ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܚ: ܝܓ ـ ܟܙ 1Corinthians 9:13-27

ܩܰܝ ܠܳܐ ܟܳܕܥܽܘܬܽܘ ܐܰܝܢܰܐ ܕܟܳܫܽܘܓ̣ܠܺܝ ܒܽܐܘ ܒܰܝܬܳܐ ܡܩܰܕܫܳܐ، ܡܽܐܘ ܒܰܝܬܳܐ ܡܩܰܕܫܳܐ ܟܽܘܟ̣ܠܺܝ؟ ܘܰܐܝܢܰܐ ܕܠܽܐܘ ܡܰܕܒܚܳܐ ܟܳܡܫܰܡܫܺܝ، ܥܰܡܽܐܘ ܡܰܕܒܚܳܐ ܟܡܺܝܫܰܪܟܺܝ؟ ܗܰܘܟ̣ܰܐ ܣܬܶܐ ܡܳܪܰܢ ܡܳܨܶܠܶܗ: ܐܰܝܢܰܐ ܕܽܐܘ ܡܓܰܠܝܶܢܰܝܕܶܗ ܟܽܘܪܙܺܝ، ܡܽܐܘ ܡܓܰܠܝܶܢܰܝܕܶܗ ܕܚܳܐܝܶܢ (ܕܥܰܝܫܺܝ). ܐܶܠܳܐ ܐܳܢܳܐ ܠܰܐܒܶܥ ܐ̱ܢܳܐ ܡܶܕܶܐ ܡܰܗ̱ܢܺܝ. ܘܠܳܐ ܟܬ̣ܽܘܠܺܝ ܗܰܬ̣ܶܐ، ܠܰܫܰܢ ܕܡܶܣܬܰܦܰܕ ܐ̱ܢܳܐ ܡܶܕܶܐ. ܡܺܝܕ̥ܶܐ ܕܛܰܘܝܳܐ ܐܶܠܺܝ̣ ܕܡܳܝܰܬ̥ ܐ̱ܢܳܐ، ܘܠܳܐ ܐ̱ܢܳܫܳܐ ܡܰܟܠܶܐ ܐܽܘ ܫܽܘ̣ܒܗܳܪܰܝܕܺܝ. ܡܺܝܕ̥ܶܐ ܐܺܝ̣ܕܰܐ ܟܳܐܟܳܪܰܙ ܐ̱ܢܳܐ ܐܽܘ ܡܓܰܠܝܶܢ، ܠܰܬܠܺܝ ܫܽܘܒܗܳܪܳܐ ܒܽܘ ܡܶܕܰܢܳܐ. ܡܺܝܕ̥ܶܐ ܕܡܰܔܒܽܘܪܺܝܶܐ ܡܰܚܰܬܬܳܝܳܐ ܐܰܥܠܺܝ. ܘܰܐܘܰܝܠܶܗ̱ ܐܶܠܺܝ ܐܶܢ ܕܠܳܐ ܟܳܪܰܙ ܐ̱ܢܳܐ ܐܽܘ ܡܓܰܠܝܶܢ. ܡܺܝܕ̥ܶܐ ܕܶܐܢ ܕܣܳܝܰܡ ܐ̱ܢܳܐ ܗܰܬ̣ܶܗ ܒܽܐܘ ܨܶܒܝܳܢܰܝܕܺܝ، ܟܶܬܠܺܝ ܐܰܓ̣ܪܳܐ. ܐܶܢ ܕܠܳܐ ܒܽܐܘ ܨܶܒܝܳܢܰܝܕܺܝ، ܢܰܩܩܰܐ ܐ̱ܚܪܶܬܳܐ ܘܰܟܰܠܰܐ ܡܘܰܟܠܳܐ ܐ̱ܢܳܐ. ܐܺܝ ܢܰܩܩܰܝܳܐ ܡܶܢܝܳܐ ܐܽܘ ܐܰܓ̣ܪܰܝܕܺܝ؟ ܕܟܳܪܰܙ ܐ̱ܢܳܐ ܐܽܘ ܡܓܰܠܝܶܢ، ܘܕܠܳܐ ܡܰܨܪܰܦ ܕܶܡܒܰܫܰܪ ܐ̱ܢܳܐ ܐܺܝ ܟܰܪܰܙܰܐ ܕܥܰܠ ܡܫܺܝ̣ܚܳܐ، ܘܠܳܐ ܡܶܣܬܰܥܡܰܠ ܐ̱ܢܳܐ ܐܽܘ ܫܽܘܠܛܳܢܰܝܕܺܝ ܒܽܐܘ ܡܓܰܠܝܶܢ܆ ܥܰܡ ܕܟܶܬܢܳܐ ܚܶܪ ܙܶܬ ܡܶܐ ܟܽܠܠܶܗ܆ ܠܟܽܠ ܐ̱ܢܳܫܳܐ ܬܘܶܪ ܠܺܝ ܪܽܘܚܺܝ، ܠܰܫܰܢ ܕܪܳܒܰܚ ܐ̱ܢܳܐ ܠܓ̥ܰܠܰܒܶܐ. ܗܰܘܺܝ ܐ̱ܢܳܐ ܥܡܰܐ ܝܽܘ̈ܕܳܝܶܐ ܟ̣ܶܕ ܝܽܘܕܳܝܳܐ، ܠܰܫܰܢ ܕܪܳܒܰܚ ܐ̱ܢܳܐ ܠܰܝܽܘ̈ܕܳܝܶܐ، ܘܠܰܐܝܢܰܐ ܕܬܰܚܬܽܘ ܢܳܡܽܘܣܳܢܶܐ (ܩܰܐܢܽܘܢܢܶܗ)، ܟ̣ܶܕ ܟܶܬܢܳܐ ܬܰܚܬܽܘ ܢܳܡܽܘܣܳܐ، ܠܰܫܰܢ ܕܪܳܒܰܚ ܐ̱ܢܳܐ ܠܰܗ̱ܢܺܝ ܕܟܶܬܢܶܐ ܬܰܚܬܽܘ ܢܳܡܽܘܣܳܐ. ܘܠܰܗ̱ܢܺܝ ܕܠܰܬܬܶܗ ܢܳܡܽܘܣܳܐ، ܗܰܘܺܝܢܳܐ ܟ̣ܶܐ ܚܰܕ̄ ܕܠܰܬܠܶܗ ܢܳܡܽܘܣܳܐ. ܥܰܡܰܗܝܳܐ ܕܠܰܐܠܳܗܳܐ ܠܰܬܢܳܐ ܕܠܳܐ ܢܳܡܽܘܣܳܐ. ܐܶܠܳܐ ܬܰܚܬܽܘ ܢܳܡܽܘܣܳܐ ܕܶܡܫܺܝܚܳܐ܆ ܠܰܫܰܢ ܕܪܳܒܰܚ ܐ̱ܢܳܐ ܠܰܗ̱ܢܶܟ ܕܠܰܬܬܶܐ ܢܳܡܽܘܣܳܐ. ܗܰܘܺܝ ܐ̱ܢܳܐ ܥܰܡܰܐ ܟܰܐܝ̣̈ܘܶܐ ܟ̣ܶܐ ܟܰܐܝ̣ܘܳܐ، ܠܰܫܰܢ ܕܠܰܟܰܐܺܝ̣̈ܘܶܐ ܪܳܒܰܚ ܐ̱ܢܳܐ. ܠܟܽܠ ܐ̱ܢܳܫܳܐ ܟܽܠ ܡܶܕܶܐ ܗܰܘܺܝ ܐ̱ܢܳܐ، ܠܰܫܰܢ ܕܠܟܽܠ ܐ̱ܢܳܫܳܐ ܡܰܟ̣ܠܰܨ ܐ̱ܢܳܐ. ܗܰܬ̣ܶܐ ܟܳܣܳܝܰܡ ܐ̱ܢܳܐ ܠܰܫܰܢ ܕܗܳܘܶܢܳܐ ܫܳܪܺܝܟܳܐ ܕܺܐܝ ܟܰܪܰܙܰܐ. ܩܰܝ ܠܳܐ ܟܳܕ̥ܥܺܝܬܽܘ ܐܰܝܢܰܐ ܕܟܳܪܳܗܛܺܝ ܒܽܐܘ ܣܛܰܕܝܽܘܢ، ܟܽܠܠܶܗ ܓܪܳܗܛܺܝ؟ ܐܶܠܳܐ ܚܰܕ̱ ܓܡܳܝܶܕ ܐܺܝ ܙܳܟ̣ܽܘܬ̣ܳܐ (ܪܺܝܫܽܘܬܳܐ). ܗܰܘܟ̣ܰܐ ܪܗܰܛܽܘ ܠܰܫܰܢ ܕܡܰܝܕܺܝ̣ܬܽܘ. ܟܽܠܡܰܢ ܕܶܡܔܰܐܗܶܕ، ܟܨܳܝܶܕ ܪܽܘܚܶܐ ܡܶܐ ܟܽܠ ܡܶܕܶܐ. ܐܶܠܳܐ ܗܰܢܺܝ ܓܪܳܗܛܺܝ ܠܰܫܰܢ ܕܡܰܝܕܺܝ ܟܠܺܝ̣ܠܳܐ ܕܟܳܥܳܒܶܪ، ܘܰܐܚܢܰܐ ܐܽܘ ܟܠܺܝܠܳܐ ܕܠܶܓܥܳܒܶܪ. ܡܰܘܟ̥ܰܐ ܣܬܺܝ ܐܳܢܳܐ ܓܪܳܗܰܛ ܐ̱ܢܳܐ، ܠܳܐ ܟ̣ܶܕ ܥܰܠ ܡܶܕܶܐ ܕܠܰܬܝܳܐ ܝ̣ܺܕܺܝ̣ܥܳܐ. ܗܰܘܟ̥ܰܐ ܟܳܡܩܰܬܰܢ ܐ̱ܢܳܐ ܠܳܐ ܟ̣ܶܕ ܚܰܕ̱ ܕܰܐܥܡܺܝ ܗܰܘܰܐ ܟܳܡܩܰܬܶܠ. ܐܽܘ ܦܰܓ̣ܪܰܝܕܺܝ ܟܳܣܰܡܢܶܐ ܓܪܶܥܳܐ، ܚܰܬܬܰܐ ܕܳܐܢܳܐ ܕܶܟܪܶܙܠܺܝ ܠܰܐܚܪ̈ܶܢܶܐ، ܕܠܳܗ̱ܘܶܢܳܐ ܡܚܰܩܪܳܐ. ܒܰܪܶܟ̥ܡܳܪܝ̱ ܀