ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܗ: ܐ ـ ܝܒ Galatians 5:1-12

ܬ̣ܒܰܬܽܘ ܒܺܐܝ ܚܺܐܪܽܘܬ̣ܳܐ ܕܡܰܟ̥ܠܰܨܠܶܗ̱ ܠܰܢ ܠܶܡܫܺܝ̣ܚܳܐ ܐܶܒܰܗ̱̇. ܢܰܩܩܰܐ ܐ̱ܚܪܶܬܳܐ ܠܳܐ ܡܺܝܬܰܨܪܺܝ̣ܬܽܘ ܒܽܐܘ ܢܺܝܪܳܐ ܕܺܐܝ ܓܪܰܥܝܽܘܬ̣ܳܐ. ܟܰܠܶܗ ܐܳܢܳܐ ܦܰܘܠܽܘܣ ܟܳܐܡܰܪ ܐ̱ܢܳܐ ܐܰܠܟ̣ܽܘ: ܕܶܐܢ ܕܡܶܓܙܳܪܺܝ̣ܬܽܘ، ܡܫܺܝ̣ܚܳܐ ܠܳܐ ܓܡܰܢܦܰܥܟ̣ܽܘ ܡܶܕܶܐ. ܓܣܳܗܰܕ ܐ̱ܢܳܐ ܠܟܽܠ ܐ̱ܢܳܫܳܐ ܡܛܰܗܪܳܐ، ܘܰܐܔܶܒܝܳܐ ܐܰܥܠܶܗ̱ ܕܣܳܝܶܡ ܐܽܘ ܢܳܡܽܘܣܳܐ ܟܽܠܶܗ. ܦܪܺܝܫܺܝ̣ܬܽܘ ܡܶܐ ܡܫܺܝ̣ܚܳܐ ܗܰܢܺܝ ܕܒܽܐܘ ܢܳܡܽܘܣܳܐ ܓܡܺܝܙܰܕܩܺܝܬܽܘ (ܓܡܺܝܒܰܪܽܘܬܽܘ)، ܘܡܺܐܝ ܛܰܝܒܽܘܬ̣ܳܐ ܢܰܦܺܝܠܺܝ̣ܬܽܘ. ܐܶܠܳܐ ܐܰܚܢܰܐ ܒܺܐܝ ܪܽܘܚܳܐ ܕܡܺܐܝ ܗܰܝܡܳܢܽܘܬ̣ܳܐ ܓܢܶܛܪܺܝܢܰܐ ܠܽܐܘ ܣܰܒܪܳܐ ܕܺܐܝ ܙܰܕܺܝܩܽܘܬܳܐ. ܥܰܠ ܕܒܶܡܫܺܝ̣ܚܳܐ ܝܶܫܽܘܥ ܠܰܬܝܳܐ ܡܶܕܶܐ ܠܳܐ ܐܺܝ̣ ܓܙܽܘܪܬܳܐ (ܛܰܗܰܐܪܰܐ)، ܘܠܳܐ ܐܺܝ ܥܽܘܪܠܽܘܬ̣ܳܐ. ܐܶܠܳܐ ܗܰܝܡܳܢܽܘܬ̣ܳܐ ܕܟܳܣܰܝܡܳܐ ܒܺܐܝ ܚܽܘܒܳܐ. ܫܰܦܺܝܪܳܐ ܪܳܗܛܺܝܬܽܘ ܗ̱ܘܰܐ܆ ܡܰܢ ܡܰܟܠܶܐ ܠܶܗ ܠܟܽܘ ܕܠܳܐ ܫܳܡܥܺܝܬܽܘ ܠܽܘ ܫܪܳܪܳܐ؟ ܐܺܝ ܡܶܫܬܰܡܥܳܢܘ̣ܬ̣ܰܬ̣ܟ̣ܽܘ ܠܰܬܝܳܐ ܡܰܗ̱ܘܳܐ ܕܶܩܪܶܐ ܠܶܗ ܠܟ̣ܽܘ. ܚܡܺܝܪܳܐ ܐܶܫܡܳܐ، ܟܳܡܰܚܡܶܥ ܐܽܘ ܠܰܝܫܳܐ ܟܽܠܶܗ. ܟܶܬܠܺܝ ܬܽܘܟ̣ܠܳܢܳܐ ܐܰܥܠܰܝܟ̣ܽܘ ܒܡܳܪܰܢ، ܕܡܶܕܶܐ ܐ̱ܚܪܶܢܳܐ ܠܳܐ ܚܳܫܘܺܝ̣ܬܽܘ. ܐܶܠܳܐ ܗܰܘܳܐ ܕܫܳܓ̣ܰܫܟ̣ܽܘ ܓܡܶܚܟܶܡ ܡܰܢ ܕܟܶܬܝܳܐ. ܐܶܠܳܐ ܐܳܢܳܐ ܐܰܢܢܰܚܽܘ̈ܢܳܢܰܝܕܺܝ ܐܶܢ ܗܽܘܠ ܠܐܽܘܥܕܳܐ ܕܟܳܪܰܙܘܰܝ ܐ̱ܢܳܐ ܐܺܝ ܓܙܽܘܪܬܳܐ، ܩܰܝ ܓܡܶܛܪܰܕܘܰܝܢܳܐ؟ ܐܺܝ ܢܰܩܩܰܝܳܐ ܐܽܘ ܟܶܫܠܳܐ ܕܽܐܘ ܨܠܺܝܒܳܐ ܒܰܐܛܶܠ. ܟܳܒܰܥ ܐܢܳܐ ܓ̥ܰܠܰܒܶܐ ܗܰܢܺܝ ܕܟܳܫܽܘܓ̣ܫܶܢܟ̣ܽܘ ܩܛܳܥܳܐ ܣܬܶܐ ܕܡܶܩܛܳܥܺܝ ܒܰܪܶܟ̥ܡܳܪܝ̱܀