ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܐ
ܓ: ܐ ـ ܝܘ܇ ܕ: ܐ ـ ܚ 1Timothy 3:1-16, 4:1-8

ܫܪܳܠܳܐܝܳܐ ܐܺܝ ܡܶܠܬ̣ܳܐ. ܐܺܝܕ̥ܰܐ ܐ̱ܢܳܫܳܐ ܕܪܳܝܰܓܠܶܗ̱ ܩܰܫܽܘܬ̣ܳܐ، ܥܰܡܰܠ ܛܳܘܳܐ ܓܪܳܝܶܓ. ܓܡܰܘܔܰܒ ܠܶܗ ܠܽܐܘ ܩܰܫܺܝܫܳܐ، ܕܗܳܘܶܐ ܕܠܳܐ ܥܰܝܒܳܐ. ܘܓܰܘܪܳܐ ܕܶܚܕܳܐ ܐܰܢ̱ܬ̣ܬܳܐ. ܘܨܳܝܶܕ ܪܽܘܚܶܗ̱ ܥܰܐܩܶܠ. ܡܐܰܕܒܳܐ ܘܪܰܚܳܡܳܐ ܕܰܢܽܘܟܪ̈ܳܝܶܐ، ܘܪܰܚܳܡܳܐ ܕܽܐܘ ܝܽܘܠܦܳܢܳܐ. ܠܳܐ ܡܕܰܘܶܡ ܥܰܠܽܐܘ ܚܰܡܪܳܐ. ܠܳܐ ܪܳܗܛܳܐ ܐܺܝ̣ܕܶܗ ܠܽܐܘ ܡܚܳܝܳܐ. ܐܶܠܳܐ ܕܗܳܘܶܐ ܡܰܟܺܝ̣ܟ̣ܳܐ، ܘܠܳܐ ܡܩܰܬܠܳܢܳܐ. ܘܠܳܐ ܪܰܚܳܡܳܐ ܕܰܙܽܘ̈ܙܶܐ. ܡܕܰܒܶܪ ܐܽܘ ܒܰܝܬܰܝܕܶܗ ܫܰܦܺܝܪܳܐ. ܘܨܳܝܶܕ ܐܰܢܢܰܒ̈ܢܰܝܕ̥ܶܗ ܒܢܰܕ̥ܰܐܦܰܐ ܘܒܐܰܕܰܒ. ܐܺܝܕܰܐ ܐܽܘ ܒܰܝܬܰܝܕ̥ܶܗ ܕܠܳܐ ܩܳـܕܶܪ ܡܕܰܒܶܪ ܫܰܦܺܝܪܳܐ، ܐܰܝܕܰܪܒܳܐ ܓܩܳܕܶܪ ܐܺܝ ܥܺܕ̱ܬܳܐ ܕܰܐܠܳܗܳܐ ܡܕܰܒܶܪ؟ ܠܳܗ̱ܘܶܐ ܚܰܕ̱ܬ̣ܳܐ ܒܺܐܝ ܗܰܝܡܳܢܽܘܬ̣ܳܐ، ܕܠܶܙܙܶܐ ܗܳܘܶܐ ܪܳܡܳܐܢܳܐ، ܘܢܳܦܶܠ ܒܽܐܘ ܚܶܟܶܡ ܕܽܐܘ ܫܺܐܕܳܐ. ܓܠܳܙܶܡ ܣܬܶܐ ܕܗܳܘܶܐ ܠܶܗ ܣܰܗܰܕܰܐ ܫܰܦܺܝܪܬܳܐ ܡܰܢ ܕܠܰܪܘܰܠ، ܠܰܫܰܢ ܕܠܳܐ ܢܳܦܶܠ ܒܽܐܘ ܥܰܝܒܳܐ ܘܒܰܐܦܰܚ̈ܶܐ ܕܽܐܘ ܫܺܐܕܳܐ. ܗܰܘܟ̣ܰܐ ܣܬܶܐ ܐܰܫܰܡܳܫ̈ܶܐ ܛܪܳܘܶܢ ܢܰܕ̥ܺܝ̣̈ܦܶܐ، ܘܠܳܐ ܡܶܔܓ̥ܳܠܺܝ ܒܶܬܪܶܐ ܠܶܫܳܢ̈ܶܐ. ܛܪܳܐ ܠܳܐܗ̱ܘܶܐ ܐܽܘ ܡܰܝܠܰܬ̥ܬ̥ܶܗ ܠܐܽܘ ܚܰܡܪܳܐ ܓ̥ܰܠܰܒܐ. ܘܠܳܐܗ̱ܘܶܢ ܪ̈ܰܚܳܡܶܐ ܕܺܐܝ ܦܰܝܕܰܐ ܚܰܪܰܐܡ. ܐܶܠܳܐ ܕܨܰܝܕܺܝ ܐܽܘ ܐ̱ܪܳܙܳܐ ܕܺܐܝ ܗܰܝܡܳܢܽܘܬܳܐ ܒܢܺܝܰܐ ܛܳܘܬܳܐ. ܗܰܢܺܝ ܒܺܐܝ ܩܰܡܰܝܬܳܐ ܛܪܳܐ ܡܶܒܚܳܪܺܝ، ܐܺܝܕ̥ܰܐ ܕܗܳܘܶܢ ܕܠܳܐ ܥܰܝܒܳܐ، ܛܪܳܐ ܟ̥ܽܘܕܡܺܝ. ܗܰܘܟ̣ܰܐ ܐܰ ܢܺܝ̈ܫܶܐ ܣܬܶܐ ܛܪܳܗ̱ܘܶܢ ܢܰܟ̈ܦܳܬ̣ܳܐ. ܘܗܰܘܢܰܝܝܶܗ ܡܰܚܺܝ̣ܣܳܐ. ܡܗܰܝ̈ܡܢܶܐ ܒܟܽܠ ܡܶܕܶܐ. ܠܳܗ̱ܘܶܢ ܣܰܝܳܡ̈ܶܐ ܕܺܐܝ ܦܶܛܢܰܐ. ܘܰܐ ܫܰܡܳܫ̈ܶܐ، ܛܪܳܗ̱ܘܶܢ ܐܰܝܢܰܐ ܕܗܰܘܺܝ ܠܶܗ ܚܕܳܐ ܐܰܢܬܬ̥ܳܐ. ܘܡܕܰܒܰܪ ܠܶܗ ܐܰܢ̈ܢܰܒܢܰܝܕ̥ܶܗ، ܘܐܽܘ ܒܰܝܬܰܝܕ̥ܶܗ ܫܰܦܺܝܪܳܐ. ܐܰܝܢܰܐ ܕܟܳܟ̥ܽܘܕܡܺܝ ܫܰܦܺܝܪܳܐ، ܕܰܪܓ̣ܳܐ ܛܳܘܳܐ ܟܫܳܩܠܺܝ ܠܪܽܘܚܰܝܝܶܐ. ܘܓ̥ܰܠܰܒܶܐ ܦܳـ̈ܬ̣ܳܬ̣ܶܐ ܓܰܠ̈ܝܶܐ ܒܺܐܝ ܗܰܝܡܳܢܽܘܬ̣ܳܐ ܕܝܶܫܽܘܥ ܡܫܺܝ̣ܚܳܐ. ܗܰܢܺܝ ܟܬ̣ܽܘܠܺܝ ܠܳܟ، ܘܟܶܬܠܺܝ ܣܰܒܪܳܐ ܕܥܰܠ ܩܰܪܺܝܘܳܐ ܐܳܬ̣ܶܐ ܐ̱ܢܳܐ ܣܺܝܕܳܟ. ܘܶܐܢ ܕܡܺܝ̣ܥܰܘܰܩ ܐ̱ܢܳܐ، ܠܰܫܰܢ ܕܶܐܕܥܰܬ ܐܰܝܕܰܪܒܳܐ ܫܰܦܺܝܪܳܝܳܐ ܕܡܺܝܣܶܡ ܒܽܐܘ ܒܰܝܬܳܐ ܕܰܐܠܳܗܳܐ ܕܟܶܬܝܳܐ ܐܺܝ ܥܺܕ̱ܬܳܐ ܕܰܐܠܳܗܳܐ ܐܽܘ ܚܰܝܳܐ، ܐܽܘ ܥܰܡܽܘܕܐ ܘܺܐܝ ܫܶܬܶܐܣܬܳܐ ܕܽܐܘ ܫܪܳܪܳܐ. ܒܰܫܪܳܪܳܐ ܪܰܒܳܐܝܳܐ ܐܽܘ ܐ̱ܪܳܙܳܐ ܕܺܐܝ ܟܺܐܢܽܘܬ̣ܳܐ، ܕܶܓܠܶܐ ܒܽܐܘ ܔܰܣܰܕ، ܘܡܙܰܕܶܩ ܒܺܐܝ ܪܽܘܚܳܐ، ܘܚܙܶܐ ܠܰܡܰܠܐܰܟ̥̈ܶܐ ܘܟܪܺܝ̣ܙ ܒܰܝܢܰܐ ܥܰܡ̱̈ܡܶܐ، ܘܡܗܰܝܡܶܢ ܒܽܐܘ ܥܳܠܡܳܐ ܘܣܰܠܶܩ ܒܫܽܘܒܚܳܐ. ܒܰܪܶܟ̥ܡܳܪܝ܀