ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܗ: ܐ ـ ܝܓ Romans 15:1-13

ܡܰܕܝܽܘܢܢܰܐ ܐܰܚܢܰܐ ܐܰ ܩܰܘ̈ܝܶܐ، ܕܛܳܥܢܺܝ̣ܢܰܐ ܐܽܘ ܟܶܘܳܐ ܕܰܟܰܐܺܝ̈ܘܶܐ. ܘܠܳܐ ܠܪܽܘܚܰܢ ܫܳܦܪܺܝܢܰܐ. ܐܶܠܳܐ ܟܰܠ ܚܰܕ̱ ܡܺܢܰܢ ܠܰܫܰܢ ܐܺܝ ܥܡܰܪܰܐ، ܛܪܳܐ ܫܳܦܶܪ ܠܽܐܘ ܩܰܪܺܝܘܰܝܕܶܗ ܒܰܛܰـ̈ܘܳܬܳܐ. ܡܺܝܕ̥ܶܐ ܕܶܡܫܺܝ̣ܚܳܐ ܣܬܶܐ ܠܳܐ ܠܪܽܘܚܶܗ ܫܰܦܶܪ. ܐܶܠܳܐ ܟ̣ܶܕ ܟܶܬܝܳܐ ܟܬ̣ܺܝܘܳܐ، ܐܽܘ ܥܰܝܒܳܐ ܕܰܡܥܰܝܒܳܢܰܝ̈ܕ̥ܳܟ ܢܰܦܶܠ ܐܰܥܠܺܝ. ܘܟܽܠ ܡܶܕܶܐ ܕܡܶܐ ܡܶܩܶܡ ܟܬ̣ܺܝܘ، ܠܰܫܰܢ ܐܽܘ ܝܽܘܠܦܳܢܰܝܕ̥ܰܢ ܟܬ̣ܺܝܘ. ܠܰܫܰܢ ܕܒܺܐܝ ܡܣܰܒܝܪܳܢܘ̣ܬ̣ܳܐ ܘܒܺܐܝ ܬܰܣܠܺܝܰܐ ܕܰܟܬܳܘ̈ܶܐ، ܣܰܒܪܳܐ ܗܳܘܶܐ ܠܰܢ. ܐܽܘ ܐܰܠܳܗܳܐ ܕܺܐܝ ܡܣܰܝܒܪܳܢܽܘܬ̣ܳܐ ܘܕܺܐܝ̣ ܬܰܣܠܺܝܰܐ، ܐܳܒܰܠܟ̥ܽܘ ܕܒܶܚܕ̥ܳܝܽܘܬܳܐ ܡܶܦܬܰܟܪܺܝܬܽܘ ܚܰܕ̱ ܥܰܠܽܘ ܚܰܕ̱ ܒܝܶܫܽܘܥ ܡܫܺܝ̣ܚܳܐ. ܘܕܶܒܚܰܕ̱ ܦܶܟܶܪ ܘܒܚܰܕ̱ ܦܶܡܳܐ ܕܶܡܫܰܒܚܺܝ̣ܬܽܘ ܠܰܐܠܳܗܳܐ، ܐܽܘ ܐܰܒܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ. ܥܰܠܰܗ̱ܬ̣ܶܐ ܡܰܩܒܶܠܽܘ ܠܶܚܕܳܕ̈ܶܐ ܟ̣ܶܕ ܡܫܺܝ̣ܚܳܐ ܡܰܩܒܶܠܰܠܟ̣ܽܘ ܠܽܐܘ ܫܽܘܒܚܳܐ ܕܰܐܠܳܗܳܐ. ܟܳܐܡܰܪ ܐܢܳܐ ܕܝܶܫܽܘܥ ܡܫܺܝ̣ܚܳܐ ܟ̣ܕܶܡܠܶܗ ܐܺܝ ܓܙܽܘܪܬܳܐ ܡܶܚܠܰܦ ܐܽܘ̣ ܫܪܳܪܳܐ ܕܰܐܠܳܗܳܐ، ܚܰܬܬܰܐ ܕܶܡܬ̣ܰܐܒܶܬ ܐܽܘ ܘܰܥܕ (ܣܳܘܙ) ܕܰܐܰܒܳܗ̈ܳܬ̥ܳܐ. ܘܰܐ ܥܰܡܶـ̈ܐ ܕܶܡܫܰܒܚܺܝ ܠܰܐܠܳܗܳܐ ܡܶܚܠܰܦ ܐܰ ܪ̈ܰܚܡܶܐ ܕܗܰܘܶܢ ܐܰܥܠܰܝܝܶܐ. ܟ̣ܶܕ ܟܬ̥ܺܝܘ܆ ܓܡܰܘܕܶܐ ܐ̱ܢܳܐ ܠܳܟ ܒܰܥܥܰܡ̈ܶܐ، ܘܠܶܐܫܡܳܟ ܓܶܡܙܰܡܰܪ ܐ̱ܢܳܐ. ܘܒܕܽܘܟܬ̣ܳܐ ܐ̱ܚܪܶܬܳܐ ܐ̱ܡܶܪܠܶܗ: ܡܫܰܒܶܚܽܘ ܠܰܐܠܳܗܳܐ ܟܽܠܟ̣ܽܘ ܥܰܡ̈ܶܐ ܘܡܫܰܒܶܚܽܘ ܟܽܠܠܶܗ̱ ܐܰ ܐܶܡ̈ܘܳܬ̣ܳܐ (ܥܰܡ̈ܶܐ). ܘܒܕܽܘܟܬ̣ܳܐ ܐ̱ܚܪܶܬܳܐ ܐ̱ܡܶܪܠܶܗ ܠܶܐܫܰܥܝܳܐ܆ ܓܬܳܗ̱ܘܶܐ ܐܽܘ ܥܶܩܳܪܳܐ ܡܶܐ ܐܺܝ̣ܫܰܝ܆ ܗܰܘܳܐ ܕܓܶܩܳܝܶܡ ܕܗܳܘܶܐ ܪܺܝܫܳܐ ܠܰܥܰܡ̈ܶܐ، ܐܰܥܠܶܗ ܓܬܳܗ̱ܘܶܐ ܐܽܘ ܣܰܒܪܳܐ ܕܰܥܰܡ̈ܶܐ. ܐܽܘ ܐܰܠܳܗܳܐ ܕܽܐܘ ܣܰܒܪܳܐ، ܡܳܠܰܠܟ̣ܽܘ ܡܶܐ ܟܽܠܰܗ̇ ܐܺܝ ܦܨܺܝܚܽܘܬ̣ܳܐ ܘܽܐܘ ܫܠܳܡܳܐ ܒܺܐܝ ܗܰܝܡܳܢܽܘܬ̣ܳܐ، ܠܰܫܰܢ ܕܙܰܝܕܺܝܬܽܘ ܒܽܐܘ ܣܰܒܪܳܐ ܘܒܽܘ ܚܰܝܠܳܐ ܕܽܐܘ ܪܽܘܚܳܐ ܩܰܕܺܝܫܳܐ. ܒܰܪܶܟ̥ܡܳܪܝ̱ ܀