܡܰܪܳܚܳܐ: ܕܠܰܢ ܬ̣ܚܰܪܰܪ ܡ̣ܶܢ ܥܰܒܕܘ̣ܬܳܐ ܘܚܘ̣ܝܳܒܳܐ ܕܰܚܛܝ̣ܬܳܐ: ܐܶܬ̣ܬܕܝ̣ܢܬ ܐܰܝܟ ܓܰܒܪܳܐ ܡܰܣܟܠܳܢܳܐ ܘܙܰܟܝ̣ܬ ܠܓܶܢܣܰܢ ܚܰܝܳܒܳܐ: ܐܶܬܢܰܓܰܕܬ ܒܰܦܪ̈ܳܓܷܠܶܐ ܡ̣ܶܢ ܦܝ̣ܠܰܛܘ̣ܣ ܕܰܝܳܢܳܐ ܘܰܦܪܰܥ̣ܬ ܚܰܘܒܬܳܐ ܕܪܝ̣ܫ ܓܶܢܣܰܢ ܬܰܚܘ̣ܒܳܐ: ܘܰܒܝܰܕ ܪܘ̣ܩܳܐ ܗܰܘ̇ ܕܩܰܒ̣ܶܠ ܦܰܪܨܘ̣ܦܳܟ ܡ̣ܶܢ ܛܰܡ̈ܶܐܐ ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܐܰܥܒ̣ܰܪܬ ܚܶܣܕܳܐ ܕܒܶܗܬܬܳܐ ܪܰܒܬܳܐ ܡ̣ܶܢ ܐܰܦ̈ܶܐ ܕܟܽܠܰܢ ܗܳܝ̇ ܕܒܰܥܒܳܪ ܦܘ̣ܩܕܳܢܳܐ ܐܰܡܠ̣ܟܰܬ݀ ܥܠܰܝܢ: ܠܒܶܫ̣ܬ ܡܳܐܢ̈ܶܐ ܕܩܘ̣ܕܫܳܐ ܒܝܰܕ ܒܶܙܚܳܐ ܡܡܰܝܩܳܢܳܐ ܕܝܘ̣̈ܕܳܝܶܐ ܕܠܰܢ ܬܰܠ̣ܒܶܫ ܪܘ̣ܚܳܐ ܩܰܕܝ̣ܫܳܐ: ܗܰܘ̇ ܕܡܶܢܶܗ ܐܶܫܬܰܠܰܚ̣ܢܰܢ ܒܶܝܬ ܐܝ̣ܠܳܢ̈ܶܐ ܒܝܰܕ ܚܣܳܡܶܗ ܕܚܶܘܝܳܐ ܚܰܪܡܳܢܳܐ: ܘܰܒܟܘ̣̈ܒܰܘܗ̱ܝ ܕܰܟܠܝ̣ܠܳܟ ܥܩ̣ܰܪܬ ܠܰܚܛܝ̣ܬܳܐ ܗܳܝ̇ ܕܙܶܪܥ̣ܰܬ݀ ܡܰܘܬܳܐ ܒܗܰܕܳܡܰܝ̈ܢ: ܘܰܒܩܰܢܝܳܐ ܕܒܶܙܚܳܐ ܕܐܰܠܒܟܘ̣ܟ ܟܳܗ̈ܢܰܝ ܥܰܡܳܐ ܟܬܰܒ̣ܬ ܠܰܫ̈ܡܳܗܶܐ ܕܝ̣ܠܰܢ ܒܣܶܦܪܳܐ ܕܚܰܝ̈ܶܐ: ܐܶܬ̣ܬܠܝ̣ܬ ܥܰܪܛܶܠܳܐܝ̣ܬ ܥܰܠ ܪܝ̣ܫ ܩܰܝܣܳܐ ܘܒܰܫܠܳܚ ܒܶܣܪܳܟ ܦܰܪܣܝ̣ܬ ܘܰܐܒܗ̣ܶܬܬ ܠܰܐܪܟܘܳܢܳܐ ܕܐܳܐܰܪ ܗܰܘ̇ ܪܝ̣ܫܳܐ ܕܒܝ̣̈ܫܳܬܳܐ ܘܐܰܒܳܐ ܕܕܰܓܳܠܘ̣ܬܳܐ ܐܶܠܳܐ ܘܰܠܦܘ̣ܪܣܳܝܶܗ ܕܐܳܕܳܡ ܢܰܟܶܦ̣ܬ: ܘܰܚܠܳܦ ܐܝ̣ܕܳܐ ܕܩܶܛܦ̣ܰܬ݀ ܦܺܐܪܳܐ ܘܐܰܥܠ̣ܰܬ݀ ܡܰܘܬܳܐ ܥܰܠ ܟܽܠ ܕܳܪ̈ܝ̣ܢ: ܝܰܗ̣ܒܬ ܐܝ̣ܕܰܝ̈ܟ ܩܰܕܝ̣̈ܫܳܬܳܐ ܠܨܶܨ̈ܐ: ܘܪ̈ܶܓܠܰܝܟ ܠܳܐ ܡܛܰܘ̈ܫܳܬܳܐ ܠܰܐܣܘ̣ܪ̈ܶܐ ܕܦܰܪܙܠܳܐ: ܐܶܫܬܝ̣ܬ ܚܰܠܳܐ ܘܰܛܥܶܡ̣ܬ ܡܪܳܪ̈ܶܐ ܚܠܳܦ ܡܶܐܟܘ̣ܠܬܳܐ ܕܡ̣ܶܢ ܐܝ̣ܠܳܢܳܐ ܗܰܘ̇ ܩܳܛܘ̣ܠܳܐ: ܥܰܡ ܥܰܘ̈ܳܠܶܐ ܐܶܬ̣ܡܢܝ̣ܬ ܘܒܰܝܢܳܬ ܓܰܝ̈ܳܣܶܐ ܐܶܬܚ̣ܰܣܰܕܬ ܕܰܠܚܶܣܕܶܗ ܕܐܳܕܳܡ ܬܰܥ̣ܒܰܪ: ܘܰܓܡ̣ܰܪܬ ܘܫܰܡܠܝ̣ܬ ܒܰܩܢܘ̣ܡܳܟ ܟܽܠܗܶܝܢ ܐܰܝܠܶܝܢ ܕܰܪܫܰܡ̣ܘ̱ ܘܨܳܪܘ̱ ܠܳܟ ܢܒܺܝܰܘ̈ܳܬܳܐ ܕܐܰܒܘ̣ܟ ܡ̣ܶܢ ܩܕܝ̣ܡ: ܘܐܶܡ̣ܰܪܬ ܕܗܳܐ ܡܫܰܠܰܡ ܟܽܠ ܡܶܕܶܡ: ܐܝ̣ܢ ܡܳܪܝܳܐ ܪ̈ܳܚܶܡܢܳܫܳܐ ܗܰܘ̇ ܕܟܽܠܳܗ̇ ܗܳܕܶܐ ܡܕܰܒܪܳܢܘ̣ܬܳܐ ܪܶܚ̣ܡܰܬ݀ ܐ̱ܢܳܫܳܐܝ̣ܬ ܚܠܳܦ ܦܘ̣ܪܩܳܢܰܢ ܫܰܡܠܝ̣ܬ: ܒܳܥܶܝܢܰܢ ܡܶܢܳܟ ܟܰܕ ܡܶܬܕܟܰܪ ܐܰܢ̱ܬ ܠܡܘ̣ܟܳܟܳܟ ܗܰܘ̇ ܕܰܠܥܶܠ ܡ̣ܶܢ ܡܶܠܬܳܐ ܘܰܠܚܰܫ̈ܶܐ ܕܝ̣ܠܳܟ ܨܶܒܝ̈ܳܢܳܝܶܐ ܘܠܳܐ ܥܕܝ̣̈ܠܶܐ ܘܳܐܦ ܠܪ̈ܰܚܡܶܐ ܫܦܝ̣̈ܥܶܐ ܕܝ̣ܠܳܟ ܕܰܠܘܳܬܰܢ: ܗܳܫܳܐ ܬܚ̣ܰܕܶܬ ܒܝܰܘܡܳܐ ܕܰܐܢܶܐܩܶܐܢܺܝܰܐ (ܚܘ̣ܕܳܬܳܐ) ܕܚܰܫܳܟ ܦܳܪܘ̣ܩܳܝܳܐ ܘܡܰܥܒܶܕ ܚܰܝ̈ܶܐ: ܘܢܰܛܰܪ ܒܰܨܠܝ̣ܒܳܟ ܙܰܟܳܝܳܐ ܠܥܺܕܬܳܟ ܩܰܕܝ̣ܫܬܳܐ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝ̇ܬܳܐ ܕܗܳܪܟܳܐ ܘܕܰܒܟܽܠܕܘ̣ܟ ܕܥܰܡ ܗܰܝܡܳܢܘ̣ܬܳܐ ܠܳܐ ܥܕܝ̣ܠܬܳܐ ܣܳܓ̇ܕܳܐ ܠܚܰܫܰܝ̈ܟ ܘܡܰܘ̇ܕܝܳܐ ܒܐ̱ܢܳܫܝ̈ܳܬܳܐ ܕܝ̣ܠܳܟ: ܘܝܳܕ̇ܥܳܐ ܠܳܟ ܐܰܠܳܗܳܐ ܕܥܰܠ ܟܽܠ ܫܰܪܝ̣ܪܳܐܝ̣ܬ: ܘܡܶܬܟܰܫܦܝ̣ܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢܰܢ ܡܚܝ̣̈ܠܶܐ ܘܕܳܘܰܝ̈ܳܐ ܡܶܬܩܰܪܰܒ ܠܳܟ ܒܥܶܕܳܢܳܐ ܗܳܢܳܐ ܕܒܶܗ ܥ̱ܘ̣ܗܕܳܢܳܐ ܕܚܰܫܰܝ̈ܟ ܡܫܰܡܠܝ̣ܢܰܢ: ܗܳܢܽܘܢ ܕܰܒܗܽܘܢ ܐܶܬܠܰܚ̣ܝܰܬ݀ ܣܰܟܠܘ̣ܬܳܐ ܕܝ̣ܠܰܢ: ܕܰܬ̣ܫܰܟܶܢ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܕܰܒܗܽܘܢ ܐܶܬܟܰܬܰܡ̣ܢܰܢ ܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ: ܘܛܰܪ ܠܰܢ ܩܕܳܡܰܝܟ ܒܚܰܝ̈ܶܐ ܠܳܐ ܥܕܝ̣̈ܠܶܐ ܘܰܕܟܰܝ̈ܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܥܕܰܡܳܐ ܠܰܢܫܰܡܬܳܐ ܐ̱ܚܪܳܝܬܳܐ: ܟܰܕ ܥܰܡ ܦܪܶܗܣܺܝܰܐ ܕܫܳܘܝܳܐ: ܐܳܦ ܚܢܰܢ ܒܐܝ̣̈ܕܰܝܳܐ ܕܐܰܒܳܐ ܕܝ̣ܠܳܟ ܩܰܕܝ̣ܫܳܐ ܠܢܰܦ̈ܫܳܬܰܢ ܡܰܓܥܠܝ̣ܢܰܢ: ܐܰܝܟܰܢܳܐ ܕܰܒܝܰܘܡܳܐ ܗܰܘ̇ ܕܡܶܐܬܝ̣ܬܳܟ ܫܒܝ̣ܚܬܳܐ: ܕܥܰܡ ܢܝ̣ܫܳܐ ܪܰܒܳܐ ܘܦܳܪܘ̣ܩܳܝܳܐ ܕܰܨܠܝ̣ܒܳܐ ܕܝ̣ܠܳܟ ܡܰܥܒܶܕ ܚܰܝ̈ܶܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀