ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܩܰܒܠܳܢܳܐ ܕܰܨܠܰܘ̈ܳܬܳܐ: ܕܒܰܨܠܘ̣ܬܳܐ ܕܰܚܠܳܦܰܝܢ ܬܟܝ̣ܒܳܐܝ̣ܬ ܩܳܡ̣: ܠܗܰܘ̇ ܫܳܡܘ̣ܥܳܐ ܕܒܳܥܘ̈ܳܬܳܐ: ܕܒܳܥܘ̣ܬܳܐ ܒܚܰܫܳܐ ܡܶܛܽܠܳܬܰܢ ܠܝܳܠܘ̣ܕܶܗ ܩ̣ܰܪܶܒ: ܠܗܰܘ̇ ܕܠܶܗ ܟܽܠ ܒܪܘ̣ܟ ܬ̣ܟܘ̣ܦܝ̱ ܕܒܘ̣ܪܟܳܐ ܒܰܚܢܰܓܬܳܐ ܥܰܠ ܐܰܦܰܝ̈ܢ ܩܕܳܡ ܐܰܒܘ̣ܗ̱ܝ ܣ̣ܳܡ: ܠܗܰܘ ܕܰܒܕܘ̣ܥܬܳܐ ܠܳܐܕܳܡ ܡܶܐܟܘ̣ܠܬܳܐ ܬܰܚ̣ܶܡ: ܕܫܶܠ̈ܬܶܐ ܕܰܕܡܳܐ ܒܰܐܓܘ̣ܢܳܐ ܕܠܘ̣ܩܒܰܠ ܒܥܶܠܕܰܪܰܢ ܕܥ̣ܶܬ: ܠܗܰܘ̇ ܠܒܝ̣ܟܳܐ ܕܰܕܚ̣ܶܠ ܕܠܰܢ ܠܒܝ̣ܒܘ̣ܬܳܐ ܢܫ̣ܰܟܶܢ: ܠܗܰܘ̇ ܡܰܥܒܪܳܢܳܐ ܕܥܳܩ̈ܳܬܰܢ ܘܡܳܪܳܐ ܕܚܕ̈ܘܳܬܰܢ ܕܐܶܬ̣ܬܥܝ̣ܩ ܐܶܬ̣ܟܡܰܪ ܘܰܥܕܰܡܳܐ ܠܡܰܘܬܳܐ ܟܶܪܝܰܬ݀ ܠܶܗ ܕܰܠܟܰܪܝܘ̣ܬܳܐ ܘܠܰܟܡܝ̣ܪܘ̣ܬܳܐ ܕܝ̣ܠܰܢ ܢܶܥ̣ܛܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܡܳܪܳܐ ܕܰܫܪܳܪܳܐ ܘܐܰܠܳܗܳܐ ܘܦܳܪܘ̣ܩܳܐ ܕܢܰܦ̈ܫܳܬܰܢ: ܡܥܰܕܪܳܢܳܐ ܕܰܡܚܝ̣ܠܘ̣ܬܰܢ ܘܝܳܨܘ̣ܦܳܐ ܕܡܶܣܟܺܢܘ̣ܬܰܢ ܝܶܫܘ̣ܥ ܡܫܝ̣ܚܳܐ: ܗܰܘ̇ ܕܡܶܛܽܠ ܫܶܦܠܳܐ ܕܬܰܚܘ̣ܒܘ̣ܬܰܢ ܕܒܰܥܒܳܪ ܦܘ̣ܩܕܳܢܳܐ ܠܘܳܬ ܣܘ̣ܪܳܩܳܐ ܨܶܒܝܳܢܳܝܳܐ ܘܚܰܫ̈ܶܐ ܐ̱ܢܳܫܳܝ̈ܶܐ ܐܶܬ̣ܰܝܬ: ܐܰܝܟܰܢܳܐ ܕܠܰܢ ܡ̣ܶܢ ܚܰܫ̈ܶܐ ܫܟܝ̣ܪ̈ܶܐ ܘܠܳܐ ܢܳܡܘ̣̈ܣܳܝܶܐ ܬܚ̣ܰܪܰܪ ܘܰܠܘܳܬ ܡܰܘܬܳܐ ܕܒܰܨܠܝ̣ܒܳܐ ܐܶܬ̣ܰܝܬ: ܘܡܶܫܬܰܡܥܳܢܘ̣ܬܳܐ ܣܰܓܺܝ̣ܐܬܳܐ ܚܰܘܝ̣ܬ: ܘܕܶܚܠܬܳܐ ܘܥܳܩܬܳܐ ܘܟܰܪܝܘ̣ܬܳܐ ܟܡܝ̣ܪܳܐܝ̣ܬ ܣܒܰܠ̣ܬ: ܘܰܨܠܘ̣ܬܳܐ ܘܒܳܥܘ̣ܬܳܐ ܬܟܝ̣ܒܳܐܝ̣ܬ ܒܰܚܢܰܓܬܳܐ ܩܕܳܡ ܐܰܒܘ̣ܟ ܩܰܪܶܒ̣ܬ: ܘܰܕܢܰܥ̣ܒܰܪ ܡܶܢܳܟ ܟܳܣܳܐ ܕܡܰܘܬܳܐ ܡܰܪܝ̣ܪܳܐ ܠܶܗ ܐܰܦܝ̣ܣܬ ܐܶܢܗܘ̣ ܕܡܶܫܟܚܳܐ: ܐܶܢܕܶܝܢ ܠܳܐ ܡܶܬܡܰܨܝܳܢܝ̣ܬܳܐ ܐܝ̣ܬܶܝܗ̇ ܠܨܶܒܝܳܢܶܗ ܝܰܗ̣ܒܬܳܝܗ̱ܝ ܕܢܶܗ̣ܘܶܐ: ܘܰܐܘܕܰܥ̣ܬ ܕܒܰܫܪܳܪܳܐ ܟܝܳܢܳܐܝ̣ܬ ܘܨܶܒܝܳܢܳܐܝ̣ܬ ܚܰܫ̣ܬ ܒܰܒܣܰܪ ܠܳܐ ܗ̱ܘܳܐ ܒܦܰܢܛܰܣܺܝܰܐ ܐܰܘ ܗܰܓܳܓܘ̣ܬܳܐ: ܘܚܘ̣ܝܳܠܳܐ ܕܡܶܢ ܡܰܠܰܐܟܳܐ ܥܠܰܝܟ ܩܰܒܶܠ̣ܬ: ܘܐܰܠܶܦ̣ܬ ܠܰܢ ܕܠܳܐ ܕܰܢܢܘ̣ܡ ܒܢܶܣܝܘ̣̈ܢܶܐ ܕܥܳܕܶܝܢ ܥܠܰܝܢ ܐܶܠܳܐ ܒܨܠܰܘ̈ܬܳܐ ܘܓܘ̣ܪ̈ܓܳܚܶܐ ܕܡ̣ܶܢ ܠܶܒܳܐ ܫܚܝ̣ܩܳܐ ܢ̇ܶܐܚܘ̣ܕ ܓܰܘܣܳܐ ܘܥܘ̣ܕܪܳܢܳܐ: ܐܳܦܠܳܐ ܐܝܟ ܕܰܒܫܘ̣ܒܗܳܪܳܐ ܢܰܡ̇ܪܰܚ ܥܰܠ ܡܰܘܬܳܐ ܐܶܠܳܐ ܡܰܟܝ̣ܟܳܐܝ̣ܬ ܠܕܰܪܳܐ ܢ̇ܶܬܩܰܪܰܒ ܘܰܒܚܰܝ̈ܠܰܘܳܬܳܐ ܫܡܰܝ̈ܳܢܶܐ ܢ̇ܶܬܚܰܝܰܠ ܗܳܢܽܘܢ ܕܰܠܥܘ̣ܕܪܳܢܰܢ ܡܶܢܳܟ ܐܰܡܝ̣ܢܳܐܝ̣ܬ ܡܶܫܬܰܕܪܝ̣ܢ: ܟܰܕ ܠܨܶܒܝܳܢܶܗ ܕܐܰܒܳܐ ܫܡܰܝܳܢܳܐ ܢܶܗ̣ܘܶܐ ܟܽܠܶܗ ܗܘ̣ܦܳܟܰܢ ܕܥܰܠ ܐܰܪܥܳܐ: ܘܠܳܟ ܢ̇ܺܚܶܐ ܕܡܝ̣ܬܬ ܥܰܠ ܐܰܦܰܝ̈ܢ ܘܠܳܐ ܠܢܰܦܫܰܢ: ܘܰܒܗܳܝ̇ ܕܚܰܦ̣ܶܛܬ ܠܰܫܠܝ̣̈ܚܰܝܟ ܨܶܝܕ ܥܝ̣ܪܘ̣ܬܳܐ ܨܠܘ̣ܬܳܐ ܐܰܠܶܦ̣ܬ ܠܰܢ: ܠܳܐ ܗ̱ܘܳܐ ܡܶܛܽܠܳܬܳܟ ܐܳܘ ܕܠܳܐ ܣܢܝ̣ܩ ܐܰܢ̱ܬ ܥܰܠ ܨܠܘ̣ܬܳܐ: ܒܗܳܝ̇ ܕܰܚܛܝ̣ܬܳܐ ܠܳܐ ܥܒ̣ܰܕܬ ܘܢܶܟܠܳܐ ܒܦܘ̣ܡܳܟ ܠܳܐ ܐܶܫܬ̣ܟܰܚ: ܐܶܠܳܐ ܥܰܡ ܐܰܒܘ̣ܟ ܡܩܰܒܠܳܢܳܐ ܕܰܨܠܰܘ̈ܳܬܳܐ ܐܰܡܝ̣ܢܳܐܝ̣ܬ ܐܝ̣ܬܰܝܟ: ܨܰܠܝ̣ܬ ܓܶܝܪ ܕܰܨܠܰܘ̈ܳܬܳܐ ܬܩ̣ܰܒܶܠ: ܒܘ̣ܪܟܳܐ ܣܳܡ̣ܬ ܘܠܰܢ ܐܰܩܝ̣ܡܬ ܡܶܢ ܡܰܦܘ̣ܠܬܳܐ ܕܰܚܛܝ̣ܬܳܐ ܘܣܶܓܕܬܳܐ ܕܰܦܬܰܟܪ̈ܶܐ: ܕܚܶܠ̣ܬ ܘܰܠܒܝ̣ܒܘ̣ܬܳܐ ܠܰܢ ܫܰܟܶܢ̣ܬ: ܐܶܬܬܥܝ̣ܩܬ ܘܠܰܢ ܡܶܢ ܥܳܩܬܳܐ ܡܕܰܘܕܳܢܝ̣ܬܳܐ ܚܰܪܰܪܬ: ܐܶܬܟܡ̣ܰܪܬ ܘܠܰܟܡܝ̣ܪܘ̣ܬܰܢ ܐܰܦܨܰܚ̣ܬ: ܘܫܶܠ̈ܬܶܐ ܕܰܕܡܳܐ ܕܥ̣ܶܬܬ ܘܰܠܕܘ̣ܥܬܶܗ ܕܐܳܕܳܡ ܒܰܛܶܠ̣ܬ: ܘܰܒܗܳܠܶܝܢ ܟܽܠܗܶܝܢ ܕܨܶܒܝܳܢܳܐܝ̣ܬ ܣܒܰܠ̣ܬ ܠܫܰܠܝ̣̈ܛܳܢܶܐ ܕܥܳܠܡܳܐ ܗܳܢܳܐ ܚܰܝ̈ܠܰܘܳܬܳܐ ܕܰܠܩܘ̣ܒܠܳܐ ܐܰܬܡܰܗ̣ܬ ܘܠܳܐ ܐܶܣ̣ܬܰܟܠܘ̣ܟ: ܘܰܠܪܝ̣ܫܳܐ ܕܛܳܥܝܘ̣ܬܗܽܘܢ ܚܶܘܝܳܐ ܗܰܘ̇ ܡܳܪܘ̣ܕܳܐ ܘܡܰܪܝ̣ܪܳܐ ܘܣܰܓܝ̣ ܪ̈ܝ̣ܫܶܐ: ܘܰܥܪܝ̣ܡ ܡܶܢ ܟܽܠܳܗ̇ ܚܰܝܘ̣ܬܳܐ ܚܰܟܝ̣ܡܳܐܝ̣ܬ ܒܕܶܚܠܬܳܟ ܘܰܥܪܘ̣ܩܝܳܟ ܡܶܢ ܡܰܘܬܳܐ ܐܰܛܥܝ̣ܬܳܝܗ̱ܝ: ܘܰܚܠܳܦ ܕܐܰܛܥܝ̣ ܒܣܰܒܪܳܐ ܕܚܰܝ̈ܶܐ ܐܰܡܝ̣̈ܢܶܐ ܠܪܝ̣ܫ ܓܒܝ̣ܠܬܳܐ ܕܝ̣ܠܰܢ ܗܰܘ̇ ܫܒܰܪ ܪܶܥܝܳܢܳܐ ܐܳܕܳܡ: ܘܫܶܠܡ̣ܰܬ݀ ܠܳܗ̇ ܗܳܝ̇ ܕܒܰܢܒܺܝܘ̣ܬܳܐ ܥܠܰܘܗ̱ܝ ܪܫܝ̣ܡܳܐ: ܕܒܰܡܚܘ̣ܬܳܐ ܕܰܡܚ̣ܳܝܗ̱ܝ ܡܚ̣ܳܝܗ̱ܝ: ܘܰܒܩܶܛܠܳܐ ܕܩܰܛܶܠ̣ܗ ܩܰܛܠ̣ܶܗ: ܢܓ̣ܰܕܬܳܝܗ̱ܝ ܓܶܝܪ ܠܬܰܢܝ̣ܢܳܐ ܒܰܡܨܝ̣ܕܬܳܐ ܕܝ̣ܠܳܟ: ܘܰܠܫܶܢܰܘ̈ܗ̱ܝ ܬܰܒ̣ܰܪܬ ܐܶܢܽܘܢ ܒܦܘ̣ܡܶܗ ܘܰܥܩ̣ܰܪܬ ܠܢܝ̣ܒܰܘ̈ܗ̱ܝ ܕܐܰܪܝܳܐ ܬܰܩܝ̣ܦܳܐ ܒܚܰܣܝ̣ܢܘ̣ܬܳܟ ܘܐܰܝܟ ܡܰܝ̈ܳܐ ܡܶܬܰܐܫ̈ܕܳܢܶܐ ܡܰܣܠܝܳܐ ܘܰܢܕܝ̣ܕܳܐ ܣܳܡ̣ܬܳܝܗ̱ܝ ܠܗܰܘ̇ ܚܰܪܫܳܐ ܕܰܣܟ̣ܰܪ ܐܶܕܢܰܘ̈ܗ̱ܝ ܕܠܳܐ ܢܶܫ̣ܡܰܥ ܩܳܠܳܐ ܕܠܳܚܘ̣ܫܳܐ ܘܰܕܚܰܒܳܪܳܐ ܘܰܕܚܰܟܝ̣ܡܳܐ ܡܢܰܘ̈ܳܬܳܐ ܘܕܶܡ̈ܘܳܬܳܐ ܡܫܰܚ̈ܠܦܳܬܳܐ ܕܰܢܒܺܝܘ̣ܬܳܐ: ܫ̣ܕܰܝܬ ܒܶܗ ܓܶܐܪܳܐ ܕܡܶܬܒܰܪܢܫܳܢܘ̣ܬܳܟ ܥܕܰܡܳܐ ܕܣ̣ܳܦ: ܘܰܐܝܟ ܫܥܘ̣ܬܳܐ ܕܡܶܬܦܰܫܪܳܐ ܘܢܳܦ̇ܠܳܐ ܡ̣ܶܢ ܩܕܳܡ ܢܘ̣ܪܳܐ ܕܐܰܠܳܗܘ̣ܬܳܟ ܐܶܬܚ̣ܪܶܩ ܕܰܠܚ̣ܶܗ ܪܘ̣ܓܙܳܐ ܠܥܰܘܳܠܳܐ ܘܫܶܢܰܘ̈ܗ̱ܝ ܚܰܪܶܩ ܘܐܶܬ̣ܛܰܠܰܩ: ܘܪܶܓܬܶܗ ܒܪܘ̣ܫܥܳܐ ܐܶܒ̣ܕܰܬ݀ : ܗܳܝܕܶܝܢ ܚ̣ܙܰܘ ܙܰܕܝ̣̈ܩܶܐ ܦܘ̣ܪܥܳܢܶܗ ܘܐܶܡ̣ܰܪܘ̱ ܐܶܗܶܐ ܐܶܗܶܐ ܚ̣ܙܳܬ݀ ܒܶܗ ܥܰܝܢܰܢ ܘܕܐܝ̣ܬ ܐܰܠܳܗܳܐ ܕܰܢ̣ܕܽܘܢ ܐܶܢܽܘܢ ܒܰܐܪܥܳܐ: ܕܳܢܬ̣ܝܗ̱ܝ ܓܶܝܪ ܒܕܝ̣ܢܳܐ ܕܫܳܘܶܐ ܠܶܗ: ܘܰܬܒ̣ܰܥܬ ܠܰܢܩܰܡܬܶܗ ܕܐܳܕܳܡ ܡܶܢܶܗ: ܘܰܒܗܳܝ̇ ܒܺܐܪܳܐ ܕܰܚܦ̣ܰܪ ܘܚ̣ܰܛܳܗ̇ ܢܦ̣ܰܠ: ܘܐܶܬ̣ܬܚܶܕ ܒܓܘ̣ܡܳܨܳܐ ܕܰܥܒ̣ܰܕ ܘܰܗ̣ܦܰܟ ܥܰܘܠܶܗ ܓܡܝ̣ܪܳܐܝ̣ܬ ܥܰܠ ܪܝ̣ܫܶܗ: ܥܰܠ ܒܝ̣ܥܬܶܗ ܘܪܘ̣ܫܥܶܗ ܢܚ̣ܶܬ ܟܽܠܳܢܳܐܝ̣ܬ: ܘܐܶܬ̣ܟܡܰܪ ܟܡܝ̣ܪܘ̣ܬܳܐ ܕܠܳܐ ܗܳܦ̇ܟܳܐ ܠܒܘ̣ܝܳܐܳܐ ܒܡܰܘܬܳܟ: ܘܒܐܝ̣̈ܕܰܘܗ̱ܝ ܟܽܠܳܗ̇ ܫܝܘ̣ܠ ܐܶܬܡ̣ܰܪܡܪܰܬ݀ ܠܘ̣ܩܒܰܠ ܡܰܥܰܠܬܳܟ: ܚܢܰܢ ܕܶܝܢ ܡܚܝ̣̈ܠܶܐ ܘܚܰܛܳܝ̈ܶܐ ܥܰܒ̈ܕܰܝܟ ܡܳܪܝܳܐ: ܕܰܒܚܰܫܳܟ ܡ̣ܶܢ ܢܝ̣ܪܶܗ ܐܶܬ̣ܚܰܪܰܪܢܰܢ: ܡܦܝ̣ܣܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢ ܟܽܠܗܶܝܢ ܨܶܢܥ̈ܳܬܶܗ ܡܥܰܩ̈ܡܳܬܳܐ ܐܰܡܝ̣ܢܳܐܝ̣ܬ ܬܶܦ̣ܪܘ̣ܩ ܠܰܢ: ܘܡܶܢ ܢܶܣܝܘ̣̈ܢܶܐ ܚܰܣܝ̣̈ܢܶܐ ܕܥܳܒܪܝ̣ܢ ܠܚܰܝܠܳܐ ܕܝ̣ܠܰܢ ܒܟܽܠܙܒܰܢ ܬܰܫ̣ܘܙܶܒ ܠܰܢ: ܘܠܰܨ̈ܠܰܘܳܬܳܐ ܡܪ̈ܰܥܝܳܢܝܳܬܳܐ ܕܡܳܪܘ̣ܬܳܟ ܒܟܽܠܫܳܥ ܬ̣ܚܰܦܶܛ ܠܰܢ: ܘܰܒܥܘ̣ܕܪܳܢܳܐ ܕܡܶܢ ܠܘܳܬܳܟ ܬܰܣ̣ܝܰܥ ܠܰܢ: ܘܢܳܛܘ̣ܪ̈ܘܳܬܳܐ ܚܰܣܝ̣̈ܢܳܬܳܐ ܕܡܰܠܰܐܟܰܝ̈ܟ ܐܰܚܕܰܪ ܠܰܢ: ܘܡܰܫܪ̈ܝܳܬܳܐ ܕܦܳܠ̈ܚܰܝܟ ܐܰܟܪܶܟ ܠܰܢ: ܘܥܰܬ̣ܶܕ ܠܰܢ ܠܡ̣ܶܛܰܪ ܦܘ̣ܩ̈ܕܳܢܰܝܟ ܘܰܠܡܶܥ̣ܒܰܕ ܨܶܒܝܳܢܳܟ: ܐܰܝܟܰܢܳܐ ܕܰܒܓܰܠܝܘ̣ܬ ܐܰܦ̈ܶܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܳܐ ܚܳܫܘ̣ܫܳܐ ܕܚܰܫ̣ܬ ܒܰܒܣܰܪ ܡܶܛܽܠܳܬܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܕܶܒܚܳܐ ܕܟܰܕ ܗܘ̣ ܕܶܒܚܳܐ ܘܟܳܗܢܳܐ ܘܰܡܩܰܒܠܳܢܳܐ: ܕܒܰܕܒܝ̣ܚܘ̣ܬܶܗ ܫ̣ܪܳܐ ܘܒ̣ܰܛܶܠ ܠܕܶܒ̈ܚܶܐ ܘܰܡܩܰܪ̈ܒܳܢܶܐ ܘܟܳܗ̈ܢܶܐ ܕܰܒܢܳܡܘ̣ܣܳܐ: ܐܰܢ̱ܬ ܐܳܦ ܗܳܫܳܐ ܐܳܘ ܡܳܪܝܳܐ ܐܰܠܳܗܳܐ: ܒܰܛܶܠ ܡܶܢܰܢ ܒܝܰܕ ܒܶܣ̈ܡܶܐ ܗܳܠܶܝܢ ܟܽܠ ܕܶܒܚܬܳܐ ܐܰܝ̇ܕܳܐ ܕܠܳܟ ܠܳܐ ܫܳܦ̇ܪܳܐ: ܘܰܐܫܘܳܐ ܠܰܢ ܕܰܢ̇ܩܰܪܶܒ ܠܳܟ ܕܶܒܚܬܳܐ ܘܬܰܘܕܝ̣ܬܳܐ: ܘܰܢ̇ܟܰܗܶܢ ܩܕܳܡܰܝܟ ܕܶܒ̈ܚܶܐ ܪ̈ܘ̣ܚܳܢܳܝܶܐ ܘܰܡܩܰܒ̈ܠܶܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀