ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܪܳܡܳܐ ܕܰܢܚ̣ܶܬ ܡܶܛܽܠ ܦܘ̣ܪܩܳܢܰܢ ܘܰܒܪܰܘܡܶܗ ܩܰܘܝ̣: ܘܶܐܣ̣ܬܰܪܰܩ ܘܡ̣ܶܢ ܡܰܠܝܘ̣ܬܶܗ ܠܳܐ ܫܰܢܝ̣: ܠܗܰܘ̇ ܦܫܝ̣ܛܳܐ ܕܐܶܬ̣ܪܰܟܰܒ ܘܰܒܪܘ̣ܚܳܢܘ̣ܬܶܗ ܟ̣ܰܬܰܪ: ܠܗܰܘ̇ ܕܰܝܳܢܳܐ ܕܕܰܝ̈ܳܢܶܐ ܕܐܶܬ̣ܬܕܝ̣ܢ ܘܙܰܟܝ̣ ܠܚܰܝܳܒܘ̣ܬܰܢ: ܘܰܦ̣ܪܰܥ ܚܰܘܒܬܰܢ ܒܢܶܓ̈ܕܰܘܗ̱ܝ: ܘܰܐܚ̣ܶܫ ܒܚܰܫܰܘ̈ܗ̱ܝ ܠܚܰܫܰܝ̈ܢ: ܘܰܫܩ̣ܰܠ ܠܠܰܘܛܬܳܐ ܕܝ̣ܠܰܢ ܒܰܟܠܝ̣ܠܶܗ: ܘܰܐܥ̣ܪܶܩ ܠܩܳܛܘ̣ܠܰܢ ܒܩܶܛܠܶܗ: ܘܶܐܨܛܠ̣ܶܒ ܘܡܝ̣ܬ ܒܰܦܓܰܪ ܘܰܐܡܝ̣ܬ ܠܡܰܘܬܳܐ ܒܡܰܘܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܺܝ̣ܬܝܳܐ ܓܢܺܝ̣ܙܳܐ ܘܠܳܐ ܡܶܬܡܰܠܠܳܢܳܐ ܕܡ̣ܶܢ ܥܘ̣ܒܳܐ ܓܢܝ̣ܙܳܐ ܕܐܰܒܘ̣ܗ̱ܝ ܠܳܐ ܙܰܒܢܳܐܝ̣ܬ ܘܰܣܛܰܪ ܡ̣ܶܢ ܪܶܕܝܳܐ ܚܰܫܳܢܳܝܳܐ ܐܶܬܝ̣ܠܶܕ: ܘܡܶܛܽܠ ܫܘ̣ܪܰܥܬܳܐ ܕܝ̣ܠܰܢ ܦܰܓܪܳܐ ܐܶܬ̣ܥܰܛܰܦ ܘܰܗ̣ܘܳܐ ܚܰܕ ܟܝܳܢܳܐ ܡ̣ܶܢ ܐܰܠܳܗܘ̣ܬܳܐ ܘܡ̣ܶܢ ܐ̱ܢܳܫܘ̣ܬܳܐ ܠܳܐ ܡܢܰܣܝܰܬ݀ ܒܒܝ̣̈ܫܳܬܳܐ: ܗܳܟܰܢܳܐ ܓܶܝܪ ܣܰܝܒ̣ܰܪܬ ܟܽܠܗܶܝܢ ܐ̱ܢܳܫܝ̈ܳܬܳܐ ܒܨܶܒܝܳܢܳܐ ܡܰܠܟܳܝܳܐ ܘܠܰܘ ܒܰܩܛܝ̣ܪܳܐ: ܘܫܰܡܠܝ̣ܬ ܐܰܝܠܶܝܢ ܕܪܘ̣ܚܳܐ ܒܰܪ ܨܶܒܝܳܢܳܐ ܕܝ̣ܠܳܟ ܐܰܟܬ̣ܶܒ: ܘܦܶܨܚܳܐ ܡܘ̣ܫܳܝܳܐ ܡܰܠܺܝ̣ܬ: ܘܐ̱ܪܳܙܳܐ ܚ̣ܰܕܬܳܐ ܠܰܢ ܒܰܕܶܩ̣ܬ: ܘܰܡܠܰܬܟܳܐ ܡܰܢ ܒܰܐܝܠܶܝܢ ܕܰܕܠܳܐ ܢܳܡܘ̣ܣ ܒܰܚܫܳܡܝ̣ܬܳܐ ܗܳܝ̇ ܐ̱ܪܳܙܳܢܳܝܬܳܐ ܦܪܰܫ̣ܬ: ܠܗܳܝ̇ ܕܰܢܛܝ̣ܪܳܐ ܕܬܘ̣ܒ ܠܳܐ ܢ̣ܶܐܟܘ̣ܠ ܠܰܚܡܳܐ ܕܩܘ̣ܫܬܳܐ: ܘܐܶܬ̣ܚܰܝܰܠ ܚܰܒܪܳܐ ܕܢ̣ܶܬܛܰܟܰܢ ܠܘ̣̈ܚܳܡܶܐ ܚܰܪ̈ܡܶܐ ܕܐܰܝܠܶܝܢ ܕܡܰܐܚܫܝ̣ܢ ܢܛܰܝܶܒ ܫܘ̣ܠܳܡ ܢܳܡܘ̣̈ܣܶܐ ܐܰܓܥܶܠ̣ܬ: ܘܗܳܫܳܐ ܒܚܘ̣ܕܳܬܳܐ ܫܰܪܝ̣ܬ: ܕܰܚ̇ܕܰܬܳܐ ܬ̣ܛܰܝܶܒ ܒܰܩܨܳܝ̇ ܦܰܓܪܳܟ ܡܳܪܳܢܳܝܳܐ: ܘܫܘ̣ܦܳܥ ܕܡܳܟ ܡܰܥܒܶܕ ܚܰܝ̈ܶܐ: ܘܰܠܢܝ̣ܫ ܨܳܐܝܘ̣ܬܳܐ ܡܚܰܪܟܳܢܝ̣ܬܳܐ ܒܐܝ̣̈ܕܰܝܟ ܐܰܝܟ ܡܕܰܟܝܳܢܳܐ ܕܨܘ̣ܥ̈ܨܳܥܶܐ ܠܳܐ ܟܢܝ̣̈ܟܶܐ ܒܶܐܣܳܪ ܚܰܨܰܝ̈ܟ ܓܡܝ̣ܪܳܐܝ̣ܬ ܕܰܟܝ̣ܬ: ܘܰܠܗܳܝ̇ ܬܘ̣ܒ ܕܘܳܠܝܳܐ ܠܐܘ̣ܪܚܳܐ ܕܚܰܫ̈ܶܐ ܠܳܐ ܓܢܝ̣ܚܳܐ ܐܰܢ̱ܬ ܠܳܟ ܛܰܝܶܒ̣ܬ: ܘܰܐܝܟ ܐܶܡܪܳܐ ܐܶܬܩܰܪܰܒ̣ܬ ܠܰܕܒܝ̣ܚܘ̣ܬܳܐ ܘܠܳܐ ܐܶܬ̣ܬܦܝ̣ܪ ܥܘ̣ܙܳܐ ܕܨܶܒܝܳܢܳܟ ܐܰܝܟ ܓܙܝ̣ܙܳܐ ܡܶܢ ܓܳܙܘ̣ܙܳܐ: ܐܳܘ ܠܡܳܪܳܐ ܕܡܶܬ̣ܩܰܦܰܚ: ܐܳܘ ܠܡܳܪܳܐ ܘܡܰܠܟܳܐ ܕܒܰܦܪ̈ܳܓܶܠܶܐ ܡܶܬ̣ܢܓܰܕ: ܐܳܘ ܠܰܐܚܝ̣ܕ ܥܳܠܡܳܐ ܕܰܐܝܟ ܚܰܝܳܒܳܐ ܡܶܬ̣ܬܕܝ̣ܢ: ܥܰܦܪܳܢܳܐ ܓܳܙܶܡ: ܘܒܰܪ ܐܰܠܳܗܳܐ ܒܰܒܣܰܪ ܚܳܐܶܫ: ܝܺܗܘ̣ܕܳܐ ܦܳܩܶܕ ܘܝܶܫܘ̣ܥ ܡܣܰܝܒܰܪ: ܣܳܛܳܢܳܐ ܡܫ̣ܬܰܥܠܶܐ ܕܗܳܢܰܘ ܕܰܠܟܽܠ ܦܳܪܶܩ: ܢ̣ܶܬܩܛܶܠ ܗܳܫܳܐ ܕܠܳܐ ܢ̣ܶܙܕܟܶܐ ܗܰܘ̇ ܕܰܙܟ̣ܳܝܗ̱ܝ ܠܳܐܕܳܡ: ܐܳܘ ܠܚܘ̣ܕܳܬܳܐ ܕܦܘ̣ܪܩܳܢܳܐ ܘܚܰܕܘ̣ܬܳܐ: ܕܗܳܫܳܐ ܠܟܽܠ ܒܥܳܩܬܳܐ ܘܚܰܫܳܐ ܕܐܶܠܝ̣ܫܰܕܰܝ ܡܚܰܝܕܳܐ ܕܥܰܡܰܢ ܓܡܝ̣ܪܳܐܝ̣ܬ ܡܶܬ̣ܝܰܗܒܳܐ: ܐܳܘ ܠܟܰܪܝܘ̣ܬܳܐ ܕܐܶܬ̣ܛܰܝܒ̣ܰܬ݀ ܠܚܰܕܘ̣ܬܳܐ ܗܳܫܳܐ ܘܥܳܩܬܳܐ ܡܙܰܡܢܳܐ: ܝܽܘܚܰܢܳܢ ܥܰܡ ܚܘ̣ܒܳܐ ܠܡܶܬܬܕܝ̣ܢܳܢܳܐ ܨܳܐܶܬ ܫܶܡܥܽܘܢ ܟܳܦܰܪ: ܬܐܘ̣ܡܰܐ ܥܰܪܝ̣ܩ ܝܰܥܩܘ̣ܒ ܠܰܝܬܰܘܗ̱ܝ: ܝܺܗܘ̣ܕܳܐ ܡܶܬ̣ܢܰܟܪܶܐ: ܕܒܶܝܬ ܚܰܢܳܢ ܙܩܝ̣ܦܳܐ ܡܛܰܝܒܝ̣ܢ: ܒܥܶܠܕܒܳܒܳܐ ܡܶܬ̣ܢܰܩܰܡ: ܘܰܒܥܶܠܕܰܪܳܐ ܡܶܬܒܰܛܰܠ: ܚܶܘܝܳܐ ܡܶܬܪܨܶܨ ܚܰܠܳܐ ܡܶܬܡܰܙܰܓ ܟܠܝ̣ܠܳܐ ܡܶܬܓܕܶܠ: ܚܰܪܒܳܐ ܡܶܬܠܰܛܫܳܐ: ܨܶܨ̈ܶܐ ܡܶܬܛܰܝܒܝ̣ܢ: ܐܳܘ ܠܦܳܪܘ̣ܩܳܐ ܕܰܟܡܳܐ ܡܶܬܡܰܟܰܟ: ܩܰܠܝ̣ܠ ܘܬܘ̣ܒ ܙܳܟܶܝ̇ܢܰܢ: ܕܗܳܫܳܐ ܚܬܝ̣ܪܬܳܐ ܒܰܪ̱ܬ݀ ܐܘ̣ܪܫܠܶܡ ܒܶܐܒܠܳܐ ܬ̣ܶܬܶܒܝ̱: ܘܒܰܪ̱ܬ݀ ܐ̱ܪܳܙܳܗ̇ ܫܝܘ̣ܠ ܚܳܪܒܳܐ: ܘܐܰܝܠܶܝܢ ܕܐܶܫ̣ܬܰܥܒܰܕܘ̱ ܠܳܟ ܗܳܫܳܐ ܡܶܬ̣ܦܰܪܩܝ̣ܢ: ܗܳܐ ܓܶܝܪ ܥܺܕܬܳܐ ܚ̇ܕܰܬܳܐ ܗܳܝ̇ ܕܰܦܪܰܩ̣ܬ ܒܚܰܫܰܝ̈ܟ ܠܳܟ ܡܝܰܩܪܳܐ: ܘܰܠܫܘ̣̈ܡܳܬܳܟ ܒܝܰܕ ܕܶܡܥܶܝ̈ܗ̇ ܡܨܰܒܥܳܐ: ܘܫܳܐܠܳܐ ܡܶܢܳܟ ܕܬܶܬ̣ܢܰܛܰܪܝ̱ ܗܝ̣ ܘܝܰܠ̈ܕܶܝܗ̇ ܡ̣ܶܢ ܟܽܠܗܶܝܢ ܫܟܳܚ̈ܳܬܶܗ ܕܗܰܘ̇ ܕܰܠܩܘ̣ܒܠܳܐ: ܘܡ̣ܶܢ ܠܘ̣̈ܬܳܟܶܐ ܡܰܘ̈ܒܕܳܢܶܐ ܕܰܒܢܰܝ̈ܳܐ ܡܡܰܪ̈ܡܪܳܢܶܐ ܘܠܳܐ ܡܶܬܬܦܝ̣̈ܣܳܢܶܐ: ܘܫܰܪܰܪܶܝܗ̇ ܕܒܰܚܕܳܐ ܐܰܘܝܘ̣ܬܳܐ ܕܚܘ̣ܒܳܐ ܒܳܟ ܬ̣ܶܬܶܐܣܰܪ̈ܝ̱: ܘܡ̣ܶܢ ܟܽܠ ܕܡܰܐܟ̈ܝܳܢ ܬܶܬ̣ܦܰܨܶܐ: ܘܗܝ̣ ܘܝܰܠܕܶܝ̈ܗ̇ ܬܚܶܝܬ ܟܶܢܦܰܝ̈ܟ ܬܶܣ̣ܬܰܬܰܪܝ̱: ܘܰܠܚܰܕ ܒܶܝܬ ܨܰܘܒܳܐ ܕܠܳܟ ܡܛܰܝܰܒ ܒܫܘ̣ܒܚܳܐ ܬܶܬ̣ܡܰܢܰܥܝ̱: ܘܰܒܬܶܫܒܘ̣ܚܬܳܐ ܕܠܳܟ ܡܶܬ̣ܬܚܝ̣ܒܳܐ ܬܶܬ̣ܥܰܠܰܡܝ̱: ܐܰܝܟܰܢܳܐ ܕܰܒܝܰܕ ܟܽܠܗܽܘܢ ܫܘ̣̈ܘܕܳܝܰܝܟ ܬܶܬ̣ܚܬܰܪܝ̱: ܘܰܕܠܳܐ ܟܰܝܠܳܐ ܬ̣ܰܘܕܶܐ ܘܬ̣ܶܣܓܘ̣ܕ ܘܰܬ̣ܫܰܒܚܳܟ: ܠܳܟ ܕܚܰܫ̣ܬ ܥܰܠ ܐܰܦܝ̈ܗ̇ ܘܰܦܪܰܩ̣ܬܳܗ̇ ܘܠܰܐܒܳܐ ܝܳܠܘ̣ܕܳܟ ܕܒܳܟ ܐܶܬ̣ܪܰܥܝ̣ ܠܳܗ̇: ܘܰܠܪܘ̣ܚܳܐ ܩܰܕܝ̣ܫܳܐ ܕܰܒܫܘ̣̈ܘܟܳܢܰܘܗ̱ܝ ܐܰܥܬ̣ܪܳܗ̇: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܰܒ ܟܘ̣ܡܪ̈ܶܐ ܡܪܰܝܡܳܐ: ܘܦܝ̣ܪܡܳܐ ܕܚܘ̣ܣܳܝܳܐ ܕܟܰܗ̣ܶܢ ܗܘ̣ ܠܶܗ ܥܰܠ ܙܩܝ̣ܦܳܐ ܡܶܛܽܠ ܡܰܣܟ̈ܠܳܢܶܐ: ܘܰܐܥ̣ܛܰܪ ܩܢܘ̣ܡܶܗ ܩܕܳܡ ܝܳܠܘ̣ܕܶܗ ܚܠܳܦ ܚܰܝ̈ܳܒܶܐ: ܗܘܝ̣ ܡܳܪܝܳܐ ܘܐܳܦ ܗܳܫܳܐ ܒܰܥܳܝܳܐ ܘܦܳܪܘ̣ܥܳܐ ܠܰܐܒܘ̣ܟ ܚܠܳܦ ܡܰܪ̈ܓܙܳܢܶܐ: ܘܒܰܛܶܠ ܡܶܢܰܢ ܟܽܠܗܶܝܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ: ܘܟܽܠ ܚܺܐܦ̈ܶܐ ܡܫܝ̣̈ܡܳܢܶܐ: ܘܒܰܣܶܡ ܠܰܢ ܒܟܽܠܗܽܘܢ ܥܘ̣ܕܪ̈ܳܢܶܐ ܐܰܠܳܗ̈ܳܝܶܐ: ܘܰܒܟܽܠ ܒܘ̣̈ܣܳܡܶܐ ܡܒܰܝ̈ܳܐܢܶܐ: ܟܰܕ ܥܳܒܶܕ ܐܰܢ̱ܬ ܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀