ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܐ: ܐ ـ ܝܒ 1Corinthians 16:1-12

ܥܰܠܽܘ ܡܶܕܶܐ ܕܟܳܠܳܝܶܡ ܠܰܐ ܩܰܕܺܝ̣̈ܫܶܐ، ܟ̣ܶܕ ܡܳܨܶܐ ܠܺܝ ܐܰ ܥܺـ̈ܕܳܬ̣ܳܐ ܕܰܓܰܠܰܛܳܝ̈ܶܐ، ܗܰܘ̣ܟܰܐ ܣܽܘܡܽܘ ܗܰܐܬܽܘ ܣܬܶܐ. ܒܟܽܠ ܚܽܘܫܰܒܳܐ. ܛܪܳܐ ܟܽܠ ܚܰܕ̱ ܡܶܢܟ̣ܽܘ ܦܳܪܶܫ ܘܢܳܛܶܪ ܒܽܐܘ ܒܰܝܬܰܝܕ̥ܶܗ، ܐܽܘ ܡܶܕܶܐ ܕܡܳܛܶܐ ܒܺܐܝܕܶܗ . ܘܠܳܐ ܡܶܕ ܐܰܬ̣ܺܝܢܳܐ، ܗܳܘܶܐ ܐܽܘ ܬܶܠܬܺܝܡܳܐ. ܡܶܕ ܐܰܬ̣ܺܝ ܐ̱ܢܳܐ، ܐܰ ܙܰܕܰܩܰܬ̣̈ܟ̣ܽܘ ܓܶܡܫܰܕܰܪ ܐ̱ܢܳܐ ܠܶܢ ܥܰܡ ܐܶܓܰܪܬ̥ܳܐ ܠܽܐܘܪܶܫܠܶܡ، ܒܺܐܝܕܶܗ ܕܰܐܝܢܰܐ ܕܗܰܬܽܘ ܡܢܰܩܶܝܬܽܘ. ܐܶܢ ܟܫܳܘܶܐ ܐܽܘ ܫܽܘܓ̣ܠܳܐ ܕܶܐܙܙܺܝ ܐ̱ܢܳܐ ܐܳܢܳܐ ܣܬܶܐ܆ ܐܰܥܡܺܝ ܓܶܐܙܙܶܢ. ܡܶܕ ܥܰܒܶܪ ܐ̱ܢܳܐ ܒܡܰܩܶܕܽܘܢܝܰܐ ܓܕܳܬ̣ܶܐܢܳܐ ܣܶܬܟ̣ܽܘ. ܥܰܠ ܕܶܒܡܰܩܶܕܽܘܢܝܰܐ ܓܥܳܒܰܪ ܐ̱ܢܳܐ. ܒܰܠܟܺܝ ܦܳܝܰܫ ܐ̱ܢܳܐ ܣܶܬܟ̣ܽܘ، ܘܡܰܥܒܰܪܢܳܐ ܐܽܘ ܣܰܬ̣ܘܳܐ ܣܬܶܐ ܓܰܒܰܝܟ̥ܽܘ. ܠܰܫܰܢ ܕܗܰܬܽܘ ܡܫܰܕܪܺܝܬܽܘܠܺܝ ܠܺܐܝ ܕܽܘܟܬ̣ܳܐ ܕܶܐܙܙܺܝ ܐ̱ܢܳܐ. ܠܶܓܒܰܥ ܐܢܳܐ ܟ̣ܶܕ ܥܰܒܳܪܳܐ ܕܕܰܪܒܳܐ ܚܳܙܶܐ ܐܢܳܐ ܠܟ̣ܽܘ. ܟܶܬܠܺܝ ܣܰܒܪܳܐ، ܕܦܳܝܰܫ ܐ̱ܢܳܐ ܣܶܬܟ̣ܽܘ، ܐܶܢ ܡܪܰܟ̣ܰܨܠܶܐ ܠܺܝ ܠܽܐܘ ܡܳܪܰܝܕܺܝ. ܥܰܠ ܕܓܶܦܳܝܰܫ ܐ̱ܢܳܐ ܒܶܐܦܶܣܽܘܣ ܗܽܘܠ ܦܰܢܛܺܝܩܽܘܣܛܺܝ. ܡܺܝܕ̥ܶܐ ܕܬܰܪܥܳܐ ܪܰܒܳܐ ܦܬܺܝ̣ܚ ܐܶܠܺܝ ܘܡܰܠܝܳܐ ܫܽܘ̈ܓ̥ܠܳܢܶܐܝܳܐ. ܘܕܟܳܩܰܝܡܺܝ ܡܩܰܒܶܠ ܓ̥ܰܠܰܒܶܢܶܐ. ܐܺܝܕ̥ܰܐ ܐܰܬ̣ܺܝ ܛܺܝܡܳܬ̣ܶܐܘܳܣ ܣܶܬܟ̣ܽܘ، ܢܛܰܪܽܘܠܠܶܗ ܕܦܳܝܶܫ ܓܰܒܰܝܟ̥ܽܘ ܕܠܳܐ ܙܽܘܥܬ̣ܳܐ. ܥܰܠ ܕܟܳܣܳܝܶܡ ܐܽܘ ܫܽܘܓ̥ܠܳܐ ܕܽܐܘ ܡܳܪܝܳܐ ܟ̣ܳܐܬ̣ܺܝ. ܐ̱ܢܳܫܳܐ ܠܳܐ ܡܚܰܩܰܪ ܠܶܗ. ܐܶܠܳܐ ܡܫܰܕܶܪܽܘܠܠܶܗ ܒܶܫܠܳܡܳܐ ܕܳܐܬ̣ܶܐ ܓܰܒܺܝ. ܥܰܠ ܕܟܳܢܳܛܰܪ ܐ̱ܢܳܐ ܠܶܗ ܥܰܡܰܐ ܐܰܚ̈ܶܐ. ܡܶܐ ܐܰܦܳܠܽܘ ܐܽܘ ܐܰܚܳܐ ܐܰܒܶܥ ܐ̱ܢܳܐ ܓ̥ܰܠܰܒܶܐ ܕܳܐܬܶܐ ܣܶܬܟ̣ܽܘ ܥܰܡܰܐ ܐܰܚ̈ܶܐ. ܠܰܐܗ̱ܘܺܝ ܠܶܗ ܨܶܒܝܳܢܳܐ ܕܳܐܬ̣ܶܐ ܣܶܬܟ̣ܽܘ ܐܽܘܥܕܳܐ. ܐܶܠܳܐ ܐܺܝ ܢܰܩܩܰܐ ܕܶܡܥܰܘܶܢ ܐܽܘ ܙܰܒܢܳܐ ܓܶܕܐܳܬ̣ܶܐ ܒܰܪܶܟ̥ܡܳܪܝ܀