ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܠܳܗܳܐ ܡܶܠܬܳܐ ܕܐܶܬ̣ܬܠܝ̣ ܒܰܨܠܝ̣ܒܳܐ ܘܰܢ̣ܓ̣ܰܕ ܒܪܝ̣ܬܳܐ ܠܣܶܓܕܬܶܗ: ܒܰܪܶܟ ܘܢܰܛܰܪ ܠܟܶܢܫܳܐ ܗܳܢܳܐ ܒܰܨܠܝ̣ܒܳܟ ܡܰܥܒܶܕ ܚܰܝ̈ܶܐ: ܘܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ: ܘܟܰܕ ܒܚܰܝܠܶܗ ܡܶܬ̣ܢܰܛܪܝ̣ܢܰܢ ܡ̣ܶܢ ܟܽܠ ܒܝ̣ܫܳܐ ܘܡܰܩܪܒܳܢܳܐ ܢ̇ܫܰܒܚܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܕܐܶܨܛܠܶܒ̣ܬ ܚܠܳܦܰܝܢ:ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ:ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܦܳܪܘ̣ܩܳܐ ܪܰܒܳܐ: ܕܰܐܝܟ ܐܶܡܪܳܐ ܠܢܶܟܣܬܳܐ ܡ̣ܶܢ ܚܒܘ̣ܫܝܳܐ ܠܕܝ̣ܢܳܐ ܐܶܬ̣ܕܒܰܪ ܒܨܶܒܝܳܢܶܗ: ܘܰܐܝܟ ܢܶܩܝܳܐ ܩܕܳܡ ܓܳܙܘ̣ܙܳܐ ܫܰܬܝ̣ܩ ܗ̱ܘܳܐ ܩܕܳܡ ܦܝ̣ܠܰܛܘ̣ܣ ܘܠܳܐ ܦ̣ܬܰܚ ܦܘ̣ܡܶܗ ܒܡܘ̣ܟܳܟܶܗ ܕܰܫܦ̣ܰܪ ܠܶܗ: ܠܗܰܘ̇ ܕܰܝܳܢܳܐ ܕܕܰܝ̈ܳܢܶܐ ܕܰܒܕܝ̣ܢܳܐ ܕܥܰܘܠܳܐ ܐܶܬ̣ܬܕܝ̣ܢ ܡ̣ܶܢ ܛܳܠܘ̣̈ܡܶܐ ܘܠܰܢ ܡ̣ܶܢ ܚܘ̣ܝܳܒܳܐ ܕܰܚܛܝ̣ܬܳܐ ܙܰܟܝ̣ ܒܛܰܝܒܘ̣ܬܶܗ: ܠܗܰܘ̇ ܡܥܰܠܝܳܐ ܒܐܝ̣ܩܳܪܳܐ ܕܐܶܬ̣ܒܰܙܰܚ ܘܐܶܬ̣ܬܫܝ̣ܛ ܘܰܐܦܰܘ̈ܗ̱ܝ ܡ̣ܶܢ ܒܶܗܬܬܳܐ ܠܳܐ ܐܰܦܢܝ̣ ܘܠܰܢ ܡ̣ܶܢ ܒܶܗܬܬܳܐ ܚ̣ܰܪܰܪ ܒܰܡܪܰܚܡܳܢܘ̣ܬܶܗ: ܠܗܰܘ̇ ܡܫܰܒܚܳܐ ܒܓܰܐܝܘ̣ܬܳܐ ܕܪܘ̣ܩܳܐ ܛܰܡܳܐܐ ܩܰܒܶܠ ܦܰܪܨܘ̣ܦܶܗ ܡ̣ܶܢ ܡܰܪ̈ܳܚܶܐ: ܘܫܰܟ̣ܶܢ ܦܰܪܶܗܣܺܝܰܐ ܘܓܰܠܝܘ̣ܬ ܐܰܦ̈ܶܐ ܠܳܐܕܳܡ ܕܰܥܒ̣ܰܪ ܦܘ̣ܩܕܳܢܳܐ ܕܢܶܦ̣ܢܶܐ ܠܝܳܪܬܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܗܰܘ̇ ܕܰܩܕܳܡ ܙܰܒ̈ܢܶܐ ܡ̣ܶܢ ܥܘ̣ܒܳܐ ܕܐܰܒܘ̣ܗ̱ܝ ܐܰܠܳܗܳܐܝ̣ܬ ܐܶܬܝ̣ܠܶܕ: ܘܰܒܚܰܪܬܳܐ ܕܝܰܘ̈ܡܳܬܳܐ ܡ̣ܶܢ ܒܬܘ̣ܠܬܳܐ ܩܰܕܝ̣ܫܬܳܐ ܐ̱ܢܳܫܳܐܝ̣ܬ ܕܢܰܚ̣: ܘܡ̣ܶܢ ܒܳܬܰܪ ܟܽܠܳܗ̇ ܡܕܰܒܪܳܢܘ̣ܬܳܐ ܕܝ̣ܠܶܗ ܕܰܚܠܳܦܰܝܢ: ܠܡܘ̣ܟܳܟܳܐ ܘܰܠܣܘ̣ܪܳܩܳܐ ܨܶܒܝܳܢܳܝܳܐ ܐܶܬ̣ܳܐ: ܘܠܰܢܒܺܝܰܘ̈ܳܬܳܐ ܕܰܢܒܺܝ̈ܶܐ ܘܦ̈ܶܠܳܐܬܳܐ ܕܚܰܙܳܝ̈ܶܐ ܒܰܩܢܘ̣ܡܶܗ ܫܰܡܠܝ̣: ܝܰܘܡܳܢܳܐ ܐ̱ܪܳܙܳܐ ܗܰܘ̇ ܕܰܡܟܰܣܰܝ ܗ̱ܘܳܐ ܡ̣ܶܢ ܕܳܪ̈ܶܐ ܘܡ̣ܶܢ ܫܰܪ̈ܒܳܬܳܐ ܒܰܡܨܰܥܬܳܗ̇ ܕܬܺܐܒܶܝܠ ܐܶܬ̣ܓܠܝ̣: ܗܰܘ̇ ܓܶܝܪ ܕܢܘ̣ܪ̈ܳܢܶܐ ܘܣܶܕܪ̈ܶܐ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܡ̣ܶܢ ܙܝ̣ܘܶܗ ܟܳܘܙܝ̣ܢ ܝܰܘܡܳܢܳܐ ܒܡܘ̣ܟܳܟܳܐ ܥܰܠ ܐܰܪܥܳܐ ܐܶܬ̣ܚܙܝ̣: ܗܰܘ̇ ܕܡܰܠܰܐܟ̈ܶܐ ܘܪ̈ܰܒܰܝ ܡܰܠܰܐܟ̈ܶܐ ܡ̣ܶܢ ܥܘ̣ܙܶܗ ܪܳܐܬܝ̣ܢ ܝܰܘܡܳܢܳܐ ܡ̣ܶܢ ܥܰܦܪܳܐ ܐܶܬ̣ܠܒܶܟ: ܗܰܘ̇ ܕܰܫܩܝ̣ܠ ܥܰܠ ܟܪ̈ܘ̣ܒܶܐ ܘܡܶܬ̣ܩܰܕܰܫ ܡ̣ܶܢ ܣܪ̈ܳܦܶܐ ܝܰܘܡܳܢܳܐ ܡ̣ܶܢ ܛܝ̣ܢܳܐ ܫܝ̣ܛܳܐ ܐܶܬ̣ܒܰܙܰܚ: ܗܰܘ̇ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܠܳܐ ܣܳܦܩܝ̣ܢ ܠܡܰܘܪܳܒܘ̣ ܠܰܫܒܝ̣ܚܘ̣ܬܶܗ ܝܰܘܡܳܢܳܐ ܡ̣ܶܢ ܥܰܒܕܰܘ̈ܗ̱ܝ ܐܶܨܛܰܥ̣ܰܪ: ܗܰܘ̇ ܕܟܳܘܙܳܐ ܡܶܢܶܗ ܫܰܠܗܶܒܝ̣ܬܳܐ ܢܘ̣ܪܳܢܳܝܬܳܐ ܝܰܘܡܳܢܳܐ ܡ̣ܶܢ ܓܶܠܳܐ ܥܡܝ̣ܪܳܐ ܐܶܬ̣ܬܫܝ̣ܛ: ܗܰܘ̇ ܕܰܡܩܰܒܶܠ ܩܘ̣̈ܕܳܫܶܐ ܕܩܰܕܝ̣̈ܫܶܐ ܝܰܘܡܳܢܳܐ ܪܘ̣ܩܳܐ ܙܠܰܚ̣ܘ̱ ܠܶܗ ܒܰܐܦܰܘ̈ܗ̱ܝ: ܗܰܘ̇ ܕܫܘ̣ܒܚܳܐ ܕܰܡܫܰܒ̈ܚܳܢܶܐ ܙܥܘ̣ܪ ܗ̱ܘ̣ ܠܶܗ ܝܰܘܡܳܢܳܐ ܒܰܦܪ̈ܳܓܶܠܶܐ ܐܶܬܢܰܓܰܕ: ܗܰܘ̇ ܕܰܫܡܰܝ̈ܳܐ ܘܰܫܡܰܝ̈ ܫܡܰܝ̈ܳܐ ܡܰܙܥܩܝ̣ܢ ܫܘ̣ܒܚܶܗ ܝܰܘܡܳܢܳܐ ܠܫ̈ܘ̣ܐܳܠܶܐ ܐܶܬܪܡܝ̣ ܡ̣ܶܢ ܝܘ̣̈ܕܳܝܶܐ ܚܰܪ̈ܡܶܐ: ܗܰܘ̇ ܕܰܩܕܳܡܰܘܗ̱ܝ ܟܽܠ ܒܣܰܪ ܥܬܝ̣ܕ ܠܡܶܬܬܕܳܢܘ̣ ܝܰܘܡܳܢܳܐ ܩܕܳܡ ܦܝ̣ܠܰܛܘ̣ܣ ܕܰܝܳܢܳܐ ܐܶܬ̣ܬܕܝ̣ܢ: ܗܰܘ̇ ܕܰܡ̣ܬܰܚ ܫܡܰܝܳܐ ܐܰܝܟ ܝܳܪܝ̣ܥܬܳܐ ܘܰܪܩ̣ܰܥ ܐܰܪܥܳܐ ܥܰܠ ܡܰܝ̈ܳܐ ܝܰܘܡܳܢܳܐ ܒܶܝܬ ܕܝ̣ܢܳܐ ܐܶܬܚ̣ܒܶܫ: ܗܰܘ̣ ܕܰܒܡܶܠܬܶܗ ܬܩ̣ܰܠ ܛܘ̣ܪ̈ܶܐ ܘܰܒܦܘ̣ܩܕܳܢܶܗ ܒܚܳܠܳܐ ܚܒ̣ܰܫ ܝܰܡ̱̈ܡܶܐ ܝܰܘܡܳܢܳܐ ܒܶܝܬ ܚܰܢܳܢ ܐܰܥܶܠ̣ܘ̱ ܚܰܒܫܘ̣ܗ̱ܝ: ܗܰܘ̇ ܕܝܰܗ̣ܒ ܡܶܠܬܳܐ ܠܟܽܠ ܡܰܠ̈ܳܠܶܐ ܝܰܘܡܳܢܳܐ ܩܕܳܡ ܕܰܝܳܢܳܐ ܫܰܬܝ̣ܩ ܘܰܫ̇ܠܶܐ̣ ܘܠܳܐ ܡܡܰܠܶܠ: ܗܰܘ̇ ܕܒܰܡܪ̈ܰܘܡܶܐ ܡܰܠܰܐܟ̈ܶܐ ܪܳܐܬܝ̣ܢ ܡܶܢܶܗ ܬܰܚ̈ܬܳܝܶܐ ܒܥܘ̣ܡܩܳܐ ܡܒܰܙܚܝ̣ܢ ܒܶܗ: ܒܪ̈ܰܘܡܶܐ ܥܶܠܳܝ̈ܶܐ ܟܪ̈ܘ̣ܒܶܐ ܡܒܰܪܟܝ̣ܢ ܠܶܗ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܨܰܥܪܳܐ ܫܳܕܶܝܢ ܒܶܗ: ܒܪ̈ܰܘܡܶܐ ܥܶܠܳܝ̈ܶܐ ܣܪ̈ܳܦܶܐ ܡܩܰܕܫܝ̣ܢ ܠܶܗ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܥܰܘ̈ܳܠܶܐ ܡܨܰܚܶܝܢ ܠܶܗ: ܒܰܡܪ̈ܰܘܡܶܐ ܥܶܠܳܝ̈ܶܐ ܡܥܰܛܰܦ ܢܘ̣ܗܪܳܐ ܐܰܝܟ ܡܰܪܛܘ̣ܛܳܐ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܠܒܝ̣ܫ ܟܠܰܐܡܝ̣ܣ ܕܚܶܣܕܳܐ: ܒܪ̈ܰܘܡܶܐ ܥܶܠܳܝ̈ܶܐ ܡܰܪܟܰܒܬܳܐ ܡܙܰܝܚܳܐ ܠܶܗ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܩܒܝ̣ܥ ܒܩܰܝܣܳܐ ܕܰܨܠܝ̣ܒܳܐ: ܒܪ̈ܰܘܡܶܐ ܥܶܠܳܝ̈ܶܐ ܡܶܬܝܰܩܰܪ ܥܰܡ ܐܰܒܘ̣ܗ̱ܝ ܘܡܶܫ̣ܬܰܒܰܚ ܘܡܶܬ̣ܩܰܠܰܣ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܥܰܡ ܥܰܘ̈ܳܠܶܐ ܐܶܬܡܢܝ̣: ܒܪ̈ܰܘܡܶܐ ܥܶܠܳܝ̈ܶܐ ܡܰܠܟܳܐ ܘܰܡܠܶܟ ܡܰܠ̈ܟܶܐ ܘܩܳܛܰܪ ܬܳܓ̈ܶܐ ܐܝ̣ܬܰܘܗ̱ܝ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܒܰܟܠܝ̣ܠ ܟܘ̣̈ܒܶܐ ܐܶܬܟܰܠ̣ܰܠ: ܒܪ̈ܰܘܡܶܐ ܥܶܠܳܝ̈ܶܐ ܒܓܝ̣̈ܓܠܶܐ ܡܰܠܳـܠܴ̈ܬܳܐ ܡܶܬܗܰܕܰܪ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܒܰܝܢܳܬ ܓܰܝ̈ܳܣܶܐ ܐܶܨܛܠ̣ܶܒ: ܒܰܡܪ̈ܰܘܡܶܐ ܥܶܠܳܝ̈ܶܐ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ ܥܰܠ ܬܪܘ̣ܢܘ̣ܣ ܕܪܰܒܘ̣ܬܶܗ ܝܳܬܶܒ ܒܫܘ̣ܒܚܳܐ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܠܨܰܥܪܳܐ ܐܰܫܠ̣ܶܡ ܗܘ̣ ܠܶܗ: ܒܪ̈ܰܘܡܶܐ ܥܶܠܳܝ̈ܶܐ ܚܰܪܒܳܐ ܠܰܟܪܘ̣ܒܳܐ ܠܡ̣ܶܛܰܪ ܐܝ̣ܠܳܢܳܐ ܕܚܰܝ̈ܶܐ ܝܰܗ̣ܒ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܬܰܪܥܘ̣ܗ̇ ܠܕܰܦܢܶܗ ܒܠܘ̣ܟܳܝܬܳܐ: ܒܪ̈ܰܘܡܶܐ ܥܶܠܳܝ̈ܶܐ ܒܪܶܡܙܶܗ ܠܡܰܝ̈ܳܐ ܡܰܪܝ̣ܪ̈ܶܐ ܒܡܘ̣ܪܰܬ݀ ܚܰܠܝ̣ ܗ̱ܘܳܐ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܡܪܳܪ̈ܶܐ ܘܚܰܠܳܐ ܐܘܫ̣ܶܛܘ̱ ܠܶܗ: ܒܪ̈ܰܘܡܶܐ ܥܶܠܳܝ̈ܶܐ ܪܘ̣ܚܳܐ ܕܚܰܝ̈ܶܐ ܢܦ̣ܰܚ ܒܳܐܕܳܡ: ܘܰܒܥܘ̣̈ܡܩܶܐ ܬܰܚ̈ܬܳܝܶܐ ܠܰܫܝܘ̣ܠ ܥܰܡ ܡܝ̣̈ܬܶܐ ܢܚ̣ܶܬ: ܒܰܕܓܽܘܢ ܡܦܝ̣ܣܝ̣ܢܰܢ ܠܪܶܚܡ̣ܰܬ݀ ܐ̱ܢܳܫܘ̣ܬܳܟ ܘܩܘ̣ܒܳܠܛܰܝܒܘ̣ܬܳܐ ܡܩܰܪܒܝ̣ܢܰܢ ܠܳܟ ܥܰܡ ܣܶܓܕܬܳܐ ܟܰܕ ܐܳܡ̇ܪܝ̣ܢܰܢ: ܫܘ̣ܒܚܳܐ ܠܳܟ ܐܰܠܳܗܳܐ ܕܠܳܐ ܡܶܬ̣ܕܰܪܟܝ̣ܢ ܕܝ̣ܢܰܝ̈ܟ: ܫܘ̣ܒܚܳܐ ܠܳܟ ܥܰܠ ܬܘ̣ܩܳܢܰܝ̈ܟ: ܫܘ̣ܒܚܳܐ ܠܳܟ ܥܰܠ ܡܘ̣ܟܳܟܳܟ: ܫܘ̣ܒܚܳܐ ܠܳܟ ܕܚܰܫ̣ܬ ܚܠܳܦܰܝܢ ܒܰܒܣܰܪ: ܫܘ̣ܒܚܳܐ ܠܳܟ ܕܐܶܨܛܠܶܒ̣ܬ ܚܠܳܦܰܝܢ: ܫܘ̣ܒܚܳܐ ܠܳܟ ܕܡܝ̣ܬܬ ܘܐܰܚܝ̣ܬܳܢ: ܫܘ̣ܒܚܳܐ ܠܳܟ ܕܐܶܬܩܒ̣ܰܪܬ: ܫܘ̣ܒܚܳܐ ܠܳܟ ܕܩܳܡ̣ܬ ܒܬܶܫܒܘ̣ܚܬܳܐ ܘܥܰܡܳܟ ܠܘܳܬ ܐܰܒܘ̣ܟ ܐܰܣܶܩ̣ܬܳܢ: ܡܰܘܕܶܝܢܰܢ ܒܐ̱ܢܳܫܘ̣ܬܳܟ ܘܰܡܩܰܠܣܝ̣ܢܰܢ ܠܰܐܠܳܗܘ̣ܬܳܟ: ܘܰܒܨܰܦܪܳܐ ܗܳܢܳܐ ܕܒܶܗ ܟܽܠܗܶܝܢ ܕܦܘ̣ܪܩܳܢܰܢ ܐܶܫܬܰܡ̈ܠܝ̣: ܠܳܟ ܐܰܠܳܗܳܐ ܡܶܠܬܳܐ ܕܗܳܕܶܐ ܟܽܠܳܗ̇ ܡܕܰܒܪܳܢܘ̣ܬܳܐ ܠܦܘ̣ܪܩܳܢܰܢ ܡܰܠܝ̣ܬ: ܡܶܬܟܰܫܦܝ̣ܢܰܢ ܠܳܟ ܥܰܠ ܥܶܛܪܳܐ ܕܒܶܣ̈ܡܶܐ ܕܡ̣ܶܢ ܡܚܝ̣ܠܘ̣ܬܰܢ ܡܶܬ̣ܩܰܪܰܒ ܗܳܫܳܐ ܩܕܳܡܰܝܟ ܒܝܘ̣ܡ ܥ̱ܘ̣ܗܕܳܢܳܐ ܕܚܰܫܳܟ ܘܕܰܙܩܝ̣ܦܘ̣ܬܳܟ ܘܡܰܘܬܳܟ ܕܰܚܠܳܦܰܝܢ ܕܬܰܫ̣ܘܶܐ ܠܰܢ ܕܢ̇ܶܚܰܫ ܒܚܰܫܳܟ: ܘܢ̇ܶܬܕܰܡܶܐ ܒܡܘ̣ܟܳܟܳܟ: ܘܢ̇ܶܪܘܰܙ ܒܢܘ̣ܚܳܡܳܟ: ܘܰܢ̇ܫܰܒܚܳܟ ܒܡܰܠܟܘ̣ܬܳܟ: ܘܢ̇ܶܬܒܰܣܰܡ ܥܰܡ ܟܽܠܗܽܘܢ ܥܳܒ̈ܕܰܝ ܨܶܒܝܳܢܳܟ: ܒܛܰܝܒܘ̣ܬܳܐ ܕܝ̣ܠܳܟ ܘܰܒܫܰܦܝ̣ܪܘ̣ܬ ܨܶܒܝܳܢܳܐ ܕܰܐܒܘ̣ܟ ܘܰܒܡܰܥܒܕܳܢܘ̣ܬܳܐ ܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ܀

ܥܶܛܪܳܐ

ܫܽܘ̣ܒܚܳܐ ܠܳܟ ܕܶܒܚܳܐ ܡܚܰܣܝܳܢܳܐ ܕܥܰܠ ܩܰܝܣܳܐ ܕܰܨܠܝ̣ܒܳܐ ܐܶܬܕܒܰܚ̣ܬ: ܬܰܘܕܝ̣ ܠܳܟ ܦܝ̣ܪܡܳܐ ܡܪܰܥܝܳܢܳܐ ܕܒܰܙܩܝ̣ܦܳܐ ܥ̣ܛܰܪ ܕܚܰܝ ܩܶܛܠܳܟ ܒܰܒܪܝ̣ܬܳܐ: ܘܒܳܟ ܐܶܬ̣ܕܰܟܝܰܬ݀ ܡ̣ܶܢ ܛܰܡܐܘ̣ܬܳܐ ܕܰܚܛܝ̣ܬܳܐ: ܘܕܶܒ̈ܚܶܐ ܙܰܗ̈ܡܶܐ ܘܰܢܕܝ̣̈ܕܶܐ ܕܚܰܢܦܘ̣ܬܳܐ: ܫܒܝ̣ܚ ܦܘ̣ܪܩܳܢܳܟ ܦܳܪܘ̣ܩܰܢ: ܕܒܰܕܡܳܟ ܡ̣ܶܢ ܡܰܘܬܳܐ ܘܰܚܒܳܠܳܐ ܐܶܬ̣ܦܪܶܩܢܰܢ: ܣܳܓ̇ܕܝ̣ܢܰܢ ܠܰܨܠܝ̣ܒܳܟ ܘܡܰܘ̇ܕܶܝܢܰܢ ܒܚܰܫܰܝ̈ܟ ܕܒܰܙܩܝ̣ܦܳܟ ܚ̣ܝܰܝܢܰܢ: ܘܰܒܡܰܘܬܳܟ ܐܶܬܚ̣ܰܪܰܪܢܰܢ: ܪܰܘܪܒܝ̣ܢ ܥܘ̣ܕܪ̈ܳܢܰܝܟ: ܘܰܙܥܘ̣ܪ ܠܳܟ ܫܘ̣ܒܚܳܐ ܫܝ̣ܛܳܐ ܕܡܶܢܰܢ: ܫܘ̣ܒܚܳܐ ܠܳܟ ܡ̣ܶܢ ܟܽܠ ܕܰܒ̣ܪܰܝܬ ܘܰܦܪܰܩ̣ܬ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀