ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܪܳܥܝܳܐ ܛܳܒܳܐ ܕܝܰܗ̣ܒ ܢܰܦܫܶܗ ܠܩܶܛܠܳܐ: ܘܰܦ̣ܪܰܩ ܡܰܪܥܝ̣ܬܶܗ ܡܶܢ ܕܺܐܒ̈ܶܐ ܚܳܛܘ̣̈ܦܶܐ: ܠܗܰܘ̇ ܒܰܣܝ̣ܡܳܐ ܕܣܰܝܒ̣ܰܪ ܚܰܫ̈ܶܐ ܡܶܢ ܛܰܡ̈ܶܐܐ: ܘܐܰܠ̣ܶܦ ܬܶܫܒ̈ܚܳܬܳܐ ܠܣܳܓܘ̣̈ܕܶܐ: ܒܰܪ ܚܺܐܪ̈ܶܐ ܕܫܰܥܶܒ̣ܕ ܢܰܦܫܶܗ ܠܣܘ̣ܪܳܩܳܐ ܐ̱ܢܳܫܳܝܳܐ: ܘܩܰܒ̣ܶܠ ܒܶܙܚܳܐ ܘܡܰܘܬܳܐ ܕܰܦ̣ܪܰܩ ܠܥܳܠܡܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܝ̣ܺܚܝ̣ܕܳܝܳܐ ܕܡ̣ܶܢ ܐܰܒܳܐ: ܗܰܘ̇ ܡܶܠܬܳܐ ܕܰܩܕܳܡ ܥܳܠ̈ܡܶܐ ܘܒܳܪܘ̣ܝܳܐ ܕܟܽܠ: ܢܘ̣ܗܪܳܐ ܕܡܶܢ ܢܘ̣ܗܪܳܐ: ܘܐܰܠܳܗܳܐ ܕܡܶܢ ܐܰܠܳܗܳܐ: ܚܶܟܡܬܳܐ ܘܡܶܠܬܳܐ ܕܚܰܝ̈ܶܐ ܘܝܘ̣ܩܢܳܐ ܕܐܰܒܳܐ ܓܢܝ̣ܙܳܐ ܘܠܳܐ ܡܶܬ̣ܚܰܙܝܳܢܳܐ ܕܐܶܬ̣ܚܙܝ̣ ܒܰܒܣܰܪ: ܠܳܐ ܡܶܬܕܰܪܟܳܢܳܐ ܕܰܒܦܰܓܪܳܐ ܐܶܬ̣ܕܪܶܟ ܠܳܐ ܡܶܬܡܰܠܠܳܢܳܐ ܕܰܒܨܶܒܝܳܢܶܗ ܬܚܶܝܬ ܡܶܠܬܳܐ ܐܶܬ̣ܚܒܶܫ: ܘܠܳܐ ܡܶܣܬܰܝܟܳܢܳܐ ܕܰܠܡܘ̣ܟܳܟܳܐ ܨܒ̣ܳܐ ܘܰܢܚ̣ܶܬ: ܕܠܰܢ ܡܰܟܝ̣̈ܟܶܐ ܘܡܶܣ̈ܟܺܢܶܐ ܢ̣ܰܘܪܶܒ: ܠܳܐ ܡܳܝܘ̣ܬܳܐ ܕܨܶܝܕ ܡܳܝܘ̣̈ܬܶܐ ܐܶܬ̣ܪܟܶܢ: ܕܡ̣ܶܢ ܡܰܘܬܳܐ ܘܰܚܛܝ̣ܬܳܐ ܠܗܽܘܢ ܢܚ̣ܰܪܰܪ: ܡܳܪܳܐ ܕܰܠܕܝ̣ܠܶܗ ܐܶܬ̣ܳܐ ܘܕܝ̣ܠܶܗ ܠܳܐ ܩܰܒܠܘ̣ܗ̱ܝ ܐܶܠܳܐ ܐܳܦ ܕܰܚܩܘ̣ܗ̱ܝ ܘܰܠܒܰܪ ܡܶܢ ܟܰܪܡܳܐ ܐܰܦܶܩ̣ܘ̱ ܨܰܠܒܘ̣ܗ̱ܝ: ܕܰܢܢܰܩܘ̣ܢܳܝܗ̱ܝ ܥܰܡܳܐ ܠܝ̣ܛܳܐ ܕܝܘ̣̈ܕܳܝܶܐ ܬܠܶܐ ܒܰܙܩܝ̣ܦܳܐ ܘܝܳܩܕܺܝܢ ܒܚܶܡܬܳܐ: ܐܝ̣ܬܰܘܗ̱ܝ ܒܚܰܫܳܐ ܘܡܶܬܓܰܘܙܠܝ̣ܢ ܒܪܘ̣ܓܙܳܐ: ܡܣܰܟܰܟ ܒܨܶܨ̈ܐ ܘܕܳܠܶܩ ܒܗܽܘܢ ܛܢܳܢܳܐ: ܕܩܝ̣ܪܳܐ ܕܰܦܢܶܗ ܒܠܘ̣ܟܳܝܬܳܐ: ܘܚܰܝ̈ܶܐ ܡܳܠܶܟ ܠܡܳܝܘ̣̈ܬܶܐ: ܡܰܠܰܐܟ̈ܶܐ ܬܰܗܝ̣ܪܝ̣ܢ ܘܰܒܢܰܝ̈ ܐܳܕܳܡ ܡܶܬܦܰܪܩܝ̣ܢ: ܫܺܐܕ̈ܶܐ ܪܳܥܠܝ̣ܢ ܘܕܰܝ̈ܘܶܐ ܡܶܣܬܰܚܦܝ̣ܢ: ܟܺܐܢܳܐ ܥܰܡ ܥܰܘ̈ܳܠܶܐ ܐܶܬܡܢܝ̣ ܙܰܕܝ̣ܩܳܐ ܥܰܡ ܥܳܒ̈ܕܰܝ ܒܝ̣̈ܫܳܬܳܐ ܐܶܬܚܫ̣ܶܒ: ܐܰܠܳܗܳܐ ܥܰܡ ܓܰܝ̈ܳܣܶܐ ܘܡܰܚܝܳܢܳܐ ܥܰܡ ܩܳܛܘ̣̈ܠܶܐ: ܣܳܗ̈ܕܶܐ ܡܡܰܠܠܝ̣ܢ ܫܘ̣ܩܪܳܐ ܘܢܶܟܠܳܐ ܘܡܶܕܶܡ ܕܠܳܐ ܝܳܕ̇ܥܝ̣ܢ ܡܫܰܐܠܝ̣ܢ ܠܶܗ: ܚܰܕ ܣܳܗܶܕ ܘܐܳܡܰܪ: ܕܶܐܡ̣ܰܪ ܕܰܠܗܰܝܟܠܳܐ ܫܳܪܶܐ ܐ̱ܢܳܐ: ܘܰܐ̱ܚܪܺܢܳܐ ܕܰܫ̣ܪܳܐ ܫܰܒܬܳܐ ܘܢܳܡܘ̣ܣܳܐ: ܘܰܒܪܳܐ ܕܐܰܠܳܗܳܐ ܐܳܡܰܪ ܥܰܠ ܢܰܦܫܶܗ ܕܐܝ̣ܬܰܘܗ̱ܝ: ܚܰܕ ܦܰܟܳܐ ܡܳܚܶܐ ܠܶܗ: ܘܰܐ̱ܚܪܺܢܳܐ ܒܰܐܦܰܘ̈ܗ̱ܝ ܪܘ̣ܩܳܐ ܙܳܠܰܚ ܠܶܗ: ܚܰܕ ܢܳܫܶܩ ܘܰܢܟܝ̣ܠ: ܘܰܐ̱ܚܪܺܢܳܐ ܕܠܳܐ ܝܳܕܰܥ ܠܶܗ ܐܳܡܰܪ ܗ̱ܘܳܐ: ܡܶܢܗܽܘܢ ܕܡܳܬܚܝ̣ܢ ܗ̱ܘܰܘ ܠܶܗ ܕܢ̣ܶܬܢܰܓܰܕ: ܘܐ̱ܰܚܪ̈ܳܢܶܐ ܢܶܓ̈ܕܶܐ ܥܰܠ ܚܰܨܶܗ ܫܳܕܶܝܢ ܗ̱ܘܰܘ: ܘܡܶܢܗܽܘܢ ܒܳܪܟܝ̣ܢ ܘܣܳܓ̇ܕܝ̣ܢ ܠܶܗ: ܘܐ̱ܰܚܪ̈ܳܢܶܐ ܡܰܠܟܳܐ ܕܝܘ̣̈ܕܳܝܶܐ ܡܫܰܡܗܝ̣ܢ ܗ̱ܘܰܘ ܠܶܗ: ܚܰܕ ܡ̈ܳܐܢܶܐ ܕܥܺܐܕܳܐ ܡܰܫܠܰܚ ܠܶܗ: ܘܰܐ̱ܚܪܺܢܳܐ ܡܳܐܢ̈ܶܐ ܕܒܶܙܚܳܐ ܡܰܠܒܶܫ ܠܶܗ: ܚܰܕ ܟܠܝ̣ܠܳܐ ܕܟܘ̣̈ܒܶܐ ܚܠܳܦ ܬܳܓܳܐ ܣܳܐܶܡ ܠܶܗ: ܘܰܐ̱ܚܪܺܢܳܐ ܩܰܢܝܳܐ ܚܠܳܦ ܫܰܒܛܳܐ ܗܰܘ̇ ܕܡܰܠܟܘ̣ܬܳܐ ܡܰܠܒܶܟ ܠܶܗ: ܚܰܕ ܥܰܠ ܪܝ̣ܫܶܗ ܡܳܚܶܐ ܗ̱ܘܳܐ: ܘܰܐ̱ܚܪܺܢܳܐ ܒܚܶܡܬܳܐ ܚܰܠܳܐ ܘܰܡܪܳܪ̈ܶܐ ܚܳܠܶܛ ܗ̱ܘܳܐ: ܚܰܕ ܥܰܠ ܩܰܝܣܳܐ ܡܳܬܰܚ ܗ̱ܘܳܐ: ܘܰܐ̱ܚܪܺܢܳܐ ܕܨܶܨ̈ܶܐ ܒܐܝ̣ܕܰܘ̈ܗ̱ܝ ܘܰܒܪ̈ܶܓܠܰܘܗ̱ܝ ܩܳܒܰܥ ܗ̱ܘܳܐ: ܚܰܕ ܕܶܐܢ ܒܪܶܗ ܐܰܢ̱ܬ ܕܐܰܠܳܗܳܐ ܐܰܚܳܐ ܢܰܦܫܳܟ ܐܳܡܰܪ ܗ̱ܘܳܐ: ܘܰܐ̱ܚܪܺܢܳܐ ܐܶܬܕܰܟܪܰܝܢܝ̱ ܡܳܪܝ̱ ܡܳܐ ܕܐܳܬܶܐ ܐܰܢ̱ܬ ܒܡܰܠܟܘ̣ܬܳܟ ܡܶܬ̣ܟܰܫܰܦ ܗ̱ܘܳܐ: ܚܰܕ ܕܚܘ̣ܬ ܡ̣ܶܢ ܨܠܝ̣ܒܳܐ ܘܰܢ̇ܗܰܝܡܶܢ ܒܳܟ ܐܳܡܰܪ ܗ̱ܘܳܐ: ܘܰܐ̱ܚܪܺܢܳܐ ܕܫܰܪܝ̣ܪܳܐܝ̣ܬ ܗܳܢܳܐ ܒܪܶܗ ܗ̱ܘ̣ ܕܐܰܠܳܗܳܐ ܡܰܘ̇ܕܶܐ ܗ̱ܘܳܐ: ܐܶܣܛܪ̈ܰܛܺܝܘ̣ܛܶܐ ܡܒܰܙܚܝ̣ܢ ܗ̱ܘܰܘ: ܘܝܘ̣̈ܕܳܝܶܐ ܡܓܰܕܦܝ̣ܢ ܘܪ̈ܝ̣ܫܰܝ ܟܳܗ̈ܢܶܐ ܪ̈ܝ̣ܫܰܝܗܽܘܢ ܥܠܰܘܗ̱ܝ ܡܢܝ̣ܕܝ̣ܢ ܗ̱ܘܰܘ: ܩܰܝܳܦܳܐ ܘܚܰܢܳܢ ܡܶܠܟܳܐ ܝܳܗ̇ܒܝ̣ܢ ܗ̱ܘܰܘ: ܘܩ̈ܳܠܶܐ ܡ̣ܶܢ ܟܽܠ ܕܘ̣ܟ ܨܠܘ̣ܒܳܝܗ̱ܝ ܨܠܘ̣ܒܳܝܗ̱ܝ ܕܰܝܳܢܳܐ ܩܳܥܶܝܢ ܗ̱ܘܰܘ: ܐܳܘ ܠܕܘ̣ܡܳܪܳܐ ܕܠܳܐ ܡܶܬ̣ܦܰܫܰܩ: ܐܳܘ ܠܦܘ̣ܫܳܩܳܐ ܕܰܡܥܰܠܰܝ: ܐܰܠܳܗܳܐ ܕܡܶܨܛܠܶܒ: ܫܶܡܫܳܐ ܕܚܳܫܶܟ: ܐܰܦܰܝ̈ ܬܰܪܥܳܐ ܕܗܰܝܟܠܳܐ ܕܡܶܣܬ̣ܕܶܩ: ܕܡܳܐ ܘܡܰܝ̈ܳܐ ܕܡ̣ܶܢ ܕܰܦܢܳܐ ܕܪܳܕܶܝܢ: ܫܘ̣̈ܥܶܐ ܕܡܶܨܛܰܪܶܝܢ: ܐܰܪܥܳܐ ܕܪܳܥܠܳܐ: ܡܝ̣̈ܬܶܐ ܕܩܳܝ̇ܡܝ̣ܢ: ܝܘ̣ܕܳܐ ܡܩܰܒܶܠ ܟܶܣܦܳܐ: ܩܰܝܳܦܳܐ ܡܳܠܶܟ ܘܡܶܫ̣ܬܡܰܥ: ܚܰܢܳܢ ܡܩܰܛܪܶܓ: ܦܝ̣ܠܰܛܘ̣ܣ ܝܳܬܶܒ ܘܡܳܪܰܢ ܩܳܐܶܡ: ܘܒܰܕܓܽܘܢ ܢ̇ܫܰܒܰܚ ܠܗܰܘ̇ ܕܰܒܟܽܠܗܶܝܢ ܬܡܝ̣̈ܗܳܬܳܐ ܐܶܬܝ̣ܕܰܥ ܕܗܘ̣ܝܘ̣ ܡܳܪܳܗ̇ ܕܬܶܫܒܘ̣ܚܬܳܐ: ܢܶܒ̇ܪܘ̣ܟ ܠܗܰܘ̇ ܕܐܶܬ̣ܬܠܝ̣ ܥܰܠ ܩܰܝܣܳܐ ܘܰܗ̣ܘܳܐ ܚܠܳܦܰܝܢ ܠܰܘܛܬܳܐ: ܢ̇ܶܬܒܰܝܬܶܐ ܠܗܰܘ̇ ܕܰܡ̣ܬܰܚ ܠܟܽܠܗܽܘܢ ܣܰܘ̈ܦܶܐ ܕܡܶܬܥܰܡܪܳܢܝ̣ܬܳܐ: ܢܶܩ̇ܪܘ̣ܒ ܠܗܰܘ̇ ܕܐܶܨܛܠ̣ܶܒ ܕܰܢ̇ܣܰܒܰܪ ܒܶܗ: ܐܰܝܟܰܢܳܐ ܕܠܳܐ ܢܰܚ̣ܦܪ̈ܳܢ ܐܰܦܰܝ̈ܢ ܐܶܠܳܐ ܢ̣ܶܙܕܰܗ̈ܝܳܢ: ܢܶܣ̇ܓܘ̣ܕ ܠܟܘ̣ܒܫܳܐ ܕܪ̈ܶܓܠܰܘܗ̱ܝ ܕܰܡܪܰܝܡܳܐ ܕܐܶܬ̣ܡܰܟܰܟ ܡܶܛܽܠܳܬܰܢ: ܢܶܒ̇ܥܶܐ ܡܶܢ ܒܰܣܝ̣ܡܘ̣ܬܶܗ ܕܠܳܐ ܢ̇ܰܘܚܰܪ ܠܡܶܦ̣ܪܩܰܢ ܡܶܢ ܟܽܠܗܽܘܢ ܣܳܐܢܰܝ̈ܢ ܘܐܘ̣ܠ̈ܨܳܢܶܐ ܩܫܰܝ̈ܳܐ ܕܰܟܪܝ̣ܟܝ̣ܢ ܠܰܢ: ܢ̣ܰܪܟܶܢ ܚܰܘܣܳܢܰܘ̈ܗ̱ܝ ܥܠܰܝܢ ܘܢ̇ܶܬܚܢܶܢ: ܘܢ̇ܶܦܫܘ̣ܛ ܐܝ̣̈ܕܰܝܳܐ ܕܝ̣ܠܰܢ ܠܘܳܬܶܗ: ܢܰܥܗ̇ܕܝ̣ܘܗ̣ܝ ܚܰܫ̈ܶܐ ܕܝ̣ܠܶܗ ܨܶܒܝ̈ܳܢܳܝܶܐ ܕܡܶܛܽܠܳܬܰܢ ܣܰܝܒ̣ܰܪ ܘܡ̣ܶܢ ܥܘ̣̈ܡܩܶܐ ܕܬܰܪܥܝ̣ܬܳܐ ܢܶܩ̇ܥܶܐ ܘܢܺܐܡܰܪ: ܕܡܳܪܝܳܐ ܗܰܘ̇ ܕܐܶܨܛܠܶܒ̣ܬ ܚܠܳܦܰܝܢ ܐܶܬܪܰܚܰܡܥܠܰܝܢ: ܩܰܕܝ̣ܫܰܬ ܩܰܕܝ̣ܫܰܬ ܩܰܕܝ̣ܫܰܬ ܐܰܠܳܗܳܐ: ܕܐܶܨܛܠܶܒ̣ܬ ܘܰܦܪܰܩ̣ܬܳܢ ܥܢܝ̣ ܠܰܢ ܘܦܰܢܳܐ ܫܶܐܠ̈ܳܬܰܢ: ܐܰܦܨܰܚ ܠܰܢ ܡܶܢ ܥܳܩ̈ܳܬܰܢ ܒܡܰܫܬܝܳܟ ܫܡܰܝܳܢܳܐ ܕܡܰܪܘܶܐ ܐܰܝܟ ܚܰܝܳܐ ܐܰܩܝ̣ܡ ܠܰܢ ܡ̣ܶܢ ܝܰܡܝ̣ܢܳܟ: ܘܡܳܐ ܕܥܰܡ ܨܠܝ̣ܒܳܐ ܐܰܝܟ ܕܰܒܢܝ̣ܫܳܐ ܕܙܳܟܘ̣ܬܳܐ ܡܶܬܓܠܶܐ ܐܰܢ̱ܬ: ܐܶܡܰܬܝ̱ ܕܰܠܗܳܢܽܘܢ ܕܝܰܩ̣ܪܘ̣ܟ ܡܫܰܒܚܳܐܝ̣ܬ ܡܶܙܕܰܝܰܚ ܐܰܢ̱ܬ ܒܫܘ̣ܒܚܳܐ ܪܰܒܳܐ ܕܡܰܠܟܘ̣ܬܳܟ: ܬܰܡܳܢ ܒܟܶܢ̈ܫܶܐ ܕܩܰܕܝ̣̈ܫܰܝܟ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܙܪܽܘ̣ܥ ܡܳܪܝ̱ ܕܶܚܠܬܳܟ ܒܰܐܪܥܳܐ ܕܨܶܒܝܳܢܰܢ: ܘܥ̱ܘ̣ܗܕܳܢܳܐ ܕܚܰܫܳܟ ܘܡܰܘܬܳܟ ܒܠܶܒܰܘ̈ܳܬܰܢ: ܘܣܰܒܪܳܐ ܕܰܩܝܳܡܬܳܟ ܒܢܰܦ̈ܫܳܬܰܢ: ܘܗܰܒ ܠܰܢ ܕܢܶܗ̇ܘܶܐ ܡܰܘ̈ܕܝܳܢܶܐ ܕܚܰܫܰܝ̈ܟ ܘܡܰܟܪ̈ܙܳܢܶܐ ܕܰܡܕܰܒܪܳܢܘ̣ܬܳܟ ܘܰܡܫܘ̈ܬܦܳܢܶܐ ܕܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܘܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܠܳܟ: ܘܚܰܣܳܐ ܒܶܗ ܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀