ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܐ
ܒ: ܐ ـ ܝܗ 1Timothy 2:1-15

ܟܳܒܰܥ ܐ̱ܢܳܐ ܡܶܢܳܟ̣ ܡܶܩܶܡ ܡܶܐܟܽܠ ܡܶܕܶܐ، ܕܶܡܩܰܕܡܰܬ ܠܰܐܠܳܗܳܐ ܛܰܠܰܒܺܐܝܶܐ ܘܨܠܽܘܬ̣ܳܐ ܘܪܰܐܔܰܐ ܘܬܰܘܕܺܝܬ̣ܳܐ ܡܶܚܠܰܦ ܟܽܠܠܶܗ ܐܰܢ̈ܢܳܫܶܐ. ܡܶܚܠܰܦ ܐܰ ܡܰܠܟ̈ܶܐ ܘܰܐ ܪ̈ܺܝ̣ܫܳܢܶܐ. ܠܰܫܰܢ ܕܡܰܥܒܪܺܝ̣ܢܰܐ ܚܰܝ̈ܶܐ ܡܐܰܡ̈ܢܶܐ ܘܣܰܐܟܶܢ، ܒܟܽܠܰܗ̱̇ ܐܺܝ ܙܽܘܥܬ̣ܳܐ ܕܰܐܠܳܗܳܐ ܘܒܢܰܕ̥ܰܐܦܰܐ. ܡܺܝܕ̥ܶܐ ܕܗܰܬ̣ܶܐ ܫܰܦܺܝܪܬܳܐ ܘܡܰܩܒܰܠܬܳܝܳܐ ܩܶܡ ܐܰܠܳܗܳܐ ܐܽܘ ܡܰܟ̣ܠܨܳܢܰܝܕ̥ܰܢ. ܗܰܘܳܐ ܕܟܳܒܶܥ ܕܟܽܠܠܶܗ ܐܰ ܐ̱ܢܳܫ̈ܶܐ ܕܟ̥ܳܠܨܺܝ، ܘܠܽܐܘ ܡܰܕ̥ܥܳܐ ܕܽܐܘ ܫܪܳܪܳܐ ܕܳܐܬ̣ܶܢ. ܡܺܝܕ̥ܶܐ ܕܚܰܕ̱ܝܳܐ ܐܰܠܳܗܳܐ. ܘܚܕ̥ܳܐܝܳܐ ܐܺܝ ܘܰܨܺܝ̣ܛܰܐ، ܒܰܝܢܰܐܠܳܗܳܐ ܘܠܰܐܢ̈ܢܳܫܶܐ، ܗܰܘܳܐ ܕܟܶܬܝܳܐ ܝܶܫܽܘܥ ܡܫܺܝ̣ܚܳܐ ܕܗܰܘܺܝ ܐ̱ܢܳܫܳܐ. ܗܰܘܳܐ ܕܗܽܘܠܶܗ ܪܽܘܚܶܗ ܟ̣ܰܠܰܐܨ ܡܶܚܠܰܦ ܟܽܠ ܐ̱ܢܳܫܳܐ. ܘܺܐܝ ܣܳܗܕܽܘܬ̥ܰܬ̥ܶܐ ܐܰܬ̣ܝܳܐ ܒܽܐܘ ܙܰܒܢܰܝܕ̥ܰܗ̱̇. ܗܰܝܳܐ ܕܳܐܢܳܐ ܡܰܚܰܬ ܐ̱ܢܳܐ ܐܽܘ ܟܰܪܳܙܰܝܕ̥ܰܗ̇ ܘܽܐܘ ܫܠܺܝܚܰܝܕ̥ܰܗ̱̇. ܫܪܳܪܳܐ ܟܳܐܡܰܪ ܐ̱ܢܳܐ ܘܠܳܐ ܟܳܡܕܰܓܰܠ ܐ̱ܢܳܐ. ܗܰܘܺܝ ܐ̱ܢܳܐ ܡܰܠܦܳܢܳܐ ܕܰܥܰܡ̈ܶܐ ܒܺܐܝ ܗܰܝܡܳܢܽܘܬ̣ܳܐ ܕܽܐܘ ܫܪܳܪܳܐ. ܟܳܒܰܥ ܐ̱ܢܳܐ ܕܶܡܨܰܠܶܢ ܐܰ ܓܰܘܪ̈ܶܐ ܒܟܽܠ ܕܽܘܟܬ̣ܳܐ. ܘܡܰܥܠܶܢ ܐܺܝ̣ܕ̥ܰܝ̈ܝܶܐ ܒܢܰܕ̥ܰܐܦܰܐ ܕܠܳܐ ܪܽܘܓܙܳܐ ܘܕܠܳܐ ܡܔܰܕܰܠܰܐ. ܘܗܰܘܟ̣ܰܐ ܣܬܶܐ ܐܰ ܢܺܫ̈ܶܐ. ܕܡܰܫܶܦܪܺܝ ܪܽܘܚܰܝܝܶܐ ܒܽܘܠܘܳܫܳܐ ܕܽܐܘ ܐܰܕܰܒ، ܘܕܺܐܝ ܙܽܘܥܬ̣ܳܐ ܕܰܐܠܳܗܳܐ، ܘܕܺܐܝ ܢܶܟܦܽܘܬ̣ܳܐ. ܠܳܐ ܒܰܓ̈ܶܕ̥ܰܠܰܬ، ܘܒܽܐܘ ܕܰܗܘܳܐ، ܘܒܰܡܰܪ̈ܓܳܢܝܳܬ̣ܳܐ، ܘܒܽܐܘ ܠܘܳܫܳܐ ܕܟܶܬܝܳܐ ܒܛܺܝ̣ܡܳܐ. ܐܶܠܳܐ ܒܰܥܡ̈ܰܠܰܬ ܛܳܘ̈ܶܐ. ܟ̣ܶܕ ܓܡܰܠܶܩ ܠܰܢܢܶܫ̈ܶܐ ܕܶܡܘܰܥܕܺܝ (ܕܟܶܬܬܶܐ) ܙܽܘܥܬ̣ܳܐ ܕܰܐܠܳܗܳܐ. ܛܪܳܐ ܝܶܠܦܳܐ ܐܺܝ ܐܰܢ̱ܬ̣ܬܳܐ ܟܠܺܝܬ̣ܳܐ ܘܒܟܽܠ ܛܰܐܥܰܐ. ܐܶܠܳܐ ܠܳܐ ܓܡܪܰܟ̣ܰܣ ܐ̱ܢܰܐ ܠܺܐܝ ܐܰܢ̱ܬ̣ܬܳܐ ܕܡܶܠܦܳܐ، ܘܠܳܐ ܕܡܺܝ̣ܫܰܠܛܳܐ ܥܰܠܽܘ ܓܰܘܪܳܐ. ܐܶܠܳܐ ܕܗܽܘܝܳܐ ܟܠܺܝܬ̣ܳܐ. ܡܺܝܕ̥ܶܐ ܕܳܐܕܳܡ ܒܺܐܝ ܩܰܡܰܝܬܳܐ ܟ̣ܠܺܝܩ ܘܒܶܬ̥ܬ̥ܶܪ ܚܰܘܳܐ. ܐܳܕܳܡ ܠܳܐ ܛܰܥܺܝ. ܐܶܠܳܐ ܐܺܝ ܐܰܢ̱ܬ̣ܬܳܐ ܛܰܥܝܳܐ، ܘܥܰܒܺܝܪܳܐ ܥܰܠܽܘ ܘܰܨܺܐܝܶܐ. ܐܶܠܳܐ ܓܟ̣ܳܠܨܳܐ ܒܺܐܝ ܘܰܐܨܺܝܛܰܐ ܕܰܐܢܢܰܒܢܰܝ̈ܕ̥ܰܗ̇، ܐܶܢ ܕܦܰܝܫܺܝ ܒܺܐܝ ܗܰܝܡܳܢܽܘܬ̣ܳܐ ܒܺܐܝ ܚܽܘܒܳܐ ܘܒܺܐܝ ܩܰܕܺܝܫܽܘܬ̣ܳܐ ܘܒܺܐܝ ܢܰܕ̥ܰܐܦܰܐ. ܒܰܪܶܟ̥ܡܳܪܝ܀