ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܦܳܪܘ̣ܩܳܐ ܕܒܰܙܩܝ̣ܦܶܗ ܐܰܦ̣ܢܝ̣ ܛܪ̈ܝ̣ܕܶܐ ܠܝܳܪܬܘ̣ܬܗܽܘܢ: ܘܐܰܥܒ̣ܰܪ ܡ̣ܶܢ ܚܰܝ̈ܳܒܶܐ ܒܶܗܬܰܬܗܽܘܢ: ܘܐܰܠܒ̣ܶܫ ܠܥܰܪ̈ܛܶܠܳܝܶܐ ܬܰܟܣܝ̣ܬܗܽܘܢ: ܘܟܰܣܝ̣ ܠܦܘ̣ܪܣܳܝܳܐ ܕܐ̱ܢܳܫܘ̣ܬܗܽܘܢ: ܘܛܰܠ̣ܶܩ ܠܚܶܫܘ̣ܟܳܐ ܕܰܚܛܝ̣ܬܗܽܘܢ: ܘܰܐܢܗ̣ܰܪ ܠܰܒܪܝ̣ܬܳܐ ܒܝ̣ܕܰܥܬܗܽܘܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܒܪܳܐ ܘܡܳܪܳܐ ܘܒܰܪ ܟܝܳܢܳܐ ܕܰܐܒܘ̣ܗ̱ܝ: ܗܰܘ ܕܡܶܢ ܐܰܒܳܐ ܐܝ̣ܬܰܘܗ̱ܝ ܗ̱ܘܳܐ ܘܐܝ̣ܬܰܘܗ̱ܝ: ܗܰܘ̇ ܕܟܰܕ ܨܒ̣ܳܐ ܫ̣ܰܕܪܶܗ ܠܥܳܠܡܳܐ ܕܢ̣ܶܦܪܘ̣ܥ ܚܰܘܒܬܳܐ ܥܰܬܝ̣ܩܬܳܐ ܕܶܐܫܛܳܪܳܐ ܪܰܒܳܐ: ܗܰܘ̇ ܕܒܰܓܙܳܪ ܕܝ̣ܢܳܐ ܕܡܰܘܬܳܐ ܐܶܬ̣ܓܙܰܪ ܥܠܰܝܢ: ܐܶܬܩܪܝ̣ ܘܐܶܬ̣ܳܐ ܠܒܶܝܬ ܕܝ̣ܢܳܐ: ܐܶܬ̣ܕܒܰܪ ܘܥ̣ܰܠ ܠܰܚܒܘ̣ܫܝܳܐ: ܢܰܓܕܘ̣ܗ̱ܝ ܘܩܳܡ̣ ܒܫܘ̣̈ܐܳܠܶܐ: ܫܬ̣ܶܩ ܘܩܰܒ̣ܶܠ ܥܠܰܘܗ̱ܝ ܚܰܘܒܬܳܐ ܥܰܬܝ̣ܩܬܳܐ: ܬܪܰܨ ܐܰܦܰܘ̈ܗ̱ܝ ܠܪܘ̣ܩܳܐ ܘܐܰܬ̣ܩܶܢ ܚܰܨܶܗ ܠܰܦܪ̈ܳܓܶܠܶܐ: ܝܰܗ̣ܒ ܦܰܟܰܘ̈ܗ̱ܝ ܠܫܘ̣ܩܳܦܳܐ: ܐܰܫܠ̣ܶܡ ܓܘ̣ܫܡܶܗ ܠܡܰܚ̈ܘܳܬܳܐ: ܐܶܨܛܰܥ̣ܰܪ ܒܢܰܚ̈ܬܶܐ ܕܒܶܙܚܳܐ: ܐܶܬܩܰܦ̣ܰܚ ܒܩܰܢܝܳܐ ܕܒܶܗܬܬܳܐ ܥܰܠ ܪܝ̣ܫܶܗ: ܛܥ̣ܶܢ ܨܠܝ̣ܒܶܗ ܥܰܠ ܟܰܬܦܶܗ ܐܰܝܟ ܓܰܒܪܳܐ ܩܳܛܘ̣ܠܳܐ: ܐܶܬ̣ܡܬܰܚ ܥܰܠ ܩܰܝܣܳܐ ܐܰܝܟ ܚܰܝܳܒܳܐ: ܐܶܬ̣ܡܢܝ̣ ܥܰܡ ܥܰܘ̈ܳܠܶܐ ܐܰܝܟ ܥܳܒܶܕ ܒܝ̣̈ܫܳܬܳܐ: ܐܶܬ̣ܩܰܒܰܥ̈ܝ̱ ܐܝ̣̈ܕܰܘܗ̱ܝ ܒܨܶܨ̈ܐ: ܐܶܬܶܐܣ̣ܰܪ̈ܝ̱ ܪ̈ܶܓܠܰܘܗ̱ܝ ܒܰܙܩܝ̣ܦܳܐ: ܘܰܡܦܰܪܣܰܝ ܘܰܡܟܰܠܰܠ ܒܟܘ̣̈ܒܶܐ ܕܒܝ̣ܪܝ̣ܢ ܠܶܗ ܘܣܳܒܶܠ ܚܰܫ̈ܶܐ ܨ̇ܗܶܐ̣ ܠܡܰܝ̈ܳܐ: ܘܡܶܬܝ̣ܗܶܒ ܠܶܗ ܚܰܠܳܐ ܘܰܡܪܳܪ̈ܶܐ: ܡܒܰܓܶܢ ܒܚܰܫܳܐ ܘܡܶܫ̈ܬܰܡܥܳܢ ܬܶܢܚ̈ܳܬܶܗ ܡܶܢ ܨܠܝ̣ܒܳܐ: ܘܥܰܡ ܗܳܠܶܝܢ ܟܽܠܗܶܝܢ ܛܥܝ̣ܢܝ̣ܢ ܚܠܝ̣̈ܡܶܐ ܘܒܰܣܝ̣̈ܡܶܐ ܥܒܝ̣ܕܝ̣ܢ ܕܒܶܝܬ ܦܝ̣ܠܰܛܘ̣ܣ ܣܳܗ̈ܕܶܐ ܠܰܫܪܳܪܶܗ ܡܰܠܟܳܐ ܡܶܬ̣ܬܰܪܓܰܡ ܒܰܬܠܳܬܳܐ ܠܶܫܳܢܝ̣̈ܢ: ܘܩܳܥܶܝܢ ܟܝ̈ܳܢܶܐ ܕܡܳܪܳܐ ܗ̱ܘ̣ ܕܒܶܪ̈ܝܳܬܳܐ: ܐܰܪܥܳܐ ܕܙܳܝ̇ܥܳܐ: ܬܺܐܒܶܝܠ ܕܢܳܝ̇ܕܳܐ: ܫܘ̣̈ܥܶܐ ܡܶܨܛܰܪܶܝܢ: ܩܰܒܪ̈ܶܐ ܕܡܶܬ̣ܦܰܬܚܝ̣ܢ: ܡܝ̣̈ܬܶܐ ܕܩܳܝ̇ܡܝ̣ܢ: ܫܝܘ̣ܠ ܕܡܶܬܥܰܩܪܳܐ: ܣܰܗܪܳܐ ܕܚܳܫܶܟ: ܫܶܡܫܳܐ ܕܰܡܚܰܦܰܝ ܢܘ̣ܗܪܶܗ: ܐܰܦܰܝ̈ ܬܰܪܥܳܐ ܕܡܶܣ̣ܬܕܶܩ ܡܶܢ ܙܰܘܥܳܐ: ܐܶܣܛܘ̣̈ܟܣܶܐ ܕܡܶܬܒܰܠܗܝ̣ܢ ܕܰܒܕܶܚܠܳܐ ܢܶܫ̣ܬܪܽܘܢ ܡܶܢ ܚܕ̈ܳܕܶܐ: ܡܕܝ̣ܢ̱ܬܶܗ ܪܰܒܬܳܐ ܕܡܰܘܬܳܐ ܕܰܡܣܰܪܗܶܒ ܠܳܗ̇ ܙܰܘܥܳܐ ܪܰܒܳܐ ܠܡܰܦܘ̣ܠܬܳܐ: ܫܘ̣ܪ̈ܶܐ ܕܐܰܒܕܳܢܳܐ ܕܪܳܥܠܝ̣ܢ: ܪܗܳܒܬܳܐ ܕܚܰܝ̈ܶܐ ܕܡܶܫܬܰܡܥܳܐ ܒܰܐܬܪܳܐ ܕܡܝ̣̈ܬܶܐ: ܡܰܘܬܳܐ ܕܡܶܬܬܕܝ̣ܫ ܥܰܠ ܐܶܣܟܘ̣ܦܬܶܗ ܡܶܢ ܟܶܢ̈ܫܶܐ ܕܚܳܒ̇ܨܝ̣ܢ ܠܡ̣ܶܦܰܩ: ܥܳܠܡܳܐ ܕܪܳܐܶܬ ܒܙܰܘܥܳܐ ܪܰܒܳܐ ܕܢ̣ܶܫܬܪܶܐ: ܥܰܠ ܕܰܚ̣ܙܳܐ ܠܡܳܪܶܗ ܥܰܠ ܩܰܝܣܳܐ: ܓܰܘ̈ܢܶܐ ܪܰܘܪ̈ܒܶܐ ܕܡܶܣܬܰܥܪܝ̣ܢ: ܚܰܝ̈ܠܶܐ ܬܡܝ̣̈ܗܶܐ ܕܡܶܬܚܰܘܶܝܢ: ܐܰܪܥܳܐ ܘܰܫܡܰܝܳܐ ܕܰܫܓܝ̣ܫܝ̣ܢ ܘܒܳܥܶܝܢ ܐܰܬܪܳܐ ܠܡ̣ܶܥܪܰܩ: ܟܽܠ ܬܶܕܡܪ̈ܳܬܳܐ ܕܡܶܬܚܰܘ̈ܝܳܢ ܒܰܒܪܝ̣ܬܳܐ ܕܢܶܬܝ̣ܕܰܥ ܗܰܘ̇ ܕܰܙܩܝ̣ܦ ܕܡܳܪܰܐ ܗ̱ܘ̇ ܕܡܰܠܰܐܟ̈ܶܐ: ܗܳܠܶܝܢ ܫܒܝ̣̈ܚܳܬܳܐ ܘܗܳܠܶܝܢ ܕܚܝ̣̈ܠܳܬܳܐ: ܚܰܕ ܩܢܘ̣ܡܳܐ ܕܰܒܪܳܐ ܝ̣ܚܝ̣ܕܳܝܳܐ ܕܕܝ̣ܠܶܗ ܚܰܫ̈ܶܐ ܘܩܶܛܠܳܐ: ܘܗܳܐ ܛܥܝ̣ܢܝ̣ܢ ܣܰܒܪܶܗ ܟܽܠ ܣܰܘ̈ܦܝ̣ܢ: ܘܰܙܪܝ̣ܥ ܝܘ̣ܠܦܳܢܶܗ ܒܟܽܠ ܥܰܡ̱̈ܡܝ̣ܢ: ܘܰܚܒܝ̣ܫܝ̣ܢ ܒܰܡܨܝ̣ܕܬܶܗ ܟܽܠ ܓܶܢܣܝ̣̈ܢ: ܘܪܳܗܛܝ̣ܢ ܠܬܰܪܥܶܗ ܟܽܠ ܚܰܝ̈ܠܝ̣ܢ: ܘܣܳܓ̇ܕܝ̣ܢ ܩܕܳܡ ܐܶܣܟܘ̣ܦܬܶܗ ܟܽܠ ܬܶܓܡܝ̣̈ܢ: ܘܐܳܟ̇ܠܝ̣ܢ ܦܰܓܪܶܗ ܟܽܠ ܦܘ̣̈ܡܝ̣ܢ: ܘܡܶܬܒܰܣܡܝ̣ܢ ܒܰܕܡܶܗ ܟܽܠ ܠܶܫܳܢܝ̣̈ܢ: ܘܙܳܡܪܝ̣ܢ ܫܘ̣ܒܚܶܗ ܟܽܠ ܩܳܠܝ̣̈ܢ: ܘܐܳܬܶܝܢ ܠܣܶܓܕܬܶܗ ܡ̣ܶܢ ܟܽܠ ܦܶܢܝ̈ܳܢ: ܘܟܽܠ ܠܶܫܳܢ ܡܰܘܕܶܐ ܕܡܳܪܝܰܐ ܗ̱ܘ̇ ܝܶܫܘ̣ܥ ܡܫܝ̣ܚܳܐ: ܘܠܶܗ ܘܠܰܐܒܘ̣ܗ̱ܝ ܘܰܠܪܘ̣ܚܶܗ ܩܰܕܝ̣ܫܳܐ: ܬܰܘܕܝ̣ܬܳܐ ܘܣܶܓܕܬܳܐ ܘܗܶܕܪܳܐ ܘܩܘ̣ܠܳܣܳܐ ܡܰܣ̇ܩܝ̣ܢܰܢ: ܘܰܥܠܰܝܢ ܪ̈ܰܚܡܰܘܗ̱ܝ ܘܰܚܢܳܢܶܗ ܒܟܽܠܥܶܕܳܢܝ̣̈ܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܓܰܢ̱ܒܳܪܳܐ ܘܚܰܝܠܬܳܢܳܐ ܕܰܕܶܚ̣ܠ ܘܰܕܥ̣ܶܬ ܕܕܶܚܠܬܶܗ ܘܕܘ̣ܥܬܶܗ ܕܐܳܕܳܡ ܢܪܝ̣ܡ: ܘܨܰܠܝ̣ ܡܶܛܽܠܳܬܰܢ ܕܢ̣ܰܠܶܦ ܠܰܢ ܕܰܒܢܶܣܝܘ̣̈ܢܶܐ ܢ̇ܶܬܟܰܫܰܪ ܒܰܨ̈ܠܰܘܳܬܳܐ: ܩܰܒܶܠ ܡܳܪܝ̱ ܐܳܦ ܗܳܫܳܐ ܒܪܶܚܡܰܬ݀ ܐ̱ܢܳܫܘ̣ܬܳܟ ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܘܥܶܛܪܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ: ܘܰܨܠܘ̣ܬܳܐ ܗܳܝ̇ ܕܨܰܠܝ̣ܬ ܚܠܳܦܰܝܢ: ܗܝ̣ ܬ̣ܶܓܕܘ̣ܠ ܓܶܦ̈ܶܐ ܠܰܨ̈ܠܰܘܳܬܳܐ ܕܝ̣ܠܰܢ: ܥܕܰܡܳܐ ܕܠܰܩܕܳܡ ܟܘ̣ܪܣܝܳܐ ܕܪܰܒܘ̣ܬܳܟ ܢܶܬܥܰܠ̈ܝܳܢ: ܘܫܰܟܶܢ ܠܰܢ ܒܗܶܝܢ ܚܘ̣ܣܳܝܳܐ ܡܫܰܡܠܝܳܐ ܕܟܽܠܗܶܝܢ ܫܳܪ̈ܥܳܬܰܢ: ܘܦܘ̣ܢܳܝܳܐ ܓܡܝ̣ܪܳܐ ܕܟܽܠܗܶܝܢ ܫܶܐܠ̈ܳܬܰܢ: ܡܶܛܽܠ ܕܐܰܢ̱ܬ ܗ̱ܘ̣ ܥܳܕܘ̣ܪܰܢ ܘܒܶܝܬ ܓܰܘܣܰܢ: ܘܠܳܟ ܬܶܫܒܘ̣ܚܬܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀