ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܛܳܘܣ
ܒ: ܝܐ ـ ܝܗ܇ ܓ: ܐ ـ ܝܗ 1Corinthians 2:11-15, 3:1-15

ܥܰܠ ܕܶܓܠܳܐ ܐܺܝ ܛܰܝܒܽܘܬ̣ܳܐ ܕܰܐܠܳܗܳܐ ܐܺܝ ܡܰܟ̣ܠܨܳܢܺܝܬ̣ܳܐ ܠܐܰܢ̈ܢܳܫܶܐ ܟܽܠܠܶܗ̱، ܓܡܶܠܦܳܐ ܠܰܢ ܕܟܳܦܪܺܝܢܰܐ ܒܺܐܝ ܚܛܺܝܬ̣ܳܐ، ܘܒܰܐܪ̈ܰܝܰܓܰܬ ܕܽܐܘ ܥܳܠܡܳܐ. ܘܥܰܝܫܺܝܢܰܐ ܒܽܐܘ ܥܳܠܡܰܐܢܳܐ ܒܢܰܟ̣ܦܽܘܬ̣ܳܐ ܘܙܰܕܺܝ̣ܩܽܘܬ̣ܳܐ ܘܙܽܘܥܬ̣ܳܐ ܕܰܐܠܳܗܳܐ. ܘܢܶܛܪܺܝܢܰܐ ܠܽܐܘ ܣܰܒܪܳܐ ܒܪܺܝ̣ܟ̣ܳܐ، ܘܠܺܐܝ ܬܶܚܘܰܝܬܳܐ ܕܽܐܘ ܫܽܘܒܚܳܐ ܕܰܐܠܳܗܳܐ ܐܽܘ ܪܰܒܳܐ ܐܽܘ ܡܰܟ̣ܠܨܳܢܰܝܕܰܢ ܝܶܫܽܘܥ ܡܫܺܝ̣ܚܳܐ. ܗܰܢܳܐ ܕܗܽܘܠܶܗ ܪܽܘܚܶܗ ܡܶܚܠܳܦܰܢ، ܠܰܫܰܢ ܕܡܰܟ̣ܠܰܨ ܠܰܢ ܡܶܐܟܽܠ ܚܛܺܝܬ̣ܳܐ، ܘܡܢܰܕܰܦ ܠܰܢ ܠܪܽܘܚܶܗ، ܠܰܫܰܢ ܕܗܳܘܶܐ ܥܰܡܳܐ ܚܰܕ̱ܬ̣ܳܐ ܕܟܶܬܝܳܐ ܓ̥ܺܝܪܰܐܢܺܝ ܒܰܥ̈ܡܰܠܰܬ ܛܳـ̈ܘܶܐ. ܡܶܔܓ̥ܰܠ ܗܰܐܢܺܝ܆ ܘܟܪܰܙ ܐܰܥܠܰܝܝܶܐ ܡܘܰܒܰܟ̥ ܒܟܽܠ ܫܽܘܠܛܳܢܳܐ. ܘܐ̱ܢܳܫܳܐ ܠܳܐ ܡܩܰܫܡܶܪ ܐܰܥܠܳܟ̥. ܡܬܰܝ ܠܒܳܠܰܝܝܶܗ، ܕܫܶܡܥܺܝ ܘܡܰܛܺܝܥܺܝ ܠܰܪ̈ܺܝܫܳܢܶܐ، ܘܠܰܫܰܠܺܝ̈ܛܳܢܶܐ. ܘܗܳܘܶܢ ܚܰܕ̥ܺܝܪ̈ܶܐ ܠܟܽܠ ܥܰܡܰܠ ܛܳܘܳܐ. ܠܳܐ ܡܩܰܬܠܺܝ، ܘܠܳܐ ܡܨܰܥܪܺܝ ܠܐܢܳܫܳܐ. ܐܶܠܳܐ ܕܗ̱ܳܘܶܢ ܡܰܟܺܝ̣̈ܟܶܐ، ܘܡܰܚܘܶܢ ܒܰܣܺܝܡܽܘܬ̣ܳܐ ܠܟܽܠܠܶܗ ܐܰܢ̈ܢܳܫܶܐ. ܐܰܚܢܰܐ ܣܬܶܐ ܡܶܩܶܡ، ܠܳܐ ܫܰܡ̈ܳܥܶܐ ܘܛܰܥ̈ܝܶܐ ܣܰܟ̣̈ܠܐܶ ܗ̱ܘܰܝܢܰܐ. ܘܥܳܒܕܺܝ ܗ̱ܘܰܝܢܰܐ، ܠܰܪ̈ܰܝܰܓܰܬ ܘܠܰܒܽܘ̈ܣܳܡܶܐ ܕܫܶܟ̈ܠܰܬ ܫܶܟ̈ܠܰܬ. ܘܒܽܐܘ ܚܣܳܡܳܐ ܘܒܽܐ ܚܰܣܰܕ ܡܶܣܬܰܥܡܺܠܝ ܗ̱ܘܰܝܢܰܐ. ܘܚܰܕ̱ ܡܽܘ ܚܰܕ̱ ܘܡܥܰܢܬܺܝ ܗ̱ܘܰܝܢܰܐ. ܐܶܠܳܐ ܐܺܝ ܢܰܩܩܰܐ ܕܶܓܠܳܐ ܐܺܝ ܒܰܣܺܝܡܽܘܬ̣ܳܐ ܘܺܐܝ ܡܪܰܚܡܳܢܽܘܬ̣ܳܐ ܕܰܐܠܳܗܳܐ ܐܽܘ ܡܰܟ̣ܠܨܳܢܰܝܕܰܢ، ܠܳܐ ܒܰܥ̈ܡܰܠܰܬ ܕܺܐܝ ܙܰܕܺܝܩܽܘܬ̣ܳܐ ܕܣܶܡܠܰܢ، ܐܶܠܳܐ ܒܰܪ̈ܰܚܡܰܝܕܶܐ، ܡܰܟ̣ܠܰܨܠܶܗ ܠܰܢ ܒܽܐܘ ܬܶܫܺܝܓ̣ܳܐ ܕܽܐܘ ܡܰܘܠܳܕܳܐ ܕܰܬܪܶܐ، ܘܒܽܐܘ ܚܶܬ̣ܳܬ̣ܳܐ ܕܺܐܝ ܪܽܘܚܳܐ ܩܰܕܺܝܫܳܐ ܕܡܰܟ̣ܠܶܗ ܠܶܗ ܐܰܥܠܰܢ ܒܓ̥ܶܠܒܰܐܝ̣ܺܝܶܗ̱ ܥܰܠ ܐܝ̣ܕܶܗ ܕܝܶܫܽܘܥ ܡܫܺܝ̣ܚܳܐ ܐܽܘ ܡܰܟ̣ܠܨܳܢܰܝܕܰܢ. ܕܡܺܝܙܰܕܩܺܝܢܰܐ ܒܺܐܝ ܛܰܝܒܽܘܬ̣ܰܝܕܶܗ، ܘܗܳܘܺܝܢܰܐ ܝܰـܪ̈ܳܬ̣ܶܐ ܟ̣ܕܽܐܘ ܣܰܒܪܳܐ ܕܰܚ̈ܚܰܝܶܐ ܕܶܠܥܳܠܰܡ. ܫܪܳܠܳܐܝܳܐ ܐܺܝ ܡܶܠܬܳܐ ܘܟܳܒܰܥ ܐ̱ܢܳܐ ܕܗܰܬ ܣܬܶܐ ܕܶܡܩܰܪܪܰܬ ܐܰܥܠܰܝܝܶܐ، ܠܰܫܰܢ ܐܰܝܢܰܐ ܕܶܡܗܰܝܡܰܢܢܶܐ ܒܰܐܠܳܗܳܐ ܕܣܰܝܡܺܝ ܥܡ̈ܰܠܰܬ ܛܳـ̈ܘܶܐ. ܡܺܝܕ̥ܶܐ ܕܰܡ̈ܡܶܕܳܢܰܐܢܺܝ ܛܳܘ̈ܶܢܶܐ ܘܡܰܢܦ̈ܥܳܢܶܐܢܶܐ ܠܰܐܢ̈ܢܳܫܶܐ. ܡܽܘ ܡܰܗܘܳܐ ܘܫܩܳܠܳܐ ܕܺܐܝ ܣܰܟ̣ܠܽܘܬ̣ܳܐ، ܘܡܰܐ ܬܰܫܥܝܳ̈ܬ̣ܳܐ ܕܰܫܰܪ̈ܒܳܬ̣ܳܐ، ܘܡܰܐ ܥܰܟ̈ܣܺܝܰܬ ܘܡܰܐ ܩܪ̈ܳܒܶܐ ܕܰܐܩܰܪ̈ܳܝܶܐ ܪܚܰܩ. ܡܰܢܦܰܥܰܐ ܠܰܝܬ ܐܰܒܒܶܗ ܘܒܰܛܶܠ̈ܢܶܐ. ܡܽܐܘ ܓܰܘܪܳܐ ܗܶܪܶܛܺܝܩܳܐ، ܒܶܬ̣ܬ̣ܶܪ ܡܶܕ ܐ̱ܡܶܪܠܳܟ ܠܶܗ ܢܰܩܩܰܐ ܘܬܰܪܬܶܐ، ܪܚܰܩ ܡܶܢܶܗ. ܘܺܝܕܰܥ ܡܰܢ ܕܗܰܘܟ̣ܰܐܝܳܐ ܥܘܺܝܔܳܝܳܐ ܘܟܳܚܳܛܶܐ. ܘܗܽܘܘܶܐ ܕܶܢܠܶܗ ܪܽܘܚܶܗ. ܡܶܕ ܡܫܰܕܰܪܠܺܝ ܣܺܝܕܳܟ ܐܰܪܛܺܝ̣ܡܳܘܣ ܐܰܘ ܛܽܘܟܺܝܩܳܘܣ ܡܰܠܶܙ ܕܳܐܬ̣ܰܬ ܣܺܝܕܺܝ ܠܢܺܝܩܽܘܦܳܠܺܝܣ، ܬܰܡܳܐ ܡܰܚܰܬܠܺܝ ܒܗܰܘܢܺܝ ܕܡܰܥܒܰܪܢܳܐ ܐܽܘ ܣܰܬ̣ܘܳܐ. ܗܰܘ ܠܙܺܝܢܰܐ ܐܽܘ ܩܰܪܳܝܳܐ ܘܠܰܐܦܳܠܽܘ ܐܽܘ ܡܶܕܶܐ ܕܡܶܣܢܳܩܺܝ ܠܽܐܘ ܕܰܪܒܳܐ ܕܡܶܕܶܐ ܠܳܐ ܢܳܩܶܨ ܐܰܥܠܰܝܝܶܐ. ܠܰܫܰܢ ܕܝܶܠܦܺܝ ܗܰܢܺܝ ܕܺܝܕܰܢ، ܘܣܰܝܡܺܝ ܥܡ̈ܰܠܰܬ ܛܳـ̈ܘܶܐ ܒܺܐܝ ܣܢܺܝܩܽܘܬ̣ܳܐ ܕܶܓܠܶܙܡܳܐ. ܚܰܬܬܰܐ ܕܠܳܗ̱ܘܶܢ ܕܠܳܐ ܦܺܐܪ̈ܶܐ. ܗܰܢܺܝ ܕܰܐܥܡܺܝ ܟܽܠܠܶܗ، ܟܳܡܫܰܝܠܺܝ ܒܽܐܘ ܫܠܳܡܰܝܕܳܟ. ܡܫܰܐܶܠܽܘ ܒܽܐܘ ܫܠܳܡܳܐ ܕܰܐܝܢܰܐ ܕܟܳܪܳܚܡܺܝܠܰܢ ܒܺܐܝ ܗܰܝܡܳܢܽܘܬ̣ܳܐ. ܛܰܝܒܽܘܬ̣ܳܐ ܥܰܡ ܟܽܠܟ̣ܽܘ ܐܰܡܺܝܢ܀