ܕܝܳܠܕܰܬ ܐܰܠܳܗܳܐ:

ܫܠܳܡܠܶܟܝ ܡܶܢܰܢ ܝܳܠܕܰܬ ܐܰܠܳܗܳܐ. ܫܠܳܡܠܶܟܝ ܐܶܡܶܗ ܕܢܰܗܺܝܪܳܐ. ܫܠܳܡܠܶܟܝ ܕܶܐܬܡܰܬܰܠܬܝ ܒܣܰܢܝܳܐ ܗܰܘ ܕܰܚܙܳܐ ܗܘܳܐ ܡܽܘܫܶܐ. ܫܠܳܡܠܶܟܝ ܥܢܳܢܳܐ ܩܰܠܺܝܠܬܳܐ ܗܳܝ ܕܶܐܡܰܪ ܐܶܫܰܥܝܳܐ ܡܫܰܒܚܳܐ. ܫܠܳܡܠܶܟܝ ܩܺܒܽܘܬܳܐ ܕܕܺܝܰܬܺܝܩܺܝ ܫܠܳܡܠܟܶܝ ܐܳܘ ܟܢܺܝܟܬܳܐ. ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ. ܫܠܳܡܠܶܟܝ ܕܡܶܢܶܟܝ ܐܶܬܺܝܠܶܕ ܡܶܠܬܳܐ ܡܬܽܘܡܳܝܶܗ ܕܰܐܒܳܐ. ܘܗܳܐ ܟܽܠ ܫܰܪ̈ܒܳܬܳܐ ܛܽܘܒܳܐ ܝܳܗ̈ܒܳܢ ܠܶܟܝ܀

ܕܣܳܗ̈ܕܶܐ ܒܗ:

ܗܳܝܕܶܝܢ ܘܟܰܕ ܥܰܠܘ ܣܳܗ̈ܕܶܐ ܠܒܶܝܬ ܕܺܝܢܳܐ ܩܕܳܡ ܕܰܝܳܢ̈ܶܐ ܥܰܘ̈ܳܠܶܐ. ܙܰܝܢܳܐ ܕܪܽܘܚܳܐ ܠܒܺܝ̈ܫܺܝܢ ܗܘܰܘ. ܡܶܢ ܗܰܘ ܕܰܨܠܺܝܒܳܐ ܚܰܝܳܐ. ܘܰܒܗܰܝܡܳܢܽܘܬܳܐ ܬܪܺܝܨܬܳܐ ܡܫܰܪܪܺܝܢ ܗܘܰܘ ܪ̈ܶܥܝܳܢܰܝܗܽܘܢ. ܕܰܚܙܰܘ ܣܪ̈ܳܩܶܐ ܘܢܶܓ̈ܕܶܐ ܘܽܐܘܠ̈ܨܳܢܶܐ. ܘܠܳܐ ܙܳܥܘ ܘܶܐܣܬܰܪܰܕܘ. ܙܟܰܘ ܒܰܐܪܥܳܐ ܢܨܰܚܘ ܒܰܫܡܰܝܳܐ. ܘܗܳܐ ܥܒܺܝ̈ܕܺܝܢ ܫܽܘܪ̈ܶܐ ܠܢܰܦ̈ܫܳܬܰܢ. ܬܚܶܝܬ ܟܶܢܦܰܝ̈ܗܽܘܢ ܢܶܣܬܰܬܰܪ ܘܥܰܡܗܽܘܢ ܢܶܥܽܘܠ ܠܰܓܢܽܘܢ ܚܰܕ̈ܘܳܬܳܐ܀

ܕܰܬܝܳܒܽܘܬܳܐ:

ܐܰܢ̱ܬܽ ܗ̱ܘ ܡܫܺܝܚܳܐ ܡܳܪܝ ܘܰܐܠܳܗܝ ܐܰܢ̱ܬܽ ܗ̱ܘ ܬܽܘܟܠܳܢܝ̱ ܥܰܫܺܝܢܳܐ. ܗܘܺܝ ܠܺܝ ܫܽܘܪܳܐ ܕܠܳܐ ܢܳܦܶܠ ܐܳܦ ܢܳܛܽܘܪܳܐ ܕܠܳܐ ܕܳܡܶܟ. ܘܢܰܛܰܪ ܚܰܝܰܝ̈ ܒܰܨܠܺܝܒܳܟ ܡܶܢ ܟܡܺܐܢܰܘ̈ܗܝ ܕܰܒܥܶܠܕܰܪܳܐ. ܚܛܳܗܰܝ̈ ܒܪܽܘܚܩܳܐ ܣܳܡܽܘܢܝ̱ ܡܶܢܳܟ ܐܳܘ ܚܰܢܳܢܳܐ. ܐܰܢ̱ܬ ܡܳܪܝ ܐܶܬܪܰܚܰܡܥܠܰܝ. ܐܰܢ̱ܬ ܡܳܪܝ ܚܰܣܳܐ ܠܺܝ ܚܰܘܒܰܝ̈ ܒܣܽܘܓܳܐܐ ܕܪ̈ܰܚܡܰܝܟ ܘܰܕܒܰܣܺܝܡܽܘܬܳܟ܀

ܕܥܰܢܺܝ̈ܕܶܐ:

ܗܳܝܕܶܝܢ ܘܡܳܐ ܕܪ̈ܳܥܠܳܢ ܟܽܠ ܒܶܪ̈ܝܳܬܳܐ ܠܡܶܫܬܪܳܝܽܘ ܡܶܢ ܬܽܘܩܳܢܗܶܝܢ. ܫܶܡܫܳܐ ܘܣܰܗܪܳܐ ܥܰܡ ܟܰܘܟ̈ܒܶܐ ܢܶܬܒܰܛܠܽܘܢ ܕܠܳܐ ܢܰܢܗܪܽܘܢ ܘܰܒܦܽܘܩܕܳܢܶܗ ܕܒܳܪܽܘܝܳܐ. ܡܳܛܶܐ ܥܳܠܡܳܐ ܠܫܽܘܠܳܡܳܐ. ܬܽܘܒ ܕܶܝܢ ܘܩܰܒܪ̈ܶܐ ܒܙܰܘܥܳܐ ܡܶܬܦܰܬܚܺܝܢ ܘܡܺܝ̈ܬܶܐ ܕܰܒܗܽܘܢ ܡܶܬܢܰܚܡܺܝܢ ܘܰܠܒܶܝܬ ܕܺܝܢܳܐ ܢܶܬܛܰܝܒܽܘܢ. ܕܰܢܩܰܒܠܽܘܢ ܦܽܘܪ̈ܥܳܢܰܝܗܽܘܢ ܒܕܺܝܢܳܐ ܟܺܐܢܳܐ ܘܰܬܪܺܝܨܳܐ ܘܠܳܐ ܡܶܨܛܰܠܝܳܢܳܐ܀