ܕܝܳܠܕܰܬ ܐܰܠܳܗܳܐ:

ܐܝܟ ܐܶܓܰܪܬܳܐ ܕܡܶܬܟܰܬܒܳܐ ܡܶܢ ܡܰܠܟܳܐ ܠܥܽܘܕܪܳܢܳܐ ܕܰܡܚܺܝ̈ܠܶܐ. ܗܳܟܰܢ ܐܺܝܬܶܝܗ̇ ܒܳܥܽܘܬܶܟܝ̱. ܐܳܘ ܟܢܺܝܟܬܳܐ ܠܘܳܬ ܝܰܠܕܶܟܝ̱ ܘܰܐܠܳܗܶܟܝ̱. ܨܠܽܘܬܶܟܝ̱ ܬܚܰܝܶܠܝ̱ ܠܰܡܚܺܝ̈ܠܶܐ ܘܬܰܚܠܶܡܝ̱ ܠܡܰܪ̈ܥܶܐ ܘܠܰܡܛܰܪ̈ܦܶܐ ܘܒܳܗ̇ ܢܶܬܬܢܺܝܚܽܘܢ ܕܰܐܒܺܝܠܺܝܢ ܘܰܡܥܳܩܺܝܢ ܘܰܐܠܺܝ̈ܨܺܝܢ ܘܰܡܛܰܪܦܺܝܢ. ܘܒܳܗ̇ ܢܶܬܩܰܒ̈ܠܳܢ ܨܠܰܘ̈ܳܬܰܢ. ܘܢܶܬܦܰܢ̈ܝܳܢ ܠܰܢ ܫ̈ܶܐܠܳܬܰܢ ܟܰܕ ܩܳܥܶܝܢܰܢ ܠܘܳܬ ܝܰܠܕܶܟܝ̱. ܘܳܐܡܪܺܝܢܰܢ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܕܩܰܕܺܝ̈ܫܶܐ:

ܐܰܝܟ ܬܰܓܳܪ̈ܶܐ ܟܰܫܺܝܪ̈ܶܐ. ܢܚܶܬܘ̱ ܣܳܗ̈ܕܶܐ܇ ܠܰܐܓܽܘܢܳܐ ܕܣܳܗܕܽܘܬܳܐ. ܘܶܐܫܰܕܘ̱ ܠܰܕܡܳܐ܇ ܕܨܰܘܪ̈ܰܝܗܽܘܢ. ܕܢܶܬܬܰܓܪܽܘܢ܇ ܝܽܘܬܪ̈ܳܢܶܐ ܪ̈ܽܘܚܳܢܶܐ. ܚܰܝ̈ܶܐ ܒܡܰܘܬܳܐ܇ ܚܰܠܶܦܘ̱ ܗ̱ܘܰܘ. ܐܳܦ ܒܰܢܝ̈ܳܚܶܐ ܐܽܘܠ̈ܨܳܢܶܐ. ܐܰܚܶܒܘ̱ ܡܰܘܬܳܐ܇ ܚܠܳܦ ܚܰܝ̈ܶܐ. ܕܠܳܐ ܡܩܰܘܶܝܢ܇ ܘܗܳܐ ܡܕܰܝܪܺܝܢ ܒܡܰܠܟܽܘܬܳܐ. ܗܘܰܘ ܠܶܗ ܙܡܺܝ̈ܢܶܐ܇ ܠܒܰܪ ܡܰܠܟܳܐ. ܘܰܚܕܽܘ̈ܓܶܐ ܨܒܺܝ̈ܥܰܝ ܒܰܕܡܳܐ. ܘܗܳܐ ܒܥܺܐܕܰܝ̈ܗܽܘܢ܇ ܩܳܥܶܝܢܰܢ. ܘܳܐܡܪܺܝܢܰܢ܇ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܕܰܬܝܳܒܽܘܬܳܐ:

ܡܳܪܝ̱ ܕܰܠܳܢܝ̱ ܡܶܢ ܨܳܡܰܪܬܳܐ. ܕܚܰܘ̈ܒܶܐ ܘܕܰܚ̈ܛܳܗܶܐ ܕܣܶܥܪܶܬ. ܠܺܝ ܕܢܶܚܬܶܬ ܠܶܐܫܬܶܗ ܕܓܽܘܒܳܐ. ܘܶܐܚܕܰܬ ܥܠܰܝ ܒܺܐܪܳܐ ܦܽܘܡܳܗ̇. ܐܰܣܳܐ ܬܒܳܪܶܗ ܕܠܶܒܝ̱ ܘܰܥܨܽܘܒ. ܘܰܒܙܽܘܦܳܟ ܚܰܘܰܪ ܟܽܘ̈ܬܡܳܬܝ̱. ܘܰܐܝܟ ܡܳܟܣܳܐ ܘܗܳܝ ܚܰܛܳܝܬܳܐ ܩܰܒܶܠܰܝܢܝ̱ ܒܰܬܝܳܒܽܘܬܳܐ. ܐܰܢܗܰܪ ܠܺܝ ܥܰܝ̈ܢܰܝ ܡܰܕܰܥܝ̱. ܕܶܐܚܙܶܐ ܫܽܘܒܩܳܢܳܐ ܕܣܰܟܠ̈ܘܳܬܝ̱. ܘܰܐܘܕܶܐ ܠܳܟ ܐܳܦ ܐܶܫܰܒܚܳܟ ܐܰܠܳܗܰܢ ܣܰܓܺܝ ܪ̈ܰܚܡܶܐ܀

ܐܚܪܢܐ ܡܥܒܪܢܐ:

ܫܽܘܒܚܳܐ ܠܛܳܒܳܐ ܕܰܒܝܰܕ ܚܽܘܒܶܗ܆ ܓܠܳܐ ܬܶܫܒܽܘܚܬܶܗ ܠܰܒܢܰܝ̈ܢܳܫܳܐ. ܒܪܳܐ ܡܶܢ ܥܰܦܪܳܐ ܟܝܳܢܳܐ ܡܠܺܝܠܳܐ܆ ܘܨܰܒܬܶܗ ܒܢܰܦܫܳܐ ܡܳܪܰܬ ܓܰܙ̈ܶܐ. ܘܣܳܡ ܝܺܕܰܥܬܳܐ ܒܦܰܓܪܳܐ ܕܐ̱ܢ̈ܳܫܳܐ܆ ܕܟܽܠܳܗ̇ ܒܪܺܝܬܳܐ ܫܽܘܒܚܶܗ ܬܶܙܡܰܪܝ̱. ܬܰܘ ܡܰܠܳــ̈ـܠܶܐ ܙܡܰܪܘ̱ ܠܶܗ ܫܽܘܒܚܳܐ܆ ܥܰܕܠܳܐ ܢܶܕܡܰܟ ܫܶܢܰܬ ܡܰܘܬܳܐ. ܒܠܺܠܝܳܐ ܕܰܐܪܺܝܟ ܢܶܬܕܟܰܪ ܠܡܰܘܬܳܐ܆ ܕܒܳܠܶܡ ܠܦܽܘܡܰܢ ܘܰܡܫܰܬܶܩ ܠܰܢ. ܟܺܐܢ̈ܶܐ ܕܰܫܗܰܪܘ̱ ܒܠܰܝ̈ܠܰܘܳܬܳܐ܆ ܐܳܦ ܟܰܕ ܡܺܝܬܺܝܢ ܚܰܝ̈ܶܐ ܐܶܢܽܘܢ. ܘܒܺܝ̈ܫܶܐ ܕܰܛܠܰܡܘ̱ ܫܽܘܒܚܶܗ ܕܡܳܪܗܽܘܢ܆ ܘܳܐܦܶܢ ܚܰܝܺܝ̈ܢ ܡܺܝ̈ܬܶܐ ܐܶܢܽܘܢ. ܢܥܺܝܪܺܝܘܗ̱ܝ ܠܗܽܘܢܰܢ ܠܰܨ̈ܠܰܘܳܬܳܐ܆ ܘܰܠܙܽܘܡܳܪ̈ܶܐ ܕܪܽܘܚܳܐ ܕܩܽܘܕܫܳܐ. ܘܢܶܗܘܶܐ ܚܰܒܪ̈ܶܐ ܠܰܒܬܽܘ̈ܠܳܬܳܐ܆ ܚܰܟܺܝ̈ܡܳܬܳܐ ܕܩܰܠܶܣ ܡܳܪܰܢ. ܕܰܒܗܰܘ ܠܺܠܝܳܐ ܕܡܰܪܗܶܒ ܥܳܠܡ̈ܶܐ܆ ܟܰܕ ܥܺܝܪܺܝܢܰܢ ܢܶܚܙܶܝܘܗ̱ܝ ܠܚܰܬܢܳܐ. ܘܠܳܐ ܢܶܬܛܰܒܰܥ ܒܰܪ̈ܓܺܝܓܳܬܳܐ܆ ܘܢܶܙܡܰܪ ܫܽܘܒܚܶܗ ܒܝܰܘܡܳܐ ܕܕܳܢܰܚ܀

ܐܚܪܢܐ ܡܥܒܪܢܐ ܕܥܰܢܺܝ̈ܕܶܐ:

ܗܳܐ ܒܓܰܘ ܩܰܒܪ̈ܶܐ ܐܰܝܟ ܕܒܰܚܛܽܘ̈ܛܶܐ ܛܡܺܝܪ̈ܺܝܢ ܟܽܠܗܽܘܢ ܝܰܠܕܰܘ̈ܗܝ ܕܳܐܕܳܡ. ܘܪܰܥܡܳܐ ܕܚܰܝ̈ܶܐ ܡܢܰܦܶܨ ܠܗܽܘܢ ܡܶܢ ܕܰܚܺܝܚܳܐ ܒܝܰܡܺܝܢܶܗ ܕܡܳܪܝܳܐ ܡܪܰܝܡܳܐ. ܨܳܪܶܝܢ ܠܳܗ̇ ܠܰܐܪܥܳܐ ܘܢܳܦܩܺܝܢ ܡܶܢ ܓܰܘܳܗ̇. ܡܶܬܡܰܣܟܰܢ ܡܰܘܬܳܐ. ܘܟܰܪܣܳܗ̇ ܕܰܫܝܽܘܠ ܡܶܣܬܰܦܩܳܐ ܘܪܽܘܚܳܐ ܕܢܽܘܚܳܡܳܐ ܢܳܫܒܳܐ. ܘܚܰܝܰܬ ܡܺܝ̈ܬܶܐ ܡܶܬܟܰܪܙܳܐ. ܘܰܡܢܰܦܨܳܐ ܠܦܰܓܪ̈ܶܐ ܡܶܢ ܙܰܗܡܽܘܬܳܐ ܕܰܓܘܳܓܰܝ. ܐܺܝܬ ܕܚܳܕܶܐ ܘܰܦܨܺܝܚ. ܘܺܐܝܬܽ ܗ̱ܘ ܕܰܟܡܺܝܪ ܒܗܳܝ ܫܳܥܬܳܐ. ܟܽܠܢܳܫ ܐܰܝܟ ܥܰܡܠܶܗ ܡܶܬܦܪܰܥ ܒܕܺܝܢܳܐ ܕܚܺܝܠܳܐ ܕܟܺܐܢܽܘܬܳܐ. ܬܰܡܳܢ ܚܳܕܶܝܢ ܙܰܕܺܝ̈ܩܶܐ. ܘܡܶܬܦܰܨܚܺܝܢ ܐܳܦ ܩܰܕܺܝ̈ܫܶܐ. ܬܰܡܳܢ ܡܶܬܟܰܡܪܺܝܢ ܟܽܠܗܽܘܢ ܥܳܒ̈ܕܰܝ ܒܺܝ̈ܫܳܬܳܐ. ܘܳܐܠܶܝܢ ܠܚܰܝܰܝ̈ܗܽܘܢ ܕܡܶܢ ܐܰܝܠܶܝܢ ܛܽܘ̈ܒܶܐ ܐܶܬܓܠܶܙܘ. ܡܳܪܰܢ ܒܗܰܘ ܝܰܘܡܳܐ. ܚܽܘܣ ܘܶܐܬܪܰܚܰܡ ܥܰܠ ܥܰܒܕܰܝ̈ܟ ܕܰܫܟܶܒܘ ܘܶܐܬܬܢܺܝܚܘ ܥܰܠ ܣܰܒܪܳܟ܀