ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܦܳܪܘ̣ܩܳܐ ܕܝ̣ܠܰܢ ܘܰܡܫܰܘܙܒܳܢܳܐ ܕܚܰܝܰܝ̈ܢ: ܠܗܰܘ̇ ܐܶܡܪܳܐ ܚܰܝܳܐ ܘܝܳܗܶܒ ܚܰܝ̈ܶܐ ܕܒܰܕܒܝ̣ܚܘ̣ܬܶܗ ܫܩ̣ܰܠ ܚܛܳܗܰܝ̈ܢ: ܠܗܰܘ̇ ܕܰܒܚܰܫܶܗ ܡܰܚܝܳܢܳܐ ܡ̣ܶܢ ܛܪܘ̣ܢܘ̣ܬܶܗ ܕܒܝ̣ܫܳܐ ܐܰܓܗܝ̣ ܠܰܢ: ܠܗܰܘ̇ ܕܰܒܡܰܘܬܶܗ ܡܰܥܒܶܕ ܚܰܝ̈ܶܐ ܡ̣ܶܢ ܐܝ̣̈ܕܰܝ ܡܰܘܬܳܐ ܫ̣ܰܘܙܶܒ ܠܰܢ: ܠܗܰܘ̇ ܕܒܰܨܠܝ̣ܒܶܗ ܦܳܪܘ̣ܩܳܝܳܐ: ܐܰܗ̣ܦܶܟ ܠܰܢ ܠܝܳܪܬܘ̣ܬܳܐ ܗܳܝ̇ ܕܐܰܘܒ̣ܶܕܢܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܐܝ̣ܬܰܝܟ ܨܰܝܳܪܳܐ ܚܰܟܝ̣ܡܳܐ: ܘܰܒܦܘ̣ܩܕܳܢܳܟ ܒ̣ܪܰܝܬ ܠܳܐܕܳܡ ܒܗܳܢܳܐ ܝܰܘܡܳܐ ܫܬܝ̣ܬܳܝܳܐ ܕܰܥܪܘ̣ܒܬܳܐ ܘܨܳܪܬ ܒܶܗ ܨܰܠܡܳܐ ܕܪܰܒܘ̣ܬܳܟ: ܘܡܶܛܽܠܳܬܶܗ ܛܰܟܶܣ̣ܬ ܢܰܗܝ̣ܪ̈ܶܐ ܠܟܽܠ ܥܶܕܳܢܝ̣̈ܢ: ܘܦܰܪܕܰܝܣܳܐ ܘܐܰܬܪܳܐ ܕܒܘ̣̈ܣܳܡܶܐ ܘܟܽܠܗܶܝܢ ܛܳܒ̈ܳܬܳܐ ܗܰܝܡܶܢ̣ܬܳܝܗ̱ܝ: ܘܟܰܕ ܒܚܺܐܪܘ̣ܬܶܗ ܠܘܳܬ ܡܶܠܟܳܐ ܕܐܰܢ̱ܬܬܳܐ ܐܶܨܛܠܝ̣ ܘܰܒܡܰܗܡܝܳܢܘ̣ܬܶܗ ܥܒ̣ܰܪ ܥܰܠ ܦܘ̣ܩܕܳܢܳܟ ܐܰܠܳܗܳܝܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܛܪܝ̣ܕܳܐ ܗ̣ܘܳܐ ܡ̣ܶܢ ܝܳܪܬܘ̣ܬܶܗ ܘܐܶܫܬ̣ܕܝ̣ ܠܰܐܟܣܘ̣ܪܺܝܰܐ: ܐܰܢ̱ܬ ܕܶܝܢ ܡܳܪܝܳܐ ܒܛܰܝܒܘ̣ܬܳܟ ܚܳܣ̣ܬ ܥܠܰܘܗ̱ܝ: ܘܪ̈ܰܚܡܶܐ ܕܝ̣ܠܳܟ ܓܳـܠ̣ܘ̱ ܘܐܶܬܪܰܚܰܡ̣ܘ̱ ܥܰܠ ܫܶܦܠܳܐ ܕܝ̣ܠܶܗ ܕܕܳܘܝܳܐ: ܘܒܶܗ ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܐܶܬ̣ܰܝܬ ܠܚܰܫܳܐ ܘܰܨܠܝ̣ܒܳܐ ܘܡܰܘܬܳܐ ܡܶܛܽܠ ܦܘ̣ܪܩܳܢܳܐ ܕܓܶܢܣܳܐ ܐ̱ܢܳܫܳܝܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܥܰܡܳܐ ܩܰܦ̣ܰܚ ܪܝ̣ܫܳܟ ܥܰܡܳܐ ܠܝ̣ܛܳܐ ܕܰܛܠ̣ܰܡ ܛܳܒ̈ܳܬܳܟ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܓܘ̣ܕܶܗ ܕܚܰܢܳܢ ܘܩܰܝܳܦܳܐ ܩܳܥܶܝܢ ܗ̱ܘܰܘ ܠܦܝ̣ܠܰܛܘ̣ܣ ܨܠܘ̣ܒܳܝܗ̱ܝ ܨܠܘ̣ܒܳܝܗ̱ܝ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܕܝ̣ܢܳܐ ܕܚܘ̣ܝܳܒܳܐ ܕܳܢܘ̣ܟ ܕܰܝ̈ܳܢܶܐ ܥܰܘ̈ܳܠܶܐ ܠܳܟ ܕܰܝܳܢܳܐ ܕܟܽܠ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܗܰܘ̇ ܓܰܝܳܣܳܐ ܝܰܡܝ̣ܢܳܝܳܐ ܥܰܠ ܪܝ̣ܫ ܩܰܝܣܳܐ ܟܰܕ ܚـܼܙܳܟ ܘܗܰܝܡ̣ܶܢ ܒܳܟ ܘܩܳܥܶܐ ܠܘܳܬܳܟ ܟܰܕ ܐܳܡܰܪ ܕܐܶܬܕܰܟܪܰܝܢܝ̱ ܡܳܪܝ̱ ܒܡܰܠܟܘ̣ܬܳܟ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܘܰܥܕܳܐ ܕܚܰܝ̈ܶܐ ܘܰܕܦܘ̣ܪܩܳܢܳܐ ܫܰܟܶܢ̣ܬ ܠܥܺܕܬܳܟ ܒܚܰܫܳܟ ܦܳܪܘ̣ܩܳܝܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܙܳܟܘ̣ܬܳܐ ܙܰܡܶܢ̣ܬ ܠܰܟܝܳܢܰܢ ܕܐܶܙ̣ܕܟܝ̣ ܗ̱ܘܳܐ ܒܰܥܕܶܝܢ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܚܫ̣ܶܟ ܫܶܡܫܳܐ ܕܰܚ̣ܙܳܟ ܒܰܙܩܝ̣ܦܳܐ ܠܳܟ ܫܶܡܫܳܐ ܪܰܒܳܐ ܕܙܰܕܝ̣ܩܘ̣ܬܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܛܘ̣ܪ̈ܶܐ ܪܥܶܠ̣ܘ̱ ܘܰܐܪܥܳܐ ܢܳܝ̇ܕܳܐ ܗ̱ܘܳܬ݀ ܕܰܚ̣ܙܰܐܘܽܘܟ ܒܰܙܩܝ̣ܦܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܝܰܗ̣ܒܘ̱ ܠܳܟ ܚܰܠܳܐ ܘܰܡܪܳܪ̈ܶܐ ܠܳܟ ܝܰܡܳܐ ܕܪ̈ܰܚܡܶܐ ܕܠܳܐ ܣܘ̣ܦ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܟܬܳܒܳܐ ܕܰܓܙܳܪ ܕܝ̣ܢܳܐ ܥܒ̣ܰܕ ܦܝ̣ܠܰܛܘ̣ܣ ܕܒܶܗ ܐ̱ܪܳܙܳܐ ܪܰܒܳܐ ܡܶܬ̣ܬܨܝ̣ܪ ܗ̱ܘܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܠܚܰܫܳܐ ܕܰܒܝܰܕ ܨܠܝ̣ܒܳܐ ܐܶܬ̣ܰܝܬ: ܘܰܒܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܠܚܰܫ̈ܶܐ ܕܝ̣ܠܰܢ ܒܰܛܶܠ̣ܬ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܡܬܰܚ̣ܬ ܢܰܦܫܳܟ ܒܰܨܠܝ̣ܒܳܐ ܨܶܒܝܳܢܳܐܝ̣ܬ ܐܰܝܟ ܕܰܡܬܰܚ̣ܬ ܠܰܫܡܰܝܳܐ ܐܝܟ ܝܳܪܝ̣ܥܬܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܢܘ̣ܪ̈ܳܢܶܐ ܘܪ̈ܘ̣ܚܳܢܶܐ ܒܬܶܗܪܳܐ ܩܳܝ̇ܡܝ̣ܢ ܗ̱ܘܰܘ ܟܰܕ ܚܳܝ̇ܪܝ̣ܢ ܒܳܟ ܕܰܬܠܶܝܬ ܥܰܠ ܩܰܝܣܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܣܳܛܳܢܳܐ ܘܟܽܠܗܽܘܢ ܫܺܐܕ̈ܶܐ ܘܚܰܝ̈ܠܰܘܳܬܶܗ ܐܶܬܛܰܠ̣ܰܩܘ̱ ܐܰܝܟ ܫܥܘ̣ܬܳܐ ܡ̣ܢ ܩܕܳܡ ܢܘ̣ܪܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܥܪܰܒ̣ ܫܶܡܫܳܐ ܒܰܪܩܝ̣ܥܳܐ ܘܰܥܒ̣ܰܕܬ ܦܘ̣ܪܩܳܢܳܐ ܒܰܡܨܰܥܬܳܗ̇ ܕܰܐܪܥܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܦܘ̣ܪܩܳܢܳܐ ܗ̣ܘܳܐ ܠܓܶܢܣܰܢ ܡ̣ܶܢ ܡܰܘܬܳܐ ܘܣܳܛܳܢܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܨܠܝ̣ܒܳܐ ܕܚܰܝ̈ܶܐ ܨܰܠܒ̣ܳܗ̇ ܠܰܚܛܝ̣ܬܳܐ ܒܰܨܠܝ̣ܒܘ̣ܬܳܐ ܕܝ̣ܠܳܟ ܡܰܠܝܰܬ݀ ܐ̱ܪ̈ܳܙܶܐ ܬܡܝ̣̈ܗܶܐ ܘܐܰܠܳܗ̈ܳܝܶܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܩܳܡ̣ܘ̱ ܣܳܗ̈ܕܶܐ ܕܫܘ̣ܩܪܳܐ ܘܡ̣ܰܠܶܠܘ̱ ܥܰܘܠܳܐ ܕܰܢ̣ܡܝ̣ܬܽܘܢ ܠܳܟ ܕܰܐܡܝ̣ܬܬ ܠܡܰܘܬܳܐ ܒܡܰܘܬܳܟ ܩܰܕܝ̣ܫܳܐ ܘܩܰܒܪ̈ܶܐ ܘܫܘ̣̈ܥܶܐ ܐܨܛܰܪܝ̣ܘ ܘܡܝ̣̈ܬܶܐ ܒܩܳܠܳܟ ܐܶܬܢܰܚ̣ܰܡܘ̱ ܘܩܳܡ̣ܘ̱: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܪܕܰܘ ܡ̣ܶܢ ܕܰܦܢܳܟ ܡܳܪܰܢ ܕܡܳܐ ܘܡܰܝ̈ܳܐ: ܘܟܳܣܳܐ ܕܚܰܝ̈ܶܐ ܠܰܡܗܰܝ̈ܡܢܶܐ ܕܢܳܣ̇ܒܝ̣ܢ ܒܗܰܝܡܳܢܘ̣ܬܳܐ ܘܰܒܗܽܘܢ ܐܶܬ̣ܚܢܶܢܘ̱ ܚܛܳܝ̈ܶܐ ܘܐܶܬ̣ܬܫܝ̣ܓܘ̱ ܡ̣ܶܢ ܨܳܐܝܘ̣ܬܳܐ ܕܥܰܘܠܳܐ ܘܕܰܚܛܝ̣ܬܳܐ ܘܰܕܡܰܘܬܳܐ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܫܘ̣ܘܙܳܒܳܐ ܡܫܰܡܠܝܳܐ ܗ̣ܘܳܐ ܠܰܒܢܰܝ̈ܢܳܫܳܐ ܕܗܰܝܡ̣ܶܢܘ̱ ܘܰܡܗܰܝܡܢܝ̣ܢ ܒܐ̱ܪܳܙܳܐ ܕܡܰܘܬܳܟ ܘܕܰܩܝܳܡܬܳܟ: ܒܗܳܢܳܐ ܝܰܘܡܳܐ ܕܰܥܪܘ̣ܒܬܳܐ ܬܶܫܒܘ̣ܚܬܳܐ ܠܳܐ ܡܶܬ̣ܦܰܣܩܳܢܝ̣ܬܳܐ ܥܰܡ ܪ̈ܶܒܘ̣ ܣܶܓ̈ܕܳܬܳܐ ܡܩܰܪܒܳܐ ܥܺܕܬܳܟ ܩܰܕܝ̣ܫܬܳܐ ܕܰܒܚܰܫܳܟ ܐܶܬ̣ܦܰܪܩܰܬ݀ ܟܰܕ ܐܳܡ̇ܪܳܐ: ܫܘ̣ܒܚܳܐ ܠܳܟ ܐܰܠܳܗܳܐ ܕܰܒܚܰܫܳܟ ܐܶܬ̣ܦܪܶܩܢܰܢ: ܫܘ̣ܒܚܳܐ ܠܳܟ ܡܫܝ̣ܚܳܐ ܐܰܠܳܗܳܐ ܕܐܶܬ̣ܬܰܚܬܝ̣ܬ ܡܕܰܒܪܳܢܳܐܝ̣ܬ ܠܡܘ̣ܟܳܟܳܐ ܒܐ̱ܪܳܙܳܐ ܪܰܒܳܐ ܘܰܠܡܰܘܬܳܐ ܕܡܶܛܽܠܳܬܰܢ: ܫܘ̣ܒܚܳܐ ܠܳܟ ܕܕܝ̣ܠܳܟ ܗ̱ܘ̣ ܕܪܳܥܳܐ ܘܕܝ̣ܠܳܟ ܗ̱ܝ̣ ܓܰܢ̱ܒܳܪܘ̣ܬܳܐ ܟܝܳܢܳܐܝ̣ܬ: ܫܘ̣ܒܚܳܐ ܠܳܟ ܡܫܝ̣ܚܳܐ ܐܰܠܳܗܳܐ ܕܐܝ̣ܬܰܝܟ ܠܳܐ ܚܳܫܘ̣ܫܳܐ ܒܰܟܝܳܢܳܐ: ܘܚܰܫ̣ܬ ܚܠܳܦܰܝܢ ܒܰܒܣܰܪ ܡܕܰܒܪܳܢܳܐܝ̣ܬ: ܫܘ̣ܒܚܳܐ ܠܳܟ ܡܫܝ̣ܚܳܐ ܐܰܠܳܗܳܐ ܕܪܰܡܪܶܡ̣ܬ ܠܓܶܢܣܰܢ ܕܰܥܓܝ̣ܢ ܗ̱ܘܳܐ ܒܰܚܒܳܠܳܐ: ܫܘ̣ܒܚܳܐ ܠܳܟ ܡ̣ܶܢ ܟܽܠ ܦܘ̣̈ܡܝ̣ܢ: ܫܘ̣ܒܚܳܐ ܠܳܟ ܒܟܽܠ ܥܶܕܳܢܝ̣̈ܢ: ܫܘ̣ܒܚܳܐ ܠܳܟ ܥܰܠ ܟܽܠ ܡܶܕܶܡ: ܘܐܳܠܶܦ ܐܰܠܦܝ̣̈ܢ ܫܘ̣ܒܚܳܐ ܠܳܟ: ܘܪ̈ܶܒܘ̣ ܪ̈ܶܒܘܳܢ ܫܘ̣ܒܚܳܐ ܠܳܟ: ܘܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܕܰܒܝܰܘܡܳܐ ܗܰܘ̇ ܐ̱ܚܪܳܝܳܐ ܕܢܘ̣ܚܳܡܳܐ ܕܒܶܗ ܐܳܬܶܐ ܐܰܢ̱ܬ ܕܰܬ̣ܕܽܘܢ ܠܬܺܐܒܶܝܠ ܒܙܰܕܝ̣ܩܘ̣ܬܳܐ: ܠܳܐ ܬ̣ܕܽܘܢ ܠܰܢ ܐܰܝܟ ܥܳܒ̈ܕܰܝ ܒܝ̣̈ܫܳܬܳܐ: ܠܳܐ ܬ̣ܶܟܦܘ̣ܪ ܒܰܢ ܕܐܰܘܕܝ̣ܢܰܢ ܒܚܰܫܰܝ̈ܟ: ܠܳܐ ܬܶܫ̣ܕܶܐ ܠܰܢ ܡ̣ܶܢ ܩܕܳܡܰܝܟ ܕܐܝ̣ܬܰܝܢ ܣܳܓܘ̣̈ܕܶܐ ܕܰܨܠܝ̣ܒܳܟ ܦܳܪܘ̣ܩܳܝܳܐ: ܐܶܠܳܐ ܐܫܘܳܐ ܠܰܢ ܕܢ̇ܶܚܰܫ ܒܚܰܫܰܝ̈ܟ ܘܢܶܫ̇ܬܰܒܗܰܪ ܒܰܙܩܝ̣ܦܳܟ: ܘܢܶܣ̇ܓܘ̣ܕ ܠܰܨܠܝ̣ܒܳܟ ܘܢ̇ܰܘܕܶܐ ܒܰܩܝܳܡܬܳܟ: ܘܰܢ̇ܫܰܒܚܳܟ ܒܡܰܠܟܘ̣ܬܳܟ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܥܶܛܪܳܐ ܕܚܘ̣ܣܳܝܳܐ ܕܐܶܬ̣ܬܰܥܛܰܪ ܒܦܝ̣ܪܡܳܐ ܕܰܙܩܝ̣ܦܳܐ ܥܰܠ ܪܝ̣ܫ ܪܰܘܡܳܐ ܕܓܳܓܘ̣ܠܬܳܐ ܒܟܶܢ̈ܦܶܐ ܕܰܨܠܝ̣ܒܳܐ ܒܰܡܨܰܥܬܳܗ̇ ܕܐܰܪܥܳܐ: ܘܒܰܣ̣ܶܡ ܪܝ̣ܚܳܐ ܕܗܰܢܺܝܐܘ̣ܬܶܗ ܠܥܺܕܬܶܗ ܡܗܰܝܡܰܢܬܳܐ: ܐܰܢ̱ܬ ܡܳܪܝ̱ ܘܗܳܫܳܐ ܐܰܣܓܳܐ ܘܰܐܘܣܶܦ ܒܓܰܘܳܗ̇ ܕܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܘܰܡܫܰܒܰܚܬܳܐ ܒܰܣܝ̣ܡܘ̣ܬ ܪܝ̣ܚܳܐ ܕܚܘ̣ܒܳܟ ܐܰܠܳܗܳܝܳܐ: ܘܰܐܫܪܳܐ ܒܳܗ̇ ܟܰܗܝ̣ܢܘ̣ܬܳܐ ܘܫܰܝܢܳܐ ܐܰܡܝ̣ܢܳܐ ܘܰܫܠܳܡܳܐ ܡܫܰܡܠܝܳܐ ܘܫܰܪܝ̣ܪܳܐ ܡ̣ܶܢ ܩܕܳܡ ܦܰܪܨܘ̣ܦܳܐ ܕܝ̣ܠܳܟ ܦܨܝ̣ܚܳܐ ܘܡܰܦܨܚܳܢܳܐ: ܐܰܝܟܰܢܳܐ ܕܟܰܕ ܝܰܠ̈ܕܝܗ̇ ܡܶܬ̣ܒܰܣܡܝ̣ܢ ܟܽܠ ܫܳܥ ܒܪܝ̣ܚܳܐ ܠܳܐ ܡܰܘܦܝܳܢܳܐ ܘܠܳܐ ܡܶܣ̣ܬܰܒܥܳܢܳܐ ܕܫܘ̣̈ܘܟܳܢܰܘܗ̱ܝ ܐܰܠܳܗ̈ܳܝܶܐ: ܢ̣ܰܘܕܽܘܢ ܠܣܰܓܺܝܐܘ̣ܬܳܐ ܕܪ̈ܰܚܡܰܝܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀