ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܚ: ܟܚ ـ ܠܛ Hebrews 8:28-39

ܟܳܕܥܺܝ̣ܢܰܐ ܐܰܝܢܰܐ ܕܟܳܪܽܘܚܡܺܝ ܠܐܰܠܳܗܳܐ، ܒܟܽܠ ܡܶܕܶܐ ܟܳܡܥܰܘܰܢܢܶܐ ܠܺܐܝ ܛܰܘܬܳܐ. ܗܰܢܺܝ ܕܟܶܬܢܶܐ ܩܰܪ̈ܝܶܐ ܟ̣ܕܽܘ ܨܶܒܝܳܢܰܝܕܶܗ، ܗܰܢܺܝ ܕܡܶܩܶܡ ܐܰܕܶܥܥܶܐ، ܘܡܶܩܶܡ ܦܪܺܝܫܺܝܠܶܗ، ܠܰܫܰܢ ܕܗܳܘܶܢ ܒܽܐܘ ܕܽܘܡܝܳܐ ܕܺܐܝ ܨܽܘܪܬܳܐ ܕܽܐܘ ܐܰܒܪܰܝܕܶܗ܆ ܕܗܳܘܶܐ ܗܽܘܘܶܐ ܒܶܟܶܪ ܒܰܐܚ̈ܶܐ ܓ̥ܰܠܰܒܶܐ. ܘܰܐܝܢܰܐ ܕܡܶܩܶܡ ܦܪܺܝܫܺܝ ܠܶܗ، ܐܰܠܠܶܗ̱ ܩܪܶܐ ܠܶܗ. ܘܠܰܐܝܢܰܐ ܕܶܩܪܶܐ ܠܶܗ، ܐܰܠܠܶܗ ܡܙܰܕܰܩ ܠܶܗ. ܘܠܐܰܝܢܰܐ ܕܶܡܙܰܕܰܩ ܠܶܗ، ܐܰܠܠܶܗ ܡܫܰܒܰܚ ܠܶܗ. ܡܶܢ ܐܶܡܡܺܝܢܰܐ؟ ܐܶܢ ܐܰܠܳܗܳܐ ܐܰܥܡܰܢܝܳܐ، ܡܰܢܝܳܐ ܐܰܥܠܰܢ؟ ܗܰܘܳܐ ܕܠܳܐ ܡܰܪܚܰܡ ܠܶܗ ܥܰܠܽܘ ܐܰܒܪܰܝܕܶܗ ܐܶܠܳܐ ܗܽܘܠܶܗ ܡܶܚܠܰܦ ܟܽܠܰܢ. ܐܰܝܕܰܪܒܳܐ ܠܶܓܒܶܐܠܰܢ ܟܽܠ ܡܶܕܶܐ ܣܬܶܐ ܐܰܥܡܶܗ؟ ܡܰܢ ܓܡܰܫܟܶܐ ܥܰܠܰܐ ܛܳܘ̈ܶܐ ܕܰܐܠܳܗܳܐ؟ ܐܰܠܳܗܳܝܳܐ ܕܟܳܡܙܰܕܶܩ. ܡܰܢܝܳܐ ܕܕܳܝܶܢ؟ ܡܫܺܝ̣ܚܳܐܝܳܐ ܕܡܰܝܶܬ ܘܩܰܝܶܡ، ܘܟܰܐܠܶܗ ܥܰܠܽܘ ܝܰܡܺܝܢܳܐ ܕܰܐܠܳܗܳܐ ܟܳܡܕܰܐܦܶܥ ܡܶܚܠܳܦܰܢ. ܡܰܢ ܟܦܳܪܰܫ ܠܰܢ ܡܺܐܝ ܚܽܘܒܳܐ ܕܶܡܫܺܝܚܳܐ؟ ܐܺܝ ܥܺܝܩܽܘܬ̣ܳܐ؟، ܐܰܘ ܐܽܘ ܚܒܽܘܫܝܳܐ؟ ܐܰܘ ܐܽܘ ܛܪܳܕܳܐ؟ ܐܰܘ ܐܽܘ ܟܰܦܢܳܐ؟ ܐܰܘ ܐܽܘ ܙܰܠܛܳܐ؟ ܐܰܘ ܐܽܘ ܟ̣ܰܛܰܪ ܕܽܐܘ ܣܰܝܦܳܐ؟ ܟ̣ܶܕ ܟܬ̣ܺܝܘ، ܠܰܫܰܢܳܟ ܟܽܠ ܝܰܘܡܳܐ ܓܡܰܝܬ̣ܺܝܢܰܐ. ܘܚܫܺܝܘܺܝܢܰܐ ܟ̣ܕܰܐ ܦܰܐܪ̈ܶܐ ܠܽܐܘ ܢܚܳܪܳܐ. ܐܶܠܳܐ ܒܰܗ̱ܢܺܝ ܟܽܠܠܶܗ ܓ̥ܰܠܳܒܶܢܰܐ ܒܺܐܝ ܘܰܨܺܝܛܰܐ ܕܰܗ̱ܘܳܐ ܕܶܪܚܶܡ ܠܶܗ ܠܰܢ. ܟܳܡܗܰܝܡܢܺܝܢܰܐ ܕܠܳܐ ܐܽܘ ܡܰܘܬܳܐ ܘܠܳܐ ܐܰ ܚܰܝܶـ̈ܐ، ܘܠܳܐ ܐܰ ܡܰܠܰܐܟ̥̈ܶܐ، ܘܠܳܐ ܐܰ ܫܽܘ̈ܠܛܳܢܶܐ، ܘܠܳܐ ܐܰ ܚܰܝ̈ܠܶܐ، ܘܠܳܐ ܗܰܢܺܝ ܕܽܐܘܥܕܳܐ، ܘܠܳܐ ܗܰܢܺܝ ܕܓܶܕܐܳܬ̣ܶܢ. ܘܠܳܐ ܥܽܘܠܝܳܐ، ܘܠܳܐ ܥܽܘܡܩܳܐ، ܘܠܳܐ ܒܪܺܝܬ̣ܳܐ ܐ̱ܚܪܶܬܳܐ، ܟܳܩܳܕܪܳܐ ܕܦܳܪܫܳܐ ܠܰܢ ܡܺܐܝ ܚܽܘܒܳܐ ܕܰܐܠܳܗܳܐ ܕܶܒܡܳܪܰܢ ܝܶܫܽܘܥ ܡܫܺܝ̣ܚܳܐ ܒܰܪܶܟ̥ܡܳܪܝ̱܀